Lori

 لوري جميلة وحلوة هادية وطيبة بتضحك الدنيا بتنور ، بتهزر الحياة بتختلف 

لكنتها ركيكة ومضحك في اي لغة بتحب الحياة والجري والتنطيط والشوبينج 

بتلبس عريان ومكشوف تقريبا طول الوقت 

بتقعد تتمسح فيا زي ما يكون انا الراجل الوحيد علي الكوكب 

بتبتسم بهدوء وبتنطق كلمتين معناهم لطيف ، باي لغه كل كلامها حلو 

زي ما يكون السكر اتخلق من علي شفايفها 

بنقعد نلعب لعب عبيط ملوش علاقة باي حاجة بتسخسخ من الضحك معرفش ايه السر او الخلطة السرية لضحكتها كانها بتجمع الكون بكل ما فيه من روعة زي لوحة لفان جوخ بحبها وبعشقها بتصور النجوم في السماء 

بترحب بيا برضا لما بتشوفني بتحضني بعمق كانها اخر مره شافتني من عشر سنين بتضمني وتبتسم وتقفش فيا كاني هجري 

متعرفش خصام ولا تعرف زعل بتقف جنبي وتقول بلهجة ركيكة جدا عايز ايه او اعملك ايه عشان تبقي مبسوط ، بتسمع الكلام برغم انها مش مجبرة 

عنيدة جدا مع كل الناس وبتطلب طلبات غريبة في اوقات غريبة 

بنزل في عز المطر واجيبلها حاجة او ابعتهالها لحد البيت 

بتقابلني عالباب بابتسامة وتضحك وتتعلق في رقبتي 

هوا دا الحب ؟ معرفش 

قلبي بيتخطف لما بشوفها بس مكشرة عشان اي حاجة مهما كانت تافهة 

نظرة عيونها ليا وسط اليوم وكأنها بتقول خطفتك وطايره بيك وانت الدنيا ، مبتقولهاش بس في عينيها 

بتاخدني اماكن اول مرة اروحها بتمشي معاها بالساعات ، بقف اعيط علي جنب احيانا من شدة التعب من الحياة ، بتبوس عينيا وتقولي انا هنا وبما معناه نتزعلش من الدنيا ولا من اي حاجة مزعلاك 

بقولها متبوسش عينيا لكنها مصممة كان دا قمة الحب بالنسبة لها 

بنروح نشرب قهوه بتتعلق في ايدي ووتلف في الشارع دايره حواليا وحوالين نفسها وتحضني وتبوس راسي وكانها لقت كنز 

بسالها كتير ليه كل دا 

بتقول بحبك

بغلس عليها وبعاندها ، بتاخر في الاكل والدوا وبقعد في مكاني مبتحركش احيانا بلاقيها جايه بشنطة كبيرة 

تخبط وافتحلها وتقعد تقولي الشنطة فيها ايه ونقعد نلعب حتي وانا مبردش لكن عيوني بترد عليها 

بتبتسم 

بتحضني 

لحد ما كل الحمول علي كتفي بتختفي 

كاني مولود من اللحظة دي 

كل اللي عشته في حياتي بيختفي في لحظة وهي بتحضني وبتطبطب علي قلبي 

علمتها ازاي تطبطب عليا وعلي قلبي 

بكل هدوء بتطمن ليا في اوقات تعبها وتيجي تتكوم جنبي وتدفي فيا ولو حتي الجو حر 

تقعد تقولي سقعانه لمجرد تاخد الحضن 

تبصلي في لحظة وتقولي كريم عايزه طفل 

اقعد اهزر معاها واقلد الاطفال وتقولي هحبه برده

بنعمل اكل سوا وبقعد اعدل عليها وتقولي انا عارفه بعمل ايه وتحرق الاكل واقعد افهم فيها وننزل نشتري غيره او ناكل من برا 

سريعه في ردود فعلها ومجنونة وعنيدة جدا ومتمسكة للنهاية 

مش عارف هل انا فعلا حلو ؟

بتحب شعري وضحكتي وعيوني وملمس وشي حتي والدقن متحددة واحيانا تقيله وبتحب طولي وضلوعي وقلبي ونفسي وريحة ايديا وريحة هدومي وبتفضل تشم فيا وكاني ريحتي من مسك 

برن علها كتير وبترد كل مره بكل حنية وتقول حبيبي 

نتخانق عشان الشغل ونتصالح قبل ما نقوم من مكاننا 

هوا انا فعلا حلو ؟

لوري لغز عقلي مش قادر يحلله ولا يفهمه 

عاملة زي ما اكون نمت وحلمت ببنت ملهاش مثيل ولا زي 

وفي النهاية صحيت لقيتها قدامي 

فاكر اول مره واحنا ماشيين سوا وبتتعلق في داعي وبنضحك جدا واحنا مش فاهمين ليه بنضحك 

لغز ملوش نهاية 

الحب ايه وازاي ؟

اذا مكانش دا هوا الحب يبقي هنعيش الحياة ليه ؟

هوا انتي شايفة إيه معلش ؟

 هوا معلش انا عايز افهم ، هوا انتي شايفة ايه ؟ -

شايفاك أحن وأطيب راجل في الدنيا ، شايفاك راجل محترم -

انا بدور علي الحنية ممكن ابيع الدنيا بكل ما فيها واشتريها -

حاضر -