السبت، 14 نوفمبر 2015

الذي بنعمته تتم الصالحات

"اللي بدأوا قبل منك بدأوا أصلا من مفيش "فاكر أول مرة قريت الجملة دي علي بروفايل ندي بعد ما فات تقريبا أكتر من أربع شهور عالحلم وكنت لسه فى أول المشوار وكنت ببص للصور ومبهور ومستغرب وبقول لنفسي إزاي وهل ممكن ؟ الكلام دا كان بعد ما طاقتي من لقاء صاحبي ( اللى سافر أمريكا وبيحضر دكتوراة فى كالتك واشتغل فى ناسا )كان الباور خلاص إنتهي وكنت نسيت كلامه تقريبا وكانت الدنيا متقفلة خالص وبعد الأحداث والتفاصيل البارده كانت بتخلي الحياة أكثر برودا وأكثر عتامة زي ما بيقولوا مع إني معتقد إن العتمة واحدة بس إحساسنا بيها مختلف 
المهم ...
خطوة ورا التاني ومستوي ورا التاني وكل شوية بنقرب وكل شوية بنحقق حاجة 
أنا بصراحة النهارده مبسوط وسعيد ومش عارف أعبر إزاي عن فرحتي باللي وصلتله 
كنت لسه من يومين بكتب هنا عالمدونة وبقول إني لسه فى نقطة الصفر وببتدي من المفيش والنهارده الحمد لله مكمل ووصلت لخطوة أهم 
كل يوم السكة بتوضح أكتر ورزقنا من رفاق الدرب بيكتر والله اعلم مين مكمل ومين هيسيبنا ويكمل لوحده ومين هيقع فى السكة من التعب ومين هيفقد إيمانه بالحلم 
أي حاجة فى الدنيا أول ما بتركز فيها بإخلاص لازم هتحققها مهما كانت صعبة ومستحيلة ومهما كان اللى حواليك بيعطلوك أو بيحبطوك كفاية إن الواحد شايف لنفسه الهدف الفلاني 
النهارده أنا فخور بنفسي وفخور بكل اللى وصلت له 
أيون فى حاجات كتير بخسرها مع الوقت وفى ناس حواليا بتحقق حاجات كتير 
يمكن دا مش الاوان اللى أحقق فيه حاجات عظيمة يمكن هوا دا فعلا الوقت اللى الواحد بيجهز فيه عشان يطلع فجأة بحاجة خارقة للعادة 
اللهم لك الحمد علي كل شىء 
الحمد لله عالحب والصحبة والعيشة والدنيا وكل التفاصيل الحلوة والوحشة والباردة والقاسية والمحبطة والصالحة والفاسدة وكل حاجة 
لان لولا الحاجات دي كلها ولولا كل فشل عديت عليه فى حياتي مستحيل كنت أوصل للنقطة اللى تخليني أشوف للدرجة دي 
الحمد لله علي نعمة البصر والبصيرة وعلي القدرة عالتحقيق والإنجاز 
الحمد لله الذي تتم بنعمته الصالحات 

شاب فقري

الاثنين، 19 أكتوبر 2015

In Time

عزيزي القارىء 
طالما وصلت للصفحة دي يبقى أنت بتبحث عن توضيح لما لقيتني ماسح بوستات فى المدونة :D ولقيت لينك بيقولك إضغط هنا :D
مبحبش أشرح لحد الحاجات اللى بكتبها إستاتس عموما بس نعمل إستثناء بسبب مناسبة عظيمة :)
I have no doubt the revenge you want will be yours in time, if you have the stomach for it
الجملة دي كانت علي لسان شخصية فى Game of Thrones 
كان بيكلم تيريون البطل المحبب لقلبي أكثر من بين كل أبطال المسلسل 
وبيفهمه إن الشخصية اللى بوظت حياته هياخد إنتقامه منها فى لحظة ما بس المهم هوا يقدر يستحمل ينفذ الإنتقام دي ويقدر يعيش مع نفسه لما يحققه 
وطبعا الإنتقام زي ما حكينا قبل كدا مليون مرة بيكون أعظم من الذنب مليون مرة 
بس لو الإنتقام هيتحقق بدون تدخل منك فدا يبقي شىء عظيم جدا يعني :D
لأنك بينك وبين نفسك برىء  تماما من اللى بيجري وفى نفس الوقت معليكش ذنب 
زمان كنت ومازلت مؤمن بمبدأ فى حياتي إن الوحش مش محتاج أنك تأذيه أو ترد له اللى عمله فيك لأن سيئاته و كونه هوا شخص وحش كفيلة بإنه يبوظ حياته بنفسه ويدمرها ويقلبها رأساً علي عقب 
والحمد لله حتي لو معنديش القدرة علي تحمل رؤية الإنتقام دا فغصب عني أهوه بيحصل :D وبرده الناس إنتقامهم بيحصل زي ما هما شايفين :D
نشوف بقي المشهد دا 


Have you learned to trust me
?
However, if you choose not to, you will never be heard from again. Your body will never be found. You will simply vanish. I ask you, Special Agent Strahm: Have you learned enough to trust me? Will you heed my warning? For if you do not, this room will forever be your tomb. And my legacy will become yours. Make your choice.

أعظم عقاب قريت عنه قبل كدا اللى إتكلم عنه درويش وقال : تنسي كأنك لم تكن 
تمسح حد من تاريخك وتمسح تفاصيله وتدمر كل ما يخصه عشان الموضوع يتقفل للأبد بحيث إنك بتمسح من حياتك شخص بالكامل من ذكرياتك ومن كل حاجة بمعني كل حاجة 
يمكن دي الحاجة اللى مقدرتش ولا رضيت أعملها فى حد لحد النهارده لكن بناء علي طلب الناس وبالذات الناس دي لو كان لها قيمة عندي فى يوم من الأيام فلازم أقدملهم اللى بيتمنوه لأني بصراحة  لا أتمني فى حياتي إلا إن الموضوع ينتهي ويتقفل وببساطة ميظهرش تاني أبدا الموضوع بأشخاصه وتفاصيله وبحتي الحاجات اللى كتبتها عن الموضوع دا قبل كدا وبكدا ينتهي ويختفي وكأنه مكانش موجود بكل ما يخصه 
الوعود تم الحفاظ عليها وكلامي إلتزمت بيه وبيني وبين نفسي الحمد لله راضي ومش حاسس بأي ضرر سببته لأي حد ...
خيرا إن شاء الله 
لو ضغطت علي لينك فى المدونة أو لقيت رسالة فى كام بوست مكتوب فيها إنك تضغط هنا فتوصل للتفاصيل اللى تفهمك الحكاية فأنا بقولك يا عزيزي القارىء إن مفيش حكاية وإن بعض الأشخاص بيبقى لهم وقت وبينتهوا من حياتنا وقيمتهم بتزول وإن لا لهم ولا لذكرياتهم قيمة كل شىء وصل لنقطة إن مبقاش فى حاجة لأى حد هنا ولا بقى لهم قيمة فى حياتنا وحتي ذكرياتهم إتمسحت والحكاية إتمحت :)

من اللحظة دي ببساطة مفيش حاجة هتتكتب فيما يخص الشخصيات المقصودة فى البوست ولا هيتحكي عنهم ولا حتي هيتم ذكرهم بأي شكل والحمد لله أنا أخدت وعد بإن كل حاجة تنتهي ونخلص من الموضوع دا ونستريح وميبقالوش أي سيرة تاني أبدا 

نقطة ومن أول السطر ونركز بقى فى الحاجات اللى تستاهل فى حياتنا وننسي المسكنات والحاجات اللى لا عاد لها قيمة ولا تمن .

Over :D
شاب فقري  

عايز بس أقول حاجتين فى الآخر :
الأولي : بشكر البنت اللى كنت أعرفها من كام سنة اللى قالت لى : كل شىء بيحصل لسبب وفعلا كان عنها حق الله يرحمها مطرح ما راحت برغم غباءها إلا إن كل حاجة تخصها لسه هنا 
ثانيا: الوقت كفيل بكل شىء سواء بالتوضيح أو بالعدالة أو حتي بفكرة الإنتقام اللى فوق ويمكن البوست دا أكبر دليل علي إن الإنتقام اللى الناس بتتمناه هياخدوه يوما ما دا لو كان لهم حق زي ما انا الحمد لله حقي بييجي لى دايما :) . 
ثالثا : إن مفيش حاجة هتتكتب تخص الناس اللى كتبت عنهم فى البوست دا تاني أبدا ومليش دعوة بقي باللي يقول دي تخصني أو متخصنيش لأني بجد والله وغصب عن أن حد بلتزم بكلامي 
رابعاً: وربنا وربنا وربنا كمان مرة My Doctor مصطلح أو إسم لا يعبر عن الناس اللى مكتوب عنهم البوست من قريب أو بعيد وبالتالي مش مجبر أشرحه ولا يهمني إن الناس تفهمه كفاية إن اللى يخصهم الإسم فاهمينه كويس .
 خامساً : What Kind of fathers will i be After all i kill people برده وربنا لا تعبر عنكم وكمان الأميرة وكمان سنو والتفاصيل اللطيفة اللى بتاخدوها علي نفسكم دي متخصكمش والله :)
سادساً : محدش يعرف حاجة أو فعلا والله العظيم مفيش حد يعرف أي حاجة عن أي حاجة سواء عني أو عن اللى فات أو عن اللى بيجري فى حياتي فى مرحلة ما ومش ذنبي إن الناس بتفهم الكلام عليها وهوا والله ما عليهم 
بس خلاص .

الجمعة، 2 أكتوبر 2015

إفحت فى القاع وإستمر


عارفة 
أنا مبدئيا كدا مبقتش حاسس إني عايش 
كل الحاجات اللى بحبها واللى بحسها واللى بتخلي فى ألوان لحياتي فقدتها بكل سهولة 
بطلت أتابع السينما وأتفرج وأتمتع بكل لحظة فى الفيلم وأركز مع المزيكا وأتخيل بجنان
بطلت أسمع مزيكا بتعبر عن اللى جوايا وبطلت أركز مع الآلات اللى بتعزف وأروح أسمع لها مقاطع سولو 
بطلت أسمع Skillet وبطلت أسمع أغاني المسلسلات اللى بحبها وأرقص عالمزيكا اللى بتطير الواحد من مكانه 
بطلت أتصور وأسجل اللحظات اللى عايز أفتكرها وبقيت بعدي كل حاجة بسرعة بدون ما أركز فيها عشان مش عايز أتوجع 
بطلت أقعد أتعرف علي ناس معرفهاش وأرغي معاهم وأحكي لهم وأسمع منهم 
فقدت الصحاب اللى بيصبروا عالطريق إبن الوسخة اللى ماشيين فيه سواء الصاحبة أو اللي بتسمع أو أي حد 
فقدت الصحاب اللى كانوا كل شوية يقعدوا يفضفضوا ويفتحوا قلبهم ويشاركوك لحظاتهم الحلوة والمرة 
فقدت الشغف تجاه الحياة 
تخيلي معايه بقى لما شخص مدمن للحياة يفقد الإحساس بيها فجأة, كل الشغف اللى كان موجود جوايا تجاه الحياة بكل أشكالها من الخروج والإختلاط بالناس والثقافات الغريبة والكلام والمناقشات والتجربة والمخاطرة والجنان والسهر والمشي فى الشوارع والحب والمكالمات الحلوة والشكوي والخناق والجنس حتي الجنس 
كل دا فقدت تجاه الشغف والإحساس 
بقيت عامل زي أرماند وهوا بيقول للويس هوا أنا هموت ؟؟ فلويس قاله إنت مش هتموت يا أرماند لأنك ميت بالفعل ومفيش حاجة هتطول فى عمرك تاني 
بطلت أفكر هعمل إيه يسعدني النهارده وهرمي همومي فين ووأشتكي لمين ؟ بطلت أفكر هترمي فى حضن مين يسمعني ويحتويني وأمنح بجنون زي زمان بطلت أفكر فى المنح مبقاش عندي حتي شغف المنح للآخرين 
بطلت أعيش 
عارفة 
كل الحاجات اللى بحلم بيها وعايش ليها والكورسات واللغات والجري والتنطيط ومراسلة الجامعات ومراقبة الطريق الجاي والتحضير للخوازيق , كتر الحياة العملية خلاني فجأة مش قادر أشع أي طاقة لأي حد ولا فى حد حواليا يشحني ويديني طاقة ويخليني أكمل 
كل الناس فجأة بقت بتفكر فى نفسها وكل الناس بتحكم وتتنطط 
فى ظل كل الكوارث اللى حواليا من أقرب الناس ليا لحد صحابي لحد القرف اللى بشوفه كل يوم كل دا خلاني فاقد للرغبة حتي فى الحياة بقيت شايف إن حتي الحياة العادية هيبقى فيها معاناة 
أنا يا عزيزتي بكره الإحتياج وبكره العناد وبكره الكبر وبكره تكرار الغلطات وبكره نفسي لما بزعل من الناس وبكره نفسي لما بتعصب وبكره نفسي لما بفكر ألبي إحتياجاتي وميشغلش بالي حاجة تانية 
بجد يا عزيزتي بقيت مقتنع إن مفيش حد مكمل معايه فى الطريق لأن أنا بكره نفسي إزاي هما هيحبوني ويستحملوا ؟؟
مش عارف 
بقي عندي حالة من التوهة مش عارف أولها من أخرها ولا عارف بدأت فيها إمتي ولا توهت فيها إمتي 
يمكن عشان إصطدمت بشكل غبي بالواقع ؟ يمكن عشان بحاول أغير كل لحظة فى يومي فبقيت بضيع كل لحظة فى يوم وأنا بقرب من الناس والناس بتخنقني أكتر ؟ مش عارف والله 
أنا بجد تعبت وزهقت وإتخنقت ... 
تفتكري لو سافرت قضيت يومين بعيد هرتاح ؟
تفتكري لو إنعزلت عنك وعن الناس هرتاح ؟؟
هل هعرف أصلا أنعزل فى ظل كل الحاجات المتربط بيها ؟ فى ظل الروتين اللى فى حياتي واللى مقدرش أتخلي عنه لنهم جزء مني وحتة مني ؟
هل هعرف أعيش لوحدي بعيد عن كل دا  ؟
مفيش حد بيعرف يقسم حياته بالشكل المثالي لأن فى لحظة معينة بتلاقى الدنيا كلها ساحت علي بعضها 
أنا محتاج أغضب وأحول طاقة غضبي دي لحاجة تدفعني لقدام حاجة تحفزني وتنقذني 
انا عمري ما وجعت حد ولا أذيت حد وعارف إن كل حد تعبني وظلمني هيندم علي دا 
عمري ما دايقت حد ولا كنت السبب فى الضرر لحد 
ميتين أم الإستطراد دا بكرهه بس لازم أعمله عشان ببساطة ءأكد علي كلامى 
برغم كل المحافظة اللى حافظتها عالناس بشوف منهم تصرفات أبسط ما يقال عنها بنت وسخة 
وبعد وهجر وقلة تقدير وقلة اهتمام وقلة إحترام وتصرفات غبية 
هوا المفروض أكون غبي وأتغابي عليكم بزيادة ؟ 
هل المفروض أكون قاسي وعديم الرحمة ؟
ولا المفروض أفكر بشكل عملي بزيادة ؟ 
أنا كتلة من المشاعر بنت التيت اللى بتتأثر بأي حاجة وكل حاجة وبتعافر كل يوم عشان تعيش 
يمكن اللى جرالى كان لأني ببساطة رميت كل المشاعر دي وبدأت أفكر بعملية وبقى فى إلتزامات وغباء من الآخرين 
مش عارف أبتدي لك منين 
بس كل لحظة فى يومي بمعنى الكلمة بقت فيها خنقة وتعب أعصاب 
الإكتئاب الحقيقي مش إنك تنعزل عن الناس وتقعد لوحدك لكن الإكتئاب هوا إنك تفقد شغفك للحياة وتفقد إحساسك بالحياة وتضحك وتتكلم وتكمل يومك عادي وأنت من جواك بتعد الثواني لحد ما اليوم يخلص 
الإكتئاب إن الحياة ميبقاش ليها طعم ولا لون 
يمكن دا اللى بمر بيه حاليا 

معنديش قدرة إني إسامح فى غلطات بتتكرر 
ولا مبقاش عندي قدرة إني أتعامل مع عناد وقسوة 
ولا بقى عندي قدرة أتعامل مع قلة إهتمام أو سفه أو إحباطات من الغير
كفاية همومي واللى أنا فيه واللى مكرهني فى العيشة مش هييجي اللى عايشينها يحطوا عليا 

دايما كنت ببقي واقف زي الملاك الحارس جنب الناس فى الاوقات اللي زي دي وأرجع لهم إحساسهم بالحياة وأسعدهم من تاني 
لكن ياتري مين اللى هيعمل كدا معايه وهيعيشني من تاني 
مين هيلبي النداء من الناس اللى حواليا وهيستوعب دا ؟
مين هيفهمني ويعرف يتعامل معايه ؟
أغلب الظن إني هبقى كعادتي غامض وبتكلم بسخافة وكاره نفسي وكاره العيشة ومش بصرح بأي حاجة 
الله أعلم مين هيمشي عشاني فى النار 
انا تعبت 
هقوم أكمل مذاكرة 
Auf wiedersehen 
شاب فقري

بغض النظر عن كل دا لولا اللى قلته دا مكانش حد هيعرف ولا هيستوعب ولا هيقدر اللى انا فيه لأني مستمر فى مكاني كملاك حارس وصديق وكل الأدوار الحلوة اللى فى حياتي مكملها وشايل همومي لوحدي 
ويمكن كل اللى قلته دا ولا حاجة 
اللى يقهر بجد إن مكانش فعلا والله حد هيفهم دا إلا لو كتبت 

الأحد، 27 سبتمبر 2015

الأمر الذي

الحياة مقيتة وكئيبة ومملة بشكل مبالغ فيه
يمكن عشان الفترة دي الواحد مبيخرجش ومبحبش أخرج أصلا فى الأعياد والمناسبات لأني بكره الزحمة وقلة الذوق اللى مغرقة الشارع ؟ ويمكن عشان كل حاجة متوقفة لحد ما العيد يعدي والدراسة تبتدي وعجلة الحياة تستمر من جديد
بإختصار كدا فى مليون سبب
الأمر الذي بيدفع الواحد للصمت والسكات وعمل الشاي والقعدة فى البلكونة أو البعد عن الناس
مبقاش فى نفس تتكلم مع حد مبقاش فى الطاقة إن الواحد يقعد يحكي
الحكي بقى ماسخ
والكلام بقى متعاد
والحلم لسه باقى عليه كتير
أهم حاجة لازم الواحد يفكر فيها هي إن الوقت بيعدي وبتعدي معاه كل حاجة
صحيح كل حاجة بتسيب فينا علامات تخلينا نتخنق ونكتئب ومننساش الأيام السودا ومجرد ذكراها بيعكنن علينا
بس فى ذكريات برده فى نفس الأيام السودا دي لما بتفتكرها بتفرح وتقول يارب تعود مهما كان السواد شديد
مين راح ومين جه ومين بيتكلم ومين مختفي ومين هنا ومين بيعاند ...؟
أسئلة كتير ملهاش لزمة
لأني بطبيعة الحال مش هرضي إني أتحول لمسخ عشان أرضي شخصية مفيش بيني وبينها حاجة
ولا هرضي إني أعيش زي ما الناس عايزة
لو كنت هعمل كدا فكنت عملت كدا من زمان ومشيت جنب الحيط وطاطيت وقلت معلش عدي يا واد
لكن روح العند اللى جوا الواحد وبتخليه يستمر هي اللى الواحد بيعتمد عليها ضد الروتين والقرف دا وفى سبيل تحقيق اللى بنتمناه
عشان فى الآخر الواحد يعيش سعيد ...
ياهلتري الواحد هييجي عليه يوم ويتأمل كل ما حوله ويحس بسعادة ؟
الله أعلم نهاية المشوار مش حلوة
بس علي رأي واحد عالأقل لما الواحد يكتئب ويتخنق لما يحقق حلمه هيقعد يعيط فى مكان وفى وسط جوا مختلف غير الجو إبن المرة
الإكتئاب فى باريس أو فى روما والقاهرة واحد
بس بتفرق فى العوامل المحيطة
وكذلك وأنت غني وناجح أو وأنت فقير وبتعيط علي حالك :D
فى كل الأحوال الإكتئاب واحد يبقى خلينا نكتئب بقي ونتخنق وإحنا محققين الحلم
وبالنسبة للعيدوالتفاصيل الكتير اللى حوالينا دلوقتى
يمكن العيد هيبقى حلو لو فى بنت تسهر جنبك فى حضنك للصبح زي زمان
أو إنك تصحي تسلم وتحب فى كل الناس اللى أصلا مفيش حد حواليك يعمل معاك كدا فبالتالى مبقاش حتي فى طاقة للتواصل ولا اني اتصل او اكلم حد 
دلوقتى الحياة مقيتة فعلا
مفهوم الإحتواء ضايع والحياة مملة بزيادة من كل النواحي
والصبر بقي شىء فوق طاقة الواحد
لكن مازال الواحد لازم يكمل فى كل طريق بدأه لأن لو وقفت هتتجمد مكانك ومش هتعمل حاجة
خلينا مقتنعين كدا ومتفقين سوا علي مبدأ إن : كل حاجة فى وقتها وهتيجي فى وقت معين
وننسي أي حاجة تانية ونركز فى اللي فى إيدينا
وننسي الناس والوش والصداع المستمر من المعارف والقرايب والصحاب او اللى فاكرين نفسهم صحاب
خليني مكمل عشان دا مش مكاني ...

خلي فى حاجات جوانا تفرحنا بعيد عن الناس ومبنحكيش عنها لحد
خلي فى تفاصيل تسعدنا فى الحياة تخصنا احنا وبس
خلي فى أسرار تخصنا وتبقى سند لينا
خلينا نحضن الفقد عشان نعرف نعدي منه علي خير 

شاب فقري

الأربعاء، 23 سبتمبر 2015

ياسمين ويسرا ورجعت

ياسمين رئيس ويسرا الهواري وأغاني ومشاهد مبتحسسنيش غير بالسعادة والحنين 
هفضل أحبهم ويكونوا مصدر سعادة دايما بمجرد إني أشوفهم فى أي مشهد أو كليب أو حتي رقصة او صورة او اغنية 
يخرب بيت الجمال 
ونرجع من تاني 
" ولقد خلقت من حنين "
شاب فقري

الثلاثاء، 1 سبتمبر 2015

بنشوف إيه ؟؟؟


دايما بنشوف اللى عايزين نشوفه فى الناس واللى الناس عايزينا نشوفه فيهم وبس
من الغباء إننا نصدق إن بعض الصداقات هتدوم للأبد لأننا كنا كويسين ومأذيناش وحافظنا علي وعودنا لآخر لحظة
من الغباء إن الواحد يفتكر إن ممكن الناس تفهم تصرفه صح ومتعتبرش صمته أو هدوؤه طيبة وعبط
من الغباء إننا نصدق إن لما ننصح حد بالصح واللي ينفع إنه هيفهم ومش هيتغابي ويعتبرنا عايزين منه حاجة لمصلحتنا
من الغباء إننا نفتكر إن غباء البشر محدود وبالذات الناس اللى كبرناهم  وتعبنا بسببهم وإتقرفنا وإتأذينا
يلا مفيش كلام يتقال أكتر
لأن لو عملنا حاجة من اللي فوق دي هنصحي فى الآخر علي حقيقة مقرفة ويمكن أكتر من كدا وساخة كمان
بس خلاص
لا عزاء لمن تخلي

#daughter

الاثنين، 24 أغسطس 2015

الكل فى وقت واحد

هوا دا شهر حد يبتدي فيه بالزمة ؟
كل كوارث حياتي ظهرت فى شهر تمانية وممكن أعد أكتر من عشر مواقف بتغير حياة البني آدم حصلوا لي فى الشهر الحلو دا 
لكن دا مش وقته 
الحكاية بإختصار إنهم بيقولوا اللى بيحارب فى كل الجهات بيخسر 
ميعرفوش ببساطة إن فى حاجات بتخليك تحارب علي كل الجبهات وتنتصر 
زي الخوف 
الخوف من الفشل والخوف من الخسارة والخوف من الوحدة لا و خسرت حاجات مينفعش تخسرها والخوف إنك مش هتعرف تعوض حاجة 
الخوف زي ما هوا حاجة حقيرة ممكن تموتك فى جلدك وتخليك تعيط كل يوم قبل ما تنام وانت بتبص للسقف زي ناس :D
ممكن تخليك برده عندك الطاقة المهولة اللى محدش يقدر يتخيل هي قد إيه وتخليك تكمل وتحارب وتوصل لهدفك 
الخوف حاجة حلوة 
والحمد لله الواحد عارف يتعامل إزاي مع حاجة زي الخوف والغضب وبيقدر يغلبهم 
زمان كانوا بياخدوا الستات والعائلات معاهم الغزوات والحروب عشان خاطر تبقى عارف إنك مينفعش تخسر وإن مفيش قدامك غير النجاح والانتصار وإلا هتموت 
دا غير إيمان بعض الملاكمين إن لو كان الخصم عايز يكسبك فلازم يقتلك لأن ببساطة إنت مش هتسيبه يكسبك وأنت عايش ومش هتستسلم ومش هتسيب نفسك عالأرض والحكم بيعد عليك وإنت مش قادر تجمع 
لما كنت بجري ضاحية كل يومين كان لازم طول الطريق أخلي عندي نفس عشان أقدر أوصل لنقطة النهاية 
طول الطريق بجري ومتخيل عالجانبين ناس واقفة بتشجع مع إن كان عالجانبين صحراء بمعني الكلمة :D
متخيل ناس مينفعش تخسر قدامها 
متخيل ناس مينفعش تخسر عشانها 
متخيل ناس بتحبك للدرجة اللى ممكن يجروا معاك خطوة خطوة عالتراك عشان تكمل 
متخيل ناس بتكرهك للدرجة اللى ممكن تخليهم يفجروا نفسهم جوا التراك عشان تتزحلق فى دمهم ومتكملش :D
كانت من أمتع لحظات حياتي وأنا بجري ونفسي بيضيق وبكمل وبصبر وبوصل للنهاية 
لحظات الضيق ولحظات النصر كانوا الأمتع بالنسبة لى 
ومع الوقت بقيت طول ما انا ماشي بغني مع نفسي اغنية ألفتها علي لحن خيالي وكلمات تخصني أنا وبس 
كان هدفي إني أبقى متحمس طول الطريق لدرجة إن يستمر الحماس دا معايه لآخر العمر 
ودا اللى بيجري اليومين الحلوين دول 
بحارب فى كل الجبهات 
حاجة زي الزفت , مش لاقى وقت اعمل أي حاجة غير إلتزامي التام تجاه حلمي , مش لاقى وقت أتكلم فيه مع حد ولا أخرج ولا حتي أقعد ساعة لوحدى أكتب بوست زي دا 
( الطريق صعب وطويل وبيمتحن الروح ) علي رأي الجماعة بتوع مشروع ليلي :D
وحشتني ليلي والله :D
ودلوقتى نقفل البوست بقى عشان مفيش وقت 
ولازم المعركة تستمر والواحد يقدر يحقق حاجة 
هبقى أكمل بعدين 
المهم دلوقتى إن الواحد يبقي قد التحدي دا وينتصر فى كل الجبهات 
#Rise 


شاب فقري 
ونكمل بقى الطريق
ونحارب الكل ..
واللى بييجي علي بالي الفترة دي محمد علي كلاي وهوا بيزعق فى الجمهور وبيقولهم : who am i ??
ملاحظ إن المصايب بترف من أول الشهر وناس كتير ماتت 
ملاحظ إن فى غم بيكتر كل شوية وضغوط بتزيد 
يبقى مينفعش تقعد وتعمل جدول لمعركة لازم تبتدي 
خليك زي ما محمد علي قال :
 I am Gonna Show You How Great I am

الجمعة، 7 أغسطس 2015

ومشيت خطوة

فات شهر 
إتحقق فيه كتير 
الحمد لله إن الواحد قدر فى الشهر دا يفوق أكتر ويحقق أكتر 
الخطوة الأولي دايما هي أصعب خطوة 
باقى علي المستوي اللى الجامعة طالباه حبة حلوين 
بس طالما قدرت أحقق أول مستوي يبقى خلاص الباقى كله سهل 
فى ناس كانت مؤمنة إني أقدر أعدي من قبل ما أي حاجة تبتدي وبالرغم من أي حاجة إيمانهم قواني وخلاني أقدر علي حاجات كتير 
يمكن الناس دي عارفيني أكتر مما أي حد فى حياتي عرفني ... الله أعلم 
وفي ناس ظهر إيمانها بيا لأول مرة 
الحمد لله 
عدت خطوة وباقي أكتر 
ولسه الطريق مليان عقبات ومشاكل بس أول خطوة علمت الواحد كتير 
ولسه اللي جاي ياما هيعلمني بس دايما هقدر أواجه وعمري ما ههرب زي العيال التايهة اللى مروا عليا فى حياتي وإختفوا فجأة :D
الحمد لله 
شاب فقري

السبت، 25 يوليو 2015

خليها ذكري ( تاتو )


الذكريات كتير والحكايات أكتر ويمكن الواحد فى حاجات بتيجي علي باله ومبيبقاش عايز ينساها ولا عايز يفكر في إنها حصلت من الأساس ( وربنا الإتنين سوا  :D ) هقعد أفتكر وأكتب كل المواقف اللي بتزن وتلح علي بالي دايما ...
بما إنها ضلمة .. فمش هتفرق في حاجة لما الواحد يفتكر موقف وحش ويكتب عنه او يحط عنه حتي تلميح
أو يفتكر حاجة حلوة وتخرجه من الأحداث الزفت اللى بيشوفها وبتقف فى سكته
ومعنديش ادني إستعداد أشرح وأقول الموقف حلو ولا وحش ولا منيل بنيلة
نبتدي بموقف بسيط :)

نختصرف فى جملة من الأغنية الشعبي الهايفة : بنت حلوة



كنت كل ما أسمعها (بحكم إن ليل ونهار كانت شغالة فى الكانتين وكل ما اروح اجيب حاجة اسمعها واشوفها اجبار ) مبركزش غير فى جملة واحدة بس وكنت بسرح معاها ياما مع الشاي والسجاير اللى كانوا فى إيدي طول الوقت  ((علي جسمها ترسم تاتو )) يخرب بيت الجمال يمكن لما يبقي تاتو إنت اللى ساعدت فى عمله ويمكن أنت اللي رسمته كمان :D أو يمكن صورته أو حتي كان مجرد شخبطة بالقلم الجاف علي إيد حد غالي عليك أو علي حاجة تانية ...


***

كنت بفكر ياما إن في ناس حلوة بالفطرة
ناس طعمهم حلو من كلامهم وأسلوبهم والتاتو بتاعهم اللى طالع لك فى كل حتة واللى بيبقي كلمة أو صورة أو حتي فكرة متعبر عنها بشخبطة حلوة تتوه فيها زي ما بتتوه فيهم ...
ويمكن فى جملة بيقولوها وبيعبروا بيها عن حاجات تتكتب فى قصايد
ويمكن فى نظرة عين بتسرح وتقول قد إيه في حاجات حلوة فى الدنيا دي فى يوم أجازة أو في ليلة سهر وعشق
ويمكن فى حاجات أحلي بكتير بس الإنسان بغباوته بيسعي دايما زي أما يكون متخلف عقليا علي إنه يضيعها
(( علي جسمها ترسم تاتو ... تعمل لوك مفيش كده أخوه ))
(( عاملة إيميل وإتنين وتلاتة ... واخدة الدنيا بكل بساطة ))

تصدقوا كان فعلا تاتو حلو :D



تصبحوا علي خير 
هروح أعافر أنا بقي :D
#خليها_ذكري
#تاتو
شاب فقري

الأربعاء، 22 يوليو 2015

علي قد حلمك

بما إني مصدع بعد يوم شاق جدا فاللى أقدر أقوله بإختصار شديد 
أنت علي قد حلمك 
علي قد ما حلمك كبير علي قد ما أنت كبير 
كل واحد بيحط لنفسه هدف فى الحياة وبيسعي له 
لو الهدف بسيط هتسعي له وتتعب له بشكل قليل ولو الهدف كبير ؟ هتتعب بكل طاقتك وهتحقق حتي فى حالة فشلك نتيجة غيرك بيعتبرها قمة وبرده هي نتاج كويس لتعبك الكبير دا فإحلم وإسعي والله المعين
اللى بيحلم بكل طاقته وبيتعلم لغة وبيقدم فى جامعات وبيسعي بكل طاقته عشان يخرج من هنا وبيعمل اللي عليه وبياخد بالأسباب
أحسن بكتير من اللي لسه عايش فى وهم إن هنا هيقدر يبدع أو يطور من نفسه أو يعيش مستريح 
أنا مبسوط باللي بعمله وبالتعب دا كله ويمكن دا اللى مهون عليا 
بالاضافة طبعا للبنت الأمورة اللى قعدت تعاكسني النهارده :D
الحمد لله علي نعمة السعادة والفرحة بكل خطوة فى الطريق مهما كانت متعبة ومقرفة 
طريق طويل ومليان مشاكل وتحديات بس أنا لها إن شاء الله 
" إحلم  " حضرتي :D
" وعلي قدر حلمك تتسع الأرض " درويش
تصبحوا علي خير عشان بكره يوم طحن 
كنت ناوي أكتب بوست حلو بس مش وقته 
الصورة من المسلسل الرائع Game Of Thrones  اللى بحبه ومستني الجزء الجديد منه بفارغ الصبر :D
الصورة لدينيريس البنت اللى بتحلم وبتحقق أحلامها ...
بيس بقي :)
شاب فقري

الجمعة، 17 يوليو 2015

ليلة العيد يا حبيبتي ( ولسه الحلم )

" ولسه الحلم فيك عايش ومتهزش "

فات ناس كتير أوي علي حياتي وعلي ليالي العيد ودايما بقول ان العبرة فى الرحلة والعبرة فى اللى بتتعلمه وبتقابله فيها , بعد كل السنين اللى فاتت أقدر أقول إني راضي وسعيد جدا باللى وصلت له , قدرت ألاقي المرسي والعيلة وكل اللى بحلم بيه , أينعم لسه فى خطوات كتير ولسه في إلتزامات كتير جدا جاية وتعب و جهد لا يعلمه إلا الله لكني فخور بإني وصلت للحظة دي , فخور إني قدرت أحافظ وأحب وأقدر حد للدرجة دي ...
مبسوط ولله الحمد وشايف المستقبل والعمر الجاي صعب وكله مشقة وتعب فى بلاد غريبة لكنه برده يظل متعة عظيمة الحياة مع حد بيحبك ويقدرك وبتتمني له كل خير ومبتتمناش من الدنيا إلا سعادته , أيوا اللي فات فيه حاجات كتير تقرف ومواقف تسد النفس وإكتئاب مبعرفش أوصفه ووجع متقدرش السطور تحكي عنه ولا تقول أثر فى الواحد إزاي لكنه بكل بساطة يظل فخرعظيم ليا إني قدرت أعدي كل دا وقدرت أحافظ جوايا علي حاجات كتير 

الحلم أو الفكرة مبتموتش طول ما فى حد مؤمن بيها وبيتمناها وبيستني اللحظة اللى يقدر يحققها ...
ويمكن دا اللى مخليني دلوقتى بكتب وبكمل الطريق حتي لو فى حاجات وناس كتير خسرتهم إني مازلت مؤمن بالحلم بتاعي 
مؤمن بالأفكار اللي عايش عشانها والحياة اللي إخترتها ومعنديش لحظة ندم تجاه أي شىء ولا أي شخص لأني الحمد لله عمري ما ظلمت حد 
من يومين كنت بكلم صديقة غالية عليا أوي وبحكي لها حكاية قديمة أوي ولقيتها فجاة بتنصحني وبتديني حلول الصراحة فى الاول إتعصبت وبعدين إبتسمت وقلت لها إني مش محتاج حلول وإني عايش مبسوط وإني لو مستني شىء من أي حاجة فاتت عليا فهي عدالة ربنا اللي بتصحح كل شىء ولو بحلم وبتمني شىء فهوا اللحظة اللى أبص فيها علي كل اللي فات عليا وأبتسم وأمشي بلا عودة ...

حبيبتي 
الدنيا هنا بقت ضيقة أوي علينا وعلي أحلامنا , طبعا عارفة بتعب في سبيل إني أحقق حلمي وأبني حياة إزاي , مش مستني منك حاجة ولا عايز منك حاجة ولا بتمني غير قربك ووجودك الدايم جنبي إنتي السند اللى دايما إستنيته إنتي الفتاة المستحيلة اللي قدرت تبقى موجودة دايما وتصبر وتستحمل وتفهم وتقبل وتتعامل وتسيطر فى بعض الأحيان وتطلب فى أحيان تانية وتخنق :D عادي جدا علي رأي ديكستر لما قال إن الحياة مش لازم تبقى رائعة وعظيمة وبالجمال الخرافي لكن بتتعاش والأحلي فيها بكل مشاكلها وصعوباتها إننا نعيشها ونعدي ... عيد سعيد عليكي وربنا ما يحرمني منك أبداً 

ورحمة الغالية فى تربتها أنا سعيد :)
ويمكن عشان كدا مبقتش عايز أكتب هنا وبقيت بحب أكتب وأتكلم في عالمي الموازي للمدونة دي فى دنيا بعيد محدش فيها يقعد يسأل علي كل التفاصيل ويتحشر ويخنق :)
الله يرحم كل حاجة حلوة واللى جاي أنا اللي هقدر أخليه أحلي وأجمل 
كل سنة وإنتوا طيبين
برغم إني بتخنق من مناسبات الأعياد بس دا بوست بكتبه كل عيد ومينفعش أبقى فى البيت بعد ما خلصت جيش وقدام النت ومكتبش 
هابي عيد عليكم 
شاب فقري
** العنوان بتاع البوست من عبارة عن سطر صغير من قصيدة من مدونة دخلتها من تمان سنين
وعلقت القصيدة والسطر دا معايه ...


الأحد، 12 يوليو 2015

نسألك العون

الحماس 
مليون حاجة لازم تتعمل فى نفس الوقت 
وإختيارات لأكتر من طريق بيودوا نفس الوجهة 
بيتهيألي الواحد يفضل فى الطريق اللي راسمه لنفسه أفضل 
الطريق الرئيسي دايما بيوصل أسرع وبيبقى أحسن علي نفسية الواحد 
الطرق الفرعية هتنجز وتختصر وقت كبير بس مش مطمن لها للدرجة اللى تخليني أمشي فيها 
ربنا يسهل فى الكام مليون حاجة 
ويسهل فى اللى جاي اللي هيخلي الواحد يبص عاللى وراه ويضحك بمزاج :)
يارب أسألك العون ...
ياتري الواحد لو طنش كل الأحلام والخطط اللي ماشي فيها وعاش حياة تافهة فاضية زي الأشكال الزبالة اللى مرت علي حياة الواحد ومكملة حياتها وسايبه نفسها بين إيدين النصيب والمجتمع ياتري ساعتها الواحد كان هيبقى مبسوط ؟؟؟
دا اللي بيفرق بين شخص وتاني دايما ... اللى عنده حلم وهدف واللي معندوش غير القعدة والمشي فى نفس الطريق الأهبل اللي رسمهوله غيره وفى الىخر يفشل برده أو يعيش أكليشيه كدا بلا معني لكلامه وبلا معني لحياته وعايش فى الملل فى حين الدنيا مليانة حاجات أروع من إن الواحد يضيعها 
يمكن الحياة البسيطة دي متخلقتش غير للناس اللي بياخدوا علي دماغهم ويقولوا امين ويمشوا جنب الحيط والحمد لله إن الواحد مش من الناس دي :)
الحمد لله علي كل حال 
ربنا يسهل فى الجدول الزمني علي كل حال :D
الحمد لله وصلت لنقطة الصفر (ممكن أبقي أكتب عن دا بعدين ... أو مكتبش عادي يعني :D ) وبدأت أخد خطوات وعن قريب هوصل للرقم واحد :)
الحمد لك يارب علي توفيقك ليا
شاب فقري

#thanks_to_my_Doctor
#Dream 
#غني_لرفيق_الدرب 
#وبنعافر

الجمعة، 10 يوليو 2015

أنا من هؤلاء و حقائق و تغيير فى حياتي ورغي كتير

النقطة الأولي :
واحد مع واحدة قعد يحكي لها ويوهمها عن ان فى شر رهيب وأذي كبير جدا فى فلان 
البنت عارفة فلان كويس جدا جدا جدا وبالتالى مش مصدقة 
البنت فى الآخر كرهت فلان وإعتبرته محور الشر بالرغم من إن فلان معملش حاجة 
والعيب كله عاللى حكي وقعد يوهم مش علي فلان اللى مأذاش ولا عمل الغلط 
لكن الإنسان دايما بيحب يفضل عايش فى الوهم 
بيحب دايما يوهم نفسه إنه كان مجبر عالإختيار الفلاني بالرغم من إن كان قدامه كل الإختيارات 
بيحب يضحك علي نفسه ويقول أنا كويس مش أنا السبب أو لو حتي لو كنت أنا اللى عملت الغلط ففلان هوا السبب 
تهرب منين من حقيقتك يا إنسان يا معتوه يابن اللذينة؟؟؟
حتي أقوي التخيلات مستحيل تحميك لما تبقى عارف حقيقتك وحقيقة اللى حواليك وحقيقة الشخص الوحيد اللى وقف جنبك وساعدك فى حياتك كلها ...

زمان كان يفرق عندي إني مكانش ينفع أكتب بوست زي دا لكن دلوقتى بعد ما مر الزمن دا كله وحاجات كتير وضحت وظهرت للنور فحاجة تسعدني إني أكتب وأبرأ ساحتي يمكن قدام الناس لأن ربنا عالم بكل اللى عملته 

أنا من الناس اللى مبتضحكش علي نفسها وتبرر الغلط انا عارف الغلط فين وحر فى إختياري وفى إني أعمله أو لاء 
أنا من الناس اللى بتسمي الحاجات بإسمها وبتحس بالحاجات اللى بتعيشها أوي مش محتاج أقنع نفسي بوهم معين عشان أقدر أعمل كذا وكذا وكذا 
أنا من الناس اللى بتعمل الغلط وبدون ما تكره نفسها لأنهم ببساطة عارفين إن دا إختيار ومتحملين النتيجة قدام ربنا و بيعملوا الغلط عشان يمنعوا نفسهم عن غلط أكبر ... يمكن كمان الواحد بيقاوم بس فى الآخر لما بيعمل حاجة بيبقى مسئول مسئولية تامة 
انا من الناس المؤمنين بحرية الآخر يعني اللى قدام يعمل اللى هوا عايزه فى نفسه وفى جسمه وفى حياته وبدون أحكام مني , طالما مفيش أي إلتزام تجاهي مادي أو معنوي فمن حق اللى قدامي يعمل ما بداله بدون ما أقعد أسب له وأشتمه واهينه وأرعبه وأهدده والهبل دا الحمد لله انا فى غني عن كل العته دا
أنا من الناس اللى مبتحبش حد يحكي عنها ولا بتحب تحكي عن حاجة لحد وأي تفاصيل فى حياتي فأنا بشوف إنها تخصني وبس 
أينعم بكتب عالمدونة لكن دي مجرد قشور بسيطة جدا من حياتي 
أعظم مشاكلي فى إن الناس المعاتيه ولاد الهبلة بينسوا أنا مين ... فبيزودوها وأنا بستحمل وبقدر وبعاني بسببهم وبتأذي وبرغم ذلك بحافظ وبلتزم بعهودي وفى الآخر يقولوا عليا وحش ويتمنوا لى الموت 
لاحظوا يا أعزائي إني أكتر من يعرفكم ويعرف حقائق كتير جواكم وحقائق أكتر عن تفاصيلكم و مش محتاج لزيف ووهم اهبل بترسموه :)
***

النقطة التانية 
اللحظة اللى بتغير منها حياتك بالكامل انا وصلت وعديت عاللحظة دي تقريبا كذا مرة وغيرت حياتي كذا مرة 
يمكن الفترة دي هيبقى أهم تغيير واللى مش هسمح لحد يبوظه وهتبقى أهم خطوة فى الحياة 
أنا سعيد بقدرتي عالإنجاز حتي لو كانت بسيطة وسعيد بثباتي علي مبادىء كتير فى حياتي الشخصية وسعيد كمان بقدرتي علي تخطي كل العوائق اللى فاتت 
بيحصل تطورات وتقدم كبير جدا فتى حياتي طول الوقت بس مبرضاش أكتب لأن طبعا زي ما قلت قبل كدا الواحد لما بيكون مبسوط بينشغل بالسعادة ومبيكتبش غير وقت الزعل 
انا بكتب هنا النهارده بما اني مقاطع الفيس فترة 
فقلت هنا الأحلي بقى والأروع والروقان بتاع زمان 
بقالى كتير مكتبتش 
رمضان جه والعيد قرب والذكريات كتير 
الذكريات الحلوة سواء ببنت جميلة سهرانة للصبح بتحكي حكايتكم :D
او ببنت تانية وحكايات أروع وسايبه الدنيا كلها عشانك :) وجنبك ومن جواها أوي عارفة هي بتنتمي فين ؟
أو ببنت تالتة عارفاك حتي نظراتك عارفة معناها إيه وكل نفس بتاخده :)
حكايات كتير 

كل سنة وانتم طيبين :)

شاب فقري

#تيريون

الأحد، 21 يونيو 2015

أنت لا تعرف شيئاً

القاعدة الأزلية الأبدية اللولبية الجهنمية اللى عمرها ما فشلت ولا طلعت غلط أبداً :

- اللى جاي أحسن و أكتر من اللى راح 


والواحد عرف دا بعد ما فات عليه كتير وخسر كتير وكان دايما بيلاقي أكتر وأحسن :)

يبقى الواحد يقدر يقول القاعدة دي علي الملأ ويأكد إنه فى كل اللى راح لا أذي حد ولا سبب ضرر لحد ولا إعتدي علي خصوصية حد ولا إفتري وظلم حد ولا فكر إنه يجبر حد علي حاجة ولا نصح بالغلط ولا شاور علي طريق غلط ولا حتي شد لسكة زفت 

طالما أنت كويس بتراعي غيرك وبتعامل غيرك زي ما بتتمني يعاملك يبقى أكيد حتي لو جالك الوحش هتقدر تعرفه بسهولة وهيمشي بسهولة أكتر من السهولة اللى جه بيها ولو جالك حاجة كويسة هتعرف إزاي تحافظ عليها بأفعالك وتصرفاتك 

اللى يفرط فيك خسران واللى يشمت فيك ميستاهلش تفكر فيه واللى يكدب عليك ميستاهلش تسأل عليه واللى ميقدركش ميستاهلش حتي كلمة منك 

الحمد لله علي نعمة الثقة بالنفس اللى بتقلب غرور أغلب الأحيان لكنها مبتبقاش تكبر أبدا :D

بس خلاص 

شاب فقري

من وحي السهر فى رمضان :)

إزيك ؟

- إزيك يا بنتي ؟
-- أحسن منك
- أكيد وإلا مكنتش كلمتك
-- كنت هتكلمني غصباً عن
- طيب عاملة إيه ؟
-- قول أنت عامل إيه ؟
- عايزين نتقابل
-- إمتي ؟
- الأسبوع الجاي
-- ودا إزاي يعني ؟
- يعني شوفي اللى يناسبك بقى تنزلي القاهرة أو نتقابل فأليكس كالعادة
-- هفكر
- ياربي
-- لازم أغلس .. مقدرش مغلسش ولا ألامض دا فى تكويني
- طيب
-- مالك بقي ؟
-هتعرفي لما تشوفيني
-- أوك
- سلام
-- بقولك
- إيه ؟
-- إفتكر أنت مين وخليك أنت فى قوتك لأن محدش هيتحرك عشان يعملك حاجة ... إفتكر دا لحد ما أشوفك
- إشطة
--باي
- بيس يا جميلة

الجمعة، 19 يونيو 2015

مربوط بأستك

قبل ما تقرا البوست لازم تعرف كام نقطة عشان تفهم كلامي :
أولا : معهد جوته هوا المكان الوحيد فى مصر اللى معتمد لدراسة الالماني وله فروع فى كل أنحاء العالم وتابع للخارجية الألمانية 
ثانيا : التقديم له مواعيد يعني مش فى أي وقت تقولهم خدوا فلوسي وعلموني وادوني كورس لاء مينفعش , قدامك فى السنة كلها أربع مواعيد بس للتقديم :D
ثالثا : مينفعش تقدم علي دراسة أو سفر برا بدون ما تكون عارف اللغة لأنك حياتك هتبقى فى منتهي الصعوبة وتكلفة رهيبة عليك 
بس كدا نبتدي بقى 
***
كنت فى معهد جوته ومعايه الفلوس عرفت أتصرف فيها والحمد لله وبقالى اكتر من خمستاشر يوم مستني ميعاد التقديم لحجز أول كورس ليا بحيث أبقى وقفت عند نقطة الصفر , وصلت معهد جوته فى الدقي حوالى الساعة اتناشر ونص وأخدت رقم لقيته 385 قلت عادي وطلعت شوفت المواعيد اللى متاح فيها الحجز وكانت المفاجأة ...
فى كلاسات إتملت ومواعيد إتملت وبصيت فى العداد لقيتهم لسه موصلوش لرقم 110 :D
وبعدين قابلنا شخصية محترمة جدا من القائمين علي المعهد وقالت لنا إن المتاح 200 فرد بس فى الحجز لمستويات المبتدئين :D
قالت جملة مفهمتهاش غير فى آخر اليوم قالت : بس أنت حط رجلك 
إنت مجرد ما بتتنقل من نقطة الصفر بيبقى سهل تعمل manage للوضع بتاعك وتنقل نفسك لمستويات تانية 
كنت سعيد جدا بكلامها بس برده المواعيد مش مناسبة 
قدامي إمتحان الإنترناشيونال اللى حجزته فى خلال شهر وقدامي شغل وقدامي كورس متقدم فى مجالي فى الشبكات والاي تي 
يبقى لازم أظبط المواعيد علي كل دا 
كنت بالظبط حاسس زي اللى واقف فى وسط مفترق طرق وقدامي ستين ألف طريق ولازم أمشي فى أربع طرق فى نفس الوقت 
الموضوع ملخبط ويخنق فلقيت قدامي وقت فروحت المركز الثقافي الألماني ( تابع للسفارة برده ) لقيتهم نقلوا مكانه لمدينة نصر والمنيل فقمت متصل ولقيت إن أقرب حجز هيكون بعد رمضان 
طيب وبعدين هعمل إيه ؟؟ هل هستني شهر كامل مبتقدمش فيه فى حلمي اللى عايز أكمل فيه ؟
طيب والشهر دا هيخلي حاجات كتير أوي تتأخر 
روحت جوته تاني لقيت اللى باقى ميعادين وغاليين جدا ومش مناسبين ليا بأي شكل ومينفعش أدخل فيهم هبقى بلخبط نفسي عالفاضي 
ومن هنا بدأ إحساس الرفض 
إن معهد جوته مش صعب عليه يجيب مدرسين أكتر ويكونوا تابعين له ومعتمدين ولا صعب عليه يزود أماكن الدراسة ولا صعب عليه ي handle العدد الكبير دا من الناس اللى جايين يقدموا 
فكرت في النقطة دي لقيت إن الفكرة كلها إنها مصفي بالمعني الحرفي للكلمة 
مصفي بيفوت منها اللى مستعد يضحي بوقت وفلوس وشغل ومواعيد متعبة 
بحيث لما توصل للدرجة الأخيرة وتيجي تقابل الوحش وتنجح 
يبقى فعلا أنت تستاهل مش مجرد شخص وخلاص عايز يسافر أو يكمل دراسة برا ومعندوش عزيمة


الفكرة مش رفض أبدا 
الفكرة إن لو انت عايز تنجح هتضحي وتزنق نفسك وتتعب 
لو عايز تحقق حاجة هتخلق الطريق لنفسك 
ومن هنا جاتلي فكرة تانية للدراسة بعيد عن معهد جوته 
أبتدي وأنطلق لحد ما ربنا يسهل وأمتحن وأخد شهادة من جوته بالمستوي اللى وصلت له واللى محتاج له للدراسة والسفر 
من هنا بكتب البوست المفاجىء دا لسبب بسيط جدا 
بفكر نفسي وبفكر غيري بجملة كتبتها هنا زمان قالها راجل فلاح عجوز يبقى جد أعز صحابي 
قال : الناجحون فى الحياة أناس إن لم يجدوا الظروف ملائمة صنعوها .
ربنا يقدرنا ونوصل علي خير ونعدي من الكام مصفي الجايين 
ونقطع الأستك اللى مربوطين بيه هنا ونعرف ننطلق منبقاش زي اللى واقف يتفرج عالدنيا من ورا القزاز وبيقنع نفسه إنه كدا كويس وتمام
يارب إديني القوة أضحي بالحاجات اللى أقدر أعيش من غيرها فى سبيل تحقيق حلمي 
يارب إديني القوة أعرف الحاجات اللى مقدرش أعيش من غيرها ومضحيش بيها مهما كان السبب 
يارب 

شاب فقري

الثلاثاء، 9 يونيو 2015

يو آر نوت ألون

دايما البداية صعبة
مببقاش عارف أبتدي الحكي منين
هوا الحكي هيبقى ليه أصلا ؟؟؟
إفتكرت ... تسجيل ليومياتي وأحداث حياتي اللى بتجري وتخليد للحظات لازم تعيش للأبد
الفترة اللى فاتت كانت مفتح عينيا عالآخر ومتابع العالم كله ما عدا مصر طبعا عشان مكتئبش وأعصابي تتعب
العالم كبير أوي لكنه فى نفس الوقت واحد
طيب عشان محدش يتوه هنقسم البوست أجزاء

الجزء الأول : الأرض كوكب واحد
الواحد لما بيفكر فى السفر وهوا بيعمل أي حاجة خياله بيسرح وبيتخيل إنه خرج من البلد دي ولكنه بيكتشف شىء مكانش واخد باله قبل كدا
هتروح هناك الأرض هي الأرض والشمس والهوا وكل حاجة وحواليك بشر بيتكلموا لغة مختلفة وفى كلام كتير بيقع منك فى كلامهم :(
فبتبقى واقف زي العبيط تتفرج علي كلامهم لكن يا صديقي هي هي نفس الأرض
الحلم بالتغيير بتغيير المجتمع اللى انت عايش فيه
تروح لبلد مفيهاش أصل فلان دا خريج كذا وأصل فلان أحسن من فلان لأنه خريج كذا أو معاه شقة أو فلوس او أهله أو أو
مفيش حد هيسيب حياته الشخصية ويدخل يفعص فيك وفي خصوصياتك ويزنقك فى كورنر و قالب معين ويجبرك زي الجزمة تعيش فى إطار معين
العالم برا مختلف لأن فى إحترام للحريات لأن فى مفهوم الوطن اللى بيحتوي الناس وبيدوب فيه الناس علي إختلاف ثقافاتهم
متفقين علي مجموعة من الأفكار والقوانين والمبادىء عشان يقدروا يعيشوا فى سلام
وفى حالة إختلاف حضرتك مش هتموت ولا تعتقل ولا تتحبس ولا يتاخد منك حقك ويقولك أصل اللي خريج جامعة حكومية مينفعش يشتغل هنا ولا اصل انت بتفهم فى مجالك وبتقدر تقوم بشغلك علي أكمل وجه لكننا عايزين خريج كلية بتاع
مفيش تعنتات ولا إجبار
فى حرية يتبعها مسؤلية لازم تستوعبهم الإتنين قبل ما تسيب نفسك تعيش زي البطيخة فى وسط الناس بتتمتع بحقوقك ومن جواك مازال الراجل الشرقي عايش ومعشش وبيحكم عالناس وبتقول علي زميلتك فى الشغل شمال لأنها مصاحبه واحد و تقول علي جارك إنه غبي ومتخلف لأنه يختلف معاك فى المعتقد
فى حرية

الجزء التاني : الحالمون فقط يغيرون العالم
الإنسان الحالم هوا الوحيد اللى يقدر يغير العالم لأنه عنده رؤية ونظرة للمستقبل محدش قادر يوصلها بعقله المحدود
اللى اخترع المش عارف إيه واللى واللى واللى
واللى راح عمل فيلم بيتكلم فيه عن الموبايلات والإلكترونيات قبل إختراعها بكام سنة
واللى إتخيل التنانين ورسمها علي ورق وقعدت ألف سنة كحلم للإنسان فى الطيران :D
وهكذا
الشخص الحالم هوا اللى بيفتح الباب للعالم كله ولكل الدنيا عشان يتبعه ويمشي وراه
ويقدر ينقلهم إيمانه وحلمه حتي لو كان دا شىء مستحيل لكن يكفيه إنه حلم وسعي لدا

الجزء التالت : مفيش مستحيل يا كريم 
لما وقفت مع الدكتور أحمد وإتكلمت معاه من فترة قالى مفيش مستحيل
دايما فى طريق
الدكتور أحمد كان بيتكلم بلساني , فاكر لما كنت فى أسوأ فترات حياتي فى إدكو وكنت بكتب فى النوت بوك إن دايما فى طريق وبكتب لنفسي بفكرني إن كل دا هيعدي وينتهي ونعيش حياتنا
أيون حققت حاجات لطيفة فى حياتي كنت بحسبها من المستحيلات لكن مازال أمامى العديد من الأشياء اللى بسعي لها ومش هبطل أسعي لها حتي لو هموت فى الطريق
ما طبيعي إن البطل يموت ما كلنا هنموت ولا ايه ؟
لكن قبل ما يموت  لازم يقوم بدوره كبطل الأول :D

الجزء التالت : مبحبش الإنتظار
مستحيل أبطل أكره الإنتظار
باقي علي بداية الطريق لحلمي ونقطة الصفر حوالي عشر تيام
عمال أفكر هيعدوا إزاي وأحسب وأخطط وحاسس بخنقة شديدة
ولهفة وحماس وياريت بقى اليوم دا ييجي عشان أقدر أقول إني خلاص واقف علي نقطة الصفر :)
شىء عظيم إنك تقف علي نقطة الصفر
أهوه أحسن بكتير من تحت الصفر :)

الجزء الرابع :خنقة الإنتظار بتوقع فى كوارث 
إنتظار الواحد لشىء ما بيجيب كوارث لا حصر لها ... مرة خناقة ومرة تانية مشكلة ومرة تالتة علاقات مش فى أوانها 
دا غير التعب النفسي 
زمان كنت بقول الواحد ممكن يستحمل اي حاجة 
وأثبتت دا لنفسي فى السنة اللى فاتت فى القرف اللى عشته واللى خلاني أبص علي ناس كتير علي أنهم فرافير وأطفال :D
طبعا نقدر نعدي من الإنتظار ونتعب فى الوقت دا عشان نحقق حلمنا بس اللى لازم نقاومه بجد هوا الخنقة وان الواحد يقوي عزيمته ورغبته فى حلمه 

الجزء الخامس : الموتي لا يتلون الحكايات 

الجزء السادس : انا حالم ومش لوحدي 
حواليا كتير بيشاركوني الحلم وبيتطلعوا للمستحيل زي حالاتي لكن من السهل الواحد يحقق دا 
فى مكان ما هيكون فى شخص تاني عنده إرادة وبيتعب زيي 
يمكن نتقابل عند لحظة تحقيق الحلم او بعدها بسنين 
لكن لو وقفت مكاني 
زي ما ناس تانية وقفت مكانها هلاقى الوقت عدي ومفيش حاجة اتغيرت 
واللى اتغير هوا الوقت وبس والظروف بقت اصعب 
يعني الواحد يستغل الوقت اللى قدامه مش فى حاجة واحدة بس لكن فى  أكتر من حاجة :)

وعمري ما هبقى لوحدي طول ما الناس اللى بحبهم وبعتمد عليهم دايما جنبي 
لأني واثق فيهم وفى وجودهم الأبدي جنبي مهما كانت ظروفهم أو أحوالهم أو المشاكل اللى هما فيها 
شكرا يا عزيزتي :)
شكرا لانك هنا :)

خير إن شاء الله 

بقالى كتير مبكتبش يمكن لأني فرحان وعايش حياتي فى إستقرار وسعادة ودا بيخلي الواحد مش مستعد يحكي لحد حاجة :D
ولا مستعد يكتب , بيعيش الحياة وبس :)
ملحوظة : البوست إنكتب فى أسبوع :D يعني باقى علي بداية الحلم دا تقريبا اقل من أسبوع :D


شاب فقري

الجمعة، 5 يونيو 2015

loved

يتبع ..

شاب فقري

الخميس، 14 مايو 2015


No 
Risk
 No
 رزق
#Fact يا بيبي :D

الأحد، 10 مايو 2015

Father 1

العهود بتحمل معاني وقيم وإلتزام للي بيدرك معناها فقط 
كونك تحلف علي حاجة أو توعد بحاجة أو الاخرين يتعشموا فيك وانت تمنحهم اللى بيتمنوه دا بيخليك ملتزم تجاههم باللى إتعشموا بيه 
كونك أب أو سند أو أخ أو عشيق أو صاحب أو أي حاجة مهما كانت بتخلي عليك مسؤلية زي مثلا :
- مسؤلية البناء 
إنك تبني اللى قدامك كويس وتعلمه وتعرفه كل حاجة وتمنحه حتي أفكارك ومجهودك عشان يعلي لفوق ويقدر يبقى شخص حقق حلمه 
- مسؤلية المساعدة 
إنك تساعد بدون قيد أو شرط وبكل كيانك فى أي مشكلة حتي لو ملكش يد فيها 
- مسؤلية التواجد 
إنك دايما تبقى موجود مهما كانت الظروف أو المشاكل أو العوائق اللى بتمنع أو مهما كانت فأنت بتبقى موجود دايما 
- مسؤلية الفرصة التانية 
دايما لازم تمنح فرص مهما كنت مخنوق أو فاقد الامل , علي حسب رغبة اللى قدامك سواء فى البعد وبناء حياة جديدة بدون ما تعطله , وفى نفس الوقت تمنح فرصة لو حب يتسند عليك وتساعده
- مسؤلية المنبوذ 
تسمح لغيرك إنه يخليك منبوذ وملعون ويطلع عليك كلام ويقول إنك وحش ويعتبر إنك فيك العبر عشان يقدر يسامح نفسه ويكمل حياته , ويطردك لمجرد انك مش عايز تواجهه بحقيقة مرة عشان متألموش 
إنك ترضي لنفسك المكان الوحش عشان خاطر متزعلش حد أو حد غيرك يبقى فى المكان دا 
مسؤلية الباب المفتوح :
دايما فاتح بابك ومبتطردش حد ولا بتشمت فى حد مهما كان السبب 
- مسؤلية الطبطبة وعلاج النفوس المريضة 
مهما جري لازم تساعد وتعالج وتعوض اللى جري وتمنح الدوا حتي للي ميستاهلوهوش حتي لو مآمن اللى قدامك أول ما يبقى قوي هيدوس عليك
- مسؤلية الصبر 
مسؤلية إنك تصبر علي غباء الآخرين وعلي الأفعال الوسخة اللى بتعك الدنيا وعلي الحاجات اللى بتوجع وعلي اللى بتساعده وبيحاول بكل طاقته يوجعك , إنك تصبر لحد ما حاله ينصلح أو حتي ما يقدر ينفع نفسه
أما عن حقك أو عن واجبات الآخر أو عن ظلم الناس ليك 
فأنت تعتمد عالعدالة الإلهية 
وإفتكر دايما : الوحش هيأذي نفسه بنفسه بدون أي فعل أو كلمة منك , طالما وحش فيبوظ حياته ويأذي نفسه بنفسه 
وفى الآخر لا أملك إلا إني بعتبر نفسي أب لناس كتير حواليا 
ناس بحبهم وبتمني لهم كل خير مهما اتحولوا ومهما بعدوا ومهما أثروا بالسلب فى حياتي أو أذوني او حتي نسيوا أنا مين 
كريم 
مش عارف ليه الناس بتنسي ؟
اللى عنده إجابة ياريت يقولي ...
يمكن فعلا الفترة دي بحاول أفتح عينيا وأشوف العيال الحلوين حصلهم إيه ؟ وبدور علي حد أتبناه من جديد ...
يمكن ... كل شىء محتمل وقابل للحدوث 
يتبع... يوما ما
شاب فقري