الخميس، 31 يناير 2013

دعوة فى المطر

وأنت العالم يارب 


يوم مطرة وتلج 

والصبح بدري أوي برغم إنى منمتش تقريبا تلات أربع ساعات علي بعض 

بس يوم زي دا ميتفوتش 

لازم تبعت حاجات مع المطر 

لازم تفكر البرد والتلج بكل حاجة 

 وإنته عارف إن كل المرسل هيوصل 

متأكد

يارب

شاهد يارب ...

كنت عايز أقول إيه ؟؟؟

آه , بس كدا 

كريم

Focus

تقدري تكوني مليون حاجة

ليه دايما بتختاري بالشكل دا ؟؟؟


***




أنا الشخص اللي دايما بيقف فى وش القطر

بيحارب ضد التيار

لآخر نفس

آخر نفس

لآخر نفس

ببقي عارف اللي قدامي قوته عاملة إزاي

ببقى عارف أكتر مما اللى قدامي باين عليه

بشوف كويس أوي

أكتر الأشياء اللى قدرت أحافظ عليها علي مدار العمر اللى فات هي بصري وبصيرتي


ليه بقى ؟؟؟

ليه تظهر عكس ما انته ناوي ؟؟؟
ليه تظهر عكس ما إنته هتتصرف ؟؟؟
ليه توضح حاجات ومتعملش أى حاجة ؟؟؟

هوا المفروض أنا أروح أقف قدام القطر كل مرة وأستني إني أصده وأكسره حتت من هول الصدمة ؟؟؟

أنا مش عايز أكسر حد حتت

لا قطر ولا حتي كوباية

أنا مش الشخص اللى بيكسر

متعودتش أكون ومش هكون الشخص دا

قلتها مليون مرة ومش عارف هقولها كام مرة تاني

أنا الحمد لله بقدر أصلح كل حاجة مرة وإتنين وعشرة وتقريبا لحد المليون


بقدر أفتح الأبواب وأخبط عالأبواب 

بقدر أقف مكاني وأتبت فى الأرض زي العيل الصغير لما يقولك مش ماشي 

وقوة الدنيا كلها متقدرش تحركني 

ليه بقى كدا ؟؟؟
ليه ؟؟؟
ليه بعد كل اللى شفته أو فهمته أو إتقال 
يحصل كدا ؟؟؟

طيب أديني مستني 

أما نشوف 

هفضل واقف قدام القطر 

الخوف لو كان جوايا أنا متقبله ومتقبل النتايج 

بس مش متقبل من وسط النتايج حقيقة إن شخص آخر يبقى قدامه يوقف القطر وبرده يدوسك فى الطريق 

***

كنت مع صديق ليا من يومين بنتكلم عن الحب يعني وعن حكايات كتير 

فى وسط الكلام لقيته بيقولي ليه مش تتكلم وتتحرك ؟؟

كانت الإجابة كرامتي 

كانت الإجابة اللي رد بيها عليا 

نظرة إستهزاء بالجملة اللى قلتها 

وقال مفيش كرامة فى الحب لأن اللى بيحبوا بعض  بيكونوا شخص واحد 

أنا مقتنع جدا باللي هوا بيقوله 

بس يمكن الموضوع مش موضوع كرامة 

موضوع إن إنته حتي لو واثق إن اللى قدامك لسه علي وعده وبيحبك 

بس شاكك فى العقلية ممكن تتصرف إزاي 

في حين بتدي كل الإشارات والتفاصيل والتلميحات اللى تخصك إنته وبس  عن الحب 

 عارف التناقض ؟؟؟

أنا ممكن اتعامل مع أى شىء وأحل أى مشكلة وأصلح أي متكسر 

ولكن لابد لكل دا من تحقيق شىء إسمه (( وجود ))

أنا هقدر أعمل إزاي دا كله لو مكانش فى وجود 

؟؟؟

ما هوا شىء بعيدا عن العقل والمنطق كدا هعمل كدا لو كنت أنا ساحر 

أنا ساحر فعلا 

بس مش للدرجة دي 

حتي السحر عشان يتحقق (( زى ما أنا مؤمن بيه )) لابد من وجود 

العشر دقايق الضوئية أنا أقدر أمشيهم فى لحظة يمكن أسرع من الضوء 

وجاهز للى هشوفه 

ولكن .....

لو هتقطعهم فى لحظة فلازم الجنب التاني يكون فاتح الباب عشان متخبطش فى الباب وانته ماشي زي العبيط 

وساعتها تبقى عبيط فعلا (( الكلام عليا ))) 

هوا عنوان البوست إيه علاقته بالمكتوب ؟؟؟

مش ضروري حد يفهم العلاقة بين العنوان والمكتوب , أكيد فى حد معين هيقدر يفهم 

***
أنا بس عايز لما أنام أعرف أحلم حلم طبيعي زي بقية خلق الله 

عايز أرتاح 

كل واحد عايز حاجة 

وكل واحد يقدر يحقق للتاني حاجة 

أنا بقى 

عايز لما انام أحلم حلم طبيعي زي بتوع زمان 

دلوقتى مش عارف وأنا نايم أحلم حلم طبيعي 

مش عايز أحلم إني بقع وإني بمد إيدي عشان أمسك الهوا 

انا مش عايز أمسك الهوا 

انا عايز اتنفس 

مش عايز اموت 

أينعم كل شىء فى الوجود قابل وبشكل تام للتغيير 

بس فى حاجات مبتتغيرش 

وبرده مقتنع إن .....
إن 

إن الواحد يقدر يحارب لحد ما يوصل للي هوا عايزه 

ليه تلاقى المعركة جاية من كل إتجاه 

أنا حاليا من العزلة والوحدة إني مش لاقى حد حتي أتكلم معاه ولو بشكل ودي وأقوله ناوي أعمل كذا بكره 

فى اللحظة دي بفكر فى الأشخاص المهمين جدا 

بفكر إني ممكن أكون غلط 

بس إزاي غلط 

وكل الأشارات دي ؟؟؟

يبقى كل الإشارات صح 

بس الغلط فى إيه ؟؟؟

انا مش عايز تفسير 

ولا عايز أجوبة 

أنا عايز أعيش حقايق 

مش عايز أوهام ولا عايز كلمة تتقال ملهاش معني أو مش حقيقية 


بعد كل دا 

طيب خلينا نقرا الكام سطر دول 

////

لا أدرى ... ما علينا الآن ... تبدأ عيناى فى رؤية تفاصيلها التى بدأ قلبى فى عشقها قبل أن يراها من هذا الصوت الرقيق قبل أن ألتفت نحوها ... طويلة نوعا ما ... ترتدى نظارة شمس كبيرة تخفى عينيها وطرحة تحمل لون حجر الفيروز وفستانا أبيض يحمل فراشات باللون الوردى ويخيل لى أنها حقيقة وتتحرك مع نسمات هواء البحر حولها وكأنها وردة برية ... هادئة .. رقيقة .. سماوية .. تنتمى للبحر ... تنتمى لبلاد فتاة أحلامى ... 


#قصة هنا فى المدونة 
#فستان 
#أغنية
+

مسار إجباري 


شعر أشرف توفيق 

///
يبقى أكيد أنا مش واهم 

يبقى أكيد دا حقيقة 

يبقى أكيد انا بتكلم صح والناس كلها غلط 

فى حالة زي دي يبقى أكيد أنا شايف صح 

لأن الحقيقة مش بيغيرها نظرتك ليها 

الحقيقة حقيقة غصب عنك وعني 

نظرتك ليها مجرد فيلم سينما ممكن يكون متصور غلط أصلا 

لكن المرة دي وبرغم كل شىء الحقيقة زي الفيلم 

يبقى هاو بقى ؟؟؟

خوف ؟؟؟

طيب ما الخوف طبيعي فى كل الناس 

خوف من بكره ؟؟؟

محدش ضامن عمره 

خوف من اللى ممكن يجري ؟؟؟

ما هوا لو كل واحد هيخاف من اللى هيجري يبقى كلنا هنقف فى مكاننا ويبقىى مننزلش من البيت أحسن 

ولا إيه ؟؟؟

الخوف مفيش مانع يكون موجود بس متخليهوش يبقى عقبة فى طريقك وتبقى عامل زي العيل اللى واقف يشاور عالكلب اللى جوا بيت الجيران ومش راضي ينزل من البيت لاحسن يعضه 

يابابا فوق - الكلب جوا بيت الجيران - وانته برا فى الشارع  - خايف من إيه بقى طول ما الكلب محبوس ؟؟؟؟

ما هوا بالعقل كدا 

طيب بلاش العقل - العقل وحش ورخم وبيودي فى داهية مش عايزين نروحها 

بمراجعة التاريخ - بلاش مراجعة التاريخ وحشة وبتفكرنا بحاجات إحنا أصلا ناسيينها 

يبقى بالاحساس - طالما هوا الحاجة الوحيدة اللى باقية - هوا انتى حاسة اصلا ان ممكن ييجي شر من كدا ؟؟؟

أنا تقريبا هتجنن عن قريب 

انا يدوبك بس 

محتاج وجود 
محتاج أنطق 
محتاج الباب ميكونش مقفول 

أو يتقال بصراحة الباب مش مفتوح ليك 

الباب مقفول 

مالها الصراحة 

بتنقذ الموقف 

بس تبقى صراحة وحقيقة بجد 

مش انا مثلا اقول انا مش طايقك يا فلان عشان انا بحب نفس الفلان وخايف علي نفس الفلان مني 

لاء 

قول الحقيقة 

وبس 


خلي غيرك يتعامل معاها ويقدر يعيش ويتنفس بدون وجع 

****

يا عاشقة الورد 
إن كنت علي وعدك 
فحبيبك ينتظر 



شاب فقري
بعد الميسد كول دا كله أكيد

الأربعاء، 30 يناير 2013

لما روحت أنتحر

(( لما روحت أنتحر يا كريم ))

هوا قال الجملة وأنا تنحت 

إنته بتقول إيه ؟؟؟

كلمة (( أنتحر )) صداها بيتردد فى عقلي لحد لحظة كتابة البوست ولحد لحظة قرايتك السطور 

إزاي ؟؟؟

طب ليه ؟؟؟

طيب ..................


فقدت قدرتي على التعبير وحطيت إيدي علي خدي وسمعته 

الغريب مش فكرته فى إنه ينهي حياته 

أبدا ...

الغريب إني مش لوحدي اللى بقول الجملة دي ...

أنا تقريبا تسعة وتسعين فى المية من تصرفاتي بتعبر عن رغبة فى الإنتحار 

من أول عبور الطريق الصبح 

والسكر والعادات الغلط وكمان الناس الغلط

أنا فاكر أول مرة من ست شهور رجعت أعدي الطريق بالشكل دا 

كان يوم إتنين وعشرين ستة الفين واتناشر 

فاكر ساعتها الطريق كان عامل إزاي والهوا والبرد 

فاكر الضلمة اللى كانت مالية الوجود 

لسه بعدي الطريق بنفس الشكل إلي هذا اليوم وهذى اللحظة

نحن معشر الحمقي الغير راغبين فى الحياة اللى أقدر أقول إننا ببساطة عايشين ونفسنا فى حاجات بتصنع لنا معني للحياة ومش طايلينها وفى نفس الوقت محناش بالشجاعة الكافية لإرتكاب الفعل الأكثر حماقة وإنهاء حياتنا تقدر تقول إننا كتير 

كارهين الوجود بأكمله والحياة بأكملها وعندنا تقريبا حاجز بيمنعنا عن الموت 

عندنا شخص فى الخلفية صورته متعلقه علي جدران القلب والذاكرة 

عندنا شوية إيمان عاملين زي نور شمعة مغروزة فى قلوبنا بتحرقها أكتر ما بتدفيها أو تلحم الكسور اللى فيها 

عندنا شوية ضياع لا يساعهم الوجود 

عندنا شوية شوق مينفعش يتقال عنهم شوية لأنهم تقريبا فى كل لحظة فى حياتنا لشخص مش موجود 

عندنا شوية أفكار جوا عقولنا مخلية عقولنا عاملة زي إنفجار لسوبر نوفا ( نجم ) فى الكون البعيد 

عندنا شوية حاجات مش عارفين نحطها علي أنهي رف وماسكينها وواقفين زي العيل الصغير اللى كسر فازة فى الصالون ومش عارف يوديها فين 

عندنا شوية سنين فى عداد العمر وخايفين نعترف إنهم حقيقة وإننا كبرنا ومبقناش صغيرين 

جوانا طفل متلخبط وحيران وخايف 

جوانا نار الفراق والشوق والحلم 

جوانا حلم لبكره مبيهداش وفى نفس الوقت مستحيل تحقيقه فبنقنع نفسنا كل يوم إننا بنقرب منه عشان إحنا أغبيا ومش قادرين نتقبل حقيقة ضياع الحلم دا 

جوانا مش وجع واحد لأن الوجع الواحد دا للناس العاديين اللى بيفضلوا محطوطين مكانهم إحنا جوانا أوجاع ميقدرش الكون يصلحها 

جوانا نفس مكسورة ودموع وقهرة من كل كلمة إتقالت فى غير محلها من أغلي الناس علي قلوبنا ومن الناس اللى بنحبهم أكتر من ... كل حاجة

جوانا نفس مقهورة من كل الكلام اللى مكانش ينفع نقوله وقلناه لأنه الحقيقة لأننا صدقنا ان الحقيقة هتخلصك من الوجع وهتخليك مرتاح وسعيد فى حياتك 

جوانا عيل صغير عنده ألف سنة وحاسس إنه عاش ألفين سنة ولسه حاسس إنه لا كبر ولا هيكبر أبدا 

جوانا ذكريات لكل نفس ولكل كلمة وموقف ونظرة من الناس اللى بنحبهم وسكنوا قلوبنا 

جوانا ذكريات لكل طلعة شمس وكل يوم مر بدون الناس اللى بنحبهم 

إحنا اللي ملعونين بالوجع والفراق والكسر وقهرة الخسارة و آلام الفقد وعاهة المنبوذين الذين يتركهم الجميع ويرحلون 

إحنا اللى عايشين بنعافر عشان مش قادرين ننهي الحياة فى أقرب فرصة ممكنة وبنضحك فى وش الموت بكل شجاعة لأننا ببساطة مبقناش بنخاف منه 

مبقناش بنخاف منه لأننا بنحلم وبنتمني ويمكن واثقين جدا إن بعد نهاية حياة طويلة من كل ما سبق 

أكيد فى ربنا 

وإحنا منقدرش نخذله , الناس هي اللى بتخذلنا وإحنا مش بنخذل حد ولا حتي ربنا .
 
وربنا هيكون حنين علي قلوبنا أكتر من أى حد 

وأكيد هيحبنا وهنبقى عارفين دا ساعتها ومش هيوجعنا وهيفهم كسرنا ويجبرنا لما نشوفه 

بنحلم بالرجوع ليه والعودة لوطننا 

لأن الدنيا دي مش وطن لينا 

بس بنستحملها وبنعافر وبنعيش 

إحنا كتير أوي 

***

شكرا لصديقي اللى قابلته وقالى الجملة دي وساعدني فى التفكير وقعد يتكلم ويحكي لي قصة حياته وأنا تقريبا مبهور لأنها مش قصة نجاح ولكنها قصة حياة تستحق تتكتب بكل تفاصيلها وبكل موقف فيها وبرغم ذلك مازال حي وبيحاول يعيش وبينجح ...

صديقي مش عالم ذرة 

صديقي مش مهندس طيار ظابط محامي دكتور محاسب كائن فضائي

صديقي  مش غني وعنده عربية وفيلا وشقة وقصر وكوكب خاص بيه 


صديقي إنسان 

ولذلك أنا معنديش وصف لإحساسي بإني كلمتك 

غير إني مبسوط إني لقيتك تاني 

وفى نفس الوقت 

موجوع لأن كل الكلام اللى قلته دا ينطبق عليا وعليك 

متزعلش يا صديقي 

بكره نقابل ربنا بأمره وقت ما يريد يقابلنا 

وأكيد هيبقى أحن علينا من الوجود بأكمله 

خالص التحية 

كريم

(( فى بيني وبين حاجة زي دي حاجز أول وحاجز تاني وحاجز تالت ))
والمشكلة إن الحواجز التلاتة أضعف من بعض ...
لكن هوا بس ستر ربنا 
اللى بيخلي إيماني يقوي كل يوم 
ولو ضعف 
ففي أمي تفكرني إن هقوم من تاني وهكون أنا من تاني   , بتفكرني إني هخجل من دمعها لفراقي
وبعد أمي فى حاجز إسمها شخصية مش موجودة حاليا 
بس بعتبرها حاجز حتي لو مش هنا     
وأنا عارف إنها هتبقى هنا قريب أوي أوي أوي أوي أوي أوي 
مش كدا ؟؟؟؟

الاثنين، 28 يناير 2013

إشارات

بعد ساعة كاملة من التفكير 
وبعد ساعة كاملة من محاولات الكتابة
كتبت تقريبا أكتر من متين سطر 
وفى الآخر مسحت كل حاجة 
ورفعت صور
ومسحتها 
الخلاصة :


أنا تعبت 
محتاج إشارة واضحة 
تحمل كلمة ( أنت )
عشان أقدر أقف وأحارب 
عشان أقدر أتحرك 
عشان أقدر أتكلم 
شفت كل الإشارات 
إستقبلت الهدية 
شفت الكلام كله 
قريت كل حرف 
ركزت ...

حقاً يمكننا البدء من جديد




بس خلاص 


#مازال بإمكاني إيقاف الزمن إلي أن يكون كل شىء بخير ...

كريم

الأحد، 27 يناير 2013

بكتب

بكتب ناو وهنشر فى خلال ساعة

الخميس، 24 يناير 2013

زي العصفورة بجناحين :) + تحديث

E


أنا فرحة وضحكة











الساعة تعدت تلاتة بساعتين إلا ربع 

اللحظات الأكثرR ظلمة هي التي تسبق الفجر 

النور جواك Eيا يوسف 


واحد واقف بينده علي سارة لحد ما تعب لي أعصابي 
وفى الآخر طلعت سارة بنوتة كتكوتة زى القمر فى الكي جي :)
جت بصت لى كدا  وضحكت
وسابتني وجريت H


عارف لما تبقى مستنيE لحظة معينة ؟؟؟

وإنته مستني المشكلة إنك بتبقى لوحدك :(

بس طالما عارف إن انته خلاص عدييييييييييييييت والنتيجة طلعت 

بيبقى قلبك مطمن 

بس المشكلة انك لسه لوحدك 

بس كدا 

والفجر هيأذن 

mوليلة زي دي 

مينفعش تبقى فيها لوحدك 

حتي لو هتسهر لكمان تلات تيام 

بس كدهون بقى 

.....

 فرحان طيب ...
O
بس لوحدي ....




كرمللة 
#عيد Cميلادي
#شكلي عجزت بقى
#وبلون وبطعم الأفراح
#غلطات إملائية بالعكس 
#محتاج تأكيد أو إشارة أو كلمة واحدة بس .

الأربعاء، 23 يناير 2013

بمناسبة عيد ميلادي



بمناسبة عيد ميلادي ...

بمناسبة حياة بتتبني وبمجهود يتضمن (( تعب ووقت وفلوس وإرهاق وسهر وبرده وضلمة ووحدة ))


بمناسبة عمر عندي رغبة أعيشه وعندي أمل فى الحياة

بمناسبة إني بعلن فى لحظة زي دي عن إني سامحت وبشكل كامل وكلي ومن جميع النواحي كل الناس اللى وجعوني فى حياتي بأي شكل كان وإني أصدرت رسالة من العفو والصفح عن الجميع بلا أي إستثناء

بمناسبة والدتي اللى بتتصل بيا من أودتها بليل عشان أروح أقعد معاها ولسه بتحبني وبتدعي لي

بمناسبة إني حاليا لوحدي تماماً وكلية وبدون أى تواجد لأي حد فى حياتي وسنجل بشكل كامل

هقول (( كل سنة وأنا طيب وإنتوا كمان ))

وطبعا ليا طقوس خاصة فى يوم عيد ميلادي

شغل التورتة والحفلات دا مبياكلش معايه

أنا من المؤمنين بإن الحاجات الصغيرة والعبيطة والبسيطة ممكن تخليك أسعد إنسان فى الكون

متجبليش تورتة , هاتلي سندوتش شوكلاته نوتيلا أو مولتو شوكلاته لو مش فاضي وأنا هبقى مبسوط
متجبليش هدية كفاية رؤية حضرتك وإحساسي بإن فى حد مهتم بيا فى الوجود دا وبيقدر إني عايش وبيستغل كل لحظة أنا عايش فيها عشان يكون معايه ويسعدني ويقدرني
متجبليش ورد  , كفاية إبتسامة صادقة من القلب أو نظرة فى النوت بوك وإنته بتقرا حاجة حلوة كتبتها عشاني
متجبليش علبة فيها هدية بتنور وبتعمل صوت والحاجات دي , كفاية ترسم رسمة توصف بيها بتحس بإيه بقلم رصاص قديم أو بقلم جاف هربان من مقررات الدراسة
مش لازم أي شىء غير إنك تشغل موسيقي بحبها أو تفكرني بيها أو تغنيها أو تقولي إني كائن مهم فى هذى الحياة

بيقولوا إني بعرف أجيب هدايا بسيطة أوي أوي أوي بتخلي الناس مبسوطة والمفروض فى عيد ميلادي أجيب للناس اللى بحبهم هدايا ووالله العظيم هيحصل حتي لو هشيلها فى الدرج بتاعي :)

هستني اللى فاهميني بس يفهموا الصدفة الرائعة فى إن يوم عيد ميلادي يوم خميس

مش كدا وبس

لا دا خميس ببني فيه حياتي ومستقبلي

طبقا لطقوسي فأنا هكون فاتح كل الأبواب  وكل التليفونات وكل السكك بكل شكل ممكن

مفيش طلب هيترد بكلمة لاء

مفيش حد مش هيتسامح

مفيش حد هيطلب حاجة وهيتقال له لاء

كل الطلبات مجابة
من كل وأي شخص
وتسامح صادق ومن القلب
:)

مش عارف أعمل إيه تاني

بس مهما كان كريم هوا كريم والناس هما الناس

كريم دايما عبيط

وأنا سعيد بذلك :D

حد يقولي وصلت كام سنة ؟

هيكون ردي الوحيد : أنا سعيد إنك سألت السؤال دا :D

كرمللة :)


الجمعة، 18 يناير 2013

جمعة مباركة

بدون سبب 
وبدون مناسبة كدا

جمعة مباركة 
وكل جمعة وإنتوا طيبين 
هي مش مدونة برده وبكتب فيها اللى نفسي أقوله 
يوم مبتدي بداية حلوة من ليلة الخميس لحد دلوقتى 
الحمد لله علي كل النعم 
متنسوش تدعولي 
عشان داخل علي أيام صعبة حبتين أو صعبة أوي  
( بدون مبالغة ) 
وكل جمعة وإنتوا طيبين وحلوين وبخير والحياة معاكم ماشية سلانسية سلانسية 
سلامات يا ذوق :D

كريم :)

#كرمللة

الثلاثاء، 15 يناير 2013

مبروك يا صديقي الأزهري

وصلنا نحن سمو حضرة جلالة عظمة فخامتي نبأ سار جدا فى مخطوط من طرق الملكة فاتيما
قال إيه يا ولاد أسامة الأزهري خطب 
وفجأة توقف الزمن وأنا تنحت فى الفراغ 
ياعيني يابني :D
لا حول ولا قوة إلا بالله :P
أنا صحيح كنت بدعي عليك 
بس مش عمري قلت يحصلك كدا 
لا إله إلا الله :D
سيخسر محاربو نون النسوة وستخسر افريقيا والعالم كله رجلا عظيما كان دايما مطلع عينينا جميعا 
ثورجي كبير 
بطل أكبر 
محترم أكتر 
شخصية عارفة ربنا 
نتكلم بجد شوية بقى 
أزهري خطب يا ولاد 
أزهري من الناس اللي بتشرف بصداقتهم 
يعني أزهري مش معرفة 
ولا واحد بقوله سلام عليكم كل لقاء وأشوفه بعدها بسنة ونص :D
أزهري صديق 
والشخص الوحيد اللى وقف جنبي وسندني لما الدنيا كلها خذلتني 
والشخص اللى قواني ومتخلاش عني برده لما وقعت وقعد يشجع فيا 
الشخص اللى شجع عنادي يعاند الحياة وخلاني انجح فى شغلي 
صديقي الأزهري 
صديقي أسامة 
أنا فخور بمعرفتي بيك (( دي حاجة طبعا إنته عارفها )) وألف مليار ( من أبو تسع تصفار دا )تريليون ( معرفش جنبه كام صفر بس هما كتير ) ترنيار ( دا رقم جديد من إختراعي ) مبررررررررررررررررررررررررررررررررررررررررررروك 


أنا سعيد بإنك قررت تتأهل وسعيد بإنك هتسبقني وهشمت فيك يا واد والله :D
:P :P :P
الزمن بيمر وإحنا بنجري فى كل إتجاه وبنحاول بمليون شكل 
بس ولله الحمد ربنا كرمك وقدرت تتحرك يا صديقي وتخطب وتاكل جاتوه وتشرب شربات
عقبالي قادر يا كريم لما أقدر أنا كمان 
مش أخطب 
لاء
 أبسلوتلي :D
أكل جاتوه  واشرب شربات فقط :D :D

ولذلك 
وجب الشماته فيك 
وللعلم أنا لسه مخدتش الجاتوه وناوي نية سودا لما أشوفك 
الجاتوه قبل أي حاجة يا حاج 
:D

ألف مليون مبروك يا حاج 
وعقبال الحبايب 
وعقبالي لما ألاقي بنت الحلال
والحمد لله علي نعمة السنجل يا ولدي :D
اللى بيتبطر عالنعمة بتزول :P
وبما اننا قريبين من سن بعض 
فألحق قبل ما الزمن يسرقني والقطر يفوتني :D
 هختتم البوست بقي قبل ما أقلبها دندرة :D

مبروك لصديقي أسامة الأزهري 
ولأختي الطيبة جدا جارة القمر ( مي )
بارك الله فيكما وبارك عليكما وجمع بينكما فى خير 
هدعيلكم لأن من الواضح والظاهر إني رجعت مستجاب الدعوة من تاني :D
أنا سعيد جداااااااااااااا فوق الوصف والخيال بالخبر دا 
ولن أتنازل عن نصيبي فى التورتة 
دورين عالأقل من كل طرف 
:D
الطمع حلو فى الامور اللي زي دي 
ولا أنا بروح عند دكتور السنان وأصلح سناني عشان تيجي تديني حتة جاتوه :D
عيب عليكم 
:D
مش عارف أقول إيه تاني 
بس بجد أنا مبسوط بيكم وبحبكم فى الله وربنا يجمع بينكم في خير ويتمم بخير 
أخوكم طبعا دائما وأبدا
كريم عبد القادر 


كنت هنشر اخبار حلوة اوى عني وعن مستقبلي
بس لاحقا بقى 
لما نفرح باسامة الاول 
 :D
 

الثلاثاء، 8 يناير 2013

إعادة إفتتاح المدونة

- كنت مش هنا وكنت بعيد 
مش معني رجوعي إني بقيت موجود 
ولكن ...
بإختصار شديد
معني رجوعي إني بعدت أكتر .
ودلوقتى مع قصة قصيرة بمناسبة إعادة إفتتاح المدونة 
الصور من رسومات فنانة شابة وصديقة عزيزة 
والصورة الأولي مرسومة مخصوص للقصة اللى الرسامة قريتها قبل ما ترسم طبعاً
زي ما قلت لها (( بنوتة بشعر طويل وجيبة قصيرة وكوفية كروهات وماسكة سكينة وكتاب وفى مفترق طرق ))  
( شكرا جدا لمساعدتي فى فتح المدونة من جديد) .
***

فتاة , تسير علي غير هدي لا تدري إلي أين تأخذها الخطي ولا إلي أين ينتهي الطريق , تقف بهدوء فى تقاطع للطرق وتتلو بعض الكلمات السحرية لتستدعي أقوي شياطين الجحيم ليبرم معها صفقة روحها مقابل ما تتمناه ,يقف بهدوء متفاخرا بكل العقود التي أبرمها سابقا ويبتسم فى عزة وفخر قبل أن يسألها عم تتمناه من الحياة وما تحلم به , تساله فى رقة ووداعة لا تتناسب مع تنورتها القصيرة والتي تجعلها أجمل نساء العالمين فى تلك اللحظة وشعرها الطويل الغجري المجنون ذو اللون الأسود المتفحم وتلك الكوفية التى تلتف حول عنقها وتحيط بشعرها وتعجز عن أن تسيطر عليه لتقع دوما من علي إحدي كتفيها وتستقر في ثبات علي الأخري تسأله عن أي الطرق تسلك فى مثل هذا الوقت من العمر , لم يدري الشيطان ما يقول لها فالشياطين لا تخبرك الطريق ولكنها ببساطة تعقد الصفقة وتعطيك ما تريد وتعود بعد عدة أعوام لتحصد روحك إلي الأبد , لم يري الشيطان أنه من العدل أن يبرم الصفقة معها فعلي الرغم من كونه شيطانا مريدا إلي أن هنالك قوانين لابد من الإلتزام بها ولا يمكن أبدا كسرها فى عقد الصفقات , لابد أن تكون الصفقة عادلة ولابد من تنفيذ كافة شروطها ولابد من أن تستمر بإستمرار الزمن ذاته فلا شىء يكسرها ولا شىء يخترق قوانينها الصارمة , وقف الشيطان فى حيرة امام الفتاة أكثر من حيرتها فى إختيار أي الطرق لتسلكه , ولكنه ما لبث أن وجد فكرة مناسبة لها وفى غمرة صمته وشدة حماسته أخبرها بأنه سيعلمها كيف تسير فى الطريق دون مقابل سوي صحبتها بعض الوقت لأنه مل من كثرة الصفقات ويتمني لو قضي وقتا مع شخص لا يكسره ببعده بعد تمام الصفقة أو لا يكسره بوجع المنفعة أو وجع الرفض وأخبرها أن صفقات الشياطين لا تتم إلا بقبلة فى نهاية الصفقة ولكنه سيقبلها فى لحظة ما حين يشعر بأنها تعلمت منه ما ينبغي ان تتعلمه .
مر الزمان وبقيا معا فترة لا يمكن أن تحسب بالأيام , لا تدري الفتاة كيف كانت ترتاح كل ليلة فى أحضان الشيطان ولا يدري الشيطان كيف عشق براءة تلك الفتاة ولكن هذا ما حدث ولا داعي للتفسيرات المنطقية أو حتي التفسيرات المجنونة اللامنطقية , لا أحد يعلم حقا لا هوا ولا هي كيف تآلفت روحيهما ولا كيف إرتبطا بوثاق أبدي من الجنون والعشق والنور والنار , لا أحد يدري حقا
إلي أن جاء يوماً ظن فيه الشيطان أن تلك الفتاة قد كبرت بما يكفي لتستمر فى الطريق وحدها وربما لتكون صاحبة القرار فى حياتها , وقف أمامها وأسند وجهها بكلتا يديه ليخبرها بأن الوقت قد حان وبأنها الآن قد صارت سيدة قرارها فى إختيار الطريق , أفزعت كلماتها لفتاة لتنهار فى البكاء بينما هوا سحبها من يديها بقوة لتسير نحو تقاطع الطرق الذي تلاقيا عليه للمرة الأولي ومر بأصابعه علي وجهها البرىء الذي سيفتقده بجنون وأخذ يمسك بدموعها المنهمرة من عينيها بأطراف أصابعه ليقبلها ويخبرها بأنه لن ينساها أبدا وبأنه لا يحتمل أن يراها تبكي , إقترب منها ليضمها فى قوة ويقبلها قبل أن يتركها لتختار بحريتها ما تشاء وفى عقله فكرة مجنونة بأنها قد تختاره , ضم شفاها البريئة بشفتيه فى قبلت حاول أن يذوب فيها ويمنحها فيها من قوته ومن روحه ومن عشقه ومن جنونه وشوقه وحينما إنهارت كل دفاعاته أمامها وضمها بجنون شعر بالسكين الذي لم تتركه من يدها لحظة ينسل بين ضلوعه ليستقر في قرار قلبه وإبتعدت عنه قائلة : (( لم أكن الأولي ولكني سأكون الأخيرة فى حياتك )) وفى وسط دهشته من فعلها فهوا لم يطلب منها روحها مقابل وجودها بجواره والأيام التي قضوها معاً ولم يعاملها كما تعامل الشياطين البشر ودوماً منحها الإختيار ولم يخذلها قط , نظر لها مندهشاً من دموعها ونشوة إنتصارها وشبح الإبتسامة المرفرف علي شفتيها وقع هوا علي الأرض ليحاول أن يقترب منها زاحفا لكنها نظرت إليه بشكل غريب لم يره فى بشر من قبل نظرة حسرة و فرحة بما قررته , أدارت ظهرها له ونظرت تجاه أحد الطرق فى التقاطع لتتركه وتسير فى الطريق دون أن تعبأ به أو بنزيفه علي الطريق, ليموت وحيداً .


تمت,,,


***

أقدر بكل بساطة أتكلم عن الأسباب الكتير اللى خليتني أقفل المدونة والفيس بوك والتليفون والصفحة وعن حلمي اللى خسرته وعن الناس اللى خسرتها والحاجات اللى ضاعت والحاجات اللى مش موجودة ولكني بفضل إني متكلمش عن كل دا 
وببساطة شديدة برده
هسألكم الدعاء لوالدتي المريضة وبس ...
وأما عن نفسي فأنا كفيل بها .


***

بشكر كل الناس المحترمة اللى قدرت توصلي بطريقة أنا نفسي مكنتش متخيلها , آه والله , أول مرة ألاقى حاجة بالشكل دا أو حد يقدر يوصلي وأنا قافل كل الطرق بكل تعمد بالمنظر دا

***
ودلوقتي مع قصيدة وأغنية بحبها أوي أوي أوي أوي أوي ,,,
وبتفكرني بحاجات كتيرة أوي :)





يا من هواه أعزه وأذلني
كيف السبيل إلى وصالك دلني
وتركتني حيران صبّا هائما
أرعى النجوم وأنت في نوم هني

\\ وحلفت أنك لن تخون وخنتني \\


***** 
علي هامش السيرة : : :
ممكن تلعب دور كل ليلة لحد الصبح 
دور مش حقيقة إنته متأكد وواثق من دا 
ولكن بتلعبه بتفاني وبكفاءة وبقوة فى الأداء وبضعف فى التخلي عنه 
لو لعبت الدور بشكل مستمر وبإقتناع تام 
هتلاقى نفسك مع الوقت الدور مبقاش مجرد مسلسل 
بقي حقيقة 
وإنته حاسس بيه بشكل كامل 
بقي واقع 
وإنته مؤمن بيه ومش عايز تغيره 
بقي حب 
وإنته مصر تتمسك بيه لحد النهاية 
بس ياتري هوا للحب نهاية ؟؟؟

***
فى دايما نوعين من الناس : اللى بيحارب واللى بيتخاذل عن الحرب 
دا طبعا طبقاً لمبدأ : Fight Or Flight
اللى بيحارب في منه نوعين : نوع بيعرف يبطل يحارب إمتي ويبطل يحارب إمتي   ونوع تاني مبيعرفش يبطل إمتي وبيستمر وكأنه فى معركة ضد الكون
النوع اللى بيعرف يحارب إمتي ويبطل إمتي دا بيبقى شخص ذكي جدا وله هدف وبيوصله 
أما النوع التاني اللى مبيعرفش يبطل إمتي وبيستمر فى الحرب وكأنه فى معركة ضد الكون فهوا ملوش حدود وحدوده السماء لأنه هيوصل لهدفه بسهولة شديدة وفى نفس الوقت هيقع علي الأرض فى لحظة ما من كتر التعب ولما يقوم يقف هيشد من جديد ويستمر فى الحرب لحد ما لا نهاية , شخص تقدر تحس معاه بالأمان والدفا والحنان والحب والفرح والحزن لأنه دايما هيحافظ علي المود ويعدل السىء ويعوض اللى فات ويبني من جديد وفكره صاحي ودايما عارف إيه اللى جاي لأنه الزمن بالنسبة له مجرد وجهة نظر فدايما شايف اللى جاي فى الطريق .
***
طبعا فى الفترة اللى المدونة كانت مقفولة فيها مبطلتش كتابة لدرجة إني كتبت فى أربع تيام أكتر مما كتبت فى شهر إتناشر بالكامل وهقدر أوفر لكم لينكات فى نفس البوست لو حد حب يقرا وبصراحة فى حاجات مسحتها وحاجات سيبتها فى المسودات وحاجات تانية نقلتها مدونتى التانية اللى فى السر ومش معروف انها بتاعة كريم إتفضلوا الروابط :

- Disconnect 
- أقفال زمنية
- أكتر جملة وجعتك .
- فص ياقوت
- شماعة الخطايا
- حكايات ما بعد منتصف الليل 
- المنسي والمنبوذ والترياق .
- عصفور طل من الشباك .
- -لحظة مشاركتهاش مع حد .
- كانت لنا أوقات
- تفاحة آدم .
- الحب علي كرسي وفى كوباية شاي .


***
العنقاء
بيموت كل ليلة فى وسط النار 
وبيبعث كل يوم من الرماد 
وبينهض من وسط النار
عشان يحرق أعداؤه لرماد 
سواء بيحبهم أو لاء
بيبكي وبيموت من الوجع آخر اليوم عشانهم
ومن زعله عليهم 
ومن ندمه 
ومن وجعه للفراق
بيقوم كل يوم ويكمل معركته للنهاية 
بينتصر 
بيموت كل ليلة 
وبيبعث من جديد فى كل فجر 
(( لكني عمري ما بحرق حد بحبه أبدا ))
من رسم الفنانة الشابة فى شهر 7 السابق


***

الصورة عن الإنسلاخ من الواقع 
فى ناس بتشوف الإنسلاخ من الواقع علي إنه الهروب من الواقع والواحد يتعامل معاه بآلية وكأنه مش حاسس ومش موجود
وفى ناس تانية بتشوف الإنسلاخ عن الواقع فى إنك ترقص مع بنت جميلة تخطفك بعيد عن الحياة على موسيقي Sway 
أنا عن نفسي فكرت فى التجارب الحية اللى شفتها قدامي وطلبت منها ترسم الرسمة دي
ودا تقريبا كان من حوالي خمس شهور 
إستمتعوا بالفكرة الخاصة بيا 
ورسم الفنانة الشابة 

لكني مجاتليش الفرصة إني أنشرها غير دلوقتى ..
الصورة فى سطور :
(( 
إنسان واقف قدام مراية بتظهر حقيقته 
هوا بيتخلي عن إنسانية وبينزف وبشدة 
وبيتحول فى المرآية لإنسان آلي 
مجرد روبوت 
عايش وبيشتغل وبس
))

****


مش عارف ليه بتوقع من الناس تتصرف زيي
يقفوا يتحدوا الموج ويسبحوا ضد تيار العقل والفكر
ويحاربوا بدون توقف
ويقدروا كل شىء بعمله زي ما بقدرهم
الناس مش هتتغير
وزي ما قالت الحاجة : صوابعك مش زي بعضيها 
وزي ما أنا بقول 
كل واحد وإختياره 
وأنا خلاص إخترت 

****


تم حذف هذا الجزء من البوست بناء علي طلب شخصي من أحد الأشخاص الذين كانوا يعنون لي شيئا يوما ما لكنهم الآن ولله الحمد لا قيمة لهم ولا لذكراهم .
Deleted
شاب فقري  


عانقيني .. قبلي عيني وأمضي 
***
الحلم ضاع  مني وإتمنعت عنه 
غصب عني
لكني هحارب
ولو الحلم مات 
هحلم من جديد
تعبت كتير ولسه هتعب فى بقية الطريق
الحياة مش عادلة ولا سهلة 
وهكمل وهحلم من جديد وهحارب
كالعادة ..
وحتي الرمق الأخير


كريم 
شاب فقري
7-1-2013