توقعات وحاجات فوق بعض

 الخيانة وحشة ، فعل قبيح مهين مزري مقرف ، مقدرش في يوم من الأيام أغير المبدأ دا مهما جري او حصل في حياتي بأي شكل 

من زمان من أيام الشقاوة والصياعة وانا المبدأ دا ثابت عندي 

لكن النهاردة هحكي ازاي وقعت فيه زي العبيط 

خلينا نحكي الحكاية من المكان والتوقيت اللي ينفع تتحكي فيه ونشوف الخيانة كانت ازاي وللاسف مش ندمان ولا زعلان لانه مش طبع فيا لكنه طبع في كل البشر مش رجالة ولا ستات بس 

من فترةدخلت نقاش طويل عريض اتقالي فيه ان احد اسباب ان الجواز بيبوظ هي التوقعات فسالت ازاي ؟

اتقالي 

ببساطة يا كريم الراجل عنده توقعات واحلام كتير جدا عن الحياة والست كذلك ، الراجل بيكون مستني الحياة الحلوة والست الهادية اللي بتراعيه وتحن عليه وتديله اهتمام وحب بلا حدود وبتسهر علي راحته وبتطبطب عليه وتراضيه وتبقي رقيقة وتحفظ لسانها ونفسها وسر بيتها وتسانده في حلمه وامنياته وتراضيه وتسعده ، الراجل بيكون عنده صورة منقحة مكونة من كل احلامه في الشباب والطفولة ولقطات كتير متجمعة ومن كل الستات الحلوة مع اجوازها و من كل المواقف اللي شافها عالنت والسوشيال والفيديوهات والافلام الاجنبي والعربي والدلع في كل اللقطات دي وضيف عليهم اكل بيحبه من ايد امه وفوقهم حنية من اخته وعلي شوية بقي مورنينج تكست من حبيبته وزود عليهم بقي احلام المراهقة واديها بقي شوية حلوين كدا من صباح الخير يا حبيبي علي كلمتين طيبين من الدين عن الست وواجباتها وفوق كل دا شوية كمان بقي من صبر الست اللي في خياله عليه وقت تعبه ودعمها له زي فاطمة كشري واديها بقي فوق كل دا  جمال حبيبته  اللي هيموت عليها في الخطوبة ومش طايلها وتضرب دا كله في الخلاط

هي دي توقعات الراجل 

البنت بقي بسيطة خالص : دلع ابوها وكرم اخوها و حنية صحابها عليها وجدعنه ناس تعرفهم وموافق ناس شافتهم في الحياة علي شوية تصورات عن الحب من الافلام والمسلسلات علي حبة روقان كدا من احلام الطفولة وزود عليها محبة ابوها ليها وعلي شوية من هنا ومن هنا من الكام مليون معجب والناس اللي بتوعد وبتجري وهي بترفضهم لكن بتقبل احلامهم بس مش بتقبلهم هما وتحب فيهم صفات وخصل وتصنع الراجل المثالي ، طريقة ابوها في الحياة علي التزام ابدي دايم من اهلها تجاهها تبص تلاقي صورة للراجل ملهاش زي 

وهي دي توقعات البنت 

التوقعات دي بقي يا سيد كريم بتعمل صورة في خيالها عن الحياة ، في الاول كل واحد بيدي احسن ما عنده  وبعد شوية بيبتدي يقارن ويلاقي نفسه مش قادر يفضل يمنح ليل نهار بالشكل الرهيب دا ، هوا كل واحد وواحدة بيكونوا مستنيين ومش بيعبروا ويقولوا عايزين ومحتاجين بيعتبروا دا ضعف وغباء وعايزين الحاجة تيجي لوحدها ودا غباء لان ببساطة لو عمرك ما قلت الاكل ناقص ملح هتفضل تاكله طول العمر دلع ، انا هعرف منين انك بتحب الملح او تكرهه بدون تعليق ، في المشاكل كل واحد بيكون عايز يجري علي طول يخلص المشكلة ويعديها ومش مهم بقي الحل اراضي الطرف التاني ولا اقوله ايه ، المهم هو بس ان اليوم يعدي وفاكرين ان الحياة هتستمر وكل واحد مخبي توقعاته ومخبي نفسه في ايه ومخبي احتياجاته 

وهنا بقي تلاقي تلاتين قلم علي قفاك فجاة ، اللي قدامك مش بيبطل ياخد لا وكمان عايز زياده ومش بيديك اللي نفسك فيه وانت ياعيني بتتحرق في صمت واللي بتاخده مش كفايه فبتبطل تمنح وتبطل توفي اي حاجة وبتركز بس في اقل القليل اللي يخلي وشك ابيض قدام ربنا لحد ما في طرف ينكسر وطرف نفسه تتسد ووكل واحد خلاص مبيبقاش عايز البيت 

طيب فين الخيانة ياعم كريم ؟ 

وانت ازاي وقعت فيها 

اقولك انا 

انا وقعت فيها لما عيشت فترة طويلة اوي في قصة حب من طرف واحد مع بنت جميلة ، احلي من نور الشمس واحلي من انك تصحي الصبح علي كلمة حلوة وبوسة ، بنت تنور الدنيا الف مره ضحكتها زي شروق الف شمس وابتسامتها وضحكتها تخليك تفرح كانك لسه طفل وليد بيبتسم بصفو  نية وقلب صافي لأمه حبيبته ، عينيها تدوب قلبك بنظره وتشدك من اخر الدنيا علي قفاك وتجرك متقدرش تهرب منها ، بنت حبيتها كانها هي البنت الوحيدة في الدنيا ، مهمنيش اي حاجة في الدنيا غير رضاها ولا فرحني شيء في الدنيا قد مسكة ايديها ، بنت بتنور حرفيا ، مليش عذر بنت كلامها بلسم وصوتها وهي بتقول : ايه يرضيك او وهي بتقول : حاضر وبحبك ووحشتني ، بنت يقف الغزال يشرب من كف ايدها ويتمسح فيها من طيبة وبراءة قلبها ، بنت غيرتها نار تولع الدنيا و عقلها صغنن شوية بينور بيك وبكلامك وبتحب افلامك والسينم بتاعتك ، بنت تبقي ملاك نزل من السماء عشان تحتويه وتفرح قلبه وتصونه وتشيله في عينك ولا دلعها اللي ملوش زي 

انا كنت عايش قصة حب مع البنت دي ، مع صورة من نفس الشخصية بس من زمن فات ، صورة بهتت ومتبقاش منها حاجة غير لخبطة الغربة والزعيق والخناق والقفش وحاجات كتير 

نسيت زي اي راجل واي شخص ان الانسان بيتغير مع الوقت ولازم تقبل اللي قدامك علي الترابيزه وتكون صريح وواضح وبرغم صراحتي ووضوحي الا اني قضيت ساعات قاعد مبحلق في الشات والصور والفيديوهات والكلام اللي كانت بتبعته وتقوله ، مبطلتش لحظة ابص لها واقرا كتبتلي ايه 

في حين اني معايا نفس النسخة ونفس الشخصية لكن مخي عطلان مع التوقعات وضيف عليهم حبي الرهيب الفشيخ لبنت كبرت ونضجت وبقت بتعور وعايشة معاك تتخانق وتعمل مشاكل ولها توقعاتها 

يعني مجرد محبتك لنسخة قديمة من الشخص اللي معاك خيانة 

ساعتها كنت فاكر ان دا هو الجوهر والاصل وغاب عن عيني مفهوم الانسان اللي بيكبر ويتطور ، وكنت مصمم اوفي بكل توقعات الطرف التاني في ظل طروف صعبه ، انا عن نفسي مش ندمان علي الخيانه دي لان بصراحة كدا ربنا مش هيحاسبني علي ساعات قضيتها بقرا في شات قديم ، هي هي نفس البنت اللي معايا لكن انا عايش مع النسخة القديمة في خيالي وبستناها تسعدني وتنور وتيجي تبسطني وتسعدني 

يعني انت خنت ولا مخنتش؟ 

لا عمري ما خنت ، كنت بحن زي العبيط لايام الحب والدلع والفرحة والبنوته الصغيره اللي كانت بتجري عليا وتفرحني 

بالرغم من اني عايش معاها 

هي دي تتحسب خيانة ؟ انك تفضل راهن حياتك ومستقبلك لنفس الشخص وفاكر له كل حاجة لان العمر عندك له قيمة ؟ هل خيانه انك تفضل مفتكر لحظات الحب والدلع والشوق والرسايل والرغي ،والمشي والهزار والضحك والفرح 

تتحسب خيانة دي لما تحب نسخة من نفس الشخص اللي معاك وتوحشك عشان صعان عليك ان الحياة دمرت الشخص اللي معاك وبتدمرك كل يوم ؟

لكن كل يوم كان بينقص مني حته وروحي بتنطفي شوية بشوية وبينطفي معاها وجودي وهي كمان بتنطفي  وبتعب اكتر وخلقي بيضيق اكتر ونفسيتي بتدمر اكتر واكتر وبدور علي راحتي وعلي حبيبتي ومش لاقي غير المشاكل ومرضي بيزيد وضعفي تجاه الحياه بيزيد وتجاهها لاني عايز اراضي الشخصية اللي قدامي عشان البنت الصغيره تطلع تلعب معايا زي ما اتعودت وزي ما نفسي لكن مش طايل ، الموضوع ملخبط لكنه حقيقي 

حقيقي انك تفضل في سجن توقعاتك واوهامك 

وطبيعي ان تفضل تفتكر لحظات الحب الاولي لكن بالنسبة لي كنت قاعد ليل نهار بدقق في كل اللحظات بكل شكل عشان ارضي نفسي واصبر نفسي 

لحد ما تعبت

في النهاية التوقعات وحشة ،مينفعش تسيب نفسك ليها ، يمكن اتعلمت حاجات كتير اوي من حياتي السابقة ويمكن هاخد بالي في كل احلامي الجاية عشان مقعش في الكام مليون غلطه ، هفضل اتعلم واعيش واحاول ابني وادور علي حلم جديد 

الحمد لله ان كل حاجة انتهت وخلصت ودا كان درس صعب من ربنا عشان الواحد يكبر ويبقي بالمنظر دا دلوقتي مش ندمان ولا حزين والله بالعكس فرحان جدا جدا جدا باللي وصلت له

الحمد لله رب العالمين

وختاما حابب اقول اني الحمد لله لاول مره من سنين رجعت اكتب علي انغام موسيقي بسكاليا لراجح داود 

واني خلاص كلها يومين واحقق اكبر انتصار في حياتي ومفيش انتصار اعظم من دا حققته وهوا معركتي مع المرض 

انا سعيد جدا باني خلاص ببعد عن الادوية وبخف وبستقر وبهدي وبفرح وبكون سعيد وبدور علي حلم وحياة جديدة والمرة دي وانا متعلم كل الدروس دي 

الحمد لله

عارف انها مش معركتي الوحيدة دلوقتي ومكنتش عايز احارب اي حاجة كان ممكن اعمل كل حاجة بدون معارك ولكن دا قضاء ربنا 

ولكن المرض هيفضل يعاند معايا وعارف هيخلص ويرجع في اي وقت لكن ربنا هيساعدني اقف علي رجليا بدل المره مليون واللي معاه ربنا يمشي علي الميه

وعارف برده اني اخيرا حاسس ان انا موجود وعايش وحقيقي وسعيد وراضي 

كأني كنت في غيبوبة وصحيت والحمد لله

لكن صحيت انا 

كريم اللي عقله يوزن بلد ورايق وهادي ومعاه فلوس ومش خايف من حاجة ومعليهوش ديون وله قيمة وقامة ومحقق احلامه 

مبسوط اني قابلت كريم تاني 

وان الطفل الصغير اللي جوايا بقي مبتسم وسعيد وبيحبني وبيفرح معايا وعايش بسعادة 

وفوق كل دا راضي 

والاهم 

لسه بيحلم