الجمعة، 13 يونيو، 2014

و نروووووح

نرقص بجنان
نرقص كتير
بدون حاجز او قيد او مانع او حاجة تشغل بالنا
فى ناس بتعتبر الرقص صلاة تعرفي دا ؟
انا منهم ... ؟ يمكن والله
ما هوا مش كل رقص ومش فى اي حالة
نرقص لحد ما نقع فى الاخر من كتر التعب و الراحة اللى خدناها من الرقص  
والعيون تغمض ونسافر عالم تاني ...
مرهق ومازلت بنفس الحالة من اللحظة اللى فتحت فيها البوست دا اول ما وصلت من كام يوم لحد دلوقتى 
الارهاق مبيروحش 
حاسس انى محتاج اسبوع فى حمام السباحة طافي علي وش الميه ببص للنجوم وبس 
محتاج اغمض عيوني 
محتاج اطفو فوق سطح الارض دي فوق الهوا وفوق السحاب 
محتاج ابقى خفيف للدرجة دي برغم انى همومي ومشاكلي بتشدني لسابع أرض علي عمق يناسب أعماق جهنم 
مرهق يا عزيزتي 
مرهق يا حياة 
مرهق يا كل الناس 
صرخة واحدة بس هتكون كفيلة بإنها تخرج  كل الرغبة فى البوح دي 
ويمكن مبوحش بعدها لأي مخلوق 
عارفة يا عزيزتي 
المشكلة بجد فى إيه 
؟
فى إن محدش يعرفني وإني فعلا غريب 
بفكر فى قواعد جديدة تربطني وتلزمني بحاجات كتير 
لأن الحالى عامل زي ما أكون فى سخرة للي بحبهم وإني أحد العبيد
بفكر فى قواعد جديدة جدا تغير الحال
لكن الحكاية مش سهلة ومش بتاخد يومين زي ما بيقولوا 
انتى عارفة اخر مرة اخدت قد ايه ؟
من فترة فى صديق قالي : مثاليتك متنفعش 
انا واثق انه كان علي حق جدا كمان 
لازم قواعد جديدة 
لازم خطوط جديدة 
حتي لو هتقيدني 
الحياة زي الرقص بالظبط 
القيد فيها ممكن يبوظ الرقصة بالكامل 
لازم تسيب نفسك تنطلق وتطير حتي لو حافظ كل الحركات والخطوات لازم مليون ارتجال ومليون احساس مغموس فيهم وحر بدون اي قيود 
لكن علي قد ما خطوات الرقصة او القواعد بتقيدك وتحبسك لكنها بتعرفك وبتعرف الرقصة بحيث إنك بتتعرف من خلال مجموعة القواعد زي الرقصة بالظبط ما بتتعرف من خلال بعض الخطوات والإيماءات 
مفيش داعي لحاجات كتير 
ولا فى داعي لضعف او احتياج كتير 
اللحظة دي خالدة فى الزمن لانها صحت قاعدة كنت بفكر فيها قبل كدا وطارت من ذهني 
( لأني لوحدي أنا هقدر )
فى اغنيه وبحتاجلك وتحتاجلي كان بيقول : لأني لوحدي مش هقدر 
ودا يمكن يكون صح 
بس فى اوقات مبيبقاش فيها الصح صح ولا الغلط غلط حتي فى حالة ثبات القاعدة وكونها مطلقة ...
لخبطة 
سيبيني أرقص 
إقري 
عزيزتي ((
ضمينى فى صدرك ...حتى اتنبأ
وانا لا اكتب .. او اقرأ.. 
)) * أمل دنقل - العراف الأعمي 

***
المجد لمن 
لا 
يعرفها 
أحد 
من  فقدت بصرها وعالمي و  حلمي  وظلت تصلي و تقرا الادعية وتغني المزامير فى معبد الإله لأنجو و لينتشلني الرب من الظلمات للنور ....... 

شاب فقري 
فى التوهة

هناك 3 تعليقات:

Story pain يقول...

المجد لمن
لا
يعرفها
أحد
من فقدت بصرها وعالمي و حلمي وظلت تصلي و تقرا الادعية وتغني المزامير فى معبد الإله لأنجو و لينتشلني الرب من الظلمات للنور .......

اذهلتنى الكلمات... اختيار رائع...ممكن اسم القصه او الرواية اللى منها الجملة دى

نفسي الفضفضة اللى بتكتبها يا فقرى تجمعها فى رواية...هتباه اول رواية بالعامية...مش كان المفروض فى كتاب ؟ حاول تجمع بوستاتك وشوف دور نشر كويسه .. بجد تستحقعلى الاقل يكون ليك كتاب

Story pain يقول...

اذهلتنى الكلمات... اختيار رائع...ممكن اسم القصه او الرواية اللى منها الجملة دى

نفسي الفضفضة اللى بتكتبها يا فقرى تجمعها فى رواية...هتباه اول رواية بالعامية...مش كان المفروض فى كتاب ؟ حاول تجمع بوستاتك وشوف دور نشر كويسه .. بجد تستحق على الاقل يكون ليك كتاب

Do3aa El_attar يقول...

الرقص علاج .. بيخفف الروح وبيخلينا طايرين ... كل حركة بتوقع هم .. بس اكيد زي ما قولت مش كل رقص

"حاسس انى محتاج اسبوع فى حمام السباحة طافي علي وش الميه ببص للنجوم وبس
محتاج اغمض عيوني
محتاج اطفو فوق سطح الارض دي فوق الهوا وفوق السحاب
محتاج ابقى خفيف للدرجة دي برغم انى همومي ومشاكلي بتشدني لسابع "

الله .. يابخت اللي عايش فعليًا الحالة دي ..الناس اللي روحها خفيفة اللي طايرين وهما على الارض .. بس المشكلة في الهموم اللي بتشدنا لتحت :(

كن بخير :)