السبت، 22 فبراير 2014

يا سلام

لو الزمن طريق واحنا ماشيين فيه فى اتجاه واحد بس 
فالحاجات الحلوة حاجات فاتت بنفتكرها 
واللحظات الوحشة لحظات متعبة عايشينها 
ليه منقفش فى الطريق دا فى المكان اللى بنرتاح فيه ؟
طالما فى إرادة حرة وإختيار 
ليه منقفش عند اللحظة اللى حسينا قلوبنا بترتعش فيها؟؟؟ ليه فكرنا فى الوقت بيخلص وان لازم نمشي وحصلت كل المشاكل دى ؟؟
ليه منقفش عند اللحظة اللى حسينا فيها بفرحة لا نهائية وحسينا إن الهوا مطيرنا من عالارض؟؟
ليه موقفناش عند لحظة السؤال ( نمشي من هنا ولا من هنا ) ؟؟
ليه موقفش الزمن بينا فى لحظة حلوة من دول ؟؟؟
يكن عشان لازم نتعرض لاختيارات تنقي حياتنا من الشرور والمساوىء اللى فيها ؟
يمكن عشان لازم نتحط فى أزمات بشكل مفاجىء ؟
يمكن عشان لازم نكبر ونفهم اكتر مع الوقت ؟
طيب ليه نفهم أصلا لما الفهم حاجة هتضيع سعادتنا ؟
ليه يجري كل دا ؟؟؟
عشان نوصل للنقطة اللى احنا فيها يعني ويبقى إسنا إتكوننا وتعبنا ؟؟
هوا ليه مينفعش نسيب   الطفل فى محل حلويات لوحده ونحبسه طالما بيحب كدا ؟
لنفس السبب اللى بيخلي الزمن ميقفش 
لانك صغير ومش عارف مصلحتك ؟
طيب وهتفرق إيه المصلحة طالما فى اختيار حلو قمنا بيه ؟
بقالى مدة كبيرة أوي مفكرتش فى الفوارق ولا فى العشر دقايق الضوئية ولا فى الرغبة فى الهروب اللى بتراودني ولا فى اللحظات الحلوة اوى اللى عشتها من مدة طويلة 
طبعا فى حل 
الحل بسيط 
ان كل حد عشنا معاه لحظات حلوة يوعدنا يستمر حلو كدا وحتي لو بقى وحش لازم يعمل حاجات حلوة تخلي اللى جاي علي طريق الزمن حلو برده 
بس خلاص 
الموضوع إنتهي وانا خلصت كلامي 
بس خلاص
وختاما فى مشكلة كبيرة مع نفسي أتمنى متتسببش فى كراهيتي ليا 
شاب فقري

الأربعاء، 19 فبراير 2014

فى وسط كل دا

فى وسط كل الحاجات اللى بتموت هناك وبعافر عشان أصحيها وأحييها كل يوم 
فى وسط كل القرف والهم والنكد والتعب والإرهاق وساعات النوم القليلة 
فى وسط كل حاجة بتضيع 
فى وسط المعركة 
يأتي السلام منك أنت ...

You Gave me Peace In The Time Of War




 
تقريبا بقيت بكتتب هنا ومحدش بيقرا 
ودا بيفكرني بحاجة مهمة جدا 
إني بكتب لنفسي وبس 
لأني عايز أكتب وأحكي وأتكلم 
هنا بحكي براحتي 
هنا بعيش أنا 
زي ما إنتي بس اللى بكون معاكي أنا 
My Doctor
ماي لايف
كل حاجة 

الحب مش محتاج برهان ولا دليل ولا هدايا ولا أي حاجة سوي إنه يكون حب 
مش فارق بقى مين يقرا ولا مين يتكلم ولا مين يقول 
أنا دايما هنا 
عشانك 
أول وش شوفته وشافني 
أول حياة 
مش مهم أي حاجة ولا أي حد تاني 
هكتب عشان أكون أنا 
عشان الناس اللى بحبهم بجد 
اللى هما إنتي يعني :)
كريم مبينساش
لكنه برده بيعرف يعيش من تاني ويفرح 
ويخلق مليون أول مرة لكل حاجة 
عشانك 
لأنك النور 
نوري أنا 

أحبك 
قبل
وبعد 
وللمنتهي 
وحتي بواب الجنة 
وعلي كل قد 
وقد اللى مقدوش قد 
بس خلاص
اليوم خلص
لازم أسافر 
:)

مش مهم حد يقرا 
مش مهم حد يفهم 
مش مهم حد يعرف يتعامل 
المهم إنك فاهمة من قبل ما أتكلم :)
بس خلاص
بيس

المحبة تحكم 
المحبة تستر 
المحبة سر :)

كل حب يتعلق بسبب يزول بزوال السبب
ما ينفع لسبب لأنه نفسه سبب الوجود 
الحبيب حبيب :)
حبيب وبس حتي لو منع أو بعد 





الثلاثاء، 4 فبراير 2014

مشوار


It all just disappears,
doesn't it?
Everything you are,
gone in a moment,
like breath on a mirror.
But times change...
and so must I.
We all change...
when you think about it.
Were all different people
all through our lives.
And that's OK, that's good,
you've got to keep moving,
so long as you remember
all the people that you used to be.
I will not forget one line of this.
Not one day.
I swear.

quote from Doctor who

***
دايما لما أفكر أرجع لنفس النقطة 
لنفس اللحظة 
الحل فى إيه ؟
وبلاقي كل مرة إن الحل إنك تثبت فى أرض المعركة 
تكمل طريقك 
إوعي تهرب 
قدامك طريقين :Fight or Flight
الحل فى الثبات وإنك تحارب 
تحارب عشان حلم عشان هدف 
عشان اللى بتتمناه بجد 
متعتمدش علي نص قانون الجذب اللى بيقول لو إتمنيت حاجة أوي هتحصل لأنه مش حقيقي 
لو كان حقيقي مكانش فى ناس تايهين ولا كان فى حد قلبه إنكسر ولا بقى فى أمنيات ضايعة شايلين منها تذكارات فى المحفظة 
الحل فى الثبات 
إثبت وحارب وكمل طريقك 
متخافش
خاف لما يبقى الخوف دافع بيثبتك أكتر وبيخليكي تعرف قدر الطرف التاني فى المعركة حتي لو كان الطرف التاني هوا الكون كله 
إعرف المخاطر وإعرف هتعمل إيه وإثبت وحارب 
فاكر السنة اللى فاتت لما قررت أهد كل حاجة فى آخر تلات شهور من السنة وقررت أنهي حاجات كتير وحشة جوايا وأكسر بناء أكبر من التكسير جوايا إسمه أنا 
دلوقتى إتبقي عشر شهور أستعد فيهم لمعركة أكبر 
معركة مع الحياة 
عشر شهور من البناء والتعب والصبر والتفكير 
الطرق الطويلة والآمال العظيمة بنحققها بالصبر مش بالقوة 
إخترت البناء 
إخترت أفتكر كل حاجة كنتها وكل حاجة عشتها 
عشان أعرف أنا رايح فين ولما تبدأ المعركة أبقى مستعد بما يكفي لكام ألف حياة 
إيماني قوي , رغبتي فى أحلامي لانهائية , أحلامي بلا حدود , العزيمة أقوي والروح بتشتاق لنقطة راحة وأمان
الهدوء حلو والصبر حلو والتفكير أحلي ...
- This is me taking back control of my life. What the fuck have you done lately?

ويبدأ البناء ويبتدي مشوار جديد
وأنا من جديد 
مثلما ينبعث العنقاء من الرماد 
حياة جديدة 
حلم جديد 
معركة جديدة 


شاب فقري

#إنتي #My_Doctor
#أراكم المرة القادمة فى الاجازة القادمة لانى مش هعرف ادخل المدونة سوري فيس بس :D

الاثنين، 3 فبراير 2014

عن شخص واحد يقابله أشخاص مختلفين + التحديث

 أحيانا بيبقى فعلا الشخص الوحيد اللى يستاهل أخاف منه من محبتي علي الآخرين هوا أنا ... ياتري أنا غلط ولا أنا صح ؟ ياتري فى إجابة أصلا للسؤال دا ؟؟؟ المهم إني راضي عن نفسي وسعيد بالطريق اللى وصلت له وبيكي وبس خلاص :)
****

P.S : تم تحديث البوست وإستكماله 
 لأن الموتي لا تجوز عليهم سوي الرحمة :)
فليرحم الله كل عابري السبيل علي قلبي .
***

- إيه الصورة دي ؟
- دا هي ياكريم 
- إنتي بتهرجي ؟؟
- والله زي ما بقولك 
- شكلها إختلف بقت شخص تاني 
 - ما هي بقالها زمان مختلفة هتيجي علي شكلها يعني 


فى ناس بتتغير ,, بتكتشف فجأة إن فى ناس ماتت , الشكل إختلف وكمان التفاصيل والأفكار , فجأة بتكتشف إن الناس اللى كانت هنا ماتت وإختفت من علي وش الأرض وإتدفنت جوا كيانات أخري قد تراها مشوهة لأوقات وواضحة وجميلة أوقات أخري 
وهوا الفنون إيه غير تشوه وإزعاج للبعض وروعة للبعض الآخر ؟؟؟
يمكن الآنسان يكون شبه لوحة ل فنسنت فان جوخ أعظم الفنانين فى التاريخ من وجهة نظري واللوحة بعضنا بيشوفها عبقرية بلا حدود والبعض الآخر مبيفهمش منها أي حاجة , يمكن لما الإنسان بيكبر بيتشوه الطفل اللى كان هنا ويندفن جوا كيان أكبر أحمق جدا وشكله غريب بيخلي أي حد كان يعرفه زمان يستغرب 
من الآخر وببساطة وكلمة تلخص كل شىء : 
# فى بنت حلوة أوي ماتت وإختفي أثرها مع الزمن وحل محلها ناس معرفهاش , علي قدر كل الحب اللى كنت شايله للبنت دي جوايا أوي بعيد عن كل شىء وكل حدث وبعيد عن الزمان ذات نفسه إلا إني فقدت الأمل بموت البنت دي ... الزمن بيغير الناس وسنة الكون هي التغيير ولكن فى حاجات بترفض تتغير زي التغيير ذات نفسه فهوا مبدأ فى الكون لا يتغير 
ياهلتري الحب والإيمان والأمل من الحاجات دي اللى مبتتغيرش مهما جري عليها من وقت 
هل ياتري يا هلتري كل مرة هناكل فيها سندوتش شوكولا أو نحتفل بعيد ميلادنا فى مكان ما مع شخص ما هنفتكر مرة معينة لأنها خالدة جوانا ؟ يا هلتري كل مرة هنمشي فيها فى وسط البلد فى الشتاء أو ساعة المغرب وبعد الساعة تسعة هترتعش قلوبنا ؟ وكل مرة هندخل فيها محطة مترو التحرير قلوبنا هتنتفض ونحس برعشة الفراشة ؟
كل دي أسئلة مقدرش أجاوب عنها ....
يمكن يستمر الحب لكن إيه فايدة إستمرار الحب فى ظل وفاة الشخصية اللى حبيناها ؟؟؟
ملامحها وتفاصيلها وكلماتها الرائعة وأنفاسها اللى بتوصل شوقها كل ليلة مع صوت طير معين والعصفور الخيالى اللى بيبعت الأشواق ؟ إيه فايدة الحب فى ظل وفاة اللى حبيناهم وإنتقالهم لكون آخر أو لعالم آخر ؟؟؟
ياتري هل طاقة الحب دي هتستمر ولا هتفني مع فناء الشخصية اللى حبيناها اللى أصبحت شىء مختلف تماما وكيان مختلف كلية ؟
الناس بتتغير ودا طبيعي ومفيش إختلاف عليه وفى حاجات فيهم بتثبت ومبتتغيرش 
بس ياهلتري لما تقف تبص فى إبتسامة وعيون بنت جميلة حبيتها فى عيون وتكتشف إن البريق اللى كان بيشدك فى يوم واللى كان بيقول إنها هي إختفي هل هتقول إنها لسه عايشة ؟؟؟
الموت بياخد مني حاجات كتير أوي الفترة الأخيرة .... دا شىء موجع 
بس يمكن دا رحمة من ربنا 
الموت بينهي إحساسنا بالذنب تجاه جريمة أصلا لم نقترفها زي الوداع أو الرحيل 
الموت بينهي إنتظارنا لأننا بنكون متأكدين إن محدش جاي وإن إحنا اللى رايحين 


عارفين لما درسنا فى الفيزيا زمان سرعة الضوء وجه واحد لمض عالتلفزيون قال إيه : قال إن النجوم اللى بنشوفها فى السماء حالتها بتختلف لأننا بنكون شايفينها بعد ما الضوء بيمشي ملايين السنين الضوئية فبالتالى إحنا بنشوف تاريخها مش بنشوف وضعها الحالي 

نفس الحال يمكن لما نبص لحد حبيناه زمان 
إحنا بنشوف الحاجات القديمة اللى حبيناها فيه مش الحاجات اللى موجوده حاليا , عشان كدا بنتصدم فى لحظات ما لما بنكتشف إن الحاجات اللى حبيناها مكانتش حقيقة دي كانت مجرد مرحلة من مراحل التطور 
والتطور يا عزيزتي مش لازم يبقى للأحسن 
ممكن التطور يحرمنا من حاجة حلوة أوي إتخلقنا بيها 
أو ميزة جميلة أوي تضيع هباءا مقابل ميزة تانية بنستعملها أكتر شوية ولكنها جنب التانية ملهاش أى لزمة

ما يمكن الإنسان الأول البدائي كان بيقدر يقرا أفكار أنثاه اللى هي توأم روحه وميقدرش يخترق أي عقل آخر ووإختفت الميزة دي مع تطور البشر وإنتشار اللغات 
لأن الصراحة من وجهة نظري لو مكانش الإنسان الأول قادر علي قراءة أفكار حبيبته أو مراته كان قتلها ومكانش زمان البشرية إستمرت 

يمكن اللى بنحبهم بيتطوروا للأسوأ برده أو بشكل مش يناسبنا ..أو بتموت جواهم الحاجات الحلوة وبيتحول حتي شكلهم لناس تانية ... ونقابلهم فى يوم فى طريق أو فى صورة ونقول مين دول ؟؟؟؟ هوا إحنا نعرفكم ؟؟؟ 

إجابة السؤال : أيون ممكن طالما الحاجة دي ربنا كاتبهالك مهما هربت منها هتلاقيها طالعالك زي عفريت العلبة من حيث لا تدري :D
زي ما قال الواد عمرو حتي لو العفريت الأزرق هرب من العفريته الحمرا وجه عفاريت بمبي دخلت فى الموضوع وعفاريت فوشيا حاربوا برده اللى مكتوب عند ربنا هيكون 
ولا عمرو مقالش كدا ؟؟؟
لاء دا كلامي أنا :D
بس خلاص .


- تقدر تقرب
- تفتكري ؟؟؟
- أيون تقدر تعدي الحدود 
- زى فقاعة كدا ؟؟؟ أقدر أخترق وابقى فى عالمك 
- يب
-أوك أنا هنا 

كل واحد بيتحمل نتيجة أفعاله 
 
الله يرحم حد كان حلو أوي 
أحلي مما يمكن أن تصف الكلمات 
الرحمة حلوة ...
يكفى إنها من الرحمن :)
ودعوة من قلوب تحب بصدق لا تغش ولا تخادع ولا تعرف الزيف أو الظلم 

****
- إنتي مبتاخديش بالك من نفسك ودا بيحرق دمي 
- وهاخد بالى من نفسي ليه 
- عشان تبقى كويسة 
-وأبقى كويسة ليه يا كريم 
- عشان مش عايزك تعيشي حياتك ما بين تعب جسدي ونفسي ومرض وقرف 
- وتفتكر هتفرق 
- أيون طبعا , إذا كانت الحياة بغاية القرف فلازم إحنا نبقى أحسن عشان نعرف نعيش أحسن حتي لو مفيش حاجة تستدعي دا ودا المبدأ الأول أحد الفصول اللى كاتبها 
- كريم 
- إيه ؟
- أنا معنديش الإيمان إني أبقى كويسة وأعيش كويسة ولا ان اى حاجة هتبقى حلوة 
- الصبر , ركزي وهتلاقيه 


الإيمان مش حاجة بنلاقيها فى يوم وليلة ولكن من وجهة نظري فهوا حالة دائمة من الثبات فى أرض المعركة 
بالظبط زي ما المعركة تنتهي بخسارة أحد الطرفين وتلاقى فى جنود مستمرين فى الطعن والقتل والحرب ...
الإيمان زي وقفة الجندي بثبات مهما جري 
الحياة بتعمل فينا مليون فعل موجع 
ولكن ثباتنا علي الدرب وإستكمالنا للطريق بدون خوف ووقفتنا حتي لو الخوف قتلنا وتمسكنا بموقفنا كل دا مش بييجي فى يوم وليلة ولكنه بيحتاج وقت 
الإيمان بينجي البشر 
إيمانك ببكره اللى جاى حلو 
إيمانك بإن لحرمانك نهاية 
إيمانك بإن حلمك له وقته 
إيمانك بإن إلهك واقف فى صفك فى المعركة وإنك علي حق وهتنتصر 
إيمانك بحبيب بنتظرك فى غيابك 
إيمانك بذاتك 
الإيمان بينجي ... :)
 ***
- أنا عايزة حاجات كتير أوي 
- طيب ما تعملي كل اللى انتى عايزاه 
- بس هيمنعوني ((( تبكي بحرقة )))
- الفكرة كلها فى انك تحاولى ولو حتي محاولة وتحققي ولو حاجات بسيطة 
- انا لسه متخانقة معاها النهارده يا كريم حسستني انى مليش لزمة فى الوجود وإنها بتكرهني 
- مفيش الكلام اللى بتقوليه دا , دا شوية هبل من عقلك بتحاولى ترمي نفسك فى أعمق درجات الكآبة 
-يا كريم أنا مش مجنونة للدرجة دي 
- يابابا إنتي بتغني عالوجع , بتدوري عالوجع وتغمسي نفسك فيه , زي واحد بالظبط نفسه يعزف والموسيقي ممنوعة طيب ياعم ما تألف ألحان وتسرح بخيالك أو حتي تلاقى أي حل للعزف مش تقولي أنا هنتحر لأن الموسيقي ممنوعة 
-يمكن عندك حق وانا بعشق الألم للدرجة دي
- آه يابت المجنونة ما هي ناقصاكي 
- كريم 
- يس ؟
- وحشتني 
- كلك ذوق ربنا يخليكي 
(( بغيظ ))  - بطل 
(( برخامة )) - لاء

الحكاية مش حكاية مبادىء 
ولا حكاية توقعات مرئية زي إمتحانات إعدادي :D
ولا حكاية رغبة فى الشماته 
ولا أي حاجة غير إحساس 
إحساس وفهم للواقع المحيط 

هوا واللى حواليكي مش هيشوفوا فيكي اللى بيتشاف منك هنا 
مش هيفهموا رغباتك فى مليون حاجة 
هوا هيشوفك البنت اللى هتجيب له ولاد وتقعد فى البيت وتضحي زي ما إتربي وشاف كل الأمهات فى الوسط اللى هوا فيه , الرضوخ والقناعة بالقليل والسمات المعتادة للست المصرية فى المناطق دي والوقفة الجدعة جنب الزوج , مش هيشوف أم كيانك دا 
مش هياخد باله غير من أوامره وبس اللى بتتنفذ واللى تنفيذها شىء أساسي واللى مش عاجبه يمشي 
هوا مش هيشوف فيكي رغباتك وأحلامك الكبيرة 
هوا شايفك بطريقة تخليه بالغباء اللى يخسرك بيه 
هيحاول يحس بقيمته فهيسحب من قيمتك ويضغط عليكي ويحاول يحس بإنه مميز عن كل الناس فيضغط عليكي أكتر ويتعب أعصابك أكتر عشان يحس بتميزه عن كل اللى مروا فى حياتك قبله :)
مش هيشوف كيانك ولا مستقبلك 
مش هيشوف حقوقك فى الحياة 
وفى ظل كل دا 
كلامك الكبير عن الثورة وعن الأمل وبكره وعن أحلامك كله هيطير هباء 
لأنك فى الأول وفى الآخر بتضحي بكل شىء فى مقابل قصة متربية عليها ومزروعة جواكي , هوا هيبقى بالغباء اللى يضيعك وانتى هتبقى بالغباء اللى هيخليكي تخضعي بدون حب ولكن رغبة فى إنك تلاقى لك مرسي 
ونسيتي مرساكي هنا 
ونسيتي أحلامك هنا 
ونسيتي عمر عشتيه هنا 
دي مش مشكلة ولا شىء أكون زعلان عليه 
مش كل حد بنرتاح له لازم نكمل معاه الطريق 
نسيتي نفسك 
وطلع كل كلامك شعارات رنانة عشان تاخدي مكان فى وسط الناس 
للاسف مش قواعد حقيقية ماشية عليها 
عارفة حقيقتك وإنتي بتبقى إنتي فين ؟ صح ؟
طيب 

عمرك ما هتلاقى اللى لقتيه هنا فى مكان آخر وعلي وعدي 
وانا بنفذ وعودي :)

الإجابة بقى اللى وعدت بيها النهارده :
الفكرة مش فى الجري ولا فى تجري إزاي ولا علي فين 
إجري تجاه الحاجة اللى بتخاف منها 
متهربش 
واجه الحقايق 
بطل تخاف وتاخد ركن 
بطلي تجري وتستخبي من المواجهات ويبقى فى بينك وبين غيرك أسوار 
واجهي وإثبتي مكانك وبس خلاص :)
وإفرضي كيانك وشخصيتك فى أي مكان 
بطلي تجري ورا شعارات متحققيش منها حاجة لو هتقولي كلمة خليكي قدها  

P.S : والجنة هنا وهنا بس .
 ****
- أنا نفسي أحس إني أنا هوا أنا بتاعة زمان عايزة أحس إني حلوة 
- وهوا انتى مش حلوة 
- لاء مش حلوة 
- فعلا عندك حق لما يبقى قلبك اتوبيس واى حد بيدخله مش هتبقى حلوة طبعا 
- كريم انا زهقت ومبحبش كدا 
- عايزة تبقى حلوة ؟
- أيون 
- يبقى إخلصي فى حلم واحد مش فى دسته أحلام وخليكي فى مكان واحد بس مش فى ستين وبطلي تعرفي الأشكال الزبالة وانتى اصلا اللى شايفة نفسك وحشة لانك عارفة بتعملى ايه كويس اوى من ورايا ويمكن فاكرة انى مش اعرف اى حاجة
- كريم أنا عايزة أبعد 
- قلت لك قبل كدا لما يبقى نفسك تبعدي ومش قادرة قولي لي عشان أبعدك عني زي السما والارض 
- طيب واديني بقول 
- بس فى مشكلة بسيطة 
- إيه ؟
- إنتي أصلا مش هنا .
(( تبكي )) - نعم ؟؟؟
- إنتي بعيد من اللحظة اللى كنا ماشيين فيها ولعنت اليوم اللى عرفتك فيه 
- بس دي كانت خناقة 
- متحلتش ولا حاجة اتحلت وكل حاجة منتهية من بدري , جواكي شوية أمل أو رغبة فى التمسك بالحاجات اللى أصلا ماتت ومش موجودة مخلياكي لسه هنا الفترة دي إنما أنتى أصلا مش هنا من اللحظة دي ومن اللحظة اللى كدبتي فيها وانا عارف انك بتكدبي وسيبتك تكدبي وتكملي فى الكدبة وعامل نفسي عبيط عشان خاطر أشوف هتعملي إيه , صدقيني الموضوع محتاج حد جبار عشان يكدب عليا لانى عندي حساسية من الكدب 
- كريم 
- ....
****
-أنا وجعتك وهوجعك وتعبتك وهتعبك وسيبتيني قبل كدا وناوي أسيبك عن قريب بدل ما أوجعك لأني مش هستحمل أوجعك 
- لو أنا فى قربك هتوجع فأنا فى بعدك هموت 

مازلت بحلف بيكي حتي هذا اليوم وإلي يوم يبعثون وسأظل أندم علي لحظات معينة فى حياتي حتي نهايتها لأن فعلا زي ما بيقولوا فى ناس مبتتكررش .
الحمد لله علي كل حال 


***

- أنا هنتحر يا كريم
- وأنا هنا ومش هتنتحري ولا هتأذي نفسك تاني , أنا هنا فاهمة ولا لاء

وفجأة بللم وإختفت فى ظروف غامضة بعد عيد ميلادي اللى إحتفلت بيه فى شهر تلاتة 
مينفعش تختفي فجأة 
ولا ينفع ميبقاش فى ثقة فى ربنا 
ولا ينفع ميبقاش فى ثقة فيكي 
ضاعت نقطة وحصلتها مليون نقطة 
بس واثق إن إيمانك قوي بحاجات معينة 
واثق إن لو قامت حرب وإنتهي بنو البشر كلهم وكل بنات حواء فإنتي هتتخذي كل التدابير عشان نظل أحياء عشان ميبقاليش غيرك ولا يبقالك غيري ... أنا واثق إنك مرتبه كل حاجة إلا حاجة واحدة بس وهي أنا .

****

-أنا عايز أمشي لأني مينفعش أعمل كدا 
- وحياة أمي ما ينفع يا كريم 
- فكري فى الصح مش فى اللى عايزاه بمشاعرك
- والله ما ينفع يا كريم , إصبر وربنا هيكتب الخير 

بعد كام شهر 
- كريم أنا همشي 
- طيب مع السلامة 

فى ناس متستاهلش حتي إنك تمسك فيهم ولا تفتكرهم بصورة :D


****
 بلا ولا شى :P
Do You Remember
???
يس يو :)



فى لحظات بالعمر كله وفى أعمار بألف عمر تاني 
وفى ناس بيكونوا هما الحقيقة وسواهم 
مجرد ذكري :)



ناس مينفعش تتكلم عنهم 
يكفي بس إنهم موجودين 
وبس خلاص :)
يا حقيقة :)
إنتهي :)
شاب فقري

بكتشف عيوب كتير فيا فى وسط أفكار كتيرعاملة لي صداع 
فبكتب حاجة وأناقش نفسي وأصحي وأنام وأفوق وأضيع وألاقى الطريق وتلاقيني بقرالك المكتوب وبسكت شوية وأنام وأنا بتكلم :)
عايز أغنية لمنير بقى 
عايز أغنية منير وسيمون أو منير وأنوشكا ... عايز شوية دفا تبعتيهم ياخدوا كل ذكري بعيييييييييييييد ويخلوني ى أمان عشان أعرف أنام 
عايز الكون يغني أغنية وتنتهي وتستمر الحكاية 
عايز الكون يغني لي لحد ما أنام 
بس المرة دي صوتك يصاحبه :)
بس خلاص

P.S: فى وسط وعلي مدار السنين مازلت أنا زي ما أنا بكل مبادئي و أفكاري وشخصيتي فى حاجات أينعم بتظهر وبتضاف وأفكار جديدة لكني مازلت أنا بكل تفاصيلي ... وهذه نعمة أحمد عليها المولي سبحانه وتعالى 
واحمده علي التطورات برده 
:)
وعلي كل شىء واللاشىء :)