الأربعاء، 20 مايو 2020

مع السلامة يابو علي

خالي العزيز ابو علي 
الحياة اتغيرت يابو علي ، تقريبا كدا الناس اتعودت علي ارقام واعداد الوفيات ، الناس بقي عندها غباء او يمكن استهوان بالحياة، زمان كنت قريت جملة مش فاكر لمين كانت بتقول ان ( الموت لا يوجع الاموات لكن يوجع الاحياء فقط ) تقريبا حتي الاحياء جالهم غباء او يمكن برود من اللي بيحصل في زماننا دا ، عارف يابو علي لو من سنتين او من عشرين سنة وكنا سمعنا عن اعداد الوفيات اللي بنسمع عنها كل يوم ، كان زماننا انتحرنا والله ، تقريبا الناس اتهبلت مبقاش الموت عندهم متجسد في شخص ،، براحة كدا هشرح رايي
تخيل انسان متجوز ومستني طفل وربنا بيرزقه فالطفل دا ، خيل كل يوم تعب فالحمل ويوم الولادة وشقا وتعب الاب لتوفير كل لقمة للطفل وكمان تعب الام كلوا وكل يوم في الاهتمام بالطفل ولتوفير بيئة سوية له وكل لحظة شغل وتعب وكل لحظة بيتعلم فيها ونصيحة من الاب وحب من الام وهكذا بدون توقف ، وبعدها تعالي هنا بص لكل حلم حلمه الطفل لحد ما بقي شاب وراجل وله قصة حب و بيت وهوبا ، مات 
تخيل بقي كم الحسرة والالم ، الناس مبتشوفش كل دا بقوا بيشوفوا الموت لحظة بطلوا يشوفوا الانسان وروحه اللي من اعظم خلق ربنا وبيشوفوا رقم ، حياة كامله بتنتهي وتتهد وبيتشاف بس رقم ، تخيل 
انا غضبان اوي وزعان من الدنيا ومن كل الناس ، حاسس انهم بقر مش فاهمين ، محدش حاسس بعمق وجعني لفراقك والله ، تقريبا لحد دلوقتي محدش سالني عن تفاصيل تخصك ولا سالني حتي عنك ، والله الموضوع مأثر فيا اوي وانت واحشني اوي يابو علي 
مش هنسالك اي حاجة 
كل حاجة منك كانت حلوه ، كل مره كنا بنتقابل وتقعد تسالني عن كل حاجة في حياتي ونقعد نتكلم وفجاة فات ساعه ، واحشني كلامي معاك وانت بتسالني وبتقولي رايك ايه ، وازيك يا كريم 
عارف يابو علي انك تعبت كتير في الدنيا وعارف ان الموت راحة لحد تعب في حياته او كان مريض في اخر ايامه بعد ما فارق حب حياته فجاة بسبب الموت برده ، عارف والله ياغالي 
سامحني ان كنت بقول كدا بس انت هتوحشني اوي ومسيرنا نتقابل في يوم 
لك مني كل الدعا في كل صلاة ولك مني كل الحب و الرضا اللي فالدنيا والشهادة قدام ربنا انك كنت دايما حنين عليا ، لك مني كل الحب يابو علي 
مش عارف كلامي خلص ولا مخلصش وهكتب تاني عنك ولا لاء ، بس اكيد ربنا رحيم ومش بينسي قلب مكسور وقادر  يصبرني علي فراقك وعلي الغربة وعلي كل حاجة بتمناها وهي بعيد عني 
ربنا وحمته واسعة
مع السلامة ياغالي