بتقول , بيقولوا , بقولك

إزيكوا والسلام عليكم

أنا مش عارف اقول إيه بجد 

بس الشغل واخد كل وقتي 

لدرجة إني مكنتش فاضي أخد دش العيد :D

بس الحمد لله إتصرفت فى الشاور وعيدت وسيم :D

مكنتش لاقى وقت أقعد نت ولا لاقى وقت اكتب فيه ولا لاقي وقت اتكلم فيه 

حتي البوست اللي فات قلت هكمله لكن للأسف ملحقتش بسبب إن الوقت ضيق وفى نفس الوقت مينفعش أسيب المدونة كدا لازم أكتب لكم علي طول 

أنا هنشر لكم النهارده بوست كنت كاتبه وشايله على جنب 

وهكتب لكم عن اللى حصل فى العيد والحياة كلها بعد البوست دا

بس الصبر 

لأني لسه راجع من البلد ( أرض الوطن :D ) ولسه جايلي ضيوف مهمين 

ولسه شارب شاي 

ولسه دافع عيديه :DDD

ولا دا مش وقته 

بعد البوست دا بقى يبقى نتكلم 

:)

فقري

***

 إنته بتقول بتقول إن الوقت مش بيحكمك بس بتكره الإنتظار بجنون
وبيقولوا إن على طول مستعجل ومش بيهمك حاجة غير اللى فى دماغك وبتندفع بجنون .
وبقولك أنا : إن محدش بيستني قدك , وإن الوقت كل لحظة بتعدي عليك بتحس بيها بشكل مختلف عن الدنيا كلها , إنتظارك لو إستمر دقايق بيكون زي سنين لناس تانية , كل الأفكار والقلق والحب والمشاعر والحاجات اللى مينفعش تترجم , قولي مين يقدر يستني قدك أو يستني حتي واحد علي مليون من الوقت اللى بتستناه , إنته مش مندفع ولكن إنته مش عايز لحظة كمان تضيع فى هراء وعبث لا طائل منه طالما النتيجة مش هتتغير , إنته بتهتم باللى فى دماغك لأنك درست الموقف بكل حذافيره وفهمت اللى قدامك كويس أوي فبتعرف تتصرف بسرعة فى حين الكل بيقف يتفرج عليك

***

 بتقول إنك عتمة شديدة وضلمة
وبيقولوا إنك بتضلم الدنيا وبتنشر ظلامك فى كل حتة
أنا بقولك إن إنته بتكون دايما واقف فى مكانك مستعد تشع بالنور زي ألف شمس وشمس بيتحرقوا فى نفس اللحظة عشان يساعدوا الغير , بتقف مكانك صحيح فى أوقات كتير وبتستني الناس تتحرك لأن من الطبيعي إن النور مش هيقيد إلا إذا حد حرك المفتاح وطلب إن الحياة تنور .

 بتقول إنك ملكش فى الألوان
وبيقولوا إن الألوان بالنسبة لك مبتفرقش والدليل إن كل لبسك يا إما غامق أو أو إختيارات ألوان من قبيل الصدفة
أنا بقولك إن إنته اكتر واحد بتحس باللون وبموجته السارية فى الكون سواء فى وردة أو فى هدوم أو فى فكرة أو فى حد شفايف بنت بتضحك وإنته متعرفهاش بس بتقدر تشوف ورا اللون فى إيه وبتقدر تعرف إتكون إزاي وليه بقى بيتشاف كدا , بتقدر توصل للمنبع فى الوقت اللى الكل بيتعامل فيه مع المنظر الخارجي

***

 بتقول إنك صانع لعب
وبيقولوا إنك الشيطان ذاته
وأنا بقولك إنك بتسيبهم أحرار فى حركتهم , اللى يقرب يقرب واللى يبعد يبعد , بتمنحهم الإختيار اللي إنته إتحرمت منه وبتحاول متفتكرش الحدث اللى كونك وبدأ معاه كل دا , مش بتحركهم ولا بتصنعهم , إنته بتديهم إختيارات وهما بيتصرفوا , هل ذنبك إنك منحت الإختيارات وكنت موجود ؟ هل ذنبك إنك كنت قادر تشوفهم من جوا بجد وتخرج حقيقتهم وأحلامهم للنور ؟؟؟ هل ذنبك إنك حبيتهم وسيبتهم يطيروا بحرية وفى الآخر شتموك وكرهوك وسابوك ؟؟ وفى الآخر شايفينك مرض لازم يتم مكافحته وبيحاولوا يستعملوا الناس والتجارب كطريقة للشفاء منك ؟؟؟ هل ذنبك إن مواجتهم لنفسهم وبالتالي ليك صعبة أوي كدا فبيهربوا منها ؟؟؟

***

 بتقول إنك كئيب
وبيقولوا إنك حزين دايما ونظرة حزن فى عيونك مش بتغيب
وأنا بقولك : إنك جواك قدرة مذهلة على نشر الفرحة و بتحاول بكل ما فيك تخلقها لدرجة إنك برغم فشلك فى الرسم ممكن تروح ترسم فى فراشة فى ورقة أو كتاب عشان تفرح قلب بنوتة , أو تروح تجيب بوكيه ورد بأحلي الألوان أو تجيب وردة أو حتي تملي شنطة بنت ألوان وورد عشان تشوفها مبسوطة وبتضحك  ( وتفهمها إنك بتقدر تدي لححظات حلوة وكسرك دلوقتى هوا إنك بتمنح حاجات حلوة بس بدون ما تدي أكتر وهي بتبتسم وبتفهم دا وبتكمل إبتسامتها )  , او تخبي بين ايديك وردة وتقولها إختاري واحدة عشان تختار الوردة وتشوف عينيها فرحانة , أو حتي تحاول تعمل أى موقف برىء عشان اللى قدامك يبتسم , إنته الفرح والنشوة ساعة الجنون 

 بتقول إنك لعنتك فى التفاصيل
وبيقولوا إن تفاصيلك دى حاجة وحشة , بتكسف , بتوجع , بتعلم فى الروح , بتتعب أوى .
وأنا بقولك إنك بتستخدم كل تفصيلة ممكنة عشان تخلق للى قدامك عالم يقدر يفرح فيه , أو ( جنة ) زي ما بيتقالك دايما , بتجمع كل الأجزاء وتحطها فى المكان السليم وبتفهم كل حاجة خاصة بالحدث أو الشىء وبتفكر صح وبتحط كل دا فى إيد حد وتفرحه بيه

***

بتقول إنك بتحب تبقي لوحدك 
وبيقولوا إنك عندك مليون بديل دايما لأي شىء ولأي حد زي اللي واقف يرقص فى ساحة كبيرة وبيبدل واحدة بالتانية عشان تستمر رقصته وميقفش لوحده
بس الحقيقة إن الناس اللي حواليك جزء منك ومهما بعدوا ومهما عملوا بتقدر تتقبلهم تاني وعمرك ما بتبقى لوحدك طول ما حتة منك جواهم , طول ما حتت منهم محفوظة فى أمان جواك , طول ما الدفا بيسري منك ليهم , طول ما فرحتك بنجاحاتهم وآمالهم حتي لو كانت بعيد عنك وبرده متنساش إن لو مكانوش سابوك مكنتش جبت حد مكانهم ورقصت من جديد , الغلطة غلطتهم لو هنفكر بدماغهم والذنب ذنبهم وهما يستاهلوا يتوهوا فى ساحة الرقص ويلفوا حوالين نفسهم مليون مرة لحد ما ينهكهم التعب ويعرفوا فين الحقيقة ويعرفوا ويقدروا كريم .

***

 بتقول إنك وحش أوى وإنته بعيد عن ربنا
وبيقولوا إن الخير إن الواحد يسيبك ويمشي  وإن إنته فعلا بتناقض نفسك مع ربنا
وأنا بقولك : إن هما مشافوش إيديك بترتعش إمبارح ولا أول إمبارح ولا حسوا بيك قبل كدا وفي بسمة بترتعش على جنب شفايفك لأنك بجد مش عايز تغضب ربنا ولا عايز توجع حد , مشافوكش إمبارح كنت بتحارب إزاي , مشافوش جروح المعركة ولا شافوا أول إمبارح قوتك وجبروتك قدام شبح من الماضي جاي يستغل ضعفك لما حس بيه , مشافوش اللى منعت نفسك عنه ولا اللى تبت عنه ولا اللى بطلته ولا اللى عملته عشان تبقى قريب من ربنا , مشافوش المطلوب عشان تبقى كويس ولكن أمروك بالمستحيل والمثالية عشان يبرؤا نفسهم قدام نفسهم اللى هي أصلا مدانة بالحدث والفعل والكلمة , بس حتي اللى شافت الرعشة فى وشك وعلى شفايفك وإنته بتبتسم نسيت تماما , وحتي اللى شافتك وإنته بتجري عالسلم نسيت قد إيه بتحاول تقرب من ربنا بإنك عالأقل متعملش الغلط , وحتي اللى شافت رعشة إيدك مفهمتش سرها ( يمكن لأنها مؤمنة بيك أوي صدقت إنك من جواك كويس وهتقدر تمنع نفسك وتبقى كويس ) .

***

بتقول إن طرقك مش أي حد يقدر يخطي فيها 
وبيقولوا إن الطريق بيغيرهم وهما معاك 
بس أنا بقولك إن طرقك حلوة أوي وكل السكك معاك مليانة فرحة منك وبيك وللي معاك وألوان بتمطر من السماء وضحكة وإبتسامة وبلالين ملونة وفيها رز للي بيحبوك وبتحبهم :) .

***

بتقول إنك بتقفل موبايلك بالأيام 
وبيقولوا إنك بتحب تتكلم كتير وبتعيد وتزيد فى الكلام 
لكن أنا بقولك إنك مبترضاش حد يدور عليك ومش يلاقيك , دايما فى طريق للناس اللي بيحبوك يقدروا يوصلوا لك منه وعمرك ما بتتخلي عنهم أبدا ولا بتسيبهم يعانوا أبدا , ممكن تحرق نفسك وتكسر جواك حاجات أهون عليك بكتير من إنك توجعهم , إنته بني آدم بيحس بغيره وهما للأسف مش بيقدروا الحاجات اللي فى إيديهم , إنته مهما كان بينك وبين الناس حواجز دايما بتسيب لهم فتحة صغيرة فيها أمل قد الدنيا يكفيهم للأبد , اللي بينك وبين الناس مش بيموت ولو حتي بموت الناس دول .

***

بتقول إنهم بقوا أحسن بيك
وبيقولوا إن لقاك كان لعنة
وأنا بقولك إنك الوحيد اللى قدرت تدي لبنت جناحات فراشة عشان تقدر تطير وتحقق حلمها وتبقى قوية حتي لو موجوعة , والوحيد اللى قدرت تتعامل مع حالات ميؤوس منها وتخليهم بخير وكويسين لمجرد إنك مبتستحملش تشوف حد موجوع 

***

بتقول إنك أصلا جامد
وبيقولوا إنك بتتكبر ومغرور جدا
وأنا بقولك : إنك جواك حاجات حلوة أوى وبتاخد بالك من كل حاجة ومن كل اللى حواليك أوي , بتشيل قلم كانت بتذاكر معاك بيه بنوتة من زمان وبتخبي كتاب فى وسط الكتب فيه ورد ومناديل وبتشيل الهم وترميه بعيد عن اللي بتحبهم جدا بعيد أوى وبتخبيه بعيد , بتقدر تدفي ناس بعيدة عنك أوي ولو حتي بكلمه , كل حاجة بتعملها بتقول إن جواك حلو أوي أوي أوي وإن كل أفعالك بتراعي فيها إن اللي قدامك بيحس وممكن يتوجع وبتقدر كل شىء مهما كان بسيط .

***

بتقول إنك مش راضي عن الضلمة اللي جواك
وبيقولوا إنك طفيت نورهم
أنا بقولك : إنك زرعت فيهم النور اللى يخليهم يقدروا يعيشوا من غيرك عشان كدا مشيوا , قطعت من روحك حتت , من نورك منحتهم الشىء الأبدي اللى يقدروا دايما يقووا نفسهم بيه , إديتهم منك حتت وعشان كدا قادرين يعيشوا بيك حتي لو مش معاهم وبيخدعوا نفسهم باللعبة اللى إسمها الحياة والناس الكتير اللى بتتطفل عليهم

***

إنته مجنون

وخيالي

وأسطوري

وفارس من حكاية قبل النوم

و نور من صندوق ملمسوش بشر قبل كدا

و أمل محدش عارف له نهاية

ومحارب فى زمان معدش فيه محاربين

إنت كتير قوي

بس هما مش بيشوفوا غير قليل أوى

إنت مجنون

ويمكن دا اللى الدنيا محتاجاه منك فعلا تكونه

شاب فقري

بمناسبة مرور كام يوم على الكام يوم

وبمناسبة شبح الماضي فتاة الأماني اللي مقابلتها فكرتني بزمان أوي

وبمناسبة اللي آمنت بيا واللي آمنت بيا واللي دايما بتعيط عشاني وبتحس بيا واللى بتمشي وتروح وتيجي ميت مرة وبتلاقيني فى كل مرة بترجع فيها , بمناسبة كل الناس اللى بحبهم

وبمناسبة إن دا العيد ولازم ننشر حاجة ممنوعة من النشر

والإهداء بقي لاحقاً :P

على فكرة كل دا مش كلامي دي تفسيرات إتقالت لي بنفس الشكل كدا :)

عصفور الربيع يحلق مع بداية الشتاء

ساعات ساعات

 أحب عمري وأعشق الحاجات 

وساعات ساعات اضحك والعب زي عصفورة الربيع 

زي النسيم 

زي النسيم ما يعدى وفى لحظة يضيع أضيع 

افرح قوى واضحك قوى 

وأحب عمري وأعشق اليوم اللي فات 

ساعات ساعات

مفيش أكتر من اللي قاله منير 

عصفور الربيع بيضحك ويلعب مع بداية الشتا :)

حكيتلكوا حكاية العنقاء ؟؟

المرة الجاية بقى :)

هحكيلكم عن العصفور اللي طار وسط النار 

وهحكيلكم عن حالات الحلقة الأخيرة من جرايز أناتومي اللى تقريبا خلتني أفكر بشكل مختلف حبتين :)

وهنا فى نفس ذات البوست 

دا بس تمهيد لحد بكره بليل :)

وبكره هحط أغنية تانية لمنير 

بس هاف فن ب دي توداي لأنها لايقة عاليوم أوي 

أو علي آخر ساعتين فى اليوم

تصبحوا علي سكر 

شاب فقري :)

هييييييييييييه

خلصت الشغل وروحت
وباقى وقت بسيط جدا على المسرحية
مسرحية عزازيل :)

:)
انا هجهز وأخرج وأشتري كتب وأصرف المرتب كله :D


هكتب لكم كتير وهعمل تحديث للبوست دا :)

بس حاليا


لازم ألحق المسرحية :)

مستر فقري
فى كوكو ورلد :P

****

وهكذا خرجت من البيت متجه لمسرح البالون اللى كنت فاكره فى العتبه وللاسف إكتشفت أول ما وصلت إنه إتنقل الزمالك :D مش عارف إيه اللى يخليهم ينقلوا مسرح البالون بالكامل وقبل عرض مهم زي دا وينقلوه بعيد فى العجوزة جنب الساقية :D , مش مهم دا دلوقتى , لكن وانا بكلم الناس لقيت إن المفروض الواحد يروح حتي لو هيتفرج من الشباك وفعلا اتجهت للعجوزة وكان مشوار سريع سريع ولأول مرة من شهور بوقف تاكسي أبيض وأقوله آخر الشارع :D , غريبة دى بس مش مهم تقريبا التاريخ بيعيد نفسه :D

روحت للحتة اللى بنركب منها وركبت جناحات وطيرت ولقيت نفسي عند المسرح , قابلت ناس كتير هناك معرفهمش طبعا ولكن كلهم فى إنتظار العرض وللاسف العرض كان بدأ ومحدش يسألني حسيت بإيه ساعتها , لكن حا رس  الأمن ربنا يحفظه قالي بص يا كابتن حتي لو العرض انتهي فهوا هيتعرض تاني كمان تقريبا ساعة ونص عالساعة تمانية كدا , وهنا بدات مرحلة الإنتظار والناس اللى اعرفهم  بدأوا يتوافدوا كعادة اى حد اعرفه وهي التأخير :D

بدأ العرض وقعدت على الأرض قدام المسرح عالأرض والصراحة مشاهدة عرض مسرحي لأحمد صبري غباشي تستاهل أكتر من كدا مليون مرة ولو هنتشعلق فى السقف , محدش يسألني عن سر تقدير للراجل دا من زمان , يمكن لانه مبدع ويمكن لانه بيحاول يقدم جديد دايما فى كل مسرحية وفى كل كتاب ومن الناس اللى بيعرفوا يصيغوا الفكرة ويقدموها بشكل راقي جدا 

للعلم فقط : 

ملاحظة :

انا بقالي حوالي تلات شهور بقرا فى رواية عزازيل , مش عشان الرواية طويلة أو صعبة مش عارف أخلصها ولكني عشان بقرا الفصل أكتر منة مرة وبحلل كل صفحة وبستمتع بالقراءة اكتر من مرة , حاسس ان الرواية لو خلصت مش هلاقى حاجة تفرحني اوى كدا , فبحاول على قد ما اقدر انى مخلصهاش 

عشان كدا الرواية مليانة شخابيط من قلمي الرصاص وعلامات تحت السطور اللى حبيتها 

نكمل كلامنا

العرض إبتدي , العرض بدأ بالموسيقى كالعادة وبعدين دخول الممثلين وبعدين بدأ العرض , أداء الممثلين وكل تفاصيل العرض بصراحة كانت رائعة  زى ما توقعت من احمد صبري بصفته المخرج والكاتب للنص المسرحي , إتجاه الرواية شكل وإتجاه المسرحية شكل مختلف حبتين لأنه هيخلي الراهب إزاي يتكلم على احزانه لو مقدرش يخلي فى حد يكلمه من جوا نفسه ؟؟؟ بالإضافة لفكرة ظهور عزازيل ذات نفسه فى العرض , وإنه محاوط هيبا وإنه بيكلمه لحد ما بيوصل لمشهد الختام فى المسرحية اللى بيكون بالظبط متماثل لمشهد النهاية فى ( devil's advocate محامي الشيطان ) طبعا آل باتشينو و كيانو ريفز كانوا مختلفين تماما فى الفيلم ولكن العرض كان فيه احد انواع السحر فى المشهد الاخير , مشاهد فى المنتصف وقفت قدامها وعنيا دمعت أوي زي مشهد موت أوكتافيا ومشهد مقتل هيباتيا اللى أوجعني جدا لان الشخصية التاريخية محببه جدا علي قلبي , ومشهد فراق مرتا ومشهد دخوله المسرح اللى بيتقال فيه محاضرات هيباتيا , وهيباتيا نفسها , والبنت اللى قامت بدور اوكتافيا كانت ساحرة وقدرت تقوم بالدور كويس جدا جدا جدا

مش عارف اوصف لكم ازاى العرض اللى استمر ساعتين تقريبا فى خمس دقايق واوصف لكم فرحتي باحمد صبري ولا بالعرض

ولا بالرواية اللى كنت بقراها ولقيت كل الجمل والمقاطع المفضلة بالنسبة لى موجودة فى العرض وكان احمد كان قاعد معايه وانا بقرا وبعلم على السطور وعشان كدا لما روحت عملت دابل تشيك على ادوات المراقبة فى الاودة وملقتش ولا حتي كاميرا :D

انا سعيد جدا بالعرض اللى خلصته وانطلقت على وسط البلد وسلمت عالناس اللى معايه ومشيتهم وكملت الليلة مع ناس تانية ما بين التحرير اللى قعدنا نفتكر ذكرياتنا فيه ايام الثورة وما بين وسط البلد واحنا بنتكلم عن الكتب وما بين الكتب اللى كان نفسي اشتريها لديستويفسكي وملقتهاش ولما لقيتها كانت ب 190 جنيه , يعنى يدوبك أشتري لى صفحتين :D

سوري فصلت فى النص إتشغلت فى ال150 نوتفكيشن بتوع الفيس بوك :D

ولقيت أغنية رائعة أتمني تعجبكم 

نكمل كلامنا ...

ما بين طبعا كل دا والسهرة الرائعة بتاعة إمبارح والعرض المسرحي والصحبة الحلوة :)
مش لاقى حاجة تاني تتقال غير شوية أفكار بتيجي علي بالي 

بس مش كل حاجة بتيجي علي بالي ينفع تتكتب 
مش زي ما فى حد اهبل قالي من كام يوم هوا انته بتكتب كل حاجة فى المدونة 
مش كل حاجة اكيد :)
إستمتعوا بالأغنية ولما ألاقي فيديوهات للمسرحية هنشرها هنا أكيد :)
*** 
عالصعيد الشخصي بقى 
انا اللى بختار لحياتي 
انا اللى بمشي بدماغي انا 
انا مش همشي بدماغ حد تاني وافكار حد تاني قد تكون مش على مقاسي 
مش هاخد قرار مصيري بالفراق او الحب بناء على راي زمايلي وصحابي ولو حتي كانوا اخواتي 
مش هاخد قرار بناء على افكار حد تاني شايفها رائعة وممكن يكون عنده حق بس مش تناسبني لانها مش علي مقاسي ومش تخصني ومش بتاعتي والحالة اللى انا فيها تختلف تماما ومش محتاج فيها راي حد كل خبرته شوية افكار وهوا قاعد لوحده 
مش همشي ورا حد واضيع حاجات حلوة عايش فيها او كنت عايش فيها 
اظن بقى واضح مليون حاجة 
البني ادم وهوا رايح يحقق حلمه عامل زي الصاروخ اللى بينطلق من الارض , لازم يتخلي عن كل تقل ويستخدم كل الوقود المتاح له عشان يقدر يطلع من عالارض ويقاوم الهوا والسحاب والمقاومة الشديدة للهوا والجاذبية الارضية اللى عمالة تشده لتحت وتحبطه لحد ما يوصل الغلاف الجوي ويتعرض حتي للحرق من شدة مقاومة الهوا لكن طبعا بيكون متركب له دروع تحميه من النار دي ولو حتي كان هيتحرق جزء منه بس هيكمل لحد ما يوصل لمكانه فوق 
ياتري لما تتخلي عن حلمك او عن انسان بتحبه بناء على شوية افكار سواء من صديق او من حتي كتاب أيا يكن هل معني كدا انك صح ؟؟؟ مظنش لان مفيش حد شركة بتكسر حتت فى الصاروخ قبل ما تطلقه , لازم الاول تجهزه وتسيبه ينطلق براحته بقى مش تكسر فيه وتاخد منه اهم حتت منه وتقول هيطير , أينعم انا مقتنع ان الصاروخ فى الحالة دى هيطير , هيقاوم , هيحاول يوصل لارتفاع ولكن هيقع فى ربع المسافة ويمكن فى نصها ويمكن دا اللى حصل او هيحصل مش عارف لكني عمري ما اتمنيت حاجة وحشة لحد ولا هيحصل 

نفسي افهم ناس كتيرة دا 

بس للاسف محدش بيفهم 

وبكررها تاني 

(( أنا اللى هحرك حياتي بإيدي مش حد تاني ))

(( انا اللى هتحاسب على افعالي وقراراتي واختياراتي وبالتالى مينفعش اروح اغشها من اى حد واخلي حد يضيعني بدماغه فى النصح لحد ما الاقى نفسي لوحدي ))

(( مش هسمح لحد يخسرني سنين عمري عشان فاكر ان دا الصح بالنسبة لي ووجهة نظره مختلفة عني واسمح لنفسي انى اصدقها لانى مش واثق فى نفسي , لاء انا واثق فى نفسي جدا وفى كل اختيار بختاره ومحدش هيقدر يكسر الثقة دي ولا حتي شوية رغي فاضي ))

(( انا هحلم وهفضل احلم ومش هتنازل عن حلمي مهما حصل ))

(( انا مش زي حد ولا هبقى زي حد ولا هنزل لمستوي حد ولا هتنازل عن حاجات مينفعش التنازل عنها عشان خاطر حد ودا قرار نهائي ومش هيتغير مهما حصل ))

(( أنا حلمي مش هيضيع من ايدي لاني هخليه حته مني مش محتاج امسكه ولا محتاج اربطه ولا محتاج اقيده , هيبقى مني وهيبقى انا وبس كدا )) 

(( مفيش غير كريم واحد بس

كريم واحد بس 

 والحمد لله إن الطب لسه مقدرش يستنسخ بني آدم ))

وختاما يا أحبائي 

أنا جعان ومحتاج أقوم آكل وبالتالي :

اشوفكم لاحقا لما اخلص اكل كدا ويبقى لى مزاج اكتب وافضفض تاني 

ويمكن اعمل كمان تحديث بعد شوية 

مين عارف فعلا :D

هاف فن بالسونجاية وهيصوا :)

شاب فقري  

و زحمة إسمها إنتي

تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .

Deleted

للمزيد من التفاصيل إضغط هنا

شاب فقري 

***

إزيكوا يا حلوووووووووووووين 

؟؟؟

أكيد وحشتكم 

طبعا فى مليون فكرة فى دماغي بفكر فيها اليومين اللى فاتوا اللى مكانش أصلا فى وقت فيهم عشان أتنفس , بس أهوه هحكي المليون فكرة وأجل كل حاجة لحد ما أحكيهم وأقولكم على مفاجأة فى الآخر 

***

كل ما تشوفني تقولي إزيك يا مدير 

كل شوية تبعت رسالة عالفيس اللى مبقتش عليه غير ساعتين الصبح وساعة بليل وتقولي إزيك يا مدير 

حتي فى البيت عاملة لى قلق 

ودارت ما بيننا محادثة 

هي : أنا خلاص بقيت مصدقة إن اللى نفسه فى حلم أوي يقدر يحققه 

أنا : ليه يا عبيطة ؟

هي : عشان إنته رفضت مليون شغلانة بمرتبات كويسة أوي , وأول شغل ييجي لك تقبله هوا دا وتشتغل مدير :D

أنا : الموضوع متعب فوق ما تتصوري 

هي : بس حققت حلمك ( يا مديررررررررررررر )

أنا : مش هرد عليكي :P

هي : عشان ألدغ فى حرف الراء

أنا : ولو مكنتش ألدغ برده مش هرد , غلاسة مديرين بقى 

هي : غلس ياعم مين قدك 

أنا : على فكرة ناوى أتخلي عن غلاسة المديرين قريب لأنى بفكر بشكل جاد أسيب الشغل 

هي (( تتصدم وتبتسم وتقول )) : عارفة إنك هتلاقى طريقك , إنته دايما بتعمل كدا , مهما حصل لك بتلاقى طريق 

ببتسم وبدخل أودتي وأشغل الأغاني اللى بحبها 

***

الشغل متعب جدا 

من بدري جدا لمتأخر جدا وأنا حاسس إن الوقت بيخلص أو ينتهي أو بيتسرق 

عايز أقف فى وسط ميدان عام وأصرخ بعلو حسي وأقول : أنا ليا حياتي 

لكن فى زحام جاي ( منها ) مخليني حاسس إنها حياتي وإنى لازم أكمل 

طبعا لازم أكمل :)

**

الناس فى الشغل مختلفين ومميزين 

فى منهم التعلب المكار اللى مستني الفرصة عشان يعملك مشكلة 

وفى منهم العصبي المجنون اللى بيتحكم فى عصبيته مع المدير اللى هوا انا بس فى نفس الوقت مينفعش المدير يضغط عليه فى وقت العصبية دا 

فى منهم السهن الخبيث اللى ساكت ومدكن 

وفى منهم أبو النور اللى كان صايع قديم وواجه الموت وفقدان ذاكرة وتعب وحياة كاملة فى كام سنة وطيب ومحترم جدا وكل ما يشوفني يطلع علبه السجاير ودا نوع بحبه من الناس لأنه فى كل كلامه مش عايز يبين لك إنه جامد جدا من كتر الصياعة ولكن عايز يوريك ربنا وصله لفين من وسط كل دا , بيحكي فى حاجات تودي فى النهاية كلها لربنا

وفى منهم اللى صامت أوي وفى حاله ودا النوع اللى بحبه 

وفى منهم المدير اللى هوا انا اللى مسؤل عن العمال كلهم واللى بيوجه كل واحد لوظيفته وبيقابل كل يوم رئيس مجلس الإدارة وصاحب الشركة ويتكلم معاه ويشربوا شاي واللى برده مسؤل عن الفاكسات والتليفونات والعملاء والطلبات وتسليم الطلبات وفى نفس الوقت إستلامها , تقريبا أنا الشركة كلها :D

التكييف 

مشكلتى فى التكييف إنه الأخ عمرو فاشل فى إنه يوطي التكييف وحسين مبيرضاش يقوله عشان ميحرجوش وأنا مش فى دماغي لأني بحب البرد لأن الدفا طالع من جوايا أنا من الحتة اللى مني :)

وطبعا قبل ما اخلص كلامي لازم أتكلم عن عن حسن , عم حسن يعتبر أسطورة أصلا وعايز له بوست لوحده يليق بيه :D

بس لازم أجيب سيرته النهارده 

**

وحشني ديكستر 

وفى كتب عايز أشتريها 

وفى قصة حب عايز أحكيها لكم 

آآآآآآآه صحيح إفتكرت 

أماااااااااااااااااااااااااااااااني :D

نتكلم شوية عن أماني 

***

أماني هي أحد إثباتاتي فى الحياة على أهم أفكاري وأخطرها على الإطلاق 

أماني قابلتني 

مشيت وسيبتها تروح 

إنتهي الموضوع 

ليه قابلتها أو بتثت لى إيه أو أى حاجة 

مفيش حاجة من دا كله مهمة دلوقتى 

لو كان الموضوع يستاهل كنت كتبت عنه 

فى ناس تستاهل إنك تكتب عشانهم بوست أو تتصل بيهم أو تبعت لهم مسج تقولهم بجد وحشتوني حتي لو بطلت تحبهم 

وتنزل تقابلهم عادي جدا وتتكلم معاهم لانكم انتوا الاتنين فاهمين ان اللى بينكوا أكبر من أى حاجة فى الوجود 

أمانى ببساطة 

كدابة 

بتكدب وهي بتتنفس 

وتقريبا بتقرا البوست دا 

وعايز أقولها : المرة الجاية هاتي معاكي بطاطس من اللى بحبها وأنا هحاسبك 

وعايز أقولها : لو فى مرة تانية أوعدك يكون فى مفاجأة تبهرك أكتر من أى مرة عدت عليكي فى حياتك :)

أما بالنسبة للناس الطبيعيين بقى ( المعقدين يعني ) أو الناس اللى ممكن ابعت لهم مسج واقولهم وحشتوني ووحشني الكلام معاكم برغم انى بطلت احبهم فانا واثق انها هتقرا الكلام دا وهتدخل تقولي ( قولوا لعين الشمس ماتحماشي ) وتقولى ( مبروك الشغل ) وتقولي ( على فكرة إنته واطي يا كريم ) للأسف كنت فاكر إن هي محبتنيش فى يوم لكن إتضح إنها حبتني أوي بس انا كنت غبي بما فيه الكفاية إني ماخدش قرار بأني أكون معاها , يمكن هي محاولتش , يمكن حبت البحر والهوا والجنون وأحلامها اللى بتشوفني فيها أكتر , مش عارف , بس أنا بعزها أوي وبقولها وربنا وربنا وربنا كمان مرة ( مفيش حد فى الوجود كله سمع كلمة شكرا اللى سمعتيها )

****

هوا : على فكرة يابني وربنا دي بتحبك 

أنا: طيب 

هوا : إتحرك 

أنا : هي عايزاني أعاملها بشكل ما وهي واثقة إني مش ليها ودا مقدرش عليه 

هوا : طيب هتمشيها إمتي 

أنا : مع الغلطة الجاية 

هوا : هي مبتغلطش ومووجودك وبتموت فيك وكل يوم بتقطع مكالماتك مع الدكتورة 

أنا : هي هتغلط لأني عارفها وعارف أي حد بيقرب مني أكتر من نفسه , لدرجة إني عارف مستقبل كل اللى فى حياتي 

هوا : واثق فى نفسك أوي ودي مشكلة 

أنا : مش مشكلة لما أكون أنا أكبر محل للثقة وعندي توكيل وماركة عالمية كمان :D

****

أما عن 

أحلامي 

وطموحاتي 

وأنا يعني 

آه صحيح 

المفاجأة :

بكره يوم خطير 

بكره أجازة من أول الساعة أربعة :D

بكره أول مرتب بعد التخرج 

بكره مسرحية إستنيتها شهور وكلمت المخرج والكاتب مليون مرة عشان يعرض مسرحيات تاني فى القاهرة 

بكره يوم خطير لدرجة إن الدنيا هتمطر 

ولو ممطرتش 

إعرفوا إنها إكتفت بإنها تمطر جوايا وتسقي كل الزرع والورد عشان الأمورة اللى مني 

صحيح 

هوا سارة فين دلوقتى ؟؟

تصبحوا على خير 

وعلى بنت بتضحك ضحكة زي السكر 

وهي مش عارفة إن الضحكة بتنور الوجود كله 

ومش مقتنعة بدا 

بس كفاية إني أكتر واحد مقتنع بدا 

صحيح 

نسيت أقول إني دلوقتى بقيت مبدع فى موضوع الحواديت دا 

وإني بحب منير

وإني أوعدكم بحكايتين فى سلسلة الراجل العجوز 

الاولي : آخر كلمة 

التانية عن : قوي 

التالتة عن : الشلن 

وبس كدا 

المدير العام 

 شاب فقري :P

تلات ملحوظات مهمين 

وكان لازم احدث البوست بسببهم 

:

أولا : انا بفكر أسيب الشغل بشكل جاد 

ثانيا : أنا محتاج اشتري جزمة جديدة :D

بس شكلها يدي علي كوتشي

ثالثاً: أنا بفكر أعمل العملية تاني 

برغم انى النهارده لما ركبت موتسيكل واجهت الموت أربع مرات أو خمسة لدرجة إنى كنت بكلم نفسي وفكرت فى الفرق بين مقاومة البشر ومقاومة الهوا وبين  الحال لو حصل مش فاكر إيه كدا ومستر عباس 

وبعدين فكرت انى محتاج اتنفس بحرية 

وافتكرت اخر مرة فى غيبوبة العملية شفت ايه 

ونزفت كام ساعة 

وقعدت فى البيت قد ايه ومستقبلي اتغير إزاي 

فات كتير 

لكن جه الوقت اللى الدكتور حذرني منه 

أنا محتاج أتنفس 

بجد بجد بجد انا مش عايز اقلبها غم 

بس وربنا حاسس ان الكون بيغني ليا وان فى موسيقى فى الهوا عشان تخليني انام دلوقتى وانا حاضن حلمي ببكره وحاضنها معايه

مش هتكلم كتير 

انا مش خايف من العملية للمرة التانية بعد مرور سبع سنين 

ولا خايف من الموت 

لانى كنت ببتسم عالموتسيكل 

انا مستني أوصل لقرار فى النقط التلاتة دول 

لأنهم وإن كانوا تافهين بالنسبة للناس 

بس مهمين أوي فى الوقت دا 

أهم شىء فى الوجود كله هما التلات نقط دول 

ومفيش حاجة تاني 

يلا بقى 

هروح اتفرج على وفاة البطل فى الموسم الرابع قبل ما يصحي من الموت ويقابل ايمي اللى بتحب روري ودى القصة اللى نفسي احكيها لكم :)

اشوفكم لاحقا بس المشهد اشتغل خلاص ومؤثر اوي 

تصبحوا على خير

قانون بقاء الفرحة

قانون بفاء الفرحة 

ملوش علاقة 

بالضي اللي فى عيونك 

ولا بالبسمة فوق شفايفك 

ولا الرعشة اللي فى إيديكي

ولا حتي ملكي ليكي 

له علاقة طردية بشوية حاجات بسيطة 

وفي عيون الناس عبيطة

أولا : بكونك إنتي مٍني 

مٍني  أنا  وبس 

ثانياً : ووجودك جنبي دايما

فى عز الفرح والجرح والوجع والنجاح 

والكسر والإنهزام 

وعشان أولا وثانيا 

ناتج المعادلة والقانون دايماً واحد 

بحبك بجنون 

وعشانك أنتي بس بقيت مجنون :)

:D

بعد الكلام الحلو اللي فوق دا محتاج أكتب وأحكي لكم كتير 

أنا لسه داخل البيت 

وحتي مشفتش التعليقات المركونة فى المدونة 

هنشر أكيد 

وهتكلم كتير 

بس أفوق كدا وأغسل وشي 

وأوعدكم أتكلم قبل ما أشوف حلقة ديكستر الجديدة :P

و قبل ما أكمل عزازيل أو أقرا فصل جديد فى الحب فى زمن الكوليرا أو حتي أشخبط لي فى صفحتين فى شيكاغو أو نسيان 

جاي لكم على طول 

بجد وحشتوني :D

فقري

راجل عجوز : خليك أصيل

ف &  م
كان يوم من الأيام اللى الشمس بتغرب فيها جوايا وبيملاني عتمة مبتنتهيش , الأيام اللى بحس فيها بإن الشرخ اللى جوايا ممتد لأبعد مدي ولأول ذكري ولأحدث حدث وذكري فى دماغي , من الأيام اللي كنت بمشي أدور فى الوشوش على المستحيل , ومن الأيام برده اللى كان المستحيل فيها إني أبتسم أو أحس براحة , من الأيام اللى برتعش فيها من البرد حتي لو الجو حر موت لأن البرد جوايا والتلجاية بتعافر عشان تقعد فى الشمس , مش فاكر بالظبط كان فى إيه ولا قد إيه كان حجم الوجع ولا حتي فاكر كان صيف أو شتا , كل اللى فاكره إني كنت فى الجامعة وقاعد قريب من باب مترو قدام كلية إعلام والناس رايحة جاية من قدامي ولكن اللى مروح وسايب المكان كان أكتر بكتير من أى حد جاي , مكانش في نسمة هوا جوايا تخفف عن قلبي كل الوجع الرهيب دا ولا كان فى رقم عالموبايل ينفع إني أتصل بيه لأن محدش موجود وكمان مكانش فيه حد أعرفه ممكن ييجي ياخدني ويخرجني برا زي ما كنت بعمل معاها ولا زي ما كنت بعمل كتير أوى مع كل الناس لما حد يكلمنى ويقولي أنا فى الحتة الفلانية فألبس وأروح أخرجهم بنفسي من اللى هما فيه , احيانا كنت باخد معايه حاجة تخرجهم , ولو حتي إبتسامة زي إبتسامات فنسنت فان جوخ اللى إترسمت من معاناة وشقاء رهيب وكان بيبان إنها أحلي إبتسامة فى الوجود , كنت لوحدي اوي والذكريات كانت مليانة وجع واليأس كان عامل زى سحابه من المادة السودا اللى فى اخر الكون بتمشي عالارض وبتعتم كل حاجة حتي نور الشمس , كان يوم مش قادر مجرد القدرة أفتكر اللى كان واجعني فيه لكن الأكيد إنه كان زمان أوي لما كانت الجراح لسه جديدة ومش متلوثه بفضول الناس ولا حتي بمشاعر كدابة من ناس كدابين ولا حتي بإحساس وهمي ولا عناد ولا غربة , كان  الجرح لسه جديد وكان مفيش مسكن يقدر عليه , كان فى اليوم دا كل حاجة مش فى مكانها وإلا مكنتش قعدت مكاني كدا ...

(( ملحوظة : كنت ساعتها بكتب برده عالنت فى المدونة القديمة ))

كنت متهندم وعلي رأي بنوتة من زمان أوي ( أمور وبريء وطيب ) هي كانت بتحبني ؟؟ مش مهم السؤال ولكن المهم الوصف , كنت لابس حتي الكاب اللى بحبه ( اللى ضاع حاليا واللي كنت شاريه مع حسام صاحبي واللي خلاني أصلا أحب لبس الكاب ) و الهاند فري القديمة والموبايل القديم التاني اللى بيفكرني بأغاني ومواقف لا تنتهي , كنت هناك , وفى عز كل دا نزلت الهاند فري ووقفت صوت المزيكا اللى كان مسيطر عليا ومخليني فى الجانب الضلمة من القمر , وفى وسط كل دا ظهر راجل عجوز , باين عليه العمر الطويل تقريبا خمسة وستين سنة وماشي بعصايه بيتسند بيها عالأرض ووقف قدامي وكلمني وقال : 

(( متشيلش الهم يابني , ربك بيبعت البرد علي قد الغطا , معلش خليك أصيل مهما عملوا فيك , وقول يارب ))

وطبطب عليا وسابني ومشي وأنا لسه مش عارف أرد أقوله إيه... كل اللى جه على بالي إنى أساعده او أعمله أي حاجة ترضيه فمشيت وراه وقلت له : محتاج حاجة يا حاج ؟؟؟

قالي :

(( ربنا معايا يابني , ربنا يحميك ويسترك ))

وسابني وكمل طريقه وهوا بيردد  : (( يارب يحميك يابني )) 

كان أول مرة أحس فيها بطيبة وحب من بعد أكبر الصدمات فى حياتي ....

ولسه نصايحه متعلقه فى دماغي ...

ولسه صوته بيتردد فى دماغي فى مواقف كتير جدا

 وعمري ما حكيت عنه لحد 

وبردد لنفسي دايماً فى أوقات كتيرررررررررر أوي ملهاش عدد كلامه :

خليك أصيل ...

ومقابلتوش تاني ولا عرفت حتي هوا يبقي مين ...

الجزء الأول من : راجل عجوز

شاب فقري 

نقطتين ورقم ونقطتين

من قبل ما تقرأ 

البوست Encrypted بالكامل وكل حرف فيه كدا 

مليان فى كل سطر قصة وحكاية وبٌعد مختلف 

وعبارة عن نقط ليست فى الترتيب السليم وأجزاء متصلة وغير متصلة 

وأحداث وأفكار وأشياء تخصني وجب تدوينها 

عشان تفهمه لازم تبقى أنا ... ولو إنته مش أنا ...

يبقى ببساطة

متتعبش نفسك 

***

لسه فاكر كل يوم كنت بمر فيه من نفس المكان 

كل مرة ببص على البناء 

البناء أخد تقريبا سبع سنين كاملة 

منهم تلات سنين كنت بعدي كل يوم من جنبه 

وسنة من قبل ما أعرف المكان 

وتلاتة بزوره من بعيد

المكان وهوا بيتبني كان ساحر 

كل لحظة كنت بعدي فيها من هناك 

بتخيل كل طوبة وكل حيطة وكل جزء بيتركب , بتخيل المكان بشكل ثلاثي الأبعاد 

بتخيل هيبقى عامل إزاى 

بقف فجأة وباخد نفس عميق جدا 

وببص للمبني وأغمض عنيا 

الإحساس دا من الأحاسيس اللي ملهاش مثيل 

كأنك طاير وكأنك بتركب كل جزء فى المكان بنفسك 

كأنك اللى مخطط واللى رسمت واللى قدرت تخرج حاجة زي دي للنور 

وقفت قدام مباني حية وغير حية كتير 

وكل طوبة وكل منعطف وكل موقف وكل نفس 

عليه إسمي محفور 

تخيل لما يبقى إسمك محفور حتي عالهوا 

:)

***

إنك تكون أعمي 

مش معني كدا إنك مش بتحس 

ومش معني كدا إنك مبتحلمش

I'm a Dreamer 

Am i good ? or Am i very good?

لما تكون قادر بشكل غير متناهي علي شىء للدرجة دي 

بيصبح من السهولة تلمس القمر وتحضنه أوي 

وتحس بكل دفا من نوره محدش بيشوفه ولا هيشوفه غيرك 

وتحس بكل نقطة ميه فى المحيط وبأغمق نقطة فى الضلمة فى أعماقه  

وتحس إنك بتغسل نفسك بالنور وأحيان تانية بتغسل نفسك بالعتمة 

تحس بكل الكون دا متدفق وبالزمن ساير جوا دماغك 

تباً لي لكم أنا أنا ...

أنا ( أنا ) وبشدة .

***

بحلم ...

أحلام غريبة حبتين 

ومش منطقية 

ولا لها علاقة بالواقع 

بس من إمتي حلمي وأنا نايم حاجة بتحكم فيها ؟؟؟

من زمان أوى بس محدش يعرف :D

كل اللي بيتخيل إني بتحكم فى حلم الواقع بس ... يبقى مش يعرف عني حاجة :)

مش فاكر التفاصيل لكن وصلت لفكرة 

فكرة رجعتنى للكلام اللى فوق من تاني ...

وبغمض عيوني وأحلم ( صاحي / نايم )

تباً لكم أنا ( أنا ) بشدة وكثيرا مني بداخلي .

***

نقطتين مختلفتين تماما وكأن الزمن بيلاعبني بهدوء 

كل نقطة بتكرر التانية وبعد ما يفوت النقطتين 

بييجى نقطتين تانيين يبقوا مكان الأولانيين 

يعنى النقط الأولي A & B

بعد ما B بتكرر A

 بييجى نقطتين تانيين C & D

( لسه جايين فى المستقبل لكنهم خدوا مكانهم وإستحقوا إنهم يكونوا نقط فى المكان المعلوم والملعون )

المفروض ان C تاخد مكان ال A 

وإن D تاخد مكان B

لكن اللى بيحصل هوا العكس 

 ( لو توهت فى النص وأنا بتكلم مليش دعوة , قلت من الأول متقراش , مش ذنبي فضولك )

لما بفكر بين نهاية ال A وبداية ال B بلاقيهم تقريبا أربع شهور عالخط الزمني للنقط 

ولما بفكر بين C & D بلاقى الفرق متلخبط لأنه مش دقيق بس هنقول ما بين بداية النقطة الأولي والتانية حوالي أسبوعين ؟ لاء عشر تيام :D

وبلاقى فى نقطة متحركة عنيدة بتظهر جديدة بتاخد الرقم 1000

بتخيل نفسي قدام المبني اللى إتكلمت عليه فوق بس بحط النقط مكانه وبتخيل الموضوع سباعي الأبعاد  مش ثلاثي زي السينما

بيكون الأبعاد ( طول وعرض وإرتفاع وزمن وإحساس و ظروف  و فكر )

برسم النقط بالنور والعلامات الحمرا والصفرا واللون الأزرق اللامع المفضل والأخضر الكاريبي وأنا فاشل فى إختيار اللون بس بحب فنسنت فان جوخ 

بستخدم لون غير معروف من صدع ميدوسا 

بربطهم بعيدا عن الخط الزمني 

بعمل معادلة تربط بين العوامل والإختيارات والإحتمال ونسبة الخطأ 

بحرك إيديا فى الهوا على عزف كمان جاي من مكان خفي جوا روحي 

وبطير بين الأربع نقط وبستنتج المعادلة حلها السليم الوحيد من خلال الإتزان اللامترابط بمعاني خالدة وغير خالدة وبكون بذرة فكرة التجريد وبنطلق جوا المكان 

بفكر فى النقط الأولي A & B 

لما بفكر فى كم المتعة المهول والإحساس المطلق فى لحظة بتمثل جنون لا يطابقه شىء 

بلاقي إن الموضوع زي ما يكون حلم واقعي وحدث عبارة عن حلم واقعي 

بوقع فكرة الحدث وبفكر فى المتعة وبعدين بمحيها وبركز فى الفكرة وطريقة الوصول ليها وبعظم طريقة الوصول 

لأن مينفعش تمشي فى الطريق أكتر من مرة حتي لو عارفه كويس 

أمال إزاى هتتفوق علي نفسك لو كل مرة هتمشي فى نفس الطريق هتوصل لنفس النتايج 

أنا مش عايز كدا 

مش مسألة نتايج مختلفة لكني عايز طرق مختلفة ومجنونة وإبتكارات جاية من قلب فكرة بتحرك كيان ( تعرفه أو متعرفوش ) مش موجود جنبك وبينه وبين مسافات فى الواقع , بخرج بالجوهر من الطريقة وبالجوهر بقدر أسيطر ولكن ...

المتعة ...

مش متعة الحدث الواقعي بس ولكن متعة الفكرة والمنطق والأسلوب والطريق والطريقة والإكتشاف 

مش فاكر مين اللى قال إن طعم الإكتشاف بعد فترة بيتحول وبيبقى زي طعم القهوة السادة 

أيوووووون ... أحمد مكي .

فكرني بأول وآخر دوا وأول وآخر حضن

برجع بعقلي مرة تانية والمرة دي جوا الشكل سباعي الأبعاد بتحرك وبظبط المعادلات من جديد وبحط طرق وإحتمالات وحسابات للإرتجال والحركة الحرة جوا الموقف الحر 

بفرد دراعاتي وأحس إني بشد المكان كله وبيصغر الشكل سباعي الأبعاد وبيتحول لمجرد شكل من النور فى حجم عقلة أصبع وبخفي الشكل بالكامل فى عقلي وبحس بإنتشاء النور قبل ما أتغمس فى نور أعظم 

بفكر فى تسلسل الأحداث والنقط والأفكار 

وبيظهر فى الواقع إنشقاق بحس إنه من طهره ممكن يخفي كل الوجع من سنين جت ومجتش وإتعاشت ولسه هتتعاش 

بركز فى الإنشقاق اللي ظهر فى الواقع وبتكلم معاه وبنضحك ومتحاولش تتخيل حاجة زي دي بتضحك إزاي لأنك هتصاب بالجنون لكن نقدر نقول إني عارف 

((

طعم السكر على شفايفها 

والحلم فى أحضانها حقيقة 

والسكة وياها بريئة 

هخلق مستحيل جديد منها 

))

فى حاجات لسه متمش إتصالها ببعضها لكن التوفيق بين مليار إحتمال فى واقع واحد وبدون ما أقوم بمسح أى واحد وببساطة بضم بعضهم مع بعض 

بحس إني دماغي فى عالم تاني ...

عالمي أنا 

ببتسم 

بضحك بسخرية 

بفتح عنيا فى دنيتي وأحضن الساعات واللحظات والحاجات اللى مش مربوطة بفكرة ولا بمعني غير بحقيقة خالدة مفيش منها تقليد ولا ربط لكيان سواء مادي أو ذكري وبحضنها قوي قبل ما يتكون منها الكيان( جديد وأسطوري وخالد وبجون حدود ولا حتي معرفة سابقة )  اللى بتبتسم  وتضمني وتسندلي اللاب و تمسك إيدي وتقولي كمل ... :)

***

بعيدا عن كل شىء 

صورة البوست من مسلسل ديكسترالموسم السابع الجديد الحلقة الأولي 

ديبرا وديكستر 

جاي على بالي حكاية جديدة غير حكاية العصفور اللى طار وسط النار وإتحول وبقي ... ( حدوتة مينفعش تتحكي هنا )

جاي على بالي برده حكاية إيمي وروري 

مش هكتب عن كل دول 

كفاية اللى كتبته 

لأني حاسس بخلايا عقلي بتطالبني بالتوقف 

لأن مينفعش كدا 

مش عايز أنام بس نفسي في آيس كريم من ماك :)

نفسي بجنون بجد ...

لازم أروح تاني 

بس المرة دي هخلق إختلاف جديد فى مكان جديد 

ومش هيبقى آيس كريم ولا هيبقى ماك 

جاي على بالي كلمتين 

الأولي إسكندرية 

والتانية والتالتة حدثين غير مترابطين بمكانين مختلفين بوجود مختلف وأشياء مينفعش نحكيها 

نفسي فى المشروب اللي كنت بشربه فى أليكس فى سيلنترو وفى الكافيه اللى قريب من السينما فى شارع فؤاد فى إسكندرية 

لازم ألحق الشتا بدري بدري فى إسكندرية :)

ولسه ميعاد بوست لما الشتاء يدق البيبان بتاع كل سنة لسه مجاش الميعاد 

توكلنا على الله 

حاسس بالشكل اللى طويته جوا دماغي واللى خيوطه وجدرانه نور 

بيدمج نفسه مع كل خلية قبل ما أحس بإني تقريبا كدا : مش تحت أي تأثير وحر زي ال...

:)

نقطتين ورقم ونقطتين

حرية

شاب فقري