السبت، 28 نوفمبر 2009

الحقيقة المنيلة بنيلة


السلام عليكم

هابى خروف

وعيد سعيد عليكم

قلت أكتب بوست خفيف كدا عشان العيد ومحدش فاضى يقرا

شفت من شوية فيلم بنفس إسم البوست دا The Ugly Truth

الحقيقة البشعة او المرة او المنيلة بنيلة

بيتكلم عن حقيقة الحب والعلاقات الشخصية بين الراجل والست

صراحة الفيلم عجبنى

أينعم فيه جزء العقلية فيه زبالة

لكن ما شاء الله بقيت الفيلم فيه كام جزء مهم

يعنى مثلا الراجل البطل اللى فى الفيلم بينصح البطله

ويقولها الرجال لا يحبون الانتقاد لان الانتقاد بيسبب لهم الصداع والقلق وضعف الثقة

وكمان بيقولها بلاش تحاولى تسيطرى عالموقف عشان هتبقى غبية تماما

صراحة عجبنى اوى الكلمتين دول

حاجة واضحة وصريحة ومن الآخر

لان محاولة المرأة للسيطرة عالموقف هتبقى فاشلة لان بعض الرجال بترفض دا

وكمان لان قوة المرأة فى ضعفها

عشان كدا بعتبرها أقوى مخلوق خلقه ربنا

بعقلها وتفكيرها وضعفها وهدوءها

يعنى من غير ما تحاول تنتقد أو تسيطر عالراجل فهى كالعادة هتلاقى نفسها مسيطرة عليه لما تعامله كويس
وكمان تبقى حنونه

هيخاف عليها ويحبها ويقدرها

الله عليه كدا لما بقول فى حكم

وكمان عجبنى
أوى أوى أوى أوى أوى أوى مشهد الرقص اللى جايب منه لقطة الصورة دى

وربنا وربنا وربنا كمان مرة فكرنى بانى فى مرة كنت بفكر إنى أبقى أعزم خطيبتى على حفلة سلو كدا

يلا انا كدا خلصت كلام

مش عايزين إنتقادات من البنات بقى :D

كل سنة وإنتم طيبين

شاب فقرى

هناك 19 تعليقًا:

جارة القمر يقول...

انا مضايقة اوى اوى يا فقرى مش عارفة ليه بقولك بس حبيت اقولك

نيجى للبوست الكلمتين دول فى الجوووون اوى بس ليه حقيقة منيلة بنيلة مش فاهمة ما هو الفيلم بيقول كلام كويس اهو ... المهم انى كنت دايما بقول لاصحابى كدا قوة المرأة فى ضعفها ما تخديش حبيبك ند ليكى ولازم تثبتى شخصيتك ادامه و الكلام دا

مش لما بتحب حد بجد انتوا الاتنين بتبقوا واحد يبقى ليه الانتقاد ما البنت لو جرحته بنقدها تبقى جرحت نفسها قبل ما تجرحه

يارب تكون بخير و مبسوط وان شاء الله تعزم خطيبتك على حفلة زى دى

مساءك ورد

sookra يقول...

كنت بفكرك فى الحقيقه دى النهارده
وسألت نفسى سؤال ياترى هل ممكن فى يوم من الايام اشوف او الاقى حقيقه جميله ؟!!
عجيب توارد الافكار دا موش كدا؟

فراشة يقول...

السلام عليكم
عيد سعيد على كل الناس

انا عماله أقول شفت الصورة دي فين
انا شفت الفيلم دا على فكرة
اولا لانى بحب تمثيل كاثرين هيجل
ثانيا عجبي جدا اسم الفيلم من قبل ما اعرف حتي القصة

صح فعلا الراجل أو اغلب الرجال بيحبوا يكونوا هم المسيطرين ع الموقف او ف القرارات عامة
ومش بيحبوا الست تدوشهم بمشاكلها كل شوية
تقريبا رجال العالم مشتركين ف الموضوع دامش الرجل الشرقي بس

عجبنى وهو بيقولها الحاجات اللى بيحبها الراجل والحاجات اللى مش بيحبها

بس عجبنى برضه انها مقدرتش تستحمل تعمل بس اللى هو يحبه مكانتش على طبيعتها يعنى

بس فيلم نصه عايز يتحذف

المهم ...هابي خروف مع ان الخروف خلاص اتاكل

قلم رصاص يقول...

هههههههههههههههه

جرى ياعم كريم

انت هموت من الرومانسية على نفسي يا اخي
ارحمنا شوية من بوستاتك الحلوة دي
ههههههههههههههههه

وبقولك من كل قلبي :

كل سنة وانت طيب ياشاب ياطيب

وعيد سعيد عليك انت والاسرة الكريمة وكل الامة الاسلامية

في امان الله

خواطر شابة يقول...

ليه أعتقدت ان البنات حتنتقدك?
الرجل طفل صغير اللي تقدر تفك شفرته حتعيش سعيدة لكن لو مقدرتش تفك الشفرة دي يبقى حياتها هي اللي حينطبق عليها الحقيقة المنيلة بنيلة
تحياتي لك

Lady E يقول...

هي فعلا حقيقة منيله بنيله :)

وبعدين مينفعش ترقص سلو مع خطيبتك نيفر نيفر نيفر لازم تبقى مراتك علشان ترقص معاها سلو زي الصورة

وبعدين بجد في حفلات رقص سلو؟

مي يقول...

اول مرة اجى هنا وبجد مستمتعة
اولا كل سنة وانت طيب وفين عيديتى متهربش منها هااااااااا
الفيلم حلو اوىىىىىىىىىىىى
وكلامى مش هيكون تحيز ولا حاجة بس فعلا المرأة الذكية تعامل الرجل زى الطفل تعرفه من نظرته وهتعرف تكسبه لما يحب يبعد مش بيبعد عشان كرهها لا بالعكس ممكن يكون محتاج يكون مع نفسه

المرأة دى سر كبير بضعفها ممكن تاخد كل حاجة ودموعها قد تكون البوابة لفلب الرجل

انصحك بقراءة كتاب رجال من المريخ ونساء من الزهرة
ممتع جدااااااااااااااااا

عيد سعيد

شاب فقرى يقول...

sookra

لو اقتنعتى بالحقيقة هتشوفى جمالها

مع تحياتى

شاب فقرى
===============
قلم رصاص

ههههههههههههههههههههههههه

والله وحشتنا الرومانسية والواحد بقى على يقين انها مش موجودة

نورت ياجميل

يارب تكون إفتكرت تدعى لى

وكل سنة وانته طيب يا جميل :)

شاب فقرى

========================
فراشة

هوا الفيلم صراحة نضيف

بس هوا مليان كلام ونكت عايزة الحرق :D

كل الرجالة كدا فعلا

كل سنة وانتى طيبة

شاب فقرى
===================
جارة القمر

يا ساتر يارب ليه مضايقة بس

دا الحياة حلوة خالص اهيه :)

للاسف فى بنات كتير اوى بتحاول تعمل الحوار دا والموضوع بيفشل ويقولوا اتجرحنا

الحمد لله بخير وتمام

ويارب تكونى بخير برده :)

مساءك ورد :)

شاب فقرى
====================
خواطر شابة

مش عارف ليه بس حسيت ان الناس هتنتقد الصراحة

والمرأة برده كتاب محتاج فك الشفرات وقرايته بوضوح

مع ان اجمل ما فيها غموضها

نورتى

شاب فقرى
==================
Lady E

والله حاليا مش عارف بس حتى لو مفيش حفلة انا هعمل واحدة عادى يعنى :)

متفرقش

نورتى :)
شاب فقرى
==================
مى

اسعدنى مرورك وتواجدك :)

وانتى طيبة يارب وكل سنة وانتى الى الله اقرب

سمعت عن الكتاب دا فى الفيلم

بس لو الرجال من المريخ والنساء من الزهرة

ياترى

مين اللى من الأرض :D

نورتى

وعيد سعيد عليكى يارب :)

خالص تحياتى واحترامى

شاب فقرى

فتاه من الصعيد يقول...

اعتقد ان الحقيقه دي لازم كل البنات تعرفها

زي ما كل الرجاله لازم يعرفوا الطريقه المظبوطه لمعامله النساء

تحياتي

فاتيما يقول...

فين بقى الكلام
اللى البنات هتنتقدك عليه؟؟
أصل يعنى معروف
إن الرجل فى كل حتة فى الدنيا
مبيحبش الخنقة
و لا القيود
و الست على العكس تماما ...
بتحب الدنيا تبقى مترتبة
وكل شى فى مكانه
و عارفة اولها من آخرها
و بتخاف دايما الموضوع يخرج من إيدها
لو مخدتش بالها من كل التفاصيل
و بدقة
دا طبعى امومى بحت
ربنا خالقه فى المرأة حتى لو مخلفتش عيال
الرعاية الفظيعة لمن تحب لدرجة تخنق
الراجل بيسميها سيطرة
لكنها فى الحقيقة نوع من الاحتواء
مش ساعات كتير
بتلاقى ام حنونة من غير دوشة
و أم تانية تفضل تقولك شيل دا و اعمل دا و تبقى مسيطرة و يتفاتلها بلاد و كدا
والله الستات غلابة
و الرجالة أغلب منهم
وعمالين يضيعواعبثاً فى الوقت
و العمر فى مناوشات جانبية
و سايبين المهم
و عقبال ما الكل بيستوعب الحقيقة بنكون وصلنا لتوقيت صعب
ونلاقى فيه الحقيقة المنيلة بنيلة
اللى هيا
........
إن اول ما تلاقى حفلة سلو
او فرح
أو خطوبة
لا تتردد يا بنى
و خد خطيبتك و أرقص معاها
سلو بلا خوف و لا خجل
هتقولك لأ
و تبقى مكسوفة
بس من جواها هتبقى بتتمنى لحظة رومانسية تنخطف من الناس و الدنيا
و هتبقى عاوزاك تكون أشجع منها و تصر على ذلك
بس انت كمان متزودهاااااش
و دا بوست خفيف دا ؟؟
أمال التقيل يبقى عامل إزاى؟!!!
عيد سعيد عليك يا عزيزى

هيبو يقول...

اشاهد الافلام كثيرا لكن لم اشاهد هذا الفيلم .. ممم سأشاهد ان شاء الله
عيد مبارك

سلام

wella يقول...

اممممممممممم

فليم يجننن من نوعية الافلام اللى انا بحبها افلام mbc 4 /mbc max

الفليم فكرنى بكتاب الرجال من المريخ والنساء من الزهرة

صحيح اغلب المشاكل بتكون من كتر انتقاد الست للراجل
بس بجد الست لما بتنقد مش بيبقى قصدها وحش بتبقى عشان عوزة تشوف جوزها فى احسن صورة
هوة طبيعة الانسان اصلا مايبحبش كتر النصايح


يلا ماعلينا بس الفليم نصه عاوز يتحذف بصارحة

اه نسيت اقوولك انا البوست ماكنش فاضى مش عارفة هوة طلع فاضى لية بس تقربيا انا كنت مخرفة ولعبت فى شوية حاجات

وحبي لك لن يموت يقول...

كلامه صح
..
مؤمنة أنا بأن
الرجل صندوق مغلق بخمسين مليون ترباسا
في عيون المرأة الغبية
شفافا كما الماء في عيون امرأة تفهم "دماغ" الرجال

واؤمن اننا نحن النساء اكثر اهتماما بكم P:
وانتم لا تهتمون كثيرا :)
غروراً ربما D:
لكني "أحترم الرجولة الهادئة" :)
عموما ، احنا ستات ومضطرين نستحملكم يعني
:)

اشكرك :$

سلمى يقول...

السلام عليكم
كل سنه وحضرتك طيب
وان شاء الله كل سنه تبقى احسن من اللى قبلها وتحقق كل اللى بتتمناه
تحياتى

سماء يقول...

متخفش مش هنتقد لخدلى طوبة فى دماغى


ههههههههه


تعرف ان المراة بطبيعتها ناقدة يعنى تلاقيها حاجة طبيعية فيها بتاخد بالها من ادق الامور سواء فى الاشخاص او الاشياء وتحللها بعكس الراجل علشان كدة هى بتكملة فى الجزء دة وهو بيكملها فى اشياء تانية

اماالنقد انها بتسئلة جيت متأخر لية والحاجات اللى بيتخنق منها الراجل على العموم لو كدة هى عندها حق
هههههههه

ياريت كل واحد يستكشف شفرة التانى علشان يقدر يعيش معاةودا محتاج قدرا من الذكاء ودا فى كل العلاقات

بوست جميل

وكل سنة وانت طيب

دمت بكل ود

الشعب لابد له من حكومه تشكمه يقول...

:))
ازييييييييييييييييييك؟
مش عارفه اعلق اقول ايه اصلى مش شفت الفيلم فلو قلت اى تعليق هيباه شكلى عبيييطه:)
بس هقولك معلومه اى واحده بتعمل نفسها مش مسيطره على الموقف, وبتعمل نفسها غلبااااااانه, بس بينى وبينك هى بتباه مسيطره على الموقف وصاب الموقف وعامله نفسها عبيطه :)

بالنسبه للسلو.بتكسف انا اتكلم فى الحجات دى:) مش علشان عيب بس محبش حد يعرف افكارى فى الامور الرومانتك ههههههههههههههههه ايه اللى انا بقوله ده هههههههههههه.

بس عموما اعمل زى فاتيما مقالت بالظبط.قالت اللى فيها.

فكرتنى باخويا لما كان خاطب مراته حاليا كانو كل ميروحوا فرح يستنوا اول ميقولوا الكابيلز يتفضلوا وتلاقوا دول اول ناس :))

انت اخبارك ايه دلوقتى ؟؟؟احسن؟

شاب فقرى يقول...

فتاة من الصعيد

لازم الطرفين يفهموا بعض :)


نورتى كالعادة

شاب فقرى :)

=======================
سلمى

كل سنة برده وحضرتك طيبة :)

ان شاء الله نحقق كل اللى بنتمناه

ونلحق قبل ما نموت :)

ربكم هوا الكريم :)

المشكلة ان لو حققنا كل اللى بنتمناه

هنعيش تانى ليه ؟؟؟:D

اكيد عشان نتمنى حاجات تانية :)

تحياتى يا سلمى

شاب فقرى
=================
سماء

لاء لاء لاء

مفيش هنا طوب :D

فى برتقان :P

أسعدنى تواجدك :)

كل سنة وانتى طيبة وبخير


لازم كل واحد يعرف الطرف التانى بالشكل الكافى والا هتبقى كوسة وعك جامد :)

نورتى

شاب فقرى
======================
wella

على فكرة

الفيلم دا انتقد كتاب الرجال من الزهرة والفتيات من المريخ دا :P

ههههههههههههههههه

اه والله

الفيلم ليه استايل تانى

اوكى ولا يهمك

هنيجى نشوف البوست تانى

تحياتى

الفقرى الكبير :P

=================

هيبو

كفاية تواجدك :)

نورت

شاب فقرى
=====================
وحبى لك لن يموت

عجبنى اوى موضوع الخمسين مليون ترباس دول :)


متيقنة اوى انك مهتمة بالطرف التانى وان الرجالة وحشين ومش بيهتموا

والله بيهتموا

بس هنعمل ايه

النصيب

طبعا لازم تستحملونا

عفوا :)

نورتى ويارب تزورينا دايما

شاب فقرى

====================

فاتيما

تعليقك جاب من الاخر مش عارف ليه حاسس كدا

:)

طبيعى الاختلاف بينهم لان كل منهم بيكمل الاخر

اكيد طبعا بس ربنا يكرمنى الاول بالخطيبة الحلوة الهادية دى

ويكرمنى بعدها بحفلة سلو :)

التقيل بيكون اكبر من دا ست مرات يا امنا الغالية فاتيما :)

نورتى وشرفتى المدونة وأسعدنى أوى تعليقك وتواجدك وإنك بتقرى لى :)

خالص تحياتى وحبى وإحترامى
إلى الأم الغالية
فاتيما

شاب فقرى
====================

الشعب لابد له من حكومة تشكمه

شيما

الحمددددددددددددد لله بخير :)

من الواضح انك من النوع اللى قلتيه

اللى بيكون مسيطر عالموقف وعامل نفسه غلبان وعبيط :)


ولا يهمك

مادام بتتكسفى مش هجيب سيرة الموضوع دا تانى

هقولك تانى :)

يا بخت اخوكى

ربنا يحميه ويخليكوا لبعض :)

وعقبالك كدا يارب

وربنا يرزقنى انا كمان

والحمد لله بقيت أحسن

وكل سنة وإنتى طيبة وبخير يارب


شاب فقرى :)

أحن إلى ذكرى تقسو علىّ يقول...

السلام عليكم و رحمة الله و بركاته
لا انتقاد على كلامك
بس أحيانا اللى الرجاله بيسموه سيطره بيكون حب و اهتمام من الست مش أكتر و مش بتعمل كده و بس مع اللى بتحبه تلاقيه كمان بتعمل مع باباها كده و بتعامله برده بحنان يعنى البنت فى أى وقت بتعامل الواحد باهتمام و حنان
هو أنا مجربتش انى أعامل واحد كده بس أنا أحيانا بحس انى من اهتمامى ببابا انى والدته مش هو اللى والدى و بخاف على أولاد خالتى برده
يعنى دى طبيعة الأنثى بس فى فعلا نساء بتحب تسيطر على الرجل و تعامله زى ما يكون خاتم فى صباعها
سلام

شاب فقرى يقول...

أحن إلى ذكرى تقسو على

بصى والله انا مش قلقان غير من حكاية خاتم فى صباعها دى

حب وحنان اه

انما خواتم ودبل وصوابع وسيطرة

مستحيل

:)

نورتى

فقرى :)