الثلاثاء، 31 مارس 2015

الفقري واحد بس

فى الفترة الأخيرة فى محاولات تطوير الذات والخروج من القوقعة بعد الإنتهاء من الخدمة العسكرية والخروج للحياة الملكية ومحاولة التأقلم من جديد علي التعامل بأريحية مع الناس وعمل ما أحبه ورفض كل شىء مش علي مزاجي لمجرد إنه مش علي مزاجي والإلتزام بقيمى وأفكاري ومبادئي لأقصي درجة  فى الفترة بنت الحلال دي إتعرفت علي ناس كتير جدا وبقيت بخرج أكتر وبسبب كوني كائن إجتماعي بالدرجة الأولي إستطعت أكون علاقات فى مجالى وفى المجالات اللى بحلم بالإنتماء ليها يوما ما وقدرت أرسم خريطة للمستقبل وألبي إحتياجاتي المادية بالرغم من كوني لسه بلا عمل ثابت حتي اللحظة الحالية ولكن خلونا نتكلم الأول فى المهم , فى نقطة إني كل ما بتعرف علي حد وبياخد رقمي أو يضيفني عالفيس أو حتي يتكلم معايه وأقوله بكل أريحية وبإبتسامة جميلة : معاك كريم ... شاب فقري :)
بلاقي السؤال اللى تعبت منه الصراحة بكل صيغه : ليه فقري ؟ ياراجل دا إسم ؟ إشمعنا بقى فقري ؟ دا بجد ؟ 
وكومنتات لطيفة من بتاعة : إبتسم للدنيا عشان ربنا يفتحها فى وشك , إعمل الأكونت بإسمك أحسن بلاش حكاية فقري دي .

أنا هكتب البوست اللطيف دا كرد علي كل الكلام اللى بيتقالي تعليقا علي الإسم فقري وإن شاء الله مش هتكلم فى الموضوع دا تاني :
فقري حضرتك معناها الراجل اللي بيهزر وبيبتسم للحياة وبيقلش علي ظروف الحياة الطين وبيحاول بكل شكل يحلم ويوصل لأحلامه . وطبعا لها معني تاني وهوا : المنحوس  أو اللى المصايب بتيجي له لحد عنده وتاخده بالحضن كدا وهوا ماشي فى الشارع 
وأحب أوضح نقطة أهم من نقطة معني كلمة فقري, فى القاموس بتاعي حضراتكم هتلاقى كلمة فقري كالتالى 
فقري : ( إسم - noun ) 
يعني حضرتك إسمك أكرم مش معنى كدا إنك مقضيها كرم علي خلق الله , ولو إسمك أحمد أو حتي تامر أو عباس أو او او 
عمر ما كان معنى الإسم بيمنحك الصفة الخاصة بيه 
ولو فعلا للناس نصيب من أساميها كان زمان الشعب المصري بقى متدين بجد مش ( بطبعه زي ما بيقولوا )  لأن تلات تربع أسامي ولاده : محمد واحمد ومحمود

يعني الفقري دا مجرد إسم و Nick Name , مش لازم يبقى ليا نصيب منه هوا مجرد إسم للشهرة وسبب التسمية بيه إن دا يوزر المدونة وفى نفس الوقت الإسم سره هوا الظروف الطين اللى فيها كل شباب مصر مش أنا وبس , وبرغم ذلك الواحد عايش وبيتعامل وبيطور فى نفسه وبيجرب فى كل إتجاه 
قبل ما تسأل شوف أنا وصلت لحد فين وشوف الطريق اللى مريت بيه وحتي لو عرفته مظنش إن حضرتك لك بأي شكل حق الحكم عليه لأنها حياتي فى الاول وفى الآخر وتخصني 

-مدون بقالى سبع سنين منهم سنة ونص فى مدونة قبل دي وإسم تاني غيره 
- شغل ودراسة ومذاكرة فى كلية مش كليتي لمدة سنة ونص كتبت فيها مذكرات وملازم للطلبة وأنا أصلا برا الكلية ( إعلام القاهرة ) لكن شغلي كان نابع من حضوري وتركيزي ومذاكرتي وإستغلالي لقدراتي دي
- إشتغلت مع جوجل أدسينس لمدة سنة ونص وحققت والحمد لله نجاح فى مجال الإعلانات 
- أسست شركة خاصة عالإنترنت للعمل فى مجال المواقع لمدة خمس سنوات وأسستها من الصفر برأس مال صفر برده وبإمكانيات تحت الصفر وجالى عروض عمل كتير فى السعودية والبحرين والكويت والحمد لله رفضت وكملت دراسة ونفضت للسفر فترة الدراسة كلها .
- إتعلمت من الصفر فى حاجات زي اللينوكس والسيرفرات والشبكات لوحدي و تعليم ذاتي بدون كورسات 
- قدمت قبل كدا مرتين فى الاكاديمية البحرية فى إسكندرية وإتقبلت وفى نفس الوقت والحمد لله مكملتش بسبب ظروف شخصية
- إشتغلت فى المسرح وكتابة النصوص المسرحية وشاركت فى كتابة نص مسرحي وبعدها كتبت نصوص تانية وإتجهت للتمثيل فى المسرح فى الشارع وشاركت فى تدريب ورش مسرح وفى إدارة فرقة عروض مسرحية 
- إشتغلت فى المحاسبة والإدارة وكنت مدير لمصنع فى أكتوبر من قبل ما أتخرج من الكلية والحمد لله 
- إشتغلت علي باب الله ولله الحمد وإشتغلت بياع فى الشارع وبعت خضار يوما ما وبعت ليمون ونعناع وروحت لفيت علي المحلات كمندوب مبيعات وتصليح أجهزة كمبيوتر , وإشتغلت فى المعمار وشلت رمل وطوب وبنيت ووقفت كصاحب شقة وصنايعي واشتغلت نقاش وإشتغلت صنايعي ألوميتال وبتاع قزاز وكنت أسطي شاطر ( كل دا فى مرحلة ما :D ) وشرحت فى مرحلة ما شبكات ولينوكس وإديت محاضرات لمجموعات قبل كدا فى المجال دا وكورسات برايفت :D وساعدت مهندسين فى مجال اللينوكس والحمد لله الناس دي إشتغلت فى شركات محترمة .
-قعدت ولله الحمد صايع فترة علي باب الله والحمد لله حتي دي طورت فيها نفسي وذاكرت وإنتقلت من نقطة لنقطة تانية .
- خلصت جيش وبطلت سجاير :D

دا على المستوي العملي فى الحياة والحاجات اللى بتقول أنا عملتها وتبص ورا وتقول يا سلام أنا فرحان بنفسي 
أما أنا فالحمد لله شايف إني لسه مبتدتش أى حاجة ولسه عندي حلم بجري وراه وبحاول أحققه دايما
علي المستوي الشخصي والحمد لله حققت كتير وفكرت فى أكتر و حبيت وإتحبيت وحاولت أخطب وفشلت وحبيت وإتحبيت وصاحبت وعطيت وخرجت وعشت حياتي والحمد لله زي ما بتمني ومش ندمان علي أي حاجة مهما كانت 
كل عقبة قابلتها والحمد لله كانت سبب فى إني أكون أحسن وإنتقل لخانة أحسن و محاربتي للعقبة دي خلاني أتطور أكتر وأكتر وأبقى أنا ولذلك فأنا بكون مبسوط لما بفتكر أيامي السودا فى الشغل أو الكلية أو الجيش أو أو أو ...
علي المستوي الشخصي والحمد لله عمري ما أذيت حد ولا ضريت حد بالرغم من تعرضي للأذي من كتير من الناس سواء سخافات منهم أو سواء كراهية أو حتي تهيؤات بتخليهم يتعاملوا بغباء وغشم وبالرغم من قدرتي الكاملة علي الرد وقدرتي علي الأذي للجميع إلا إني والحمد لله مازلت شايف إن أعظم المعارك هي اللى بتنتصر فيها علي نفسك وعلي رغباتك فى أذية الغير 
والحمد لله فى حياتي علاقات طويلة الأمد وصداقات من سنين وذلك لأن الواحد طول عمره بيقف جنب غيره وعمر ما حد طلب مني حاجة ورفضت 
والحمد لله ليا صحاب ومعارف فى كل حتة سواء جوا مصر  أو برا مصر :)
خد بالك كل دا ومتكلمتش عن آخر سنتين والحمد لله من حياتي ولا حتي عن آخر ست شهور واللى بيهم حياتي إتغيرت ومازالت شخصيتي ومداركي ومعارفي كلها بتتطور ... ومبحبش أتكلم عن حاجة إلا أما بتخلص :D
ولذلك 
فأنا هوا أنا ولدي أسبابي 
فقري 
سعيد بالإسم
والفقري واحد بس :)

ولذلك برده خد حذرك مني :)
لأني ولله الحمد فيا عيوب ملهاش آخر لكن ربك حليم ستار 
 :)


تحياتي 
شاب فقري
***
كل الحاجات اللى بتمر عليها بتخليك أنت ,  سواء كانت نور أو عتمة *
 سواء كانت خير أو شر ...
إنسان : خير الملايكة وشر الشياطين .
*يس بالظبط كدا