الجمعة، 23 نوفمبر 2012

إهداء خاص جداً إلي صديقي المحارب

البوست مختلف ... جدا عن كل اللى كتبته الفترة اللى فاتت وعن كل اللى ناوى اكتبه وعن كل اللي ممكن اكتبه بس هوا دا وقته المناسب , رسالة موجهة إلي صديقي المحارب 

صديقي المحارب 


بعد التحية والتقدير والإحترام والفرح والدعاء لك بالتوفيق فى حياتك 

قبل ما تقرا الكلام دا اللي أتمني تقراه فى يوم من الأيام عايزك تعرف إننا صحاب من زمان أوي وكان أحد أماني حياتي فى فترة ما إني أقعد أتكلم معاك و أشوفك وأحكي معاك كتير , لأني بصراحة كان هيفيدني نصحك وتوجيهك بالرغم من إني أكبر منك وخبراتي أكتر منك بكتير بس كان هيفيدني جدا كلامك لمعرفتك وخبرتك بالتعامل مع الشخصية الوحيدة اللي عايز أتعامل معاها , وعايز أقولك إن صداقتنا بدأت مش عارف من إمتي بالتحديد ولكني كنت دايما بدعمك وبقف فى صفك مهما إتقال عنك لأنك ببساطة تمتلك شىء مينفعش ومقدرش أمتلكه أنا وهوا صلة الدم .

بما إننا صحاب من زمان أوي بدون ما تعرف وبنتشارك أحداث كتير جدا سواء فى الفرح أو الحزن وإحنا الأتنين عبارة عن حبل معقود وبيكمل بعضه جوا حد معين فأنا عايز أقولك إني النهارده فخور بيك جدا , إنته الإثبات الوحيد اللي أعرفه حاليا علي صحة كلامي وصحة موقفي وعلي إن اللى بيحارب عشان حاجة وبيتعب وبيستحمل بيوصل للحاجة فى الآخر , لأن المعركة يا صديقي مش نهايتها الدقايق البسيطة اللى بنتوجع فيها أو بنتكسر فيها ولكنها نهايتها لازم تبقى إنتصار طالما بندافع عن حد بنحبه بجد وبنبني مستقبل وحياة 

أنا فخور بمعركتك جدا وفخور بإنتصارك جدا وكأنك مش هقولك صديقي وبس لاء وكأنك أنا , مش عايز أقولك إني فشلت فى معركتي ولكني هقولك إني ببساطة أجبرت علي الإنسحاب لما الجيش كله إنسحب وبقيت عامل زي اللى واقف يحارب الهوا , عارف يا صاحبي يعني إيه تحارب الهوا ؟؟؟ عمرك ما هتنتصر طول ما إنته بتحارب فى هوا , عمرك ما هتقدر تحبسه أو تسجنه أو تكسره أو حتي تجبره علي أي شىء , لأنه ببساطة هوا , زمان إتسألت سؤال هوا إزاي ممكن أمسك الهوا أو أتعامل معاه أو حتي املكه وكان الرد إن الهوا محتاج يتحبس عشان خاطر حد معين , طبعا كلامي مبهم شوية بالنسبة لك وحاسس إنك مش فاهم أنا قصدي إيه 

ولكن أنا متأكد إن كلامي فى لحظة ما وإنته فى لحظة إنتصارك هتقول فعلا كل اللى عملته وحاربت عشانه عشانها كان يستحق , أنا عارف إني غلطت فى حاجات كتير أوي , لكن صدقني ومن كل قلبي والله العظيم حاولت أصلح , وقمت بدورك فى غيابك وقمت بدورك فى حضورك برده وإنته مشغول وغايب ومش فاضي وفى الشغل , قمت بدورك فى كل وقت إنته تخاذلت فيه وفى وسط أي مشكلة إنته مكنتش تسمع عنها حاجة كنت بنصر اللى قدامي دايما ومكسروش بحجة إن مينفعش اللى قدامي ينكسر ولازم اللى قدامي يكون بخير بجد مش بس كلام حتي لو دا علي حساب نفسي وروحي 

أنا مش عايزك تشكرني ولا عايزك تزعل مني ولا تلومني , أنا عايزك تفهم ببساطة إني حاليا مبسوط جدا عشان وفرحان ليك وبدعيلك كل ما تيجي علي بالي وكل ما بشوف مكان حلو بقول أتصل بيك عشان أقولك تيجي تسكن هنا بس للأسف ممعييش رقمك , ملحقتش أوصل للوقت اللي ينفع فيه أتصل بيك الصبح أقولك فى مكان كويس ينفع لك أو أتصل بيك بليل أقولك تعالي عشان هنخرج أوريك مفاجأة , أو حتي أشكي لك من حد معين 

تعرف يا صديقي المحارب , النهارده بعد معركة إستمرت من زمان أوي أوي أوي فى حياتك قدرت تنتصر وتحقق حلمك , صحيح إتكسرت كتير وواجهتك صعوبات بس القوة المستحيلة اللي شفتها فيك وقدرت تتغلب بيها علي كل الناس حتي علي أقرب الناس ليك اللي قالوا لك لاء وحرموك من حقك في الحياة وحقك فى الإختيار وقالوا إن إنته قرارك مش سليم وكانوا عايزين يهدوا حاجات عمرها سنين السنين أو عالأقل حاجة جواك مينفعش تتخلي عنها أو تنكسر , هوا أنا بكرر كلامي ؟؟؟ مش عارف , بس صدقني أنا محتاج حاليا أكرر الكلام ميت مرة وأعيده وأزيده وأفهم كل الناس إن إنتصارك هوا أعظم إثبات بإن اللي بيحارب عشان حاجة بيوصلها وإن اللى بيحب بجد وبيتمسك بالشىء اللي بيحبه فى لحظة ما هيقدر يحقق الإنتصار الأعظم اللي يتغلب علي كل هزيمة وعلي كل وجع وعلي كل تعب السنين , إن الواحد صعب يلاقى فى الدنيا حد يحارب عشانه بالمنظر دا ويستحمل نيران المعركة سنين وسنين وسنين , وإنته لقيت الشىء أو الشخص اللي يتحارب عشانه والشخص التاني قدرك ووقف جنبك ونصرك ومتخلاش عنك , حتي لو إتخلي عنك فإنته إلتزمت بكلامك وكملت المعركة للنهاية عشان تبتدي بعدها معركة جديدة تماما فى الحياة 

عايز أنصحك وأقولك خليك مرن فى التعامل لأن لما العلاقات بتتطور بيحصل فيها لخبطة ومشاكل بس أكيد إنته فاهم دا , وعايز أقولك إفرح علي قد ما تقدر لأن مناسبات زي دي مبتجيش غير مرة واحدة بس , وحاجات زي دي بتبقى فرحة واحدة بس فى العمر ولازم ترضي بنصيبك لأقصي حد وتحاول بكل طاقتك تصون اللي قدامك ومش تتخلي عنه أبدا مهما حصل , هتقولي إزاي أتخلي بعد كل دا هقولك ببساطة هيظهر عيوب صغيرة جديدة مكنتش تعرف عنها حاجة فى اللى قدامك وكمان اللى حواليك هيشوفوا غلطات أكبر والغلطات اللي هيشوفوها مش هتفرق معاك لكن اللي هيفرق معاك هي الحاجات البسيطة اللى بتغيظك , عايز أقولك تستحمل وتبقى قوي لأقصي درجة لأن المرحلة دي صعبة أوي , أنا عارف أنا بقولك إيه لأني جربت قبل كدا وعارف أنا بقولك إيه كويس أوي 

صديقي المحارب , أنا فرحان بيك , وفخور بيك , ونفسي أعملك أي حاجة بجد تفرحك أو على الأقل تكون سبب فى إبتسامتك لأن زي ما قلت الرابط ما بيننا وصداقتنا تمتد من سنين مضت ودي طبعا حاجة تشرفني وتسعدني بالرغم من كل أوجه الإختلاف والتقصير اللى حصلت أو بتحصل مني ومنك , ولكني معتمد عليك كإثبات وبقولك كمل للنهاية وبقولك حارب وبقولك مش تستسلم أبدا , بقولك خليك قوي أوي أوي أوي , وبقولك إوعي تسيب حاجة تكسرك وإتحرك دايما وإعتمد علي نفسك لأن لو إعتمدت علي غيرك هتلاقى نفسك بتقع ولازم تبتدي علي قدك , وعايزك مهما كانت الصعوبات متخليهاش تأثر علي فرحتك وإوعي المشاكل تأثر علي درجة رضاك بالموضوع , خليك قوي يا صديقي المحارب , أنا عارف إنك تستاهل كل خير لأن الأصل طيب أوي ولأن فى ناس طيبين أوي بيحبوك أوي وأنا عن نفسي هبقي مبسوط أوي فوق الوصف لما أشوفك بتحب الناس اللى حواليك وبتتحملهم ومش بتتعصب عليهم وبتسيبهم يعيطوا وهاتلهم حاجات بسيطة تفرحهم وتبقى شبههم ومتنساش تعمل أهم حاجة بيعملها كل واحد فى اليوم دا مع أقرب حد ليه فى حياته , فاهمني طبعا , بالرغم من إعتراضي علي النقطة دي بس هقولك إعمل كدا , عشان يبقي فى شىء ميتنسيش , إهتم باللي حواليك يا صديقي المحارب لأنهم يستاهلوا جدا أوي جدا أوي أوي أوي .

أنا خلصت كلامي يا صديقي ويا إثبات الفكرة والنظرية وبطل المعركة , إثبات إننا لازم نحارب حتي لو واثقين من الفشل , إثبات لفكرة إن مهما تعبنا أو إنكسرنا فى حاجات وناس مينفعش نتخلي عنهم , إن لازم نتعب وفى لحظة التعب نلاقى شخص واحد بس يسندنا , أنا والله العظيم عارف إنك فى الحالة اللى انا فيها وإنك برده لما بتحب بتحب بجنون وبتحارب لآخر لحظة لدرجة إن اللي قدامك بيقولك إزاي إنته كدا , إزاي بتعمل كدا , إزاي بتحب بكل الجنون دا وبتتحمل وطبعا يا صديقي المحارب السر معروف , إحنا إتخلقنا كدا 

يشرفني تكون صديقي ويشرفني فى يوم تقرا الكلام دا ويسعدني إننا نخرج بعدها ونتمشي شوية أو نسهر علي قهوة أو نسافر إسكندرية ونقضي شوية وقت هناك ونرجع برده كلنا وإنته فاهم أقصد إيه , مفيش كلام يتقال تاني غير إني فرحان وفخور وبدعيلك وبجد نفسي أشوفك فى يوم فى خير إن شاء الله , وسلام دلوقتى بقي عشان رايح أحارب :) .

صديقك المحارب برده 
كريم
فى 23-11-2012 
فى إحدي اللحظات الحاسمة فى المعركة واللى نفسي منتصرش فيها
ولكن نفسي الكل ينتصر , لأننا كلنا واحد 
ودي لحظة من اللحظات اللي بتفرق بس مش هي اللي هتحدد النهاية