الجمعة، 26 يونيو 2020

النهارده خرجت

خدت بعضي ولبست ولقيت صاحبة البيت بتخبط عليا فالشقة وعامل ايه وايه احوال الشقة ، بحس الست حزينة جدا ياعيني لما اقولها ان كل حاجة كويسه وان الدنيا تمام ، كنت حاسس في عينيها نظره انا هموت وادخل اتفرج عالدنيا واشوفك عامل ايه بس الحمد لله ان دا محصلش اني مبهدل الدنيا خالص، نزلت معاها وقالتلي عيونك حلوة اوي ، احيه ايه اللي بتقوليه دا ، رديت عليها رد لطيف وبذوق وخرجت وقررت اني اصلح الموبايل بعد ما باظ للمره التانيه وقفل تماما ومبقاش بيشحن واضطريت اني اسفا اشغل موبايلي الصغير القديم اللي كان معايا فالجيش زمان ، وبعدها لفيت علي محلات موبايلات كتير ومحدش عايز يصلحه ، مش عارف هل عشان مش ماركة علامة ، طيب ياولاد التيت كلها كام يوم واجيب موبايل ايفون واحط عليكم 😂
كملت لحد ما لقيت حد بعد نقاش طويل وافق يصلح الموبايل واشتريت بطيخ وموز ودا شيء عظيم وروحت كلت مع جاري وباباه ، وفي قصة حلوه الراجل دا حكهالي من يومين يارب افتكر اكتبها  المهم تقريبا اني بقيت باكل وانام وبرغم اني لعبت رياضه فالبيت الصبح الا اني بصراحة بفكر اروح الجيم واستفيد بصحتي للماكسيمم ، محتاج دعوات كتير فشخ عشان في ملاحظات زي الزفت علي صحتي وكمان الشغل الجديد حرفيا عام نتف في بق بعضينا ، والدنيا ماشيه بس انا قلقان حاسس زي ديبرا ما كانت بتقول ل لاغويرتا ، احيانا بحس ان هيطلع تمساح يعضني من ماي اس طالما الدنيا ماشية تمام ، بحس ان دا تحذير 
انا كويس الحمد لله وعمال اشوف ديفيوهات موبايلات وصحيت كلمت صاحبي وقعدت ارغي كتير وفي اخر اليوم اتكلمت مع فاطمة كتير والحمد لله 
انا احيانا بحسني سعيد واحيانا بحسني عندي مشكلة مش عارف هيرايه بس بيتهيالي اني هبقي كويس جدا ان شاء الله قريب 
لاني ابتديت ابدل اساليب تفكيري وافكر في امور تانيه واشغل بالي بحاجات مختلفة  وابتديت اختار امور جديدة وافتكس وامارس حياة مختلفه عن اللي نفسيتي بتضحك عليا بيه
طبعا عايز اقول واوفي حق ال مجموعة اللي ثارت عليا امبارح واقولهم ان كل حاجة تمام واتمني ميجتمعوش عليا تاني ومش عارف الفرق الشاسع بين النفسية بين اليومين دول صعب ولا بيتهيالي 
وحشني اتكلم انجلش ودويتش وعربي والله 
تخيل يا مؤمن يمكن يكون وحشني اتكلم وخلاص 
عالعموم انا دلوقتي قدامي بالظبط خمس ساعات انامهم هستغل فيهم  ربع ساعة انزل فيها كتاب حلو عن لغه برمجة حلوه واقراه بكره فالطريق بكل سعادة وهدوء وسلاسة 
انا قلقان فعليا من ان شهر حداشر قرب والله قلقان فعليا جدا كمان
خيرا يارب 
المهم تتمسوا بالخير 
تصبح علي خير يا كيمو