الخميس، 24 ديسمبر 2009

عذرا ... فهنا أصنع التاريخ



السلام عليكم ورحمة الله وبركاته
لاحظت كتير إن كل أما مدون أو غير مدون يتكلم عن مصر أو عن وطنه بيقول مساوىء كتير أوى وبيلبس النضارة السودا ويحاول يقنع نفسه بكافة الأشكال إن الحكومة بنت تيت وإن البلد دى عايزة الحرق عشان تنضف وإن فى أمل وضى بعيد أوى فى تيار ناشىء
صراحة وعن نفسى فأنا زهقت من كتر الحركات وصباح الإشتغالات والحاجات اللى بتطلع بدون إذن ومش هقول زى إيه ولكن ....
الأول قبل ما نتكلم لازم نسأل نفسنا سؤال واحد بس...

إحنا مين ؟؟؟

لازم كل واحد يعرف هوا مين بالظبط

مش بقصد الإسم والعنوان

ولا بقصد المكانة السياسية والإجتماعية والنفوذ والسلطة

أنا مين فى التاريخ ...

هسألكم سؤال هيوضح رأيى

ياترى حد فيكم يعرف ناصر ؟؟؟

ناصر دا عامل فى ورشة خراطة

متزوج ويعول طفلين أو تلاتة مش عارف بالظبط والراجل الطيب دا لما ورشته بطلت تشتغل وييجى لها شغل قرر إنه
يكرس حياته ومجهوده لهدف سامى جدا جدا جدا .... إنه يمسح العربيات فى الشارع

عايز أعرف مين الراجل دا بقى وإيه موقع إعرابه فى التاريخ ؟؟؟

سيبوكوا من إن دا رمز للمواطن المكافح الغلبان وإنه راجل مظلوم اجتماعيا وإنه الفقر اللى أجبره على كدا وإنه ياعينى

وياليلى وإنه يمثل الهزيمة اللى مصر فيها والحاجات الطين دى كلها

الراجل دا جاى الدنيا يعمل إيه ؟؟؟

إيه موقع إعرابه من التاريخ ؟؟؟

عمل إيه يفيد بيه نفسه ووطنه ؟؟؟؟

حقق إيه يقدر يقول فى يوم من الأيام أنا بحب بلدى وحققت ؟؟؟

ولا حاجة

هسمع واحد بيقولى بيصلى ويصوم وبيعبد ربنا ودا الهدف من الحياة وهوا العبادة وشغال صنايعى وبيعمر الأرض

هقول طيب حلو جدا

معنى كدا إن كل واحد فينا يشوف حاجة يعملها وياكل منها عيش ولا حتى جبنه ويكمل فيها ويتجوز ويجيب عيلين ويموت

أنا فى مرة من المرات قريت عن النمل

إنه النمل يقدر يشيل كرسى

تخيلوا

زى ما بيشيل صرصار ميت بالظبط ويوديه لحد الجحر بتاعه

أهوه لو كل نمله فكرت فى هى هتشيل ليه وتروح تتجوز نملة تانية حلوة وبنت حلال وبتكسب وبتاكل من عرق جبينها

فهما هيموتوا قريب أوى

أقصد إن فكرة الإتحاد لازم تكون موجودة فى العمل

لازم أكون ماشى فى منظومة شاملة ومتكاملة

لازم يكون ليه هدف

نرجع للسؤال الملح .... إحنا مين ؟؟؟

إحنا مدونين

طيب ماشى أهلا وسهلا

فى فترة من فترات الشعر العربى كانت فى العصر العباسى تقريبا

كان كل اما شاعر ييجى يكتب حاجة بقى بيستخدم ألفاظ زائفة و متكلفة أوى او بيكتر من المحسنات فى الشعر بدون داعى
وبيتكلم فى موضعات تافهة جدا فقد تجد هناك شاعر قاعد وتاعب أعصابه وبيوصف فى فرخة أو بيوصف فى سكينه وقد
إيه هى حامية وغدارة وشرانيه وبتقطع

نرجع للسؤال تانى ....

إنته مين ؟؟؟

إيه موقعك فى التاريخ ؟؟؟

هل فى فرق بين وبين شعراء العصر العباسى اللى بهدلوا الشعر وفشلوا فيه وكانوا بيتكلموا فى مواضيع سطحية وبينك؟

إنته كنت مدون وكان معاك القدرة عالكلام والتأريخ...ياترى هتكتب إيه فى التاريخ ؟؟؟

يوم ما تقابل ربنا هتقوله يارب أنا كنت مدون ومكنتش بفيد حد ولا بهتم بأمر أمتى ولا المجتمع اللى عايش فيه وكنت لابس نضارة سودا وبلعن أبو بلدى وبلعن الأخلاق الوحشة ؟؟؟

هتحاول تغير إيه وتوصل لحد فين ؟؟؟؟

بتعمل إيه لأمتك ولبلدك وللمنظومة اللى إنته عايش فيها ؟؟؟؟

ياترى لما يمر الزمان وإنته تموت وناس تدخل مدونتك تقرا ...هتقول إيه ؟؟؟؟

هل هتدعى لك على الإفادة ولا هتدعى عليك ؟؟؟

هل الناس لما تقرا مدونتك هتحب بلدها ؟؟؟ وهل الناس دى هتحب أمتها وتدافع عن قضاياها ؟؟؟

هل إنته زى شعراء العصر العباسى ؟؟؟

هل أنت قدرت تغير حاجة وتقول رأى صادق وصريح وتتحرك ولو حتى تنمى نفسك عشان البلد دى تنمو ؟؟؟ والأمة دى
تعلى كمان وكمان ؟؟؟

هل نقلت التاريخ بصدق وإتكلمت بحيادية وناقشت بموضوعية وساندت قضايا خير تستحق المساندة ؟؟؟

طيب

كمان خمسين سنة متخيل نفسك حققت إيه ؟؟؟

عملت إيه ؟؟؟

بلاش خمسين سنة

خليهم عشر سنين ....

عملت إيه بقى ؟

راجع آخر عشر سنين فى حياتك

شوف عملت إيه ...

شوف كل لحظة فى عمرك صرفتها وقضيتها فى إيه ؟؟؟

حاول بعد ما تقرى تسأل نفسك سؤال واحد

أنا مين ؟؟؟؟
و لو لقيت رد للسؤال

و لو لقيت إنك تقدر تفيد نفسك وأمتك ووطنك

يبقى ساعتها إرفع رأسك بكل فخر وإبدأ إخطو خطوة نحو هدفك ونحو حلمك

لحد كدا إنتهى الكلام ....

عن إذنكم مشغول

عذرا .... فهنا أصنع و أكتب التاريخ لأحفادى


شاب فقرى

ملحوظة .. حاولت أوضح كويس للجميع فكرة يارب تكون وصلت وهوا إن كلامك اللى بتكتبه فأنته تعتبر مؤرخ وإن كنت هاوى فأنته مؤوخ ياريتت تأخد بالك من اللى بتكتبه عن بلدك ونفسك وعن قوتك وضعفك وعن أحلامك وحياتك
حاول توجد لنفسك مكان فى عالم لا يوجد فيه أماكن للضعفاء والتائهين .
وذكرت مثال النمل للتوضيح إن دا نمل... فما بالك بنفسك كإنسان ومدون وسلاحك هى كلمتك ؟؟؟
الدوافع لكتابة البوست دا كتيرأوى
لكن أهمهم بالتأكيد هوا إنى شايف اليهود بيحاولوا يغيروا التاريخ وبيدخلوا نفسهم فى كل حادثة تاريخية أيا كانت ومهما كانت تافهة أو خطيرة وبيحاولوا يعملوا لنفسهم تاريخ وبيلعبوا فى كل الحوادث براحتهم وبمزاجهم بيكتبوا اللى يريح أعصابهم وبيكدبوا الكدبة ويصدقوها ويدافعوا عنها .

الأربعاء، 23 ديسمبر 2009

إلى كل مدوني الأرض


بسم الله الرحمن الرحيم

والصلاة والسلام على أشرف المبعثين سيدنا محمد خاتم الأنبياء والمرسلين


من مدة طويلة وأنا بفكر فى التدوين والمدونات والناس اللى بتدون

وبحاول أشوف الحقيقة على قد ما أقدر

مش من يوم ما بدأت تدوين من سنتين وقفلت المدونة

وفتحت (( يوميات شاب فقرى ))

مش قفلت المدونة لأنى بهرب من شىء لا سمح الله

بس لأنى ببساطة عايز أغير العتبه او المكان اللى بكتب فيه
ومن يوم ما إشتغلت عالنت وعرفت أول شخصية أثرت فى حياتى وأنا بفكر
فى النت والعلاقات والعالم الكبير اللى احنا كلنا عايشين جواه

كنت بعتقد إنى لوحدى

لكن سبحان الله دايما الإنسان عقله صغير ومش شايف غير تحت رجليه

ومن وجهة نظرى لا يوجد شىء فى الحياة يستحق التفكير غير ربنا

لو الإنسان بدأ يفكر فى ربنا هيوصل لكافة الحقايق اللى ربنا خلقها

ومنها هيقدر يفكر فى كل شىء بعقل وحكمة

أنا مش هتكلم فى الموضوع دا

أنا هتكلم فى موضوع الحب والعلاقات عالإنترنت

هسمع ناس كتير بتقول موضوع فاكس وخيبان وملوش لزمة

هقولهم كلمة بسيطة جدا .... طز لو مش عايز تقرا متقراش ولا تطلب وجهة نظرى

لأن مجرد زيارتك للمدونة فأنت قررت تسمع رأيى

يبقى تسمع بإحترام وتتكلم بإحترام

لأنى مش هقدم فكرة ساقطة ومشوهة عن عالم قذر

هحاول قدر الإمكان إنى أقدم وجهة صادقة وواضحة وصريحة

نبدأ على بركة الله ...

***
الموضوع بإختصار

- إن فى شاب

- بيكتب فى مدونة

- يعرف أكتر من بنت

- على علاقة بيهم كلهم فى نفس الوقت

- علاقة حب وإرتباط

- بيحلم معاهم وبيوهمهم بكدا

- الله أعلم الغرض إيه
لكنه بيوهمهم

الشخصيات اللى هوا مرتبط بيها

نقدر نقول إنها علامات بالنسبة لى فى عالم التدوين

ناس محترمة جدا

ومش غلطانين غير فى حاجة واحدة

إنهم سمحوا لحد يقرب منهم ومش يعرفوا عنه أى حاجة

وسمحوا له يلعب بيهم وكأنهم بنات مش متعلمات من الأرياف بل من قاع الأرياف

يا ترى فين العقل ؟؟؟

فين التفكير الحكيم ؟؟؟

لكن ياعينى المأسوف على أمره الشاب الحليوة

وقع من بنوتة هى اللى دخلته عالم التدوين

والبنت دى كانت ذكية

من الشخصيات اللى أنا بحترمها وبقدرها

ببساطة بتعرف تاخد حذرها كويس

هى قربت منه وحبته ودا معروف وهى بتقول كدا

لكن لما بقى بيغير شخصيته لأنه حس إنها ممكن تتكلم عنه

كانت هى بتتحبط وبتتصدم فيه أكتر

بتقرا محادثات المسنجر اللى بينها وبينه

وبتسمع مكالمات التليفون اللى بينها وبينه

اللى كان بيجرى وراها وبيتحايل عليها

فجأة بقى حد تانى

هنا بقى يطلع كام سؤال :

- كانت بتسجل المحادثات ليه ؟؟؟

سجلتها لأنه بتحبه أوووووى ولأنها عايزة تحتفظ بكل كلمة قالها لها جوا قلبها

- كانت بتسجل المكالمات ليه ؟؟؟

أكيد عشان لما تبقى حزينة تلاقى صوت بيقولها بحبك وعايز أكمل عمرى معاكى

وبعدين الشاب الحليوة إنفصل عنها لأنه مرتبط بتلاتة أو أربعة غيرها

يعنى الموضوع بالنسبة له مجرد لعبه

ياريت البنات تصدق الحقايق

وتتفهمها

ومش تقول إنى بقول فضايح أو مهتم بالقيل والقال

أنا مهتم بالناس

بحاول أوضح حقيقة وأفوق الناس كلها للحقيقة المرة

إن فى ناس بتكتب معانا

بس ناس من الآخر بتوع شات

بيألفوا كلام مش حقيقة

وبينقلوا وبينسبوا لنفسهم

بل وكمان بيلعبوا بمشاعر بنات الناس

المهم إن أنا بوجه نداء .......

لكل مدونين الأرض

خذوا حذركم مش أى حد يدخل حياتكم ولا أى حد يقرب منكم

يعنى لما واحدة تيجى تقولك إنتى مرتبطة بفلان

قولى لها الحقيقة وإعترفى بيها

مش تحاولى تتهربى وتوهمى نفسك إنك على حق وتكدبيها

لأن كل البنات دول

عملوا نفس الموقف

قاطعوا البنت اللى حاولت تفوقهم

بل والشاب دا دخل شتمها وقالها

(( أنا هوريكى يا ساقطة ))

هل جزاء إنها وثقت فيك وحبتك إنك تقول ساقطة ؟

هل هوا دا جزاء التقدير ؟؟؟؟

الموضوع ملوش حل

غير إننا نفوق

ونقدر نحترم الطرف اللى بييجى يحكى لنا

ونحاول نسمع ونشوف اللى عنده

يعنى لو البنت دى إدتنى التسجيلات الصوتيه والمحادثات دى وأنا نشرتها

هل ساعتها هتصدقوا ؟؟؟؟

هل ساعتها الناس دى هتفوق من الوهم وتحتقر البنى آدم دا ؟؟؟؟

قولوا بسم الله

وإقفلوا صفحة وإفتحوا صفحة جديدة

حاولوا تفهموا الحقيقة

فوقوووووووووووووووووووووووووووااااااااااااااااااااااااا


وفى النهاية أوجه كلمات كدا للناس اللى حواليه واللى بتقرى البوست


-الشاب المعجزة بطل القصة

حط فى دماغك إنك حقير

- البنات اللى فى القصة

فوقوا وفكروا ألف مرة قبل ما تحكموا عاللى قريتوه أو عن بطلة القصة

- المدونين

إنشروا الموضوع

عايز أنشر الموضوع

اللى يساعدنى ويساندنى

مش هكون غير شاكر ليه

وفى النهاية برده هقول :

أنا مش أحسن من حد وكل إبن أدم خطاء وأنا بكتب دا لتنوير الناس بس

ويمكن بعدها أبطل تدوين

أنا مؤمن بوجود علاقات ناجحة من الإنترنت

أنا شفت ناس كتير عايشين سعدا ومبسوطين ومتجوزين والحالة تمام

ناس أعرفهم شخصيا

كله بتوفيق من ربنا

فى ناس قابلت شريك حياتها فى القسم

ويمكن فى الميكروباص

ويمكن فى جوازة صالونات ملهاش معنى بقى لها معنى بعدين

الحمد لله

لا بخاف من حد ولا حاجة ولا على راسى بطحة أحسس عليها

وعمرى ما كنت بدون غير لنفسى وبس

لا كتبت لحد ولا فكرت أكتب لحد غير الفترة الأخيرة كتبت لشخصية موجودة فى الواقع عندى وفى الحقيقة وفى عالمى فعلا


هذا والله وحده أعلى وأعلم



خالص التحية والإحترام والتقدير

شاب فقرى


الأحد، 20 ديسمبر 2009

لم لا أسافر


يا أيها الوجه الذى أدمى فؤادى أى شىء فيك يغرينى بهذا الإنتظار
مازال يسكرنى شعاعك رغم أن الضور فى عينى نار
أجرى فألمح ألف ظل فى خطاى
فكيف أنجو الآن من هذا الحصار
لم لا أسافر ؟؟؟
...
ألف أرض تحتوينى ...ألف متكأ ودار
أنا لا أرى شيئا أمامى
غير أشلاءا تطاردها العواصف والغبار
كم ظل يخدعنى بريق الصبح فى عينيكى
كنت أبيع أيامى ويحملنى الدمار إلى الدمار
قلبى الذى علمته دوما فنون العشق علمنى هموم الإنكسار
كانت هزائمه على الأطلال تحكى
قصة القلب الذى عشق الرحيل مع النهار
ورأيته نجما طريدا فى سماء الكون
يبحث عن مدار
(( النجم يبحث عن مدار ..فاروق جويدة))

***
مكنتش عايز أكتب بس كان لازم أكتب
يمكن لأن فى ناس كتير مش بتقدر الوضع اللى الواحد فيه
أو مش بتقدر الرأى اللى الواحد بيقوله
أو التفكير اللى الواحد ماشى عليه وبيعتبروا دا غباوة
بس مش مهم أى حد ومش مهم أى حاجة
عادى يعنى كالعادة هقول (( طز ))
عايز أفتكر حاجات كتير أوى
مش يأس ولا ضعف ولا تعب ولا أى حاجة غير إن الواحد يفتكر
يفتكر كل حاجة
****
ياترى ليه فى ناس لما بتبعد بتختفى وبتزعل وبتحسسنا إن إحنا مكانش فى بالنا وإننا مش فارقة معانا
ليه يا ترى الناس بتقتل أى فرصة كويسة لأى حاجة
ليه الناس بتحب تعيش دور الهزيمة والحزن وإن الطرف التانى زفت ؟؟؟
ليه يحسسونا إننا مكناش فاهمين حاجة وإننا مش فى بالنا ؟؟؟؟
إلى من رحلوا فى سلام
*****
ليه الصحاب مش يفهموا ان الواحد عنده مبادىء وإن فى حاجات مش ينفع تتعمل
وإن لكل شىء فى الحياة قواعد وأصول
حتى لو كنت صديقى أو حد غالى عليه
فدا مش معناه إنك تنفض وتبطل تسأل عشان موقف تافه حصل
ليه متفهمش وتفكر براحة وتقول إنى كان عندى حق ؟؟؟
إلى أصدقائى ...
****
ليه فى ناس عايزة تحسسنا إننا كنا على غلط
ليه فى ناس عايزة تخلينى أحس إنى كنت على غلط وتناقشنى فى وجهة نظر أنا مقتنع بيها أساسا ؟؟؟
***
مش هقول ليه الدنيا بتتغير ولا ليه إحساسنا بالحياة بيموت فجأة وبنبطل نحس بكل حاجة

الموضوع مش موضوع حزن ولا هموم ولا مشكلات ولا أى حاجة أبدا
الموضوع كله بيتلخص فى إحساسنا بالحياة
وبدرجة تقبلنا للآخر
وبدرجة فهم الآخر لينا

بس كدا
إنتهى
صحيح
جاتلى هدية من شيما (( الشعب لابد له من حكومة تشكمه ))

شكرا يا شيما
أول حد يعبرنى ويجيبلى هدية يمكن اول مرة فى حياتى بس شكرا :)
بالرغم من انها اغنيه نكد وكنت بسمعها زمان بس نو بروبلم مقبولة برده
شكرا بجد
مع إن عيد ميلادى الشهر الجاى بس ربنا هوا الكريم




كنت عايز أتكلم عن لقاء المدونين
بس قلت بينى وبين نفسى وأنا مالى
أنا مش هروح فخلينى ساكت وبرا الموضوع
بس فعلا من أحلامى إنى أسافر المنصورة
ومحدش يقولى مبتحققش الحلم ليه
هقوله عشان لو سافرتها يمكن شوقى ليها يروح أو ميبقاش فى حلم تانى ينفع أحققه
فقلت أسيب تحقيق الحلم دا للآخر
****
وبالنسبة للبوست السابق
فهوا مجرد فكرة وسيطرت على تفكيرى وحبيت أكتبها وأتخيلها زى ما أنا عايز
هل فعلا فى حد كدا
أيووووووون
طيب هل دا معناه إنى إيمو ؟؟؟
لاء طبعا أنا مش كدا
طيب هل دا معناه إنى بشجع الحوار دا ؟؟؟
لاء
هل دا معناه غن جلد الذات مش معروف فى كل داهية فى العالم حتى عند الشيعة ؟؟
أيون
هل دا حقيقى ؟؟؟
اه اللى بيعمل الموضوع دا ناس كتير وأكترهم بيكونوا مرضى نفسيين وبيكون نوع من عقاب الذات
دا بالنسبة للبوست السابق بتاع جلد الذات
وكتبته لأن كان فى فكرة مسيطرة عليه أوى ومذكرتهاش فيه
وذكرتها فى البوست دا بس مش وضحت هى إيه
يمكن عشان مينفعش تتوضح

******
وبرده كنت عايز أتكلم عن الحملة بتاعت دودو عاشقة الرومانسية وشيما ( الشعب لابد له من حكومة تشكمه ) وصبرنى يارب وبدراوى وناس كتير أوى
والحملة تحت شعار إبتسم خليك جدع وبحب الناس الرايقة
ربنا معاكم
بس خايف أشترك فى الحملة يحصل لها إنتكاسة وتفشل
فقلت خلينى بعيد برده
الفقرى هيفضل فقرى
مش عارف ليه اليومين دول بفكر بس فى إنى ابعد عن كل حاجة
حتى لما قررت أشتغل من تانى
فى دماغى هاجس غريب إنى أبعد عن كل حاجة وأمشى
عن الشغل والكورس اللى بذاكره وعن النت والموبايل وكل حاجة تسد النفس فى البلد دى
مش عارف بقى
بس ناوى أعمل كدا
وقريب أوى
يمكن خطوة إنى أبطل أرد عالتعليقات دى خطوة فى مكانها
إنى بقيت شايف إن التعليق مش إثبات حضور زى ما منامينو بيقول بالظبط
ما فى ناس بتروح تقرا ومتردش لان ملهاش وجهة نظر فى الموضوع أو إنها مش لاقيه حاجة تضيفها
لكن محدش يزعل
متواجدون دوما إن شاء الله
بس دا لما أختفى فترة بقى
يلا
كل سنة وانتم طيبين
شاب فقرى

الخميس، 17 ديسمبر 2009

جلد الذات



يسير فى الظلام وحيدا وتتكرر كلمات وجمل كثيرة فى رأسه
يحاول أن يبعد تلك الأفكار السوداوية عن رأسه
يعلو صوت موسيقى الراب فى أذنيه
يحاول أن لايفكر فى أى شىء
هوا الآن وحيدا
هنالك بين الحقول وبين الخضرة التى يعشقها
ولكن الوقت ليلا
كل شىء يبدو أسود
ويزداد اللون الأسود كلما إبتعد عن البيوت والتجمعات
يستمر فى السير على غير هدى
لايدرى إلى أين يريد أن يصل
يفكر فى كل شىء
يفكر فى أصدقاؤه وفى حياته وفيمن يحب وفى كل شىء خلقه الله
ربما لم يجد شيئا يستحق ليفكر فيه إلا من أحبوه
يرن الهاتف معلنا أنها تتصل الآن
إنها الآن بحاجة إليه
ينظر غلى الهاتف
يحاول ان يحرك أصابعه ليرد عليها
يشعر بالعجز
يلقى بالهاتف على جانب الطريق
يستمر الهاتف فى الرنين
يستمر فى السير وكأن الصوت لا يعنيه وكأن ما ألقاه منذ قليلا هوا أجمل إحساس سكن روحه
يفكر فى كل من أحبوه ومن أرادوا أن يكونوا بجواره يوما
يحاول أن يكف عن التفكير ويمسك برأسه وكأن ما بها صداعا لا ينتهى ويشعر وكأنه سقط فى وسط ذلك الطريق الموحش
يستمر ذهنه فى السؤال الذى لا ينتهى أبدا
ينام على الأرض محاولا إيجاد الراحه ويخرج من جيبه علبة من السجائر وأعواد الثقاب
حقا أعواد الثقاب لم تعد كافية لمحو آلام القلب تلك
يشعل السجارة الأولى
يسحب نفسا عميقا
يشعر وكانه بهذا يسحب كل هذا المكان الجميل فى داخل صدره
يستمر فى التدخين
والسؤال مازال يتردد
يطفىء السجارة فى يده
لم يشعر بشىء بعد
يشعل سيجارة أخرى وأخرى
والسؤال لا يريد أن يترك عقله
أو ربما نفسه هى التى تأبى أن تترك السؤال بلا جواب
يستمر فى إطفاء السجائر فى راحة يده
تنتهى علبة السجائر
يبتسم فى سخرية
يسمع من بعيد صوت هاتفه مازال مستمرا فى الرنين
مازالت تتصل
يعود من حيث أتى آملا أنه حينما يرد عليها ستنتهى كل أحزانه
يلتقط الهاتف من على الأرض
يحاول الرد
إصبعه يأبى أن يرد عليها
يترك الهاتف مرة أخرى ليسقط
ويكسر إصبعه فى محاوله للشعور بشىء فى هذى الحياة
يجب أن يشعر بنبضات قلبه ونسمات الهواء قبل أن يفكر فى الاقتراب منها
الآن فقط يشعر ببعض الألم فى إصبعه وفى راحة يده
وضيق فى الصدرويرى بعض الدماءالسوداء على يديه
يبتسم
الآن فقط يمكنه الرد...
ينحنى ويلتقط الهاتف مرة أخرى
تعلو شفتيه إبتسامة و يرد قائلا :
(( وحشتينى ))

تمت,,,
شاب فقرى

ترى من أنتى ؟؟؟



أنظر إلى عينيك دوما متسائلا
ترى من أنتى ؟؟؟
أنتى حنان حرمت منه سنين
حب طال إنتظاره
أنتى ما فاتنى من الماضى
وما سيأتينى فى المستقبل
أنتى ألف عمر فوق عمرى
أنتى قلب آخر فى جسدى
يمنح الدماء لقلبى بكلماته الرقيقة
فيبدأ قلبى فى الخفقان
أنتى من يمنح الحنان لشرايينى
أنتى من بإبتسامته تنتقل المشاعر بين أعصابى
أنتى الحب
وإنى أحبك
ولو إستطعت أن أمنحك حياتى وعمرى فوق قلبى
لمنحتهم لك يا أجمل ما فى حياتى
بحبك
حلم السنين
شاب فقرى

الاثنين، 14 ديسمبر 2009

علبة من الثقاب



تجلس مساءا

وحيدا

تفكر فى المستحيل

تبذل قصارى جهدك فى التفكير

تتعجب من حال الدنيا

لما يعود للحياة من مات ليزيد من شقائك

لما تزداد تعاستك مع الأيام

وتصبح حتى أسمى أمانيك ووسيلة لتعذيبك

وينقلب السحر على الساحر

تمسك بعلبة من الثقاب

تفكر فى عمل كوب من القهوة

تحاول أن تحرق أعصابك

حتى تكف عن التفكير

تبدأ فى إشعال أعواد الكبريت

وتطفئها فى راحة لديك

(( لا يوجد شىء فى هذى الحياة لا يحمل بعضا من المتعه والسحر ))

ينطفى العود بسهولة

تشعل الآخر

وتستمر فى جنونك

وحتى تفرغ علبة الثقاب

أو تحترق راحة يدك

الآن فقط يمكنك أن تنام

ولا تشغل بالك بأى شىء

لعل آلام الحرق تخفى آلام القلب

(( أحلام ضائعة ))

شاب فقرى

الملعون

إنها مجرد لعنة فى الحياة
أن تغلق أبواب عقلك
وتكف عن التفكير
وتحاول أن تتقرب منها
باذلا كل ما تستطيع أن تبذل
مستخدما كل قواك
تنسى مبادئك
تنسى كل ما حلمت به يوما
فقط تحلم بها
لا تشغل بالها فى التفكير فيما يفعله قلبك
لا تفكر فى أى شىء
سوى أنها فقط
تفتح أبواب عقلها
وتضع القوانين والمبادىء
لتفكر
لتنسى كل ما فعلته
لتنسى كيف حركت أحاسيسك
لتنسى كل شىء
فقط تفكر فيما تريده
وكأنها تأمل أن تصنع منك شيئا خاصا بها
ليس أنت
ولا جنونك
ولا عشقك
تصنع منك ما تريد
تبدأ فى تشكيل ملامحك
تحاول أن تحملك على التفكير فيما تريد
فقط تنسى
أنك أغلقت أبواب عقلك حتى لا تخسرها
أنك كففت عن التفكير فى كل شىء حتى لا تبتعد عنها
تفقد أعصابك
تحاول الوصول إليها
تحاول أن تقترب منها
وأن تقترب منك
أن تذوب فيك
وتصبحا شخصا واحدا
وقلبا واحدا
لا يعرف الكره
ولا يعرف البعد
ولا حتى الحزن
تفكر فى حلمك الوحيد
هل تستطيع أن تحققه ؟
هل تستطيع أن تحتملك بجوارها
هل ستسطيع أن تتحمل ما يثقل كاهلها ؟

السبت، 12 ديسمبر 2009

فتافيت السكر


جلسا معا ساعة الغروب
كان الجو لطيفا رقيقا وهادئا على غير العادة
ربما لم يدركا من الدنيا شيئا
ولم يصل إليهما أصوات وتحركات من بالمكان
أخذ ينظر إلى عينيها فى صمت
لم يدرك لم يفعل هذا معها
فلم يسبق له أن نظر فى عيون الأخريات
ولم يسبق له أن نظر إلى عينى فتاة من قبل
ربما كان يتسائل
أهى حقا من أبحث عنها
أهى من سأفنى عمرى طالبا لها الرضا
أهى من ستكون ملكة أيامى ومعها أقضى ما تبقى من أيامى
حقا لا يدرى
لما يشعر الآن بأنه يعرفها منذ سنين وسنين
لما يشعر بأنها كانت جزءا منه ذات يوما وإنفصل ليعود إليه مرة أخرى
لما يشعر بأنها هى ملكة الأساطير التى ظل يبحث عنها دوما فى الشتاء فى رعشات البرد التى تعصف بجسده
حقا لا يدرك شيئا
ربما يكون هذا هوا الحب ؟
فقط تطلع إلى السماء ولم يجد فيها سوى الغيوم وقليلا من نور الشمس
قريبا يتضح كل شىء وتبزغ شمس النهار على حبهما
نظر إلى عينيها مرة أخرى ...
حقا كل شىء واضح
لا يوجد شىء يستحق القلق والتعب
فهى ليست إلا من تبحث عنها
أخذ ينظر إلى كوب الشاى
يضع ملعقة من السكر على حافة الكوب
ويرى قطع السكر الصغيرة تذوب
الآن فقط أدرك ما يمر به قلبه
فلم يعد ميتا
ولم يعد فى تلك الحالة من البرود
لقد إستيقظ فجأة
ولم يعد مكانه بين أضلعى
لقد إستقر بين يديها
يذوب فيهما ويذوب فيها
كقطع السكر الصغيرة تلك :)
....

شاب فقرى

إليها ..


إلى سيدتى الغالية
وحبيبتى البعيدة
التى لا يصلنى منها سوى كلمات قليلة
ومشاعر وعشق أقل
ورهبة أكبر
رهبة وخوف من المستقبل
القريب والبعيد
تدور الأفكار فى رأسى وتتشابك المشكلات
وتتعقد الأحوال
ولا يصبح للحروف معنى ولا للحياة كلها معنى
أدرك حينها أنكى صرتى حياتى
كم عليكى ان تخسرين حتى تظلي مالكة هذا القلب
هل عليك ترك هذا العالم ؟؟؟
لم على أن أمنحك هذا السؤال وأخيرك بين حبى والعالم اجمع
لما لا تتركين الناس لأنك إكتفيتى بى عنهم
لما لا تتركين الأصدقاء وتكونين صديقتى وعشيقتى وحبيبتى
هل تشعرين بأننى سأتركك وأرحل ؟؟
ألا ترين ان الأب لا يترك فتاته الصغيرة
والأخ لا يترك أخته الجميلة الهادئة الحنونة
لن أكون لكى عاشقا فقط
سأكون أبا وأخا وصديقا وعشيقا وحبيبا
سأظل دوما هنالك من اجلك
كالنجم الساهر على راحتك
لا يقلق سناه
ولا يشغلك بعده أو ضياه
فقط تذكرى أننى هنالك دوما من احلك
حينما تدركين تلك الحقيقة
ربما أكون رحلت
فلتدركيها الآن
ولتعلمى بأننى لا أرجو منكى سوى أن تكونى لى

وإلى لقاء قريب يا جميلتى

حبيبك :)
شاب فقرى

صباح السكر يا قلبى ...قصة قصيرة


(( حبيبى ممكن تصحى بقى ))
إبتسم أثناء نومه لسماع كلمة حبيبى منها
إنه حقا معه
هل يعيشان معا ؟
هل حقا سيفتح عينيه ويراها بجواره تنظر إليه يعينيها الجميلتين
لا يدرى
فقط سيستمر فى النوم
(( حبيبى ... كدا هتتأخر ))
أمازالت تتذكر أنه يعشق تلك الكلمة من ين شفتيها
حقا لم تكف عن حبه يوما
ولم يكف عن أن يكون وفيا لها ولا حتى لحظة واحدة
وكما كان يقول لها دائما ...
(( إنتى الشمس وإنتى النور ))
كيف يمكن أن يستيقظ دون أن يجدها إلى جواره
دون أن يشعر بيديها تمسح على رأسه فى هدوء وكأنه طفلها الصغير
أخذ عقله يتذكر جيدا كيف تقابلا ؟
وكيف بدأت علاقتهما ؟
لم تكن علاقة حب عادية ... لقد كان كل منهما ملىء بالقلق والخوف من تجارب سابقة ومن الناس ومن قصص الحب
وكان كل منهما يحمل نفس السؤال ... ترى لماذا نفشل فى الحب ؟؟؟ هل لأننا نجد من لا يستحق الحب ؟؟؟ أم لأننا تعلمنا الحب من قصص فاشلة
وكانا يضحكان لمجرد التفكير فى ذلك السؤال
كان يقول لها دوما
(( إبتسمى فمن بين نور عيناك يشرق لى فجر جديد ))
وكانت تضحك وتبتسم فى رقة
يتكرر النداء ....
(( حبيبىىىىىىىىىىىىىىىىىىىىى إنته كدا بتدلع ...آجى أصحيك بنفسى ؟؟ ))
ليتها تأتى ..
هوا حقا فى حاجة إلى لمسة من يديها
إلى أن تقترب منه وتهمسله فى رقة وتقبله على جبينه
حقا هوا فى حاجة إليها
لماذا تأخرت ....
أخذ يحدث نفسه
يتوعد لها بصباح ملىء بالفرح والمرح
سيضحكان ويمرحان ويسابقها فى إعداد الإفطار مرة
ويسابقها فى غسيل الصحون مرة
لن يتكرها تسمح لنفسها بأن تحرمه من الحنان والدلع الذى تغمره بهما
سيقوم الآن ...
يحاول أن يفتح عيناه
لا يرى شيئا
ربما هم أشباح حوله ؟؟
يتضح صوت من بعيد
صوت أمه قائلا
(( إلحق يا على .... أحمد أخوك فتح عينيه...يا حبيبى يابنى ))
يتعجب ويسأل نفسه لماذا أتت أمه وأحمد إلى منزلهما هذا الصباح
ينادى بصوت هادىء
((أميرة ....أميرة ))
تقترب منه أمه قائلة ..
(( دا قضاء ربنا يابنى ))
الآن بدأ يتذكر
فهو ليس فى منزله
لقد كان مع أميرة فى سيارتهما
كانا يضحكان كعادتهما
وتذكر الحادث
وتذكر الدماء
وتذكر أميرة
صرخ بصوت عالى ..
(( أميرررررررررررررة ))
فزعت أمه وأخيه وإقتربا منه محاولان تهدئته
وهو لا يكف عن الصراخ
((أميرررررررررررررررررة ))
مرت كل أحداث حياته امام عيناه
التعارف ... الخطوبة ... الزواج ... لحظات الحب والعشق ... كل لحظاتهما معا
بدأ صوته يخفت وتهدأ أعصابه
الآن فقط يمكنه أن يسمع صوتها حقا
وأن يراها كما تعود أن يراها دوما تنظر إيه فى رقه قائلة
(( أنا هنا يا أحمد ))
ما هذا كيف شفى من آلام الحادث ؟؟
كيف قام من مكانه ؟؟؟
أخذ ينظر إلى الجسد الملقى فوق السرير
وبجانبه أمه وأخيه يصرخان ويبكيان
لم يلمح من معالم جسده سوى شىء واحد
أن هنالك إبتسامه على شفتيه
(( هتفضل واقف كدا ))
قالتها فى دلع وكأنها تطلب منه أن يلاحقها كما تعودا كل صباح
وإبتسم قائلا لها
(( صباحك سكر يا قلبى ))

تمت
شاب فقرى

الخميس، 10 ديسمبر 2009

كرمللة ومستخلص و هواء البحر وأحلام العبيط



السلام عليكم ورحمة الله وبركاته

نتكلم فى براحتنا بقى خلاص كرمللة وصل لأرض الوطن :)

أنا خرجت من هنا يوم (( أول إمبارح مش فاكر إسمه إيه )) عالساعة عشرة او حداشر
وعلى موقف رمسيس روحت هناك وركبت عربية بتروح اليكس محطة مصر هناك
مش عارف إسمها إزاى محطة مصر بس يلا نو بروبلم
المهم وصلت هناك والحمد لله ومشيت فى شارع تقريبا إسمه شارع الشاطبى
مش هقولكم قضيت أول يوم فى إيه
توب شوكريت وأنا بخاف من الحسد
بس الحصيلة
إنى كنت طااااااااااااااااااااااااااااااااااااااااير طاير طاير من السعادة
يعنى طاير كمان كلمة تعبانة بالنسبة للى أنا كنت فيه
لقيت حاجات بدور عليها من سنين
وإرتحت
وصحيت
حسيت من هوا البحر برد الروح لقلبى وروحى وكيانى كله
كان يوم جميل أوى
خلصت وكنت قدام مكتبة إسكندرية
كان الوقت مغرب
طلعت وإتمشيت لحد بحرى
روحت قابلت أعز أصحابى فى الحياة (( مستخلص أفندى ))
دى المدونة بتاعته يا جدعان جديدة وهخليه يكتب ويخرج من أى هم فى الدنيا
لأنى معنديش أغلى منك يا مستخلص
أنا قلت له يعمل مدونة وهوا عملها هوا عبقرى بالفطرة مش محتاج تعليم أساسا
يعتبر عشرة عمر ومن الناس اللى بجد آمنت ليهم وحبيتهم
مش عايز أقولكم لدرجة إننا لما كنا بنحب نخرج هوا بيخرج فى أليكس وأنا بخرج فى القاهرة
وبننزل كل واحد فى مكان وعالموبايل بقى تلات ساعات :D

يا جدعان والله أخ أخ أخ

هوا كان بعيد عنى الفترة اللى فاتت

بس عشان إبليس كان داخل ما بينا

وإبليس دا مش تصنيف للشيطان ولكنه بنى آدم حقيقى

بس الحمد لله ربنا رجع الود والمحبه

مشيت أنا بقى من أول مكتبة إسكندرية لحد بحرى

عند قهوة فاروق

مش عايز حد يقولى مسافة كبيرة

لانى حسيتها عبيطة

بجد اعصابى إرتاحت وكمان روحى إرتاحت

ياااااااااااااااااااااااااااااااااااااااااااه

مفيش حاجة فرحتنى من زمان للدرجة دى

طبعا قعدنا عالقهوة شوية

شربنا حاجة ساقعة وقررت إنى أروح خالد بن الوليد

طبعا صديقى صعب عليه إن كلامى مش يتسمع

وقرر يلبى كل طلباتى بالرغم من إنى مجنون

قلت فجأة (( بص يا واد يا مستخلص أنا فى كافية حلو أعرفه فى خالد بن الوليد ... يلا نروح ))

صاحبنا ما صدق

وكان معانا واحد صاحبنا تانى يبقى إبن خالة مستخلص

ركبنا ووصلنا خالد إبن الوليد كان الجو مروق وتمام التمام

مشينا لحد الكافية

وبعدين قلت أنا عايز أكل يا مستخلص

هههههههههههههههههههههههههههههه

ومباكلش غير من عند محل معين هنا

تقدروا تقولوا بتمنظر بأنى عارف كل حاجة فى البلد

المهم وإحنا ماشيين بدأ المطره

ياااااااااااااااااااااااااااااااااااااااااااااااااه

وبالذات بقى لما مستخلص بيقولى (( أهى بدأت تشتى أهيه))

طبعا أنا شاب فقرى مصراوى قلت له يابنى إسمها تمطر

فضلنا فى النقاش والهزار دا لحد ما وصلنا المحل ومكانتش بتمطر أوى

وبعدين معجبنيش منظر المحل قلت له ناكل من عالشارع برا

قالى أوكى

روحنا عالشارع برا

قلت له لاء :D

أنا عايز أكل من المحل التانى :P

هههههههههههههههههههههههههههههههههههههههههههههههه

مستخلص أفندى حلف يمين بعظيم تلاتة إنى مجنون ولاسع وبستعبط

بس على مين برده هيسمع الكلام

هههههههههههههههههههههههههههههههههههههههه

المهم روحنا وكانت الدنيا بدأت تمطر بجد

سبحان الله

أنا وهوا بنشترك فى حب المطر

لو قلت إستحمينا فى المطر

فدى كلمة قليلة أوووووووووووووى

أوووووووووووووووووووووووووووووووووووى

إحنا غرقنا غرق كدا

وصلنا وجبنا الأكل والناس شايفانا مجانين

وأنا من فرحتى بمشوار النهار ومقابلة مستخلص وإنى فى أليكس وماشى فى إسكندرية

كانت طاير مع المزيكا اللى شغاله فى الشارع كله

صوت إليسا شغال
((
وسط الشوارع ناس كتيرة مروحين والناس ياقلبى هما هما وهوا فين
))

كنت بهز إيدى ودماغى من المزيكا وكأنى برد وبقولها أنا هنا وهفضل جمبك

غصبن عنك :))

ههههههههههههههههههههههههههههههههههههههههههههه

المهم وصلنا الكافية

وخدنا واجبنا وكلنا وخرجنا والدنيا بتمطر برده

طلعنا عالبحر ولفينا عالفنادق عشان كنت قررت أبات

بس طبعا مستخلص مرضيش

قالى بص يا صاحبى لو هتدفع برا خمسين جنيه فى ليلة فى أى فندق

إديهالى :D

وأنا هديك مميزات أكتر

ههههههههههههههههههههههههههههههههههههههههههههه

الحق بقى يا مستخلص خليك صاحب ضمير

ههههههههههههههههههههههههههههههههههههه

المهم

روحت مع مستخلص ونمت وصحيت وخرجت الصبح فى الشمس

مستخلص راح الشغل وأنا روحت مشوارى

فضلت ألف لحد ما جه الميعاد

محدش يقولى ميعاد إيه عشان مش هقول

اأنا قلت لكم بخاف من الحسد لأنه مذكور فى القرآن

والحب جميل جميل الحب :P

هههههههههههههههههههههههههههههههههههههههه

المهم إن خلص مشوارى برده وخلصت وروحت آخر النهار

======================

النقط المستفادة :
- إسكندرية جميلة أوى أوى أوى فى الشتا
- ملكة الأساطير لا تأتى إلا مع لسعات برد الشتاء
- مستخلص صاحبى وحبيبى وكفاءة ويستاهل كل خير
- لازم أرجع ألتزم بالمواعيد لأنى وصلت أليكس متأخر
- قررت أخد خطوة لقدام

بجد أنا مبسوط أوى

بفكر أغير إسمى كمان

وأخليه شاب عبيط

ههههههههههههههههههههههههههههههههههههههههه

زى كتاب المنفلوطى اللى كان إسمه أحلام العبيط

تقريبا

العبيط هنا هوا المنشكح المبسوط

أو أخليه شاب مبتسم وسعيد والحياة حلوة والأيام أحلى

مش عارف

بس نطلع من كل دا بحاجة واحدة

((
بفتح زرار قميصى للنسمة وللأمانى ...
وأنور فوانيسى وأملى العالم أغانى ...
بغنى للمحبة وللنجم الملالى ..
الغنوة فى قلبة شابه وطايرة فى العلالى ...
بفتح زرار قميصى وأملى العالم أغانى .....
منير

)))


شاب فقرى


ارض الملوك والإسكندر الأكبر

السلام عليكم ورحمة الله وبركاته

حاليا فى الأسكندرية

بعمل إيه ؟؟؟؟

بريح أعصابى وبتفسح وبشوف ناس قريبين منى بجد

لأنى داخل على منحنى تاريخى فلازم أريح أعصابى

هههههههههههههههههههههههههه

آه والله

تاريخى تاريخى يعنى


بذاكر للكورس اللينوكس عشان قربت امتحن وقلقان

بس على مين

كرمللة قدها وقدود

الحمد لله لسه مبسوط

مش محتاج غير دعواتكم

حاجة غريبة

مش عارف ليه قلقان ليه ؟؟

كل أما الحالة بتبقى تمام

بتأكد إنه الهدوء الذى يسبق العاصفة

آه والله

عشان كدا متأكد إن فى مصيبة كبيرة أو صدمة عالمية هتحصلى

والحمد لله أنا جاهز تماما ودايما لاى مصيبة او مشكلة

يمكن أنا بحب الأسكندرية أكتر من ما أهلها بيحبوها

سعادتى لا توصف لما بمشى فى شوارع أليكس

وطول ما أنا ماشى بغنى

((أرض الملوك والإسكندر الأكبر ...عليك تقدر ناسها وإنته كمان هتتقدر ))

والحمد لله ماشى بالنصيحة والأغنية أوى

أنا كدا خلاص تمام جدا

انا نايم عند أعز صحابى

يمكن قدرت أجمع فى السفرية دى كل حاجة نفسى فيها فى الحياة وبحبها

ومن أهمهم صحبى وأعز الناس وأقرب الناس ليه

وحاجات تانية كتير

مش هحكى أى حاجة

بخاف من الحسد :D

إن شاء الله أجيببلكم تقرير لما أروح البيت فى القاهرة

دمتم فى كل ود

شاب فقرى

===============
إعتذار واجب
إلى المعلق (( غير معرف ))
آسف لردى الحاد عليك سابقا
ولكن كان قلقى من بعد انتحال شخصيتى وشكل البروفايل من شخص من قبل
فقد ظننت أنه يحاول التعرف على الناس وتشويه صورتى
أتمنى أن تتقبل إعتذارى

فقرى

الثلاثاء، 8 ديسمبر 2009

الطريق إلى السماء


بسم الله الرحمن الرحيم

لا يسعنى إلا أن أضع صورة للأمس وألتقط صورة لليوم وأضعهما معا
أتأملهما كثيرا
أحاول أن أدرك ما كنت أمر به
وأحاول أكثر أن أدرك ما أمر به الآن
دعنى أتأمل
لا تحاول أن تفهم ما سأكتب
ولا تحاول أن تسألنى عما كتبت
ربما لأنه عالم خاص قد خلقته لنفسى
فقط إسمع تأملاتى فى صمت وهدوء
لا تحاول إزعاجى صارخا أنك لم تفهم كلمة
أو تطلب تفسيرا ما
وربما يجب عليك أيضا أن تتناسى أننى هنا اليوم

فقط دعنى اتأمل


*****

الأمس

يزداد الملل ولا أدرى سبيلا لمعالجته
أرتدى ملابسى وألتقط هاتفى مع سماعة صغيرة محاولا أن أذوب بين الألحان والأغنيات
أخرج إلى الطريق
لا أدرى لما أشعر بالبرد بالرغم من أن حر الصيف يلهب وجهى وجسدى
لا أدرى من أين يأتينى ذلك البرد القاتل
أرفع من صوت المرسيقى ومن أغانى الراب
أحاول جاهدا أن أذوب فيها قدر ما أستطيع
يبدأ جسدى فى الإستجابة إلى موسيقى الراب
لا أشعر إلا بأصابعى تهتز وكأنها ترسم شكلا للألحان وكأنها تعلو وتهبط على السلم الموسيقى
وأهز رأسى فى هدوء علنى أذوب فيها وبين كلماتها
أستمع إلى الموسيقى وأردد معها
(( حياة إنسان فى كل الأيام أحزان
يوم وأنا ماشى فى الشارع مش شايف قدامى من كتر همومى
رجلى مش شايلانى برغم شبابى
لازم أبعد وأفوق من وهمى ...
فجبت عود كبريت وقعدت أجرب هل هستحمل نار الدنيا ولا هتهرب ؟؟؟
أول حركة قلة فتحت عنيه على الدنيا
بعدوا وقت الشدة كل واحد راح فى حته
يومها بس عرفت من شيطان ومين كويس
مين هيقسم الأحزان ومين هدفه يهيس ...
إتعلمت مش كل حاجة بتلمع تبقى دهب
مش كل عين بتدمع يبقى جواها ألم
وكل كلمة قلتها ... شهد عليها الزمن
أى حد سابنى من غير سبب الباب يفوت جمل ...
واللى واقف جمبى أنا واقف جمبه ليوم الدين
))
يعلو صوت الموسيقى
وتهب نفحة من الهواء
لا أدرى ما أشعر به الآن
ربما هوا نوعا آخر من القوة التى لم ألتمسها من قبل فى أى شخص
ولم أراها حتى من قبل ولم أرى احد هكذا
أقوم بتغيير الأغنيه وأحاول أن أساعد نفسى وأخرج مما أنا فيه

((
مشيت مشوار طويل وحلمى مش سايبنى ماشى جمبى
هو دا حلمى اللى ملازمنى ...
طول الوقن مش هاممنى
عمر ما اليأس هيظلمنى
ومهما هيحصل مش آلمنى ...
))

تزداد القوة التى لا أدرى منبعها
هل ياترى هى تجارب الأمس
أم حاضر تحاول فيه إثبات شيئا ما لا يراه سواك ومن يؤمنون بك فقط

فبرغم إبتعادهم عنك وكأنهم قد تخلوا عن كل ما آمنتم به معا
يزداد إيمانك بما تراه وترى احلامك واقعا تحياه
تحاول أن تنفى الحب خارج حدود مدينتك
وتضحك على ما سبق فى حياتك من أيام عشتها متيقنا بوجود ذلك الوهم الكبير

تنظر إلى أحلامك وتراها بسيطة نسبة إلى تلك القوة التى تتمتع بها
تغمض عينيك وتستمع بالموسيقى
تفتح عينيك وتنظر إلى نهاية الطريق
وتشعر وكأن الطريق لا نهاية له وأن السماء بعيدة كل البعد عنك

*****
اليوم

تحاول أن تفكر
لا تستطيع
تحاول أن ترى شيئا من كآبة المنظر فى كل شىء حولك
فقط عينيك لا تبصر شيئا
تبتسم فى هدوء وتشعر وكأنك قد أصبحت أعمى
فتسحب نفسك وتمسك بالجوال وتخرج إلى نفس الطريق الذى إعتدت أن تسير فيه
تمشى فى الطريق مستمعا للموسيقى
ينطلق صوت منير هادئا فى أذنيك
((
مش جايز أموت فيكى وفيكى
دا أنا أموت فى عنيكى من غمزة
دا أنا عارف نفسى وتلاكيكى
بعشق لياليكى من لمسة
أنا أنسى فى شفايفك إسمى ...
دا أنا فاهم فى كنوز العفة
أنا ممكن أجرى لك دمى
أنا حاسس دمى هيتصفى
....
))
الطول واللون والحرية - منير - 1993

يعلو صوت الموسيقى وتهب نسمة هواء ترفع من روحك المعنوية
تجعلك تشعر وكأنك حى ترزق
لا تشعر ببرد الشتاء
تنظر إلى آخر الطريق
ترى أن السماء قد تقاطعت مع الطريق وأن للطريق نهاية
هنالك عند حدود السماء
ومازالت القوة بداخلك

تعود إلى نقطة البداية
وتفتح أبواب منزلك وتدخل فى هدوء
وتشعر وكأنك قد ملكت الكون وبأن أحلامك قد بدأت فى التحقيق
تخلع ملابس الشتاء وتبدأ تجهز نفسك لتحلم بها
فتعد كوبا ساخنا من الشاى ...
تطفىء النور ...
وتفتح الشباك ليدخل ضوء القمر متسللا من بين السحاب
وتطمع أن يصيبك من دفء نور القمر ولو القليل
تسأل نفسك متعجبا وهل للقمر دفء ؟؟؟
ربما هوا دفء روحى
تبتسم لكلماتك وتتأكد من أنك صرت مجنونا
تجلس فى صمت ..
وتهب لسعه خفيفة من البرد ...
الآن يمكنك أن تغفو وتحلم بها...
فملكة أساطيرك لاتأتى إلا مع لسعات برد الشتاء
:)


أحلام ضائعة
شاب فقرى


==========

يمكن بطلت أزور مدونات حد وكتبتفى المود بتاعى إنى فى أجازة كام يوم
وبالفعل كنت فى أجازة من التدوين
يمكن لقيت حد يسمعنى فبطلت أكتب لعموم البشر
مش مهم
لكنى رجعت مرة تانية
جالى تعليق غريب من شخصية غير معرفة وقال كلام أغرب
شكل فى حد راح علق عند الشخصية دى غلط وساب رقم تليفون وإفتكرت إنه انا مع إن دا مستحيل
بس نو بروبلم
كفاية الجماعة السلفيين اللى بيجيبوا تعليقات غريبة بيحسسونى إنى خارج عن الملة
ومن موقعى هذا أحب أقولهم
(( طز... ياريت يبقى فى شوية دم وتقرا المدونة بدل ما بتسيب تعليقات وتجرى كدا ))
****
ليه أخدت أجازة من التدوين ورديت عالتعليقات متأخر وبطلت تزور الناس فى مدوناتها
؟؟؟؟
يمكن لأنى مبسوط ومش قادر أنقل لكم حالة السعادة
وخايف لو مريت تصيبنى هالآت الإكتئاب الموجودة عند الناس
فأنا على إقتناع تام بأن الحالة الحالية للشخص سهلة الإنتقال بين البشر وكأنها مرض أو عدوى
يعنى لو مشيت مع حد مكتئب أو قربت منه سنتك سودا
لازم تكون هالتك أقوى من هالة الكآبة اللى مسيطرة عليه
وأنا مكنتش عايز احارب الكآبة والهموم فى الفترة دى
يمكن كنت عايز أعيش حالة من السعادة بعيدا عن كل شىء وعن اى حد
والحمد لله عشتها وتمام التمام
لكن نرجع تانى للتعليقات
كان جالى تعليقات عالبوست اللى فات بتقولى إنته مش بتنسى وإبتسم للحياة يا ضنايه
وسكر حلوة الدنيا سكر
والكلام الحلو دا كله
اللى أنا بسميه كلام حمصى
بمعنى إنى والحمد لله بالقوة الكافية إنى أنسى أى حد
يمكن اى حد قال كدا نسى إنى مؤسس جبهة الجدعان الشعبية :) (( أنا جدع ))
ثانيا مين قال إن البوست اللى فات تجربة شخصية ليه أنا ؟؟؟:D
عالعموم مش مهم
أسعدنى مرور الجميع والتعليقات والناس
وخالص تحياتى للناس اللى حست إنى مختفى الفترة اللى فاتت ومسألتش عليه
واللى محسوش ومسألوش :)

دمتم بكل ود وخير وسعادة

شاب فقرى

السبت، 5 ديسمبر 2009

بفتح زرار قميصى


بفتح زرار قميصى للنسمة وللأمانى ...

وأنور فوانيسى وأملى العالم أغانى ...

بغنى للمحبة وللنجم الهلالى ..

الغنوة فى قلبة شابه وطايرة فى العلالى ...

بفتح زرار قميصى وأملى العالم أغانى .....

منير


نقول إيه

الأغنيه بتحكى كل الواحد عايز يقوله

إن الواحد هيفتح قلبه للحياة ويستقبل الحياة مهما كان اللى فارقناه

هنسى أى حاجة وأروح للحياة

على راى منير

هفتح زرار قميصى للنسمة وللأمانى

ومحدش يقولى مين نسمة وأمانى دول :))

يمكن فى ناس كتير مفهمتش البوست اللى فات

لأنى موضحتش أى حاجة

ومقلتش دى قصة ولا حقيقة

فإن كانت قصة فلى مطلق الحرية فى تأليفها لأننى الكاتب

وإن كانت حقيقة

فلى مطلق الحرية فى التصرف فيها لأنها ببساطة حياتى

ولكن

عايز أتكلم شوية مع حد يفهمنى

عشان كدا هكتب لنفسى وللمدونة

****

عندما يأتى الفراق ..



لماذا أفارقها

وأنا أعشق أن أكون بين يديها

ونظرات عينيها ترسم لى إبتسامة اليوم وكل يوم

تسعدنى بكلماتها

إلا كلمة واحدة تقتلنى

تحرق أعصابى وتفتت أحلامى

وأتمنى لو لم أخلق فى الحياة من البداية

حينما أسألها : (( بتحبينى ؟؟ ))

ترد : (( مش عارفة ))

كيف تكون على غير علم بأمر مثل هذا

إذا لم تدرى هى

من يدرى ؟؟؟

كيف أحيا معها

وأعيش معها سعيدا وأنا وهى فقط لا تدرى

تتصرف معى وكأننى مركز الكون

لا تبدأ يومها دون أن تقول لى أولا (( إزيك ))

وتأتينى دوما كالطفلة الباكية وكأنها تصرخ مستغيثه

(( بابااااااااااااااااااااااااااااااااااا))

فلا أملك إلا أن أضمها

أتكفل بكل مشاكلها

أعطيها من قوتى ما يكفيها ألف عام

أناقشها فى دخائل نفسيتها

أحدثها

أغير لها مبادىء

أرسم لها عالما آخر

تضحك وتنسى ما جاءت لأجله :)

تتملكنى السعادة من ضحكتها

وتمتلكنى هى أكثر

إلى أن يأتى يوم

أقرر أن أضع حدا لهذا

أتقدم لخطبتها

نعم هذا ما حدث

فمن اجلها نجحت فى كل شىء

صنعت كل شىء

تعودت على وجودها

فلم لا تكمل معى بقيت عمرى

وأنا أعشقها

وسأهب لها ألف عمر فوق عمرى لتحياه حتى لو ذهبت أنا


بعدما تقدمت


تفاجئنى الأخبار


(( هى مخطوبة منذ ثلاثة أيام ))


لا أعترف بالصدمات فى الحياة


لأنه لا يوجد ما يمكن أن يصدمنى فى تلك الحياة حقا


إلا ما حدث


شعرت وكأن قلبى إنكسر


ذهبت بعيدا

فارقتها

بحثت عنها فى وجوه الكثيرين

لم تكن إحداهن شيئا

كن سرابا

فارقتهن بائسا وسعيدا

بائسا إلى ما وصل إليه حالى

سعيدا بأنى لم أكن سبب الفراق


نعود لنتحدث مرة أخرى

فلا يوجدمن يفهمها فى الكون سواى

تأتينى تبكى وتشكى خوفها من (( بكره ))

أطمئنها

(( بكره خير يا قلبى ))

تقول : أمازلت تحبنى ؟؟

أرد : بل أذوب فيكى عشقا

تقول : وأنا أدركت أنى أحبك

أرد : وكيف هذا ؟؟؟

تقول : إحتاجك وأحبك ولكن (( مش عارفة ))

أرد : أسنعود مرة أخرى إلى تلك الحالة ؟؟؟ لا ,,فارقينى غفر الله لك

لم يعد عشقى متاحا يا حبيبتى ,

قد صرتى الآن حلما لإنسان آخر

حينها فقط أنطقها :

(( طالما الأيام هتفرقنا ...

وهييجى يوم ونبعد غصب عننا ...

يبقى نبعد من دلوقتى أحسن ...

مش تكلمينى غير لما تحتاجينى أقف جمبك فى مشكلة

وأنا هفضل أحبك ...))

الآن لم يعد هناك مفر من الفراق

ولم يعد ما قلته كلاما خاطئا

الآن إتضحت الصورة


****

كيف أنساها .....



كيف أنسى عشقى الأول والأخير

حلم حياتى

كل كلماتنا معا تتردد فى أعماقى

كل أحلامنا معا لا تفارق مخيلتى

كل شىء ما عاد إلا ليصرخ طالبا الرجوع لها

حددت خطوات لأنساها

وكانت كالتالى :

أولا :

لا تذكرها فى حديثك

تانيا :

لا تتذكر ما كانت تعشق وتكره فى الحياة

ثالثا :

لا تردد كلماتها

رابعا :

لا تفكر فى أراءها فى الحياة والناس وعد إلى ما كنت عليه أو ربما عليك أن تكون شخصا آخر يجب أن تكونه

خامسا :

لا تفكر فى عينيها

سادسا :

بعد قليل ستنمحى وكأنها لم تكن هنا


*****


الخزانة ....




تعبت من البحث

أشقانى التفكير


ولكن لابد من وضع حدا لكل هذا


واليوم



على أن أحضر خزانة من نوع خاص


أضع فيها كل أحلامى


حتى الفتات منها


أضع فيها حلمى بمنزلى الصغير


وحلم إبنتى الجميلة الهادئة الحنونة ( سلمى )


وحلم عمرى بلقاء أمها ذات يوم


حتى أحلام العمل والتطور


أجمعها كلها فيها


أجمع كل أيامى القادمة


كل سعادة الدهر


كل دقيقة فرح


أغلق باب الخزانة بالمفتاح


وأضع المفتاح فى قلبى


فحتما حين تأتى من تدخل قلبى ذات يوم


ستجد المفتاح لكل ل خزانة أحلامى وفرحى


وتصبح هى السيدة الأولى


لحياتى كلها وما تبقى من عمرى


تحياتى

شاب فقرى
ملحوظة : (( مش هرد على تعليقات البوست السابق لأنى للأسف مقدمتش الصورة كاملة ومينفعش أخش أشرح للكل إن الرأى اللى كل واحد قاله مش دا محله ...لكن طبعا هرد هنا وكلمة بكلمه كمان :) ))