الأحد، 11 أبريل 2010

كسر حاجز الصمت

بعد طول سكوت قررت أكتب وأمرى لله
زهقت من الصمت ومن إنى مش عارف أرد عالشخصية الوحيدة اللى بتسأل عليه
حتى الآن
لكن بحاول ألاقى لنفسى سبب للكتابة غير التعلق بالناس وإنى أكتب لحد أو أكتب عشان خاطر صحابى مثلا اللى بيزورونى ويعلقوا
ملقتش
زمان كنت بكتب لإحساس الوحدة وإنى مش مهم حد يكون جمبى ولا أى حاجة مهمة غير إنى أكتب
وكنت الحمد لله بنزل فى اليوم اكتر من بوست
حاليا بقى
بعد ما بدأ كل الناس اللى عرفتهم من خلال البلوجر وعرفونى بدأوا يختفوا
مش هقول أسامى كتير أوى لأنهم عارفين هما مين
لكن المهم إن نفس السبب اللى خلانى أكتب هوا اللى خلانى أقف شوية وأفكر
يارتى إنته بتكتب لمين ؟
وياترى اللى بيقرا هيفهم المقصود ؟؟؟
وياترى الناس اللى بتعلق وبيبقوا صحابنا هيختفوا تانى فى أحد الأيام زى ما غيرهم إختفى ؟؟؟
حالة من الزهق والملل والتعب والغصب على النفس عشان أكتب
مواضيع وأفكار كتير بتيجى فى دماغى وبكسل أكتب
بقيت عامل زى
ولا بلاش
هحاول أطلع كل مخازين الأفكار اللى مرت عليه الفترة اللى فاتت
وأشكر الشخصية الوحدية الطيبة اللى اعرفها اللى سألت عليه فى عز الغياب دا
واللى سابت إهذاءات عالبوست السابق :)
-----------
حدث فى سته إبريل
طبعا لازم تتكتب سته إبريل
لإن اللى شفته كان شىء يقهر البنى أدم
بدأ يوم ستة إبريل كأى يوم عادى فى حياتى
صحيت الصبح وشفت ايه اللى ورايه ومبصيتش عالتاريخ إعتبارا على إن كل الأيام زى بعضها
لقيت إن فى مشاكل فى البنكين اللى بتعامل معاهم
أخدت بعضى وبدون فطار ولا حتى كوباية شاى ونزلت الدقى
وقلت أمرس هوايتى المحببه فى المشى
مشيت لحد البنك
حليت أول مشكلة وإتبقى إنى أفطر وأروح للبنك التانى
فطرت فى الشارع (( هواية محببة نمبر تو ))
وقررت أرجع الذكريات وعالأقل أمشى من الدقى لميدان التحرير عند المجمع مرورا بمتحف الفنان محمود مختار ودار الأوبرا
وأهوه كله توفير فى الزمن ال....
جبت كمية لب محترمة جدا حوالى تمن كيلو لب سورى وإنطلقت
أقزقز وأنا بسمع مزيكا ومنسجمن
لحد دلوقتى كل الكلام اللى فات سخيف وممل
وصلت لمحطة مترو الأوبرا
وماشى بدندن زى الأمير وبتفتف قشر اللب زى البرنس فى الشارع
وإذا بيه ألاقى سبعة تمانية واقفين زى ال بلطجية على الرصيف
حاولت أعدى وأمشى ومليش دعوة بحد
ولكن اللى ربنا ي... قالولى ممنوع العبور يا أستاذ إنته ياريح فين
طبعا كويس إنه قال يا أستاذ ولكنى رديت بسخافة : رايح البنك اللى جمب المجمع .. وليه ممنوع العبور يعنى ؟
فكان الرد السخيف أكتر : كدا هنا مقفول مينفعش تمر من على كوبرى قصر النيل لو عايز تروح لف وروح من ناحية الجيزة
بصراحة كنت بفكر أسكعه على قفاه أو أقوله إنته غبى ياض ؟
لمن لا يعلم فإنى لو رجعت تانى من الطريق دا هبقى كأنى بلف على شكل حرف U والهدف بين قطبى المغاطيس وانا بلف فى الاتجاه المعاكس عشان أوصل على رأى المثل حاورينى يا تيتا
قلت مش مشكلة جنية مترو يا كرملة
وركبت المترو محطة واحدة لأول مرة فى حياتى
وهنا مكنتش لسه عرفت إن دا سته إبريل
قلت لنفسى ياترى فى إيه فوق ؟
فى وزير بيعدى مثلا ؟
طيب ليه الوزير يبقى أحسن مننا يعنى ؟
هوا أبوه وأمه ملوك مصر وإحنا اللى ولاد كلب ؟
وبعدين مادام جنابه معدى يعنى ليه نوقف الطريق ؟
هوا الناس هتدايقه فى حاجة ؟؟
الناس هتقتله يعنى ؟
طيب وبعدين ؟ والنتيجة إيه ؟
ياترى إحنا اللى منحنا لهم القوة المفرطة دى عشان يوقفوا لنا بلطجية لا يختلفوا عن البلطجية اللى فى أى حكر أو عزية ويقفرفوا فى خلق الله ؟
ياترى لما حسسنا الحكومة إنها أمنا ومهما عملت لازم نحبها ونسامحها ساعتها هوننا عليها وبقينا ولاد حرام ولابد من إخضاعنا وإزلالنا سواء فى طوابير العيش أو من خلال بلطجى يمارس عليك أساليب البلطجة فى الشارع ويمنعك من إنك تمشى من هنا وهنا ؟
فى الموقف اللى أنا فيه دا قدامك حل من تلاتة
والتلاتة أحقر من بعض
1 ياتعمل فيها كرومبو وتقولهم لازم أعدى من هنا دا حق دستورى وإنته مين يعنى وإنته متعرفش أنا ممكن أوديك فى داهية
2 يا تعمل فيها إمعة ( إن لم تكون كذلك ) وتبقى غنماية فى وسط القطيع وتسمع اللكلام وتنزل تركب المترو .( زى حالاتى كدا )
3 يا اما بقى إمعانا فى الغلاسة تسمع كلامهم وترجع عشرة متر بقى بضهرك كدا وتوقف تاكس وتديله عشرة جنيه وتعدى من الطريق وإنته مطلع لهم لسانك قال يعنى يا ولاد الكلب أنا محدش بيقدر يكسرنى وأنا راجل محترم غ2صبن عن اللى خلفوكوا
وفى الحالة الاخيرة هيشتبه فيك وتخش القسم
أنا الصراحة إتفرست
إزاى البنى آدم اللى ربنا كرمه فى يوم من الأيام يبقى غنمه تحت إيد حكومتنا تقوله يمشى من هنا ومش يمشى من هناك ؟؟؟
إزاى ؟
إزااااااااااااااااااااى ؟
إزاى ننسى آدميتنا ؟
بقيت ماشى بقول ملعون أبو البلطجى اللى فوق دا ...
ولكن
البلطجى دا أب وعنده عيال وعنده أسره ومواطن زيه زيك لكن هوا متأكد من إنه بيقوم بعمل الواجب وإن دا هوا الصح
بصيت للشاويش الفلاح اللى فى القسم و رجال المباحث المتنتورين فى كل حته فى فى الميدان
مادول بنى آدمين زيهم زيك
ليه يقيدوك ؟؟؟
ليه يظلموك ؟
وهنا إفتكرت أوسخ مبدأ مترسب فى العقل المصرى
(( سامحنى يا بيه .أصل أنا عبد المأمور ))
من عيشتنا فى بلدنا للحياة العسكرية التى لا تنتهى سواء فى الجيش اللى كل الشعب بيدخله أو فى أى داهيه
أو حتى فى الشغل اللى كاسر منخير كل مواطن وعايز يربى العيال
الواحد تعب
بقيت ماشى بلعن كل عبد للمأمور
كل إنسان فى مصر لغى عبوديته لله ونسى إن ربنا هوا العدل والحق وبقى هوا مجرد عبد للمأمور
الكارثة كلها فى المبدأ دا من وجهة نظرى
المهم إن ربنا كرمنى ووصلت لحد ميدان التحرير من خلال المترو
طلعت ومشيت وروحت البنك التانى وحليت المشكلة
وحاولت أرجع من نفس الطريق من الشارع اللى فيه مجلس الشورى والشعب اللى مش ...
وجيت أعدى
بعا بقى هنا كنت خلاص عرفتإن النهاردجه سته إبريل وأنا بكلم الموظفة فى البنك
وإفتكرت ليه كردونات الأمن اللى فى كل حته
وليه عساكر الامن المركزى اللى واقفين فى كل حته
وليه عساكر القوات الخاصة اللى واقفين فى الشوارع الجانبية
وليه الناس اللى لابسين بدل وواقفين يقولوا روح من هنا وروح من هناك
وإتمنعت من إنى أمشى فى الشارع اللى لسه ماشى فيه من دقيقتين
طبعا دى جريمة فى حقى كمواطن والمفروض أروح أرفع قضية
ما أنا لو كنت أعرف إنها هترسى على اللف والبرم دا كله مكنتش هسكت
المهم خلونى أخش من شارع السفارة البريطانية
وفضلت ماشى ماشى ماشى
مكنتش أعرف إن السفارة دى كبيرة بالشكل الرهيب دا
بالمرة ليه سؤال ...
هى انجلترا دى مش كانت محتله مصر فى فترة من الفترات ؟؟؟؟
إزاى بقى نعملها سفارة بالشكل اللى شفته دا
أو حتى نسمح لها بكل دى
ولا وسائل الدفاع والأمن قدامها
تحسسك إنك داخل عالملكة ذات نفسها مش مجرد حته سفارة
طلعت على الكورنيش
ومشيت كتير اوى
ولسه موصلتش الموقف
سألت عسكرى من إياهم وإديته شوية لب
للأسف مكانش كعايه سجاير فى اليوم دا
كنت إديتهاله كإنتقام أو ضرر للحكومة :D
بس نرجع ونقول ملوش ذنب الغلبان
وكمان اللب كان إنتقام أكبر لأنه كان سورى ووحش أوى
المهم
عاندت ولفيت من بين سميراميس وشبرد عشان أشوف الوقفة لشباب سته إبريل والعربيات الحكومية
واللى ببيحصل هناك
وأخيرا إتنكدت وروحت وشفت الفيديوهات عالنت باليل إتنكدت أكتر وأكتر
وإفتكرت شعار تيت راديو وهما بيقولوا إنهم الجالية المصرية فى مصر
دلوقتى بس فهمت معنى الشعار دا
بالرغم من إنى مش بحبهم وبتعارض معاهم فى مواقف كتير خدوها
بس عندهم حق
دى مش مصر المصريين
دى مصر الحكومة
اللى فيها حكومة عايزة تمشينا زى الغنم
وفيها شعب عبد المأمور
وقلة قليلة من اللى بيفكروا ونايمين برده
وكتيررررررررررررر برا بيفكروا وبيخدموا غيرها
إنتهى
------------------
إلغاء الدعم
مش عارف ليه كل ما حد ييجى يتكلم يقولك السكان بتزيد وبتتنيل ولازم نلغى الدعم
دا الصين لغت الدعم إلا عن المولود الأول بس
صراحة لما بسمع الكلام دا ببص عالتلفزيون وأقول كلمة واحدة قبيحة شوية ومينفعش تعرفوها
ليه كل شوية يقارنوا بينا وبين الصين
الصين أسطورة بل معجزة قدرت تستفيد من السكان فى ظل إدارة حكيمة وتوجههم وتبقى دولة عظمى
وكمان مفيش أى وجه مقارنة بينك وبين الصين ؟
ليه تفكر كدا ؟
الصين عدد سكانها تلت سكان العالم
وإنته مجرد نقطة فى بحر
والكارثة إن فى ناس مقتنعين بالحكاية دى وبيقولوا هوا الناس تخلف زى الأرانب والبلد تربى لهم عيالهم
ما هوا لو فى إهتمام بالجودة بجد فى التعليم وفى كل حاجة تانية كان زمانى مبوافقك الرأى
لكن الخدمات زى الزفت من الأساس
يبقى ليه تفكر تلغى الدعم
؟؟؟؟؟؟؟
دا لا مؤاخذه
غبااااااااااااء
دا بدل ما تستفيد من الأيد العاملة الرهيبة وتعمل فرص عمل ومصانع وتحاول تزود إنتاجك عشان حتى تحقق ولو نسبة بسيطة من الإكتفاء الذاتى ...رايح ترمى المشكلة عالزيادة السكانية وكأنها سد الحنك اللى بيتقال عشان الناس تتكتم وكل واحد يحس إن عياله عبء عالبلد
حسبى الله ونعم الوكيل
=========
لما إتكلمت من كام بوست عن إرتفاع أسعار الحشيش الناس إستغربت
اللى يقولى إنته مالك
واللى يقول الواد دا شكله حشاش
واللى يقول أحسن خلى الناس تبطل
أنا مش بتكلم فى إرتفاع السعر وبس
أنا بتكلم فى غلاء الأسعار بشكل عام
بتكلم عن شريحة من المصريين أصبح الحشيش عندهم زى الشاى والسكر وضرورة فى البيت
ولو بطلنا نشوف مشاكلنا ونواجهها
هنبقى زى النعامة اللى بتدفن راسها فى النمل
وهنبقى إمعة بجد
وهننسى إننا بنى آدمين من خلق ربنا اللى كرمنا بالعقل
شاب فقرى