الجمعة، 9 نوفمبر 2012

لوسيفر

ملحوظة هامة جدا : البوست مكتوب بعد ما إستمريت تلات ساعات فى الهزار مع زمايلي بشكل مش هزرت بيه من عشر سنين وبعد هزار نص ساعة مع عم حسن أخويا الكبير بالصاعق الكهربي , نفسي أقولكم إن جسمي ودماغي لمسهم صاعق عشر تلاف فولت فمش تتوقع نهائيا إن البوست يبقي فيه ولو واحد علي عشرين مليار من العقل

أنا : فى حاجة غلط , قلبي حاسس إن فى حاجة غلط

هوا : أكيد عشان أنا هنا

أنا : إنته مش هنا وأنا بكلم نفسي وإنته مجرد شىء من صنع خيالي ومن صنعي أنا , أنا اللي خلقتك

هوا : إنته مش اللي خلقتني ومش صنعتني وأنا منك ولكن مش من صنعك

أنا : هيفرق فى إيه كل الرغي دا , إنته إزاي كسرت القفص , بلاش القفص , إزاي كسرت الصندوق ؟؟

هوا : كل شىء بينهار وطبيعي إن حتي القفص ينهار وأخرج فى وقت زي دا

أنا : مش كل حاجة بتنهار , لسه سارة موجودة وبتتنفس وعايشة ودا أكبر سبب يخليني أخلق لك قفص من جديد

هوا : إنته مش بقوتي ولا عمرك هتكون , إنته ضعيف

أنا : ضعفي هوا اللي بيخليني إنسان

هوا : دا مبدأ الأغبياء اللي زيك اللي بيقدسوا الضعف وبيخلوه جزء من الطبيعة البشرية

أنا : إحساسي بإن حياتي بتنهار حقيقة بس مش عارف أرد عليك , مش فاضي لك

هوا : أنا جواك متستعبطش , دايما فى وقت ليا , أقولك , وقف الزمن وكلمني هنا

أنا : أوقف الزمن ؟ إنته مجنون ؟؟؟

هوا :إلا قولي صحيح نفسك فى إيه ؟؟؟

أنا : نفسي أموت لوحدي

هوا : هتتفلسف تاني ؟؟؟

أنا : المسألة مش مسألة فلسفة , مسألة إن الحياة بتتحسب باللحظات اللى بيخطف فيها الزمن أنفاسنا ويقف ياخد نفسه وبعدين نحس إن اللحظة دي سنين وبعدين الزمن يجري بسرعة أوي أو فى اللحظة اللي بتفوت بسرعة أوي ومش بتلحقها  , وأنا عايز موتي يبقي شىء مميز

هوا : إنته مش عاجبني

أنا : وهوا لازم يكون فى بيننا قصة حب يعني عشان أفضل حابسك بعيد ؟

هوا : إنته كنت حابسني , خلي بالك من كنت دي , وكمان ليه بتحبسني ؟؟؟

أنا : لأنك شيطان , لأنك بتستبيح كل حاجة وبتدنس كل حاجة وبتوجع ناس كتير

هوا : دى أسبابك ؟

أنا : أيوا

هوا : هل من حقي أدافع عن نفسي ؟؟؟

أنا : لاء

هوا : طيب هدافع

أنا : قلت لك لاء

هوا : وانا قلت لك مش تعلي صوتك لأن مفيش صوت هنا أعلي من صوتي

أنا : حاضر

هوا : إنته بتشوفني شيطان فى حين إني بمنح الناس حقهم فى الإختيار والإرادة الحرة , بتشوفني شرير فى حين إني بتمتع بحقي فى الحياة مش أكتر , بتحاول تقول عليا وحش لأني ببعد الناس وبتفسر دا علي إني بستبيحهم

أنا : لأنك فعلا بتعمل دا

هوا : لاء ,, أنا بخوفهم وبخليهم يبعدوا لأن ببساطة هما مش يعرفوني نهائيا

أنا : يكون الحل إنك تحرقهم كدا ؟؟؟

هوا : هما بيكونوا أغبيا وأنا بكره الغباء جدا ومش بستحمله وطبيعي إني أخوفهم مليون مرة عشان يفهموا إن عمر ما هيقدروا يبقوا جنبي

أنا : تقوم تحرقهم ؟؟؟

هوا : لازم الحرق ينبهم زي الطفل اللي بيتعلم من الألم والشاب اللي بيخاف من عواقب التجربة والراجل اللي بيحاول مش يتعب نفسه فى قضية خسرانة

أنا : مازلت فى عيوني شيطان

هوا : أنا اللي كنت معاك فى كل لحظة , أنا اللي كنت معاك لما إنهرت ومأخدتش بالك مني وإنته بتشرب القهوة , أنا اللي كنت وياك لما حصل أول تلات صفح فى الكتاب ومفيش مخلوق يعرف عنهم حاجة ولحد النهارده واللحظة دي ولحد الوقت اللى عشته النهارده والنص ساعة الأخيرة والحاجات دى بتأثر فيك

أنا : إنته ليه بتفكرني ؟؟؟

هوا : لأني هخرج وهعيش

أنا : هقتلك

هوا : أنا فكرة والفكرة مستحيل تموت

أنا : وأنا هقتلك برده

هوا : تفتكر إنته تقدر علي أي معركة دلوقتى ؟؟؟

أنا : إنته ليه بتتمرد عليا كدا ؟؟

هوا : لأني تعبت من أسلوبك

أنا : أنا قوي

هوا : ولو , مش يهمني , فاكر اليوم إياه الساعة إتناشر الضهر لما أغمي عليك تلات مرات وكنت معاك ؟؟ فاكر لما قربت من الموت ولقيتني بسندك وبقويك ؟؟ فاكر لما عملت العملية وأنا كنت معاك برده وبكلمك وبهديك ؟؟؟

أنا : فااااااااااااااااااااااكر بس مش عايزك تخرج

هوا : مش هتقدر تمنع حقي فى الحياة وهما كلهم هنا مقتنعين بيا وكلهم هنا مصدقيني وكلهم جواك وجوايا يا رفيقي سحبوا ثقتهم فيك

أنا : فى لحظة الإنهيار مينفعش دا

هوا : ينفع طبقاً لمبادئى أنا

أنا : إنته هتبوظ لي كل حاجة عملتها وبنيتها

هوا : مفيش حاجة إتنبت , أنا هبتدي من الصفر وهقف أبص علي ملكي

أنا : إنته فاكر نفسك إله ؟؟؟

هوا : أنا مش إله , ولكني قادر على إني أعيش ودا كفاية فى حد ذاته

أنا : انا تعبان أوي ومحتاج أعيط أوي

هوا : إقعد هنا وهبعتلك زوار يواسوك ويطبطبوا عليك ويخلوك تعرف تنام

أنا : أنا عارف أنا هعمل إيه وعارف اللي هيحصل وصدقني هقتلك

هوا : بحبك وإنته عظيم

أنا : ولكن دا مش هيغير حاجة من موقفي ضدك

هوا : لما أكون برا هفهمك كل حاجة

أنا : مش بحب إستني

هوا : مش إنته سيد الزمن الأخير , وبتقدر توقف الزمن , خليه يجري بقي

أنا : سيبني فى حالي وإمشي وإسكت بقققققققققققققققققققققققققققققققييييييييييييييييييييييي

هوا : أنا  كدا كدا خارج
لأن يا صديقي النهارده الخميس والساعة قربت علي تلاتة
الوقت الأكثر قدسية فى الزمن
ومتنساش إني كنت فى يوم من الأيام ملاك
بس إنته عارف تاريخي وعارف أول تلات صفح ضيعوا عمري بالكامل حصل فيهم إيه

أنا : ...


***

أنا نفسي يبقي عندي أولاد أصحي ألعب معاهم الصبح قبل ما أروح الشغل :((
أنا نفسي أقول لعم حسن علي إحساسي لما أبويا مات عشان يبطل سجاير عشان علي إبنه الصغير
أنا حاسس إن الشغل بيريحني وبلاقي إحساس عيلة والناس كلها إبتدت تعرفني والعملاء بتتصل تسلم عليا
بس أنا مازلت بنهار
ومازلت بنهار
ومازلت بنهار
وبعد أربعة هيحصل مستحيل
المعركة بدأت بدري أوي جوايا وأنا معنديش جيوش لأني بنهار بشكل كامل وكلي وتام
مش عارف أعمل إيه غير حاجة واحدة بس
لكن مينفعش
والنتيجة حاليا 
Lucifer Walks Free

بس خلاص

أنا خلصت كلام النهارده
ولو فى كلام تاني هبقى آجي أحكي لكم
لكن دلوقتي
محتاج أغمض عيوني
والكون يغني لي
والاغنية قربت تنتهي
بس الحكاية مبتنتهيش



تحديث هام :
الدنيا بتمطر
الشتا بيدق الباب

جه الميعاد

بس لازم نعيش الحالة الأول

وقريب أوي

لازم اكتب برغم كل اللى انا فيه المعتاد

لما الشتا يدق البيبان

خايف فى عز انهياري مقدرش

بس المطرة ريحتني

بس الريحة مفقودة :(