الخميس، 2 مايو 2013

هما يومين

أبتدي الكلام منين ؟؟؟
من الواد والبنت اللى فى البرج 
ولا من مفهوم القوة ؟
ولا ما بين العلاقة بين السرقة والحال النايم 
ولا من العروض المسرحية بتاعتي ؟
ولا من اللى قالت لى نفسي أقولك تصبح علي خير وأبوسك 
ولا من نقطة إنته متعرفنيش ؟
ولا من نقطة البنات اللى مقطعه الدنيا رقص ؟
ولا مفهوم السيطرة ؟ والحب وقدس الاقداس والوجع ؟
عارفين 
فى دماغي مليون حاجة 
خلوني أحكي واحدة واحدة 
نبتدي 
خلوا نفسكوا طويل دول يومين بس أنا هحاول اختصر علي قد ما اقدر 
****
إمبارح اللى هوا مش امبارح لا اللى قبله 
خرجنا وروحنا برج القاهرة 
عارفين انا لما بطلع الدور السادس بحس بقلق من المنظر من فوق 
لكن طلعني برج القاهرة علي ارتفاع اتنين وستين دور 
ولا الدموع ولا اى ذرة قلق 
كنت مبسوط 
ومشغل مزيكا وبسمع واحيانا بولع سيجارة وعايش الحلم 
حلم القمة 
العالم كله تحت 
فى يوم كنت بحكي لبنت فى كومنت وقلت لها : انا احيانا لما بتعب بمشي فى الشارع واتخيل الدنيا كلها تحت رجليا وبحس انى فوق وبعيد عن كل وجع او تعب 
فى يوم تاني كنت بكلم بنت تانية غير الاولي بتاعة الكومنت وقلت لها انى اقدر اعيش براحتي بس المسألة إختيار 
هوا انا حياتي كلها بنات ؟؟؟
لاء طبعا فى ستين مليون حاجة تانية بس انا عموما بحب صحبة البنات لانى بعتبرهم كائنات رائعة من حيث الحضور والروح والجسد واحيانا ونادرا جدا الفكر 
صديقي قعد يصورني فى كل جانب فى البرج 
ياه , الموضوع كان كبير فعلا اه والله 
إستمتعت :)
***
فى طريق الفندق حصل كتير بس انا مش فاكر 
لكن المهم انى روحت لاول مرة بدري وهزرت مع والدتي ونيمتها وقلت بقى اقعد نت 
حصل كتير واتعرفت علي شخصية جديدة واتكلمنا عن الوجع شوية 
هي ببساطة مش شايفة ان فى حد اتوجع زيها 
وانا ببساطة مش حاسس بأي وجع 
بس عشت كتير منه كتير فوق الوصف وطبعا دا كان من حوالى ست سنين 
بس دا موضوع هنتكلم فيه فى استفاضة لاحقا 
***
النهارده كان عندي عروض مسرحية وعزمت بنت اعرفها عالعروض 
وقالت لى ان حضوري رهيب بقى وشخصيتتي وأدائي وحاجات كتير اوى 
صراحة كلامها مشجع 
قعدت اتكلم مع شخصية هامة فى فكرة بتفكر تنفذها كمشروع ومبادرة 
بتمنى الصراحة اقدر اقعد اتكلم معاها تاني بس للاسف مش عارف الفرصة هتيجي هاو :(
خلصت العرضين بتوعنا بعد ما عرضنا مرتين فى الشارع وانطلقنا علي التكعيبة 
وصديقي فات عليا بتاكسي وروحنا الحسين 
عارفين هى السياحة فعلا مضروبة ميت صرمة 
بس دا مش مبرر للسرقة نهائيا 
اه والله 
ولا مبرر لانك تحاول تستغل حد او تكدب عليه او تبيع بدون فاتورة 
حاجة تقرف بجد :(
اتعشينا وروحنا 
وعملت مصيبة النهارده كدا ... تعتبر إضافة جديدة إلي عالم حضرتي وخبراتي اللى محدش يعرف عنها حاجة 
روحت قلت لأدمن الصفحة قالت لى : يا نهار ألوان  وضحكت واستغربت وقالت لى لما هنيجي هنتكلم لاحقا 
بس هي عارفة انى معملتش حاجة 
فاكر الجملة اللى قلتها لصديقي : انا مرتكبتش المعصية بس شفتها كويس :D

***
بتخنق اوى لما الاقى حد فاكرني ضعيف 
ببقى عايز اقوله انته غبي يابني ؟
اللى قدامي يعرف عني ايه عشان يقول كدا ؟
متخيلش حد يعرف اى حاجة عن التلات صفح اللى فى اول حياتي ؟
ولا حد يعرف التلات سنين اياهم مروا ازاى ؟
ولا حد يعرف التلات شهور عدوا ازاي ؟
ولا حد يعرف برده حاجة عن كيلوباترا ( مكان مش سجاير او ماركة ) ؟
ولا حد يعرف حاجة عن اسكندرية ؟
ولا حد يعرف اى حاجة عن ازاى تبقي بتحب واحدة ( توتة ) وتبقى واثق وعارف انها نايمة بمعني الكلمة فى حضن واحد تاني وتعيش وعادي جدا ؟
ولا حد يعرف حاجة عن مدونتها اللى عملتها مخصوص لما شافتني بكتب وعملتها من سبع سنين ؟ (برده توتة)
ولا حد يعرف حاجة عن كلمة بحبك اللى قالتها ؟ ولا عن اللى نشرته لاحقا عالمدونة ؟
ولا حد يعرف انا قوي لدرجة انى اقدر استحمل كل دا ومش اضعف لحظة 
للأسف العشرة فى المية اللى اى حد يعرفهم مش هيخلوا اللى قدامي يتحكم فى بقية المية فى المية
انا باخد قرار فى حاجة وبنفذه وطز فى اى حاجة تانية 
لما بقرر ابقى مع حد او انسي حد فأنا قادر علي دا 
فاهمين الفكرة فى إيه ؟
 
 ***
لما كنت فى البرج لقيت ولد وبنت واقفين بشكل معين 
افتكرت انا كام مرة وقفت بالشكل دا ؟ تقريبا مليون ومتين الف ومع كام بنت 
ياااااااااااااه 
كانت ايام 
لبس البنت فكرني بحاجات كتير اوى 
بس دا كله مش فارق الصراحة ولا يهمني 
بس افتكرت فكرة هامة جدا 
ومحدش وحشني الصراحة :)
 
***

عن اللى قالت لى نفسي أقولك :  تصبح علي خير وأبوسك 
بجد لما قالت كدا فى حاجة اختلفت 
بجد والله 
مش عارف 
بس انا كان نفسي فى دا جدا 
بس دا مش موضوعنا 

 لان الفكرة مش فى الجنس اصلا 

لأنها قالت أو فهمت أو شافت شىء مهم جدا 
من خلال كلامها اللى قبل الجملة دي 
فهي ضحكتني 
هي شافت نقطة فى ناس بتاخد شهور عشان تحسها او تفهمها 
صح ؟
بالظبط كدا 
عاقلة ومتزنة وفى نفس الوقت قمة فى الجنون بس لسه مش مستوعبة دا 
انا سعيد جدا بكلامها علي فكرة 
 
 
***
وحشتني منار اوي يا ولاد
:(
يمكن دلوقتى بس أخدت بالي وفهمت 
 
***

واليوم ما هوا إلا يوم آخر :)
وكالعادة كتبت البوست فى وقت 
وكملته ونشرته فى وقت آخر 

شاب فقري