الاثنين، 30 نوفمبر 2009

كان عندى حلم


كان ليه حلم

كان عندى حلم ...
كنت ماسكه فى إيدى ومتبت عليه

كان عندى حلم ...
وفى زحمة المترو إتحدف ومش لاقيه


كان ليه حلم فى لحظة تاه

وضاع فى دوامة الحياة

حلمى اللى عايش عمرى بيه
لو حد فيكوا فى يوم لقاه
يشيله ويخليه معاه ...
وأنا كل يوم أسأل عليه


أنا حلمى أخضر وبضفاير

وبمريلة بنى بأساور
كتبه شايلها فى شنطة خيش
عايش فى أودة عالسطوح
مبسوط وراضى ملوش طموح
غير إنه بس فى يوم يعيش


كان ليه حلم فى لحظة تاه
وضاع فى دوامة الحياة

حلمى اللى عايش عمرى بيه
لو حد فيكوا فى يوم لقاه
يشيله ويخليه معاه ...
وأنا كل يوم أسأل عليه


أنا حلمى عادى شكله عادى
وملهش سابقة فى أى ماضى
متربى عارف ربنا
هييجى له فين بس الأعادى
دا لا عنده مال ولا له أراضى
وملوش مكان غير قلبى أنا

***

دى أغنيه جميلة للفريق الأجمل بلاك تيما
نشرتها ليه يابنى؟؟؟؟
بس
عشان لاحظت تصرفات غريبة لبعض الناس الفترة اللى فاتت
الناس مش عايزة تدافع عن أحلامها ولا عايزة تستمر
ولا عايزة تستحمل الحياة
حتى لو فى قيود
أو فى أى شىء معطلنا

تفتكروا لو دققنا النظر فى الصورة اللى فوق دى كويس
المفروض نبقى مين فى اللى فى الصورة
الجدار اللى هما ساندين عليه
أقوى ومستمر
صحيح مش مشهور
ولا معروف

بس ليه دور خطير فى الحياة
ومن غيره مكانش هيبقى فى حاجات كتير أوى
وثابت وصامد
برغم المشكلات اللى بتواجهه
برغم الأزمات اللى بتمر عليه

برغم إنه أحيانا بيفقد روح الشىء اللى بيحبها فيه
مينفعش الواحد يقف يبكى
ويقول خلاص
حتى لو الأصدقاء سابوه
والأحبه إتغش فيهم ببساطة
والقرايب طمعوا فيه
من الآخر كدا
إستمروا
لا هما هيكونوا آخر ناس الواحد يتخدع فيهم

ولا هيكونوا أول ناس الواحد يحبهم ويفارقوه
ولا هيكونوا أول غيمة تعكر صفو حياتنا

سيبوكوا بقى من الجدار

حلوة سيبوكوا دى :D

الواحد زى الصورة كدا معاه أصحابه

صحيح أنا معنديش صحاب

بس عايش مبسوط

فى منكم من الأخوة المتنكدين ليه صحاب

يبقى ليه نزعل مادام ممكن نفرح

يعنى هنعيش دور اللى بيخسر

ونعيش زعلانين

ونعيش لوحدينا

وقرفانين

خد يا وديع إعمل الفيلم دا :D

فى السنة اللى رفضنا فيها النكد

قدمنا :)

هاكونا مطاطا

مدونات عربى ...أم الأجنبى :)

شكلى قلبت على تهامى باشا

ههههههههههههههههههههههههه

كل سنة وإنتوا طيبين وإلى الله أقرب


ها حد سمع الأغنيه وإنبسط

حد فكر مرة تانية

حد قال إنه هيفضل كويس وصامد وبخير

طيب فى هدايا للشطار

كابتشينو كرمللة :D

أربع فناجيل أهم زى السكر :)

ربنا يفتح نفس الجميع عالحياة

ملحوظة : اللى هياخد فنجان هيدفع دمغة سبعتاشر جنيه وتلاتين قرش ويسيب رهن الفنجان :)

الحق حق

:) :) :)

وبقول لأى حد بيحب النكد

هنفضل جمبك غصبن عن عين سعادتك:)

الكلام موجه لناس كتير أوى أوى أوى

المهم كل واحد يفهم إن ما كتب هنا موجه ليه :)

شاب فقرى

السبت، 28 نوفمبر 2009

الحقيقة المنيلة بنيلة


السلام عليكم

هابى خروف

وعيد سعيد عليكم

قلت أكتب بوست خفيف كدا عشان العيد ومحدش فاضى يقرا

شفت من شوية فيلم بنفس إسم البوست دا The Ugly Truth

الحقيقة البشعة او المرة او المنيلة بنيلة

بيتكلم عن حقيقة الحب والعلاقات الشخصية بين الراجل والست

صراحة الفيلم عجبنى

أينعم فيه جزء العقلية فيه زبالة

لكن ما شاء الله بقيت الفيلم فيه كام جزء مهم

يعنى مثلا الراجل البطل اللى فى الفيلم بينصح البطله

ويقولها الرجال لا يحبون الانتقاد لان الانتقاد بيسبب لهم الصداع والقلق وضعف الثقة

وكمان بيقولها بلاش تحاولى تسيطرى عالموقف عشان هتبقى غبية تماما

صراحة عجبنى اوى الكلمتين دول

حاجة واضحة وصريحة ومن الآخر

لان محاولة المرأة للسيطرة عالموقف هتبقى فاشلة لان بعض الرجال بترفض دا

وكمان لان قوة المرأة فى ضعفها

عشان كدا بعتبرها أقوى مخلوق خلقه ربنا

بعقلها وتفكيرها وضعفها وهدوءها

يعنى من غير ما تحاول تنتقد أو تسيطر عالراجل فهى كالعادة هتلاقى نفسها مسيطرة عليه لما تعامله كويس
وكمان تبقى حنونه

هيخاف عليها ويحبها ويقدرها

الله عليه كدا لما بقول فى حكم

وكمان عجبنى
أوى أوى أوى أوى أوى أوى مشهد الرقص اللى جايب منه لقطة الصورة دى

وربنا وربنا وربنا كمان مرة فكرنى بانى فى مرة كنت بفكر إنى أبقى أعزم خطيبتى على حفلة سلو كدا

يلا انا كدا خلصت كلام

مش عايزين إنتقادات من البنات بقى :D

كل سنة وإنتم طيبين

شاب فقرى

الجمعة، 27 نوفمبر 2009

ما بلاش نتكلم بصراحة ...


السلام عليكم جميعا
عيد سعيد :)
وهابى خروف
وهابى عجل
وكل الحاجات الحلوة دى
فى فى مخى ألف حوار عايز أتكلم فيهم
فبدل ما أنزل بكام بوست والناس تقلق وتقرا ومتبقاش عارفة تعلق فين ولا فين
فأنا هكتب كله ورا بعضه
العنوان العام (( ما بلاش نتكلم بصراحة ...))
ليه ؟؟؟
(( لأنى هبطل صراحة وهتكلم ببجاحة :D ))
ليه ؟؟؟
(( لأنى مبحبش أكدب ولا أذوق الكلام ولا بحب أعمل كدا بالرغم من براعتى فى الموضوع دا ))

نبدأ على بركة الله

السفر

طبعا والحمد لله يوم الوقفة كان يوم مشحون وحافل بألف حوار ومش عارف طلعوا لى منين
والمشكلة الأكبر بالنسبة لى
إنى عايز أعيد بدقنى دى
وفى نفس الوقت مش عايز أعيد بيها
والحلاق زحمة
وكمان لازم أسافر بعد الفطار
ميت حاجة فى دماغى
الحمد لله اتصرفت ومش حلقتها برده
لقيت شكلى عامل زى اللى مكتئب و مش طايق نفسه
قصرتها شوية وظبطت المنظر وقلت طير يا كرمللة
خرجت من القاهرة ووصلت البلد بليل والحمد لله
كالعادة أول بيت بدخله بيت عمى
بالرغم من إنهم كانوا مدايقين لأنى بقالى كتير مروحتش لكن رحبوا بيه وأنا شوية وخلعت
ولفت نظرى أول ما وصلت البلد عربية قصب برا
روحت إشتريت قصب بسعر أنا مكنتش ممكن أتخيل إنى أدفعه فى شوية قصب
بس الحمد لله
كان زى السكر
وشوية ولفينا فى البلد مع صحاب إبن عمى
وإتكلمنا فى كل حاجة حتى الجزائر ومصر وعبد الناصر وكلام كتير أوى
وروحت مع إبن عمى التانى
وطلعت الفلاشة بتاعتى
وبدأت حفلة سينما ل saw 6
طبعا فيلم رهيب وعجبتنى النهاية أوى أوى أوى
كانت الساعة سته الصبح
خرجت أتمشى مع نفسى وألف فى البلد وطلعت عالغيطان ولفيت فيها شوية
وبعدين روحت تانى
حسيت إنى كنت بحرق فى أعصابى
بتلف فيها أكبر قدر ممكن من التلف عشان أقدر أناملى ساعة وأقدر أصحى أصلى العيد


رجال ... لا نعرف المستحيل
روحنا العيد
زى ما كانوا زمان بيقولوا لنا هتروحوا العيد يا ولاد ؟؟؟ ويضحكوا علينا وإحنا نقول ببراءة الأطفال آه :D
هوا دا اللى حصل على ما صحيت وسحبت نص عود قصب أفطر بيه
بس ملحقتش
على ما جهزوا اللبن وفطرنا والحمد لله بدأ اليوم بزوبعة من أولاد عمى زى الفل
قلق قلق قلق
قلق ممتع ولذيذ ميعرفش معناه أى حد فى الدنيا غيرى
تقريبا كنت نمت ساعة
بس قدرت بكفاءة إنى أخرج نفسى من أى مود زى ما أنا متعود :)
والله يا كريم يابنى برافو عليك
وشوية وعرفت بالصدفة أن عمتى اللى فى البلد اللى جمبنا
هيدبحوا النهارده عجل محترم :)
طبعا ركبنا نمر العربية ولبسنا الحمار وركبنا العربية وشرخنا
ويا سلام بقى اللى يشوفنى وأنا راكب العربية دى والتناكة اللى بكون فيها
تقولش راكب دبابة أو هامر
المهم
وصلنا ونزلت وشوفت الضحية
وشوية وقلعت بقى
والشاب التنك اللى كان راكب العربية دا تقدروا تقولوا إتقلب 180 درجة بقى حاجة تانية
بقى الواد كوكو صبى الجزار
طبعا لأننا منعرفش الجزارين وعاملين مقاطعة وبنشجع الإنتاج المحلى
فمكانش فى غيرنا يقوم بالمهمة دى
أنا وعمى وجوز عمتى
طبعا إحنا نقدر نجيب جزار فى دقيقة
ونخلص نفسنا ونقف نتفرج زى البهوات والشاب التنك اللى كان راكب العربية من شوية
بس مينفعش
مبدأ العمل وإن الواحد يتعب عشان يحس بحلاوة الشىء
وكمان تعبنا دا بيحسسنا براحة غريبة فى الآخر
طبعا مش أهل بلدنا كلهم كدا ولا عيلتنا كلها كدا
قلة قليلة زى حالاتى كدا
بيتهيألى لو مصر قررت تطلق قمر صناعى جديد
ياريت توكللنا المهمة دى :D
وربنا ساعتها هسميه (( كرمللة 707)) لانى بحب الرقم دا أوى :$
طبعا فهمتوا مبدأنا فى العمل و دا أهم حاجة
المهم بدأ الضرب
وفين يوجعك
طبعا قلعت هدومى وبقى منظرى الواد كوكو صبى الجزار
وبقيت طول الوقت ماسك الساتور أو السكينه الرهيبة بتاعت الجزار اللى لما تبص لها من بعيد بس
تحس إنها هتعورك غلاسة كدا :D
خلصنا متأخر
والحمد لله تمت المهمة على أكمل وجه
دعواتكم بقى ربنا يتقبل مننا :)

***


لعنة كرمللة


النهارده كنت فى بيت خطيبتى
لاء لاء لاء
هى مش خطيبتى
هى واحدة العيلة بتشجع إننا أخطبها
لأنها طيبة وبنت حلال ومؤدبة وفتاة جامعية محترمة ومليون سبب
بس طبعا لأن العيلة عندنا مش مافيا إيطالية
فأنا بلعب دور آل باتشينو وبحرق دم الجميع ولا بخطب ولا بتكلم ولا بنيل
لأنى ببساطة مشكلتى معاها حاجة واحدة بس
مش حاسس بيها
ولا قادر أحس بيها ولا أحس بغيرها
بقيت حاسس إن قلبى ببساطة عامل زى مقبرة من مقابر الفراعنة
عليها لعنة الفراعنة
اللى يفكر يفتحها يشيل اللعنة بقى ويتعامل
أو يموت على بابها زى ما سبقه غيره كتير
عالعموم بغض النظر عن أى شىء
فأنا مبسوط وراضى بكدا والحياة حلوة وعليها سكر كمان
المشكلة كلها إن الواحد هوائى شوية
أو متقلب زى موج البحر
وكل واحد بقى يفهمها بطريقته
طبعا مش غدر ولا خيانة
المشكلة إن الواحد أحيانا بتمر عليه لحظات بيحس بتعاسة وتكون (( لحظة وعدت زى سنين ))
فى بوست كتبته عن الحالة دى
مش وقته
المشكلة مش فى انى مبحسش بالناس وبس
غير كدا بقى
إن القلب مش زى حالتى المزاجية
يعنى ممكن اكون حزين جدا دلوقتى
وفى خلال دقيقة تلاقينى عرفت إزاى أبقى مبسوط من قلبى
ياريت قلبى يكون كدا وأعرف أفوقه وأحب ولو لدقيقة واحدة وبعدها أموت
بس طبعا اتمنى تكون الدقيقة دى قبل ما أموت

وفى آخر تلاتين ثانية أنطق الشهادة
أقولكم
الصفقة مش مربحة :D
أنا هلغيها
No Deal
إنتوا شايفنى عاقل ولا شايفينى مجنون

مش فاكر ليه جاى فى بالى أوى الموقف بتاع فيلم اسف عالازعاج
مش عايز شاب لطيف ظريف وأمور يطلع يقولى إنته هتعيش دور احمد حلمى ياعم
هرد عليه وأقوله أنا شايف نفسى أحسن منه تقريبا ألفين مرة
سواء هوا أو غيره
لأنى واثق فى نفسى وعندى إيمان بربنا إنه مخلقش غيرى ولا زيى بالمنظر دا
والكلام دا ينطبق على كل شخصية تقرأ هذا الكلام
المهم
الموقف فى الفيلم لما واقف قدام أمه وأبوه وبيقولهم إنتوا شايفينى عاقل ولا شايفينى مجنون
والكلمة اللى قالها للدكتور
ساعة ما قاله إنته بتعاملنى على أساس إنى مجنون
تصرفاتك بايخة وحركاتك سخيفة ومكشوفة
مش عارف ليه بفكر فى الكلام دا


موحشتنيش

تمر سنين وأعياد
وتبدأ المرحلة الأخيرة فى النسيان
ياترى هيبقى فى مراحل تانية
مش عارف ليه مش حاسس النهارده إنك مش واحشنى
مش عشان أى سبب غير
إنى ببساطة بدأت أفكر بالعقل أوى
موحشتنيش إنته عارف إنى مش بكدب
يمكن فكرت فيك
بس مبقتش توحشنى زى زمان
يمكن عشان بعيد عنى
يلا
مش هقولك غير
رحمة الله عليك يا أبى
أكيد كتير أوى بحتاجلك
وأكيد أكتر بحب أتكلم معاك
والأكتر إنى عارف إنته بتحبنى إزاى وأنته غالى عندى إزاى
بس حاليا
أنا بالقوة الكافية إنى أكمل الحياة من غيرك :)
نلتقى فى الدار الآخرة بعون الله :)

صاحبى

مش عارف ليه النهارده حسيت بشعور غريب كنت تقريبا نسيت إحساسى بيه من زمان
شعور بالصداقة من حد كويس وبيحبنى بجد
بجد أنا سعيد
يمكن الفرق بينى وبينك عشرين سنة
لكن إحنا تقريبا
نسخة جينيه واحدة
ودا
لأنك
عمى :D
مش عارف ليه كنت حاسس إننا لازم نروح نقعد على قهوة
أو نقعد نتكلم براحتنا شوية زى زمان
وحشنى أكلمك
بس اليوم كان مشحون وزى ال.... فل :@
هتتعوض يا معلم

خالص تحياتى لكم وإحترامى الشامل المهندم المهندس الأمور الحليوة الكامل المكتمل المكمل :)
هابى خروووووووووووووووووووووووووووف
وبالنسبة لتعليقات التبريكات والتهنئات بخصوص العيد ليه رد واحد بس للجميع
(( كل عام وأنتم إلى الله أقرب))
شاب فقرى


الخميس، 26 نوفمبر 2009

حلوة الدنيا سكر



بحر الحياة غدار ...
وإحنا لفين رايحين ...
شايل معاه الأسرار ....
وإحنا معاه ماشيين
أيام تفوت وتروح وإحنا ولا حاسين
أحلام تعيش وتموت يا قلوبنا يا خايفين

الطير بيهاجر وبيرجع
الشمس بترحل وبترجع
الدنيا بتاخد وبتدى
الليل لو طول هيعدى

فى ليالى بنحلم وتعبنا
ورجعنا لوحدنا بعذابنا
حاول تتغير
ومسيرك تقدر
وبلاش نستسلم يوم للحزن مادام عايشين

بحر الحياة غدار ...
وإحنا لفين رايحين ...
شايل معاه الأسرار ....
وإحنا معاه ماشيين
أيام تفوت وتروح وإحنا ولا حاسين
أحلام تعيش وتموت يا قلوبنا يا خايفين


لو ينسى الواحد أحزانه
هيشوف الورد وألوانة
لو نفتح للدنيا قلوبنا
هتدق الأحلام على بابنا

فى ساعات الدنيا بتوعدنا
ونقرب منها وتبعدنا

حبها من قلبك

حبها هتحبك

إضحك للدنيا الفرحة هتيجى فى غمضة عين :)

الدنيا لسه بخير

فى حياتنا لسه كتير

أيام تفوت وتروح

بكره هييجى أكيد

أحلام تعيش وتموت

هييجى لنا حلم جديد

***
أغنية : بحر الحياة لمحمد منير
مش عارف ليه إفتكرت الأغنيه دى النهارده
يمكن هى محاولة إنى أخرج من المود اللى أنا غرقان فيه ؟؟؟
يمكن عشان شايف فعلا بريق أمل بجد ,,, بس مينفعش نقرب له ؟؟؟
وبرده إفتكرت الموقف بتاع حلمى لما كانت بتقوله غنى لى
قالها سكر حلوة الدنيا سكر
هههههههههههههههههههه
ربنا كريم ويعين ويخلينا نعيد فى سعادة وفرح
خالص تحياتى ليكم

هابى خروف
عيد سعيد
ويارب كل سنة وأنتم إلى الله أقرب :)


وبالمناسبة السعيدة دى
أحب أوجه كلمة لكل الناس اللى بتحبنى فى الدنيا :
(( شكرا ,,, نفسى أشوف نفسى بعيونكم أووووى ))

أما أى حد سابنى من غير سبب :
(( الباب يفوت جمل :D ))

شاب فقرى

الأربعاء، 25 نوفمبر 2009

أوهام الأعياد والأفراح





السلام عليكم ورحمة الله وبركاته


تتملكنى رغبة شديدة فى الحديث عن شىء ما
لشخص ما
لقلب يتفهمك بهدوء
أمسك جوالى وأهمس له فى صمت
هل حقا تحتفظ فى ذاكرتك بإسم حبيبتى ؟؟؟
فلا أجد منه ردا ولا جوابا
وكأنما تملكه خجلا أراد له الصمت ليمنع عنى حقيقة
بأن حياتى اليوم بلا أحباب
ولا فى الدنيا عاد لى أصحاب
بأن عمرى الفائت ما كان إلا
غربة فى بلدى وبين جدران منزلى
وبأنى عشته كله حائرا ووحيدا
أبحث عن قلبى يملكنى
يأخذنى لشط ولا أعرف بعده موج البحار
ولكنى لازالت أبحث عنها
وأبحث عنى شاطئى
ولا أندم على ما فات من شهورا وسنين
فيوم لقائك يا عمرى
حينها يكون للندم معنى
بأن عمرى قد مر دون أن نكون معا
بأن فى عمرى لحظات
مرت دون أن تواسينى
وأبكى بين يديكى صارخا طالبا للغفران
وتحتضنين رأسى بين كفيك بحنان
وكأنك تداوين فى نفسى ما دمرته كل السنين
وما حطمته كل الأيام
ومنى تقتربين
وتهمسين
أحبك يا حبيبى
فإن لم أكن لك
وإن لم أعفو عنك
فمن يفعل ؟؟؟

***






ما زال يُسكرني شُعاعك ..

رغم أن الضوء في عيني نار

أجرى فألمح ألف ظل في خُطاي

فكيف أنجو الآن من هذا الحصار ؟

لم لا أسافر ؟

ألفُ أرض تحتويني .. ألفُ متكأ .. ودار

أنا لا أرى شيئا أمامي

غير أشلاء تُطاردها العواصفُ .. والغبار

***
كنت عايز أكتب بس مش عندى نيه للكتابه فى الرومانسية ولا فى أى حاجة تانية
بس كان لازم أكتب
خلاص العيد قرب وكل سنة وإنتم طيبين ويارب دايما إلى الله أقرب
والحياة حلوة وكل حاجة جميلة
تتملكنى أفكار كتير أوى
ياترى بمناسبة العيد الواحد المفروض يفتكر إيه ولا يتكلم فى إيه ولا يروح فين ؟؟؟
أنا عن نفسى لا أعترف بالاقارب ولا بالاصدقاء
لانى ايه الفايدة ان يكون لى اقارب تقريبا بقعد اسلم عليهم ساعتين الصبح ومفيش حد فيهم حتى يعرف إسمى
ولو كان يعرفه فمش يعرف عنى حاجة
وكمان بالنسبة للاصدقاء فأنا لم أجد من الحياة أصحابا بعد
لا اعرف صحاب ولا بتاع
هوا مش المفروض الصاحب يسأل على صاحبه ؟
بلاش ندخل فى جدل عقيم حول الصداقة وشروطها واساسياتها وهى ايه عشان مش هنطلع باى حاجة
لان حاليا مفيش لا صحاب ولا احباب فى حياة الواحد
فكل واحد ليه طلب او ليه حاجة زى زمان
لم يتغير الأمر كتير اوى عن زمان وبداية شغلى
حاليا يمكن شغلى متوقف وسيبت الشغل فى الورشة لانى مش عايز اكمل ببساطة
عادى جدا
انا حر فى تفكيرى
ونرجع تانى نقول لنقطة تانية
يا ترى هل يبحث النجم فعلا عن مدار ؟؟؟
ياترى فعلا هى مازلت أبحث عن الحب والعشق ؟؟؟؟
هل مازلت مؤمن بكل هذا ؟
للاسف لما الانسان بيكون قوى الملاحظة او كثير التجارب فى الحياة
بيكون على مقدرة انه يعرف معادن الناس وددى مشكلة
يمكن الواحد احيانا بيحسد البنت اللى بتحب واحد سنين وبتتخدع فيه
ومحدش يقولى ليه
يمكن احيانا االواحد بيحتاج للحب فعلا من اجل الحب مش لاجل اى هدف تانى
يمكن الواحد فعلا بيكون محتاج الحب من اجل الحب
مش فاكر مين اللى كان قالى الجملة دى من كام يوم
ولكن فعلا
مفيش حالة بتقدر تنكد عالواحد زى حالة العيد دى
يمكن الايام العادية انعدام الفرحة او الاحساس فيها بيكون شىء طبيعى
انما يوم العيد
لما يمر عادى ؟؟؟
لما ميبقاش فى اى تمييز
لما يكون زيه زى اى يوم تانى فى السنة ؟؟؟
مش عايز حد يروح فكره لبعيد ويفكر فى الناحية الدينية
انا بتكلم دلوقتى عن الناحية الحسية
عن الاحساس
لازم الواحد يوضح
لما بوضح كدا بحس انى مش بكتب لنفسى
انا بكتب لغيرى
عشان يفهم ويقرب
وبعد ما يقرب مش هنوصل لحاجة برده
لان مفيش اصدقاء ولا احبه
يمكن مفيش قدام الواحد غير انه يبص لنور الشمس وقت الغروب
ويروى منه روحه ومشاعره المكلومة فى فراق الكثيرين
ويرتوى بيه ويسكر منه
ياترى على فين بعد الارتواء
وايه اللى هيحصل بعد الغروب
هل هتستمر الدنيا فى الظلام
لحد ما توصل لاحلك النقط فى اليوم
هل فعلا احلك الاوقات جت ؟؟؟
لان دايما معروف ان احلك الاوقات
او الاوقات الاكثر ظلمة هى التى تسبق الفجر
ياترى امتى الفجر
ياترى هى دى الأوقات الأكثر ظلمة ؟؟؟
يعنى خلاص الفجر قرب ؟؟؟
ولا أحلك الأوقات والظروف لم تأتى بعد ؟؟

حتى السفر مبقاش بيمثل للواحد متعه
الواحد مبقاش حاسس إن السفر فيه جديد وفى متعة هتهب على الواحد لما يسافر
خلاص راحت المتعة دى
ياترى امتى هترجع ؟؟؟
الفرحة والعمر اللى الواحد نفسه يمر عليه
ياترى إمتى هلاقيها بتتصل
وبتبكى فى هدوء
ويدور الحوار التالى :

---

==========

هى تبكى فى صمت

هوا : مالك يا قلبى ؟

هى : هتفضل بعيد لحد إمتى ؟ هوا العيد هيبقى ليه معنى من غيرك ؟

هوا : وهوا البعد بإيدينا ؟ ولا إمتى الواحد إختار يبعد عن قلبه ؟وعن روحه وعنك ؟؟

هى :وبعدين هتعيد إزاى من غيرى إنته ؟ مش مهم أنا .

هوا : يا قلبى ,,,

قومى دلوقتى ...

إلبسى الطرحة

وإفتحى الشباك

دقايق وهلتلاقينى عندك

هتلاقينى جاى وجايبلك وردة وهمسح بإبتسامتى كل دموعك

وهمحى من ماضيكى كل تعب الإنتظار

هتلاقى بكره كله مرسوم فى عيونى

عشقى ليكى هيقول كل حاجة

قومى يلا إفتحى الشباك

وإستنينى

إستنى ثانية ....

بحبك

هى : وأنا كمان

بس هاتلى الورده حمرا

ومتنساش الشوكلاته :)

هوا : حاضر يا قلبى و يا طفلتى يا أميرتى :)

-----

==========


عيد سعيد عليكم
ولنا عودة نكمل كلامنا
كنت هكتب دلوقتى تانى فى موضوع مصر والجزائر فى فقرانيا العظمى
بخصوص أراء بعض المثقفين المصريين ورأيى الشخصى
بس خلاص مليش نفس
سلام

شاب فقرى

الثلاثاء، 24 نوفمبر 2009

جناحان صغيران


بسم الله الرحمن الرحيم
لم أعد أكتب القصص الفصيرة لأننى للأسف فاشلا فى إيجاد نهاية سعيدة لكل تلك القصص
ولكن أحيانا قد تعجبنى قصة
وأكتب لها النهاية
وهذا ما حدث
منذ مدة ليست بالكبيرة قرأت قصة بعنوان ( جناحان صغيران )
ل ponpona الدكتورة منى سلامة
(( إن شاء الله تتخرج على خير :) ))
إندمجت فى الرد وكتبت لها النهاية
كانت المرة الثانية التى أزور فيها تلك المدونة
حقا أعجبتنى فى وصف ما تكتب عالمها الصغير الذى لم أستطع أن أكون به يوما
واليوم أطرح لكم تلك القصة
أتمنى أن تروق لكم
الجزء الأول من القصة بقلم ponpona صاحبة مدونة ( شوية ورق )


***
(( جناحان صغيران ))
الجناحان الصغيران منذ فترة طويلة ينتظران بالداخل في ركن الدولاب ، المكان الذي لا يعرفه أحد حين كنت أختبئ هناك وتبحث عني أمي . لا أعرف كيف سيكون الحال عندما أطير بعد ان أثبتهما جيدا بحيث لا يتأثرا بأشعه الشمس لأني أنوي الارتفاع كثيرا ، ولا أعرف هل سيمكنني الوصول الي القمر ؟ لأنهم يقولون في الحكايات القديمة أن سيندريللا فقدت حذاءها الفضي ولازالت تبحث عنه ، ويقولون أن ياسمينا قد حبسها جني المصباح في مكان بعيد لا يصل اليه أحد ، هكذا أخبر علاء الدين كي يكف عن اطاعة أوامره حتي يعرف أين هي .
هؤلاء الحمقي البسطاء ... ألا يعرفون أين يمكن أن يجدوا أشياءهم الضائعة ، إنها هناك عند القمر حيث النهايات السعيدة دائما ، لهذا حين جاء الملاك الذي يقف كل صباح علي حافة نافذتي يبتسم ويخبرني أن اليوم سيكون سعيدا طلبت منه أن يصنع لي جناحين كي أصل إلي هناك ، أخبرته أن لدي الكثير من الأشياء الضائعة وأني أرغب في شئ مثل الذي يحدث ف الأفلام وأيضا لأن صديقي ليس بيتر بان .... لم يتحدث إلي لكن اتسعت ابتسامته ولم أره في اليوم التالي .
" ها أنا بحماقتي قد أضعته وأضفته بنفسي إلي قائمة أشيائي الضائعة والتي سأجدها يوما ما !! " . أنا لست من الأشخاص الذين بفقدون الأمل سريعا ، ولكن أيضا أنا لست من الأشخاص الذين يفترضوا أن كل مايريدون سيحدث ... فقط لأنهم أرادو .

النافذة لا تزال مفتوحة ، وقد مر اسبوع ... يبدو حقا أني أغضبته

هو اليوم العاشر ، لا أحد عند النافذه ، لا شئ يبدو مختلفا ، لكني أشعر بأن هناك شئ ما ، لا بد وأن شئا سيحدث ... ذهبت إلي المطبخ
كل يوم أصنع فنجان شاي ، فلماذا لا يكون اليوم فنجان قهوة ، أضفت إليه ثلاث قطع سكر رغم أني لا أحبها هكذا ... لكن اليوم مختلف قليلا
حملت الفنجان ، سأعود إلي غرفتي ،لكنه كان هناك ، يقف علي حافة النافذة ويبتسم .. ابتسامة أكبر من أي شئ آخر . كان يقف ويخبئ شئا ما خلف ظهره ولم أصدق ، لكن هذا ماحدث فعلا ... كان قد صنعهما .. ولأجلي . جناحان صغيران يلمعان بهدوء رغم أن الإضاءة هنا ليست جيدة بما يكفي . ناولني الجناحين وأخذ مني فنجان القهوة ، وفي حين كنت أري انعكاس صورتي في المرآة كان هناك صوت ارتشاف وهمهمة استمتاع . حينها أدركت لماذا اليوم كان مختلفا ، ولماذا أضفت ثلاث قطع سكر لفنجان القهوة الذي أفضله بقطعة سكر واحدة .


*****
الجزء الثانى
و النهاية كما رأيتها بقلمى .....

*****
أخذ فنجان القهوة ولم أشعر بذاتى إلا وأنا أضم الجناحين بين أحضانى ولا أريد لهما أن يضيعا منى مثلما ضاعت كثير من الأشياء
طمأنت نفسى بأننى حالا سوف أستعيد ما ضاع منى منذ طفولتى
عروستى الجميلة و كوب الشوكولا وعلبة الثقاب و أبى

حتما لابد أن أجد أبى هناك
فكما قالت أمى لابد أنه ((فوق )) ومازال ينتظر أن أصل إليه
نظرت نحو النافذة وسألت ملاكى الجميل عن متى سأطير إلى القمر
رد على فى صوت يملؤه المتعه بكوب القهوة و بهمهمه لم أسمع منها شيئا
فكررت سؤالى فى خجل
فرد قائلا وكأننى أقلقته وأخرجته من دنيا جميلة :
(( بعد ثلاثة أيام فى تمام منتصف الليل عندما يكون القمر مكتملا ولكن تذكرى أن تكتبى كل ما ضاع منك
حتى لا تطلبى الذهاب إلى هناك مرة أخرى))
وتركنى وترك الكوب وإختفى كعادته
وجلست أحتضن الجناحان وأبتسم فى سعادة
وأمسكت قلمى فى هدوء
وأمسك دفتر أوراقى
وظللت أتذكر وأكتب
قائمة طويلة
يغالبنى النعاس والنوم
ولكنى لن أنام
فقريبا جدا أحصل على كل ما أريد
قمت فصنعت كوبا جديدا من القهوة
وظللت أكتب كل ما ضاع منى
أبى
كل عرائسى التى أحببتها
تنورتى البيضاء التى كنت أرتديها فى العيد دوما
وشاحى الصوفى وهدية أبى فى عيد ميلادى السادس
قائمة طويلة جدا
ولكنى لم أكتفى ظللت أكتب وأكتب
مر يوم
ويوم آخر
ويوم أخر
وجاءت العاشرة مسااء
ولم أكن نمت بعد
شوقى يمنعنى من النوم
لم أعد أصدق
فى خلال دقائق معدودات سأستعيد كل ما ضاع منى فى حياتى
سأطير نحو القمر
حقا سأرى ياسمينا ؟
هل سأجد مصباح علاء الدين ؟؟
ربما أقابل أيضا السندريلا والأقزام السبعة
وهنا إبتسمت ونظرت للساعة
وجدتها مازالت العاشرة
ترى لما يمر الوقت ببطء
حسنا سأعد فى هدوء حتى أتأكد من مرور الوقت
وبدأت أعد الدقائق الباقية 120 دقيقة كاملة
بدأت فى العد مائة وعشرون
مائةوتسعة عشرة
ما هذا لما يغلبنى النعاس ؟
مائة وثمانية عشرة
مائة وسبعة عشرة
مائة و....

((إبنتى الحبيبة إستيقظى ))
هل هذا صوت أمى ؟؟؟
ما هذا هل طلع النهار ؟؟؟
هل طلعت الشمس
أين أنا وأين الجناحان
لم لم أطير
غلبنى النعاس :((
وطار الجناحان إلى القمر
وإنضما إلى كل ما ضاع منى فى الحياة :((
أغلقت النافذة وجلست حزينة أرتشف كوبى وأدعو الله أن أجد ما ضاع منى ويصبرنى على فقدانه .

تمت
بقلم شاب فقرى و ponpona

الاثنين، 23 نوفمبر 2009

الخروج عن الصمت

أنا قررت أخرج عن الصمت فى كل المواضيع اللى مش بحب اتكلم فيها
وعشان كدا هفتح مدونة من مدوناتى السابقة وهضيفها للبروفايل بتاعى
المدونة موجودة فى البروفايل بعنوان
دولة فقرية حرة مستقلة
أتمنى تعجبكم
شاب فقرى

متأخرتش كتير


النهارده يوم سعيد

النهارده يوم رهيب

النهارده يوم مش عادى

أخيرا نزلت فيدورا 12 يا جماعة

مش مهم عيان ولا كنت بتألم ومخنوق وبكح دم

مش مهم إن مشوار الدكتور كان متعب وتوهت حبه حلوين فى باب الشعرية

مش مهم إنى لسه متعشتش واخدت الدوا عالفاضى كدا

مش مهم إن مفيش شوكلاته مورو

المهم إن فيدورا 12 نزلت

اللى بيفهم فى اللينوكس هيعرف قصدى

:)

ياااااااااااااااااااه

أنا مبسوط أووووووووووووووووووى

وحزين إنى لسه عارف دلوقتى وإنى مش متابع بقالى أسبوعين ومقطوعة الأخبار عنى :(((

بس خلاص

هبدأ داونلود وهعملها تسطيب قبل الفجربعون الله :$

هنزل اللايف سى دى الاول سبمعميت ميجا فى السريع كدا

وبعدين اشوف الدى فى دى الاربعة جيجا بقى انزله من هناك

ونلتقى بكم بعد تركيب الفيدورا 12

وداعا ويندوز سفن إلهى يبتليك بإيرور يهد ميكروسوفت طوبة طوبة قادر يا كريم

مش عارف ليه عندى إحساس إنى رايح أقابل البت اللى بحبها :$

مبسوط وسعيد

آه صحيح

نشكر السادة اللى سألوا عليه فى البوست السابق وأحب أقولهم من موقعى هذا

الأغنيه الشهيرة اللى فى إعلان الحلاوة بتاع زمان

((

إن الواد كان عنده حق

))

يعنى لما قلت مروحش لدكتور كان عندى حق

أدينى روحت وكشفت عند إستشارى أنف وأذن وحنجرة ودكتور فى جامعة الأزهر

وعملى منظار فى الانف واكتشفت الحاجة اللى كنت متأكد منها

إن دا إلتهاب من ساعة العملية

من خمس سنين :$

متأخرتش كتير أوى :D

هههههههههههههههههههههههههههههههههههههههههههههه

اخدت دوا والمشوار كلفنى ميت جنيه

وأنا بناشد شيما وبنبونة وسكرة وأميرة على كوكب مهجور وجارة القمر وريمان

وكل واحد قالى روح لدكتور يشارك فى المبلغ دا


تمن الدوا والفيزيتا ولما أحسب المواصلات هبقى أضيفها

ما هوا انا مش هسمع الكلام وأدفع من جيبى كمان :$

ممكن تبعت الفلوس مع عيل زوغير

قولوا له هتروح القاهرة الدور التالت هتلاقى فقرى بيقولك سكلك أمك

سيب الفلوس عالسلم وإجرى

ههههههههههههههه

شكرا لإهتمامكم جميعا وسؤالكم ودعواتكم

مش عارف أقول إيه بس فرحت ومبسوط طبعا بسبب الإهتمام والسؤال والدعاء

مكنتش أعرف أهمية الفقرى هنا فى المدونة

وكمان مبسوط بسبب الفيدورا اتناشر

ياااااااااااااااااااااااااااااااااااه

أخيرا هفرمت الهارد من تانى :$

صبح صبح

الفقرى خلص وهيروح


شاب فقرى

الأحد، 22 نوفمبر 2009

إحذر مما تتمناه


And this is real talk
I feel like the Incredible Hulk
My back has been broke, and I can still walk


So be careful what you wish for
'Cause you just might get it
And if you get it then you just might not know
What to do wit' it, 'cause it might just
Come back on you ten-fold

دى أغنيه ل
EMINEM
إسمها
careful what you wish for
إحذر مما تتمناه

أنا خلاص تعبت جدا
الكحه والدم مش بيبطلوا
خلاص قررت أخرج وأروح لدكتور
هقوم أفتح دليل الأطباء اللى عندى بتاع الوالد الله يرحمه
بصعوبة هحاول ألاقى إستشارى أمراض صدرية فى القاهرة
وهروح له
هروح لوحدى لأنى مش عايز حد معايه وبكره يكون حد معايه
يمكن حاجة مؤلمة فى المعنى ولكنها بتريحنى وفى نفس الوقت بتتعبنى
بكون بتمنى حد ييجى يغلس عليه ويقولى
(( إنته عبيط يابنى أنا جاى معاك ياض إنته ))

لكنى معرفش الضعف ومعنديش أصدقاء ومش هطيق أمشى مع حد من البيت هنا
بدون تطويل

إحساسى زى ما كتبت فوق
And this is real talk
I feel like the Incredible Hulk
My back has been broke, and I can still walk

أنا قايم ألبس وخارج
لا أسألكم شيئا

شاب فقرى

يشرفنى لو بتفكر تعرفنى


فى ناس كتير فاكرة أن التاج هوا مشرط الجراح اللى هيشرح المدون ويقول هوا مين ويفك الطلاسم كلها ولكن من وجهة نظرى مع إحترامى ..فأنا مش كدا ومتاكد من دا لأن أفكارى وشخصيتى بتظهر فى البوستات وكل كلمة بكتبها هنا أو هناك أو فى أى مكان ولو حتى فى المسنجر أو الفيس بوك أو حتى فى ردى عالتليفون ,,, فى ناس كتير لما بتكلمنى بتقولى إنته بتفكر كتير أوى قبل ما ترد يعنى مش بتجعجع وخلاص أو تتهور فى الرد ودا شىء طبيعى فى شخصيتى ومشكلتى هى إنى بكون سعيد لما بكون لوحدى وبفكر ومبحبش أجرح أى حد بكلمه إلا لو كان قصد يجرحنى بكلامه ,,,, و يمكن جت عليه فترة كان معايه صحاب كتير قوى وكلهم يعتبروا الأنتيم بتاعى ولكن خلاص الوقت دا فات وحتى الأن لم يعد لى أصدقاء سواكم ولهذا فإن كان التاج هيسعدكم وهيساعدكم فى التعرف علي كريم ( شاب فقرى ) فأنا موافق وسأرد بكل سعادة ورضا
همسك الميكروفون بهدوء وإبتسامة سعيدة :)
لأنه خلاص
لازم أرد
نبتدى بسم الله بالتاجين بتوع شيما
***


اسمك؟


شاب فقرى / كريم

والناس أحيانا بتقول الجنرال لأنى شخصية قوية بتعرف تتحكم فى الأخرين بدون أى ضغوط وبخيوط زى عرايس المسرح بالظبط


اسم مدونتك؟


يوميات شاب فقرى



مجال دراستك؟


كلية التجارة وإدارة الأعمال جامعة القاهرة


RHCE = RedHat Certified Engineer

يعنى دراسة فى اللينوكس والسيستم أدمن عشان أقدر أشتغل مهندس it

وكمان شغال فى النت بعمل مواقع ودعم فنى للمواقع وحماية وبعمل شغل سيكيورتى للسيرفرات وبحجز سيرفرات وعندى شركة زوغيرة كدا

هل فكرت في اغلاق مدونتك؟ والسبب؟


فكرت والسبق السابق كان :

إن الناس تعرفنى فعلا وتحدد كل حاجة من خلال معلوماتها عنى مش من خلال أفكارى

والسبب الحالى :

لو توجه تفكيرى وفلسفتى للأفكار الإلحادية وبقيت بضيع الناس وساعتها مستحيل أستمر فى المدونة

ايه رد فعلك لو حد قل ادبه عليك في المدونه؟


ماشى بمنطق (( إتفو على أم رأيك اللى هيخليك تشتمنى ))

ممكن أرد عليه وأحرجه أو أنفض له وكأنه سيس ومقالش حاجة

أسوا مدونه دخلتها؟

مجموعة مدونات كتيرررررررررر

هجص وهلث ودماغ فاضية ورومانسية تافهة بلا هدف

ناس بتعشق الشات وداخله منه للتدوين ومش فاهمين معنى التدوين حتى
وممكن تعلق عندك بإسمها وبعدين تخش تشتمك بغير معرف بعلا إسلوب قذر

هيحصل ايه لايميلك بعد ماتموت؟

عادى مش هفتحه تانى أكيد


اديت الباسورد لحد قبل كده؟


طبعا لاء :)
بس كنت ناوى طبعا أديها لحد بقدره فى عالم التدوين

السفر بالنسبه لك؟

بعشق السفر والترحال وممكن أسافر مكان معرفش فيه أى حد ولا حتى فيه أى شارع اعرفه وألف وأتوه هناك

المود بتاعك ايه؟

فقرى دايما

وحاليا مريض جدا جدا جدا

بتعمل ايه وقت فراغك؟

الانترنت وبعدين شرب الشاى فى البلكونة والتأمل فى ربنا والتفكير فى خلق الله


الاكلات المفضله؟

الفاصوليا الخصرا والرز وجمبهم حته فرخة أو شوية لحمة حلوين


الصفات التي اخدتها عن والدك؟

القوة الرهيبة

الشجاعة

القدرة عالتصرف فى أحلك المواقف والظروف

التفكير بعقلانية

الإبتكار والإبداع


الصفات التي اخدتها عن والدتك؟

الطيبة

الحنان


اكتر 6 حاجات بتحبهم؟


سلمى بنت بنت خالتى بعشقها

أختى

أمى

أخويا

البيت الجديد اللى بنيته وطلع عينى فيه

دراستى

شغلى عالنت

الحقيقة والواقع والصراحة


اكتر 6 حاجات بتكرهم؟


الكدب أساسى واللى بيكدب ولو مرة واحدة بيسقط من نظرى وبطرده من حياتى تماما

الخيابه والخيانة

الفشل

المعيلة

البنات السيس والتفاهة

الناس اللى تفكيرها غلط


شخصيتك نوعها ايه؟

قوية إلى حد لايمكن تخيله

بس مليانة تناقضات وصباح الحاجات اللى ملهاش علاقة ببعض


لماذا دخلت عالم التدوين من الاساس؟


من تلات سنين تقريا كنت داخل أكتب وأتكلم عن حياتى

من مدة لما فتحت يوميات شاب فقرى كنت عايز بس أقرب من حد بيفكر ويكون ليه ناس بتفهم وبتحكى وبتعبر عن اللى جواها بدون قيود وبتفهم بعضها بدون حدود


اهميه التعليقات بالنسبه لك؟


مهمة جدا بس مش معنى كدا إنى ألاقى واحد كاتب تعليق تافه أو فيه كلمة جارحة أو بيهزقنى فيه
أو كاتب تعليق سد خانه ودا بيغيظنى
لازم عشان تعلق تبقى فهمت اللى قريته مش بتعلق وخلاص


احلي بوست كتبته مع ذكر السبب؟

أى بوست يحمل كلمة فلسفة والسلسلة الفقرية



افضل مدونه قريتها؟

تقصد قريت المدونة كلها

يبقى إنته هنا تقصد إتنين بس

شيما ...الشعب لابد له من حكومة تشكمه

ميرام ,,,ميراميات ...إسكت يابنى...!

ponpona منى سلامة شوية ورق (( بنبهر من أسلوب الحكى ))

المدونتين دول تقريبا قضيت فيهم حوالى شهر ونص مبهور بمحتواهم وطريقة الكتابة والتفكير والأسلوب وحاجات كتير أوى

قلبت فى القديم والجديد


اهميه الانترنت بالنسبالك؟

بزنس وعلم وترفيه وصحاب

***********************


اسمك واسم مدونتك؟

قولنا فووووووووووووووووووق



احب الالوان؟ الايام؟ الارقام؟
الأحمر ... يوم الخميس والجمعة ... الأرقام رقم تلاتة

برجك وتاريخ ميلادك؟

الدلو شهر واحد

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : قوى بقدر أقف جمب أى حد والباقى معرفوش

العيوب:البعض بيقول مغرور والبعض بيقول رخم وغلس بس أنا مش عارف وربنا

الصفه اللى بتمنى وجودها: القدرة عالنسيان والتسامح والمغفرة

ماهو مكانك المفضل؟

كذا مكان وبالترتيب هما :

بيتنا القديم فى بركة السبع

بلدنا والغيط لما الواحد ينام هناك ساعة العصر

إسكندرية وبالذات عند القلعة

كورنيش النيل بالكامل وأقصد بكلمة الكامل الكامل فعلا


ايه هى هوايتك المفضله؟

النت والسفر والمشى والقراءة مع إنى بطلتها

ما المقوله اللى تؤمن بها؟
مقولة خاصة بيه أنا :
(( اليوم اللى يمر عليك من ما تتعلم جديد تبقى حمار
واليوم اللى يمر عليك بدون ما تحتفظ بمعلوماتك السابقة تبقى أهبل
واليوم اللى يمر عليك بدون شغل تبقى عندك تخلف عقلى ))

(( قرب .... تتكهرب ))

لأنى مش بحب الناس تقرب منى خوفا عليهم

(( اللى ميقدرنيش ميلزمنيش ))

(( عيش وحيد تعيش سعيد ))

اجمل هديه قدمت لك من مين؟
عمر ما فى حد جابلى هدية أيون صدق ولا حتى كيلو برتقان
أفتكر فى حد جابلى نص كيلو كنافة فى عيد ميلادى من حوالى عشر سنين بالظبط
غير كدا محدش عبرنى
ولا فى حد جابلى هدية كويسة محتفظ بيها حتى

اسعد يوم فى حياتك؟ واتعس يوم فى حياتك؟

أسعد يوم : يوم ما خلصت بناء البيت الجديد ووقفت قدامه أصوره وأنا سعيد بإنجازى فى الحياة وإنى خلاص عملت بيتى اللى هسكن فيه بالرغم من إنى لسه مبنتش شقتى ولسه مقررتش هسكن فيه ولا لاء لانى عندى شقتى الخاصة

أتعس يوم : يوم وفاة والدى

موقف طريف لا ينسى من ذاكرتك؟

لما كنت داخل المترو ونسيت التذكرة تقدروا تقروا بوست المسحور وإنتوا هتفهموا انا كنت عامل إزاى ساعتها

مسحوووووووووووووووووووووور

معاك ثلاث وردات لمين تهديهم ؟

أول وردة :طبعا للى جرحنى اول وردة وأقوله وأعرفه يابنى أنا أحسن منك لأنى كنت أقدر أكسرك وأدمرك بس أنا معملهاش

تانى وردة للعيلة الخاصة بيه : أختى وأخويا وأمى

تالت وردة : لأى حد حاسس ناحيتى بشعور الحب وشايف إنى كويس ودا فعلا حاجة مش بحسها كتير ولو حسيتها بقول فى نفس الناس دى هبلة بتحبنى على إيه ؟؟؟

معاك ثلاث رصاصات على من تطلقهم؟
-أى حد قبيح
- أى حد فاكر نفسه حاجة وهوا حمار فى الأساس
- أى حد مغرور

ايه رايك فى الحب؟ ولمن تقول اجمل كلمه حب؟

والله ما بكدب ولا بشتغل حد بس أنا قلبى حاليا متوقف لا بحب ولا بتاع

وكمان بالنسبة للحب راح معناه ومش قادر أفتكره خالص من كتر الجراح اللى جوايا واللى بشوفه


هل من السهل ان تمثل الحب لشخص يحبك لعدم جرح مشاعره؟

دا بقى بتنجان صرف ... لأنى ببساطة صريح جدا مبقدرش أكدب على حد مع إنى ممكن اكدب وشاطر أوى فى الكدب بس مبعملهاش

المراه فى نظر الرجل .......... أكمل ؟

الحنان والحب وبتعوض عن تعب السنين كله بكلمه

الرجل فى نظر المراه.............أكمل؟

راجل البيت

ماهو اسعد خبر سمعته هذا العام؟ وماهو اتعس خبر؟
وربنا ما فى حاجة حلوة تقريبا سمعتها السنة دى
أيون عايش فى نكد
********************
شوية أسئلة من ريمان
هواياتك؟
النت والقراءة والنقاش مع حد بيفهم وبيفكر

ايه اكتر شىء بتحبه فى الطبيعه؟
اللون الأخضر والطيور والغيط والفاكهة والخضرة
بعشق كل دا وكمان نهر النيل

ايه اكتر شىء دايما بتحن ليه؟
أرضنا فى البلد
وحبيبتى اللى لسه مش قابلتها ومعرفش هى مين ولا فين
بحر إسكندرية

ايه شاغل دماغك الايام دى؟
تحقيق ذاتى
الوصول لأهدافى


احلام حلمت بيها ومقدرتش تحقهها؟
الحب الحقيقى مقدرتش ألاقيه حتى الأن
غير كدا اى شىء حطيته كهدف وصلت له

احلام حلمت بيها وحققتها؟
تقدرى تقولى كل حاجة
بداية من بناء البيت من كام سنة على إيدى
لحد الشغل عالنت
وكمان الإحترام المتبادل مع الناس
عدم الإبتعاد عن التدوين
وكل حاجة فى حياتى

********************
خلونا بقى نجاوب عالتاج بتاع دموع القمر :

روحت مدونتها مش لقيته نو بروبلم
هحاول أتظاهر بأن كان فيه تاج هناك وكان نفسى أرد عليه لأنى حسيت إنه جميل قوى بس خلاص كدا
بس هسأل نفسى كام سؤال يمكن تقدروا تعرفوا أنا مين

مين جنابك ؟؟؟
فقرى فقط

حلمك لبكره ؟؟؟
بنوتة زوغيره بتجرى عليه وتحضنى وتقول بابا

بتحلم بإيه ؟؟؟
بحلم بتحقيق ذاتى

تعرف الخوف ؟؟؟
لا أعرفه ولا يعرفنى

يهمك رأى الناس ؟؟؟
من الأخر طز ,, أنا عايش براحتى ومش يفرق معايه حد ومطبق مبدأ عيش وحيد تعيش سعيد

إنته مغرور؟
لاء بس ثقتى فى نفسى بلا حدود

نفسك فى إيه ؟؟؟
بنوتة عسولة أو خمسة يبقوا بناتى مفيش مشاكل
شغل محترم
بيت فى مكان بحبه أوى

بتحب مصر ؟؟؟
اه والله

مدى عشقك للحياة ؟؟
ملوش حدود

هل أنت مجنون ؟؟
طبعا

ليك صحاب ؟؟
لاء
بس حاليا فى ناس قربت منى وأقدر أقول صديقة واحدة بس

بتكره الحب ؟؟؟
بعشقه لدرجة الجنون

يعنى إيه نت ؟
نت يعنى علاقات وشغل وتعليم وسياحة وسفر وحب وجواز كمان

الطب فى نظرك ؟؟؟
pure Freaking magic
ومش بلجأ له خالص غير لو بدأ جسمى ينهار

البنات فى وجهة نظرك ؟؟
مخلوقات لطيفة بتجلب السعادة
لو سمعت منك كلمة وحشة بتبقى لعنه وبتبقى ليها كيد عظيم

الصداقة ؟
عطاء بلا حدود

الكدب ؟؟؟
ملوش رجلين

الحب الحقيقى ؟؟؟
معرفة وإهتمام وطاعة

الغرور ؟
لسه متخلقش اللى هيتنك عليه
بالإضافة لأنى معرفش حد عشان أتنك عليه

أمريكا ؟؟؟
بنت كلب باليهود اللى فيها

إسرائيل ؟؟؟
قذارة وسفالة بلا حدود

الموت ؟؟
مش خايف منه نهائى
ربنا يجعل موتى على أعتاب المسجد الأقصى مدافع عنه
وطبعا لو أنا خارج بودع أى حد وداع الموت وكانى مش هشوفه تانى وكذلك بعمل مع صحابى

الزمن ؟؟؟
لازم تعمل له حساب

تقول إيه لكلا من ؟؟
والدك : بجد شكرا
حبيبتك : إتأخرتى أوى
مبارك : حس بينا الله يرضى عليك ويحسن خاتمتك

تعرف الإنتقام ؟؟؟
قادر عليه تمام القدرة لكن مبعملوش

تعرف الغدر ؟؟
أنا أكبر من إنى أعمله

إدمانك فى الحياة ؟؟؟
التفكير والتفكير والتفكير
بفكر حتى وأنا نايم ومحدش يقولى إزاى


******

إنتهت الإجابات
هل حقا علمت من أنا ؟؟؟
لا أظن هذا
ولكن
إهداء التاج يكون لمين ؟؟؟
isolde
الفراغ
سلمى
قلم رصاص
ريمان
جارة القمر
ponpona منى سلامة
شيما
وطبعا مش عايز أقول إنى بوجه مش التاجين أو اللى جاوبوا عليه قبل كدا بل الأسئلة الإضافية اللى فى النص واللى حطيتها عشان تعرفونى بيها

خالص تحياتى وإحترامى الكامل لكم
ولكل من أهدى لى تاج وخاصة من جاء ذكرهم فى البوست
وكل من أراد من القرب أو إحترمنى أو قدر رأيى ووجهة نظرى

شاب فقرى
كريم

السبت، 21 نوفمبر 2009

إلى السيد رئيس الجمهورية


السيد رئيس الجمهورية
صباح الخير
أرسل لسيادتك الخطاب رقم 1 وكلى أمل أن تقرؤه
أنا شاب مصرى بيحب مصر
لاء ياريس مش زى كل الناس
بحبها بجد مش كلام عالفاضى ولا طمعان من حبها فى حاجة لا عايز منصب ولا عايز فلوس ولا عايز واسطة ولا حتى عايز تشوفلى عروسة
إنته اكبر من كدا ياريس
أنا بس عايز أمشى محترم
سواء جوا أو برا مصر
أحس بإنى مواطن بلادى بتخاف عليه وبتحبنى
يوم ما يتجمع عليه الجزائريين أولاد التيت فى السودان ألاقى حد واقف جمبى
يوم ما أروح أشجع بلدى فى تصفيات التأهيل لكأس العالم ألاقى حماية من بلدى
مش عايز أنضرب عشان أنا مصرى
ولا عايز حد يهزقنى عشان أنا فى منى كتير وإنى تعليمى أى كلام
ومش عايز يطلع واحد سعودى يتهمنى إنى كنت بدى لمراته مخدرات وبخليها مدمنه إنتقاما منه ويجلدونى ألف جلدة
ومش عايز أسافر إيطاليا فى مراكب صيد مينفعش حتى إنها تنزل تصطاد لحالتها الزبالة
ومش عايز لما أروح إيطاليا أرجع مترحل لأن بلدى مش بتدى لى حقوقى
وكمان ياريس أنا مبفكرش أسافر إسرائيل زى ما شباب كتير عملوا
وأروح أقعد فى السجون هناك أو يتهمونى بتهمة ملهاش معنى وأعيش فى السجن
ولا عايز أموت فى عبارة أو طيارة ياريس الله يكرمك
ولا عايز ينضحك عليه بوهم الشقق والتسكين وفلوسى تروح منى
ولا عايز ياريس تبعتنى أمريكا وتعلمنى هناك وتخلينى دكتور مهم
ما أنا ممكن أبقى أحسن واحد فى الدنيا وفى بلدى
كل اللى فات دا أنا شفته وشفت اللى أكتر منه
وأخواتى ماتوا فيه
وأنا ليه حق فى البلد دى ياريس
مش كفاية بس إنى إبنها
أنا خالى كان معاك فى حرب أكتوبر وكان مهندس مصرى وإستشهد هناك
أنا مش عايز غير حاجة واحدة بس
أبقى محترم جوا وبرا
مش عايز أتهان من الجزائريين لما أروح أشجع بلدى وأرجع فى تابوت
مش عايز أنضرب برا بلدى وأتعذب جوا بلدى فى أقسام الشرطة
لأول مرة بنطقها ياريس
عايز أبقى محترم
ولك منى كل التحية والدعوات بطولة العمر
بس تشوفنا ياريس
مطلوب منك تشوفنا مش أكتر
وإحنا هنصعب عليك
خالص الإحترام والتحية والتقدير
شاب فقرى

الجوزة والسرير والمشنقة


قريت مقال من شوية عالنت فكرنى بكتاب كنت قريته زمان

الكتاب بعنوان الجوزة والسرير والمشنقة

ببساطة الكتاب دا بيتكلم عن أكتر الحاجات اللى كانت موجودة زمان فى مصر وحاليا برده

أول حاجة :

الجوزة

أو الشيشة والحشيش والكيف
الكتاب بيحكى عن قدوم الحشيش لمصر وإدمان الناس ليه وبداية شرب الحشيش فى مصر ومن أول واحد خد نفسين أيام ماكان الحشيش مش مغشوش ومليان بنج وبلاوى
الكتاب بيحكى عن فلسفة شرب الناس للحشيش وبرده بيحكى قصة لشخصية بتحب المخدرات عموما والحشيش خصوصا

تانى حاجة :
السرير :
السرير هنا بمعنى صناعة البغاء فى مصر أو الدعارة لا مؤاخذة يعنى
مش عايز واحد يطلع يقولى الزنا حرام وإنته بتتكلم كدا ليه
وبيحكى عن نشأتها فى مصر ووجودها من بين 1900 لحد سنة إصدار الكتاب
وبيحكى عن إنها كانت مباحة فى مصر وكانت مهنة ومكانش فى أى واحدة بتشتغل فيها وخلاص ولازم شهادة صحية عشان ضباط الجيش الإنجليز كانوا بيعطوا كتير فى مصر وكان لازم يشوف الشهادة الاول
هم يبكى وهم يضحك والله

ثالث حاجة :
المشنقة
نشأة جرائم القتل فى زمننا المعاصر وأسباب القتل اللى بتوصلك لحد باب حبل المشنقة
يعنى ليه الناس بتقتل ووجهة نظر القاتل بل والمقتول والكتاب يتضمن قضية خطيرة فى الجزئية دى قذرة لدرجة إنى مش عايز أفتكرها

أينعم الكتاب كان بجنيه ونص من عالرصيف وكان من إصدار دار كتب أول مرة أسمع عنها وكان كمان إصدار قديم

بس صراحة عجبنى أوى وكان يستاهل كل مليم دفعته فيه أيام ما كنت بحوش الربع جنيه عالربع جنيه ويبقوا خمسة وسبعين قرش (( فلوسى بقى ))

طيب أنا إفتكرت الكتاب دا ليه ؟؟؟
كنتيجة طبيعية للى شايفه
يعنى شايف الإعلام بيهيص عن الجزائر والمصريين اللى ماتوا والناس اللى إتعجنت والعك دا كله
وقريت بوست فى مدونة سياسية شهيرة بيحكى عن الحوار دا بل وقريته بالتعليقات
وأول ما قريته لاحظت إن كاتبة الموضوع مع إحترامى ليها ربطت الموضوع على طول بالسياسة
وبأن علاء مبارك وساويرس هما السبب ومش عارف مين وكلام بتنجان كدا تطلع من البوست منتش عارف وشك من قفاك
وطريقة تحوير الموضوع سياسيا خلتنى إفتكر النقطة الخاصة بالكيف
والخاصة بإن كل واحد فى البلد دى ليه حشيش خاص بيه أو مخدر بيدمنه وبيبدع فيه وبيظبطله المسائل
إزاى ؟؟؟

تعالى أفهمك

يعنى مثلا :

السياسة :
أكتر حاجة تنقطنى بقى الجماعة بتوع السياسة دول
تلاقى الواحد من دول عمال يتكلم وياما هنا ياما هناك ويرغى ويقبح عالحكومة وكل أما يشتم أكتر
الناس تحبه أكتر ...(( غباوة تلقائية متبعة فى مجتمعنا ))
صحيح الناس مش بتنضم لتفكيره السياسى بس بتبتدى تفكر زيه
وتلاقى الشخصية اللى بتتكلم فى السياسة دى
مش هقول فى حاجات متعرفهاش
ولكن هقول إنها بتتكلم بس
يعنى لا بتعمل حاجة ولا بتهش ولا بتنش
يعنى بدل ما تتكلم عن الدستور وأخطاؤه وجنابك قاعد عالمسطبه
قوم إتنحرر وخد موقف
إرفع قضية إن شاء الله على أتخن تخين فى البلد دى
إعمل حاجة تخليك لما تنطق تبقى كلمتك مسموعة وليك سلطة تقدر منها تغير فعلا
بدل ما إنته قاعد تتكلم وتحرق فى دمنا يمين وشمال وتخلينا نكره فى مبارك وساويرس وعلاء وجمال والشاذلى وكل الأندال
الناس دى بقى المخدر بتاعها هوا السياسة
هات له كتاب فى السياسة أو تابعه فى أثناء وجود حدث سياسى هام أو موضوع خطير
تلاقيه بقى لا هوا على حامى ولا بارد وشغال فى العك هنا وهناك وطالع بمتين وجهة نظر بتبقى حاسس وعايز إنك لابد من قتله شر قتله
وعايش فى عالم تانى خالص ولا بيفكر فى الجعانين ولا الفقرا ولا الشحاتين فى البلد دى
هيطلع واحد بيقولى ما هوا بيكتب عشان مستقبل الجعانين دول
أقوله وهوا الجعانين دول هيمسكوا اللى كتبته وياكلوه أو يستغطوا بيه ؟؟؟؟
لازم نفكر صح يعنى نغير فعلا مش نقعد نتكلم ومحكى وإزيك ياللى هناك
أنا بخير ياللى هنا

الحب والرومانسية والحريم
تلاقى بقى فى ناس تانية المخدر بتاعهم هوا جو الحب والرومانسية والبنات اللى مظبطينهم
وعلى طول ماسك الموبايل وبيتكلم وهيمان فى عالم تانى أو ماشى عالكورنيش بيفعص فى إيد الموزة بتاعته
يعنى صراحة .... حياته كلها بتتمحور فى النقطة دى
ولا هوا بيتجوز ولا بيتنيل ولا حتى بيحب حد بجد ويرتبط بيه وخلصت
ودوله بقى المخدر بتاعهم بيخليهم سيس شويتين ومحدش يسألنى يعنى إيه سيس

الدراسة والشهادات :
تلاقى برده طائفة تانية من الناس عايشين مع الشهادات وبس
يعنى عمال يدرس ويفرم ويفحت ويقطع فى نفسه فى دبلومة معهد اللاسلكى أو فى كلية مش عارف إيه
وسايب كل حاجة تانية فى الحياة وكأن الدنيا هتيجى تعيط له وتقوله والنبى يا شيخ تعالى عيشنى شوية
يعنى طول ما هوا بيذاكر هوا تمام أوى
ومن وجهة نظرى بعتبر المخدر دا قوى جدا
ومفعوله بينتهى لما بينضم صاحبنا لفئة العاطلين ويأنتخ كام شهر فى البيت

الكورة اللى ربنا يخرمها قادر يا كريم :
وفى ناس تانية بتعشق الكورة
طول ما هما ماشيين بيتكلموا عن الجون بتاع متعب وعن الشوطة التالتة بتاعت أبو تريكة من الفاول الثابت اللى شاطها وطلعت برا وعمالين يقولوا حاجات كدا مش عارف معناها إيه عن الماتشات والليلة دى وكل اللى يهمهم الماتش الساعة كام وهنتفرج فين
ولو بصيت له وهوا ماشى تلاقى معاه جورنال الرياضة وفاتح الصفحة بتاعت الأهلى
لأن الزملكاوية قليليين أوى مش هتلاقى منهم كتير وإنته ماشى
وعمال يقرا بقى ومندمج وتح إنه هيطلع له أوت من الجورنال يشوطه ويجيب جون فى نفسه ويبقى حقق حلم حياته
ومن تحت راس الهبابة دى المصريين يضربوا فى بعض ويضربوا فى الجزائر والجزائر تشتم فينا وتقول القاهرة الفاجرة
بعد ما كنا فى السما من الأخر يطلع شوية .... يقولوا علينا كدا
نستاهل والله نموت هناك وناخد بالجزمة كمان عشان إعطينا حاجة أكتر من قدرها وحولناها من مجرد لعبة وتشجيع وروح طيبة ل هوس وخناقة ولازم نتأهل ونتنيل

النت :
فى ناس بقى كل وأهم حاجة فى حياتهم هى النت
وتلاقيه طول الوقت مقضيها هنا وهناك عمال يعمل داونلود ويكلم فى البت فلانة ويثبت فى البت التانية
ويخش يعمل مدونة ويشتغل الناس هنا وهناك وحركات
وناسى خالص إن فى ناس من خلال النت دا بتكسب ملايين والموضوع دا حقيقى وشفته بعينى
وناسى إن النت مش سكس ومسخرة أو تجارة أو تعليم بس
دا نافذة ليك عالعالم تقدر توصل منها لأى شىء
تقدر تدرس وتبقى تمام وتروح تاخد الدكتوراة
أو تقدر تعرف كافة المعلومات اللى محتاجها فى مجال معين

الأغانى والمطربين :
تلاقى بقى فئة حلوة أوى كدا بتموت فى الأغانى والجرح والعذاب والهبل دا كله
ما هوا هما معتقدين إن الحياة أغنيه بس وناسيين إن الأغانى دى ما هى إلا مزيكا وكلمات أحيانا بتفيد وتحسن الحالة وكتير أوى بتضر
وغير كدا تلاقى بقى روابط لعشاق تمورة الأمورة
اللى بحس كل ما أشوفه إنه عيل مش تمام متنى كدا من اللى بيعمله فى الكليبات واللقاءات ويطلع يتنحنح ويعيط ويصعب علينا شوية
صباح التيت يا تيت يابن التيت
الكلمة دى موجهة للشاب تمورة الأمورة : حاول تفوق من اللى إنته فيه
ودى بقى موجهة لعشاق مطرب معين : طز

الدين :
ناس حلوين بقى تانيين مركزين أوى مع الدين
ومنضمين كمان للأخوان وفاكرين إنها جدعنه أو إن دا يرضى ربنا
الحمد لله أنا ليه جماعة قرايبى يعتبروا من قيادات الأخوان فى القاهرة
بل إن فى جد من عيلتى من اللى إعتقلوا فى حادثة موت السادات وفضلوا فى المعتقل كام سنة وطالع منه حاجة تانية خالص
بس أنا بكره الإخوان جدا ومش بحبهم ولا بطيق نهجهم وسلوكهم
لأن أى تفكير مفهوش إخلاص لربنا بجد تأكد إنك رايح بيه جهنم
يعنى من الأخر كدا
عايز تفكر فى الدين أوكى ...... لكن متنساش السبب من وجودك فى الكون إنك تعبد ربنا وتعمره

***
يا خسارة حاليا مش عارف ولا قادر أفتكر حاجة تانى

لكن والله صدقونى الحياة أعظم وأكبر من إننا نقضيها فى حاجة واحدة بس

لازم تدرس وتشتغل وتكتب تدوينات وتصاحب ناس وتقرب من ربنا وتعمل كل حاجة

مش لازم يبقى ليك مخدر معين يلهيك عن كل حاجة فى الحياة ويخليك تركز معاه هوا بس وتسيب كل حاجة

حاول تغير أو تنتج وتحط هدف وتوصل له وتعيش فخور بنفسك وراضى عن نفسك يعنى لو موتت حالا مش هموت حزين

لأنى خلاويص حققت رسالتى فى الحياة

بس كدا

شاب فقرى

إمكانياتى صفر


السلام عليكم جميعا

يارب دايما بخير

هنا الفقرى يتحدث بكل فقره وهمومه ومشكلاته وسلطاته وبابا غنوجه

اليوم حصلى موقف فى الشغل تعب اعصابى

كنت فى مدينة جديدة بعمل شغل لناس مهمين

طبعا فى البدايه انا كنت فاكر الشغل فى الشقة تبع الراجل الكبير اللى بيتكلم معانا

وعادى بقى مر يوم الشغل بكل تعبه وهمومه وقرفه والحمد لله إتعلمت كتير أوى وتعبت أكتر

لأن التركيبات بتبقى متعبه وبتكسر الجسم وبتخلى الواحد راجع مش شايف قدامه

فما بالكم بقى بالشىء اللى زاد همى

بعد ما خلصت الشغل ومشيت بكلم صحبى

فبقوله إلا مين الواد الشاب اللى كان بيكلمك دا بعد ما خلصنا الشغل

قالى : واد مين يا كيمو دا وكيل نيابة يابنى

أنا ضحكت أوى أوى أوى

دلوقتى إتضحت كل حاجة فى بلدنا العظيمة دى

تجمعت حواليه كل حاجة

إن لما واحد أمور يخلص الكلية

وباباه يشوف له وظيفة بواسطة ويشغله

ويجيب له شقة فخمة فى مدينة جديدة

ويجيب له عربية 2009

ويتجوز أحلى وأرق بنت فى الكلية وأطيب بنت

ويجيب منها بنوتة زى القمر

طبعا ربنا اللى يعلم إنى ميفرقش معايه كل دا

أنا من وجهة نظرى إن البنى آدم رأس ماله هوا تفكيره ونفسه وعقليته

يعنى مش هتفرق أنا اهلى مين أو أهل مراتى مين أو حتى ساكن فين

عارفين إيه أكتر حاجة إتمنيتها فى كل دا ؟؟؟؟؟

فكروا

إنى نفسى أتجوز عشان يبقى عندى بنوتة عسولة زى دى

ملحوظة :
كنت بكلم صاحبى بقوله بتحلم بإيه ؟؟
قالى نفسى فى شقة فى المدينة الحلوة دى لأنى بعشق الهدوء
رديت بينى وبين نفسى :
إنته حلمك شقة لأنك بتعشق الهدوء
أنا حلمى أبقى صاحب المدينة دى اللى أنشأها من الأصل
لأنى مينفعش أحدد حلمى وطموحى فى شقة وعربية ووظيفة وهبل من دا
أنا مقتنع فعلا إن كل واحد عايش فى الدنيا دى
على قد حلمه
يعنى أنا بحلم إنى أشتغل بمرتب 500 جنيه يبقى يوم ما أخسر حلمى هشتغل ب 400
لأن الحلم هوا اللى بيحدد هدفك و يخليك تتعب عشان الهدف دا وبيحدد تعبك

أكيد فهمتوا قصدى

وفهمتوا يعنى إيه إمكانياتى صفر

يعنى لا أملك إلا نفسى

لا فى واسطة تجيبلى وظيفة فى موقع حساس

ولا فى كاشات بنكيه تخلينى أعمل مدينة كرمللة

ولا فى أب أو قريب يقف جمبى ويمد لى إيده ويمهد لى الطريق بخبرته

طبعا والدى الله يرحمه كان معروف عنه إنه لو لمس التراب بيحوله دهب (( يعنى كان شاطر أوى أوى أوى ))

وأنا حاليا بحاول أكون كدا

أو كمان أحسن من كدا

صحيح الإمكانيات صفر

بس الشغل جبار

والتعب والمجهود المبذول كبير

والأمل فى ربنا أكبر


مش هطول عليكم

دقايق وهرد عالتاج

شاب فقرى

الجمعة، 20 نوفمبر 2009

حقا إمتلكونى


كلما إقتربوا منى
وهم يظنون العكس
وهم لا يعلمون
كلما وقفوا بجوارى
كلما لم يشعروا بأنهم يقدمون شيئا
بأن ما يفعلونه (( عادى )) من أجلى
أنه لا يوجد بشر آخر يقتربون منه هكذا
يضحون من أجله
يتعبون حقا
ولكن لا يشعرون
يظلون بجوارى
برغم أننى لا أعلن حالتى لأحد
برغم أننى لا أقبل قرب أحد
طالما إقتربوا ولو حتى مرة
وساندونى دون أن يدرون
دون أن يشعرون بأن هذا شيئا إضافيا
وأنه يجب أن يظلوا هكذا دائما
وأنهم لا ينتظرون أى شىء
فقد إمتلكونى
وإلى الأبد
سيجدوننى بجوارهم
حتى وإن لم أستطع أن أكون لهم صفة أمام الناس
فلا أنا صديق ولا حبيب ولا زوج ولا عشيق
أنا ما هوا أنا
كريم
وهم هنا فقط
دون أن يشعروا
فقد إمتلكونى
وإلى الأبد
وحتى يقولون (( إرحل فى سلام ))

شاب فقرى
ملحوظة : بجد شكرا
ملحوظة : البوست الجاى تاج هرد على كل اسئلة البوست الماضى