الأربعاء، 29 يناير، 2014

تيجي نتجنن ؟؟

هما فاكرين لما يحبطوني هبطل أحلم 
وفاكرين لما يقولولي فكر فى اللى قدامك وبطل طموحاتك دي هبطل جنان وهبطل محاولات 
فاكرين إني ممكن إنكسر أو أقف فى محلي أو أبطل أفكر 
النهارده معرفتش أرد عليكي 
بس حصل حاجات كتير أوي خلت كل حاجة زفت ولكني زي الفل وجه فى بالي مليون حاجة حلوة وإفتكرتك وبرده لسه أنا هوا أنا :P
بقولك إيه ... ما تيجي نتجنن :) :) :)


 جربت قبل كدا أرقص فى الشارع 
وياما غنيت فى الشارع 
يمكن كانت أروع لحظات حياتي اللى مثلت فيها فى الشارع 
واللى غنيت ورقصت 
ما تيجي نرقص سوا 
ما تيجي نطير بعيد عن هذا العالم الأهبل اللى مش قادر يستوعب أحلامنا ولا يستوعب كل الجنان بتاعنا 
ما تيجي ندعي ربنا يبعت لنا جناحات ونطير 
حكيت لك أنا عن اللقطة اللى إتخيلتها لما الفراشات شالت بطلة الفيلم بتاعى وطارت بيها للسما عشان تعيش فى وسط السحاب وتلمس النجوم وتنام فى حضن القمر كل ليلة 
لسه مصورتش الفيلم ولسه فى إمكانيات كتيرة أوي مش فى إيدي بس عادي 
مسيري هعمل كل دا حتي لو إضطريت أعمل الفراشات فوتوشوب 
هوا في فيلم قصير بيتعمل فيه مشهدين وبيخلص بس بيقول كل حاجة ؟؟؟
أيون الفيلم بتاعي :D
ما تيجي نتجنن يا حبيبتي ؟
***
 أيون بطلت سجاير 
عشرين يوم تقريبا ورا بعض وبقيت بشرب سجارتين كل يوم وأحيانا مبشربش :D
بس برغم انى بطلت إلا إني بحب السجاير 
ما تيجي نشد نفس ونخرج بيه كل شىء أسود جوانا 
أيون السجاير بتطلع السواد اللى جوا القلوب 
النار 
بتسيب بدالها سواد حقيقى فى صدرك والرئة 
بس إشطة بتضيع الوجع اللى جوا :D
آه وربنا 
أمال فكرك بحبها ليه 
وليه قبل كدا شربت ست علب سجاير فى يوم واحد :D
تقريبا كنت بولع سيجارة من سيجارة 
أيون مش حكيت لك عن التلات شهور دول ولا عن جناني دا 
بس فى حاجات كتير لسه جاية فى الطريق 
إستعدي إنتي بس :P
ما تيجي نسمع مزيكا سوا 
ولا أقولك نعزف سوا 
هوا ممكن الإندماج بين إتنين يخلي إيد تعزف وإيد تانية علي الأوتار ؟؟؟
أيون تصدقي 
أنا مؤمن بإن فى ناس تقدر تكون شخص واحد 
هوا إنتي برده مش جاية من ضلعي الشمال ؟؟؟
هوا إنتي مش النور اللى هربان من روحي وحتة مني ؟؟؟
أيون تصدقي فعلا :D
يبقى نقدر نعزف سوا 
أقولك 
لو معرفناش هنبقى نتصرف ونقعد نمارس الهبل بتاعنا ونعمل أصوات بايظة وبرده هنغني وهنفرح 
الفكرة مش فى أي حاجة 
غير إننا سوا وهنا 
ما تيجي نغني بصوت عالي :D
أو نجيب دي جي ونشتغل بتوع دي جي :D
أنا عن نفسي بشجع هذه الفكرة 
وإن شاء الله لما أسافر هتعاقد مع نايط كلاب :P و أبقى بتاع دي جي وأجيبك تشتغلي معايه :D
 
 ***
 الحكاية كلها إيمان قوي إتثبت بيكي 
إيمان بروحك اللى بتهفهف حواليا دايما وبتحسسني إنك هنا وبتطمني إنك فى نفس اللحظة أكيد بتفكري فيا وواخدة بالك مننا كويس أوي 
هوا فى حد بيشوفني ؟؟؟
هوا أنا بعرف أحكي حاجة لأي حد ؟
هوا أنا بحكي لك إزاي للدرجة دي ؟
وإزاي أصلا بتستحملي أفكاري اللى تعتبر بنت ستين فى تلاتين :D
أيون عصبي 
ما عشان كدا مرضيتش أرد النهارده 
من شدة العصبية والجنان وبعدها من شدة الشوق 
ما تيجي نطير سوا ؟
ما تيجي نروح نشتري ترمبولين ونتنطط عليه لحد ما نوصل للسما 
مش هنقع متخافيش أنا برده هخطط واخد احتياطاتي 
ممكن اعمل المستحيل بدون ما يقع أي ضرر 
***

 مش ببطل أحلم 
ولا هبطل أحلم بيكي ولا ليكي 
ولا هبطل أقول إني بحبك
مش أنا اللى بهرب من المعارك ولا بهرب أصلا 
أيون هنحارب وهنوصل وهنحقق اللى بنتمناه 
أيون الوقت طويل أوي والمعركة طويلة أوي 
بس زي ما حكيت لك عن فارس الظلمة 
البطل دايما لازم يصبر ويتحمل لآخر لحظة ويشوف هيتحرك إمتي وإزاي ومش يبقى يائس
ومهما جري من حواليه يفضل فااكر هدفه 
مينفعش حلمنا يقع مننا 
عارفة حتي لو العالم كله قال لاء 
عارفة لو فشلنا فأنا واثق إني مش هبقى لوحدي 
لأن برده هتبقى هنا وهنشد بعض عشان نقف ونكمل المعركة ونحارب تاني 
الفكرة كلها إننا هنا 
مهما طال الوقت أو بعدت المسافة أو حتي إتكسرنا فتافيت 
هنرجع نكمل بعض ونقوم من جديد نحارب ونقف علي رجلينا 
حتي لو جري إيه عندي إيمان قوي بيكي 
توقيت كلامي دا له معني 
إن حتي لو حصل أي حاجة عندي ثقة إنك هنا 
وإنتي واثقة وعارفة إني هفضل هنا مهما جري 
هنحلم ونرتب ونخطط ونصبر مهما طال الطريق ومهما ضعفت قوتنا ونحقق 
بقولك إيه 
بحبك

ما تيجي نتجنن ؟؟


P.S :باقى من الزمن من شهر إلي شهرين وهجيبلك هدية كبيرة أوي , هدية عن نفسي بحلم بيها بقالي سنين , بقالي فترة طويلة بدور علي حاجة أعملهالك أو أجيبهالك , بيتهيألي لقيت الحاجة اللى هتجننك وتبهرك وتطيرك لفوق , عارفة ... ولا بلاش أحرقها , ربنا يكرم بس وعن قريب أوي ... هتلاقيني جاي لك بيها :D

وبس خلاص كدا يا بت 
بيس بقى 

بوست من وحي حاجات كتير 
مكتوب ليكي طبعا 
أوعدك راح أخدك المكان اللى تعرفي تدوقي فيه طعم السحاب وأوعدك نطير سوا بجد مش هزار ....


كريم 
شاب فقري 


هناك 3 تعليقات:

نيللي علي يقول...

مش عارفة أعلق علي أيه ولا أيه..

هي الإبتسامة كان علي وشي طول البوست..
عجبني الحب بطعم الجنان أو الجنان بطعم الحب..

الإصرار علي حلمك وحبك واللي هما وجهين لعملة واحدة وهو أنت..

عن سوا..

عن الحب الحقيقي..

حقيقي رائع:)

doaa elattar يقول...

"أنا مؤمن بإن فى ناس تقدر تكون شخص واحد
هوا إنتي برده مش جاية من ضلعي الشمال ؟؟؟
هوا إنتي مش النور اللى هربان من روحي وحتة مني ؟؟؟
أيون تصدقي فعلا :D
يبقى نقدر نعزف سوا "

الله بقى .. ربنا يخليكم لبعض ويفرح قلوبكم دايمًا ^ــــــــــ^

قمر وليل وغيوم يقول...

هو جنان
بس احلى جنان
جنان لذيذ
لمست فى كلامك.تحدى.واصرار
وايضا لمست جنون الحب
اعجبتنى كلماتك
واعجبتنى ايضا افكارك
اتمنى ان تستمر فى التحدى
فالمعركه قادمه قادمه
والحرب مع الحياه من اصعب الحروب
وان شاء الله تفوز فى الاخر يابطل
يابطل الجنان
وما احلى الجنان
اعجبتنى افكارك وتدوينتك وخلتنى احط نفسى مكان البنت اللى بتكلم عنها واعيش الحلم. ..دع من بعد اذنها طبعا
اتمنى انك تزور مدونتى
هنتظرك