كمان رسالة

 عزيزي كريم 

قريت رسالتك الأخيرة وبصراحة قلقت عليك كتير ، مش عارفة انت كويس ولا لا ، بس بتمني تكون بكل خير ، وحشني هدوءك والعاصفة شغاله جواك وانا برغي معاك رغي فاضي ، كنت دايما بتحب تحكي كتير وتتكلم بدون فواصل وكأن مفيش بكره وعايز تلحق تقول كل حاجة ومش عايز تمشي وانت في نفسك كلام، عارف يا كريم انا فكرت في معني الحب الحقيقي زي حالاتك كتير ويمكن اللي اقدر اقولهولك ان الامان الحقيقي والاطمئنان انك تحب حد يعرف يقول الحق حتي لو مستفيد من الباطل ، ، عارف صعوبة انك تمنع استفادتك من الباطل سواء شغل او مصلحة او علاقة عاملة ازاي ؟ الحياة صعبة يا كيمو وكل واحد بيدور علي اللي بيتحامي فيه ، في ناس بتجري ورا الفلوس عادي جدا وناس بتجري ورا حد يفضل يتعبد عند محرابهم ليل نهار لكن انت انسان قلبك نقي ونضيف واصيل ومهما اتقال عليك هفضل اصدق انك قلبك طيب لاني سمعت دقاته قبل كدا والقلوب مبتكدبش 

كريم المشكلة انت جزء منها مش هقدر اقولك ان المشكلة مش فيك ، سواء لوري او اي حد تاني فانت عندك برده مشكلة يا حبيبي ، متنساش كل اللي عشته و افتكر كويس ان الحب الحقيقي بينور قلوبنا وحياتنا وبيبان علي وشنا ، مش حبنا احنا يا كريم لكن حب الطرف التاني هوا اللي بينور وشنا يا كريم ، القلوب متعلقه بين ايدين الرحمن ، فلان النهارده ميعرفكش وبكره بيكرهك وبكره بيحبك لكن الحب الحقيقي مع اي حد مبيقولش الحق فهوا مش حب يا كريم دا مجرد قناع زايف وباطل يراد به مصلحة واستنفاع 

عزيزي وحبيبي كريم ، عارفه ان كلامي تقيل وان صعب الواحد يعيش في الحياة بدون ونيس يحس بيه يراضيه بجد وعارفه الوحدة متعبة قد ايه علي قلبك ومتنساش اني اول من صدق قلبك وصدقك ومتنساش لما قلتلك انك هتوصل لدرجة من النجاح انت ذات نفسك مش هتصدقها ، من رحمة ربنا بينا يا كريم هي الجهل بامور كتير جدا ، متفكرش للحظة ان ربنا هيسيبك يا حبيبي اتطمن 

لو مش عارف الحب مع لوري حقيقي ولا لا فاحب اقولك انه حقيقي بس ياتري في الالتزامات والحياة الشخصية هتقدروا تعيشوا سوا ، الحياه مع شخص زي انك تنصهر فيه بشكل تام ، ازاي تنصهر في الناس وينصهروا فيك يا كريم ويطلع منكم حاجة حلوة ، بيت هادي امان طمأنينة اطفال حاجات تقدر تمسكها بايدك وتحسها في كل لحظة في يومك ، انك تكون عايش في بيت حقيقي هوا دا اللي هيطمن قلبك 

حبيبي واسمحلي اقولك حبيبي لاخر مرة في الجواب دا علي الاقل ، قوم ارتاح ونام ومتنساش كلامي وافتكر اني عايزاك كويس وبخير واتطمن كل حاجةهتبقي كويسة يا كريم وافتكر اني انا كمان بحبك 

تصبح علي خير يا حبيبي