الخميس، 25 يوليو 2013

ثلاثة متأخر : مازلت حيا


 ملخص الوضع الحالي ليا بعد المصيبة إياها :

مازلت حياً فى مكان ما وأعرف ما أريد


***
البوست كان المفروض يتنشر يوم واحد وعشرين لكن تأخر النشر بسبب المصيبة اللى حصلت لى 
وكإنها مجموعة إشارات بتطلع عيني 
جري إيه للإشارات اللى بتيجي بدون حوادث بس ومصايب وسرقة ومرض ؟؟؟
الظاهر كدا إني إنتقلت للمستوي الأعلي وقربت أقابل الوحش 
أو يمكن كبرت


***
" كل القطع هتسقط فى أماكنها فى النهاية ودا شىء حتمي ومفيش منه مفر " 
ملاحظة : دا أحد القوانين الفيزيائية او الكونية او الطبيعية وإن لم يكن فإنسبوه ليا أنا نو بروبلم :D
ومعناه إن كل واحد هينزل فى مكانه الحقيقي بدون لخبطة أو توهة أو إدراك منه
فى النهاية روحك بتوجهك لمكانك وبتسيبك بالظبط زي القطعة اللى ناقصة فى البازل واللى بتقع فى مكانها لوحدها بدون اى تدخل لضبط وضعها او زي ترس فى الساعة بيقع فى مكانه اللى المفروض يشتغل فيه وبيشتغل


Sooner Or Later you always have to wake up .

***
هنالك أشياء لا يؤمن بها بعض الأشخاص ويستحيل جعلهم يؤمنون بها .

بعض الناس معندهاش حتي الإستعداد أو القابلية للإيمان بأشياء معينة , لما بقول الكلام دا بلاقي كائن حي من فئة الثدييات العظيمة ويصنف علي إنه إنسان لكنه ليس كذلك بيقولك طيب وإنته هتعرف المستقبل منين ؟ , الشخصيات الغبية دي بتعصبني , ومش هقول وجهة نظري للمستقبل بتكون إزاي سواء بتفاصيل أو بأحداث أو بتدخلات قدرية ؟ ومش هقول برده فكرتي الأخري عن أي بتاع لكني هقول إني من هولاء اللى فى حاجات واثق إني مستحيل آمن بيها مهما حصل  .

***
لما تبقى لعنتي إني باخد بالي من التفاصيل يبقى لازم يجري لى كارثة زي اللى حصلت لى كدا 
:(
إني أبقى ماشي فى الشارع واخد بالى من كل حاجة
 وابقى شايف فى ميت اتجاه واتحرك بسرعة واحاول اطلع نفسي من الخطر لكن اللي ربنا رايده هيكون
واحنا مجرد بناخد اختياراتنا
واللى مكتوب برده هيكون مهما كان اختيارك
فى الحالة دي بتسأل نفسك طيب يا هلتري لومكنتش اخترت واحد اتنين تلاتة يا هلتري هل كان فى شىء فى اللى بيجري هيتغير ؟
بتلاقى ان المكتوب مكتوب وان اختياراتك بس خلتك تعيش حالة زي الزفت لوحدك او منعزل فترة طويلة لانك فاكر ان كدا هوا الصح فى حين ان المكتوب مكتوب
زي ما بيجري لي كدا , يا هلتري لو مكنتش جريت كنت هقع برده او هيجري لى مصيبة ؟؟؟
وهكذا من الأشياء الغريبة والإختيارات الأغرب
***

يحكي أن فى عصر ما حدث شىء ما لسبب ما وكان هذا هوا السبب فى هذا الحال البيبي اللى وصلت له البشرية ووصل له الإنسان حاليا , وهوا دا السبب فى إن حد يسرقك وانته مرمي عالارض وبتنازع الموت وإنك تفضل مرمي كدا لحد ما عربية تقف لك وإن تروح مستشفي تقعد نص ساعة لحد ما تلاقى دكتور ......
طبقا لنظرية  The butterfly Effecct
لازم نلاقى الشخص دا ونخترع آلة زمن ونروح نولع فيه عشان حال البشرية ينصلح
والإنسان يبقى إنسان
****
كل ما يكتب تحت هذا السطر 
 إضافة يوم خمسة وعشرين 
اليوم اللى الوجع أصبح فيه قاتل ولا يحتمل 
يمكن أكتر من اليوم اللى وقعت فيه وإتسرقت 
حماقة وغباوة الزفت الآخرين كفيلة بجعلك كإنسان تفكر فى الإنتحار , أنا حاليا مبفكرش فى الإنتحار عندي أمنية واحدة بس وهي إني أغور فى ستين داهية بعيدا عن كل البقر ساكني هذا الكوكب إبن التايهة اللى كل شوية يعملها علي روحه ويسيح جبال التلج وخورم الأوزون يزيد وكلنا رايحين فى داهية إن شاء السميع العليم , وبعد ما الأمنية دي تتحقق هدعي وأقول اللهم أمتني علي الحق لا أكثر ولا أقل , تعالوا نتكلم بقى 
عارفين أنا بحب الدعوة دي لسبب واحد 
مش عشان هي دعوة بركه والناس بتدعيها كتير وبتقول يارب حسن الخاتمة 
وربنا أبدا 
الأهم من وجهة نظري بيتفسر من خلال التالي :
الإنسان فى خلال حياته كلها بيدور علي الحقيقة والحقيقة هي حقيقة واحدة بس لا تختلف بالإدراك ولا بإختلاف الأراء 

يعني معنى السطرين دول إن حضراتكم مفيش غير حقيقة واحدة بس يعني  حضرتك مش هتلاقى حقيقة وأنا هلاقى حقيقة تانية وكل واحد بقى بالصلاة عالنبي يمسك فى حقيقته كما يمسك فى لغاليغه لاء هي حقيقة واحدة , فى جملة بيقولوها من زمان الناس الكبار وإكتشفت إن حتي نجيب محفوظ كتبها بشكل أو بآخر بتقول إيه بقى ؟؟؟ بتقولك : ثق فى الباحث عن الحقيقة ولا تثق فى من وجدها , هتقولي طيب وإيه العلاقة بين الحقيقة وبين الحق هقولك الحقيقة واحدة لسبب بسيط جدا وهوا ان إله الكون واحد مش ربع دستة آلهة زي ما بلاد اليونان القديمة او الفراعنة ولاد الموكوسة شافوا , الحق واحد والحقيقة واحدة 
فلذلك أتمني قبل ما موت بتلات دقايق أشوف الحقيقة عشان عالأقل أبقى وصلت لحاجة من حياتي دي كلها مبقاش عشتها وكل اللى سيبته شوية كلام وشوية عيال يعيثون فى الأرض فساداً
***
بتدعي علينا فى مولد النبي يا رمضان :D
***
أنا مش عارف بعرف أكتب إزاي فى ظل هذا الوجع الرهيب 
الحمد لله بجد والله 
مفيش غير الواد أسامة هوا اللى دايما مصر يتصل يتطمن ويحاول يوصلي والراجل بيتعب الصراحة 
اللهم دمها نعمة صداقتك يا أسامة 
عليك إكسترنال ياض :D
***
بعضا من نفحاتي فى الفيس بوك فى بداية الوقت العصيب المنيل اللى أنا فيه دا :

- تمهيد : لا شىء حقيقي
- لا شىء يدوم للأبد حتي الموناليزا تبلي ....
- الثابت الوحيد فى الكون هوا التغيير
- سمي قلب من التقلب دا حتي الدعاء بيقول يا مقلب القلوب ثبت قلبي علي دينك
- هوا إسمه إنسان لأنه نساي وبينسي وآفته النسيان مع مرور الوقت
- مع الوقت كل شىء بيتغير
- كل الغلطات بتتكرر والغلطة ب فورة
- التقدير بيقل ويزيد مع عدد مرات خذلان الشخص ليك بتكرار نفس الفعل
- العته إنك تختار الرفيق قبل الطريق وتنام فى لوكانده مع الرفيق وتنسرق ومتمشيش ولا خطوة فى الطريق
- التعميم هوا إستراتيجية بلهاء للهروب من البحث والمواجهة
- التخصيص والتصنيف إستراتيجية أكثر بلاهة لعدم ثبات الصفات الفردية فى الأشخاص وتغيرها طبقا لتغير المواقف والأحداث والأزمنة
- الصفات اللافردية تتغير مع تغير نسبة الإيمان لدي الشخص بالشىء الذي تؤمن به جماعته

دي كانت إستاتس لطيفة كدا:D
قلت أجيبها المدونة بدل ما تموت هناك فى الفيس
***
عالساعة كام ياربي 
تقريبا عالساعة إتنين لقيت فى حد كاتب الجملة دي فى الجود ريدز 
جملة بتقول إيه :
قف علي ناصية الحلم وقاتل 
#درويش

الله يرحمك يا درويش 
لو كنت تعرف إن مفيش حد ممكن يرضي يشارك حد فى حلم أو حتي يسمع صوت واحد بيشتكي أو بيتكلم 
او بيتأوه وحالته زي الزفت 
والله يا جدع أنا واثق كان زمانك هتقلبها زي أمل دنقل 
وتقولي إرشق فى الحائط حد المطواة 
ويمكن كمان كنت هتقولي إرشق المطواة فى صدرك المتكسر دا يا فقرقر ياخويا 
آه طبعا ما أكيد هنبقى صحاب 
للأسف ملحقتكش 
تتعوض بقي فى الدار الآخرة أصاحبي 
***


عارفين الصدفة بتدفعني أحيانا لدرجة إني أسمع أغنية فتعجبني أوي بشكل مجنون وتسكن جوايا أوي وتبقى من لسته الأغاني المحبوبة بتاعتي 
وبعدين بعدها بكام شهر أسمع أغنية جامدة جدا فاحس بحالة من السحر 
وفجأة أكتشف إن اللى غنت الأغنية الأولي هي نفس البنت الجامدة فحت اللى غنت الأغنية التانية 
ومن هنا مع بعض الصدف الحلوة بيخش حياتي وقلبي بنوتة زي العسل جديدة بعد إيفانسينز وناتاشا بيدنجفيلد وبتدخل العزيزة إيزابيل وفرقتها فلورنس والماشين :D 
وبطير بقى مع الصوت إبن اللذينة الجامد جدا وبطيرررررررررررر لحد حدود المجرة 
وبسلم عالترماي وباخده بالحضن وبشده من غيره ونطير ويمكن أوديه بعد آخر لا يمكن الوصول له سوي من خلالي 

حاليا علي مقياس من واحد لعشرة فالألم بالظبط تسعة :D

***
أيون بطلت أثق فى الناس تماما 
وبطلت أثق فى الشرطة 
وبطلت أثق فى أي كائن حي يدعي إنسان وبيتكلم 
انا بحسد مرضي التوحد بغباوة والله 
مش مركزين ولا شاغلين بالهم بكل العالم المعفن المحيط بينا دا وبكل الشرور اللى الواحد مضطر يتعامل معاها 
وبكل الناس اللى بتدايقنا 

***
ليه علي الحافة الناس بتتغير ؟؟؟
يعني الأبن ميسامحش أبوه إلا لو إكتشف إن أبوه بيموت 
والأب ميسامحش إبنه ولا يحاول يمسك فيه إلا إذا حس إنه هيسافر ويسيبه 
وليه الأم متحاولش ترضي بنتها غير لما تتأكد إنها خلاص كلها كام شهر وتسيب البيت ويبقى ليها بيتها ؟

ليه معرفتك بحقيقة الفراق المقتربة أو الموت 
بتخليك تضحي بأي حاجة فى سبيل إنك ترضي اللي بتحبهم أو تحافظ عليهم 
طيب يابن العبيطة ما أبوك عايش معاك من زمان وأمك كذلك وإبنك 
يعني هوا الإعتقاد العظيم إنه هوا ممكن يسامحك فى كل سنين القرف عشان خلاص هي دي لحظة النهاية ودي الفرصة الأخيرة 
فلازم تبذل كل مجهودك 
ليه كدا ؟
تصدقوا عايز أشتم 

***
ياتري متي يمكن أن ينصت لك الآخرون ؟؟؟
الإنصات يعني اللى قدامك يسمعك حلو كدا ويفهمك ويتجاوب معاك 
مش عارف الصراحة 

***
اللهم لك الحمد علي قوة ملاحظتي اللى وديتني فى ستين داهية ولك الشكر والفضل الكامل والتام فى ذاكرتي الفولاذية :)
ياما إنته كريم يارب 
الحمد لله 
الألم دخل فى الحدود الغير مسموح بيها وطبعا أنا مش فاضي أتعامل معاه فى الدرجة من عشرة لإتناشر لأني مشغول بصلح العداد اللى الألم كسره ودخل فى مرحلة جديدة معشتهاش قبل كدا 
أول مرة أعرف معني إن كل نفس بتاخده يبقى عذاب 
وإن ضلوعك تبوظ وعضلات صدرك تتنيل 
أقولكم 
أنا رايح أريح من هذا القرف الكوني لعل هذا اليوم يخلص 
دعواتكم وتبرعاتكم 
***
مازلت تعبان بعد الراحة
يارب ...

شاب فقري

الجمعة، 19 يوليو 2013

عملت حادثة

ادعولي انا عملت حادثة واتسرقت ولسه راجع من المستشفي ...

الموبايلات اتسرقت












وانا وقعت علي جنبي ولسه راجع من المستشفي

دعواتكم

الخميس، 18 يوليو 2013


الثلاثاء، 16 يوليو 2013

مانيفستو

من غرفتي المتواضعة دايما فى جسر بيني وبين أحلامي وبين القمر وبين كل اللى بتمناه أو بحلم بيه أو فى يوم حاولت أوصله وفشلت , دايما فى مليون خطة ومليون طريقة ومليون فكرة قادرة توصلني للهدف , مش مهم الطريق فيه إيه ولا مهم السكة مقفلة إزاي ولا مدي خطورتها ولا حتي مين الرفقة اللى بتتبعك ومين بيعمل معاك صفقات حتي لو كان الشيطان ذات نفسه ولا مهم بتخسر إيه أو بتتوجع إزاي أو إيه بيقع منك عالطريق , لكن الأهم فيك إنته من جوا بتنتمي لفين ومن جواك أوي أوي فى أعماقك عارف إنته رايح فين وليه ؟ 
فى أماكن مينفعش حد يتواجد فيها ولا ينفع حد يلمسها لا من قريب ولا من بعيد حتي ولا حتي يلمحها من بعيد , فى وسط الطريق ناس كتير بتقرب وناس كتير بتقول إنك ملك ليها وفى ناس كتير بتعتبرك حق مكتسب وناس تانية بتعتبر مجرد وجعك حق مكتسب وفى ناس تانية بتفتكر إنها من كتر ما تعمقت فيك بقيت مضمون بالنسبة لهم وفى ناس عاشرة فاهمين كل حاجة لكنهم للأسف برا السور وفى بيني وبينهم مش سور واحد لاء إتنين أو تلاتة لأنهم عارفين كويس أوي إن ناس لازم تاخد حذرك منهم زي حالاتي .
فى ناس كتير بتخاف وناس كتير بتهرب وناس أكتر بتنسحب وفى وفي وفي لكن فى ساحة المعركة أو فى الآخر هيبقى فى واحد بس واقف هوا صاحب المعركة ومهما طالت المعركة أو قصرت فإنته عارف كويس أوي إن وقوف حد معاك فى الآخر أو عدم وقوف حد مش هيفرق فى حاجة لأن الهدف بكل حال من الاحوال هيتحقق 
علي مر كل السنين اللى فاتت فى عمري والناس اللى دخلت حياتي وخرجت منها كان نفسي حد يعرف يسألني سؤال فاهم معناه بجد مش مجرد يسأل , كان نفسي حد يسأل ( بتحلم بإيه ونفسك فى إيه ) من جوا أوي بيبقى فى حلم متكامل برغم براءته أو سذاجته والحلم دا بيشكل أرض الميعاد اللى لازم قبل ما أموت أنحني مرة واحدة بس عشان ألمس ترابها وأستريح , كان نفسي حد يفهم السؤال أو يسأله وهوا فاهمه عشان أقدر أجاوب لأن طبعا مينفعش تدي الإجابة أو المعلومة بسهولة ولا ينفع واحد يكون بيسألك نفسك فى إيه دلوقتى وترد تقوله اللى بتحلم بيه فى عمرك كله واللى مزروع جواك علي عمق بعيد عن كل حاجة فى الوجود ...
اللى قدامك بيسأل سؤال معين وعلي حسب العمق اللى وصله فيك بيكون الرد ... وهكذا , الموضوع عمره ما كان سهل وجملة ( أي سؤال هجاوب عليه ) لما بتتقالك بتكشف اللى قدامك أكتر ما بتكشفك :) .

***

ودماغي وذكرياتي وعقلي وقوة ملاحظتي , نقدر نقول إني مستحيل يقع مني تفصيل مهما كانت تفاهته مهما كانت إنعدام اهميته فهوا فى مكان معين مركون فى دماغي 
فى لحظة زي دي بشكرك يارب 
علي كل إختيار غلط قدرت أخده 
وعلي كل سكة مش تمام مشيت فيها 
وعلي كل مصيبة عملتها فى حياتي 
وعلي كل كارثة شاركت فيها أو إضطريت أعملها 
وعلي كل شخصية إضطريت أتعامل معاها برغم شرورها 
وعلي كل شيطان ظهرلي فى الطريق بصفقة 
وعلي كل شخص قال وعد وأخلفه 
وعلي كل واحد إلتزم بشىء وخذلني 
وعلي كل كسر 
وعلي كل وجع 
وعلي كل ألم 
شكرا يارب لأنك صنعتني بكل الحاجات الصعبة اللى فى الدنيا وعلمتني 
وشكرا لأنك خلتني مبنساش 
مهما عجزت ومهما كبرت ومهما تعبت هفضل أنا 
ولذلك ففي كل شىء قادم هكون عارف بعمل إيه وليه وإزاي 
شكرا يارب 
\\\\\\\\\\\\\\\\\\ للتاريخ //////////////////
مانيفستو 
عرفت منين ؟؟؟
الموضوع قدري بحت :)
وغير كدا أنا فاهم 
وغير كدا أنا مبسوط 
مانيفستو 
و ...
كدا يعني 
14
14
مانيفستو 
للتاريخ :)
وللقدر :)
ولي أيضاً :)
:) 1
/////////\\\\\\\\\
 
****

الوقت ...
هل تعتبر دي معركة ؟؟؟ ولا حركة فى نفس إتجاه عقارب الساعة وإستعجال للعقارب ؟
يمكن فعلا إستعجال للعقارب ويمكن عدم صبر عالوقت المتبقى ولكن مع صعوبة الأمر ومع كل مرة الواحد بيلاقي فيها عقبة 
اللى بيحصل إن القوة بتزيد والقدرة عالتحمل و الصبر والتفكير والفعل فى وسط كل الضغوط بيبقى أروع بكتير :)
زمان ياما فكرت فى إني شايل حاجات كتير أوي جوا صناديق زمنية وبقدر أستدعي الشىء اللي عايزه أو محتاجه بكل سهولة :)
دا لسه حقيقي 
لكني مبقتش عايز أستعمل الصناديق الزمنية مرة تانية أو فقدت أهميتها بالنسبة لي يمكن لأن اللى بتحتويه مبقاش له أي أهمية ...
الموضوع ببساطة ...
ولا ليه ببساطة ؟؟؟
نسيب الموضوع فى حاله :)
***


I never feared death or dying
I only fear never trying
I am whatever I am,
Only God can judge me
قول اللى تقوله وإحكي اللى تحكيه , بحب أسمعك ...
الجدول ...
الحكايات ...
(( عارفة إني مبخافش ؟؟
وإني أحيانا محتاج خوفي دا عشان أكون بكل طاقتي وقوتي ؟
لأن إزاي هتقدر تعيش بكل طاقتك وتنجح بشكل ملوش نظير لو إنته مش خايف من الفشل ؟؟
لو مفيش جواك خوف رهيب من الموت إزاي تقدر تحافظ علي حياتك وتمسك فيها وتحارب بقوة ؟؟؟
الخوف ضروري جدا 
بس أنا مبخافش 
بس ممكن أعيش حالة الخوف لما أحتاجها وأحس بيه لما ألاقى إنه له سبب منطقي وإنه هيبقى طاقة ليا 
 ))
الفكرة كلها فى إنك أحيانا لازم تسيطر علي كل حاجة جواك بمنتهي القوة 
عشان مش تضر حد بتحبه ولا توجع إنسان بيثق فيك أو غالي عليك 
الفكرة كلها فى أنك تسيطر علي مشاعرك وإحساسك اللى عامل زي المفاعل الذري 
وأي تسرب مهما كان ضعيف هيقضي علي مليون حاجة ...
الحمد لله إني أقدر أعمل دا 
الحمد لله إن مفيش المشكلة دي 
الحمد لله إني بعمل دا :)

***
دايما الحب أو أي حاجة تانية فى حياتنا مليانة مغامرة ومخاطرة , بالظبط واقف قدام القطر ومش خايف , بالظبط بمنتهي القوة بتاخد قرار وبرغم كل خطورة بتقف وتكمل ومش مهم أي حاجة تانية , حتي لو واقف قدام القطر , الموضوع كدا دايما بيبقى عامل زي عزف الكمان وإنته واقف علي شريط القطر والقطر جاي والسيرناد من العظمة بحيث ممكن تضحي بحياتك عشان تكمل عزفه , الدنيا كلها هتشوفك مجنون لوقفتك قدام القطر أو عشان بتعمل اللي بتعمله أو بتاخد إختيار ما , يعني معلش تخيل إنك مروح بيتكم ولقيت واحد واقف يعزم بالكمان قدام القطر , والقطر جاي بسرعة رهيبة والشخص دا مستمر فى العزف :)
هتقول مجنون لكنه إختيار , فى مخاطرة أيوا , فى موت ووجع ممكن ييجي ؟؟ أيون طبعا , طيب يا هلتري الشخص دا دماغه فين ؟ وياتري حاسب الموضوع ولا لاء ؟
بالظبط بقى أنا لما باخد قرار فيه مخاطرة أو جنان بالظبط لازم يكون عندي القوة مش عالإلتزام والتفكير والتنفيذ وبس ولكن الإنضباط الكافى جدا والإحساس بكل شىء حواليا عشان ببساطة مهما حصل سواء متوقعه فى دماغي أو لاء فأنا أكيد عارف هخرج من قدام القطر إمتي وإزاي وهقدر أنقذ الموقف وأتحرك ولا لاء , والحمد لله العيب الجوهري فيا هوا إن دماغي عمرها ما بتنخطف ولسه مستني البنت اللى تخطف الدماغ دي بحيث تعزلني عن الوجود كله وتخليني مش شايف غيرها , عارفين درجة العمي ؟؟؟ طبعا الدرجة دي ممكن فى ناس تقول إني وصلت لها قبل كدا  , بس متقدرش تحكم ببساطة غير لما تشوفني إتعميت فعلا , يعني متقدرش تقول اللبن فار أو المية بتغلي إلا إذا كنت شفت كل حالاتها وقدرت توصل لدرجة إنك تفهمها للدرجة

***
أنا مين ؟؟؟
الإسم بيعتبر وعد علي الإنسان 
وعشان كدا فى ناس بتعتبره مهم 
لكن فى ناس تانية بتعتبر الإسم مش مهم 
وبيبصوا ورا العيون وورا الجسد وورا العقل لحد ما توصل لروحك 
وتسيب بصمة علي روحك وعلي كل نفس بتاخده وعلي كل موقف بتعيشه 
أيون , أننا بالظبط مستني لما أوصل للحظة دي  ...
عارف إنها جاية لا محالة 
ولكني حتى الآن مصر علي حاجة مهمة جدا 
وهي إني أعيش وأستمر فى كوني أنا ....
وأحافظ كل شوية علي أراضي بعيدة أوي جوايا وعلي أعماق بتظهر كل شوية 
عارف لما بتبقى بتحفر بتدور علي شىء فى أرض وكل ما توصل لعمق معين تقوم المادة اللى بتفحت لها بتبعد وبتتعمق أكتر :)
أيون :)
الحكاية كلها إن لما تحصل اللحظة دي هيبقى فى أمان ومعني وجود الأمان إن فى إيمان قوي قدر يوصلك للحظة دي وللحالة دي :) 
((
 ساعتها مفيش حاجة هتبعد عن اللى بيحفر وههدي وهرتاح زي ما بتمني :) 
))

عشان كدا دايما بتحدي بقوة شديدة لأني عارف نفسي يمكن أكتر من أي حد مليون مرة ويمكن برده لما بعرف حد بعرف ألمس الروح اللى جوا وأفهم الشخص كويس أوي :)

***

فاكر اليوم دا كأنه حصل النهارده وبكل تفاصيله حافظه كويس جدا جدا جدا , كنا بنتكلم عن سواقة العجل ومكنتش لسه بعرف أسوق عجل , قالت لى علي إحساس الطيران والسرعة وقالت لي عالكلاب اللى بتجري وراها وهي سايقة العجل بليل , الإحساس الرائع اللى شفته فى عيونها واللى حسيته من مجرد كلامها ووصفها , الطريقة اللى كانت بتاخد بيها نفسها وكل الحاجات دي خليتني فى أقل من شهر أتعلم سواقة العجل :D
وبالهاند فري والمزيكا والعجلة والطريق المفتوح والكلاب اللى مبتبطلش نبح وجري ورا العجلة وإحساس السيطرة والقوة وأنا سايق والقدرة علي مواجهة كلاب مسعورة لو قفشتني مش هتسيب حتة سليمة ( علي فكرة نفس الكلاب اللى فى الغيطان مسكت واحد صاحبي قبل كدا وشوهته ) والإحساس بإني فيا القوة دي كلها
لكن من التجربة دي فكرت فى حاجة تانية 
ياتري أنهي الأروع إحساس الطيران بشكل مستمر والخطورة ؟؟
ولا إحساس الثبات والأمان والإستقرار والهوا الخفيف واللى بيلمس وشي والفرحة بيه ؟
مش هجاوب عالسؤال دا هسيب كل واحد يختار :)
عن نفسي أنا عارف كويس أوي معني الأتنين وأهمية كل واحد فيهم , ما هوا مينفعش بعد بوست زي دا تلاقيني بقولك إجابة وحكمة ترميها فى جانب بعيد أوي من دماغك وتعيش حياتك , لازم أنكد عليك وأخليك تفكر :)

شاب فقري

الجمعة، 12 يوليو 2013

سبعة أشياء منفصلة

أنا كنت داخل أتكلم علي إني فى المعدل العادي والوضع الطبيعي ليا قررت أحسب الأفكار اللى بتشغل تفكيري فى نفس الدقيقة واللى بفكر فيها والحاجات اللى شغلاني فى دقيقة واحدة وصلت لحد سبعة وزهقت من العدد :D
وبعد ما غلطت فى العدد قررت أغلط تاني وبعدين أعد من الأول وأغلط برده :D
كنت داخل أتكلم فى الموضوع دا 
لأنه مهم 
وفى حاجة تانية تخص إني ببساطة مكسل أكتب جدا بالرغم من انها شوية تكتكة عالكيبورد 
بس مكسل جدا والله 
معندكوش فكرة يا بشرمكسل اكتب ازاى بالرغم من ان حاليا فى وقت وافكار واحساس
وبرده يمكن السبب فى عدم الكتابة : لأن الواحد أو الإنسان البني آدم العادي الطبيعي لما بيكون فرحان بيعيش الفرحة 

ما هوا أحيانا فى اللينك بينك وبين ربنا مش شرط وانته واقف قدامه يعني لا مؤاخذة تبقى حاسس بيه ومقطعك الشوق وبتقول بحبك يارب ويارب انا وحش وابن كلب وسامحني 
مش ضروري وربنا 
الفكرة فى استمرار وقفتك قدام ربنا بشكل دايما مش فى انك بتبقى حاسس 
ابدا يا حوبي 
ممكن تبقى حاسس احيانا 
لكن الفكرة مش فى كدا 
- افكار - تتابع - يقين -وحود - خلق - تدمير - أمان - أمل 

بجد مليش نفس أشرح :)
عندي حاجات أهم بس اهم حاجة فى جدولي فى اللحظة الحالية 
إني أنام لحد ما السرير يبلغ عني 
تصبحوا علي خير 


نتكلم بعدين 
انا موثق كل افكارى بالحرف فمفيش حاجة هتضيع :)))

شاب فقري فى يوم أجازة وفاضي وحب يغلس عالدنيا :)

الخميس، 4 يوليو 2013

إكتئاب بطاطساوي شرس

لا ينصح بالقراءة لأي شخص ...

 هي أصلا أغنية فقر كل ما تشتغل تحصل مصيبة وأشوف نفس الإحساس المتجسد للذنب والألم والخنقة والكآبة والرغبة فى عدم الحياة

" نايم فى الأباتشي "

يعني هوا لما تنام فى الأباتشي أو جوا أي حاجة بتحبها دا هيريحك ؟؟؟

أحياناً بننتحر بإننا نعمل كل الحاجات اللى بنحبها لأننا ببساطة بنحاول نهرب من حاجات مش قادرين نكرهها

" تحت الحصار فى بيت مع سفاح "

شىء يدعو للشفقة مجرد ذكر الفكرة بس أكيد البيت يستحمل فكرة وجودكم كلكم معاه فى نفس اللحظة ويستحمل كمان وجود ناس من برا لأنكم بكل بساطة هتقدروا تحموا البيت صح ؟؟ مش هتسيبوا حد يموت أو يمشي ؟ صح ؟

" أنا عارفك "

متبقاش غبي مينفعش تعرف حد بشكل كامل لأن حتي الناس متعرفش نفسها ولسه بتكتشف نفسها إزاي إنته هتثق أو هتحب أو هتعيش مع شخص متعرفوش ؟؟؟ بس متجيش تقولي عايز أعيش لوحدي لأن ببساطة هديك ميت قلم علي سهوة لأن الإنسان كائن إجتماعي حتي لما بينعزل وبيقعد عالنت بالساعات فمعني فكرة النت عموما هي القدرة على التواصل مع عوالم أخري وأشياء وأحداث وتفاصيل أخري لكنها بعيدة عن حواجز الحياة الشخصية فدا بيمنح ويوفر الأمان فى نقط معينة لكنه بيحسس بالعزلة بنسبة كبيرة وبيصيب بحالة إكتئاب شديدة للي مبيعرفش يتعامل معاه 

 ****

" لسه بحلم يوم بمرسي ومركبة وحضن وصبية "
 وهوا فكرك لما ترسمي لى مركبة وحضن وصبية هبقى لقيتهم
تعرفي
لولا  الغباء البشري المتحكم مكانش ضاع مليون حاجة
فكرة أصلا إن شىء يضيع دي فكرة متخلفة وغبية وبنت ستين مليون كلب مع إن الكلب برىء منها لأنه وفي بس برده فكرة الضياع دي بتلاقى نفسك فى النص لو إنته اللى ضعت لكن لما يضيع منك حاجة بتحبها أو شخص يهمك أمره بدون حب بقي وهتش من دا والكلام بتاع الأفورة بتاع الناس دا بتحس بخلل بإن فى شىء إنسرق منك فى وسط الزحمة وإنته متلخبط وعايز تدور وعايز حد يمسك إيدك عشان لو الزحمة وقعتك ويمكن الحد دا لما يمسك إيدك يحسسك ببساطة إنك طاير مع الهوا
يعني هوا قبل ما يمسك إيدك حاسس إن الزحمة والكركبة هتقتلك
لكن بعد ما يمسك إيدك تلاقى فجأة حاجة مختلفة جدا حصلت تلاقى إحساس إن الزحمة إختفت وإنك فعلا طاير بس لامس الأرض بس برجليك بس لو سابك هتطير فووووووووووووووووووووق أوي عند كوباية قهوة عالبحر
***

متنطش من عالسور إلا لو هتقدر تتعامل مع اللى ورا السور
ومتفتحش باب إلا لو تقدر تتعامل معاه
ومتقربش إلا لو تقدر تحمي نفسك من النار

حاجات لازم كل شخص عبيط يفتكرها آه والله
أنا مثلا فاكرها جدا عشان كدا بقدر بكل سهولة أقيم الموقف وأقدر إيه اللى يحصل وإيه اللى ميحصلش
وأقدر كذلك أفهم آلية سير أي شىء عشان لما أنط من عالسور أبقي فاهم إيه اللى هيجري
فاهماني ؟؟؟
ما هوا فى تحت كل قشرة بلاوى مستخبية
أنا عامل زي الشيطان اللى قدر يبيع الخطيئة للخطاة والقديسين وباعها لهم بلا تمن رحمة بيهم واحساس منه انهم يستاهلوا يبقوا احرار وفى الآخر هوا اللى اتعاقب وهما فلتوا بالعقاب
تفتكر إن فى نقطة ما من خط سير حياتنا فى عدالة هتطبق علي كل شىء وهنقدر نعيش سعدا ؟
طيب وهوا اصلا العدالة بتجيب سعادة ؟؟
السعادة يمكن بتيجي بالتفاهم
عشان كدا بيقولوا الحب دا اهم الحاجات اللى فيه : معرفة وإهتمام وتفاهم
لأن اكيد التفاهم بين اى اتنين بيخلق حالة من السعادة مستديمة بينهم
بس ياتري لو حد شد الفيشة من واحد فيهم ؟؟؟ وفصله من لحظة التفاهم
ياتري هيجري إيه ؟
متي يتجمع الشتيتين يا كوكو ؟ أيون وربنا كوكو ... انا عارف الناس وأقدر أميز الكوكو أول ما أشوفه ومبحبش حد يعارضني ويقولي أنا مش كوكو :D
نفس نظرية الكتكوت المستحمي
****

 انا ببساطة وصلت لحد البوابات
وساعتها بس عرفت انا هعمل إيه
طول الطريق وقبلها بايام وشهور عمال افكر
وجيت لحد البوابات اخدت قراري
كانت كوباية الشاى اللى شربتها فى الاستراحة لسه مفعولها ساري جوا دماغي
والمطر عامل شغله
والبرد كان إبن ستين كلب جامد جدا يحسسك إنك عايش
وهناك كدا بصيت للبوابات وعرفت
إن فى حاجات لازم اخد بالي منها
واخدت قرار مهم جدا فى حياتي
ومن هنا إختلفت الأمور وإتغير كل شىء

بالظبببببببببببببببببببببببببببببببببببببببببببببببببط
كانت معدتي وجعاني لما قعدت عالقهوة
والقهوة كانت حقيرة بنت كلب
ايون انا واخد لها صورة
ثواني انزل بالصورة
يخرب بيت شوتاتي :D
 صورة بت ستين كلب جامدة جدا :D
شربت كوباية البتاع الحلبة اللى طلبتها تقريبا عشان معدتي واخدت حباية دوا ولبست الشنطة
وكان الاحساس الاول هوا الجمال والفرحة والمرح
مررررررررررررررررررررررررررح بجد
أيون والختمة ياعم :D
معدتي كانت وجعاني من القلق ومن السفر ومن القرار
لانه صعب بشكل إبن ستين فى سبعين
وكمان الصناديق كانت تقيلة عالشنطة
نفسي أشتري لنفسي صناديق
هوا ليه عمر ما حد بيجيبلي هدية نفسي فيها حلوة بحبها بجد
مع انى بجيب لكل اللى بحبهم هدايا
يووووووووووووووووووووووووووووه
الموبايل سايلنت
أحييييييييه بقي :D
 ***
 جربت تتحرق ؟؟؟
أيون بالظبط كدا
الفكرة كلها فى الألم الجسدي ؟؟ طبعا تبقى متخلف جدا
الفكرة فى أمور أخري
عارف لما تبقى ماشي جوا مضمار سباق ؟؟ البتاع التراك بتاع العربيات دا اللى بيجري فيه العربيات الفورميلا وبعدين فجاة تلاقى طرزان جاي متشعلق فى حبل وبيشوطك بالشلوت يرميك بعيدا عن التراك وعن العربيات فى اللحظة الأخيرة
أيووووووون بالظبط كدا هوا دا اللى بنتكلم فيه بقى
إن حاجات زي الحاجات إياها بتنقلك من واقع لواقع ومن عالم لعالم ومن دنيا لدنيا
وآه يا دنيا علي راي بوسي
وزي ما قال العظيم محمود الليثي : الدنيا زي المرجيحة يوم تحت وفوق
إحساس إن وسخة لما كل مرة بسمع أغنية غير دول بييجي فى خيالي بنت بترقص مع إني عمري ما شفتها بترقص , أنا مفكرتش قبل كدا أو يمكن فكرت هل الرقص بفستان طويل أحلي ولا الرقص بجينز وليجند .... لاء لاء الصورة فى خيالي محددة بشكل معين وبحركات معينة
نفس البنت اللى واقفة جنب الحيطة بتغمز وبتطلع لسانها وبتحدفك بحاجة تعورك عشان تعك بيها الدنيا وبعدين تقعد عالرصيف جنبك تعيط
هتقولي بطل جنان يا كريم إيه اللى جاب الاودة جنب الحيطة جنب الرصيف جنب الاغنية والرقص
هقولك كلمة واحدة بس تفهم منها : سويت

***

من أعظم الإختراعات اللي قام بيها البشر علي الإطلاق هوا الشاي , شىء عظيم ومن وجهة نظري فهوا مشروب روحاني كدا بينقلك لعوالم أخري وكان إبن محترفة بقى ولعيبة بقى اللى حط عالشاي نعناع ودلق نص برطمان السكر فى الكوباية وعمله فى كوباية قزاز كدا بتلمع وعملاقة :D
هتقولي القهوة برقبته والقهوة والهىء والمىء هقولك إسرح
القهوة جميلة طبعا وانا من عشاقها
لكن فى مليون عامل بيحكمها بتخلي متقدرش تقيمها
لكن الشاي بيعتمد علي روحك
يعني من الآخر كوباية الشاي مش هتطلع حلوة لو حطيت عليها سكر الدنيا كلها وروحك مش حلوة وعمرها ما هتبقى ريحة النعناع فايحة فيها إلا لو كل الجناين اللى جواك نسيمها بيتحط فى الشاي والنعناع وعمرها ما هتبقى رايقة وتعدل المزاج إلا لو كانت على ترابيزة مع شخص عارف كويس أسرار الشاي .
 ***

مش هتكلم عالفراش لأن ببساطة فى اطوار تحول وكلام كدا عالفراش ملوش علاقة بالامر فطز فى كل الفراشات اللى فى الوجود

 بس الصورة حلوة قلت احطها :D
***

 الفكرة فى حد ذاتها مشكلة
فكرة القرب من حد للدرجة دي
فى ملايين الأشخاص فى الكرة الأرضية
لكني بخلاصة تجاربي مع كل شخصية إتعاملت معاها فى كل مكان ولو حتي بكلمة صباح الخير او حتي بكلمة شكرا
مفيش قرب إرتحت فيه إلا قرب واحد بس
المشكلة بقى هتيجي تقولي فى إيه ؟
هقوم ببساطة ماسك لك المسطرة الحديد اللى ضايعة مني بقالها سنة وقالب عليها الاودة واقولك بص يا توتو
دلوقتى لما مثلا واحد صاحبك ياخدك محل حواوشي فى وسط البلد ويقوم بقى يقعد يجيبلك فى حواوشي وفى الاخر تقوله الرغيف بكام يقوم يقولك باتنين جنيه ؟ بس إزاي ياعم بإتنين جنيه دا مليان لحمة , يا سيدي هوا كدا باتنين جنيه وتقعد تاكل وانته عندك شك إن دي لحمة قطط فتقوم مطلع حتة لحمة وترميها لقطة فى الشارع قال يعني بتعمل إختبار لانها لو لحمة قطط القطة مش هتاكلها لكن بتلاقى القطة مبتسمة وبتاكل وبتقولك والنبي ياعمو هات كمان حته
:D
أحيانا من كتر ما الموضوع حلو فى بعض الناس بتشك فى جمال الموضوع وحلاوته
وبينسوا تماما ان فى شخص طلع عين اهله عشان يخلي كل حاجة حلوة واستحمل كل حاجة
الشخص اللى بيجري فى الكواليس وعمال يقيد الكشافات ويشغل المزيكا ويفتح الستارة
تيجي انته بقى تقولي لاء اصل الموضوع دا مشكوك  فى اصله ؟
ما هوا فعلا مشكوك فى اصل امه لان الشخص اللى بيعمل كل دا وبيعمل حاجة ممتازة كدا بيبقى شخص غبي

هاي أحب أعرفك بنفسي أنا الغبي اللى بيعمل الحواوشي الرغيف باتنين جنيه وبيدي معاه طحينة وكاتشب وطرشي كتير وبيشتغل عالكشافات والموسيقى والستارة عالمسرح وبيعمل كل حاجة تخلي الحلم المستحيل ممكن يتحقق
والنبي بقى ممكن بعد اذن حضرتك تريحني لانى بجد تعبت
مش هفضل يطلع عين اهلي كدا وتيجي تقولي اصل والنبي مينفعش اريحك اصل وفصل
يا اخي A7A 
****
هوا ببساطة The Rain Maker
أينعم هوا ذلك الشخص اللى عنده قدرة عقليه جبارة
وبيقدر يحول الناس لفتافيت ويعمل أمطار من دم أعداؤه
لكن حاسب يابن العبيطة
دا مجرد طفل
طفل صغير بسيط تقدر بشوية حب صغيرين خالص وتفاهم تعمل معاه المستحيل ويبقى فى صفك مش ضدك
وبعدين حتي لو ضدك فهوا ككل الأطفال بدل ما يحرق بيتكم  ويهد شخصيتك وحلمك اللى بناهم معاك
هيفكر يخاصمك ومش يقولك ازيك ياعمو ومش يروح يزورك فى البيت ولا يقف ينده علي احلامك تحت البيت
مش هيهتم بيك ولا هيسأل عنك ومش هيبص عليك
هوا دا بقى المعنى المفهوم للجملة إياها
أيون العيل أبو إتناشر سنة
ما هوا مش معقول تفكر إن حتي لو كان اللى قدامك فى منتهي القوة إنه ممكن يحرقك بقوته دي
فاهمني يا بكابورت افندي ؟؟؟
أيووووووووووووووووووووووووووووووووون بالظبط
خد تايجر كينج وهتبقى تمام يا تيمو وهيطلع لك شعر فى صدرك تاني وهتبقى نجم الجير

 ****


 أيون بقى وسمعني سلام البطاطسايه المكتئبة اللى بتفكر فى الإنتحار فى الزيت عشان تبقى طعمة ولذيذة ومحدش يعرف إن فى قصة وعلاقة بينها وبين الزيت وإنها مش بتنتحر بس بتحاول تحضنه فبتموت فيه وتسكنه جواها حتي لو هتتحرق وهوا من شدة شوقه مش عارف يعمل إيه بس بعد ما بتعدي عليه بتبقى ألذ وأطعم وحكاية

بالظبط كدا 
***

طفلتي
شاور تايم
عشان نلبس حاجة بنحبها
و ننام حلوين كدا
و نصحي مبسوطين

أيون هاتي إيدك
غمضي عيونك
طيري معايا بقي :)

شاب فقري

#P.S :مشفر_بالكامل

حين لا يصبح هنالك نور ويختفي النور من كل شىء ومن كل مكان حولك تأكدي من حمل هذي فهذي النار ستريكي الطريق للنور 
...

حضن بقي ؟؟؟
أمان ؟؟؟
واحد ولا إتنين ولا تلاتة ؟؟؟
ها؟؟
طيب
طيب حضن يلا :D

وقد يكون إكتئاب قلقاسي شرس :D

إيه اللى بيجمع البطاطس والقلقاس ؟؟؟
فى الشكل والقشرة والجوهر والطعم ؟؟؟
واللى بياكلوهم برده
لكل شىء معني المهم نفهم المعني كويس جدا
أنا تعبت من الكتابة
هقوم أخد شاور لطيف كدا
وأخرج مع العيال صحابي
وآجي تاني
بس خلاص
إنتهي البوست العملاق المتعملق الطويل والرفيع بزيادة

الثلاثاء، 2 يوليو 2013

ديكستر يعود من جديد

اللي يعرفني كويس يعرف معني الصورة اللى فى ال Cover بتاع الفيس بوك بقالها شهور , أو بيتهيألي محدش أصلا يعرفني يعرف معناها , أو نقدر نقول إن محدش بيقدر يتعمق بالشكل الكافي اللي يخليه يقدر يوصل لإنه يعرفني أو يفهم معني صورة زي دي من اللحظة الأولي أو يحس حتي باللي فى دماغي , يمكن فى ناس كتير عاشت جنبي وإضطريت للأسف إني أشرح لهم وإني أفهمهم وإضطريت لأمور كتير أوي , لكن بعيدا بقى عن كل العك اللي إتكلمت فيه دا خلونا نتكلم فى النقطة الأهم وهي فكرة البوست أو انا جاي أقول إيه , عن  ديكستر الغامض الحالم بطل رواية وبطل مسلسل وعن أداء مايكل سى هول وعن المسلسل والفكرة والعقد النفسية والكلام الكبير دا :D , فكركم انا هتكلم فى كل الحاجات الملعبكة دي ؟؟؟ ههههههه ناس طيبين أوي أوي يا خال :D

***
بما إنك كلمتيني النهارده وصدمتيني بما فيه الكفاية فأنا مش هتكلم طبعا نهائيا فى اللى قلتيه ولا هجيب سيرتك بس هقولك إني فى وسط ما انتي بتتكلمي كنت بكتب و فكرتيني بحاجات موجعة أوي , احيانا بنسي إنك موجودة وأحيان أخري زي الأيام اللى فاتت بفكر إنك هتنطقي وتتكلمي فى أي وقت لأن فى أحمال خفية مش عارف إزاي بتحسي بيها أو بتيجي لكن أنا مش هاجي النهارده أفسر كل اللى بيننا أنا مش عبيط للدرجة دي , لكني هنا بقولك إني بدعي من قلبي ودا كفاية أوي وهسكت ...
***
 أكتر من الجنة
***
مبكونش سعيد قد ما بشوف حلقة جديدة من المسلسل دا أو أشغل السبع أجزاء من الاول للآخر وأفكر أو أنام وأنا مشغل حلقتين , عارف طبعا إنه إزاي تنام علي مسلسل عن القتل والدم والعقد النفسية :D , أهلا وسهلا بيك فى عالمي الخاص , درجة تانية ومختلفة عن الدرجة اللى قبلها , فى ناس بتقول مبنبطلش تفكير وإحنا نايمين , ودا بيحصلهم نادراً , انا بقي نفسي ربنا يكرمنى كدا قادر يا كريم ولما أنام مفكرش فى أي حاجة ومصحاش ألاقيني بقول نفسي لقيت حل وحاسس إني منمتش
***
أنا مشبعتش
***

رحلة البحث عن النور جوا الإنسان , التفكير فى المشاعر والحياة والبحث فى الحياة عن الذات والمعني , المواجهة مع قيم وأفكار الغير ومواجهة قيم المجتمع البالية وأفكاره العبيطة اللى متشبث بيها .
رحلة طويلة أوي مليانة مفآجات , إنسان بيستكشف ماضيه وبيكتشف إزاي أصبح الشخص الحالي وبيركز فى التفاصيل
وبيفهم الآخر وعنده كود او نظام وقواعد ماشي عليها , ودا من أروع الحاجات اللى بتعجبني فى الشخصية دي .

***
تعبت
***
 ياتري إمتي الوقت المناسب عشان تبقى إنسان أحسن ؟ إمتي الوقت المناسب عشان عالأقل تسمح لجوهرك ينور للغير ؟ إمتي الوقت المناسب لأي حاجة بتغير حياتنا زي الحب أو الفرحة أو الحزن ؟ إمتي الوقت المناسب لأي حاجة ؟؟ ياتري حد عارف فعلا ولا كل واحد فينا بيعمل اللى بيتمناه وخلاص فى الوقت اللى عايزه ؟؟ 
***
حد التعب 
***
ما هوا مش هيفضل الواحد طول العمر بيعمل الحاجة الصح , أحيانا كدا لازم يتجنن ويعمل الحاجة الغلط أيا كانت , اهوه نوع من التغيير يا أخي :D 
فكرة إن عقلك يقولك حاجة وقلبك يقولك حاجة تانية وأفكارك تصارعك عشان توصل بيك لنقطة معينة بتلبي إحتياجاتك يبقى إنت فى صراع مع نفسك وأعظم الإنتصارات هي اللى بتنتصرها علي نفسك , بس يا هلتري كدا حد هيعرف أصلا بوجود المعركة دى وبإن فى أكتر من واحد جواك بيتخانقوا مع بعض وكل ليلة واحد بينتصر وبيصحي وبيخرج تاني يوم والبقية بيبقوا نايمين جوا فى العسل او متضروبين ومتكسرين ؟ متنساش إن الحرب خدعة لكن مع نفسك الخدعة او الموضوع لو صدقته ومشيت فيه كتير بكل تفاصيله بيبقى حقيقة مش مجرد موضوع أو حلم أو حكاية ... بيبقى حقيقة كاملة مكتملة مش مجرد حلم او موضوع وإنتهي 
بيقولوا لما الواحد بيتقطع دراعه او رجله بيفضل بعد البتر بشهور يحس زي ما يكون بتنميل فى مكان الدراع اللى هوا اصلا مش موجود , حالة نفسية بتحس إن الجزء المبتور منك لسه موجود ولسه بيتحرك وبينمل ومحتاج تهرش فيه عشان تستريح أو تريحه .
***
عكيتي الدنيا
***
 إحتياجاتي كإنسان مختلفة عن البقية 
مش دايما بدور عاللي الناس بتدور عليه , أنا بشوف حاجة أهم فى أي شىء وبركز فيها وبحاول وانا مركز فيها اتعب اكتر عشان أوصل لها , إحتياجاتي مختلفة 
***
نفسي أرتاح 
***
إياك تقلل من قدرة الآخرين علي خذلانك 
إياك ...
يقدروا وبسهولة , خد حذرك 
بيعملوها مرة ورا التانية ورا التالتة وحتي المليون
***
كل مرة نفس الغلطة ونفس الوجع 
***

فى عيون بعض الناس برغم كل شىء ...

أنت مش الوحش 

إنت الرحمة ويمكن الفرحة ويمكن السعادة ويمكن النور 

علي حسب كل واحد بيشوف إيه وبيعمل إيه وبيتعامل إزاي ... :(

***
مش الأرض بس اللى ساقعة , كل حاجة بقت كدا .
***

 كيميا جوا قلوب الناس 
بعض التفاعلات لما بتحصل 
حتي لو بنسبة صغيرة أو قليلة أوي 
بيبقى من المستحيل الفصل بين المكونات أو إرجاع المواد لحالاتها الأصلية 
بيبقى من المستحيل إن تقول إن نسبة التعرض للمادة الفلانية وهم 
لان حتي لو كان إشعاع بسيط أو مجرد تاتش قليل جدا 
فهوا حصل منه تفاعل رهيب 
كان السبب فى كارثة راح ضحيتها ملايين الأفكار ويمكن الأماني 
***
حلم 
***


what kind of fathers will i be ? After all I kill people
***
مش عارف , عايز أعرف بقي 
***
عن الناس اللي بتشوف الحقيقة وبتغامر وبتتحمل النتايج وبتكمل برغم كل اللي بتسمعه 

عنكم أيها العظماء

شكراً

إلي أن ألتقيكم بقي أبقى أحييكم ساعتها :(

لكن طول ما انا معرفش إنتوا فين أو أوصلكم إزاي فلكم مني الشكر والثناء ...

شاب فقري

#P.S :مشفر .