الأربعاء، 24 مارس 2010

وسطى بيوجعنى

فاكرين زمان كان فى أغنية كدا بتيجى فى مسرحية
شوية بنات بيقولوا : وسطى بيوجعنى
وشباب يردوا عليهم : من إيه
ويقولوا تانى : وسطى بيوجعنى
الشباب يردوا : من إيه ؟
يقوم البنات يقولوا : من كتر النوم ليلة إمبارح ... وياللى عالترعة حود عالمالح :D

فاكرين
أنا بقى كمان وسطى بيوجعنى
بس مش من كتر النوم
النوم بقى سلعة غالية لا يمكن الوصول إليها
وعلى رأى المثل : النوم أحلى من اللحمة الضانى
المهم إنى وسطى بيوجعنى
والسبب هوا الأتوبيس
ربنا كرمنى بمشوار كل يومين لمكان
أحلى مواصلة وأسرع مواصلة هى الأتوبيس
طبعا أول يومين كنت بنزل بدرى وألحق الأتوبيس فاضى
وأهيص بقى عالكرسى لوحدى
ولما أخلص أروح للموقف الرئيسى وأخد الأتوبيس من أول الخط فاضى
لحد اللى جرى لى إمبارح
غلطت ونزلت فى رمسيس
:(
وكانت المشكلة
الأول : الطلوع من المترو
كام مطلع من هنا وهناك ووجع دماغ وبلا توشيح ولا خريطة عالجمب للناس الغلابة
ومفيش غير عساكر المرور اللى ميعرفوش أساميهم أساسا
وبعد ما طلعت ربنا كرمنى بإنى طلعت قدام جامع الفتح
ولمن لا يعرف ولمن ليسوا من أهل القاهرة
عندنا فى القاهرة عشان يمنعوا الناس تمشى فى الشارع وتعطل العربيات
بيعملوا سور عالرصيف
أنا طبعا طلعت من سلم المترو لقيت السور اللطيف دا والعساكر ممنوع انك تقف تستنى الاتوبيس غير من ورا السور
طبعا مر من قدامى اربع اتوبيسات بالصلاة عالنبى وأنا واقف زى الباشا بسمع كلام الحكومة وواقف ورا السور
ولا عارف أركب ولا عارف أتشعبط
ولا عارف أعمل أى حاجة
فقط قاعد أشتم عساكر المرور فى سرى وادعى عليهم وعلى اللى جابوهم (( عينوهم يعنى مش خلفوهم ))
المهم قررت انى انط من عالسور
نطيت والحمد لله ووقفت استنى الاتوبيس
إن أتوبيس فيهم يقف ويراعى ضميره فى الناس الغلبانة اللى واقفة فى الشارع دى
أبدااااااااااااااا
فقلت أتمشى
عرفت إن ممنوع تمشى من وسط الشارع ولازم تخش تانى جوا السور
يعنى لو قدامك طريق وعايزو توصل لمكان
فانته لازم تلف حوالين افريقيا
قصدى حوالين السور
نفسى أعرف مين المهندس الغبى اللى عمل الأسوار وبدل ما يعمل جناين عمل أماكن كلها سراميك وقرف
أدعى عليه بإيه
ربنا كرمنى ووصلت لمكان الاتوبيس بيمر فيه
وقفت فى تحفز
لقيت الاتوبيس المقصود
فى وسط الطريق
معدى بسرعة
قررت أعيش دور المواطن المصرى الكحيان الغلبان وأتشعبط
ولأنها أول مرة أتشعبط
فكانت النتيجة السودا
إنى مسكت بإيدى ووقعت عالسلم
الاتوبيس الله يحفظه كان هيجرنى
وعشان كدا وسطى بيوجعنى
من الرغى دا كله بقى نطلع بالتالى

ليه الحكومة بتعاملنا زى البقر وبتعملنا أسوار عشان نقعد نلف حواليها :( على ما نطلع منها ؟؟
ليه ميدان رمسيس واقف فيه عساكر تمنع الناس تمشى فى الشارع ؟
ليه سواقين الاتوبيس معنجهمش ضمير ومش بيقفوا للناس الغلابة ويسيبوهم لإستغلال وخطر الميكروباصات ؟
إنتهى الكلام
شاب فقرى