السلام عليكم ورحمة الله وبركاته
هنا شاب فقرى يحدثكم من أمام المدونة وعلى بركة الله وهتكلم واللى يحصل يحصل
أنا قررت إنى أعمل إنتخابات نزيهة لرئاسة جمهورية مصر العربية
أيوة ياعم مصر
هى مصر اللى رئيسها مبارك
اللى ناويين يخلوا فيها جمال جيمى رئيس جمهورية قادم
أيووووووووووووووووون هى اللى فيها حزب واحد
أيووووووووووووا هى اللى فيها أحمد عز بتاع الحديد
ياعم هى بلد الشاذلى
يا نهار تيت
لسه مش عارفها وهتستعبط
هى اللى على شرق ليبيا وفى شمال السودان وفيها الأسكندرية
إوعى تقولى لسه مش عارفها
هى اللى أولادها إنتصروا على إسرائيل فى تلاتة وسبعين
هى بلد الحضارة والعظمة والقوة والأخلاق والتاريخ
هى كل حاجة حلوة فى حياتنا
ياعم هى بلد شرم الشيخ
دلوقتى عرفتها
آه يا سيس
عالعموم مش مهم إنته
المهم أولاد بلدى
اللى هيرشحونى
أيون زى ما قريتوا بالظبط
إحنا هنعمل إنتخابات لرئاسة الجمهورية على المدونات وعلى الفيس بوك
من غير شروط ولا بطيخ
المهم الريس يكون بيحب مصر ...زى أخته طبعا
ميكونش داخل على طمع ولا ناوى يبهدلنا معاه
و يكون ليه برنامج إنتخابى واضح وصريح وعلى أساس
ويكون بيرسم مستقبل حلو لمصر فى رئاسته القادمة بعون الله :)
ويكون من الشعب المتكحرت
بعد ما باب الترشيح يغلق إن شاء الله
هنقوم بعمل فرز للأصوات
وطبعا بقى إحنا لا هنزور ولا الحركات البلدى الفكسانة دى
ولا احنا بنعمل إنتخاباتنا لاى سبب ولا إتباعا لأى تيار غير إننا بنحب بلدنا بجد
ولا عايزين حاجة من ورا الحوار دا
لا عايزين نبقى بنتمريس على حد ولا اى بطيخ من الكلام اللى هييجى فى دماغ الناس
إحنا بنحلم ببكره وعايزين حد مننا يفكر لو بقى فى مكان الريس
وهوا شايف كل الحاجات الوحشة دى
وشايف المرار اللى عايشين فيه والطوابير والكرامة اللى بتنداس كل يوم والبلاوى دى كلها
هيعمل إيه ؟؟؟
هياخد خطوة إزاى
عايزين نفكر فى بكره
بقية التفاصيل ....
قريبا بعون الله
تابعونا عالفيس بوك
منظمى الموضوع :-
شاب فقرى ....يوميات شاب فقرى
محمد كمال على ..... كيمو ... صوت من مصر
بإنتظاركم تنضموا وتساعدوا ولو حتى بفكرة أو تقدر ترشح نفسك أو تدلى بصوتك بما إنك مواطن مصرى
خالص التحية والتقدير والإحترام
شاب فقرى