صوت العصافير في حديقتي الهادئة صباحا، قهوة صنعت بأمل وبعض الفطور بالكثير من الشغف وكأنها آخر وجبة في التاريخ ، بضع دقائق تفصلني عن موعدي الأول في يومي كثير من الحب والتخطيط للمستقبل ، مكالمة صباحية هادئة ، بعض الرسائل ، ، كثير من المودة والود والهدوء ، عودة النسق الطبيعي للحياة ، رحمة الله تسع الجميع حتي قلبي العاصي ، يوما ما ينظر الله الي قلبي ووجهي حين ألقاه ويعفو عني ويصفح ويغفر وتمحي عني كل الخطايا ، الآن علي فقط أن أنعم بالهدوء والسكينة وبعض المهام البسيطة ، أرسل الكثير من الحب كل صباح من نافذتي ليحملها الهواء إلي تلك البلاد البعيدة ، سوما ما سأكون هناك سألمس حلمي وشغفي بكل ما عندي وما لدي
الحياة بسيطة عمري ما حاولت ألعب وألاوع وبحاول اكون مباشر لكن تقريبا بتكسف احيانا اقول اني مقدرش علي شيء فبأجله واقول حاضر وبلبس في شجرة لاحقا بسبب دا ، مفيش اكتر من اني في جملة قلتها خسرت مبلغ كبير عالفاضي والشخص اللي خده طالبني بكلمتي وبس ، تقريبا عشان الشخص دا اقرب حد ليا وفاهم كويس طبيعتي ، مش مهم الفلوس اي حاجة بنشتريها بيها سهله بتتعوض وبنعمل تاني مش قصة ، بس يهمني اخويا يبقي مبسوط وسعيد واي حاجة تانية مش مهمة
كنت دايما بقول الحياة بسيطة والصراحة والمباشره احلي من نور الشمس ، مفيش حاجة بتتبني علي لوع ولف ودوران وخداع وتلوين ، يمكن دا انا منتبه له من زمان ويمكن صراحتي طعمها وحش لانها زي الحقيقة مرة جدا ولكن ميهمنيش كل دا يهمني اكون ماشي في طريقي مكمل ناحية حلمي وبسعي بكل طاقتي عشان اوصل لهدفي ، مبعرفش الاوع ، من شوية حد بيكلمني علي ميعاد نتقابل وقعد ينبه عليا قلتله والله لو مش عايز اقابلك عمري ما هديك كلمة ، انا كلمتي بتبقي واضحة ورغبتي معلنه ، يمكن اكتر حد اتفاهمت معاه في حياتي وقدرت اتواصل بشكل مباشر كان نفس الحاجة ، مباشر ين بنفس الشكل وواضحين وفي صراحة ومفيش حاجة تستخبي ، كنت بتناقش امبارح في اهمية النقطة دي وفي نقطة ان كل حاجة بالنور اكثر وضوحا وراحة ، التفاهم والتفاق بيكون زي العسل لما بنرسح نفسنا واللي قدامنا ،
امبارح سمعت تعليق عليا اني تقريبا اتغيرت تماما وانا ذات نفسي مش مصدق لا اللي وصلتله من خير او شر واللي وصلتله في حياتي ولا تغيير شخصيتي وحياتي ، تقريبا بقيت السوبر كوكو زي ما كنت بتريق زمان
انا الحمد لله حاليا بخلص كل حاجة عشان افرض حالة السلام بدون وش وصداع في حياتي من اي حته ، اخلص كل مشاكلي في خلال كام يوم واقعد اتمتع بثمار الهدوء والسلام والسكينة ، معدتش مستني اي حاجة غير اني ابقي كويس وبس ، مش عايز اي حاجة تانية غير حبة الروقان دول ، حاجات كتير بتمثل للناس اهمية بس بالنسبة لي لا تمثل شيء ، مبسوط بالوضع والحال والاحساس والفرحة والعيشة واللي عايشينها وبالسكينة والراحة دي ،بعيد عن المفروض واللي حصل والي بيحصل قدرت اخلق لنفسي مربع ذهبي والحمد لله
بحب اكتب واحب افرح ولو بابسط الحاجات واحتفل كل شوية بحاجات عبيطة واخيرا ربنا كرمني واشعدني ونولني كل احلامي وامنياتي ، فرج من ربنا ونصر عظيم
خلينا نكمل ايامنا بهدوء وشوية ضحك ومحبة وراحة بال و روقان وصراحة ومباشرة ومعاشرة ناس بتعرف وبتفهم في الكلام العبيط بتاعي دا ، خليني استقر زي ما بتمني وانا بخلص كل حاجة علي الهادي
يارب الف حمد لك يارب
.jpg)
