علي ايه

 علي ايه كل دا عمال تقولي لو قدامي طريق او فرصة اشرح واقول الحق واوضح وابعت رسايل واتنيل 

والله لو قعدت تتكلم ليوم الدين معاهم بشكل مباشر مفيش فايدة 

والله مهما عملت من حلو هيتشاف وحش 

والله مهما بعتت ناس ورسايل مع ناس واتفاهمت مع ناس واقسم بالله ما له اي فايدة

والله مهما حاولت معاها ومع اهلها ومع اي حد يخصها ما في اي فايدة

عشان خاطر اللي حاطط نضارة سودا علي عينه عمره ما هيشوف اي حاجة غير باللون الاسود 

لو كان في حاجة هتتقدر كان اللي فات اتقدر يا عينيا 

رسايل متبعتتش ١

الموضوع ملوش علاقة بعقاب او كره او  محبة كريم او باي حاجة غير حاجة واحدة بس ، الحرية المزعومة والوهم اللي الناس بتخلقهولك تستمر في العيشة ام بلاش معاهم 

كان نفسي ابعت او اخد فرصة اقول الكلام دا 

في حرية وخروج وفسح ومكالمات وصحاب وونس كبير كبير كبير 

لكن كله وهم مش حقيقي ميتقارنش بلحظة حب حقيقي او دفا ليلة اتعاشت او تعب ليلة عشانك من حد بيحبك

في فسح وخروج واستكشاف للعالم وونس ياما لكن مع ناس قليلة ورخيصة ومتسواش ، عشان مفيش حد بيحبك هيقولك ضيع عمرك في عزلة عن اللي بتحبهم واخسر حد بيحبك وعمل عشانك كل دا ، مفيش حد بيحبك هيشتم في اكتر شخص ضحي عشانك ويبعدك عنه ، اللي بيحبك بجد مش هيساعدك تاذي اللي بتحبهم 

في ونس وناس معجبة ياما وكلمات حب واعجاب من كل حتة ، انما مين هيكمل للاخر ويمد لك ايده وانت تحت ويسافرلك اخر الدنيا ويضحي بعمره ووقته وكليته ولغته ومذاكرته عشان يوفرلك حياة كريمة؟ ،مين هيروح لحد باب بيتك في مصر ويحط ايده في ايد اهلك ويتفق معاهم ويراعي ربنا فيك؟ مين هيتعب عشانك سنين عشان بس يشوفك بتضحك وسعيد ومش زعلان، 

كل الونس الكبير دا عايزين صحبة بنوتة عسلية حلوة حواليهم، صحبة الست احلي بكتير من صحبة الراجل وعايزين دا ببلاش ، صحوبية ويمكن كلمتين حلوين، ايه اكبر تضحية عملوها ، يجيبولك ملزمة او كوبايه شاي او حتي عزومة في مطعم او حتي مشوار ، لكن الحقيقة صفر ، مين ضحي ب سنين عشانك ؟

مين اتحسن وسافر لاخر الدنيا وعمل كل اللي في طاقته عشانك ؟

لو الحب افعال فانا قدمتها 

ولو الحب كلام فياما قلت وكنت بقول وحاولت بدل المرة مليون

ولو الحب تضحية فانا عملتها 

لكن كل دا دفعت فيه الغالي من عمري وحياتي وسنيني واتباع بالرخيص عادي 

خير لعله خسر ، هكمل عادي 

كل دا واكتر كان ممكن يتحل لو كان في طريق لو كان في وسيلة، بس دور المحارب الوهمي حلو ودمه خفيف ومسلي ، لازم نعيش دور اننا بنحارب مع اقرب الناس لينا ونعيش دور مش بتاعنا واساسا محدش بيحاربك 

امبارح فكرت في جملة ، ان اللي بيحبك بجد هيتلكك لك عشان يصالحك حتي لو علي موقف تافه ويقول دا عمل فيا الموقف التافه دا ويستاهل اصالحه

وان اللي بيكرهك برده هيحاول يدور علي اي حاجة تخليك تبعد عنه ويشتم ويعيب فيك

خير كله بتاع ربنا 

وانا متاكد ان ربنا كاتبلي الخير طالما بيحوش عني حاجة بحبها وبتاذي وبتالم بسببها كل شوية مهما بعدت ومهما سافرت ومهما خدت بعضي ومشيت 

كان نفسي يبقي في طريق تتحل منه كل المشاكل  الواحد حتي يعرف يقول الحقيقة منه بس هي إرادته كدا 

فالحمد لله

الف

 الف الفين تلاتة اربعه خمسة سته سبعه تمانية تسعه عشرة

اصوات كتير في الخلفية ، ديوك بتصيح و آذان واصوات لطيفة هادية بتسود المكان وأسئلة كتير اهمها ( هنعلن امتي ) مش عارف ايه الغرض من الاعلان عن حاجة خاصة ، ياتري الكون هيتغير ياتري طعم الحياة هيبقي احلي ياتري تحقيق الذات هيكون بالاعلان ، مش شايف الاعلان عن اي حدث كوني خاص هيكون له اي قيمة، مباركات من الحبايب وحقد من الحاقدين ورغي من الناس بلا طايل ولا فايدة ، فين الهدف ؟ 

تعالي ناكل برا ، نخرج ونركب اوبر ونتمشي و نسجل لوكيشن ونمسك ايدين بعض ونعدي الطريق وابتسامة خجولة وضحكة صافية وقلب بيحبك بجد ، قلوب كتير بتتجمع وتنطق بنفس الكلام ودعوات وحب ومباركات وتهاني ومحاولات كتير بلا داعي لطمأنة روح وقلب اطلا متطمن وراضي وسعيد ، واكل حلو وحضن هادي وبوسة خفيفة علي الإيد ، نور قلوب بينور المكان ويكبر لحد ما ينور البلد والدنيا كلها وينطلق وينور الكون كله ، هوا الوجود بقي حلو اوي كدا امتي 

قريت وسمعت وشفت كلام كتير عن العلاقات لكن مازلت عند يقيني ان العلاقة اللي تكون فيها ببساطة متطمن ومتاح ومش محتاج تخبي ضعف او تخبي مشكلة او زعل مهما كانت احوال الزعل واللي هيتنج عنه من خصام وهجر هي احلي علاقات ، علاقات خفيفة هادية حتي في الخصام كل واحد بيحب التاني وبيسنده ولو من بعيد ، بكلمة بصورة بتنهيدة بشوق بنظرة طيبة ، مفيش احلي من كدا ، مين قال ان الفلوس بتفرح ؟ زمان ايام زمان خالص كنت معدم ومكانش معايا اي حاجة كنت بحاول اعيش واقضي مضاريف واطور نفسي ، كان عندي شوبينج قهري بيخليني اصرف فلوس كتير عشان اسعد اللي حواليا ، واكتشفت ان الحكاية مش في الفلوس ، ناس كتير فلوسها قليلة ويمكن معدمة لا تملك شيء لكن بتدي وبتتقدر علي عطاءها حتي لو كان كسرة خبز ، الرضا والتقدير هما اللي بيخلوا بيت صغير جنة وبيخلوا علاقة بين الطرفين بلاد وبلاد تبقي جنة تتعاش وتتحب عشانها الحياة ، مش هعيش دور الحكيم في وقت زي دا عشرن مش سهران وقاعد اكتب عشان كدا ، لكن هي وجهة نظر 

عارف المتعة في الاسترسال في الحديث وتحكي وتحكي وتسمع وتحكي وتقول رايك حتي لو غلط وحتي لو قلقان وحتي لو وجهة نظرك مشوهة من السوشيال ميديا والعلاقات الضارة السامة بيكون لكل دا متعة لما تقعد تتناقش وتطلع من النقاش انسان احلي متطمن مرتاح بيفرح بتنهيدة وبكلمك طيبة من حد بيحبك بجد وبيقدرك ويقدر عشان يلف بلاد ويضحي بوظيفة ومستقبل مستقر وحلو في وطن زي مصر ؟ عارف كمية التضحية الرهيبة لما حد يرمي كل حاجة بنعني كل حاجة عشان خاطرك ؟ يقولك بص انا ميهمنيش دا وميهنيش كمان الفلوس ولا يهمني السفر ، انا ممكن اعيش معاك في اي مكان عشان بس انت بتطمني وتريحني وعشان الاهم من اي شيء في الدنيا هي حياة مستقرة مع قلب متطمن وراضي ، ننام بدون مشاكل ، نتخانق لحد عتبة اوضة نومنا ومسافة ما نفتح الباب وندخل نرمي كل حاجة برا وننام زي الاطفال في حضن بعض متطمنين، اتفاقات بتتحقق علي ارض الواقع ومشاكل بتتبخر واهل بيتراضوا وونس وحب وتضحية وعطاء حقيقي مش بس فلوس ولا شبكة ومهر بآلافات ولكن بحب ولكن بهدوء وراحة وامان ودفا ، عطاء حتي لو صغير ودبلتين بيتقدر 

العلاقات والجواز تحديدا اتخلق للسكن ، من فترة دخلت في نقاش وكان موقفي اني معنديش مشكلة انك تغلطي عشان ببساطة انتي مش ربنا ، اذا كان احنا بشر وربنا بيقولنا اغلطوا واستغفروا وانا هغفر لكم ، هل انا ككريم احسن من ربنا ؟ اكيد لا م اسامح ، زمان مكنتش متخيل كدا وكنت بقول الغلط اعتذاره انه ميتكررش ومش عايز كلمة اسفة لكن متعملش دا تاني ، مع الوقت كبرت وعقلت وفهمت ان اه كرروا الغلط يا جماعة طول ما في احتواء وحب حقيقي ، اعملوا نفس المشاكل ، عادي هنسامح ونغفر ونصبر ، ما اصل دي طبيعة الانسان وربنا خلقنا عشان نسامح ونغفر ونساند وندعم بعض ، كل الغلطات مغفورة طول ما احنا عايشين عشان دي طبيعتنا ومفيش حد فينا احسن من ربنا 

الامان مش بس في علاقة هادية او في لحظة حب صافية او بوسة ايد واحنا بنعدي الشارع او في حضن خاطف في اي مكان لكن الامان الحقيقي اني اتطمن ان حتي لو انت غلطت فانت عمرك ما هتضرني ولا دي نيتك ولا دا غرضك وان اي اثر وقع عليا من غلطك هتحاول تطمني وتمسحه وتشيله عني وتتحمل معايا نتيجة افعالك وافعال مش هعيش طول الوقت في دور الراجل الغول الشرير اللي بكل بساطة بيشيل ذنب كل حاجة لانه ببساطة برده يقدر ، مينفعش اعيش حقيقة غير حقيقتي ، يهمني اكون انا قبل اي شيء وفي كل الاحوال يهمني اكون كريم الانسان اللي بيحب حب حقيقي وبينفذ وعوده ولو مقدرش الطرف التاني بيتفهم ويرحم ويغفر ويساند ، يهمنس اكون كريم الحالم السكرة العسلية اللي بيبقي حنين في كل وقت وبيقف قدام اي حد ويدافع عن حبيبته ويديها عينيه عشان ترضي 

علاقة آمنة وحب حقيقي يعني مش محتاج اثباتات وحرق اعصاب عشان احتفظ بيك او اتمسك بيك ولا محتاج مليون تصرف عشان نقول انا مين وبعمل ايه وليه ، حد بيفهمك وبيديك اعذار وبيحتويك وبيتناقش براحة بدون قوالب تخليك تكره نفسك ، علاقة حقيقية تبقي خفيفة علي الروح تطمن القلب ، من كام يوم اتقالي : انا عايزه ابقي كدا طول الوقت لازقة للي بحبهم لا يسيبوني ولا اسيبهم خلاص انتهي مشوار الشا والهجر والتعب وكل حاجة هتبقي كويسة ، ونصا اتقال : هعمل اي حاجة عشان احافظ علي العلاقة دي ومهما كان اللي هعمله هيتقدر وفي نفس الوقت هيتصان ودا اللي يهمني 

انا عرفت من فترة اني محظوظ ومرزق دلوقتي اتاكدت وبقي عندي يقين ، الحمد لله رب العالمين

سويت دريمز ويارب بكره يوم خفيف وهادي بدون اي ضغوط او حاجات غريبة 

يارب يحقق كل ما نتمناه ويراضي قلوبنا ويعلقنا بكل ما يرضيه ويراضينا 

والحمد لله رب العالمين

الحجر و الشجر

 ناقص الحجر والشجر ينطق ويقولي البنت رافضة والسكة مقفولة وافقد الامل ومتحاولش 

ناقص حصي الارض ينطق ويقولي الطريق مسدود ومفيش فايدة والسكة مقفولة 

الحمد لله رب العالمين فضل ونعمة وكل اللي تجيبه كويس يارب 

والله يارب قلبي راضي اني عملت كل اللي في طاقتي لحد آخر نفس 

والله يارب راضي علي اني صونت العيش والملح وحاولت بدل المرة مليون 

الحمد لله

لحد آخر لحظة

 كل حاجة في الدنيا لها آخر ومحدش بيبقي عارف الآخر فين بس مطلوب منك تعافر وتحارب وتحاول لحد آخر لحظة، لحد ما كل حاجة تنتهي وتمون وتروح تبتدي حياة جديدة ، مش عارف هعمل دا امتي او ازاي لكن كل حاجة تبدو قريبة ويمكن اقرب من تصوراتي وتوقعاتي ، ليه بتحارب ؟

عشان الحب : ممكن تلف العالم كله وتشوف ناس قد كدا عشان تلاقي حد تحبه بنفس الشكل ، مش بنقول يحبك لكن تحبه وتقبله بس  وبرده نحط فيها جانب ان حد يحبك للدرجة دي 

عشان السنين والقرب والعمر : هتعيش كمان عشر سنين عشان تبني حاجة كدا ؟ مظنش عاد ينفع  عشان العشره والمودة والرحمة و السكن والألفة 

من فترة كتبت عن ان ربنا قال خلقنا لكم من انفسكم ازواجا دا غير ان كل روح بتتخلق مكتوبه عند ربنا 

من انفسكم يعني اللي بتاخده هوا المناسب ليك ومخلوق منك

وكل روح بتتخلق بمعني ان لو مكتوب لك ذرية او عيشة لو حتي لقمة مع حد هتاخدها مهما بلغت المشاكل عنان السماء 

الحمد لله انا معنديش حاجة وحشة تعطلني حاليا ، كل حاجة فابريكا ، النفسية في السماء ، الهدوء والراحة وستر ربنا واستقرار وامان ، كل الحاجات الحلوة كلها كلها كلها 

يمكن في حاجات تانية بتلمع في الدنيا 

لكن اللي حصل عليها خد ايه ، عارف ان الاغراء كبير ، سفر وحرية واقامة وشغل وصحاب وهيصة 

بس آخر اليوم كله بيروح يتحط في الدرج مفيش حاجة حقيقية كل دا وهم وبيطير ولو نفعوا حد كانوا نفعوا نفسهم 

في نماذج كتير حواليا كدا تايهين مجرد تايهين واقعين في المعجنة دي ومعنديش ادني استعداد اني اكون منهم 

المرة دي انا بكسر العداد وبتجاوز كل الحدود وبعمل كل حاجة وبدق كل الابواب بكل شكل عشان يبقي لو كل حاجة خلصت تبقي خلصت وانتهت 

المشكلة انك احيانا مهما عملت حلو للناس هتتشاف وحش ، مهما كان اللي بتقدمه او تقوله دايما هتتشاف وحش ومش كويس ، مهما كنت كويس وصالح وابن حلال وبتراعي ربنا وبتمشي في الطرق بتاعتهم 

ويمكن عشان كدا قفلت كل حساباتي التانية وعطلت اي شباك ، دلوقتي مش هستني حد يلعب بيا تاني ، او يتلاعب او يشتغلني او يتوهني ، معادش عندي براح لدا خلاص ، قفلت كل شباك اشوف منه حاجة تطمني او يوصلني حتي منه خبر او تديني علامة او تبسطني او تديني وعد او وهم مش حقيقي 

ويمكن كمان وصلت لفكرة حلوة في الحياة وانا بلف في القاهره وبلاقي معالم عمرها مئات السنين كنت بحبها بتتهد عادي جدا 

دلوقتي معادش لها قيمة وبتتهد ، طيب هل حياتي اكثر قيمة او حتي ذكرياتي او حتي اي حدث او شيء موجود عندي له قيمة ؟ اذا كانت الحياة طمست وكسرت وهدمت حاجات من مئات السنين 

الموضوع يبان ملعبك لكنه فعليا حقيقي ويمكن دي الفكرة الحالية اللي هتبعها عشان اريح قلبي واعصابي  وللابد 

مش هقعد اشوف تفسيرات تانية ولا هقعد ادور ولا احقق ولا احسب ولا حتي اتابع من بعيد زي ما كنت بعمل ، دا فوق طاقتي 

في كل الاحوال مش هسيب الوقت يعدي في حرمان وجوع وتعب وبدون حياة سوية 

ولو بعد حين: 

الحمد لله رب العالمين علي حاجات كتير ، من ضمنها الكام مليون محاولة دول ومش زعلان ولا ندمان عليهم بالعكس سعيد بحالي وبنفسي ، سعيد بالعيش والملح ، وسعيد اني عشت اوريدي حياة كاملة اكتر من مرة قبل كدا وانا احسن من غيري 

 زمان بعد ما خلصت جيش كنت قررت اخد كورس شبكات وفعليا ابتديت في الكورس وفي نص الموضوع  لقيت ان حلمي القديم بسفر المانيا ممكن واني ممكن اسافر وابتديت بحث في الموضوع وساعتها كنت خلاص هروح بكل بساطة كدا اخد كورس الماني واوقف كورس الاي تي 

لكني ساعتها كملت اكتر من شهرين تقريبا عشان سبب واحد 

عشان اعود نفسي علي اني لما ادخل حاجة اكملها ، عشان اعلم نفسي منسحبش من حاجة عشان الوقت والمجهود والحمد لله ربنا جازاني وشغلني وساعدني ورحمني 

الحمد لله والله ان الدرس اللي علمته لنفسي فضل موجود وبرغم زهقي وخنقتي من حاجات كتير الا انه استمر علي خير والحمد لله وفضل أثره موجود 

ربنا لحد دلوقتي بيعلمني دروس علي ايد الدنيا وعلي ايد ناس كتير 

من سنتين كنت بتألم وبموت ومليش مكان في الدنيا ومروفوض في كل حته وكل مكان 

والحمد لله ربنا جازاني كل الخير ، لو كنت ظالم او وحش او مستاهلش مكانش رزقني كل دا وجازاني كل دا 

مكانش زمانه رفع بييا ونصرني ونجحني 

الحمد لله رب العالمين

هفضل احاول لحد اخر لحظة مش حاجة عيب ولا تسيء ليا بالعكس 

انا سعيد بنفسي وحالي وسعيد باللي وصلتله من اي حاجة سواء نجاح وهدوء او صبر او راحة بال او اي حاجة 

الحمد لله رب العالمين 

يمكن كل اللي بيحصل من فشل محاولاتي دا رسالة من ربنا اني ابتدي احاول وابني في مكان جديد ، نجاة ربنا ممكن تكون في مكان تاني لازم ادور عليها واوصلها ، الحياة الاسرية وشريكة الحياة و الحضن اللي يريحوالبنت العسولة اللي تقف جنبك وتدعمك نفسيا وتريحك ، موجودة في مكان تاني ، مين عارف 

هستني واشوف نجدة ربنا بعينيا 

هانت ، خلينا نكمل في اخر لحظة ولحد هنا حلو اوي اللي وصلنا له ، فضل ونعمة من ربنا ونكمل محاولاتنا وبعدها نستني نصيبنا ونستني الاحلام وربنا يعوضنا بكرمه ، مفيش اعظم من كدا ، انا اثبتت جديتي المرة دي مليون مرة والحمد لله 

معادش في حاجة تانية تتعمل الحمد لله

اجازة سعيدة يا كرمللة