الثلاثاء، 2 يوليو 2013

ديكستر يعود من جديد

اللي يعرفني كويس يعرف معني الصورة اللى فى ال Cover بتاع الفيس بوك بقالها شهور , أو بيتهيألي محدش أصلا يعرفني يعرف معناها , أو نقدر نقول إن محدش بيقدر يتعمق بالشكل الكافي اللي يخليه يقدر يوصل لإنه يعرفني أو يفهم معني صورة زي دي من اللحظة الأولي أو يحس حتي باللي فى دماغي , يمكن فى ناس كتير عاشت جنبي وإضطريت للأسف إني أشرح لهم وإني أفهمهم وإضطريت لأمور كتير أوي , لكن بعيدا بقى عن كل العك اللي إتكلمت فيه دا خلونا نتكلم فى النقطة الأهم وهي فكرة البوست أو انا جاي أقول إيه , عن  ديكستر الغامض الحالم بطل رواية وبطل مسلسل وعن أداء مايكل سى هول وعن المسلسل والفكرة والعقد النفسية والكلام الكبير دا :D , فكركم انا هتكلم فى كل الحاجات الملعبكة دي ؟؟؟ ههههههه ناس طيبين أوي أوي يا خال :D

***
بما إنك كلمتيني النهارده وصدمتيني بما فيه الكفاية فأنا مش هتكلم طبعا نهائيا فى اللى قلتيه ولا هجيب سيرتك بس هقولك إني فى وسط ما انتي بتتكلمي كنت بكتب و فكرتيني بحاجات موجعة أوي , احيانا بنسي إنك موجودة وأحيان أخري زي الأيام اللى فاتت بفكر إنك هتنطقي وتتكلمي فى أي وقت لأن فى أحمال خفية مش عارف إزاي بتحسي بيها أو بتيجي لكن أنا مش هاجي النهارده أفسر كل اللى بيننا أنا مش عبيط للدرجة دي , لكني هنا بقولك إني بدعي من قلبي ودا كفاية أوي وهسكت ...
***
 أكتر من الجنة
***
مبكونش سعيد قد ما بشوف حلقة جديدة من المسلسل دا أو أشغل السبع أجزاء من الاول للآخر وأفكر أو أنام وأنا مشغل حلقتين , عارف طبعا إنه إزاي تنام علي مسلسل عن القتل والدم والعقد النفسية :D , أهلا وسهلا بيك فى عالمي الخاص , درجة تانية ومختلفة عن الدرجة اللى قبلها , فى ناس بتقول مبنبطلش تفكير وإحنا نايمين , ودا بيحصلهم نادراً , انا بقي نفسي ربنا يكرمنى كدا قادر يا كريم ولما أنام مفكرش فى أي حاجة ومصحاش ألاقيني بقول نفسي لقيت حل وحاسس إني منمتش
***
أنا مشبعتش
***

رحلة البحث عن النور جوا الإنسان , التفكير فى المشاعر والحياة والبحث فى الحياة عن الذات والمعني , المواجهة مع قيم وأفكار الغير ومواجهة قيم المجتمع البالية وأفكاره العبيطة اللى متشبث بيها .
رحلة طويلة أوي مليانة مفآجات , إنسان بيستكشف ماضيه وبيكتشف إزاي أصبح الشخص الحالي وبيركز فى التفاصيل
وبيفهم الآخر وعنده كود او نظام وقواعد ماشي عليها , ودا من أروع الحاجات اللى بتعجبني فى الشخصية دي .

***
تعبت
***
 ياتري إمتي الوقت المناسب عشان تبقى إنسان أحسن ؟ إمتي الوقت المناسب عشان عالأقل تسمح لجوهرك ينور للغير ؟ إمتي الوقت المناسب لأي حاجة بتغير حياتنا زي الحب أو الفرحة أو الحزن ؟ إمتي الوقت المناسب لأي حاجة ؟؟ ياتري حد عارف فعلا ولا كل واحد فينا بيعمل اللى بيتمناه وخلاص فى الوقت اللى عايزه ؟؟ 
***
حد التعب 
***
ما هوا مش هيفضل الواحد طول العمر بيعمل الحاجة الصح , أحيانا كدا لازم يتجنن ويعمل الحاجة الغلط أيا كانت , اهوه نوع من التغيير يا أخي :D 
فكرة إن عقلك يقولك حاجة وقلبك يقولك حاجة تانية وأفكارك تصارعك عشان توصل بيك لنقطة معينة بتلبي إحتياجاتك يبقى إنت فى صراع مع نفسك وأعظم الإنتصارات هي اللى بتنتصرها علي نفسك , بس يا هلتري كدا حد هيعرف أصلا بوجود المعركة دى وبإن فى أكتر من واحد جواك بيتخانقوا مع بعض وكل ليلة واحد بينتصر وبيصحي وبيخرج تاني يوم والبقية بيبقوا نايمين جوا فى العسل او متضروبين ومتكسرين ؟ متنساش إن الحرب خدعة لكن مع نفسك الخدعة او الموضوع لو صدقته ومشيت فيه كتير بكل تفاصيله بيبقى حقيقة مش مجرد موضوع أو حلم أو حكاية ... بيبقى حقيقة كاملة مكتملة مش مجرد حلم او موضوع وإنتهي 
بيقولوا لما الواحد بيتقطع دراعه او رجله بيفضل بعد البتر بشهور يحس زي ما يكون بتنميل فى مكان الدراع اللى هوا اصلا مش موجود , حالة نفسية بتحس إن الجزء المبتور منك لسه موجود ولسه بيتحرك وبينمل ومحتاج تهرش فيه عشان تستريح أو تريحه .
***
عكيتي الدنيا
***
 إحتياجاتي كإنسان مختلفة عن البقية 
مش دايما بدور عاللي الناس بتدور عليه , أنا بشوف حاجة أهم فى أي شىء وبركز فيها وبحاول وانا مركز فيها اتعب اكتر عشان أوصل لها , إحتياجاتي مختلفة 
***
نفسي أرتاح 
***
إياك تقلل من قدرة الآخرين علي خذلانك 
إياك ...
يقدروا وبسهولة , خد حذرك 
بيعملوها مرة ورا التانية ورا التالتة وحتي المليون
***
كل مرة نفس الغلطة ونفس الوجع 
***

فى عيون بعض الناس برغم كل شىء ...

أنت مش الوحش 

إنت الرحمة ويمكن الفرحة ويمكن السعادة ويمكن النور 

علي حسب كل واحد بيشوف إيه وبيعمل إيه وبيتعامل إزاي ... :(

***
مش الأرض بس اللى ساقعة , كل حاجة بقت كدا .
***

 كيميا جوا قلوب الناس 
بعض التفاعلات لما بتحصل 
حتي لو بنسبة صغيرة أو قليلة أوي 
بيبقى من المستحيل الفصل بين المكونات أو إرجاع المواد لحالاتها الأصلية 
بيبقى من المستحيل إن تقول إن نسبة التعرض للمادة الفلانية وهم 
لان حتي لو كان إشعاع بسيط أو مجرد تاتش قليل جدا 
فهوا حصل منه تفاعل رهيب 
كان السبب فى كارثة راح ضحيتها ملايين الأفكار ويمكن الأماني 
***
حلم 
***


what kind of fathers will i be ? After all I kill people
***
مش عارف , عايز أعرف بقي 
***
عن الناس اللي بتشوف الحقيقة وبتغامر وبتتحمل النتايج وبتكمل برغم كل اللي بتسمعه 

عنكم أيها العظماء

شكراً

إلي أن ألتقيكم بقي أبقى أحييكم ساعتها :(

لكن طول ما انا معرفش إنتوا فين أو أوصلكم إزاي فلكم مني الشكر والثناء ...

شاب فقري

#P.S :مشفر .

هناك تعليقان (2):

غير معرف يقول...

البوست عبارة عن صرخة من الاعماق
مش عارفة صرخة بتقول اسمعوا
افهموا
اصرخوا
اغلطوا وبجد الغلط ليه طعم الحرية
متعه الغلط انك جربت ومش مهم النتيجه بص انا دلوقتى هاقرا البوست تاني
هاقرا الصور هبص بنظرة انسان لسة مولود معندوش مبادئ او قانون او اخلاق
سوف اعود بعد التجرد من ذاتى المقيد
(G)

غير معرف يقول...

ساعات كل اللي بتكون محتاجو انك تلاقي
حد يفهمك من غير ما تتكلم!
وسعات بيجي علينا وقت تبقي عايز تقول لحد غالي عليك على فكرة انا مستاهلش منك كده


النور الداخلى
احلى شعور انك تلاقي ذاتك
بس تفتكر بجد ان هو ده الذات اللى عايزة بص لو لقيت شخص فهم نفسه وعرف قدراتة بقولة انت مش من العظماء بس لكنك انت( بطلى) لانك عرفت نتيجة
اتالمت
اتخدلت
اتحربت في احلامك(انت فاشل+انت ضعيف+انت زيرو

(اعظم متعة فالحياة انك تنجز شيئا قالوا عنة الاخرين انه(مسسسسستحيل)



انا غلط لو كان عجبك

ازاى هاحكم علي الشئ انها مقدس وصحيح الا اذا جربت الغلط هتفرق ايه عن الملاك انا بشر يعنى خليط من(الصالح.الطالح.الفاجر)
انا انسان ربنا خلقنى علشان اغلط واتعلم ( افجر واتوب)
ازاى هانفخ في الزبادى الا اذا اتلسعت من الشربة(لازم اعرف الغلط بنفسي علشان اتعلم مش اعتمد فقط علي نصايح الناس لافوز بنصري


ااحتياجي واحلامي
(حلمي الصغير لها قدامين صغيرتين كأنة يتدرب علي خطاة الاولي كثيرٍآ تتعثر
ولكن باصرارى سيتحقق)
احتياجي شئ لا يخصك اذا رايتة غلط او تافه احتياجي ملكي ولن اتنازل عنة لذلك يسمي احتياجي



اتخذلت
(لا تلم الناس اذا خذلوك ولكن لم نفسك لانك توقعت منهم اكثر مما ينبغي)

الطيبة ليست غباء انما نعمة فقدها الاغبياء

سبب انفجار او تبلد او تبخر (مشاعري)

هو انت ايها القلب اللعين ماذا افعل بك
ولكن مهم كان السبب لن استطيع الرجوع بل سوف احاول ان ااحاول الا اوذي احبابى ( افكاري اللعينة)بالدمار

الان سوف احاربك يا تقاليدى التى تقيدني
لن تهزميني وتتهمني بالضياع بابتعادي عنك
انا اغلط واتحمل

انا مذنب و اتحاكم
ولكن تتطلبي منى المثالية المقدسة
سحقا عليكى ايتها الكذابة
انا غلط اذا سمعت كلاما يرجعنى للوراء

(النجاح ةو ان تمر بفشل وراء فشل دون أن تفقد حماستك)

سوري علي الرغي بس البوست مليان
افكار بجد عندع كتير يتقال بس البال تعبان(G)سورى على الغلطات الاملائية