الجمعة، 4 يناير 2013

لحظة مشاركتهاش مع حد

***************************************
***************************************
***************************************
***************************************
***************************************
***************************************
طلعت 
مشيت بإيدي عالجدران 
لمست الشبابيك 
تقريبا كنت بحضن المكان 
وبفتكر بحاسة اللمس كل ذكري ليا فيه 
واللى تقريبا بيني وبين أي ذكري فيه أكتر من عشر سنين 
ويمكن إتناشر سنة 
إيديا لمست المكان كإنها بتحضن أجمل بنت فى الوجود 
حضن جامد أوي 
قوي زي الكهربا فى جسمي وفى قلب المكان 
وفى نفس الوقت لمسة خفيفة جدا ومجنونة 
لمست الابواب ووقفت قدام الهوا 
فى الاول خفت 
وبعدين افتكرت انا كنت بعمل ايه هنا وبتمني ايه زمان 
ضحكت أوي وإتكلمت وكأن فى حد معايه 
مشيت بصوابعي عالجدران بفتكر الكتابة عالحيطة 
وكأن صوابعي بتبوس دموع السنين والقهر والحرمان 
كأني بحضن الذكري 
وكأني ببوس بنت بكر بريئة ومجنونة 
مبتعرفش تبوس 
لكن إحساسها ونفسها الخارج مع كل شهقة ودفاها فى عز التلج يخليك تتجنن 
مشيت فى المكان وكأني بستكشفه للمرة الأولي برغم إني حافظ كل ملليمتر فيه 
كنت حاسس فيه بإن أنا فى شىء بيحتويني 
وكأنها علاقة كاملة متكاملة مع أجمل أنثي فى الوجود 
شبكت صوابعي فى الحديد 
وكأني علي حافة الإثارة من الهوا والإرتفاع 
افتكرت انى مش بخاف من الموت 
ولكن الوقوع من إرتفاع عالي مشكلة جامدة جدا 
هتاخد وقت علي ما توصل للموت 
وافتكرت يوسف السباعي وهوا بيوصف فى أرض النفاق علي لسان البطل وبيقول 
: لست أخشي الموت ولكني أخشي مقدماته الدرامية 
يعنى ممكن أموت أوكي
 لكن مش عايز أموت محروق أو مشنوق وهتجنن علي نفس واحد بس من الهوا 
فى لحظة وأنا بلمس الجدران فكرت أمسك موبايلي وأتصل بأي حد 
لكني لقيت إن كريم لازم يشارك نفسه اللحظة ولوحده 
زي زمان 
زي ما شفايف الذكري وحضن المكان قالي ...
عملت مكالمة واحدة لوالدتي أتأكد إنها بخير لأنها مريضة جدا 
و
بس ...

كريم

عصفور طل من الشباك


************************
************************
************************
************************
************************
************************
عصفور طل من الشباك قالى يا نونو
خبينى عندك خبينى دخلك يا نونو
خبينى عندك خبينى دخلك يا نونو
خبينى عندك خبينى دخلك يا نونو

قلتله انت من وين قالى من حدود السما
قلتله جاى من وين قالى من بيت الجيران
قلتله خايف من مين قالى من القفص هربان
قلتله ريشاتك وين قالى فرفتها الزمان

عصفور طل من الشباك و قالى يا نونو
خبينى عندك خبينى دخلك يا نونو
خبينى عندك خبينى دخلك يا نونو

نزلت على خده دمعه وجناحاته متكيه
واتهدى بالأرض وقال بدى امشى وما فيه
نزلت على خده دمعه وجناحاته متكيه
واتهدى بالأرض وقال بدى امشى وما فيه

ضميته على قلبى وصار يتوجع على جروحاته
ضميته على قلبى وصار يتوجع على جروحاته
قبل ما يكسر الحبس كسر صوته وجناحاته


قلتله انت من وين قالى من حدود السما
قلتله جاى من وين قالى من بيت الجيران
قلتله خايف من مين قالى القفص هربان
قلتله ريشاتك وين قالى فرفتها الزمان

عصفور طل من الشباك قالى يا نونو
خبينى عندك خبينى دخلك يا نونو
خبينى عندك خبينى دخلك يا نونو

قلتله لا تخاف اتطلع شوف الشمس اللي هتطلع
اتطلع عالغاب وشاف امواج الحريه بتلمع
قلتله لا تخاف اتطلع شوف الشمس اللي هتطلع
اتطلع عالغاب وشاف امواج الحريه بتلمع

شاف جوانح عم بتزقفى من خلف ابواب العليه
شاف جوانح عم بتزقفى من خلف ابواب العليه
شاف الغابه عم بتحلى على جوانيح الحريه

قلتله انت من وين قالى من حدود السما
قلتله جاى من وين قالى من بيت الجيران
قلتله خايف من مين قالى القفص هربان
قلتله ريشاتك وين قالى فرفتها الزمان

عصفور طل من الشباك قالى يا نونو
خبينى عندك خبينى دخلك يا نونو


 كلمات مارسيل خليفة
****

خبيني عندك خبيني ...
بدي أمشي وما فيا ...
:(
تفتكري هقدر أطير وأسيبك وأمشي ؟؟؟
ها ؟؟
كريم 
 

المنسي والمنبوذ والترياق

***********************************
***********************************
************************************
************************************
*************************************
المنسي ...
 هوا أنا إتنسيت إمتي ؟؟؟
هوا الناس مبقتش تاخد بالها مني من إمتي ؟؟؟
يمكن عشان انا موجود وبتحرك ويعتمد عليا دايما فطبيعي الناس تنسي كريم لأنه قوي وجبار وسهل عليه يعمل اي حاجة ؟ وهوا دا عذر برده ؟؟؟
انا دايما كنت هنا ليهم , دايما إستحملت , دايما مسحت دموعهم وقت البكا والإنهيار , دايما كنت بقويهم وبخليهم أحسن 
هوا انا اتنسيت إمتي ؟؟؟
طيب إزاي ؟؟؟
أنا دورت عليا فى الصور وملقتنيش 
دورت عليا فى حياتهم وبرده ملقتنيش
دورت عليا فى قلوبهم ولقيتها زحمة أوي فمقدرتش برده ألاقيني 
هوا أنا رحت فين جواكم ؟؟
هوا أنا ليه مش فى حياتكم ؟؟؟
هوا إيه فى الوجود ممكن يبرر لكم وجع إنسان ووحدته كل اللى عمله فى حياته معاكم إنه حبكم ونصحكم وكان كويس بجد ؟؟؟
أنا إتنسيت إزاي ؟؟؟
إزاي ملقتنيش ؟؟؟
أنا روحت فين عندكم أو شوفتوني إزاي ومخدتوش بالكم ؟
إزاي أنا بغرق دلوقتى وحلمي ضاع وتقريبا فاقد البصر وإنتوا مش هنا ؟؟؟
إزاي أنا حتي مش لاقي حد أعرف أعيط معاه ؟؟؟
هوا انا كنت كويس أوي كدا معاكم لدرجة إنكم تقدروا تقولوا كريم مش هيزعل 
ولا يا هلتري أنا كنت وحش أوي كدا معاكم لدرجة إنكم قلتوا كريم ميستاهلش 
هوا فى بني آدم ميستاهلش ؟؟؟
معرفش بقي 
بس أنا مش لاقيني عندكم 
وكمان مش لاقيكم ...
بجد شكرا 
 
***
 المنبوذ :
أنا عندي قناعة تامة بإن لو هزعل من حد أو هدايق من حد يبقى أزعل منه وهوا جنبي مش أسيبه وأمشي وأقول أنا زعلان لأني ساعتها بشوف دا خذلان وفى كل الأحوال جرح ووجع للي قدامك 
إمبارح الساعة خمسة ونص كنت ماشي فى (رشدي ) فى إسكندرية و كان معايه كام واحد صحبي والدوشة عالية قوي ولقيت واحد صاحبي بيتكلم فى موضوع فقلت له جملة تلقائية ( نهاية أي حاجة هي كلمة وداع ) فى الأول الشخص قالي إزاي وبعدين سكت مستنيني أشرح وأنا بفكر فى جملتي وبعدين قلت له إن مهما عرفنا ومهما صاحبنا ومهما حبينا فالناس بتفارقنا وأي طريق وله نهاية أو نقطة بينقطع فيها صلتنا بالشخص وبنقول سلام قلت له إن كل الناس بتمشي 
يا هلتري فعلا كل التجارب اللي فى حياتي إنتهت بسلام ؟؟؟
طيب واللى لسه مقالتش سلام ؟؟؟
أو نسيت تقول سلام ؟؟؟
مش عارف بصراحة 
بس يمكن هديتي الأخيرة فى أي مشوار هوا عدم تعديل رأي الطرف التاني , الطرف التاني وهوا ماشي دايما بيبقى عايز يقف علي رجليه ويكمل حياته وأنا فى نفس الوقت بكون نفسي أمسك فيهم أوي وفعلا بمسك بس فى الآخر هما بيقطعوا صوابعي عشان يفلتوا ومبيهمش الألم اللي بتعرض له, وعشان كدا بسيبهم يقطعوا فيا أوي ويوجعوني أوي ويشوفوني وحش فى حين إني عمري ما عملت حاجة غير إني كنت عايزهم أحسن وعايزهم أقويا وبخير وبلبي لهم دايما كل أحلامهم وأمانيهم وكل مكان مشينا فيه يشهد 
تضحيتي الأخيرة إني أرضي إني شكلي يبقى وحش وإن اللى قدامي يقول كريم دا شيطان وأسيبه يقتنع بشوية حقايق فارغة ملهاش أساس من الصحة وينسي كل حاجة حلوة أنا عملتها وكل شىء وحش وعيب إتحملته , بسيب اللى قدامي ينبذني بشكل كامل ويقول عليا إبن ستين تيت عشان خاطر يقدر يمشي وينبسط وهوا ماشي ويبقي راضي بقي إن كريم خلاص مينفعش 
مع إن أنا عمري ما عملت حاجة وحشة فى حد ولا حتي بقصد وجع 
مبقتش بعرف أعاقب حد زي زمان 
بقيت بتخطي الموقف وأسامح وأقول مش هتحصل تاني وأسكت , آه والله العظيم 
بقيت عبيط للدرجة دي 
وعشان كدا الغلطات إتكررت 
وعشان كدا أنا لوحدي دلوقتى بدون كل اللى بحبهم 

أنا رضيت أكون منبوذ
شوفتوا بقي حبيتكم قد إيه ؟؟؟

***

الترياق والمرض 

أنا لأول مرة بحس بحلم بيجري فى عروقي ميت زي السم كدا , زي إحساس الأم لما إبنها يموت قبل ما تولده وتبقى شايلاه كيان ميت 
أول مرة أحس بالسم للدرجة دى ...
النور اللى فى عيوني إنطفي ...
دايما كان بيتقالي من زمان أوي من أيام ما كنت عيل صغير إني عيوني بتضحك وفيها ضي 
ودلوقتى لأول مرة كل اللى يشوفني يقولي إنته عيان ولا إيه 
وبعلل كل حاجة بإني لسه راجع من السفر وبإن البرد شديد وبإن عندي إرهاق 
أنا تقريبا بقيت بصحي عشان أنام ودايما مرهق ودايما تعبان ودايما مخنوق وساكت وفيا وجع شديد أوي :(
هوا أنا إزاي حصلي كل دا ؟؟؟
الحلم مات 
حلم حياتي خلاص إنتهي ومات 
وحاليا مبقتش عارف أعمل إيه بالظبط 
كان نفسي ألاقى اللى بحبهم جنبي فى اليوم دا 
لكن للأسف علي قدر عبطي كان وحدتي برده بنفس القدر 
أنا مش عارف أقول السبب فى ضياع الحلم 
ومش عارف أقول أنا إيه اللي جري لي :(
لكني تعبان أوي أوي أوي أوي أوي 
ومش قادر بمعني الكلمة 
حاسس إني كنت رخيص أوي معاهم للدرجة دي 
وحاسس إني حلمي ضاع وبالتالي بقية العمر ملوش قيمة ولا تمن 
أنا لما ببقى فى الحالة دى جسمي بيعلن العصيان التام بكل أشكاله 
سواء من الصداع وقلة الأكل والإرهاق وأمراض تانية بتظهر فجأة وبالذات فى الأوقات دي 
نفسيتي بتتعب فبالتالي جسمي بيتكسر علي طول علي طول 
:(
مليش نفس أكتب تاني 
ومش عارف هفتح المدونة إمتي 
وشكلي مش ناوي 
تعبان ومرهق ولوحدي أوي :(
كريم

حكايات بعد منتصف الليل

*********************
*********************
*********************
*********************
**********************

حبيبتي 

Once upon A time...

 هحكي لك حواديت 

عن قريب أوي 

هترجع ححكايات بعد منتصف الليل

أقرب مما تتخيلي 

كريم

شماعة الخطايا

**********************
**********************
**********************
**********************
**********************
**********************
**********************
**********************

ليه دايما الناس بتدور علي شماعة تعلق عليها كل الخطايا : يعنى اللى بيدخن يقول انا بدخن عشان عباس اداني سجارة واللى بيسرق بيقول عشان الشيطان شاطر واللى بيقتل يقول الشيطان سيطر علي عقلي بالغضب واللى بيزني بيقول هي اللى خلتني أنام معاها 
الشيطان وهي وعباس براءة منكم والله العظيم ...
 

إنتوا هتشلوني يا ولاد المرة 
واجهوا نفسكوا مرة بقى 

ليه الناس بتقول : أصل فلان خلاني اعمل ؟؟؟
هوا انته بتعمل غصب عنك ؟؟
لما إتكلمت ولا لما خرجت ولا لما حسيت كان العيب فى الطرف التاني اللى خلاك تعمل كل دا ؟؟؟
لما رتبت حياتك علي واحد واتعودت علي دفاه وحنيته وقربه كان العيب من الحد التاني ولا حضرتك اللي عملت كدا ؟؟
طيب لما روحت خونت أو بعت او مشيت مش كان برده انته اللى عملت كدا ولا هتقول اصل الطرف التاني عمل وسوي , أمال انته كنت فين وليه مش ساعدته مش يوجعك ؟؟؟ ليه مش ساعدته يقف علي رجليه وحميته من نفسه ومنك ؟؟؟
متقولش اصل انا عملت الغلط لان فلان هوا اللى شدني للنقطة دى ؟ طيب وحضرتك كنت فين ؟؟؟ شربت حاجة أصفره ؟؟؟
متقولش اصل انا حياتي بتبقى غلط وفلان فيها ؟؟؟ ومعلش يعني هي دي برده مش حياتك ؟؟ هي دي مش مصيرك وانته اللى بتحدده ؟؟ وانته اللى بتعدل الغلط فيه وتقومه وتحاول تخليه مش يتكرر ولا ايه ؟؟؟ ولا هوا حضرتك فالح تاخد وبس ومتديش ؟؟؟ فالح تفكر فى اللى يبسطك وترميه فى الاخر علي فلان وفلان يطلع فى نظرك إبن كلب وحش ؟؟؟

 للاسف مش عارف ليه كل بني آدم محتاج شماعة للخطايا أو حتي لو عارف فانا مستغرب من غباء البعض فى التعامل مع الموقف 
والمشكلة العظمي لما تبقى بتساعد كل الناس او موجود جنب كل الناس وكل الناس بتيجي ترمي عليك اى خطيئة وانته على طول الوحش 
ساعتها مبيبقاش قدامك غير حل واحد بس ...
تبقى وحش زي ما بيقولوا عشان عالأقل اللى بيتقال عليك يبقى كلام تستاهله 
ولا ايه ؟
فى حل تاني 
بس الزمن دا ميستاهلوش 
بس كدا 
كريم 

فص ياقوت

مرة حقيقة ومرة خيال ...

مرة البحر معذب فينا 
مرة بياخد أغلي ما لينا 

كريم

أكتر جملة وجعتك

************************
************************
************************
*************************
فاكر أكتر جملة قلتهالك ووجعتك 

(( أنا بفكر نفسي دايما كل ما أفتكرك إن لو مكنتش انا كان هيبقى حد تاني فى مكاني ))

وساعتها حسيت بغضبها كافي بحرق الوجود 

(( يعني إنته شايف كدا ))

قلت 

(( آه ))

قالت 

(( مستحيل كان يبقي أي حد غيرك ))

قلت 

(( أصل أنا حبيتك أوي ))

قالت 

(( وأنا كان مستحيل أحب غيرك ولسه بحبك ))

وبس كدا ...

ودلوقتي 

(( عرفت إن محدش حبني فى حياتي كلها غيرك إنتي وبس
والباقي كله 
مبهور وبيتفرج وبيجرب وخلاص
وأدفع عمري كله إلا تلات شهور بس 
عشان تبقى معايه
وأوعدك هخليهم أجمل تلات شهور خلقهم ربنا فى الزمن كله
 ))
كريم

أقفال زمنية


***********************
***********************
***********************
***********************
***********************
***********************
الأحلام شىء رائع وجميل وحلو وعليه سكر كمان 
ولكنه أسلوب قديم وفاكس وغير كافي وبيتطلب وجود شخصين 
والشخصين متفاهمين وبينهم ود كافي للحلم 
ومن هنا تطلب الأمر فكرة جديدة خارقة للطبيعة وللعادة ولكل حاجة 
الفكرة بتتلخص فى شىء واحد فقط 
قفل زمني علي فترة معينة 
يعني إيه ؟؟؟
تخيل معايه كدا لو إنته عشت موقف أياً يكن إن شاء الله يكون حتي مشيت عالبحر أو رديت علي حد بينده عليك أو روحت سينما مع حد بتحبه أو إتعزمت فى سينابون أو برازيلي أو مشيت عالبحر مع فتاة أحلامك أو ركبت معاها عربية أو شفتها بتضحك أو إتصلت بيها فى عز وقت الامتحانات تقولها بحبك يا خيبتك يلا روحي ذاكري أو ندهت لها فى خيالك ولقيتها بتتصل بيك وبتقولك وحشتني يا إسمك إيه أو إتصلت بيها لقيتها بتقولك مين حضرتك ؟ وبعدين بتتعرف عليها من جديد بالرغم من إنكم عارفين بعض لمدة تقريبا تتجاوز النص ساعة أو بتقعد معاها فى محل حلويات حلو أوي تقولها فيه إنها وحشتك وتحكي لها عن حياتك وهي بتهرب بعيونها بعيد 
تخيل لو جيت علي حدث مفرد من دول وحفظته بكل تفاصيله اللى تقريبا لو قعدت أكتب موقف واحد منها هيتجاوز الوقت الساعة ونص  ومش هخلص من كتر التفاصيل , وبما إني مينفعش أفكر فى كم التفاصيل دا كله فى ذات الوقت لأني لو عملت كدا هتجنن أكتر ما أنا مجنون , فبحفظ كل دا فى فقاعة زمنية , حاجة يتحبس فيها الموقف بكل تفاصيله بكل مشاعره وأحاسيسه حتي لو الشخص دا بقاله سنين مش هنا , وتحفظ الموقف فى عقلك فى ركن خاص وتسيب علامات عشان تقدر تستدعي بيها الفقاعة وتفتحها وتعيش فيها وتعيش نفس الإحساس 
بالظبط 
هوا دا مبدأ الفقاعة الزمنية أو القفل الزمني ...
مفيش حاجة وحشة تقدر تخرج منها تأثر علي يومك أو علي حياتك أو علي إحساسك بالحياة
ومفيش حاجة برده تقدر تدخل تبوظ الموقف أو تخليه ذكري وحشة أو تسىء للاحساس الجميل اللى جوا حتي لو إكتشفت بعد كدا إن كان بيتلعب بيك أو إن مش انته اللى فى النية أو لو الشخص اللى فى الموقف كله قطر أو علي راي كريم عبد العزيز مترو الخلفاوي شاله
الفقاعة الزمنية إحساس بالحياة والحلم والفرحة والحب والروعة واللذة والمتعة فى وقت بيقف فيه كل شىء والوجود كله بيتوقف عن التواجد وكل شىء بيسكت وبتعيش فى حالة واحدة بس 
هي الحالة اللى فى الفقاعة لا أكثر ولا أقل 
بكل التفاصيل والنظرات والتفاصيل اللى مش ينفع أقولها لأن هيبقى كريم قبيح أو قليل الأدب لو ذكرها لأني ببساطة بفتكر أتفه التفاصيل ووالله لو قلت لكم بفتكر تفاصيل لحد إيه هلاقى حد بيقولي إنته مجنون أو انا عمري ما هقعد أتكلم معاك ولا أقابلك 
القفل الزمني سبب وجوده هوا كل الناس اللى بتمشي 
القفل الزمني سحره فى إنه مستحيل ينسرق أو يضيع أو حد يخطفه 
القفل الزمني نتيجته حالة من السعادة قد تصبح أقوي من كل عواصف الكون 

القفل الزمني مش زي الصناديق اللى بحفظ فيها الحكايات وأخد فيها باك آب من مشاعري تجاه شخصية معينة وأفكاري تجاهها لأن الصندوق مليان أقفال زمنية ومكون من مليون حاجز 

القفل الزمني وقته هوا دلوقتى 
وأنا راجع من السفر 
وخسران أهم حلم فى حياتي وفى الوجود كله 
ووأنا قاعد لوحدي وقافل كل موبايلاتي وقافل الفيس بوك وكمان بكتب فى المدونة وأنا قافلها 
ومخاصم الحيطة بقالي مدة طويلة أوي ومش متوقع إنها ترد عليا بسهولة كدا بعد كل البعد دا 
وعايش فى عالمي الخاص برتب أوراقي 
والدتي مازالت مريضة جدا 
لكني مش هفكر فى النقطة دي وهقول ربنا يستر وهقول اللى فيه الخير هييجي لوحده 
وهرتب أولوياتي 
وههدي وبراحة أوي 
هفتح قفل زمني حلو اوي كافي بإنه يعيشني فى حالة من السعادة تشبه العصف
وأغمض عيوني بعدها وأنام ...
هسمع هدي عمار وهي بتغني لروايح الزمن الجميل 
واحتمال أغنية علي الحجار بتاع العصفور اللى كنت بسمعها معاها عالبحر وبغنيهالها 
واكيد منير يعني ... عشان مينفعش مسمعوش هوا ودرويش 
و كاميليا جبران  
وأهدي 
وأبتسم 
وأنام 
ومش هقول ملعون أبو الوجود كله يا ولاد الكلب ياللي إتخليتوا عني وخذلتوني 
ههدي 
وهعمل نفسي مش بفكر 
وأفتح القفل 
وأكون كويس وبخير 

كريم