الجمعة، 31 يناير، 2014

إختيار

" سأموت وحيداً و عارياً لأن الله ليس له وجود "
رضوي عاشور / ثلاثية غرناطة 


***
عاشق سارح فى الملكوت , ميهموش العمر يفوت , يدفع فى الحرية حياته , لو إتكتف فى لحظة يموت 
ريهام عبد الحكيم / عاشق سارح فى الملكوت 
***
أنا مش عارف ليه ؟
هوا السؤال الأقدم فى التاريخ فعلا هوا ليه ؟؟  ولا ياتري كان (إزاي ) ؟
مش عارف الصراحة بس السؤالين أقدم من بعض ؟
ليه كدا يارب ؟
ليه بنخسر إيماننا ؟ هوا فعلا الإيمان ممكن نخسره ؟ ممكن نفقد إيماننا بشخص ما ؟ ممكن نفقد حاجة بالقوة دي ؟؟ طيب يارب هوا ليه بنفقد إيماننا بيك وبنضيع ؟ أو بندور عليك كل شوية بحيث نحس إننا غلط مليون فى المية لأن كل الناس اللى حوالينا ثابتين علي نفس المبدأ ومآمنين بيك ؟ بس ياتري هوا الإيمان بيك مجرد كلمة بتتقال ؟ هوا مش برده الإيمان بيك حاجة أكبر من الكلام ؟؟؟ 
طيب يارب ليه مبتتدخلش فى كل الأحوال السودا دي ؟ هوا إحنا مش عبادك الصالحين ؟ ولا حتي لو كنا مش صالحين هوا إنته مش كريم ورحيم يارب وعالم باللى فينا ؟ ليه مبتظهرش فى الأوقات دي اللى بتبقى فيها الصدمات أقوى من إن قلوبنا وعقولنا وإيماننا يتحملها ؟؟؟
يارب أنا مش عايز أجي الدنيا وأمشي وكأني مجيتش وكأني كنت مجرد إسم ؟ يارب أنا مش عايز أكون مجرد تلات ورقات : شهادة ميلاد وبطاقة وشهادة وفاة , انا عايز أعمل حاجة , فى ناس بحياتها بتحيي أمم وبترشد ملايين من بعديها وفى ناس موتها بيصحي أمم وبيحرك ملايين وبيسيب علامة فى التاريخ 
أنا مش عايز أروح أعزي صاحبي وأقوله البقاء لله , مبحبش المواقف دي ومبقدرش أتكلم فيها وبحس إن كل كلمة ممكن تتقال ما هي إلا جملة مبتذلة مينفعش تتقال , يارب أنا ببقى فاهم اللى حاسس بيه واللى حاسس بيه أى كلمة هقولها جنبه هيبقى ملهاش أى معني وهحس إني عاجز 
يارب أنا عارف إن المواقف الصعبة بتصنع الرجال والأيام السودا بتخلي الواحد يتعود عالمر عشان أكيد فى حاجات صعبة لكن لما بنقع ومبيبقاش فى أي حاجة تقول أي حاجة ولا حتي علامة ولا إرشاد نعمل إيه ؟
يارب أنا عارف إنك فى كل مكان وحوالينا بس يا هلتري دا هيخليني مش لوحدي لأنك علي طول معايه ؟ ما إحنا بنتوجع وبنكمل وبنحاول وبنحاول لحد ما نيأس تماما وندور علي طرق تانية لأحلامنا ونطلع من عزلتنا بكل وجعنا فاكرين إن اللى بنحبهم هيطبطبوا علينا او حتي الناس اللى عملناهم ووقفنا جنبهم هيعملوا أي حاجة لكن بنلاقى الشر فى نفوس الغلط والتراكيب الغلط فى النفوس اللى بتضيعنا أكتر وأكتر 

يارب أنا بشكرك علي كل عقبة عشتها عشان العقبات دي قوتني وخلتني عارف أعمل إيه وخلتني أنا وفى نفس الوقت مع كل عقبة كنت بزداد تصميم وقوة رهيبة علي إني أكمل وأمشي فى الطريق الصح أو يمكن فى الطريق بتاعي اللى بتمناه حتي لو كان غلط بس يارب مفيش فى إيدي حاجة أعملها عشان أخليه صح .... أنا مجرد إنسان مش هغير موازين الكون 
هستعمل حقي فى الإرادة الحرة ومش هغير الحقايق مش هقول عالغلط صح بس هختار الغلط وأنا متحمل مسؤليته أيا كانت لأني عايز دا 


***
العزلة والوحدة مش الصحرا اللى بنروحها لما بنيأس ,مش بنروحها عشان نندفن 
العزلة والوحدة لكل الناس لكن كل واحد بيستعملها بطريقته 
واحد زي حالاتي بيروحها عشان يستمتع الصراحة مش عشان يتعذب ويعيش فى الألم 
بروح عشان بلاقى نفسي وبعرف أتكلم معاها كويس 
عشان هناك بيبقى فى قوة مفرطة لأن مبيبقاش فى حاجة بتشد أو بتكسر ولا روابط بتحكمنا ولا حاجة تشدنا لتحت
فى ناس كتير فاهمة الموضوع غلط
***

عالمزيكا 
قلبي فى إيدك 
موج البحر شديد 
صوت فيروز 
الرمل 
الهوا 
صوت العزف عالكمان من Awake and alive 
مش إنتي اللى هتشديني للضلمة 
مش هتقدري تطفي النور تاني 
المفتاح مش فى إيدك 
الرسم مبقاش علي ورقك 
إنتهت السيطرة 
إنتهى العهد دا 
هيبتدي عهد جديد 
أنا ممكن أبقى فكرة أو إيمان أو قيمة أو أمل
بس أنا فى الحقيقة أكبر من كدا 
أنا إنسان  
إنسان لحم ودم وبيحس ودا اهم من كل المذكور 
كل الحاجات اللى فاتت أجزاء مجرد أجزاء مني 
بقدر أغير وأصنع وأكريت عوالم من الصفر 
بقدر علي مليون حاجة 
وأولهم إن مش إنتي اللى هتموتيني 
ولا إنتي اللى هتطفي النور 
ياااااااااااااااااااااااااااااااااااااااااااااااااااااااااااااااااااه 
مفتقد ( إسكيب )
 جدااااااااااااااااا

بقى عندي القدرة إني أنتقم وإني أدمر عوالم كاملة وحكايات كبيرة فى لحظات 
بقي عندي القدرة إني أكسر بكل شكل ممكن ومعملتش دا ..
المسألة كلها إختيار 
وأنا خلاص إخترت الإختيار اللى يخليكي فى كون و أنا فى كون آخر 
 كملي وعيشي 
زي ما بتجري وتهربي 
جه الوقت اللى آجري فيه ...
جه الوقت اللى نبدل فيه الأدوار 
حظ سعيد فى الدور بتاعي 
وتذكري ... العدالة تنبع من التوازن وهي اللى بتخلي وجود الخالق فكرة قابلة للتصديق 
و عن نفسي شايف إن هوا دا الأوان 
Have Fun
#كرة التلج #ساعة #سنين #قصر_الأميرة_بطاطس
***
هي نسيت أنا مين من فترة طويلة أوي 
نسيت الشخص اللى كان موجود فى الأول ولسه بتتعرف عليه 
هي وغيرها كتير 
مش عارف ليه الناس بتنسي  , ومش عارف ليه الناس بتتوه , هوا الطريق مش واضح ؟
؟؟؟
***
أحيانا القلوب بتخاف تمشي فى الطريق 
 المشكلة كلها إن القلوب ممكن متصدقش إن اللى قدامها حقيقي من روعته 
أو تفتكر أنها ببساطة متستاهلش دا ومتستاهلش دا كله 
زي ما كنت بقول زمان وزي ما قريت فى الخيميائي من كام يوم

شكرا باولو ... خلي التايهين تايهين , كل واحد يتحمل نتيجة أفعاله 

***
كنت خايف لما أبص لنفسي وأركز وأدون ملاحظاتي عن شخصي 
خوفي مكانش فى محله 
لقيت عيوب كتير جدا وقدامي وقت كبير جدا أقدر أعالج كل العيوب دي 
حالة من الإستقرار النفسي والعاطفي مخليني رايق للدرجة دي 
اللى تخليني أركز بدون تعب
عندي وقت أقرا عن أينشتين وعن فلليني وأقرا كل الكتب اللى نفسي أقراها 
عندي وقت أحدد فيه حاجات كتير أوي هتخليني مبسوط 
يارب يسعدني ويقويني عاللى بتمناه 
والأهم من دا كله يصبرني 
لأن يا حبيبتي الطرق الطويلة بنكملها وبننتصر فيها بالصبرررررررر مش بالقوة 

يارب 

***
أنا حر 
وهفضل حر 
وزي ما بطلت سجاير الفترة اللى فاتت 
هبطل حاجات تانية بحبها برده 
بيس 
***
إختيار 


شاب فقري

صدع و ركز

هنزل أقص شعري عشان مسافر بكره , هحاول أبعد عن كل أدوية الصداع , هسيب الصداع يوصل لكل خلية فى دماغي وأكتب وبعدها أشوف بقي هيجري إيه , بس حاليا نفسي وعايز أكتب بطريقة عمري ما كتبت بيها قبل كدا . 

بس خلاص 



الأربعاء، 29 يناير، 2014

تيجي نتجنن ؟؟

هما فاكرين لما يحبطوني هبطل أحلم 
وفاكرين لما يقولولي فكر فى اللى قدامك وبطل طموحاتك دي هبطل جنان وهبطل محاولات 
فاكرين إني ممكن إنكسر أو أقف فى محلي أو أبطل أفكر 
النهارده معرفتش أرد عليكي 
بس حصل حاجات كتير أوي خلت كل حاجة زفت ولكني زي الفل وجه فى بالي مليون حاجة حلوة وإفتكرتك وبرده لسه أنا هوا أنا :P
بقولك إيه ... ما تيجي نتجنن :) :) :)


 جربت قبل كدا أرقص فى الشارع 
وياما غنيت فى الشارع 
يمكن كانت أروع لحظات حياتي اللى مثلت فيها فى الشارع 
واللى غنيت ورقصت 
ما تيجي نرقص سوا 
ما تيجي نطير بعيد عن هذا العالم الأهبل اللى مش قادر يستوعب أحلامنا ولا يستوعب كل الجنان بتاعنا 
ما تيجي ندعي ربنا يبعت لنا جناحات ونطير 
حكيت لك أنا عن اللقطة اللى إتخيلتها لما الفراشات شالت بطلة الفيلم بتاعى وطارت بيها للسما عشان تعيش فى وسط السحاب وتلمس النجوم وتنام فى حضن القمر كل ليلة 
لسه مصورتش الفيلم ولسه فى إمكانيات كتيرة أوي مش فى إيدي بس عادي 
مسيري هعمل كل دا حتي لو إضطريت أعمل الفراشات فوتوشوب 
هوا في فيلم قصير بيتعمل فيه مشهدين وبيخلص بس بيقول كل حاجة ؟؟؟
أيون الفيلم بتاعي :D
ما تيجي نتجنن يا حبيبتي ؟
***
 أيون بطلت سجاير 
عشرين يوم تقريبا ورا بعض وبقيت بشرب سجارتين كل يوم وأحيانا مبشربش :D
بس برغم انى بطلت إلا إني بحب السجاير 
ما تيجي نشد نفس ونخرج بيه كل شىء أسود جوانا 
أيون السجاير بتطلع السواد اللى جوا القلوب 
النار 
بتسيب بدالها سواد حقيقى فى صدرك والرئة 
بس إشطة بتضيع الوجع اللى جوا :D
آه وربنا 
أمال فكرك بحبها ليه 
وليه قبل كدا شربت ست علب سجاير فى يوم واحد :D
تقريبا كنت بولع سيجارة من سيجارة 
أيون مش حكيت لك عن التلات شهور دول ولا عن جناني دا 
بس فى حاجات كتير لسه جاية فى الطريق 
إستعدي إنتي بس :P
ما تيجي نسمع مزيكا سوا 
ولا أقولك نعزف سوا 
هوا ممكن الإندماج بين إتنين يخلي إيد تعزف وإيد تانية علي الأوتار ؟؟؟
أيون تصدقي 
أنا مؤمن بإن فى ناس تقدر تكون شخص واحد 
هوا إنتي برده مش جاية من ضلعي الشمال ؟؟؟
هوا إنتي مش النور اللى هربان من روحي وحتة مني ؟؟؟
أيون تصدقي فعلا :D
يبقى نقدر نعزف سوا 
أقولك 
لو معرفناش هنبقى نتصرف ونقعد نمارس الهبل بتاعنا ونعمل أصوات بايظة وبرده هنغني وهنفرح 
الفكرة مش فى أي حاجة 
غير إننا سوا وهنا 
ما تيجي نغني بصوت عالي :D
أو نجيب دي جي ونشتغل بتوع دي جي :D
أنا عن نفسي بشجع هذه الفكرة 
وإن شاء الله لما أسافر هتعاقد مع نايط كلاب :P و أبقى بتاع دي جي وأجيبك تشتغلي معايه :D
 
 ***
 الحكاية كلها إيمان قوي إتثبت بيكي 
إيمان بروحك اللى بتهفهف حواليا دايما وبتحسسني إنك هنا وبتطمني إنك فى نفس اللحظة أكيد بتفكري فيا وواخدة بالك مننا كويس أوي 
هوا فى حد بيشوفني ؟؟؟
هوا أنا بعرف أحكي حاجة لأي حد ؟
هوا أنا بحكي لك إزاي للدرجة دي ؟
وإزاي أصلا بتستحملي أفكاري اللى تعتبر بنت ستين فى تلاتين :D
أيون عصبي 
ما عشان كدا مرضيتش أرد النهارده 
من شدة العصبية والجنان وبعدها من شدة الشوق 
ما تيجي نطير سوا ؟
ما تيجي نروح نشتري ترمبولين ونتنطط عليه لحد ما نوصل للسما 
مش هنقع متخافيش أنا برده هخطط واخد احتياطاتي 
ممكن اعمل المستحيل بدون ما يقع أي ضرر 
***

 مش ببطل أحلم 
ولا هبطل أحلم بيكي ولا ليكي 
ولا هبطل أقول إني بحبك
مش أنا اللى بهرب من المعارك ولا بهرب أصلا 
أيون هنحارب وهنوصل وهنحقق اللى بنتمناه 
أيون الوقت طويل أوي والمعركة طويلة أوي 
بس زي ما حكيت لك عن فارس الظلمة 
البطل دايما لازم يصبر ويتحمل لآخر لحظة ويشوف هيتحرك إمتي وإزاي ومش يبقى يائس
ومهما جري من حواليه يفضل فااكر هدفه 
مينفعش حلمنا يقع مننا 
عارفة حتي لو العالم كله قال لاء 
عارفة لو فشلنا فأنا واثق إني مش هبقى لوحدي 
لأن برده هتبقى هنا وهنشد بعض عشان نقف ونكمل المعركة ونحارب تاني 
الفكرة كلها إننا هنا 
مهما طال الوقت أو بعدت المسافة أو حتي إتكسرنا فتافيت 
هنرجع نكمل بعض ونقوم من جديد نحارب ونقف علي رجلينا 
حتي لو جري إيه عندي إيمان قوي بيكي 
توقيت كلامي دا له معني 
إن حتي لو حصل أي حاجة عندي ثقة إنك هنا 
وإنتي واثقة وعارفة إني هفضل هنا مهما جري 
هنحلم ونرتب ونخطط ونصبر مهما طال الطريق ومهما ضعفت قوتنا ونحقق 
بقولك إيه 
بحبك

ما تيجي نتجنن ؟؟


P.S :باقى من الزمن من شهر إلي شهرين وهجيبلك هدية كبيرة أوي , هدية عن نفسي بحلم بيها بقالي سنين , بقالي فترة طويلة بدور علي حاجة أعملهالك أو أجيبهالك , بيتهيألي لقيت الحاجة اللى هتجننك وتبهرك وتطيرك لفوق , عارفة ... ولا بلاش أحرقها , ربنا يكرم بس وعن قريب أوي ... هتلاقيني جاي لك بيها :D

وبس خلاص كدا يا بت 
بيس بقى 

بوست من وحي حاجات كتير 
مكتوب ليكي طبعا 
أوعدك راح أخدك المكان اللى تعرفي تدوقي فيه طعم السحاب وأوعدك نطير سوا بجد مش هزار ....


كريم 
شاب فقري 


نفسي أنام

عندى رغبة واحتياج لا نهائي للنوم
والصورة تقول انى محتاج امان ومحتاج اتدفى واغمض عيونى وانام
والبوست خلص 
يبقي نشغل ديكستر 
ونستعد لسفر بكره وننام بقي :)
تصبحى على خير 
ياحتة منى 

هحصلك كمان دقايق 
ومن قبل مالصبح ييجي اقولك صباحك سكر :)

شاب فقري
كريم 

الأحد، 26 يناير، 2014

قبل بكره ما ييجي جواب بسيط وشوية كلام كدا

الصمت حرام شرعاً فى يوم زي دا :D
ولذلك حاجات بسيطة نقولها ونكتبها سوا كدا
قبل ما أفتح النوت بوك بكره
وأطلع كل حاجة 
وأتكلم وأقول :D
***
  
 موحشتنيش القاهرة ولا إسكندرية علي قد ما وحشتني فكرة إني أكون معاكي فى نفس العالم 
فى نفس الشارع 
فى نفس المنطقة او المجمع السكني 
إفتقدت فكرة حضورك ((عيل بيفتح دراعه عالآخر ويقول :   قااااااااااااااااااااااااد كدهوه :D  ))
فكرة إفتقاد حضرتك بقى لا يمكن تخيل قدرها :D
أنا فاكر آخر مرة شفتك فيها بالتفصيل 
وفاكر كل حاجة 
أنا فعلا ذهني مرهق وإتخذلت كتير وسافرت كتير فى الدنيا لحد ما لقيتك جاية هنا 
إيه اللى جابك هنا ؟
ليه جيتي القاهرة ؟
ليه ظهرتي فى الوقت دا بالذات ؟
ليه حبيتك ؟
إحنا مبنختارش بنحب مين لكن ممكن نختار بنعيش مع مين ونختار نعامل اللى بنحبهم إزاي ونختار نمشي فى أنهي طريق من طرق حياتنا 
فى إرادة حرة يابابا :)
ومن لحظة كتابة هذه السطور 
فعمر إختياري ما هيكون غيرك 
وهذا مؤكد 

***
هوا أنا قلت لك إني بحب الصورة دي ؟؟
فكرة الحضن والرقص بعد طول بعاد 
الأفكار بنت المجنونة دي بنسبة تسعة وتسعين فى المية بتخلي للحياة طعم 
بصي معايه كدا ركزى فى ملامح وشها 
أيون 
مبسوطة أو مشتاقة أو مبهورة أو يمكن مليون حاجة فى بعض
شايفة بقى القفشة دي كأنها قافشة حرامي 
:D
فاكرة (( عريس يابوي ؟ طخه بس متعوروش يابوي ؟؟ ))
أيون :D
بس يمكن هي هنا واصلة بيه ومش محتاجه حد يطخه 
ولا حتي محتاجه تتجوزه 
لأنها عندها ثقة 
وإيماااااااااااااااااااااااااااااان 
إن مهما جري هيبقي ليها 
ما هوا برده مش معقول يبقي أهبل ويروح حتة تانية 
نسيت أقولك بقى 
كل شىء فى وقته 
الجملة الشهيرة بتاعتي 
دا بالنسبة للرقصة والحضن 
و
بالنسبة لبكره 
أو 
ل 
لنا يعني 
فإنتي وحشتيني ويمكن إنتي اللى خليتي السنة اللى فاتت يبقي ليها قيمة 
نقطة النور بتاعتي 
حبيبتي 
أحبك 
علي كل قد وقد 
وقد اللي مقدوش قد 
:)
ومن هذه اللحظة تبدأ الإحتفالات بعيد ميلادي ولمدة ثلاثة أشهر :D
قوموا بينا نقف دقيقة حداد علي خمسة وعشرين سنة فاتوا :D
ونحتفل بإن باقي من الزمن عشر سنين قبل ما أنتحر 
دا لو يعني ربنا قدر ومنتحرتش قبلها 
ومش تقلقي 
مش هنتحر وأسيبك يعني :P
أكيد هاخدك معايه :)
هنغمض عينينا ونصحي فى حتة تانية 
وحتي لو الموت ممل 
وجودك هيخلي له معني 
:P
مفيش مجال للهرب :D
بس خلاص 

وهذا وقد إنتهي شاب فقري من هذا البوست وقرر يكتب بكره حاجة جبارة 
وليكن هذا البوست منعا للصمت اللى طال فى المدونة 

بيس علي كدا :)