الجمعة، 19 ديسمبر، 2014

لا تناقض جنتك

مش شايف جديد الصراحة :D
مازالوا : أيام سودا وبهايم Every where :D

الناس لسه زي ما هي 

وانا لسه بسأل نفسي 
إمبارح جه فى بالي الناس اللى بتكره كذا 
قلت انا ضد موقفهم المتخلف دا ازاى اسيبهم يغلطوا فى قيمة كبيرة او فى شخص بيطلع فن ما بطريقته وباسلوبه 
وبعدين قلت ثواني 
طالما هما بيمقتوه كدا 
وانا برده بتخنق وبتدايق وبكره بعض مغنيين المهرجانات ( بعض وليس كل ) اللى بيهبلوا وكل مزيكتهم هب ودب وترللي ومفيش كلمة ولا ايقاع تحس انه هبل 
طيب ما دا ممكن يخليني زيهم 
عزيزتي انا ازاى هحلم بأرض فيها تسامح وحرية وطيبة وحب وحاجات حلوة من اللى بنكتبها علي لوحة ورق ونعلقها فى أودتنا وأنا من جوايا فى ولو حتي نقطة من الكره لشخص أو فكرة 
إزاي هحلم بجنة أنا مستاهلهاش وبخالف أبسط ومبادئها ؟
إزاي هقدر أبطل أكره ولاد الوسخة ؟؟؟
أنا عندي قدرة عالتعامل مع أي حد 
لكن خلينا نيجي لنقطة الحب 
هل أنا بحب العالم ولاد الوسخة دول ؟
أنا بناقض جنتي :(

ضمي دا يا عزيزتي لمجموعة تناقضاتي اللى مش هيبقي لها تفسير
***
أنا بحب مستر آند ميس سميث 
عارفة المزيكا اللى رقصوا عليها فى أول الفيلم فى أول يوم إتعرفوا فيه علي بعض ؟
أيوا هي دي 
ما تيجي نشوفها إيه ونرقص عليها :D
(( وحشتيني ))
هبقي أجيبلك وردة لشعرك :)
فكريني :)
لما نبقى نتقابل بقي :D
 ***
بدأت أفكر وأصدق فى إن طاقات جوانا بتتحرك تجاه اللى بنحبهم , يمكن بتطمنهم ويمكن بتعرفهم فينا ايه 
زي بالظبط ما كل ليلة بعرف كل الناس فيها ايه 
أكيد حضرتك بتعرفي برده 
أكيد مش هيفرق لا التردد ولا الهوائي ولا الأنتينا ولا الحاجات الغريبة دي كلها :D
أكيد مش هيوصل غير بقوة الحاجات اللى بتدوم 
أقولك 
إستقبلي أنتي بس :)
***
النهارده حصل موقف عبد الله وأمجد
هبقى أحكي عليهم بكره 
تصبحوا وتصبحي :) علي خير 
 

الثلاثاء، 16 ديسمبر، 2014

In Time

عزيزتي 
كانوا بيسألوني دايما ويقولولي طالما أنت جامد كدا وبتنتصر فى كل معاركك ليه مش بتحارب دلوقتى ؟
ليه ساكت وليه واخد ركن ومش بتحاول ولو حتي محاولة تدخل المعركة ؟
عزيزتي 
هما ميعرفوش إن كل شىء عندي له وقته 
وكل مرحلة ولها حاجات خاصة بيها 
مينفعس تبقى شايف واحد فى الانعاش أو العناية المركزة وتقوله الله يباركلك روح إجري الماراثون دا 
كل معركة هامة وخطيرة ولها دور فى حياة الواحد بيكون لها وقتها 
أينعم تقدر تخش أكتر من معركة سوا 
بس لازم تكون معارك بسيطة أو مش بخطورة المعركة الكبري 
أنا مبسوط اليومين اللى فاتوا دول 
لأن حتي لما جه وقت المعركة لقيت إن الموضوع مستهلك تماما ومش فى حاجة أصلا لأني أحارب 
أنا بعمل اللى يريحني واللى يسعدني واللى يخليني أنام بليل بدون قلق أو إحساس بالذنب أو تأنيب الضمير 
أنا سعيد باللى وصلت له وإن شاء الله هوصل للى أنا عايزه 
بس الفكرة مش فى اللى وصلت له 
الفكرة إني حتي لسه مبدأتش أحارب وحققت النتايج الحلوة دي ؟؟؟
فاهماني يا عزيزتي ؟
إدا كان قبل المعركة وبعمل كدا ...
أمال لما المعركة تبتدي بقى ؟
إجابة السؤال دا هسيبها لخيالك 
بس خلاص :)
وفى الختام لك ألف سلام 
ودعوة من القلب ** وربنا ما يحرمني من عيونك الحلوة اللى بتقرا دي :)
و حاجات بتوصل بطرق محدش يعرفها غيرك :)

الأحد، 14 ديسمبر، 2014

فاكرة ؟



فاكرة زمان لما كنت بستغرب وأقول إزاي تنسي حلمك ؟؟ أو إزاي تنكسف من حلمك ؟؟

إياك تستسلم وإياك تفقد الأمل وإياك تنسي :)

خليك جرىء ولا يهمك لا حد ولا حاجة :)


بس كدا دلوقتى ...


الاثنين، 8 ديسمبر، 2014

Back Again :D

الوردة ال... ها :)
عزيزتي 
بعيدا عن ظلال كل شىء 
 الدنيا بتتغير والناس بتتغير ودا عادي ودا اللى اتعودنا عليه
السؤال الأهم : هوا إحنا ليه مبنتغيرش ؟؟؟
ليه مش بنستسلم لكل القبح اللى فى العالم ؟
ليه مبنصحاش الصبح نلاقى نفسنا ناس تانية ؟
ليه مبننساش أفكارنا ومبادئنا وكل الكلام الكبير اللى عايشين فى ضله وكل قناعاتنا والقواعد اللى بنتبعها ؟
عارفة إني أول ما بلاقي نفسي بسأل ليه بعرف إن الغلطة أقدم من إن الواحد يعرفها ولو عرفه حتي فمش هيفتكرها ولو حتى وصلنا لها بآلة زمن ولا حاجة مكانش في حاجة هتتغير .. أقدم سؤال فى التاريخ مظنش إن فى إجابة تتقال أو تتعرف تخلي الواحد يرضي
مفيش أسهل من الغلط وقلة الأدب و إن الواحد يفتري علي الخلق
لكن هل الواحد هتبقى نفسه راضية وهوا شايف نفسه بالمنظر دا ؟؟ إزاي هتبص فى المراية وإنت عارف إنك عايش غلط وإن أنت شخصية زبالة ؟؟ أو إن كل ما تفكر بينك وبين نفسك تفتكر إن شرك قدر يقتل حتي المروءة والرجولة اللى فيك ؟؟ قدر يقتل إنسانيتك وبقيت أشبه بالحيوانات بتتبع قوانين متخلقتش ليك
صدقيني يا عزيزتي لما أقولك إن بسهولة جدا ممكن أكسب أي معركة مهما كانت
المشكلة فى الإنتصار بشرف , بدون ما توسخ إيدك وتضطر تشوف نفسك ***
العالم مقزز ومقرف وكل ما ببص له بغضب وبكتم غضبي
خايف من يوم تكون فيه الظروف كلها غلط وتكون كل حاجة تيت تيت  و أطلع فى اليوم دا جناني وعصبيتي علي الناس
مش هتفرق هخسر قد إيه أو هخسر مين لكن يهمني جدا إني مبقاش زيهم
مبقاش من ضمن قايمة الزبالة فى العالم دا
من يومين كنت بحكي لصديق بقوله : إن أعظم المعارك هي المعارك اللى بتخوضها مع نفسك
كنت بشرحله نظرية الثانية الواحدة , الثانية اللى بتاخد فيها قرار وبتفرق كتير أوي فى حياتك
الثانية اللى ممكن تصنع منك إنسان كويس مهما كانت رغباتك وتوجهاتك ودواخلك
واللى برده ممكن تخليك تعيش ولا حاجة
فى وسط ما بحكي له مر عليا إحساسي تجاه العالم دا وقلت بيني وبين نفسي ليه  أوجهه لأشياء هتتعبه وتخليه دايما ينتصر علي نفسه ويطلع كويس فى حين العالم بكل هذا القبح , هوا انا كدا بحب الشخص دا وعايز له الخير ؟؟ طيب إزاي يكون الجواب أيوا فى حين إن كل اللى بيعمل الحاجات دي بيتعب وبيكره الدنيا
أنا عارف إني هوصل لحالة تصالح مع الدنيا دي
عارف إن كل الزهق والغضب دا هيختفي وهقدر أطلعه من جوايا فى شكل حاجات حلوة لكل اللى بحبهم , عارف إني هقدر أسيطر و أتحكم فى كل دا ... كله بيعدي يا عزيزتي
لكن المهم الأثر اللى هيسيبه جواك ...
لما كنت بعيد السنة اللى فاتت كلها كنت فاكر إن العيب فى المكان أو فى الناس اللى حواليا , فى الآخر إكتشفت إن العيب فى الناس مش فى العيشة ولا الظروف , العيب متأصل فى نفوس مريضة بالجهل ... حاليا بتمني يا عزيزتي ألاقى حد بيفهم أعرف أتكلم معاه :)
مجرد فكرة إني هقدر أسيطر وأتحكم دي وهرجع أحب الحياة تاني بتخليني أتدايق من نفسي أوي , إزاي أحب عالم فى غاية القرف ومليان مرضي بالهوس و أغبياء تخلوا عن إنسانيتهم و أشياء أخري كثيرة
محدش فى الناس دي يفرق
معادش يفرق فى عيوني فى الدنيا كلها حاليا حد
ودا علي طول مش بس لحظة كتابة الجواب دا
أنا مش عارف الجواب هيوصلك ولا لاء وهيوصلك إمتي ومش عارف برده لسه الوقت مش مناسب ولا إيه ؟
تظل خطاباتي ليكي هنا من أسعد اللحظات فى حياتي  يمكن لأانك دنيتي اللى مفيش مخلوق يعرف عنها حاجة :D
أنا مبسوط ونفسي أختتم الجواب وأنا مبسوط
هكمل لك وقت تاني يكون غضبي زال
وتكون الظروف أحسن
نصيحتي نصبر يا عزيزتي
كل حاجة بتخلص ... الليالي الباردة والأحلام السيئة والظروف التيت
إنتي عارفة أنا أقدر أسعدك إزاي وأقدر أغير الحال إزاي  .... صح ؟؟
عارفة اللى أقدر عليه كله ...
مش هتكلم أكتر
تصبحي علي خير يا عزيزتي
دعواتك

*****
عن حضرتي والمدونة وكدا :D
واحد إتناشر جه وخرجت ورجعت تاني لبيتي ولدنيتي :)
سعادتي فى آخر الفترة مكانتش تتوصف , فكرة إني مش رايح تاني كفيلة بإسعادي وتخليني أرقص واتنطط
عرفت ناس كتير وإتعلمت كتير وإستفدت ياما :D
كان مجرد ذكر أي تاريخ بيعدي واحد اتناشر بيسعدني وبستغرب فى نفس الوقت إن فى أيام وزمان قادم يتخطي الواحد من إتناشر
مش هحشر فى كلام كتير فى البوست وأرغي عالفاضي
للحديث بقية :)
P.S : إنتصرت فى كل معاركى فى السنة دي :)
أنا سعيد ومازلت أنا :) وبقيت بشوف أكتر :)
( ربنا يستر )

شاب فقري

الأحد، 24 أغسطس، 2014

ياريت

جاتنى مكالمة اليوم من رقم غير مسجل عالموب 
رديت لقيته محمد 
محمد قريبي ومعرفة وجدع جدا 
محمد كان المكالمة الاولى من سنينن لحد بيتصل يتطمن عليا 
أحوالك ؟ أخبارك ؟ عامل إيه ؟ هانت ... اصبر ... بدعيلك .. اما تخلص هتلاقيني مستنيك .. خلص انته بس ولا داعي للقلق 
باقي لك قد ايه ؟ المرة الجاية هنتقابل 
انت كويس 
بس خلاص 
المكالمة كانت أعظم أسباب سعادتي 
غيرت مودي وحسستني إن لسه فى خير وإن فى حد تربطني بيه صلة دم ومعرفة مهتم بالكلام معايه وبحالتى وباللى بيجري 

قد إيه حاجة تافهة وبسيطة وتكلفتها قليلة جدا ممكن تغير حالتك وتحسسك إن الدنيا لسه فيها خير وإنك هتبقى كويس وإن فى ناس واقفة بتساندك من بعيد 
ياريت كل حاجة سهلة وياريت الناس تفهم حقيقة حاجة بسيطة زي دي ممكن تعمل إيه 
ياريت ياريت ياريت يتفهم القصد
من الاخر سأظل مؤمن إن الناس اللى بتعقدها وإن معظم الحياة بسيطة بس إحنا غاويين تعقيد وكآبة

الموقف يستاهل التوثيق فى مدونتي 
لا يوجد ما يقال لمحمد سوي إني سعيد ويارب المكالمة تتكرر 
هسجل الرقم عالجهاز وبس ودا لأنه لما يتصل المرة اللى جايه واتفاجيء بيه هكون سعيد 
:)
كريم

الجمعة، 22 أغسطس، 2014

الحالة بتتدهور

النفسية زي الزفت وبعد الزفت بمراحل 
من 11 سنة محصليش اللى حصل النهارده 
:(
الحالة بتتدهور 
شكلي فعلا هيجري لي حاجة 
شكلي محتاج (( لومن ))
بداية عملية ريكفري 
حد يلصمني ويجمع شظايا البلور ويستحمل يمد إيده فى النار 
طبعا تقدري 
عقلي مش مستوعب للحظة دي 
:(
أنا هروح أكمل اللى بعمله 
شكرا شهر زفت ... فوت بقي مش ناقصة
بيس
** البوست نزل متأخر كان لازم ينزل إمبارح بس كان فى عطل
 


الخميس، 21 أغسطس، 2014

مين ؟؟؟



مين هيمد إيده فالنار ؟؟؟

*****
-  ها ..؟
- لم أنطق حرفاً
- ولكني مستمر فالإنصات والفهم
- إستمر فيما تفعله .

 
فقري

الاثنين، 21 يوليو، 2014

عودة الروح

عن بكره 
عن القاهرة 
عن النور 
عن روح النور 
عنك 
My Doctor
عن رجوعك هنا تاني 
لمكانك
عن الساعتين بتوع بكره
اللى بدعي ربنا يبقوا عمر بحاله
عن الأمان 
الثقة 
الراحة 
مرحلة العمي اللى ياما كلمتك عنها 
عن إنك تغمض عيونك وتمشي مطمن 
عن كل نفس منك بيطمني إن الدنيا فيها خير 
ولو مفيهاش خير غيرك 
فانا ملكت الوجود كله 
***
عن الضمة اللى بترد لك روحك 
عن الجنب الشمال اللي بيبطل وجع لما بتيجي 
عن عشقك اللى ملوش نهاية
عن الحضن اللى عرفت معناه 
عن النور اللى بيحتويني 
وبيبعد العتمة 
***
بكره جاي 
غصب عنه 
إن شاء الله خير 
حبك 
قبل 
وبعد 
وعالمدي 
وللمنتهي 
وحتي بواب الجنة 
قد كل قد 
وقد 
اللى مقدوش قد
حبك

***
21-7
أجازة من البعد والغياب 
الحمد لك يارب 
 
شاب فقري
P.S : متتاخريش عشان متجننش :D

السبت، 12 يوليو، 2014

حبل الوريد ( بوست مجمع )

قاعدة أزلية : كل الكوابيس تنتهي ..

الحب مبيخلصش يا عزيزتي 
كل حاجة فى الوجود بتخلص 
الكوابيس والأحلام والأماني وحتي الزمن والعمر ذات نفسه 
لكن الحب مبيخلصش 
بيكمل معانا للعوالم الموازيه اللى هننتقل لها يوما ما بعد الموت 
يمكن فى حياة تانية أقدر أشوفك أو أحبك أو أقربلك 
بس لكي ينتهي الكابوس اللى إستمر سنين وسنين 
لابد من قرار جريء وقوة فى تنفيذه وتجديد فى بعض الوعود وطلب واحد بس 
أنا عايز الكتاب 
:)
وينتهي الكابوس ويرحل ال boogy man اللى قالب الحياة رعب 
ويطير العصفور اللى بيصلي عشان يطير من جديد 
وتخلص الحكاية 
بعض الناس تستحق فرصة تانية وبعض الناس مكانتش تستحق الفرصة الأولي 
اللهم إرزقني القدرة علي التمييز بينهم يارب 
***
 كنت زمان بقول إحذر فإنك تخطو فوق أحلامي 
شعر لشاعر إنجليزي مشهور 
وكنت بحب الكام بيت دول أوي 
يمكن لأنهم بيحملوا التهديد والوعيد لكل شخص بيحاول يكسر احلامك بيحاول يدوس علي أحلامك 
لكن برغم كدا كنت بتعامل علي أساس إن الحلم شىء أبدي وقوي زي الموت والحياة وبيتصنف كحالة تالتة للإنسان 
وهي حالة الإنتقال من عالمنا لعالم آخر فى أوقات النوم والرؤي اللى بنشوفها والاحداث والتفاصيل وغير كدا كمان لما تبقى صاحي وتسيب عقلك يروح لبعيد 
الحلم هيكتمل مهما كان التمن ومهما كان اللى لازم تخسره فى الطريق عشان توصل 

****
وأنا الأقرب إليك من حبل الوريد 
عطرك ساكني 
طعم قربك 
الوصال 
المشي جنبك وكإني بتحرر من كل قذارة شفتها وعشتها فى العالم دا 
كل الحاجات الجميلة اللى ملهاش مثيل 
الطيران وإحنا سوا وإحساس إننا مش عالأرض 
وأنا أقرب لكي من حب الوريد 
لأنك مني 
ومين أقربلي مني ؟؟؟
***
 وسيبي روحك 
وإعرفي 
مكانك وبيتك دايما موجود :)
****
و إطلق الصبر في وريدي  ....
مهما كان السكة طويلة وبتمتحن الروح 
ففي صبر فى وريدي 
وفي أنتي في نفس الوريد

***
أحلم بقربك 
لتعودي للجانب الأيسر 
ونرتاح من جديد 
***

سبحان من خلق لنا فى الرحيل حياة 
وفى البعد نجاة 
وفى الفرقة راحة 
هرتاح كتير وأنا ماشي فى يوم من الأيام 
وعارف كويس أوي 
إني سايب كل الناس دي ورايا 
ومعايا وجوايا الحاجات اللى محدش يقدر ياخدها مني 
***
إزاي فى وطننا الحلم بقربك وحياة تجمعنا 
جنون 
؟
إزاي ؟
***
عزلتي عن الناس 
وبعدي فى المكان اللى انا فيه 
بيخليني أعرف كتير 
قدرت أبص جوا ناس كتير أوي 
من مكانى 
إتعلمت دا 
عرفت إن طاقة إحتمالي هي مزحة نسبة إلي ما أصبحت عليه تلك الطاقة 
قدرت أعيش من جديد وأشوف أكتر 
بشكر الظروف السودا والأيام الطين 
والصحاب الرجالة بجد 
شكرا 
#مستشار_إبليس 

هقوم أروح لدكتور السنان وأشوف ورايا إيه 
وربنا يسهل وأعرف أرجع أكتب تاني :)
شاب فقري

***
والسر 
والحلم
والأمل 
والراحة 
واصلين ما بيننا زي حبل الوريد 
مينقطعش غير بموت 
ولا يخرج منه نقطة إلا بموت برده 
----
بالمناسبة دا البوست رقم 1000 فى المدونة :)

الجمعة، 13 يونيو، 2014

شكلي

شكلي مش نافع لحد 
ولا فى حتة 
يبقى الأحسن 
مفيش حل إلا عباءة إبليس اللطيفة 
و طز فى الوجود 
طالما كدا كدا غريب 
فلأكن أنا حقا بدون أي محاولة لإفهامهم أو التقرب منهم 
ديك أبوكم كلكم يا ولاد المرة

شاب فقري

و نروووووح

نرقص بجنان
نرقص كتير
بدون حاجز او قيد او مانع او حاجة تشغل بالنا
فى ناس بتعتبر الرقص صلاة تعرفي دا ؟
انا منهم ... ؟ يمكن والله
ما هوا مش كل رقص ومش فى اي حالة
نرقص لحد ما نقع فى الاخر من كتر التعب و الراحة اللى خدناها من الرقص  
والعيون تغمض ونسافر عالم تاني ...
مرهق ومازلت بنفس الحالة من اللحظة اللى فتحت فيها البوست دا اول ما وصلت من كام يوم لحد دلوقتى 
الارهاق مبيروحش 
حاسس انى محتاج اسبوع فى حمام السباحة طافي علي وش الميه ببص للنجوم وبس 
محتاج اغمض عيوني 
محتاج اطفو فوق سطح الارض دي فوق الهوا وفوق السحاب 
محتاج ابقى خفيف للدرجة دي برغم انى همومي ومشاكلي بتشدني لسابع أرض علي عمق يناسب أعماق جهنم 
مرهق يا عزيزتي 
مرهق يا حياة 
مرهق يا كل الناس 
صرخة واحدة بس هتكون كفيلة بإنها تخرج  كل الرغبة فى البوح دي 
ويمكن مبوحش بعدها لأي مخلوق 
عارفة يا عزيزتي 
المشكلة بجد فى إيه 
؟
فى إن محدش يعرفني وإني فعلا غريب 
بفكر فى قواعد جديدة تربطني وتلزمني بحاجات كتير 
لأن الحالى عامل زي ما أكون فى سخرة للي بحبهم وإني أحد العبيد
بفكر فى قواعد جديدة جدا تغير الحال
لكن الحكاية مش سهلة ومش بتاخد يومين زي ما بيقولوا 
انتى عارفة اخر مرة اخدت قد ايه ؟
من فترة فى صديق قالي : مثاليتك متنفعش 
انا واثق انه كان علي حق جدا كمان 
لازم قواعد جديدة 
لازم خطوط جديدة 
حتي لو هتقيدني 
الحياة زي الرقص بالظبط 
القيد فيها ممكن يبوظ الرقصة بالكامل 
لازم تسيب نفسك تنطلق وتطير حتي لو حافظ كل الحركات والخطوات لازم مليون ارتجال ومليون احساس مغموس فيهم وحر بدون اي قيود 
لكن علي قد ما خطوات الرقصة او القواعد بتقيدك وتحبسك لكنها بتعرفك وبتعرف الرقصة بحيث إنك بتتعرف من خلال مجموعة القواعد زي الرقصة بالظبط ما بتتعرف من خلال بعض الخطوات والإيماءات 
مفيش داعي لحاجات كتير 
ولا فى داعي لضعف او احتياج كتير 
اللحظة دي خالدة فى الزمن لانها صحت قاعدة كنت بفكر فيها قبل كدا وطارت من ذهني 
( لأني لوحدي أنا هقدر )
فى اغنيه وبحتاجلك وتحتاجلي كان بيقول : لأني لوحدي مش هقدر 
ودا يمكن يكون صح 
بس فى اوقات مبيبقاش فيها الصح صح ولا الغلط غلط حتي فى حالة ثبات القاعدة وكونها مطلقة ...
لخبطة 
سيبيني أرقص 
إقري 
عزيزتي ((
ضمينى فى صدرك ...حتى اتنبأ
وانا لا اكتب .. او اقرأ.. 
)) * أمل دنقل - العراف الأعمي 

***
المجد لمن 
لا 
يعرفها 
أحد 
من  فقدت بصرها وعالمي و  حلمي  وظلت تصلي و تقرا الادعية وتغني المزامير فى معبد الإله لأنجو و لينتشلني الرب من الظلمات للنور ....... 

شاب فقري 
فى التوهة

السبت، 24 مايو، 2014

عم ينده لحدا ضايع

"عم ينده لحدا ضايع بده يدله عالايمان
مطرح اصابيعك علي كتفي عم يحرقني من ايام
يمكن لو بتبوسلي المطرح بتهدي اوجاعي وبتنام "
هبه طوجي - لا بداية و لا نهاية

احكي لي اكتر عن الحتميات و الاقدار والصدف والعلامات والاشارات والاختيارات والرغبات والاهداف والسكك اللي بتودي والرسائل والكلام في قعدة صمت وشاي عصاري

انا اكتشفت ان فعلا اسلوبي في التعامل ضيع مني حاجات كتير اوي
حتي لو كنت صح بس بتيجي لي اوقات بقرار اتخلي عن عقلي واتصرف بعبط او اجري ورا مشاعري او عصبيتي
يمكن الناس فعلا عارفين عايز اقول ايه؟
يمكن هما مش محتاجين الكلام محتاجين قسوة؟  يمكن محتاجين حنية في صمت؟
انا فكرت في كلام صاحبي وتعليقاته
لازم اسكت بقدر استطاعتي
لازم اركز
لازم ابطل استطرد في الكلام
عارفين المشكلة بجد في ايه؟
ان الواحد مبيعرفش غلطه غير متاخر اوي لما بيكون فات الاوان لتصحيح اي شئ

امتي ايه كانت لحظة البداية لكل الهبل دا واللي قررت فيها اتخيل عن تركيزي و عقلي واخد قرارات هبله؟
لسه عايش يعني العالم كله ملكي واقدر اغير واحقق كتير
 " انت ايماني الكبير  "
-هبه برده بس مش عارف انهي اغنية

احكي لي عن اسباب كل دا
كنت بدور ع الايمان؟
هل كنت محتاج فعلا حد اؤمن بيه؟
هوا انا كنت يائس كدا؟

هوا انا فعلا محتاج اغير النمط؟
هفكر اكتر واقرر
هل فعلا كنت ومازلت فاقد.  ايماني في الناس للدرجة دي؟


بيس ناو الحق الصلاة

الثلاثاء، 20 مايو، 2014

S.O.S

Help me
S.O.S
K

الجمعة، 16 مايو، 2014

أول بوست من ( أمان )


بما ان دا اول بوست من امان موبايلي العزيز وان اول مرة اكتب وانا بعيد كدا فانا مبسوط واشكر التكنولوجيا علي انها رمت امان في سكتي ومكناني من فتح مدونتي هنا عالموب

سعادتي لا وصف لها مع اني بكره التاتش عمي مقتنع اني من جيل الموبايلات ام زراير. اللي اما التعصب ترميها فالحيط وتلاقي الموبايل جاي ياخد بالحضن كدا ويقولك اضرب كمان انا هستحملك 
اللي اقدر اقوله حاليا هوا اني مبسوط بس مرهق ومسكر ببساطة تعبت من الزمن اللي عامل حاجز بيني وبين كل حاجة وكل حد مستنيه يكون معاليه
في ظل كل الملل والقهر والوجعواليومي لا املك الا اني اسافر بعيد بخيالي وساعتها بطلعبة برائعة الدنيا واقابل كل اللي بحبهم بالحضن واعي جوا دماغي حياة تنسيني كل ورجع بدل ما اطلق واموت من البعد والوجع والظروف

انا حر وعندي جناحات اطير بيها لفوق اوي هناك في قصوري   اللي بانيها وفيها حبايبي

نفسي في حقائق 
نفسي التقي كب الحاجات وكل الناس اللي ضاعت

  • نفسي الاقيك هنا ومش مجرد لحظة،  انا عايزك الف عمر وعمر

لكن زي ما ديكستر قال : 
الامنيات للاطفال وبس
 تحياتي 
P.S: هوا في ميت بيموت مرتين؟  
يلقي اكيد انا لسه عايش و لسه فيا كتير عايش


يارب انا تعبت
يارب خير
فات سنة 
واصبر واستناكي 
الحب والايمان بينجوا
وانتي مسيرك تبقي في مكانك للابد
وطنك
هنا

انا رايح اريح بقي عشان اعرف اطبق 
اراكم البوست. القادم 
دا لو كتبت عالتاتش دا تاني
 تحياتي
وعقخبال. كل. سنة وانتي حبيبتي 

شاب فقري

الثلاثاء، 13 مايو، 2014

الألبوم :D

المولي سبحانه وتعالي بينجينا من أماكن لا تخصنا
ومن أحداث مش هنبقى سعداء فيها 
ومن تفاصيل مش بتاعتنا 
ومن ناس مش هنبقى سعداء معاهم 
عالعمموم 
نقدر نقول جملة واحدة قالها هشام الجخ ربنا يباركله : 

روحي ياشاطرة هناك إنضمي للألبوم :D

نقول مبروك :D
 مع إنها جت متأخرة 

وبس خلاص
P.S :وربنا ما كنت ناوي أكتب الأجازة دي ولا ليا نفس بس من كتر الضحك قررت أكتب :D
 
شاب فقري

الأحد، 6 أبريل، 2014

عن هنا وهناك

أبعد نقطة بالنسبالك جوا الدايره...هيّا مكانك
ولأن أساسا ف الدايرة هنا هو هناك
 ف طبيعي تحس إنك عايش بـ إتنين جواك
لــ مصطفى ابراهيم.
***
#عن_هنا_و_هناك 
 
أولاً : المنفي
 
المنفي بيخليك حر 
أصل هيجري لك إيه أكتر من النفي عن وطنك ؟
هيحصلك إيه أكتر من كدا ؟
البعد عن كل حاجة حلوة من أول صباح الخير 
ومسكة الإيد 
وحضن 
ولقاء بدون مواعيد 
وكتب بتتقري ساعة العصر 
وشاي فى البلكونة فى نص الليل 
ومكالمة كلها عياط وخنقة بتنتهي بإبتسامة وحدوتة 
البعد حتي عن الإبتسامة الحلوة بتاعة كل لقاء 
والمعاكسات بتاعتك اللى بتغرق بيها وطنك 
وتتغزل فى الجنة 
وتتغزل فى نظرة العيون وتفاصيل الإبتسامة فى لحظة تخليها تعرف إنها أميرتك وشبه أميرات الحواديت 
وتتغزل فى شعرها اللى مشوفتوش أو اللى إتخيلته فى صورة 
وتحكي عن عشقها 
وعن الحكاية من الأول للنهاية 
المنفي بيبعدك عن مكالمة بتعملها الفجر وتقول ( إتفزعت ... فينك ؟ ) وتحضنها وتنام 
المنفى بيبعدك عن رسايل طول اليوم وحشتيني وحشتيني وحشتيني وحشتيني لحد ما الموبايل يقولك وربنا عرفنا خلاص بقى 
بيبعدك عن فكرة بتطاردك عن حلمها وبتتمني إيه وبتفكر فى إيه وإيه اللى هيبسطها 
بيبعدك عن بحثك الدائم عن هدية لها تسعدها وتفرح قلبها وتكون مفاجاة غير متوقعة 
بيبعدك عن تفكيرك فى إزاي تختصر حاجة حلوة أوي فى حياتها فى مجرد رسمة أو كتاب أو منديل وتديها دا كله هدية 
بيبعدك عن وقفتك فى محل الورد واقف عايز تاخد المحل وتجري بس بتفكر هي هتحط الورد دا كله فين ؟ فبتختار وردة حلوة وتسيب الباقى وتجري تخبيها من عيون الناس لحد ما تلقاك وتمشي وياك ماسكة الورد ومبسوطة وكأنها بتقول للكون كله دا حبيبي بدون خجل أو خوف 
بيبعدك عن مناقشات فلسفية فى أصل الحقيقة والموت والشوق والندم والإختيار واللى جاي 
بيبعدك عن الوعود اللى بتوعدها وبتقول إنك هتحافظ عليها طول العمر واللى بترميك بعد كدا فى شقاء لا نهاية له 
المنفي بيحررك من لحظات الغضب واللوم والزعل والوجع اللى هي بتعيشها وبتحاول تشدها منها فبتبقى عامل زي اللى بيمص السم من دراع طفل صغير والسم بيسكنك إنت 
المنفي بيحررك من إنك تسرق كل وجعها وأحزانها وتوعدها تخبيهم فى مكان مستحيل حد يوصل له وتنجح فى دا وترجع لها تلاقيها مشغولة بحاجات تانية وتقول أحلامي ومستقبلي ومقدرش و و و و 

***
وطنك 
 
وطنك بيحرمك من إنك تطير لفوق لأن قوانين الجاذبية فى الوطن بتربطك بكل الناس لحد ما يبقوا قيد أكتر ما هما جناح 
وطنك بيحرمك من حرية إنك تخرج لوحدك وتمشي بالساعات بدون ما يقلقك كل شوية بمكالمة تطلب منك فيها تعقل وتروح البيت وتديك وعد إن كل حاجة هتبقى كويسة مع إنك عارف إن دا مش حقيقي 
وطنك بيحرمك من متعة التعارف علي ناس جديدة وإكتشاف صفح تتقري تحت مسمي الغيرة ومتقدرش ومينفعش وميصحش وحياتنا وكلام كتير بيشكل قيود 
وطنك  بيلزمك بأمور شبه مستحيلة من خلال الوعد وخلافه 
وطنك بيخلي الغيرة تحرق قلبك تماما لما بيتصرف تصرفات حمقاء وبيحكم الأغراب فيه بأعذار واهية زي الصداقة ومنظري والمجتمع والناس تقول إيه 
وطنك بيخذلك بأعذار تنفيك وتوجعك وإنت لسه موجود فيه ومسيبتوش لحظة ولا خذلته لحظة 
وطنك بيسيب الظروف تتحكم فيه وميدافعش عنك ولا يتمسك بيك وفى الآخر يلومك إنت وينسي إنك مجرد بشر مش إله وإنك برده بتغلط عادي جدا ولازم تتسامح لأنك ملكش وطن غيره ولا قصدت توجعه  
وطنك بينسي إنه حلمك فمينفعش يتخلي عنك ولا ينفيك ولا يوجعك ولا يعذبك لأسباب ملكش دخل فيها 
وطنك بينسي يضمك كتير وبيهرب من أحضانك أكتر وبيحاول بكل طاقته يحسسك بإن مش ذنبه وجعك وإن لازم تستحمل وإنه مينفعش يتغير 
وطنك حلو وأحلي الأوطان فى الدنيا بس بيحبسك أوي ويقيدك أوي ويستعبط أوي
وطنك إمرأة 

***
وطنك من نظرة هيعرف إيه اللى بيبهرك فيه حتي لو اليوم مكانش فيه أي إشارة ولا علامة وهتروح وتكلمك وتقولك علي فكرة أنا خدت بالى من عيونك ومن نظرتك وعارفة إيه أكتر حاجة عجبتك النهارده 
وطنك هيحضنك بنظرة ويخطفك بعيد عن الناس وقت ما تحتاج تفوق وتدفن كل همومك 
وطنك هيفهمك حتي لو إتكلمت هندي وشفرت الكلام فى المدونة باللاوندي وحطيت تطعيم للمقالة رموز أسبانية و ألغاز يابانية معقدة برده هي لوحدها اللى هتفهم والناس كلها هتقف تفهم حاجة تانية تماما وتبني أفكار عبيطة فى حين إن المقصود تكتب لها وحشتيني وبس وهتعرف إنته غرضك إيه من صورة أو كلمة أو ذكري منشورة 
وطنك برده برغم كل دا هيقدر يحتويك فى لحظة ما تبكي لأول مرة من سنين وصوتك يرتعش ويبقى نفسك تقفل السكة وتكسر أي حاجة حواليك , لكن هتقدر تقولك : كل حاجة هتبقى كويسة , وتصبرك وتخليك أقوي وتقف علي رجليك من جديد 
وطنك سندك أمانك فرحك وحاضرك وعمرك 
وطنك اللى ميتوصفش ولا يتحكيش عنه 
***
المنفي اللى بيسيبك تستمتع بكل تجربة 
المنفي اللى بيفكرك دايما إنك معندكش حاجة تخسرها واللى يقدر علي حاجة يعملها واللى يقدر يقبض روحي يتفضل يحاول لأن أمر روحي من عند ربي 
المنفي اللى بيخليك تنطلق وتقف تحكي مع ناس متعرفهاش أو تروح إستوديو وتقعد تحكي ساعة مع أشرقت وبعدين تمشي أو تقابل مي فى حفلة فتقف تحكي معاها وتتناقش معاها نص ساعة أو تقابل أسيل فى تجمع وتقف تحكي شوية وبعدين تمشي وتروح بيتكم وتقتنع قناعة تامة إن لم يحدث شىء وإن مفيش حاجة تحس ناحيتها بالذنب وإنك هتعيش مبسوط لو فضلت عالوتيرة دي لأن ببساطة محدش هيقدر لا يوجعك ولا يخذلك وأديك بتقابل وتعرف وتشوف ويكفي إنك تشوف وهكذا تنعزل بعيد عن وطنك وتقرر تعيش وتتنفس 
المنفي بيخليك فى أي لحظة تقدر تطير ويحتضن حريتك بدون ما يكسرها زي ما وطنك بيعمل وبيسيبك تعمل كل حاجة ويستمر بحثك عن وطن أو عن حياة أو حتي تستمر عيشتك كدا فى الهوا طاير بدون أي قيد بتقدر تتواجد علي شجر كتير بس فى نفس الوقت ملكش وطن وبعيد عن وطنك 
***
اللى بيعشق الوطن وميقدرش يتخلي عنه 
ولا اللى بيدور عالحرية والمنفي مريحه تماما ومبسوط فيه ؟

***
الوطن حلو بيديك حاجات 
والمنفي برده بيديك حاجات 
والحيرة والعجز ملهمش نهاية 
والخذلان يبقى العنوان دائما
شاب فقري

الجمعة، 4 أبريل، 2014

The F D

No Thing To Say 

يوم متسجل فى المدونة 
 4 - 4 - 4

شاب فقري

ست أيام

رتب 
نظم 
إكسر الفوضي 
رتب 
رتب 
رتب 
إكسر كاس العادة 
رتب 
دمر الباترن بتاعك 
رتب 
شيل فكرة الروتين 
رتب 
إصنع 
إبني 
خلاص 
رتب 
أولويات 
أهداف 
نتائج مطلوبة 
أسباب 
حقائق تشعل النار 
رتب 
حول الطاقة من إتجاه للتاني 
إستخدم المتاح 
ركز 
إبني 
رتب 
إحرق 
إحرق كويس 
إحرق أكتر 
العلامات بتروح 
ولو مراحتش فالنسيان هيمحي سببها من عقلك وهتفضل فى إيدك 
إحرق 
إنطلق 
متسيبش ولاد الكلب يوقفوك 
صنعت الجميع 
جه دورك تبني من جديد 
وتصنع علي كيفك 
بدون فتح الباب لأي حد جديد يتبني 
بدون أي حد 
زي ما صاحبة النبؤه قالت : إنت قالت الناس , ملكش دعوة بيهم خليك فى حالك 
زي ما بقول : إتفو وكمل , النار اللى حرقتك هتحرق غيرك لكن كل شىء فى وقته 
متفتحش صناديق زمنية تاني 
عيش فى اللحظة دي وبس 
سيبك من كل اللحظات التانية 
مش مهم اللى جري 
مش مهم اللى حصل 
رتب 
مش مهم تفتكر 
مش مهم تشوف 
الفكرة والذكري هتيجي لوحدها 
إنطلق 
هما ست أيام 
يبتدوا هنا ويخلصوا هناك 
ونبتدي نولع النار كيفما نشاء 
*****

 طلع من جواك الشخص دا 
اللى محدش شافه ولا يعرفه 
اللى كانت بتخاف منه صاحبة النبؤه وبيسبب رعب لغيرها مجرد فكرة وجوده 
النور مطفي 
بإرادتي 
النور بين إيديا 
النور مش هدف 
النور بتتحرك بيه من نقطة للتانية 
إستمر فى الكتابة 
إنطلق 
خرجه يتصرف 
هوا عارف يتعمل إيه 
بيحرك القطع علي رقعة الشطرنج كويس وعارف كل شىء بيروح فين 
بينفذ الإغتراب الروحي بمنتهي الحرفية والقوة 
هيقدر يعيش فى كل مكان ويوصل لكل شخصية المطلوب ويحقق لها المرغوب 
هينقلهم اللى هما عايزينه وفى نفس الوقت هيصنع العازل المطلوب بين ال Core والوجود 
إعزلهم 
إحرقهم 
دمر وكسر 
بدون عواصف 
بدون هجوم 
بدون عصب 
وبدون عزف 
الضلمة مش محتاجة غير لحظة واحدة بس 
يغيب فيها النور 
وساعتها الساحة بتتملكها العتمة 
فى ناس فاكرة إن الضلمة متعودين عليها 
من كتر السهر 
الضلمة حاجة والوحشة حاجة والغربة والعزلة فيهم حاجة تالتة خالص 
فى ناس فاكرة إنهم إتبنوا الضلمة والعتمة من كتر وحدتهم 
الحقيقة إن العتمة مش محتاجة تتبناها 
لأنها أصلا مدفونة فى الصندوق اللى هناك جواك 
خرج العتمة 
إطفي النور 
إنطلق 

عقلك شغال 
****
 متنساش 
الحماقات 
وخيبات الأمل 
والغباء 
وقلة الفهم 
وانعدام الإحساس 
والقدرة عالقسوة 
متنساش كل صفة فيهم بتخذلك 
متنساش حاجة 
إوعى تقلل من حد فى موقعه وإلا هيسعي ورا خوفه 
مش هسمح لحد يسعي ورا خوفه ويحققه عشان يواجهه 
مش هسمح لحد يفرض علي حياتي هالة الخوف بتاعته 
***

 انت اللى بتحدد توقيت كل شىء 
كل شىء 
تبقى احسن 
او تبقى اوحش 
وبتمنح فرصة 
ولا بتبقى جت متاخر 
بتعمل إيه إمتي 
إنت اللى بتحدد الزمن 
فى اللى بييجي متأخر وفى اللى بيبقى عايز يكسر وخلاص وفى اللى جاي يمثل لهدف 
إتبت وحدد الزمن براحتك 
وصاحبي كان غلط 
مش لازم اعمل كل يوم حاجة صح وجديدة 
مش محتاج الصح 
انا هعرف اعمل الجديد وأخليه صح حتي لو كان غلط 
فى دستوري وشريعتي الخاصة ميفرقش كلامه ولا يهمني 
برغم إنه فى محله 
بس آسف يا صديقي 
وقت كلامك فات 
الوقت إتأخر 
إنسي اللى بتحكي فيه دا للأبد 
المرة الجاية هنتناقش فى الموضوع المهم 
لو كان لسه عندي إهتمام فى مناقشة إنسان فى أحلامي 
وأغلب الظن أو اللى هيجري إني هنطلق مع نفسي 
وبس خلاص
****





الإحتياجات تختلف 
أوقاتها تختلف 
الحالة تختلف 
المهم 
إن هيتم تلبية كل الإحتياجات بكل شكل 
ومش مهم كلام صديقي 
بلا صح بلا جديد 
هحقق اللى عايزه واللى بحلم بيه 
وطز فى الصح والغلط 
مهما كان الطريق هتوصل 
بس خلاص 
لو الأهم فى الرحلة هوا الطريق هنبقى كسبنا متعة التفوق فى الطريق والقدرات اللى قدرنا نطورها فى الطريق 
حتي لو كان طريق بيوسخ الإيدين 
لو الأهم فى الرحلة هوا النتيجة فإحنا برده هنبقى كسبنا النتيجة اللى حددناها 
لازم كل الإحتياجات تلاقى مكانها 
وطز فى الطرق كلها 

*****
 أتحرق بنفسي عادي 
لكن تحرقني 
يبقى لك حسابك 
الروح عاملة زي طاقة 
مبيبانش فيها العلامات زي الوش 
لكن بتحمل قراءات مختلفة عند مقابلة شخص زيي بيقدر يقراها 
عايز أرواح ينفع تتقري 
أرواح بريئة تستاهل فتح الكتاب والنظر فيه واللهفة للقراية 
عايز أرواح وشخصيات مختلفة 
متكونش أكليشيهات زي البقر اللى بيظهروا 
عايز إختلاف
هلاقى وهقرا وهستمتع بمعرفة حقايق أروع ونظرات أحلي وعوالم أخري بتتصنع 
لكن برده 
تحرقني أو تأذيني أو تتعبني 
فحسابك جاي عن قريب

***
 التذكارات مهمة 
بتعرفنا روحنا فين وجينا منين وعملنا إيه وليه واللحظة دي تتحط فى صندوق خاص بيها إزاي وليه ؟
التذكارات حياة وأحداث وأرواح محبوسة 
نوت بوك وسلسلة وقلم ومناديل وموستيكة وساعة وتيشرت وبرفان وكتب وكورة تلج 
التذكارات اللى لسه عايشة بتقول اللى المفروض نكتبه ونقوله فى صت كل ما عيوننا بتمر عليها 
إلتزم وإحتفظ وإقفل الخزاين كويس أوي 
***
هعرف أفصل 
هعرف أحقق 
هحلم بجنة مشوفتهاش 
هخلق الكام عالم الباقيين 
وأقدر أفصل ما بينهم 
وأحقق 
وبدون خساير 
هقوم أقف وأعمل كل دا وكل المذكور أعلاه بمنتهي القوة والحرية 
هنطلق حتي لو مفيش باور ولا حتي قدرة 
بس خلاص 

شاب فقري

#ولاد_الكلب 
#غضبان_جتكم_القرف
دلوقتى انا اللى قرفان منكم
دلوقتى أنا اللى هجري .... خلي الدنيا كلها تحاول تحصلني 
أما نشوف آخر الجري بتاعكم قد الجري بتاعي ولا لاء 
بس خلاص