السبت، 19 أكتوبر 2013

ونفسي أروح وألاقيكي

وفينك ....Waiting 

حبيبتي / 
وهكتب ليه حروف إسمك ؟؟
أيوا طبعا ناوي أروح الكافية اللى هناك تاني
محدش أعرفه يعرف مكان هذا الكافيه غيري , تخيلي متعة الجلوس فى مكان والتفكير بالساعات ومحدش يعرفك هناك , يعني محدش هيقاطعك ولا حد هيسخف عليك ولا حد هيدايقني نهائيا بأي شكل ولا يخرجني من الحالة الحلوة اللى هعيشها مع نفسي ومعاكي لأنك ساكنة جوايا , عارفة فى مرة من مرات توهاني فى اسكندرية دخلت جنب مكتبة إسكندرية كدا فى منطقة تقريبا إسمها الأزاريطة وتوهت هناك بقى لحد ما قعدت علي قهوة بلدي قديمة جدا وفجأة هبت ريحة الحشيش , يومها كنت مصر إني أكتب وملقتش حاجة أكتب فيها لدرجة انى لفيت علي البقالين اقولهم هاتولي ورق اكتب فيه واشتريت قلم وقعدت عالقهوة وكوباية الشاي وريحة البحر والهوا , عارفة السحر ؟؟ أهوه بقى الجو ساعتها مكانش سحر وبس كان حاجة أقوي تحسي إن الورق القديم بتاع الجبنة اللى بيلف فيه البقالين الجبنة دا زي مخطوطة قديمة والكلام بيخرج لوحده والقلم بيخط بدون اى مساعدة , كانت من أمتع لحظات حياتي ويومها كتبت عالقهوة حاجتين : الأولي كانت : مهر عشقي والتانية كانت ( كان هوا ) واللى مقدرتش أكمل نشر فيها لأن بصراحة حسيت إن ممكن يهدروا دمي لو نشرتها لأن محدش هيفهمها بالشكل اللى عايزه يوصل وهيحصل هري وقلت فكك يا واد , تصدقي مش كل دا موضوعنا بس أنا قلت لك هحكي لك علي توهاني فى أليكس يعني هحكي لك :D , الخلاصة إن الواحد يروح مكان زي اللى كنت فيه فى الصورة دا وطبعا أكيد مش سلنترو لأن اللى فى إيدي كان مجلة للسنة أخدتها من سلنترو واحنا خارجين من هناك قبل ما نطلع عالكافيه دا ,مكان زي دا كدا والواحد يشغل أغاني وهوا النيل والهدوء الجميل بليل , بعد ميعاد المرواح يعني هنسهر للصبح , تخيلي الجو بقى ... أيون بالظبط كدا :) 
أنا نفسي أروح هناك دلوقتى وألاقيكي ...


***
آية ويسرا الهواري أغنية : أنا عايزة أروح وألاقيك ....
آه والله 
مش عارف ليه الأغنية دي مربوطة فى عقلي بأغنية منير بتاعة حرية اليومين دول بالذات ؟ ليه ياتري ؟؟؟
يمكن عشان الربط قوي بين الشوق والرغبة المجنونة فى اللقاء وتقريبا إستحالة حدوثه 
إنتي عارفة طبعا إن كلمة تقريبا دي إحتمالية وبالتالى جدلية ومش هنتناقش في نقطة الإستحالة فى لحظة زي دي ومش هقول إن بيني وبينك سور ورا سور وإن حتي لو نزلت دلوقتى من البيت عشان آجي وأشوف عينيكي من بعيد أو طلتك من بعيد هيبقى الموضوع مستحيل وممكن أصلا مينفعش نزولي فى وقت زي دا أو سفري كل المسافات دي , حظر بقى وعليكي خير :P
المسألة مش مسألة حظر 
المسألة إن برغم كل شىء فى حاجات بتعيش ودا هوا المهم , برغم البعد الحالي والمسافات الجاية والزمن الباقى والطريق الطويل والخنقة اللى بلا حدود اللى بتمتص كل حاجة حلوة وبترميها فى ثقب أسود وتحبسنا جواه محدش سامعنا هناك فى قلب الكون السرمدي دا وفى عزلة تامة وحتي لو حاولنا ننطق حيطاننا بتمنعنا ولو الحيطان سمحت فمفيش حد يسمع , بس برغم دا كله فى حاجات بتعيش فى حاجات بتعيش فى حاجات بتعيش فى حاجات بتعيش ( كفاية تأكيد كدا ؟؟؟ لاء لسه ) فى حاجات بتعيش فى حاجات بتعيش فى حاجات بتعيش ( أيون كدا كفاية )   :D

يمكن الربط جاي من خيالي ولا منك إنتي ؟؟؟
يمكن لأنه بيقولها جوايا قلبي شجر مقطوع , بعطش إليكي وأحن وأجوع .... ويمكن دا اللى حاسه ناحيتك علي طول ... مش كل الشوق غلط ولا عمر إن الواحد يحس كانت جريمة لكن الواحد برغم كل حاجة لازم يحافظ عالناس اللى بيحبهم حتي لو هيبعد عنهم مسافات من جواه أو حتي يعزل أجزاء منه عنهم ويحارب فى معركة عظيمة جوا نفسه ويموت كل يوم من أجل هدف سامي مؤمن بيه فى نهاية الطريق , المشكلة إن برغم كل الكلام دا محدش ضامن الظروف ولا ضامن بكره بس اللى الواحد لازم يضمنه هوا إختياره وهوا عايز إيه بجد بحيث يبقى عارف ومصمم ويفكر فى المعركة كويس ( هقلبها نكد صح ؟؟ طيب هسك عالسيرة ) الخلاصة يابابا إن فعلا أنا عايز أروح المكان دا وألاقيكي هناك ودلوقتى ,أيون أنا عارف إني مجنون وأعملها بس إنتي مش هتيجي :( وهروح أقعد لوحدي وأغني مع نفسي طول الليل برغم إن الهوا والليل بيبقى مرسال كويس أوي وبيبقى شاطر وبيوصل كل حاجة وصدقيني لما أقولك إني جربت مليون مرة وإتأكدت إن اللى بيتبعت بيوصل :D آه وربنا , الهوا دا جبار يعني :D


***
One Flew Over the Cuckoo's Nest (1975)
تعرفي إن دا الفيلم الوحيد اللى مش بعرف أكمله للآخر ؟؟ 
مش عشان مدة الفيلم طويلة أو ممل بالعكس لكن المشكلة فى كمية القهر واللى بصراحة عشت أو شفت أكتر منها فى حياتي فى مواقف وأحداث كتيرة وإستحملت وفاتت لكن عارفة لما يبقى البطل بيموت فى المسلسل ومش عايزه يموت او فى حد بيعذبه وصعب عليكي ؟ أيون بيبقى نفسك توقفى التعذيب , مش الممثل طبعا لان اكيد كل دا ديكور واكسسوار إنما إحنا هنا بنتكلم علي الشخصية والفكرة والبطل المكتوب ذات نفسه واللى عاش جوانا واللى حسيناه 
البطل هنا كان مجنون بالحرية , عاشق للحرية بكل شكل مش بيسمح للحياة تعذبه وتطلع عينه 
فاصل : 
تصدقي وأنا بكتب دلوقتى طلع لى صوت الشيخ إمام من الكولكشن دا بيقول : بيني وبينك سور ورا سور وأنا ولا مارد ولا عصفورررررررررررررررررررررررررررررررررررررررررررررر :) 
نكمل كلام بقى  :D
رافض للقيود وعاشق للمتعة فى الحياة وحالم وله قدرته علي إنه يخلق حاجات تفرحه مهما كانت بسيطة وتافهة 
أيون عارفة الشخص دا ؟؟؟
بالظبط كدا ..
مش بستحمل إني أشوف كمية القهر دي كلها برغم إنه بيكافح وبيكمل وبيستمر وبيقدر ينقذ ناس وبيخسر ناس وناس بتموت وفى الاخر صاحبه فى الصورة مقدرش يسيبه ويهرب لوحده فقرر يهربه معاه , إنه يموته ويمنحه الحرية المطلقة 
مش عايز أختتم البوست بيأس وسؤال : هوا مفيش حرية فى الحياة دي بجد ؟؟؟
فى كل جنب من جوانب العالم المقزز دا بلاقى القهر والموت والتمييز والغباء اللانهائي للبشر ياتري فعلا مفيش حرية إلا فى الموت ؟؟
ساعتها الواحد يقدر يطير ويروح لشبابيك اللى بيحبهم ويطمن عليهم كل ليلة وساعتها المسافات مش هتفرق ولا حد هيقدر يتكلم أو يمنع او حتي يحبس الواحد (( لاء طبعا محدش هيصطاد الواحد لما يبقى عصفور لأنه هيبقى روح يعني مش ينفع تتنش طلقتين وتتحمر فى السمنة :D ))
ما لازم إبتسامة كدا فى ختام الجواب والمرسال اللطيف دا :)

إستني كدا ؟؟؟ بفكر أتكلم فى حاجة تخص قوي الظلام :D
آه والله :)) ولا بلاش وكفاية رغي كدا ويخلص الجواب دا بدل ما تفتكريني بحاجة وحشة؟؟ 
كل شىء ناقص وكمالته مع ربنا زي ما قال مصطفي إبراهيم فى المانيفستو :)
الخلاصة جملة واحدة بس بخصوص قوي الظلام المنيلة دي : أحيانا الواحد بيبقى مضطر يبقى عامل زي قوي الظلام اللى بتطلع فى الأفلام تطفي النور وتكسر القزاز وتوقع الكتب ويبقى زي الأعصار كدا عشان فعلا فى ناس مينفعش معاها غير كدا لأنهم عاملين زي قوي سالبة فى الكون مؤثرة بشكل قمىء ومزري علي حياتنا فلازم الواحد يفرغ فيهم كل السواد اللى بيحس إنه لازم يطلعه ما يا عزيزتي مفيش ملايكة إحنا بشر فينا خير الملايكة وشر الشياطين والموضوع إختيار , ولازم الواحد يعرف ياخد قرار ويسيطر , أنا يقيت بتلخبط فى اللى بكتبه إملائيا ولازم أختم البوست بقى :)


كريم
كل يوم بقى :)
ولحد ما أمشي فى 26 
صورة + cover +بوست +جواب 
شاب فقري

P.S :الصورة فى الكافيه السري من كام شهر مع صديق جالي فى زيارة من برا مصر :D