الأربعاء، 16 فبراير 2011

مبارك الأب ... عندها يا أدهم




السلام عليكم ورحمة الله وبركاته
بعد تنحى الريس محمد حسنى مبارك ولأول مرة فى مصر يطلق على رئيس كلمة الرئيس الأسبق وبدأت أنباء عن مرض الرئيس الأسبق : محمد حسنى مبارك وبدأ المصريين فى التعاطف وظهرت صفحات حب وبدأت تتنظم مسيرات فى حب الرئيس وحملات تدعو له بالشفاء ومصريين بيبكوا بليل كل يوم (( والله العظيم الكلام دا بجد وحقيقى وناس متعلمه وواعية وناس جهلة برده متعرفش لا تقرأ ولا تكتب )) وبدأ الناس تحن لما مضى وتبكى الرئيس المريض بالسرطان وظهرت تفسيرات بأن الجيش كان ينوى الإنقلاب وكلام كتير كدا مش لازم نتكلم فيه دلوقتى .... هنتكلم فيه لاحقا
لكن الأهم حاليا هوا الرئيس محمد حسنى مبارك ومرضه والتصرف الصادر من البعض ...أنا طبعا مليش علاقة بحد وكل واحد حر فى رأيه وقلت من أول يوم نزلت فيه فى الثورة أو شجعت لها أو حتى إتكلمت عنها إن النزاع على اللى هيمسك مصر أو عن اللى المفروض يحكمها يتحل بحاجة واحدة : إنتخابات نزيهة وشريفة وقاضى لكل صندوق فى ظل شفافية وصدق تام ... غير كدا يبقى ملناش علاقة بحد وكل واحد حر فى رأيه ... مش هفرض عليك رأيى لكنى هناقشك فى رأيك عالأقل
نيجى للسؤال الأهم والإجابة المستفزة :
السؤال : إنته بتبكى على جناب الريس ليه ؟؟؟
الإجابة :
- الرئيس مبارك كان بطل حرب أكتوبر
- الرئيس مبارك فى بداية حكمه كان راجل طيب وكويس
- الرئيس مبارك عيشنا فى سلام طوال فترة حكمه
- عملنا مشاريع وكبارى ومترو الأنفاق وقهر الإرهاب والجماعات المتطرفة فى مصر
- راجل كريم ومحترم ويستحق التبجيل ل...كذا كذا كذا كذا

ردى :
أولا : فلنقل إنى شاركت فى حرب أكتوبر ... ولا بلاش الحرب ... أنا شاركت فى الثورة الحالية ومن أول مظاهرة طلعت (( زى أول ضربة جوية كدا )) وإتبهدلنا وحصلنا وحصلنا ... هل دا يمنحنى الحق فى سرقة البلاد ؟؟؟ هل مشاركتى فى شىء بطولى (( هوا فى الأساس واجب عليا إنى أطلع أقول لاء للفساد والظلم زى ما واجب على كل جندى إنه يدافع عن وطنه )) تمنحنى الحق فى إفساد وطنى أو قتل أبناؤه ؟؟؟ هل عشان الريس شارك فى الحرب أصبح من حقه إنه يذلنا كل شوية بمشاركته دى ويسرق البلد ويكون السبب فى كل البلاوى ؟؟
وهل الرئيس إحترم ضحايا الحروب ومن شاركوا فيها زى الفريق سعد الدين الشاذلى ؟؟ جمعة الشوان ؟؟ وغيره ....
هل الرئيس إحترم المدنيين ؟؟؟ هل أصدر أوامره للداخليه بمعاملتهم بإحترام وحمايتهم فى المظاهرات عالأقل وبدأ يستجيب للطلبات من اليوم الأول ؟؟؟
هل الرئيس إحترم ورد مصر (( الشباب )) ووفر لهم فرص عمل أو حتى حاول أن يترك لهم شىء من الكرامة ؟؟ أو حتى رحمهم ؟؟؟أو جاب لهم حقهم لما ماتوا فى العبارة ؟؟؟ أو حاول يقضى على الفاسدين المحيطين بيه ؟؟؟

ثانيا : هل بداية حكم الرئيس مبارك تشفع له كل اللى عمله فى التسعتاشر سنة الأخيرة ؟؟؟
يعنى مثلا وليكن شاب فقرى رئيس الجمهورية وعملت لكم الأنفاق الطائرة .... فهل من حقى بقى إنى أعمل اللى أنا عايزه بعد كدا عادى ... سواء بتوزيع ثروة البلد على أولادى أو إسكات صوت الحق فى البلد وقهر المفكرين وإعتقال المواطنين ؟؟؟

ثالثا :
هل الهروب من الحرب فى الأصل ... عمل بطولى ؟؟؟
إن كانت الحرب واجبا عليك وتفاديتها ... فإنته فى الحالى دى مش بطل ...إنته جبان
هل تصدير الغاز للعدو الأول للمصريين وللعرب والمسلمين يعتبر عمل بطولى أو سلمى ؟؟؟
وهل هروبك من الحرب بحجة البناء ... وبعدين يختفى البناء والتنمية .... يبقى حضرتك بتبنى عزبة بقى مش بتبنى بلد عشان تحارب أو تكون دولة قوية ... ولا إيه ؟؟

رابعا :
عمل المشاريع والحاجات الكتير الحلوة دى هل دا مكافأة من بيت الريس ؟؟؟ يعنى هل هوا أعطانا الميراث الخاص بيه وقام بعمل تلك المشروعات من ماله الخاص ؟؟؟ هل هذا ليس واجبه وهوا متفضل ومتكرم علينا بيه جدعنه ؟؟؟
طبعا واجبه كرئيس جمهورية وواجب القسم اللى أقسمه وإن لم يكن جاهز لهذا فليه يقسم القسم من الأول أصلا ؟؟؟

خامسا :
العذر الأكثر إستفزاز ....(( فقع من وجهة نظرى ))
حضرتك حاليا وليكن فى عهد السيد الرئيس المبجل المحترم محمد حسنى مبارك (( نتكلم بأدب )) وبتقبض 500 أو 650 جنيه (( مش قلنا بلاش قلة أدب )) ... وخد بالك إنته بتقبض كويس فى ناس تانية شغالة باليومية ومش بتشوف الطبيخ أو اللحمة أصلا ... دا بفرض إن حضرتك موظف ... قولى بقى هتربى عيالك إزاى من المرتب المحترم دا فى عهد الرئيس المبجل ؟؟؟
هتأكلهم حب الريس ؟؟؟ هتعالجهم بطيبة الريس؟؟؟ ولا هتفسحهم كل جمعة بجدعنة الريس ؟؟؟
ساعتها خلى المشاعر تنفعك .... السياسة والحكم لا يقيم بالمشاعر والعواطف بالرغم من إننا شعب عاطفى بالدرجة الأولى ... ومعظم أحكامنا وتصرفاتنا قائمة عالعواطف والمشاعر

كام سؤال أخير :
هل من حقنا أن نشمت فى مبارك ؟؟؟
هل يستحق عطفنا أو حبنا ؟؟
هل كل أعماله البطولية تيشفع له إطلاق النار على المتظاهرين والمدنيين أو إختطاف أبناء الشعب وتعذيبهم فى السجون ؟؟؟؟
هل يستحق الدفن فى مصر أو حتى جنازة عسكرية ؟؟؟
هل يستحق أن يحيا بيننا على أرض مصر ؟؟؟
هل يظل للأب حقوق حتى بعد أن يعق أبناؤه ؟؟؟
هل الفساد الذى إنتشر فى عهده يمكن المسامحة فيه ؟؟؟
ماذا عن شهداء الثورة ؟؟ وماذا عن شهداء العبارة وقطار الصعيد و أكثر من قطار غيره ؟؟ وماذا عن تصدير الغاز ؟؟ وماذا عن من ماتوا فى السجون ؟؟ وماذا عن مليارات سويسرا ؟؟؟ وماذا عن أمراض الشعب المصرى التى سببها له بفساد من حوله ومتاجرتهم فى دماء المصريين ؟؟؟ وماذا عن كل العقول المفكرة التى هجرت البلاد بسبب فسادها وإحتمالية دفنهم أحياء يشتكون فى طوابير دواوين الحكومة أو فى إنتظار قراراتها ؟؟ وماذا عن التوريث وجمال وعز وصفوت وسرور وغالى وغيرهم ؟؟؟ وماذا عن الرعب الذى سببته للشعب بفتح السجون ؟؟؟ وماذا عن وعن وعن ... لا تسعنى المدونة ولا حتى الكتب لنشر آلام الشعب التى سببتها بعنادك وجبروتك وتكبرك علينا وفسادك أولا وأخيرا ....

كلمة أخيرة للرئيس الأسبق حتى وإن لم يكتب لها النجاة لتصل إليه :

سيدي الرئيس :
كل الشعب كان يتمني لك خروجا كريما من السلطه...لأننا لسنا شعب خائن لا يقدر الجميل ولسنا أنذالا ولأنك كنت رئيسا لمصر أم الدنيا و أرض الكنانة وكنت جندى من خير أجناد الأرض ولكنك نسيت هذا وتناسيت من أنت وما هوا دورك حقا ونسيت أبناء وطنك وأمرت بإعدامهم فى الشوراع ... و للاسف أنت من اضطررتنا لذلك .. وعلي الرغم من فرحتنا العارمه بنجاح ثورتنا الا انها تركت لنا غصه في حلوقنا لاننا لم نكن نرغب في ان يخرج رئيسا لمصر بتلك الطريقه وكنا نتمني خروجا كريما ... وتركنا لك الأختيار تقديرا لك ... تركنا لك بعض الكرامة والتقدير ولكنك تماديت فى عنادك
أنت من وقفت في وجه التيار... تيار الحرية وموجات تسونامى الغصب وتكبرت على أن تتنحى ونسيت ان من يقف فى وجه تيار الحرية ومن يتاجر فى ألام الشعب وفقره لا يستطيع يصمد كثيرا .... وفى النهاية لا أدعو لك ولا أدعو عليك إنما أقول : حسبنا الله ونعم الوكيل والله يحكم بين الشعب وبينك يوم الدين ... لكن لا تنتظر منا شيئا ولا حتى عطفا ... فجراح الوطن منك أعظم من أن يطويها النسيان أو الشفقة أو حتى الحب

شاب فقرى

ملحوظة : محدش ييجى يقولى يا عميل وبتحب مبارك والرغى الفاضى دا ... المقال مجرد نقاش ورد على المتعاطفين معاه وتقدير له كرئيس جمهورية سابق وإنسان .... غير كدا لو مفهمتش يبقى تقرأ تانى لأنك مقرتش أصلا أولانى ...

ملحوظة 2 :
قريت إستاتس عند سووو عالفيش وكان بيقول كل ما نيجى نقول حاجة عن مبارك يقولوا لنا أبوكم مبارك ولو إتكلمنا عن الشرطة اللى بتقتل الناس فى الشوارع يقولوا إخواتكم معلش يا شباب .... دا إيه العيلة الوسخة دى
:D

الجمعة، 11 فبراير 2011

تحيا مصر وتحيا الثورة

مش عارف أقولكم إيه .....
مبروك علينا ... مبروك لثورتنا
أبطالنا اللى إستشهدوا .... الناس اللى بيتت فى الشوارع ... الناس اللى خرجت وقالت لاء .... الشباب اللى مخافش من الموت ومخافش من الإعتقال والحبس ..... شباب مصر الرجالة بجد
إن شاء الله ثورتنا وكفاحنا دا يكون نور لغيرنا .... يكون دافع لكل الشعوب العربية إنها تتحرك وتقول لاء لظلم الحكام ولاء للفساد
جوايا كلام كتير أوى بس مش هقدر أكمله .... عندى مشوار مهم ... للأسف سيبت الميدان الصبح وراجع له دلوقتى أحتفل مع كل المصريين برحيل وتنحى الظاغية ....
ألف مبروووووووووووووووووووك لمصر
الصورة دى أنا بعتز بيها جدا من يوم 25 يناير وبزى الأمن المركزى :D
بعد ما إتضربنا بالطوب والقنابل المسيلة للدموع وإتبهدلنا ....
الحمد لك يارب
الحمد لك إن تعبنا وشهداءنا ودم أهلنا مراحش هدر ....
غدا تشرق شمس الحرية

مبروك تانى وتحياتى لكم جميعا
مش هقول شمتان فى اللى قالولى مش هتغير حاجة أو فى اللى إتريقوا على الثورة وعلى دم اللى ماتوا فيها .... اليوم ننسى كل شىء ... اليوم كلنا مصريين
فلتحيا مصر
شاب فقرى


الأحد، 6 فبراير 2011

أصلها جماعة محظورة وبتأكل كنتاكى وبتتجوز فى الميدان


حوار بينى وبين واحد معرفة عن الثورة أتمنى أن يرد على إجابات البعض منكم :

واحد معرفة : أنا مستحيل أروح الميدان أو أشارك فى المظاهرات .
أنا : ليه يابنى ؟؟؟ هوا إحنا بنسرق ولا بنعمل حاجة غلط ؟؟ دا حقنا إننا نعترض ونتظاهر
واحد معرفة : لاء يا صديقى .. مش بتكلم فى كدا ولكن قصدى إنى مش عايز أبقى فى نفس الصف بتاع الأخوان المسلمين
أنا : ومالهم الأخوان المسلمين مش مصريين زى أى قوة مصرية ؟؟؟
واحد معرفة : أصلهم جماعة محظورة
أنا : وإيه علاقتهم بالمظاهرات ؟ إيه اللى ودى القلعة عند البحر ؟؟؟
واحد معرفة : إنته بتهرج ؟ أنا سمعت إنهم هما اللى ماسكين المظاهرات
أنا : سمعت ؟؟؟ وبتدى ودانك لحد ليه ؟
واحد معرفة : عشان مورطش نفسى فى كارثة ضد الوطن
أنا : إنته عبيط ولا شكلك كدا ... الإخوان المسلمين مينفعش تقول عليها جماعة محظورة لأنهم ببساطة واضحين وأهدافهم معلنة وعلى الملأ وليهم مرشد عام والبلد كلها عارفاه وعارفة أعضاءها ... روح إتكلم وقول جماعة محظورة عالتكفير والهجرة أو الجهاد أو حتى القاعدة ... الإخوان النظام لو حب يبيدهم ليه مش أبادهم من زمان زى الجماعات دى فى مصر ؟؟؟ متقنعنيش إنك أهبل ومصدق إن النظام اللى هوا مليان بلطجية وكان بيعدم المدنيين فى الشارع صعب عليه يبيد جماعة أو حتى يعتقلهم واحد ورا التانى ... القصة كلها فى إن دا كارت إرهاب
واحد معرفة : كارت إيه ؟ وبعدين ما هما اللى ماسكين المظاهرات وبيحركوها ... وبيتفاوضوا
أنا :كارت إرهاب عالدول الأجنبية وكل أعداء المسلمين ...أينعم إحنا دولة فيها مسلمين ولكن ... العالم كله أصبح فى رعب من شعار الإسلام وسيرته زى ما يكون كابوس هيهبط عليهم ويدفنهم تحت الأرض ... عايشين فى جهل ولا يعرفوا أصلا يعنى إيه إسلام غير إن فى واحد إسمه أسامة بن لادن وبيقتل فى الناس بالقنابل والطيارات ومعندوش مشكلة يفجر عربيات فى العراق ويمكن كمان يفجر مترو أو قطر فى أسبانيا أو اليابان ... النظام بتاعنا بقى صايع ... بمعنى إيه ؟؟ بمعنى إنه بيهددهم وبيقولهم أنا الأخوان أكبر منى ومش قادر أسيطر عليهم ودول لو مسكوا الحكم هيسحلوكم ويبهدلوكم وتبقى دولة متشددة وكلام كتير يحاول يخوف الغرب ويخليه يدعم مبارك.... وخد بالك كل اللى فى الميدان مصريين فقط ... لا تقولى أخوان ولا مسيحيين ولا مهندسين ولا مدونين ولا حتى شباب خمسة وعشرين ولا ستة برميل ولا إتناشر مايو ... دول كلهم مصريين فقط ومحدش بيدير حاجة ...كلنا فى بعض كيان واحد.
واحد معرفة : طيب ياعم أنا برده مش رايح المظاهرات ومش هبقى مع الأخوان فى صف واحد
أنا : الأخوان بتشارك زيهم زى أى قوى وطنية ومتنساش إن فى مسلمين ومسيحيين ومش تبع الأخوان ولا حتى المقاولين العرب .... ناس عاديين زيى وزيك وكل واحد شايل جبل هموم ومشاكل ... الإخوان مش ماسكين الميدان ولا ماسكين حاجة ولكن .... هما بيشاركوا زيهم زى أى قوة وطنية ...إنته ناقص تقولى مش هنزل عشان المهزلة اللى موجودة عاليفط وكتب الكتاب اللى تم ...
واحد معرفة : ودى فعلا حقيقة ... الناس دى نازلة تهزر وتهرج ... وأنا مستحيل أعمل كدا وأخرب بلدى
أنا : أهوه إنته كدا بتستهبل ...
واحد معرفة : ليه بقى ؟
أنا : أولا كل واحد وعنده أمنيته الخاصة وحلمه الخاص لكن كلنا متفقين على كون إن دا وطننا ولازم نعيش فيه أحرار ومعززين مكرمين وبدون طوارىء ... هل تتفق معايه فى دا ؟؟
واحد معرفة : أتفق معاك جدا
أنا : طيب أنا يا سيدى بينى وبين نفسى ... مش عايز أتجوز ولا أجيب عيال للدنيا فى ظل الظلم والفساد دا ويتقهروا وأحلامهم تتكسر زى حالاتى ... حد ليه عندى حاجة لما أقول دا على الملأ ؟؟؟ حد يقدر يقولى إنته بتهرج ؟؟؟ هوا الإنسان مش بيحب ولاده ؟؟؟ ومن حقى أتمنى أربيهم فى بلد يعاملهم على إنهم بنى آدمين مش مجرد أرقام وأعداد بتساعد كل مسؤل إنه يسرق أكتر من قوتهم ومن حريتهم ...
كل واحد حر فى تعبيره بس دا ميمنعش إننا كلنا بنشترك فى هذا الحلم الواحد .... مصر بكره ... الحرية والأمل والتحرير من الذل والقهر وبلطجية الأمن وحكم الظالم
واحد معرفة : طيب والناس اللى بتستهبل ورايحين يتجوزوا فى الميدان ؟؟؟
أنا : إنته مش واخد بالك من حاجة ؟
واحد معرفة : إيه هى ؟
أنا : الناس اللى بتتكلم عليها دى اللى واقفين فى الميدان من يوم خمسة وعشرين يناير ومات منهم فى يوم تمانية وعشرين الجمعة شباب زى الورد ... الناس دى النظام بيحاول يضحك عليهم بشوية مطالب بيحققها بشكل صورى ... ولكن المطالب الحقيقية لا تتحقق ..
واحد معرفة : قول كلام مفهوم وحياة والدك
أنا : النظام بيحاول يراوغ ويطول فى وقت المفاوضات والمجادلة عالفاضى على أمل إن الناس دى تزهق وترجع ترضى بالذل وحاول يلاعبهم بكارت الفوضى لكن شباب مصر قدروا يتغلبوا على البلطجية وعصابات الشرطة السرية المنظمة اللى كانت بتسرق واتغلبوا على اللى اتهربوا من السجون بواسطة العادلى الخسيس ... الشباب أثبتوا إنهم رجالة بكره بجد ومطلعوش مجرد متحرشين وشوية عيال أملها فى الحياة تجيب عيال وتتجوز وتقبض كل آخر شهر وخلاص
واحد معرفة : برده كل دا ملوش علاقة بإن واحد وواحدة يتجوزوا فى الميدان ... دا إسمه تهريج ومنظره فاضية
أنا : النظام يا صديقى بيحاول يلاعبهم بكارت النفس الأطول ... والناس بتحاول ترد بإنها هتمارس حياتها عادى فى وسط المظاهرات ... فى بعض الناس بتروح أشغالها الصبح وبيقسموا بعض و متابعين حياتهم عادى خالص ... حتى لو عزلتوا ميدان التحرير وخليتوه منطقة عشوائية وبنيتوا فيها عشش هنفضل معتصمين وهنطالب بحقوقنا لأنها حقوقنا ... حتى لو موتنا قدامها.... يعنى من الآخر الناس بتوصل رسالة : تناحة بتناحة يا نظام بيستهبل وريس مش عايز يحس بشعبه .... وبرده دى رسالة للأمل ... ناس بتبدأ حياتها من النقطة دى ...أمل للمتظاهرين وأمل لمصر كلها .
واحد معرفة : يعنى إنته قصدك إن الناس مش هيفرق معاها المظاهرات وهتكمل وهتعيش حياتها غصب عن النظام صح ؟؟
أنا : بالظبط
واحد معرفة : طيب والتخريب اللى حصل والبلطجية والتكسير والتدمير دا كله ...
أنا : دا كله رد فعل طبيعى لسحب الشرطة من كل مكان فى مصر ... البلد كلها فضيت من الأمن وأطلقوا البلطجية والشرطة السرية والمساجين على الناس عشان يدينوا الثورة زى ما السادات عمل قبل كدا وعشان يقدروا يكدبوا علينا فى أجهزة الأعلام والتلفزيون الفاشل
واحد معرفة : طيب ليه الناس مش تروح بقى ؟؟؟ إنته مش شايف كل الناس اللى بتعيش باليومية فى مصر ومش لاقيين ياكلوا بقالهم إتناشر يوم ؟؟؟
أنا : متحاولش تقنعنى إن شباب المظاهرات وميدان التحرير هما السبب ... السبب هوا النظام الفاشل فى توزيع الثروات والراغب فى إنتشار الجهل عشان يقدر يسرق كمان وكمان وكمان ومحدش يقدر يلومه ولا يقوم بررم معاه ... وبعدين إنته نسيت الناس اللى ماتوا ؟؟؟
واحد معرفة : ناس مين ؟
أنا : شباب نزلوا من بيوتهم مطالبين بحقهم وحق أهلهم فى بلدهم ... اللى إنضرب بالنار من قناص واللى إتدهس تحت عربيات الشرطة واللى إتكسرت دماغه تحت عصيان الأمن المركزى وغيرهم ... الناس دى دمها فى رقبتنا كلنا ... منقدرش نخونهم أبدا ولا نقدر ننسى دمهم اللى إتهدر بسبب عناد النظام وعناد رئيس لا يحترم أبناء وطنه ولا يقدر حياتهم ودمائهم ومرة يطلق عليهم البلطجية ومرة الرصاص الحى ومرة الأمن المركزى وكأنهم كلاب أو صراصير ... مع عدم الإحترام ليهم ولا لإنهم مصريين زيهم زي أى مصرى ومن حقه مطالبه تتحقق
واحد معرفة : طيب يا سيدى أنا مقتنع بكلامك ... لكن إحنا صبرنا تلاتين سنة ... خلاص جت على الكام شهر دول ؟؟؟
أنا : وهل النظام حقق لك أى وعد أو إلتزام فى خلال تلاتين سنة ؟؟؟
واحد معرفة : ما هوا كل مسؤلين الحزب الفاسدين إستقالوا وكمان الريس وعد بعدم ترشيح نفسه
أنا : إسمحلى أقولك إنته بتخلط الأمور ...
واحد معرفة : إزاى ؟؟
أنا : أولا إيه علاقة الحزب دا بالدولة ككل ؟؟؟ إحنا مالنا وماله ؟؟؟ ما يروح فى أى داهية .... إحنا عايزين الفاسدين يتحاكموا والنظام يرحل بكل رموزه ... وإيه ضمنك بقى إن اليوم اللى تنتهى فيه الفترة بتاعت الريس تلاقى مظاهرة من بعض المؤيدين بيهتفوا بغن الريس يرشح نفسه أو جمال مبارك وتلاقى الريس بيدمع وبيقول سأنزل عن رغبتى وأتبع رغبة الجماهير ... وطبعا دى حصلت قبل كدا ... وإزاى تثق فى رئيس ونظام بالكامل بيخدعك من تلاتين سنة ... ومش بيحقق أى حاجة وكل شهر وكل يوم بيفوت بسرقة ودم وإهانة للمصريين جوا وبرا ؟؟
واحد معرفة : بس إحنا مستهدفين ... والعالم كله عيونه علينا وإيران والمخابرات الأمريكية وإسرائيل والدنيا كلها نفسها نفشل وتيجى تحتلنا
وكمان سمعت إن المظاهرات فيها ناس بتاكل من كنتاكى وبياخدوا فلوس كل يوم
أنا : طيب بزمتك دا كلام يتعقل ؟؟؟ لما يبىقى ميدان التحرير فيه إتنين مليون بنى آدم ... أنهى ملياردير دا اللى هيصرف عليهم أكل وشرب ؟؟؟ أنهى ملياردير هيديهم كل يوم خمسين جنيه وكمان وجبة من كنتاكى ؟؟ بزمتك إنته تعرف فرع كنتاكى شغال أصلا ؟؟ إذا كان كل المحلات للوجبات السريعة إتدمرت والبنوك نفسها كانت قافلة ... مين بقى اللى شايل فى بيته حوالى أربعين مليون جنيه عشان كل يوم يصرفهم عشان يأكل كل دول ويشربهم ويديهم فلوس كمان ؟؟؟ لاء والأدهى بقى يخليهم يقنعوا بقيت الشعب ... ويبقى لكل واحد أجندة .. لاء وكمان يموتوا قدام الشرطة والبلطجية ويتضربوا ويتسحلوا عشان خمسين جنيه .... بزمتك إنته مصدق اللى بتقوله أصلا ؟؟؟ وكمان هل كل دول المخابرات المركزية والأخوان وإيران وحماس وحزب الله وكمان غسرائيل فجأة تحالفوا ضدنا ؟؟ إيه دا ياعم هوا خلاص محور الشر ؟؟؟ ولا ياترى لو كل دول موجودين فى مصر ... فجهاز المخابرات المصرية كان فين ؟؟؟ وعمر سليمان رئيس جهاز المخابرات كان بيعمل إيه ؟؟؟ ول دا حقيقى فهوا لا يستحق يبقى نائب للرئيس ... ويجب محاكمة كل اللى قصروا فى أمن مصر ... من أول ؤئيس الجمهورية لحد أصغر غفير فى المخابرات وأمن الدولة ... هل لسه مصدق اللى بتقوله ؟؟؟
واحد معرفة : لاء
أنا : خلاص يبقى تبطل تسمع سموم الإعلام وتتبع قلبك وضميرك
واحد معرفة : طيب والناس اللى إتفاوضت مع النظام وبتتفاوض ؟؟
أانا : النظام بيكسب وقت لا أكثر ولا أقل وبيضغط على الناس عشان تضغط على الأحرار اللى قدروا يقولوا لاء ... الحوار لا يبدأ إلا برحيل مبارك ... غير كدا مفيش حوار ... يرحل بأى شكل فى مليون سيناريو دستورى ... مش لازم يتمنظروا علينا ويحطوا العقدة فى المنشار ..
واحد معرفة : أظن دلوقتى أنا عرفت أنا هعمل إيه ...
أنا : وأظن إنى دورى معاك إنتهى ....

أتمنى أكون قدرت أرد على دعاة التوقف وإخلاء الميدان ورديت على أسئلة كتير فى نفوس كل المصريين ....
أتمنى تشوفوا الفيديوهات اللى هشيرهالكم ...

فيديو عن أحداث الثورة :




فيديو إعدام مواطن مصرى ( مدنى ) فى الشارع يوم الجمعة 28 يناير فى الأسكندرية :



صور لبعض من شهداء مصر فى ثورة 25 يناير :


من أجل كل هؤلاء الشهداء الأحرار ومن أجل مصر ومن أجل الأجيال السابقة والقادمة ... نكمل مسيرتنا ...
شاب فقرى

ملحوظة : أنا لست أخوانى ولا تبع أى تيار أو جماعة أو إتجاه ....أنا مصرى يطالب بحرية بلده ومحاسبة الظالمين وطرد الفساد خارجا ...
ملحوظة 2 : يوم الجمعة القادمة باذن الله زحف مليوني سلمي من شعب مصر الي قصر العروبة و مبني الاذاعة و التلفيزيون و ميدان التحرير في القاهرة .... و قصر راس التين بالاسكندرية .... لمزيد من الضغط علي تنفيذ مطالب الشعب من اسقاط نظام السفاح مبارك انشروا يا شباب

السبت، 5 فبراير 2011

مش هنسيب الميدان وهنكمل المشوار


فى الأول قالوا علينا أغبياء ومفيش ثورة بيتحدد ميعادها وإن الكلام اللى بنعمله دا مش هينفع وإننا هناخد على دماغنا والأمن هيدينا بالجزمة ونرجع تانى بيوتنا
وبعدين بعد يوم الجمعة 28 يناير : قالوا علينا ثوار ورجالة بصحيح وإن اللى عملناه دا يعتبر إنجاز قوى جدا وإننا بجد رجالة
وبعدين لما ظهر التنظيم فى دخول ميدان التحرير والتفتيش وإظهار البطاقة الشخصية والبيات فى الميدان والمستشفى الميدانى : قالك دول معاهم أجندات أجنبية وخونة وعملاء
وبعدين لما البلطجية بهدلونا وبهدلوا المتظاهرين : قالوا لاء مينفعش كدا ... النظام فعلا فاسد ولابد من إستئصال الورم بس كفاية عليكم لحد كدا وسيبوا الشرعية والدستورية وسيبوا النظام فى حاله وروحوا بقى كفاية كدا
وكل الحاجات دى عصبتنى وحرقت دمى :
أولا : لما إنته شايف إن مفيش ثورة ينفع يتحدد ميعادها ... معملتش ليه حضرتك تحرك أو ثورة أو حتى مظاهرة على غير ميعاد ... أبسط حاجة كان هيتقبض عليك وتتهم بالخيانة العظمى والعمالة ...إنما اللى حصل هى ثورة تحرك فيها كل فئات الشعب ....
ثانيا : لما إنته شايفهم رجالة كدا وثوار منزلتش معاهم ليه ؟؟؟
ثالثا : إتهام الأجندات الفاكس وشبح الأخوان اللى النظام بيلعب بيه ... تفتكر الناس هتبلع الظعم بالسهولة دى ... ما كل الناس نازلة الميدان ... كل اللى أعرفهم مفيش فيهم ولا واحد أخوانى وحتى اللى ماسك الميدان هما الشباب مش تقولى أخوان وبتنجان ... وعلى فكرة لو الثورة إنطفت نارها ... أبسط حاجة هيعملها النظام هيوجه السكينه تجاه الأخوان ويتهمهم بالعمالة ويسجنهم ويخوف بيهم الغرب والدول الأجنبية اللى بتعادى نظام مبارك وهيبقوا عبرة لبقية فئات الشعب
ثالثا : شرعية مين ودستورية مين يا قمر الدين .... فاكر لما حاولوا يغيروا الدستور كان فى إستفتاء نزيه .؟؟؟ ولا أصلا المجلس دا إتعمل فى إنتخابات نزيهة ؟؟؟ متجيش تطالب بشرعية فى وسط نظام فاسد من أوله لأخره
طيب لو إحنا كنا سمعنا الخطاب الأول وقولنا آمين ولازم نسمع كلام الريس ... هل ياترى الحكومة كانت إتغيرت أصلا ؟؟؟
هل ياترى كان فى حد عبرنا بعدها ؟
كان زمان البلد لسه تحت حكومة نظيف أو الحكومة الجديدة والحزب الوطنى قوى ومسيطر عالبلد وعلى كل حاجة واللى بيسرق بيسرق واللى بينهب بينهب وكان زمان الناس دى كلها إتلمت فى المعتقلات
بعد كل خطاب بيطلع فى تصريحات أهم وكلام من النظام وقرارات فاكرها منحة على ناس غلابة ... فى حين إن دى أصلا حقوق الغلابة
إهمدوا بقى وبطلوا شعار إخلاء الميدان ووحدوا الصف
وبعدين اللى بيقولى دا خراب لمصر .... هوا فى خراب أكتر من اللى وصلنا له ؟؟؟ فى دم راح أكتر من اللى راح واللى إتدفن فى الدويقة واللى غرق فى العبارة واللى إتحرق فى قطر واللى مات فى قسم شرطة من التعذيب أو إتسرقت لقمة عيشه منه .... هوا فى خراب أو عار أكثر من تصدير الغاز ؟؟؟ وهوا فى عار أكثر من إطلاق الرصاص الحى على المتظاهرين والبلطجية يقطعوا فيهم ؟؟؟؟
وهوا الناس اللى بتتهمنا بالعمالة والخيانة والأجندات والناس اللى شغالة باليومية ... عاجبها حالها وحال البلد ؟؟؟ هوا مين اللى رماهم فى الفقر ؟؟؟
هوا مش كفاية اللى شوفتوه من كروت الإرهاب من النظام : مرة بالشرطة السرية والمباحث والمساعدين وهما بيسرقوا البيوت والجيش قبض عليهم ومرة تانية من بلطجية فى التحرير ومرة تالتة من المكالمات الزائفة عالتلفزيون المصرى ووساخة الإعلام ...
إعرفوا قيمة حريتكم وإعرفوا تمنها .... إخلاء الميدان والتنازل فجأة يعتبر تصرف غبى .... كلنا هنكمل وكلنا هنفضل ننزل
وسمعت الفترة اللى فاتت ناس بتقول شباب 25 يناير بطلوا ينزلوا ووافقوا على اللى بيانات الريس
شباب مين يا قمر الدين ..... دا شعب ... مفيش حد من حقه يقول وافقنا عالمطالب غير الشعب اللى يرضى بيها بشكل كامل ... ولنفترض إن البرادعى أو الإخوان أو حتى الوفد أو سته برميل زى ما بحب أسميهم قالوا إحنا وافقنا على إنجازات النظام ... هل دا خلاص هيخلى الناس تفوق وتقول بابا مبارك حبيبنا ونمشى وراه ؟؟؟؟
الناس اللى نازلة دى من كل فئات الشعب لاهى فى تيار ولا فى حزب ولا حتى فى جماعة ... واللى هيحاول يصنفهم تحت رابطة أو حاجة يبقى يتكلم ويقول مصريين .... فقط
الناس اللى فى الميدان واللى بيحاولوا يوهموكوا إن عددهم بيقل وإنهم خلاص زهقوا ... الناس دى وقفت فى المكان دا بدمها ... راح منهم ومننا جرحى وشهدا وناس إتكسرت على إيدين البلطجية ونازل إتبهدلت على إيد الأمن .... مش عايز حد يحلم ويقول محدش هيعبرهم ...
النظام بيتهاوى ويتداعى وإنما النصر صبر ساعة ... ولا تنسوا إن الساعات الأكثر ظلمة هى التى تسبق الفجر
وحدوا الصفوف .... كونوا معا بصوت واحد ورأى واحد وقوة واحدة
وإحنا مكملين وثابتين على موقفنا... ومش هنسيب الميدان وهنكمل المشوار .... كلنا على قلب راجل واحد
قلب مصرى
شاب فقرى

الأخوة المحترمين اللى مش عاجبهم الكلام يتفضلوا يشوفوا المطالب الدستورية للشعب ممكنة ولا لاء ويشوف السيناريوهات المطروحة فى شرح مبسط هنا ....إضغط ربنا يهديك وتعقل وتركز كدا ...
وأنا جايبلكم الفيديو هنا كمان ...





أما اللى مش عاجبهم الكلام خالص : فيحسم المشكلة بيننا إنتخابات تشريعية أو رئاسية نزيهة أو إستفتاء نزيه وقاضى على كل صندوق .... غير كدا مفيش غير الإحترام والنقاش الجاد المحترم.... وشكرا

الأربعاء، 2 فبراير 2011

خطاب شكر لرئيس الجمهورية


أولا وقبل أى حاجة لازم أقولها بصراحة : شكرا ياريس
بجد شكرا
إنته بكل اللى عملته بجهاز الشرطة يوم التلات والاربع والخميس والجمعة ( 25 - 26 -27 -28 ) قدرت تصحى فى المصريين معانى الرجولة ...قدرت تخلى حتى الناس الغلابة اللى ملهاش فيها تنزل وتقول لاء وتنزل وتتضرب وتكمل برده ...قدرت ياريس تخلى المصريين ينزلوا بالسلاح يحموا بيوتهم فى لجان شعبية وقدرت تصحى الرجولة جوا شباب الوطن ... بقوا واقفين فى الشارع بيتعاملوا بإحترام أو فى مظاهرة بيهتفوا بإسم مصر اللى مكانوش بيفتكروه غير فى كاس الأمم ... بجد ياريس اللى عملته خلانى ألعن أبو اليوم اللى كرهتك فيه ... إنته اللى قدرت توحد المصريين بإنك تجعل نفسك العدو المشترك للجميع ... إنته قدرت على مدار تلاتين سنة توعد ملايين الوعود ومنلاقيش منها أى حاجة فى أى حاجة ... قدرت بعون الله تصنع نوع من الصمت للقادة العرب علمتهم إزاى يسكتوا وميعبروش الشعب ويعملوا نفسهم كأنهم مفيش ...قدرت ياريس والحمد لله تلعب على عواطفنا بحرب أكتوبر وثورة يوليو أكتر من تلاتين سنة ... قدرت تقنعنا إنك البطل العظيم اللى نزل لنا من السما عشان ينجدنا ويعيشنا فى حب وأمان وإن إنته نبى ومرسل من المرسلين جاى تطهر البلد وتحميها ... بجد ياريس مش عارف أقولك إيه عاللى شفته فى المظاهرات ...هما دول المصريين ؟؟؟ بجد هما دول ؟؟؟ أمال مين اللى كان بيتحرش ؟؟؟ ومين اللى كان بيسرق ؟؟؟ ومين اللى كان بيعمل جماعات مسلحة ؟ وفين القلة المندسة ياريس ؟؟؟ أنا حتى الآن مش مصدق اللى شفته فى الناس اللى بتحافظ على الأمن فى الميدان ومن الناس اللى بتلم الزبالة ومن الناس اللى بتملى ميه وتسقى اللى واقفين فى الحر ومن اللى بيساندوا بعض فى كل حاجة ....أنا مش متخيل بجد اللى حصل ... دا لو كان حصل حرب مكانش الناس هتتحرك بالشكل دا ...أنا دلوقتى ياريس بفتخر بجد إنى مصرى ...حسيت إنى مصرى بجد والناس بترج الميدان بكلمة تحيا مصر أو بتقول النشيد الوطنى ...حسيت بكيان واحد للمصريين ... حسيت بوحدة ونوع من العيلة وفين ؟؟ فى الشارع وغلاوتك ياريس .
ياريس الشرطة السرية والمخبرين والبلطجية اللى نزلتهم مش خوفوا الشعب وشعبك قدر يكون لجان شعبية تقف فى وش الكلاب دول وتصدهم والجيش كمان ياريس قدر يعتقلهم ...أنا مشوفتش الجيش الصراحة بيحمى المنشآت عندنا هنا لا فى القسم ولا فى مجلس المدينة ولا فى البوسطة ولا فى أى حاجة تانية بس الحمد لله قدرنا ندافع عن بلدنا كلنا ...
عارف ياريس كلاب العادلى اللى كانت بترش الميه عالناس وهى بتصلى فى المظاهرات أو بتضرب الناس بالرصاص الحى أو بالقنابل المسيلة للدموع ... صدقنى ياريس مخوفناش للأسف وخيبنا ظنك وطلعنا رجالة



شكرا ياريس لأنك خليت الشعب يبقى رجالة تقدر تقول لاء بكل العناد والجبروت اللى أبديته لينا ورفضك لترك منصبك ومحاولتك للكدب علينا إمبارح وعدم تعديل المادة 88 من الدستور اللى بتنص على اشراف القضاء اللى حضرتك شيلته .... ومحاولتك إستعطاف الجماهير العريضة إمبارح بإنك هتموت على أرض مصر ...بجد حركت قلوبنا كلنا ...لكن ياترى لما ييجى لنا سرطان بسبب القمح والاغذية والمبيدات اللى بيأكلها لنا كلابك هل هنتعالج بالحب والعطف ؟؟؟ ياترى اللى بيقبضوا 250 جنيه فى الشهر هيقدروا يصرفوا لما مرتبهم يخلص ويصرفوا شوية قيادة أو بطولة من بتوعك ؟؟؟ ياترى ياريس كرامتك هتأكل المصريين وتعالجهم ؟؟؟
ياترى ياريس هتقدر تنفذ أى وعد من اللى قلته ؟؟؟ ياترى هتقدر ياريس تلتزم لآخر مرة ...؟؟
على كل حال مش هتفرق لأن الشعب مش هيسكت وكلنا عايزين نيجى نشرب معاك الشاى فى القصر يوم الجمعة العصر ؟؟؟ ولا دا مش من حق المواطنين الغلابة طبقا للدستور ؟؟؟ لو مش من حقنا فحاول تغيره ياريس وإنته الكبير برده
وفى النهاية أحب أقولك هتوحشنى من هنا ليوم الجمعة ....
والبلطجية اللى نزلوا ميدان التحرير دول ... أنا شفتهم قصاد ماسبيرو إمبارح ومش فرقت معايه وهما بيهتفوا بإسمك ... مش هيقدروا على ناس مش لاقية تاكل وجعانة ووقفت فى وش الرصاص الحى ومش هنسكت لهم ياريس .... لو حضرتك وصلت لك الرسالة أحب أقولك ياريت يعنى لو تكرمت ولو تعطفت تحل الخلاف بيننا وبينهم فى إنتخابات نزيهة تحت إشراف قضائى محترم ونزيه ...


ما نشرته صباحاً تعليقا على ما رأيته أمام مبنى ماسبيرو :

إمبارح راجعين من ميدان التحرير وماشيين عالكورنيش نلقى نظرة ونعرف من أين يقوم التلفزيون المصرى بتصوير بنقل الشوارع الفارغة ومن أين تصور العربية ...إستمر سيرنا حتى ماسبيرو ووزارة الإعلام لنجد مظاهرة قوامها 300 متظاهر تنادى : يوم الجمعة العصر هنروح كلنا عالقصر ..
قوات الجيش تحاصر مبنى ماسبيرو وتمنع المتظاهرين من أى شىء سوى أن يرحلوا أو يقفوا فى صمت
إستمر سيرنا لنعبر حتى وزارة الخارجية ونرى مؤيدين مبارك .. محموعة من البلطجية والنساء غريبات المنظر وبعض العجزة ... تشكيلة مختلفة .... وبدأنا نسمع بقى العبارات القبيحة اللى بتأيد الريس
- العيال السيس اللى بتعارض الريس بتروح فين ؟؟؟
- العيال اللى بتت**** واقفين يعارضوا فين ؟؟
- كلنا بنحب الريس ويلعن تلاتة *** ** المعارضين
- وتوجه احدهم لأحد ضباط الجيش قائلا : إنته فاكر إن الشوية دول ميقدروش على اللى فى ميدان التحرير ... اللى فى الميدان دول عيال م***
وفى وسط الزحام شاب يرتدى زيا منمقا (( بدلة سودا ))ويمسك هاتفه الجوال ويتكلم لمن على الطرف الآخر :
- أيون يا دكتور كلهم من الحزب
دا قبل الخطاب بثلاث ساعات على الأقل
وضحت اللعبة من قبل الخطاب اللى قاله الريس
من قبل أى شىء فأنا ضد الهتافات التى تحمل سبابا وأهانة على أحد جنود مصر
وضد طرد أى مواطن مصرى خارج البلاد ....كلنا مصريين ...إترك الحكم وإعتزل العمل السياسى وإرحمنا
إترك لنا شيئا أجمل لنتذكرك به ...
إرحمنا الله يرحمك

فى أمان الله
المواطن المتظاهر المصرى :
شاب فقرى