فقط إنتظرينى ...

لم أعد أتذكر كيف بدأ كل هذا حقا ولكننا كنا معا وفى بيت واحد ... عاشقين حتى النخاع أيدينا تحتضن بعضها وتتشابك أصابعنا وكأنها خلقت لتدوم معاً ... كان الحب هوا خمر الحياة الذى لا تفرغ منه قلوبنا أبداً وقد شربنا حتى السُكر ...بدت تلك المساحة الضئيلة للغرفة و فضائها الذى يساعنا وكأنها ( تاج محل ) فكنت أنا ملكاً فى عينيها وكانت فى عيناى أجمل من أميرات الأساطير التى لا تأتى إلا فى البرد ...إلا أنها للمرة الأولى فى حياتى أشعر بمثل هذا الدفء يحيط بى ونحن فى فصل الشتاء...لم أدرى هل كان ذلك الدفء ينبعث من قلوبنا أم بين عينيها ليغمرنى ويصنع لى عالماً متكاملاً لطالما حلمت به ...
كانت تقف بجوارى تتدلل كالأطفال وتعبث فى خصلات شعرها القصير وتهمس من بين شفتيها الساحرتين بكلمة واحدة (( دفينى )) لتجذبها يدى التى تشابك يدها فى قوة وتضمها إلى فى شوق وحنين مندفع كأمواج البحر فى نواته فأسمع صوت أضلعها بين أحضانى وكأنها تفتح أضلعها لقلبى لتضمه ... فأسمعها تقول فى دلال وهى تحاول أن تهرب من بين أحضانى بلا جدوى : (( براحة ... الله))..
أنا : وحشتينى
هى : وحشك قرد
أنا : بقى كدا ؟
هى : أيون كدا
أنا : مش وحشتك
هى : إنته بتحلم يا حلمى ...
أنا (ضاحكاً ) : متأكدة ؟
هى : آه ... بس أحلامك حقيقة وإنته عارف
تبتعد من بين أحضانى هذى المرة وكأنها فراشة تكافح كى لا تحرقها النار وتتجه ناحية هاتفى لتبدأ ألحان الموسيقى وسحر الكمان فى الإنسياب بين طيات هذا الفراغ الذى يفصلنى عنها لأقترب منها ممسكا يدها مرة أخرى وتحاول الإبتعاد عنى ولكن فى هذى المرة أقبل يدها قائلا : إرقصى معايا ... أدرك جيدا أنها لم ترقص من قبل ولكنها تعشق رقصة ( الفالس ) وتحكى عنها وتتمناها دوما ... تتشابك أصابع يداى مع يدها وأجذبها نحوى لتلتف الأخرى حول خصرها وترفعها عن الأرض وتستقر قدماها على قدماى وهى تنظر لى فى إنبهار وكأننى جننت (( مع أنها تعلم أننى هكذا منذ زمان بعيد )) وتبدأ رقصتنا وأنا أهمس مقتربا من شفتيها : وحشتينى ... تكافح الفراشة النار وتحاول الإبتعاد عنى ولكن بلا جدوى لتهمس هى الأخرى : وحشتنى أكتر .. لألامس شفتيها بقبلة قائلا : هتستنينى ؟؟ فترد بحنان : العمر كله

أستفيق من عاصفة أفكارى لأجد نفسى وحيدا فى المنزل ... هى حقا ليست هنا ... لم تعد بجوارى ...هل تتذكرنى حقا ؟؟ هل مازالت تنتظرنى ؟؟؟ أجلس فى منتصف الغرفة يحاوطنى الفراغ ... أمسك هاتفى الجوال منتظرا سؤالها عنى وإتصالها القادم ... لعلها تتصل ...

تمت ,,,,,

شاب فقرى

صانع اللعب

لا أدرى أين تعلمت كل هذا ولا متى بدأ عقلى فى الإعتياد على تلك الأفكار ومحاولة نقلها للواقع ... فجأة وجدت مجموعة من الرسومات والأشكال والأحداث فى عقلى فقررت نقلها للواقع ... فى البداية لم أدرى كيف ولكنى بداية سطرتها كتابة ليقرأها الجميع ولكن يبدو أن هذا لم يكن كافيا ...مازال هنالك المزيد طبعا فهنا بين جدران معملى البسيط يوجد الكثير من الأشياء التى أستطيع إستخدامها لأنقل كل ما أفكر فيه للواقع ...دعك من الورقة والقلم ودعك من رسوماتى ... أترى قد يحدث فى حياتى فرقا إذا حولتها إلى أشياء مجسمة ؟؟؟ ألعابا ربما ؟؟؟
راقتنى تلك الفكرة كثيرا .... لن أبدأ فى أى وقت ولكن لابد أن يكون الوقت مميزاً ليدوم لى تلك الذكرى وهذا التغيير فى حياتى .... الآن أنا أصنع ألعاباً ... لم أتخيل هذا يوماً ولكن .... فلنبدأ

***

تدق الساعة معلنة منتصف الليل ...أجهز أشيائى البسيطة ... الكثير من القماش الملون ذو الملمس الناعم وبعض القطن والكثير من الخيط وبضعة أزرار تكفى لصنع أعين لألعابى ...بعضها زرقاء والبعض الآخر أسود ... كل الألوان ... لا أدرى حقا هل توجد عيون صفراء فى أى مكان فى الوجود ؟؟؟ لعلها فى مخيلتى أنا فقط ....

***

تدق الساعة معلنة الواحدة صباحاً لأبدأ فى ترتيب كل شىء فى مكانه وأخرج الرسومات التى رسمتها من قبل ....أستدعيها من ذاكرتى لا من الورق وأتذكر الكثير والكثير من التفاصيل ... حقا أنا الآن قادر على صنع المستحيل ؟؟؟ قادر على صنع شىء ينبض بالحياة ؟؟؟ سنرى

***

تدق الساعة معلنة الثانية صباحا .... أجلس على الكرسى العتيق وأمامى تلك الأشياء كلها ... الكثير والكثير من الأفكار الآن تتصارع فى عقلى ... كلها تريد أن تكون نواة لصنع لعبتى المفضلة ...أشعر وكأن هنالك الكثير والكثير فى تلك اللعبة ... لن أترك أحدا ليعبث بك يوماً ...ينطلق خيالى أكثر بكثير .... حالة من التكامل يصاب بها هذا الخيال

***

تدق الساعة الثالثة صباحاً

إنه الوقت الأكثر قدسية لى فى الليل ....

أجهز كوب الشاى وعلبة السجائر

أتناول القماش والخيط والقطن وأبدأ فى صنع جسد هذى اللعبة ... أتخيلها كما يجب أن تكون فتاة أحلامى ... ممشوقة القوام وتحمل فى جسدها كل معانى الأنوثة التى قد حظت بها ( فينوس ) حين كانت آلهة الجمال ... ولكن ليس بعد اليوم ... من اليوم آلهة الجمال أنا من أصنعها ...أنا من يحدد لها قواما ومن يصنع لها جسدا تتمنى كل النساء أن تحظى به

أنتهى من صنع الجسد بكل طياته وبكل تفاصيله ...أبالغ فى تفاصيل الجسد لتصبح أنثى لا مثيل لها .... ولكن لم ينتهى عملى بعد ...
أتناول الأزرار وأصنع لها عينان زرقاوتان ... لا حدود لعمقهما حقا... بحر هادر أحيانا غدارا وأحيانا هوا الدفء وأحيانا هوا المنفى ....

أحرك أصابعى وخيوطى وأصنع لها شفتين تتحرك عليهما شهقات الحياة وآهات العشق ... هاهى تكتمل حقا .. ربما قد يجن جنونى يوما وأقبلها بكل شوق الدنيا

أستمر فى عملى وأصنع لها أنفا ساحرا يفوق جمال أنف كيلوباترا وكل ملكات الجمال فى الكون ... فبه ستستشعر عطورى وسيغمرها سحرى ... ويكون لى عليها سلطاناً بلا حدود .... وأنفخ من دخان سيجارتى على وجهها لتعشق حتى رائحتى الكريهة ...

أصنع لها أذنين لتستطيع سماعى حين أشدو لها وحين أداعبها بكلمات الرقيقة ... وتداعبها أنفاسى وهى بين أحضانى ذات يوم ...

أمسك بذراعى اللعبة وأصنع لها أصابع تستطيع أن تشابك أصابع يدى كما أحب ... هكذا أتمنى أن أمسك بأصابع

حبيبتى ذات يوما ... متشابكتين وكأنهما قدر لهم أن يظلوا هكذا إلى الأبد

أمسك بالقماش لأصنع لها فستانا رائعا ... يجعل منها الأكثر أناقة فى عالم الدمى واللعب

الآن أنتى كاملة يا عزيزتى ....

أقربها منى وأنطق بكلمات عشق إعجابا بما صنعت يداى ....وما إستطعت أن أرسم بخيالى بين طيات هذا الجسد الرائع ...
لتشهق هى بين يداى

تتحرك ...

ينبض قلبها بالحياة بين كل هذا القطن والقماش ....

تنظر إلى ....

قد لا تجدنى كما تحب أن ترانى ...

تنظر لى شذرا ... وتدير لى ظهرها لتخرج من باب الغرفة قائلة : أنا أستحق من هوا أروع منك يا صانعى

أنظر لها فى إستهزاء قائلا :

: لعبتى الجميلة ...أنا من صنعك ووهبك تلك الحياة ... لن يستطع أحد أن يمنحك عمراً سواى ...

: أنا فقط من يستطع أن يشعرك بأى شىء ...

: يا حبيبتى ...أنا من صنعك ...أنا (( الله )) لعالمك البسيط الصغير ... أنا من يصنع لك إحساسا ومن يمنحك عمرا وأنا من يمنحك شوقاً وعشقاً وحباً ...أنا فقط ...أنا من أصنع التهديدات والملذات فى عالمك الصغير هذا ... فلتخطى خارج هذى الغرفة وتطردى من رحمتى لتتمنينها يوماً ...إذهبى ...

وأعود لمكانى لعاصفة أفكارى و خيالى الخصب لأصنع المزيد والمزيد من اللعب ....
ألعابى الحبيبة ... أعشقكم جميعا ...

" تمت "

شاب فقرى

ملحوظة : أى حد هيقرا لازم يعلق .... لازم ولو حتى بغير معرف

خد يارايق ...عن التعديلات أتحدث

السلام عليكم ورحمة الله وبركاته
فاقع مرارتى هذه الأيام كل ما أفتح الفيس بوك واليوتيوب والمدونات ألاقى واحد عامل صورة البروفايل نعم ولاء وألاقى واحد متصور وعامل فيديو تحفة عن إن التعديلات هتودينا ورا الشمس وإن دى مش مطالب الثورة وإن الثورة طالبت بدستور جديد ولا لتعديل الدستور وواحد تانى بيقول إزاى بس إحنا لازم نقول نعم وبالفم المليان لان التعديلات هتنقلنا خطوة لقدام وعجلة الحياة هتمشى وهتلعب معانا ويبقى عندنا مجلس شعب ورئيس منتخب وإييييييييييه
وشوية ألاقى واحد تالت بقى بيقول : فينك يابابا مبارك ... كنت بتحبنا ومكنتش بتغلبنا ... كنت بتكتب لنا استمارات الإستفتاء بنفسك ... ويعيط شوية ويضحك صحابه عليه
وألاقى تسعة مقدمين بلاغات للمحكمة الإدارية بيطالبوا بإلغاء الإستفتاء والمحكمة تقول الإستفتاء من حق الجيش يعمله ودا قرار سيادى وملناش فيه ...
وشوية ألاقى حملة لعمل مظاهرة مليونية عشان نلغى الإستفتاء من الأساس ونعمل دستور جديد
وشوية تانيين بلاقى واحد عمال يناقش ثغرات كتيررررررررر فى الدستور ويقول المفروض نحرق الدستور فى ميدان عام مع صورة مبارك أو مبارك نفسه إذا إستطعنا
وناقص ألاقى واحد داخل كاتب للبت بتاعته عالوول : بصى يا بيبى إنزلى يوم الإستفتاء وقولى لاء عشان خاطر حبيبك لو بتثقى فيا
تصدقوا فعلا ممكن :D
دا طبعا غير الإعلان الدستورى الإنتقالى للمستشار البسطويسى وقراره بترشيح نفسه لرئاسة الجمهورية (( عن نفسى بفكر فى دعمه ومتقوليش ليه عشان هقولك وإنته مالك :@ ))
وغير ناس كتير أوى بتتكلم عن تعذيب الجيش للمدنيين والمحاكم العسكرية وسؤها ....

دلوقتى بقى أنا فين من كل دا كمواطن مصرى طالع تلاتة تيت مامته بين كل دول ؟؟؟

أنا من وجهة نظرى الشخصية إن الناس لم تدرك معنى الحرية بعد بشكل كامل .... إنته تقدر تتكلم وتقول فى حالة النعم وللاء اللى هتكتبها فى الإستمارة اللى إنته عايزة ... بمعنى لو الإستفتاء أغلبية نعم هيحصل كذا ولو أغلبية لاء هيحصل كذا ... أهم حاجة هى التوعية ... سيبك بقى الناس تقول نعم أو لاء دى مش قصتك إنته ولا لعبتك إنته .,... إنته مجرد واحد مصرى بتوعى غيرك وبتنبه على اللى هيحصل فى كلتا الحالتين الرأى للشعب مش لحضرتك ... حضرتك مجرد نفر ....
مليش دعوة بقى الأخوان موافقين وواحد يقول دا الأخوان بتوع مصلحتهم وعايزين يمسكوا الحكم وواحد يقولى أصل البرادعى بيقول ومبيقولش .... فى كل الحالات يا صديقى الطيب ...دا رأى الشعب ... فهمهم ووعيهم وبس ... بمعنى آخر إعمل الخير وإرميه فى البحر
التغيير الأساسى اللى بنقابله دلوقتى هوا التوعية السياسية وتوعية كل شخص بحقوقه وواجباته وإيه المترتب على قرارته وأفعاله سواء نزل مظاهرة عشان المرتب يزيد أو عشان حتى الشركة تجيبله أتوبيس ينقله لحد الشغل أو قال نعم أو لاء فى التعديلات ... الناس لازم تفهم وتعرف الحقيقة وبس
وبعدين سيبهم يختاروا ... وعلى رأى عمنا جاهين كان بيقول : لاتجبر إبن آدم ولا تخيره يكفيه ما فيه من عقله بيحيره
الشعب المصرى إشترى حريته وبقى بيعرف يقول آه ولاء ... ولكن للأسف نسى يأخد الكتالوج بتاعها معاه ... فعمال يلعب فى الزراير ويضغط هنا وهناك وميت رأى وميت كلمة
كل واحد يقرأ كويس ويشوف هوا هيقول لاء أو نعم وينزل من بيته ويروح يشوف هل فعلا قدرنا بثورتنا نغير التزوير اللى بيحصل ؟؟؟
هل فعلا خلاص بقينا بلاد الحرية ؟؟؟؟
وبالنسبة لنقطة الجيش اللى بيعذب مدنيين ....
فاكرين لما كنا فى الميدان وكنا بنعمل حواجز تمنع الناس من الإقتراب من الجيش والإحتكاك بيه ؟؟؟
كنا بنحاول منخليش حد يستفز العساكر والجنود ... دلوقتى بقى وإحنا مش فى كل حتة ياترى مين بيمنع الإستفزاز دا ؟؟؟ ياترى مين بيحوش الناس تروح تشد فى خناق الجيش وتستفزه ... سواء بلطجية أو مجرمين أو حتى أصحاب مطالب وإعتصامات ؟؟؟
مش هتكلم كتير ... لكن هقولكم إن المهم والأهم حاليا هوا إن كل واحد فينا ينزل من بيته ....ويروح يشوف الإستفتاء ويقول رأيه
وقبل ما يقول رأيه يسأل كويس ويقرأ ويحاول يقيم الموضوع بشكل سليم

وفى كلتا الحالتين ...

الدستور الحالى الموقوف سواء إتقال نعم ففى بند إتضاف بخصوص إنشاء دستور جديد
و لو إتقال لاء ... فهيكون فى إعلان دستورى ومحاولة إنشاء دستور جديد
يعنى فى كلتا الحالتين فى دستور جديد .... بلاش إستفزاز بقى
هلاقى واحد جاى يقولى : أصل ممكن يا فقرى الريس الجديد يكون شخص وحش وشرير ومش يعملنا دستور جديد أو يعك لنا الدنيا ؟؟؟
أو واحد يقولى أصل الإنتخابات التشريعية هتدخل فلول الوطنى مجلس الشعب
هيكون ردى الوحيد عليه هى الصورة اللى فوق دى ... إفتكر كويس الناس اللى نزلت وقلعت الجزم ورفعتها فى وش مبارك يوم الخطاب ووقفت فى وش الموت وطالبت بحريتها مرة ... الناس دى مش هتسكت وأنا أولهم فى أى حالة من دول .... وطبعا مش محتاجين ننوه وننبه إن خلاص الجماعة الحلوين بتوع الوطنى هياخدوا بال.... لو حاولوا يدخلوا الإنتخابات ولو شخصية عامة هتأخد على دماغها وتخاف من تشويه سمعتها .. وميدان التحرير موجود وديتها جنيه مترو وأبقى أنا وإنته هناك ونشيل روحنا على كفوفنا من تانى ... مش كدا ولا إيه ؟؟؟

وعشان خاطرى عشان خاطرى عشان خاطرى .... بطلوا تلعبوا فى زراير الحرية وإقروا الكتالوج
وإقروا كل وجهات النظر وخدوا قرار
والأهم تنزلوا الإستفتاء على كل حال

شاب فقرى

إلغاء جهاز مباحث أمن الدولة

أصدر السيد منصور عيسوى وزير الداخلية قراراً بإلغاء جهاز مباحث أمن الدولة بكافة إداراته وفروعه ومكاتبه بجميع محافظات الجمهورية.

كما قرر السيد وزير الداخلية إنشاء قطاع جديد بالوزارة بمسمى (قطاع الأمن الوطني) يختص بالحفاظ على الأمن الوطنى والتعاون مع أجهزة الدولة المعنية لحماية وسلامة الجبهة الداخلية ومكافحة الإرهاب وذلك وفقاً لأحكام الدستور والقانون ومبادئ حقوق الإنسان وحرياته..وسوف يجرى اختيار وتسكين ضباط القطاع الجديد خلال الأيام القليلة القادمة ليؤدى هذا الجهاز دوره فى خدمة الوطن دون تدخل فى حياة المواطنين أو ممارستهم لحقوقهم السياسية.

الخبر نشر منذ 12 دقيقة على الصفحة الرسمية لوزارة الداخلية على موقع الفيس بوك هنا

الحمد لله الثورة مستمرة ....

عشتى يا مصر وعاش أولادك ...

شاب فقرى

البقاء لله

وفاة جدتى لأمى بالأمس ...
إنا لله وإنا إليه لراجعون ...

كريم عبد القادر

لن أعيش فى بلوفر شفيق

أحمد شفيق بعد الثورة يتحدث عنها ويتمنى لمصر مستقبل أفضل وفى حديثه يشير إلى الثورة بأنها ثورتنا ...
ثورتكوا منين يا عم أحمد ؟؟؟
جبت الكلام دا منين ؟؟؟؟
ولا نسيت فى الأيام الأولى للثورة طلعت لنا عالتلفزيون ببلوفر جميل وقلت هذه ليست ثورة ولا يمكن إعتبارها هكذا ؟؟؟
وبعدين هى حكومتك خلاص إستنفذت كل طرق التواصل مع الشعب مبقاش ناقص غير الفيس بوك ؟؟؟
يعنى مكاتب إستقبال شكاوى المواطنين ضد الفساد وحليت مشكلة المصريين فى طرابلس وجبت حق اللى إستشهدوا فى المظاهرات
خلاص قدرت تحل كل مشاكل البلد فقلت تلبس البلوفر وتطلع فى فيديو لصفحة الحكومة عالفيس بوك؟؟؟؟
الفيديو دا بيفكرنى ب فيديو الدكتور الفاضل المحترم أحمد فتحى سرور بعد إنشاء صفحة محبيه عالفيس بوك قبل الثورة بكام يوم وإنضم لها حوالى متين وخمسين مشترك
أبسط ما يقال عن الفيديوهين أنهم مهزلة ....
ورجاء إعتبره وطنى أو شخصى أو مهلبية حتى : إرحل بحكومتك بالفاسدين اللى بتحميهم
وياريت الفيديو الجاى تطلع لنا كدا ومعاك الراجل اللى واقف ورا عمر سليمان وبتعلن فيه إستقالة الحكومة


*****
***
وهنا فى هذا الفيديو فى جمعة التطهير أحد المواطنين المصريين بيعبر عن رأيه ...
نازل ليه ؟؟
وليه بيطالب بإسقاط الحكومة ؟؟؟
وليه شارك فى الثورة ؟؟
وليه لسه بينزل وبيشارك فيها ؟؟؟
نموذج مشرف للمواطن المصرى الواعى

ومازالت الثورة مستمرة حتى تحقيق بقيت المطالب
وحتى يتم الله نعمته علينا ...
تحيا مصر
تحيا ثورتنا

شاب فقرى

قوم من النوم

إيه يا مصريين ....

هتفضلوا فى مكانكم ؟؟؟

بقالكوا كتير أوى ساكتين ...

آن الأوان دلوقتى تتحرك وتعمل بطاقة إنتخابية وتتابع الأخبار (( بدون ما ييجى لك الضغط أو نقطة وتتشل )) وتعرف البلد بيجرى فيها إيه وتعمل حسابك دايما فى جنيه فى المحفظة تركب بيه المترو وتروح بيه التحرير فى أى وقت مع أخواتك المصريين تقول لاء لأى ظلم أو فساد

آن الأوان ترفع رأسك وتقول أنا مصرى وتتحرك وتثبت نفسك ويكون ليك رأى وتنادى بيه بحرية ...

والحمد لله اللى قدر لأخواتك أنهم يخلعوا الديكتاتور مبارك ... مش هيبقى صعب عليهم يعنى يطردوا شفيق أو أى حد يحاول يتآمر على المصريين أو ينشر الفساد والظلم أو يكتم صوت حق ... بس برده لازم تكون معانا ... عشان ميجيش يوم تقول فيه ياريت اللى جرى ما كان .. ولا إيه ؟؟؟

قوم من نوم وقوم بواجبك كمصرى وإنصر الثورة والحق ... إنصر مصر

---- الجزء القادم نقلا عن أحد أصدقائى عالفيس بوك ------

أكيد في لعبة معينة بحيث يخرجوا ناس كتير من الكشوف. اللي مسيطرين على الحكومة عموماً والداخلية خصوصاً هم نفس العصابة بتاعة التزوير

وصلتني هذه الرساله الهامة

طبقاً للقرار الجديد الانتخابات ستكون ببطاقة الرقم القومي، روحت القسم امبارح اسأل بالظبط عشان أتأكد .. بالنسبة للناس اللي كان معاهم قبل كده بطاقات انتخابية يبقى مفيش مشكلة . هيروحوا ينتخبوا عادي بالرقم القومي، أما الناس اللي ما كنش عندهم بطاقات انتخابية لازم يروحوا القسم اللي هما تابعين ليه (اللي استخرجوا منه البطاقة الشخصية)، تاخد معاك الآتي :

- بطاقة الرقم القومي و صورة منها

- شهادة الميلاد و صورة منها

- وهتملى الاستمارة

تروح القسم و تقف في الطابور و تسلم الاوراق دي و الظابط هيقولك و انت واقف على اللجنة الأنتخابية بتاعتك .

الإجراء ده مش عشان استخراج بطاقة انتخابية ، ده عشان اسمك يكون مسجل في الكشوف الآنتخابية و تعرف لجنتك .

و ده عشان انتخابات مجلس الشعب و انتخابات الرئاسة و استفتاء الدستور

القسم بيستقبل الطلبات من 8.30 ص و حتى 2 مساءا يوميا ما عادا الجمعة و آخر معاد تسليم الطلبات يوم السبت 5 مارس 2011

ما حدش يكسل الموضوع مش بياخد اكتر من نص ساعه ، على الرغم اني روحت في يوم اجازة و الطابور كان طويل جدا لكن الدنيا كانت ماشية بسرعه و سلاسة و خلصت في منتهى السهولة

-------- إنتهت النوت --------

يبقى أولا تسجيل إسمك فى كشوف الناخبين (( لازم تروح القسم ... وبلاش رشاوى لأى موظفين الله يرضى عليكم ))
وثانيا : الله يرضى عليكم لا تنسوا التبرع بالدم يوم الجمعة 4 مارس وهنا تفاصيل اليوم عند نوران .
وثالثا : إن شاء الله مسافر إسكندرية بكره .... السفرية جت فجأة لو قدرت أرجع هحضر التبرع بالدم وأكيد هكمل اليوم فى الميدان ...

ربنا يحميكى يا مصر ....
شاب فقرى