السبت، 21 نوفمبر، 2009

الجوزة والسرير والمشنقة


قريت مقال من شوية عالنت فكرنى بكتاب كنت قريته زمان

الكتاب بعنوان الجوزة والسرير والمشنقة

ببساطة الكتاب دا بيتكلم عن أكتر الحاجات اللى كانت موجودة زمان فى مصر وحاليا برده

أول حاجة :

الجوزة

أو الشيشة والحشيش والكيف
الكتاب بيحكى عن قدوم الحشيش لمصر وإدمان الناس ليه وبداية شرب الحشيش فى مصر ومن أول واحد خد نفسين أيام ماكان الحشيش مش مغشوش ومليان بنج وبلاوى
الكتاب بيحكى عن فلسفة شرب الناس للحشيش وبرده بيحكى قصة لشخصية بتحب المخدرات عموما والحشيش خصوصا

تانى حاجة :
السرير :
السرير هنا بمعنى صناعة البغاء فى مصر أو الدعارة لا مؤاخذة يعنى
مش عايز واحد يطلع يقولى الزنا حرام وإنته بتتكلم كدا ليه
وبيحكى عن نشأتها فى مصر ووجودها من بين 1900 لحد سنة إصدار الكتاب
وبيحكى عن إنها كانت مباحة فى مصر وكانت مهنة ومكانش فى أى واحدة بتشتغل فيها وخلاص ولازم شهادة صحية عشان ضباط الجيش الإنجليز كانوا بيعطوا كتير فى مصر وكان لازم يشوف الشهادة الاول
هم يبكى وهم يضحك والله

ثالث حاجة :
المشنقة
نشأة جرائم القتل فى زمننا المعاصر وأسباب القتل اللى بتوصلك لحد باب حبل المشنقة
يعنى ليه الناس بتقتل ووجهة نظر القاتل بل والمقتول والكتاب يتضمن قضية خطيرة فى الجزئية دى قذرة لدرجة إنى مش عايز أفتكرها

أينعم الكتاب كان بجنيه ونص من عالرصيف وكان من إصدار دار كتب أول مرة أسمع عنها وكان كمان إصدار قديم

بس صراحة عجبنى أوى وكان يستاهل كل مليم دفعته فيه أيام ما كنت بحوش الربع جنيه عالربع جنيه ويبقوا خمسة وسبعين قرش (( فلوسى بقى ))

طيب أنا إفتكرت الكتاب دا ليه ؟؟؟
كنتيجة طبيعية للى شايفه
يعنى شايف الإعلام بيهيص عن الجزائر والمصريين اللى ماتوا والناس اللى إتعجنت والعك دا كله
وقريت بوست فى مدونة سياسية شهيرة بيحكى عن الحوار دا بل وقريته بالتعليقات
وأول ما قريته لاحظت إن كاتبة الموضوع مع إحترامى ليها ربطت الموضوع على طول بالسياسة
وبأن علاء مبارك وساويرس هما السبب ومش عارف مين وكلام بتنجان كدا تطلع من البوست منتش عارف وشك من قفاك
وطريقة تحوير الموضوع سياسيا خلتنى إفتكر النقطة الخاصة بالكيف
والخاصة بإن كل واحد فى البلد دى ليه حشيش خاص بيه أو مخدر بيدمنه وبيبدع فيه وبيظبطله المسائل
إزاى ؟؟؟

تعالى أفهمك

يعنى مثلا :

السياسة :
أكتر حاجة تنقطنى بقى الجماعة بتوع السياسة دول
تلاقى الواحد من دول عمال يتكلم وياما هنا ياما هناك ويرغى ويقبح عالحكومة وكل أما يشتم أكتر
الناس تحبه أكتر ...(( غباوة تلقائية متبعة فى مجتمعنا ))
صحيح الناس مش بتنضم لتفكيره السياسى بس بتبتدى تفكر زيه
وتلاقى الشخصية اللى بتتكلم فى السياسة دى
مش هقول فى حاجات متعرفهاش
ولكن هقول إنها بتتكلم بس
يعنى لا بتعمل حاجة ولا بتهش ولا بتنش
يعنى بدل ما تتكلم عن الدستور وأخطاؤه وجنابك قاعد عالمسطبه
قوم إتنحرر وخد موقف
إرفع قضية إن شاء الله على أتخن تخين فى البلد دى
إعمل حاجة تخليك لما تنطق تبقى كلمتك مسموعة وليك سلطة تقدر منها تغير فعلا
بدل ما إنته قاعد تتكلم وتحرق فى دمنا يمين وشمال وتخلينا نكره فى مبارك وساويرس وعلاء وجمال والشاذلى وكل الأندال
الناس دى بقى المخدر بتاعها هوا السياسة
هات له كتاب فى السياسة أو تابعه فى أثناء وجود حدث سياسى هام أو موضوع خطير
تلاقيه بقى لا هوا على حامى ولا بارد وشغال فى العك هنا وهناك وطالع بمتين وجهة نظر بتبقى حاسس وعايز إنك لابد من قتله شر قتله
وعايش فى عالم تانى خالص ولا بيفكر فى الجعانين ولا الفقرا ولا الشحاتين فى البلد دى
هيطلع واحد بيقولى ما هوا بيكتب عشان مستقبل الجعانين دول
أقوله وهوا الجعانين دول هيمسكوا اللى كتبته وياكلوه أو يستغطوا بيه ؟؟؟؟
لازم نفكر صح يعنى نغير فعلا مش نقعد نتكلم ومحكى وإزيك ياللى هناك
أنا بخير ياللى هنا

الحب والرومانسية والحريم
تلاقى بقى فى ناس تانية المخدر بتاعهم هوا جو الحب والرومانسية والبنات اللى مظبطينهم
وعلى طول ماسك الموبايل وبيتكلم وهيمان فى عالم تانى أو ماشى عالكورنيش بيفعص فى إيد الموزة بتاعته
يعنى صراحة .... حياته كلها بتتمحور فى النقطة دى
ولا هوا بيتجوز ولا بيتنيل ولا حتى بيحب حد بجد ويرتبط بيه وخلصت
ودوله بقى المخدر بتاعهم بيخليهم سيس شويتين ومحدش يسألنى يعنى إيه سيس

الدراسة والشهادات :
تلاقى برده طائفة تانية من الناس عايشين مع الشهادات وبس
يعنى عمال يدرس ويفرم ويفحت ويقطع فى نفسه فى دبلومة معهد اللاسلكى أو فى كلية مش عارف إيه
وسايب كل حاجة تانية فى الحياة وكأن الدنيا هتيجى تعيط له وتقوله والنبى يا شيخ تعالى عيشنى شوية
يعنى طول ما هوا بيذاكر هوا تمام أوى
ومن وجهة نظرى بعتبر المخدر دا قوى جدا
ومفعوله بينتهى لما بينضم صاحبنا لفئة العاطلين ويأنتخ كام شهر فى البيت

الكورة اللى ربنا يخرمها قادر يا كريم :
وفى ناس تانية بتعشق الكورة
طول ما هما ماشيين بيتكلموا عن الجون بتاع متعب وعن الشوطة التالتة بتاعت أبو تريكة من الفاول الثابت اللى شاطها وطلعت برا وعمالين يقولوا حاجات كدا مش عارف معناها إيه عن الماتشات والليلة دى وكل اللى يهمهم الماتش الساعة كام وهنتفرج فين
ولو بصيت له وهوا ماشى تلاقى معاه جورنال الرياضة وفاتح الصفحة بتاعت الأهلى
لأن الزملكاوية قليليين أوى مش هتلاقى منهم كتير وإنته ماشى
وعمال يقرا بقى ومندمج وتح إنه هيطلع له أوت من الجورنال يشوطه ويجيب جون فى نفسه ويبقى حقق حلم حياته
ومن تحت راس الهبابة دى المصريين يضربوا فى بعض ويضربوا فى الجزائر والجزائر تشتم فينا وتقول القاهرة الفاجرة
بعد ما كنا فى السما من الأخر يطلع شوية .... يقولوا علينا كدا
نستاهل والله نموت هناك وناخد بالجزمة كمان عشان إعطينا حاجة أكتر من قدرها وحولناها من مجرد لعبة وتشجيع وروح طيبة ل هوس وخناقة ولازم نتأهل ونتنيل

النت :
فى ناس بقى كل وأهم حاجة فى حياتهم هى النت
وتلاقيه طول الوقت مقضيها هنا وهناك عمال يعمل داونلود ويكلم فى البت فلانة ويثبت فى البت التانية
ويخش يعمل مدونة ويشتغل الناس هنا وهناك وحركات
وناسى خالص إن فى ناس من خلال النت دا بتكسب ملايين والموضوع دا حقيقى وشفته بعينى
وناسى إن النت مش سكس ومسخرة أو تجارة أو تعليم بس
دا نافذة ليك عالعالم تقدر توصل منها لأى شىء
تقدر تدرس وتبقى تمام وتروح تاخد الدكتوراة
أو تقدر تعرف كافة المعلومات اللى محتاجها فى مجال معين

الأغانى والمطربين :
تلاقى بقى فئة حلوة أوى كدا بتموت فى الأغانى والجرح والعذاب والهبل دا كله
ما هوا هما معتقدين إن الحياة أغنيه بس وناسيين إن الأغانى دى ما هى إلا مزيكا وكلمات أحيانا بتفيد وتحسن الحالة وكتير أوى بتضر
وغير كدا تلاقى بقى روابط لعشاق تمورة الأمورة
اللى بحس كل ما أشوفه إنه عيل مش تمام متنى كدا من اللى بيعمله فى الكليبات واللقاءات ويطلع يتنحنح ويعيط ويصعب علينا شوية
صباح التيت يا تيت يابن التيت
الكلمة دى موجهة للشاب تمورة الأمورة : حاول تفوق من اللى إنته فيه
ودى بقى موجهة لعشاق مطرب معين : طز

الدين :
ناس حلوين بقى تانيين مركزين أوى مع الدين
ومنضمين كمان للأخوان وفاكرين إنها جدعنه أو إن دا يرضى ربنا
الحمد لله أنا ليه جماعة قرايبى يعتبروا من قيادات الأخوان فى القاهرة
بل إن فى جد من عيلتى من اللى إعتقلوا فى حادثة موت السادات وفضلوا فى المعتقل كام سنة وطالع منه حاجة تانية خالص
بس أنا بكره الإخوان جدا ومش بحبهم ولا بطيق نهجهم وسلوكهم
لأن أى تفكير مفهوش إخلاص لربنا بجد تأكد إنك رايح بيه جهنم
يعنى من الأخر كدا
عايز تفكر فى الدين أوكى ...... لكن متنساش السبب من وجودك فى الكون إنك تعبد ربنا وتعمره

***
يا خسارة حاليا مش عارف ولا قادر أفتكر حاجة تانى

لكن والله صدقونى الحياة أعظم وأكبر من إننا نقضيها فى حاجة واحدة بس

لازم تدرس وتشتغل وتكتب تدوينات وتصاحب ناس وتقرب من ربنا وتعمل كل حاجة

مش لازم يبقى ليك مخدر معين يلهيك عن كل حاجة فى الحياة ويخليك تركز معاه هوا بس وتسيب كل حاجة

حاول تغير أو تنتج وتحط هدف وتوصل له وتعيش فخور بنفسك وراضى عن نفسك يعنى لو موتت حالا مش هموت حزين

لأنى خلاويص حققت رسالتى فى الحياة

بس كدا

شاب فقرى

هناك 33 تعليقًا:

ponpona يقول...

مممممم
صباحك ورد
:))
لسه ماقرأتش البوست بصراحه ، مماهو انا انام واصحي الاقي بوستين !! قريت اللي فات ودا بقي هاقراه بالليل ان شاء الله لان انا نازله حاليا ..

بس في حاجه
"صدرى ومنخيرى وزورى بيجيبوا دم :'( وبرده مش هروح لدكتور :("
ايه اللي مش هاروح لدكتور دي .. هاه؟ لازم أزعق يعني ؟؟
ياكريم لو جسمك وصل للحاله دي يبقي لازم فعلا تعمل ستوب وتريحه شويه لان حلمك الكبير عايز جسم كويس .. ولا ايه؟ اتعب اي نعم واعمل مابدالك بس اوعاك دا يجي علي صحتك قوي
يافقري جسمنا أول مايبتدي يعترض كده يبقي لازم نريحه شويه .. لازم نهدي حبتين عشان نقدر نكمل وإلا هو هيسيبك في عز مانتا محتاجله ويقولك خلاص انا هاقف شويه استريح وارجعلك

لو الموضوع وصل معاك لدرجه دم يبقي دي ساين مش كويسه بالمرة
:(

خلاص

غير معرف يقول...

هو سؤال بسيط يعنى

ايه حبك فى احمد حلمى

بس الصراحة بتبقى معبرة
وحلو العنوان

غير معرف يقول...

صباحك سكر زيادة

ههه
حلوة فلسفة شرب الحشيش دى

صناعة البغاء ؟؟؟؟؟
ايه الكتاب دا

الناس خلاص مبقتش طايقة بعضيها
ولا طايقة هدومها اصلا
وفيه عوامل كتيير جدا
بتخلى الشخص ينحرف
بس برضو دا مش مبرر انه يقتل
بس نعمل ايه فى شوشو بقى

كل ملييييم ؟ ياعم دا جنيه ونص
يعنى مش محصل علبة كانز
بس بدام انت قولت يساهل يبقى يستاهل

انا من رأيى فى موضوع مصر والجزائر
انهم ناس فاضية
ومعجبنيش خالص اللى حصل
شمتوا فينا كل الناس
عيب علينا اصلا اللى عملناه واللى هما عملوه .......... والرغى دا
اسرائيل مبسوطة وبتضحك وبتقول عقبال مايحصل كدا بين باقى الشعوب
وعقابل فتح وحماس ؟؟؟؟
المفروض الماتش دا من البداية مكنش اتعمل
وبعدين فين الروح الرياضية انا بحس اننا فى حلبة مصارحة مش كورة قدم

فيه ناس بجد تستحق انك تشتمهم
وتدعى عليهم
ولانى مليش فى السياسة ولا بحبها
فمش هتكلم فيها كتير
علشان مخبطش فى الحلل

الشباب دول بتوع اللبانة والسلسلة
والبطلون الساقط
والواد من دول عاملى فيها عم الفلانتينو ورشدى اباظة ولا احمد مظهر ولا حتى احمد حلمى :) فى زمانه

بينقطونى بجد وبكون نفسى افوق البت اللى بتحبه وهيمانه وفاكره انه هيموت عليها وهو ليها لوحديها ياحبه عين ماماتها فى الاخر تلبس فى حيطة او تصحى من الحلم دا على فازوع كوبسة :)

نفسى اخبطها على نافوخها كدا علشان تصحى من الغيبوبة اللى هى فيها
فعلا الحب دا عامل زى الهيروين

لااتفق معك فى هذا الموضوع
ياعمونا البلد دى بتاعة شهادات
سيبك انت
يعنى الواد اللى معاه ليسانس ولا باكلريوس احسن ولا اللى معاه معهد ولا دبلوم

طب دول ولا اللى محضر الماجستير والدكتوراه وبيشتغل
او معاه دورات وبيشتغل بيها
وبعدين ماانت برضو بتذاكر وبتشتغل
وبتدرس ومقطع نفسك وعايز توصل
وبتذاكر فى كام مجال ؟؟؟؟ ولا اييه

سيبك من الكورة لانى مبحبهاش ولا ليا فيها زى السياسة كدا
تقولى امال انت عايشة ليه

غلاااسة :):)

يقطع النت على النتيت على اللى هينتتوا علييه قادر ياكريم
النت دا ادماااااااان
دا افظع من الحشيش والهروين واى مخدرات
ماهو زى مافيه الفئة اللى بتتكلم عنها فيه برضو الفئة المثقفة اللى زي كدا ويتشتغل على النت 100 ساعة
وهتكسب الملايين دى ان شاء الله

انا احب الاغانى لكلماتها
والحانها مهما كان مين المطرب
بس برضو مفيش احسن من زمن الفن الجميل

وبتفرس جدا من لما اتفرج على كليب كدا ولا كدا
اوولا فى الحفلات شلل

واحنا كدا هنخبط فى الحلل بجد
ياعمونا
الاخوان مش محشين خالص
انا اول واحدة لاكنت احبهم
وزيك كدا انا من طريق وهما من طريق لمجرد انى اتعاملت مع حد ومعجبنيش تصرفاته
فحكمت على كدا
لكن بجدبجد
لما قربت منهم لقيتهم شخصيات جميييلة جدا
سيبك من حكاياة الاعتقال والكلام دا
لا دى سياسة وانت فاهم الباقى

بص انت مش عاجبك الاخوان دى حاجة ترجعلك لكن تفرض فكرك لحد لا
هما لو مش كويسسين وهما اللى فعلا هيصلحوا البلد دى
مكنوش اعتقولوا ويتمنعوا من دخول الانتخابات
وبعدين انت حكمت منين ان مفيش اخلاص لربنا
انت دخلت جوا قلوبهم يعنى
الرسول قال خير الامور الوسط
وهما ماشيين على المنهج دا انا واحدة من الناس دخلت وسطيهم وخطيبى واحد منهم
بيعرفوا يوفقوا كويس اوى بين دعوتهم لربنا وبين شغلهم وبيتهم
لاهما ارهاب ولا متعصبين ولامتطرفين

انا اتعاملت مع جميع الجماعات
من اخوان وانصار سنة والتكفير والهجرة
علشان بس اشوف مين الاحسن بجد
ملقتش غير الاخوان

ميقولكش دا حرام ودا حلال وهتروح النار يااكاافر لا خالص
يفهمك ويوجهك وانت ودماغك
يعنى اللهم انى قد بلغت اللهم فأشهد
ماشيين زى عمر خالد ومصطفى حسنى ومعز مسعود والقرضاوى ووجدى غينم وغيرهم

معلش لو طولت عليك وياريت تقبل مرورى
بس انا بضايق من اللى النس اللى بيعملوا زيك كدا

انت مش حابب حاجة خلاص
لكن وتقول هتروح معاهم جهنم

امال مين بقى اللى هيروح الجنة
بتوع الكليبات والبنات والشباب الصايع
طب الشباب دول مش لازم يكون فيه حد ينصح ويربى

كنت فاكره عقليتك افضل من كدا
كنت فاكره انك متفهم اكتر من كدا
لكن يلا

تحياتى لك

فتاه محبة للحياه

جارة القمر يقول...

ايه النصب العلنى دا فين التاج عاااااااا انا هرفع عليك قضية هيه بس :(

ندخل بقى فى البوست دا يااااااااه يا فقرى دا انت دخلت فى كام حاجه كبار اوى اوى كل واحد عايز مقال لوحده

اولا بس انا فرحت و اتمزجت من البوست لما لقيتك غلطت سهوا و كتبت فقرة باللون اللى انا بحبه ميرسى

اقول رايى بقى واحدة واحدة اولا السياسة هى فعلا افيونة لناس كتير اووى لان شعبنا بطبيعته بيحب اللى يشتم الحكومة بما انها ظالمة و مفترية عليهم و بالتالى بسهولة جدا يكسب احتفاء الناس بيه ... لكن انا من وجهة نظرى ان اى تغير بيبدأ بالكلام و بعد كدا يطلع واحد مفتح زى حضرتك كدا و يقول لازم نعمل حاجه و ناخد موقف ايجابى فتبدأ مرحلة الفعل و عن قراءة تاريخية احنا شعبنا بياخد وقت طويل فى مرحلة الكتابة لحد ما يتنقل لمرحلة الفعل

اما بقى بتوع الحب و الرومانسية اعتقد من وجهة نظرى الشخصية ان وصلهم للطريقة دى فى الحياة ليه اكتر من سبب ظروف اقتصادية بنعشها بتخلى اى حد فاضى و عاطل عن العمل يروح يدور على اى حاجه تافه يشغل بيها وقته ... دا غير ان بحس ان مجتمعنا بقى فيه ازمة تربوية و ثقافية

الدراسة و الشهادات بتفق معاك انه بيغير اتجاهه بعد ما بيأنتخ فى البيت كام شهر

الكورة و النت و الاغانى هينضموا لنفس كلامى عن الحب و الرومانسية انه فراغ بيعيشه كتير من الشباب و تبقى النتيجة الطبيعية اللى موجودة من فئات اهتمامها بنصب على حاجه مش هتفيده فى حياته و تبقى هى شغله الشاغل ... و طبعا مش اقصد ان الاهتمام بالنت كله مالوش لازم لكن اقصد اللى بيستخدمه لمجرد التسلية فقط

الدين بقى انا بتفق معاك ان كل واحد فاكر انه يرضى ربنا انه يتشدد فى افكاره و يعطى لنفسه الحق فى تكفير الاخرين فى رايى الدين دائما وسطية ...المهم ترضى ربنا و تعبش حياتك برضو

حاجه بقى عايزة اقولها مش مبالغة و الله خالص بس فعلا تفتكر ان موقف الجزائر دا طبيعى و ممكن يكون سببه ماتش كورة لا اعتقد احنا لعبنا معاهم كتير اشمعنى المرة دى يعنى .. خاصة ان اللى حصل مدعم من حكومتهم نفسها يعنى موقف دولة مش موقف شعب هى بس الدولة استخدمت المجموعة المتعصبة كرويا لا اكثر ولا اقل لكن مش كل الشعب الجزائرى مشترك فى هذا الامر ... مش ممكن دولة تضحى بعلاقاتها الدولية و تعمل كل دا عشان خاطر ماتش كورة لا اعلم السبب ان كان سياسيا او غير ذلك لكنى لا اعتقد انه يعتمد فقط على ماتش كورة ... الاصعب الا يغيب عنا المطالبة بأخذ حقنا لهجوم الحزائر ولا نطالب ولا يقف اعلامنا اما تعدى اسرائيل علينا فى مواقف اخرى حاجه غريبة و الله

انا طولت اوى اوى انا اسفة بجد بس فعلا البوست مليان حاجات كتير اوى

صباح البنفسج سلالالالام

غير معرف يقول...

فى حاجة كمان عايزة اقولهالك

يااااااريت تعيد النظر فى الماضى

صدقنى هتستريح كتييييييير

وفكر كويس وحاول تغير نظرتك شوية
هتلاقى عندك حاجات اتغيرت كتيييييير

اكيد فاهمنى
ولو مفهمتش .............

فتاه من الصعيد يقول...

حلو التحليل ده

احيانا بندمن حاجات موش بتوصلنا لشيء

يعني لو ادمنت مذاكره مع نت مع حبه رومانسيه .... الدنيا هتتظبط لانهم هيعملوا توازن مع بعض .... وموش هيكون في ادمان اصلا لان كل حاجه هتاخد وقتها

بس انت نسيت ادمان الشغل .... ده مفيد بس بيدمر حياتنا الاجتماعيه ساعات كتير

كمان على فكره الزمالكاويه موش قليلين .... هما بس بيستخبوا اليومين دول نياهاهاها

تحياتي

فراشة يقول...

هييييييييييه جيت بدري شوية
كل مرة آجى الاقي مليون تعليق
مش بححسد ماتخافش ههههههه

بس فعلا كل واحد تحس انه مركز قوي ف حاجة واحده وكأن هي دي دنيته
صحيح ساعات ببقى كدا
بس برجع اركز ف كذا حاجة فافرح وانبسط بحب انا التغيير

من الانواع اللى كتبتها تقريبا انا احيانا بكون النوع اللى بيحب الدراسة بس مش فحت وكدا بس للعلم واهو بالمرة شهادة يمكن تنفعنى وربنا يسهل

المهم انا مبسوطة انى جيت ف بوست جديد
عشان مش بعرف ادخل كتير على النت

سلام بقى...ف حفظ الله

أميرة علي كوكب مهجور يقول...

اولا لازم تروح لدكتور هو عند وخلاص دماغك ناشفه تروح وتطمننا عليك وان شاء الله خير


حلو الكتاب ده انا بحب الكتب القديمه بتاعت سور الازبكيه ليها ريحه مميزه و ورقها مميز :)


انا معاك مينفعش الواحد يمحور حياته في منعطف واحد بس ايه اللي انا بقوله ده مين فتح التليفزيون:)

المدونه عارفها وبرضه مش بفهم في الاخر ايه الهدف او المضمون كلام يحرق الدم وخلاص

كريم روح لدكتور ويارب تكون بخير

sookra يقول...

الله يحرق كدا
هاعلق تعليق كبير بس اما ادى بابا الدوا وارجع

سلمى يقول...

السلام عليكم
سيدى احسنت فيما قلته
لا اجد التعليق المناسب فلا يوجد كلامات ابلغ من كلماتك
تحياتى

sookra يقول...

بما انى قريت الكتاب دا على لسان حد تانى
فبجد كتاب عظيم عظيم
ويستاهل الجنيه ونص اللى دفعتهم فيه
دا اولا
اما ثانيا بقى
انت اكتر واحد بتعمل ميه حاجه فى اكتر من وقت واحد
نت ومذاكره وشغل ولعب وتك تك تك تك
ياام سليمان
تعرف الاغنيه دى بتاعه فيروز موش عارفه ليه جات على بالى دلوقتى
تيجى تسمعها معايا
تك تك تك ياام سليمان
تك تك تك جوزك وين كان
تك تك تك كان بالحقله عام يقطف خوخ ورمان

شبــ اون لاين ـــاب يقول...

الرجاء الدخول علينا


...


و اتمنى تحديد موقفك من القضيه

شاب فقرى يقول...

ponpona
صباحك ورد وزى العسل

هستنى تقرى البوست وتقولى رأيك

هفكر فى موضوع الدكتور دا

دعواتك معايه

فقرى

شاب فقرى يقول...

غير معرف 1

إيه سر حبك لأحمد حلمى ؟؟؟

حاجات كتير أوى

أول حاجة : إنه كان صفر عالشمال
ودلوقتى بقى نجم كبير ومحترم

تانى حاجة : إنه كان ممثل كوميدى بيضحك الناس وخلاص
ودلوقتى بقى صاحب فكر وبيفكر كويس أوى فى أى عمل قبل ما بيقدمه

تالت حاجة :
إنه بيقدر يوصل مشاعرى كويس
صحيح أنا أقدر أوصل اللى انا عايزه بكلامى
بس طبعا هوا بيضيف لمسة سحر بوجوده

شكرا لسؤالك

شاب فقرى

7annen يقول...

الكتاب دا شكله جامد

ابدعت فى نقله الينا
تسلم ايدك

شاب فقرى يقول...

غير معرف (( التعليق التالت ))

الأول نرد على أسئلة حضرتك ...

صناعة البغاء يعنى الدعارة تقدر تبص فى كتب التاريخ المصرى وتشوف شوارع رمسيس دى كانت إيه وتقرا فترة الإحتلال الإنجليزى كانت عاملة إزاى وبعدين تقدر تيجى تعلق عالنقطة دى تانى

إيه الكتاب دا ؟؟؟
كتاب عادى يمكن يكون غرضه تقديم المعلومة مع الإثارة الرخيصة ولكن قدم معلومات لا بأس بها بغض النظر عن أسلوب العرض أو السم اللى فى العسل

فى عوامل كتير جدا بتخلى الشخص يقتل

طيب حلو جدا إنك متفهم دى
لأن اللى بيدايقنى بلاقى واحد يقولك فلان قاتل يبقى إبن كلب ووحش وهيخش النار
بغض النظر عن ظروفه أو عن أى شىء تانى
طيب يا سيدى الفاضل لو وضعت نفسك فى نفس الظروف ربما كنت قتلت أسرة الضحية كلها إنتقاما وليس الضحية فقط

أولا موضوع مصر والجزائر غير مطروح للنقاش فمش هقدر أرد عليه لأنى مش عايز أولعها كمان وكمان أو أقولك رأى وانت اساسا مش فارق معاك رأيى

الناس اللى بتقولى عليهم نستحق إننا نشتمهم دول هما فى غفوة ومسيرهم يصحوا

كان نفسى أقولك على نقطة إسمها عيش سنك
بس برده مش هتتفهم ولو إتفهمت هتتفهم غلط

وبالنسبة للى عايش أحمد حلمى فى زمانه

الحمد لله إنى مش كدا أنا نفسى وأحسن من أى حد تانى لأنى من صنع المولى تبارك وتعالى

موضوع الدراسة
الشىء اللى بيزيد عن حده بيتقلب ضده

أنا مرت عليه فترة كنت مدمن دراسة وكنت مدمن نت والنتيجة إنى موصلتش لحاجة غير لكمية كبيرة من العلم غيرى بيتعلمها فى سنين وانا إتعلمتها بكل سلاسة وغير إنى بقيت وحيد ومنطوى إجتماعيا وفى حالى

انا بقى بعمل كل دا فى وقت واحد
مش بركز فى حاجة واحدة واسيب الباقى لان كدا غلط

النت هوا طريق محتاج اللى ينورهولنا مش أكتر
اللى يوضح لنا العقبات اللى فيه ويرشدنا من بعيد

بالنسبة للإخوان

صباح الخبط فى الحلل

مش ينفع يطلع حد يقولى إنته إزاى بتقول كدا مش من حقك

لاء أنا أتكلم براحتى واللى مش عاجبه ينقدنى بأدب

مش هقولك إنتى مش زيى ولا الكلمة دى لانى مش بقولها كتير

مش احتقار ليكى ولكن لان الظروف متغيرة وكمان انتى مش تعرفى تفكيرى ولا فى دماغى إيه

طيب كويس قوى إنك قلتى دى سياسة وإنته فاهم الباقى

يعنى هما كل هدفهم السياسة

تعرفى إنى شفت قيادى من الجماعة دى وهوا اللى حكالى سياستهم عاملة إزاى بالظبط

وشفت ناس إنضمت لهم وطلعت بسبب إنهم لقوا إن مفيش إخلاص لربنا
وإن الدين اللى بينادوا بيه عشان بس يلموا الناس عليهم ويكسبوا حب الناس

وإنهم بيقربوا من المثقفين والشريحة المحترمة عشان يخلوا الناس تصدقهم وتصدق كلامهم

وإن النقاش معاهم مش بيوصل لحاجة لأن فيهم الكثير من السوفسطائيين

وبعدين تخبطك بين كل الجماعات دى لا يدل إلا على عدم إستقرار أو فهم خاطىء للأمور

عشان أقرب لربنا وأبقى إنسان ناجح فى حياتى مش لازم أبقى إخوانجى ولا تبع التكفير والهجرة والعك دا كله
ربنا موجود فى أى زمان وأى مكان وهقرب له بعيد عن الناس اللى مش تعرفه من الأساس

عمرو خالد ووجدى غنيم مش من الأخوان المسلمين يا انسة لو سمحتى

قبل ما تدى أمثلة شوفى تقصدى مين

والله أنا مقرب منهم يمكن أكتر منك ألف مرة

بس مش عايز أحكى فى المحكى

(( بس انا بضايق من اللى النس اللى بيعملوا زيك كدا ))

بتضايقى من الناس اللى بيهاجموا الأخوان وبتنقدى رأيهم بدون تفكير أو بحث ورا كلامهم ؟؟؟
إدايقى براحتك دى حاجة تخصك

(((امال مين بقى اللى هيروح الجنة
بتوع الكليبات والبنات والشباب الصايع
طب الشباب دول مش لازم يكون فيه حد ينصح ويربى))))

إنتى كدا بقيتى أكتر من السلفيين أو أى حد متشدد اللى شايف إنه هوا وفرقته بس هيخشوا الجنه والباقى مصيرهم جهنم

لاء تفكيرك فى النقطة دى غلط

يمكن الشاب الصايع دا اللى شايفاه قدامك ومحتقراه محترم أكتر من ناس كتير بتستخبى تحت عبايه إنى بحب ربنا وبحاول أرضيه وأنا أساسا غلط فى غلط

بس برده مش إنتى اللى هتقررى مين يخش الجنة ومين ميدخلش

بالنسبة لخطيبك
مش عشان مقتنعه بيه يبقى تحاولى تقنعينى بالأخوان كلهم

ربنا يهديكى ويهدينا جميعا

((
كنت فاكره عقليتك افضل من كدا
كنت فاكره انك متفهم اكتر من كدا
))
شكرا عالإهانه

المرة الجايه رد بمعرف عشان أعرف أنا بكلم مين خليك أجرأ من كدا

شاب فقرى

شاب فقرى يقول...

جارة القمر

والله ناوى أرد

بس لما أشوف الأول أنا عايز أقول إيه

:)

عينيه بس كدا

نكتب بعد كدا العنوان باللون دا :D

مطولتيش ولا حاجة والحمد لله لاتفاقنا فى الرأى :)

دمتى بكل خير

شاب فقرى

شاب فقرى يقول...

غير معرف التعليق الخامس

ببساطة حضرتك تعرف الماضى بتاعى منين

وأعيد نظرتى فيه...

حلو الجملة دى

بس هرد برده بالرغم من إنها حاجة مش تخص حد غيرى

بالنسبة للماضى أنا ذاكرتى قوية جدا ومستحيل أنسى أى حاجة أو أفوت حاجة وتمر عليه بدون ما أفهم وأشوفها من جميع النواحى

أنا بفكر فى الماضى أكتر من مرة عشان أقدر أستفيد منه فى كل مرة بفكر فيه وأتعلم منه وأشوف منبع المشكلة والخطأ منين

ووضح كلامك عن كدا لو سمحت ورد بمعرف بعد كدا

شاب فقرى

شاب فقرى يقول...

فتاة من الصعيد

إدمان الحياة هوا الوحيد اللى صح

يعنى نعيشها كلها

نعمل كل دا

نقرب من ربنا ونشتغل ونذاكر ونتعب ونكافح وكل حاجة

مش نقف فى حته واحدة بس

تحياتى وإحترامى

شاب فقرى :)

شاب فقرى يقول...

فراشة

سعيد برجوعك للتعليق فى المدونة

الدراسة ممتعة بس لما نمزجها مع الحياة :)

نورتى وشرفتينى بتعليقك

شاب فقرى

شاب فقرى يقول...

أميرة على كوكب مهجور

إن شاء الله بعون الله هروح بس لما أفكر كويس الأول

أنا عندى شكاير من سوق الأزبكيه

إن شاء الله هروح لدكتور قريب

تحياتى ونورتى

شاب فقرى

شاب فقرى يقول...

sookra

سكوكرة

معلش النور بيهزهز معاكى شوية

ههههههههههههههه:)

نورتى

شاب فقرى

شاب فقرى يقول...

سلمى

شكرا لرأيك

شاب فقرى

شاب فقرى يقول...

7aneen

نورتى وشكرا لرأيك فيما كتبت

شاب فقرى

شاب فقرى يقول...

شبــ اون لاين ـــاب

شكرا للدعوة

الرد عالدعوة : مرفوضة

شاب فقرى

شاب فقرى يقول...

غير معرف طلب عدم نشر التعليق


إن شاء الله حاضر

شاب فقرى

غير معرف يقول...

مع احتراى ليك يعنى

دا كله كلام الافلام والاعلام اللى مسوأ سمعة الاسلام وخلياه ارهاب مش دين يسر

اولا هما لو كان هدفهم السياسة فهدفهم بجد انهم يصلحوا البلد ودا فعلا اللى عملوه عندنا فى بلدنا

وانا ماقصدتش نهاااااااائى انى اقول حاجة
وانا اتنرفزت شوية من اسلوبك فى الكتابة لكن المرة الجاية ننقض بأدب

معظمهم السوفسطائيين

كل هدفهم السياسة

تعرفى إنى شفت قيادى من الجماعة دى وهوا اللى حكالى سياستهم عاملة إزاى بالظبط

وشفت ناس إنضمت لهم وطلعت بسبب إنهم لقوا إن مفيش إخلاص لربنا
وإن الدين اللى بينادوا بيه عشان بس يلموا الناس عليهم ويكسبوا حب الناس

لااااااااا اتفق معاك نهائى

انا مقصدتش ان عمر خالص ووجدى غنيم من الاخوان

انا قوووووولت انى لما اتعاملت معاهم
لقيت منهجهم نفس منهج عمر خالد ووجدى غنيم وغيرهم ودا اللى حبيبنى فيهم بعد ماااااااااكنت مبحبهمش زيك كدا
وعن تجربة مش كلام من الهوا

لكن قائد الاخوان اللى اتكلمت عنه دا اكيد مش من الاخوان
لان سياستهم غير كدا خالص

بص انا برضو مقصدتش ان الاخوان هما اللى هيدخلواالجنة والباقى هيدخل النار
لكن انا اتكلمت انك بتقول ان اللى يمشى ورا الاخوان يروح جهنم

؟؟؟؟؟؟؟؟؟؟؟؟؟؟؟

انا عايزة افهم
انت مفهموك ايه للاخوان
اكيد غير اللى انا بتكلم عليه
وعلفكره الاخوان كلهم مش زى بعضيهم
انا اتكلمت من منطلق الفئة اللى اتعاملت معاها مش شرط خطيبى لا
بجد تعاملهم مفيهوش اى حاجة من النفاق نهائى

انا عمرى مابفرض وجهة نظرى على حد
بس يمكن الكلام كان حاد شوية
فانت حسيت كدا
الدليل على كدا ان ليا صحاب كتييير
عاديين جدا وعمرى حتى مااتكلمت معاهم فى اى حاجة تخص الاخوان لكن هما شافوا تعاملاتى مع الناس وازاى ان الواحد يتخلق بالدين ويعيش الدنيا
هما اللى حبوا الموضوع من نفسيهم


نروح لنقطة الشباب اللى اتكلمت عنه
انا عمرى ماقللت من نظرتى لحد مهما كان والله

ولا قصدت انى اقلل من شأنك ولا اهينك ولا اى حاجة خاااااالص

ولما قولت انى فاكرة تفكيرك احسن من كدا لانك ياكريم عقلية حلوة
فلما قريت كلامك فى الاخر اتضايقت شويتييين

انا بالجراءة انى ادخل بمدونتى لكن كدا احسن
مش خوف ولا اى حاجة
لكن ............

وانا هعتير دا اخر نقاش فى الموضوع دا
لانى مش عايزة اخسرك يااستااااااذ

جارة القمر يقول...

انت مش جيت اهو حمد لله على السلامة طبعا ... فين بقى البوست الجديد ها فين فين لازم اجى اقولك يعنى ؟؟؟ و مش تنسى العنوان يبقى باللون اللى بحبه :$

moma1415 يقول...

تصدق
انا اتخنقت








وربنا اتخنقت

شاب فقرى يقول...

غير معرف

مش هعرف ارد عليك تانى فى المووضع دا

بس ليه نربط النقاش دايما بحرب مع الطرف التانى لو متفقش معانا نخسره

لما يكون فى وعى تام بأدب النقاش هرجع أرد

شاب فقرى

شاب فقرى يقول...

جارة القمر

نورتى

البوست نزل فى أمان الله :)

شكرا عالمتابعة

شاب فقرى

شاب فقرى يقول...

بيطرية


وربنا ما عارف مالك

شاب فقرى

نعكشة يقول...

فاشلة فشل ذريع في السياسة
يعني مبفهمش فيها اي بتاع في البتاع
دة غير اني معرفش اي حاجة عن الاخبار

بالنسبة للادمان بتاعي
فهو متغير
بس بيتمحور حول النت

او قوقعتي
يلا في يوم هطلع من هذه القوقعة
خير خير

آه صحيح
شكل الكتاب كدة حلو
طبعاً معتقدش انه ممكن يكون موجود في الاسواق
طيب حضرتك مذكرتش هوه لمين
يمكن اسئل عنه
لو افتكرت يعني

عامة
خير خير

سلامٌ عليك