الخميس، 24 ديسمبر، 2009

عذرا ... فهنا أصنع التاريخ



السلام عليكم ورحمة الله وبركاته
لاحظت كتير إن كل أما مدون أو غير مدون يتكلم عن مصر أو عن وطنه بيقول مساوىء كتير أوى وبيلبس النضارة السودا ويحاول يقنع نفسه بكافة الأشكال إن الحكومة بنت تيت وإن البلد دى عايزة الحرق عشان تنضف وإن فى أمل وضى بعيد أوى فى تيار ناشىء
صراحة وعن نفسى فأنا زهقت من كتر الحركات وصباح الإشتغالات والحاجات اللى بتطلع بدون إذن ومش هقول زى إيه ولكن ....
الأول قبل ما نتكلم لازم نسأل نفسنا سؤال واحد بس...

إحنا مين ؟؟؟

لازم كل واحد يعرف هوا مين بالظبط

مش بقصد الإسم والعنوان

ولا بقصد المكانة السياسية والإجتماعية والنفوذ والسلطة

أنا مين فى التاريخ ...

هسألكم سؤال هيوضح رأيى

ياترى حد فيكم يعرف ناصر ؟؟؟

ناصر دا عامل فى ورشة خراطة

متزوج ويعول طفلين أو تلاتة مش عارف بالظبط والراجل الطيب دا لما ورشته بطلت تشتغل وييجى لها شغل قرر إنه
يكرس حياته ومجهوده لهدف سامى جدا جدا جدا .... إنه يمسح العربيات فى الشارع

عايز أعرف مين الراجل دا بقى وإيه موقع إعرابه فى التاريخ ؟؟؟

سيبوكوا من إن دا رمز للمواطن المكافح الغلبان وإنه راجل مظلوم اجتماعيا وإنه الفقر اللى أجبره على كدا وإنه ياعينى

وياليلى وإنه يمثل الهزيمة اللى مصر فيها والحاجات الطين دى كلها

الراجل دا جاى الدنيا يعمل إيه ؟؟؟

إيه موقع إعرابه من التاريخ ؟؟؟

عمل إيه يفيد بيه نفسه ووطنه ؟؟؟؟

حقق إيه يقدر يقول فى يوم من الأيام أنا بحب بلدى وحققت ؟؟؟

ولا حاجة

هسمع واحد بيقولى بيصلى ويصوم وبيعبد ربنا ودا الهدف من الحياة وهوا العبادة وشغال صنايعى وبيعمر الأرض

هقول طيب حلو جدا

معنى كدا إن كل واحد فينا يشوف حاجة يعملها وياكل منها عيش ولا حتى جبنه ويكمل فيها ويتجوز ويجيب عيلين ويموت

أنا فى مرة من المرات قريت عن النمل

إنه النمل يقدر يشيل كرسى

تخيلوا

زى ما بيشيل صرصار ميت بالظبط ويوديه لحد الجحر بتاعه

أهوه لو كل نمله فكرت فى هى هتشيل ليه وتروح تتجوز نملة تانية حلوة وبنت حلال وبتكسب وبتاكل من عرق جبينها

فهما هيموتوا قريب أوى

أقصد إن فكرة الإتحاد لازم تكون موجودة فى العمل

لازم أكون ماشى فى منظومة شاملة ومتكاملة

لازم يكون ليه هدف

نرجع للسؤال الملح .... إحنا مين ؟؟؟

إحنا مدونين

طيب ماشى أهلا وسهلا

فى فترة من فترات الشعر العربى كانت فى العصر العباسى تقريبا

كان كل اما شاعر ييجى يكتب حاجة بقى بيستخدم ألفاظ زائفة و متكلفة أوى او بيكتر من المحسنات فى الشعر بدون داعى
وبيتكلم فى موضعات تافهة جدا فقد تجد هناك شاعر قاعد وتاعب أعصابه وبيوصف فى فرخة أو بيوصف فى سكينه وقد
إيه هى حامية وغدارة وشرانيه وبتقطع

نرجع للسؤال تانى ....

إنته مين ؟؟؟

إيه موقعك فى التاريخ ؟؟؟

هل فى فرق بين وبين شعراء العصر العباسى اللى بهدلوا الشعر وفشلوا فيه وكانوا بيتكلموا فى مواضيع سطحية وبينك؟

إنته كنت مدون وكان معاك القدرة عالكلام والتأريخ...ياترى هتكتب إيه فى التاريخ ؟؟؟

يوم ما تقابل ربنا هتقوله يارب أنا كنت مدون ومكنتش بفيد حد ولا بهتم بأمر أمتى ولا المجتمع اللى عايش فيه وكنت لابس نضارة سودا وبلعن أبو بلدى وبلعن الأخلاق الوحشة ؟؟؟

هتحاول تغير إيه وتوصل لحد فين ؟؟؟؟

بتعمل إيه لأمتك ولبلدك وللمنظومة اللى إنته عايش فيها ؟؟؟؟

ياترى لما يمر الزمان وإنته تموت وناس تدخل مدونتك تقرا ...هتقول إيه ؟؟؟؟

هل هتدعى لك على الإفادة ولا هتدعى عليك ؟؟؟

هل الناس لما تقرا مدونتك هتحب بلدها ؟؟؟ وهل الناس دى هتحب أمتها وتدافع عن قضاياها ؟؟؟

هل إنته زى شعراء العصر العباسى ؟؟؟

هل أنت قدرت تغير حاجة وتقول رأى صادق وصريح وتتحرك ولو حتى تنمى نفسك عشان البلد دى تنمو ؟؟؟ والأمة دى
تعلى كمان وكمان ؟؟؟

هل نقلت التاريخ بصدق وإتكلمت بحيادية وناقشت بموضوعية وساندت قضايا خير تستحق المساندة ؟؟؟

طيب

كمان خمسين سنة متخيل نفسك حققت إيه ؟؟؟

عملت إيه ؟؟؟

بلاش خمسين سنة

خليهم عشر سنين ....

عملت إيه بقى ؟

راجع آخر عشر سنين فى حياتك

شوف عملت إيه ...

شوف كل لحظة فى عمرك صرفتها وقضيتها فى إيه ؟؟؟

حاول بعد ما تقرى تسأل نفسك سؤال واحد

أنا مين ؟؟؟؟
و لو لقيت رد للسؤال

و لو لقيت إنك تقدر تفيد نفسك وأمتك ووطنك

يبقى ساعتها إرفع رأسك بكل فخر وإبدأ إخطو خطوة نحو هدفك ونحو حلمك

لحد كدا إنتهى الكلام ....

عن إذنكم مشغول

عذرا .... فهنا أصنع و أكتب التاريخ لأحفادى


شاب فقرى

ملحوظة .. حاولت أوضح كويس للجميع فكرة يارب تكون وصلت وهوا إن كلامك اللى بتكتبه فأنته تعتبر مؤرخ وإن كنت هاوى فأنته مؤوخ ياريتت تأخد بالك من اللى بتكتبه عن بلدك ونفسك وعن قوتك وضعفك وعن أحلامك وحياتك
حاول توجد لنفسك مكان فى عالم لا يوجد فيه أماكن للضعفاء والتائهين .
وذكرت مثال النمل للتوضيح إن دا نمل... فما بالك بنفسك كإنسان ومدون وسلاحك هى كلمتك ؟؟؟
الدوافع لكتابة البوست دا كتيرأوى
لكن أهمهم بالتأكيد هوا إنى شايف اليهود بيحاولوا يغيروا التاريخ وبيدخلوا نفسهم فى كل حادثة تاريخية أيا كانت ومهما كانت تافهة أو خطيرة وبيحاولوا يعملوا لنفسهم تاريخ وبيلعبوا فى كل الحوادث براحتهم وبمزاجهم بيكتبوا اللى يريح أعصابهم وبيكدبوا الكدبة ويصدقوها ويدافعوا عنها .

هناك 41 تعليقًا:

بقلم: رامى ظاظا يقول...

تمنياتى ب80 مليون صانع تاريخ

نـــــــــــــور يقول...

شايفاك محموق اوى كده
طيب روح اصنلعك شويه تاريخ وتعالى بسرعه انا مستنيه اهو p:

شوف ياسيدى انت كلامك صح جدا بس بلاش تعريف النفس لانه حاجه صعبه اوى
واعتقد لو جينا نرصد كل واحد فينا اخر 10سنين فى عمره وهل راضى ولا لا هنلاقى المعظم راضى لانه ببساطه عمل اللى كان عايزة ولو لقيت حد مش راضى عن نفسه اعرف ان ده الحد الوحيد اللى حقيقى حاجه تفيد فى حياته

اما عن التدوين وماذا فعلت فيه فانا بحمد ربنا انى عمرى ماكنت من اللى بيسبوا ويلعنوا عالفاضى
انا اما بتكلم عن موقف غلط شفته وبحاول ابين للناس انه غلط عشان الف النظر للصح او بتكلم عن احساس

فاكرنى
انا نور..حبيبه:)

وانت عامل ايه دلوقت؟:)

صفــــــاء يقول...

التاريخ
يكتب حسب الأهواء
كل مؤرخ يكتب ما يراة وتراة عيناة
فلو أفترضنا أن كلنا مؤرخين

أذا كل واحد فينا لا يكتب التاريخ
بل يكتب وجه نظرة ورأيه به

موضوع جميل

تحياتى لك

صوت من مصر يقول...

اظن ان التاريخ لن ينسى تلك الحقبة خاصة ونحن فيها مظلومين

شاب فقرى يقول...

عزيزى رامى ظاظا

يارب يكون فى بيننا من يقدر يصنع التاريخ لأحفادنا فى أحد الأيام

نورت

خالص التحية والاحترام

شاب فقرى

شاب فقرى يقول...

نـــــــور (( حبيبة ))
فاكرك طبعا

أنا بدأت فعلا فى صنع التاريخ

واخر عشر سنين الواحد لازم يشوف هوا عمل ايه فيهم وهل حقق حاجة لوطنه وأمته ولا لاء

دا هوا المهم والأهم

الحمد لله بخير حال

نورتى ودمتى بكل ود

اسعد الله أيامك
شاب فقرى

شاب فقرى يقول...

صفاء

الموضوع هنا انى بطلب من كل واحد يشارك فى صنع وكتابة التاريخ

مشاركة فى الصناعه والكتابة مش فى حاجة واحدة بس

:)

نورتى المدونة

دمتى بكل ود

شاب فقرى

شاب فقرى يقول...

صوت من مصر

المشكلة هوا الشعور الغير مبرر بالظلم :(

فهمتنى اكيد

واكيد التاريخ مش هينسانا

بس المهم هيفتكرنا بايه ؟؟؟

شاب فقرى

غير معرف يقول...

Al Salam 3alaykom...
Besara7a ana mish modawena, la aktob el taree5, bas baqra2o kowayes!!
Howa da mish meqyas enno ykoon leek ta2seer fel taree5 wel mojtama3, ma enta te2dar te2asar ejabyan, we beshakl kbeeer awy min 3'eer ma tkoon sha3er aw modawen ...

We kaman enta nafsak mish koll el posts beta3tak ejabya we bet7ki 3an el watan... Hya maktooba 7elw ah, we kollaha masha3er 7azeena kanat aw fare7a... Bas still, mish ejabya we ta2serha maloosh da3wa fel watan... Zay masalan el post beta3 gald el zat!!!

We kollena 3enna 7ajat feena e7na , ben7eb noktob 3anha we n2olha lel donia kollaha min 3'eer 7esabat :)

Ya reet tet2abal ra2yi, ma3 el 3elm enni ba7eb modawantak gidddddan we mo3jaba fe koll afkarak we 7ekayatak elli feeha..

We aho am keeping N toutch zay ma olteli fel email ;)

Salam!

شاب فقرى يقول...

3'eer mo3araf

mosh lazem tkony modawena 3ashan tekteby el taree5
momken tesharky fe sena3toh
3la fekra fe alf 7aga momken t3mleha we tesna3y beha el taree5
monhem enk tfeedy bldelk we omtek mesh t2dy el 7ayah we 7'alas
momken el posts in my blog matkonsh ejabya bas bet3aber 3any wda ykfeny we mafesh 7ad fena kamel
ana banshor el 7elw wel we7sh we b7awel a2om bedory fe el7ayah
we b7awel aktob we asna3 el taree5
ana fe3lan bd2t a3mel keda

i hate franco arab donot write with it again
never

shokran leky

nice to add a coment

keep in touch = read and left a coment :)


shab f2ry

غير معرف يقول...

Wana wallahi bakrah el Franco Arabic bardo , bas ma 3endi keyboard Arabic fel iPod we kol ma a3mil ta7meel lel keyboard 3al labtop beta5tafi tani, asli 3aysha fe America ya3ni el Arabi lel asaf 3'eer mo3taraf feeh hoon, we hada el sabab fe do5ooli 3alam el modawanat el 3arabya, 3ashan el 7orouf betow7ashni :(

. . .
3ala fekra , ana fehemt asdak eeh bel zabt min 5elal raddak 3al comments el tanya...
We min 5elal el mawdoo3 el sabe2 bardo...

Ya rab kollna ne2dar nedeef shi la anfosna we lal watan elli howa taree5na !

Keep in toutch= read and left a comment for sure:) !!!

Shukran leek enta kaman

Rana ...

قلم رصاص يقول...


فكرتك وصلتني جدا جدا جدا ياكريم

انا فاهم اوي انك مش تقصد ان الانسان يعرف نفسه هو مين ..المهم هو هيعمل ايه لنفسه ولوطنه ..!

في الاتحاد قوة ..ومثال التمل رائع جدا في تصوير الأمر لنا ..فمابالك واننا بشر..فنحن خليفة الله في الأرض وسخر لنا كل شيئ لتعميرها خصوصا ونحن خير امه اخرجت للناس وهي المسلمين ..

وضربك لمثال المدون جه في وقته ..خصوصا انك تخاطب مدونين وعلى مدونات ..يعني التمثيل هنا اسم على مسمى او اقرب لما يمكن ان نتحدث عنه من موقع وواقع نحن فيه ونفهمه ونصنعه كل يوم ونشكله..

نحن بالفعل نؤرخ ونكتب التاريخ بكل حرف نسطره على مدوناتنا وبما تحمله مدوناتنا من افكار واراء وتوجهات ..فليأخذ كل واحد فينا الموضوع بجديه ويتفهم الامر جيدا ..الكلمة الطيبة صدقه كما نعرف لذا علينا تقصي الحقائق قبل رص الكلمات في سطور ونشرها في فضاء الانترنت الفسيح كنموذج لشريحه من الحياه التي نحياها.

يعني انا مثلا اتمنى ان يجتمع المدونون على فكره معينه يناضلون من اجل ترسيخها وافساح المجال لوجودها على الواقع ..بدلا من الكتابة هنا وهناك في موضوعات غالبا بالطبع مفيدة وهناك الكثير من الموضوعات التي تتفق في محتواها مع الاخرى ..اللي عاوز اقوله :

نفسي ان اللي يدون ميدونش لنفسه .. ونفسي يجمع المدونين اهداف ساميه تهدف لرفعة ورقي بلدنا ..

وعلى فكره بقى ياكرملله انا باختلف معاك في النقطة دي ..لأنك قولت مرارا وتكرارا قبل كده انك بتدون لنفسك وبس..عشان كده انا بنبهك ع الهواء مباشرة الى انك تتناقض مع في هذه الجزئية ههههههههههه

معلهش اعتبرها بنكمل بعض ياحبيبي

فكرتك وصلت فأصابت كسهم هدفها في قلبي وعقلي .. ^_^

دمت في حفظ الله

جارة القمر يقول...

تصفيق حاد بقى

تمام الكلام جدا جدا جدا وانا فعلا متفقة معاك فى الموضوع دا

فى حقائق كتير مغيبة و بنصدق اى كلام بيتقال و اليهود ما شاء الله ما بيصدقوا اى كلام و يبدأوا يشتغلوا بقى هما هجس و كلام من الهوا

فكرتك عجبتنى :):):)

Angel يقول...

مساء الخير .. صباح التاريخ
كريم (:

أنا كنت زمان بفكر في كلامك ده والله
خصوصا أني بحب التاريخ وكان في شخصيات كتير بتعجبني وبحس انهم مش كانوا عايشين وخلاص لأ دول قضوا حياتهم عشان يبقى ليهم اسم في التاريخ يتذكر بالخير " علم ينتفع به مثلا " بس تصور أنا داخله اهو على عشر سنين معملتش حاجة عدلة لا لنفسي ولا لغيري .. زي ناصر كده اللي أنت ذكرته كمثال ... معملتش حاجة يتذكر فيها اسمي او حتى افيد بيها غيري لوجه الله

بجد لازم كلنا نفكر صح ونفكر ازاي هنبقى حاجة في التاريخ وفي حياة الناس اللي حوالينا كمان أصل ده مش هيعود علينا أحنا بس ..
وطبعا بالنسبة لمثال النمل
احنا للأسف يا كريم بقينا كلنا بنعتمد على غيرنا .. عندك احنا كعرب للأسف وبقولها بجد للأسف بنعتمد على الغرب وتقدماتهم في حاجات كتير اوي
وبنتصدر بقى في أمور تافهه والله مثلا برامج مايكروسوفت أوفيس .. مين أسس لنا البرامج اللي احنا شغالين عليها دي هما .. ألاقي بقى الناس بتتداول موضوع سخيف في المنتديات ويقولوا يا جماعة في جوه برنامج الــ Word نجمة اسرائيل وسط الرسومات ياريت تمسحوها ودي الطريقة إييييييه التخلف ده ؟؟؟؟
ما أنت ممكن تستفاد منها في موضوع هتكتبه .. غباء بجد الناس بقت معتمدة على بعضها وبتمشي بدون تفكير
.........

مش عارفة بجد أنا واحدة من الناس اللي نفسي اتغير واعمل شيء مفيد
مش للحظة إنما لعصور زي ما غيرنا تركوا لينا أسس وعلوم بنعتمد عليها
قدموا حاجة فعلاً للتاريخ بس ياريت محدش يستقل بنفسه في كتير مننا جواه طاقة مدفونة ياريت يحاول يستخدمها في الصح وفي شيء مفيد ..

مش عايزة أطول أكتر من كده ولو الموضوع احتاج نقاش أطول هرد تاني
(:


دمت بكل ود واحترام يا كريم

Angel love

الشاعر الفنان أحمد فتحى فؤاد يقول...

أخى كريم

كلامك جميل و عجبنى جدا
لكن كل واحد يكتب من الإتجاه اللى بيقدر عليه
أنا شاعر أكتب شعر مرة عاطفى مره وطنى مرة دينى .. المهم يمثل دور و تتطلع منه بفائدة و لو نسبية
أقصد كل واحد يشتغل من الخندق اللى بيقدر يقف فيه
المهم بدون إسفاف و لا تسفيه و لا تجريح و لا تزييف لأى وقائع
صح كده؟

بحر الالوان يقول...

لا اعرف لماذاذكرتني كلماتك بمقدمة كتاب ا/ محمد حسنين هيكل وهي :


لا اعرف هل هو تحيز رجل لما ألف وعرف ,او انه حكم في الموضوع بصرف النظر عن متغيرات العصور .
لكي علي شبه اقتناع ان الكتاب المطبوع علي ورق له العمر الطويل ,وانه الحاضر علي الدوام مهما اشتد حوله من زحام .
بمعني ان الكلمة المكتوبة علي الورق باقية , والكلمة المسموعة علي الاذاعة والتلفزيون عابرة , والكلمة المكهربة علي الكمبيوتر فوارة وهي مثل كل شئ فوار متلاشية .

اي ان الكلمة المكتوبة علي الورق بناء صلب : حجر او معدن وهكذا كل بناء , واما غيرها فهو صيحة متغيرة - خاطفة - لا معة - بارقة .... وبالنسبة لكاتب علي الورق وبالحبر , فان كتابته هي بناء عمره .
-------------------------

لهذا اعتقد ان المدونات ليست المكان المناسب لصناعة التاريخ او حتي كتابته..... ولكنها مناسبة جدا لميلاد فكرة او اضافة خبرة
وكم من الافكار غيرت وجه العالم .

لهذا انصحك باعتناق مبدأ .....قل كلمتك وامضي .

وشكرا

Just Smile يقول...

بداية..

أنا بحتقر أي انسان يدخل ع النت او ف اي حاجة ويشتمك وطنه ويشمت فينا التانيين لأن أولا البلد ملهاش علاقة باللي احنا فيه ولو اتعاونا هنقدر نغير حال البلد ديه...والمصيبنة اننا بنهمل الايجابيات والحجات التانية وبنبص نظرة متحيزة..

نرجع تاني لموضوعنا

أولا انا بنادي من خمسين سنة فاتوا ياريت يكون عندنا رسالة..احنا مش حيوانات عايشين ناكل ونشرب وننام ونتجوز ونموت وبس...
لازم يكون عندنا غريزة تفرقنا عن الحيوانات تخلي لينا قيمة ولزمة ..هدف بمعنى آخر وشوية صبر عشان يبقى لينا موقع م الاعراب عشان منبقاش عم ناصر

مش بس ف التدوين لازم نكتب صح وخير ف كل حاجة ف الدنيا..كل حرف هنتحاسب عليه ولو فدنا حد بمعلومة او رفعنا معنوياته بحرف..اعتقد ربنا هيكرمنا وهيفضلنا ف لحظة هتتردلنا تاني

حلوة أوي مؤرخين ديه..والله انا كنت عند بيت جدو ربنا يرحمه امبارح وتخيل كان كاتب سنة 1950 عن توقعات لسنة 2000 ومقارنة بين الزمنين متتخيلش كم سعادتي باللي لاقيته ده اكتر من اي حاجة تانية معرفش هوا كان كاتب ليه كده بس شيء رائع بالفعل

واخيرا انا من فترة دخلت مدونة واحدة ربنا توفاها بالفعل وأثرت فيا جدا مدونتها..قد ايه هيا رحلت عن العالم بس لسه متواجدة بكل كلامها متمسحتش م التاريخ ومن الذاكرة.

اسفة ع الاطالة بس موضوعك شدني وعجبني

ربنا يوفقك

أحمد شريف يقول...

السلام عليكم

معجب جداً من طرحك هذا وأعضدّه بشدة

لي وقفات عديدة معك وإن شاء الله يدوم التواصل

دمت بكل ود

أحمد شريف يقول...

ملحوظة هامة يا أخي الفاضل

لكي تصون تاريخ الوطن عليك أن تهجر تلك المدعوة بالفرانكو أرب لأنك تدمر هكذا لغة وهُوية الوطن
أرجو أن نعتز بلغة الوطن أكثر يا شباب

ليس فقيرا من يحب يقول...

طيب لو المدونه حصل فيها عطل او اتمسحت

بالغلط التاريخ هيروح فين

احنا مش مؤثرين قوى يا فقرى

دا احنا بس بنفضفض مع بعض

نبعبع بكلمتين خنقينا سوا

نضحك مع بعض شويتين نعيد على بعض

مفهمتش كويس فكرتك يا فقرى

واكيد العيب فى السمك اللى اتغديت

بيه ههههههههههههه

خير يارب اخبار الصداع ايه

يارب تكون بخير

حنين الذكريات يقول...

السلام عليكم
المشكله اننا مش عايزين نصنع تاريخ خاص بينا وعايشين على تاريخ فات عليه سبعتلاف سنه
فعلا لو كل واحد فى البلد حس انه هو اللى بيوصل البلد للى هى فيه كان كل واحد عمل اللى عليه وفى الاتحاد قوه
مش بس الاتحاد وتخطيط لبكره هيكون الزى
مش هيكون فيه تقدم واحنا عايشين على ذكريات
سؤال انا مين ده صعب جدا الرد عليه

مستخلص افندى يقول...

فى كتير كده

بس فى برضه بيبص للحلو والا ماكنتش شوفت مدونين عاملين دونات علشان مصر وكاتبين الحاجات الحلوه

بس لاسف فى مصر الفساد سايد اكتر من الكويس والحلو

وكل واحد يدور بنفسه جوا نفسه حيلاقى نفسه

lostlove يقول...

تحياتي ليك بجد
عجبني الموضواع
كل واحد بيصنع التاريخ من وجه نظرو
وبيعبر عن رائيو
ومفيش حد عارف از كان صح
ولا ماشي عكس الطيار
انا عن نفسي
مش فاكره عملت ايه من 10 سنين
ولا عارفه انا مين
مبحبش اعرف نفسي
يمكن حققت حاجه
يمكن لاء
لاكن انا مين
معرفشي
مفيش حد يعرف هو مين
تحياتي علي كلامك
اتمني التوفيق

7akwena يقول...

انت بتفيدنى فعلا مفيش مره بتدخل مدونتك غير لما استفيد من حاجه
شكرا يا شاب
انتى ليك عندى تاج على فكره

صانعة تاريخ .. وملوخية احيانا يقول...

طب يعنى هو التاريخ دا بسمنة ولا بسكر :D

شمس النهار يقول...

ازيك

عامل ايه يارب تكون بخير

ان شاء الله هنقوم بحمله ضد الهبل علي النت

والاسفاف والغش

وحطيت لينك البوست بتاعك اللي نشرت فه القضيه

وكيمو صوت من مصر بيعمل البانر

هنادي بنت نظيف شفاف

البوست لطيف جدا

كل واحد في موقعه مهم المهم ان يكون له بصمه واضحه مش موجود وخلاص
وجوده زي عدمه

سلامي

سمكه واحده يقول...

ماشاء الله عليك بجد
لما قريت كلامك كاني قاعده مع ابن خالي الصغير تفكيرك وكلامك
والله الواحد بيفرح لما بيلاقي الشباب عقلهم جميل كده
بجد قريت كام بوست ليك
ربنا يحميك
بالنسبه لكل واحد عمل ايه فهو يختلف من انسان عن التاني
وانا راضيه بحالي وعاوز اتطور ولا مش ارضيه ولا مبسوطه
ولا انا محلك سر
ولا انا هدفي ايه في الحايه
انا عاوزه ايه طيب
متهمه ببلدي وقضايا بلدي ونفسي تتغير
ولا مليش دعوه وياله نفسي

بالنسبه للتدوين فهو عالم غريب ومنكرش انه جميل وليه ميزاته وليه بردو عيوبه
بس عرفنا حجات كتير وغير افكار لينا كتير
وعلي الاقل قدرنا نقري افكار بعض
وكل واحد كان مفكر انه لوحده في العالم ده لقي ناس كتير زيه
ناس كتير مبسوطه
ناس كتير حزينه
ناس كتير تايهه
ناس كتير بتحاول تعبر عن مشاعرها بطرقتها
ناس كتير وحجات كتير لاقها متشابه
ناس كتير مش عارفه هي عاوزه ايه
ناس كتير توصلت وحست بكينها في العالم ده
بغض النظر بقي عن المساؤء اللي فيه والامراض اللي بتظهر طبعا
بس بجد وبدون مبالغه
الله ينور عليك
تحياتي يا
فقري
ولون كده مظنش انك فقري ابدا
(:

walaa tulip rose يقول...

ومن منا لا يستطيع صنع تاريخ ولكن بالكلمات

لاننا مدونين فالتاريخ كلمات لكن يارب نقدر نصنع تاريخ حقيقي واحداث حقيقية ونغير ركود تاريخنا الحالي ونحركه لمستقبل واضح يكون تاريخ في يوم م الايام
تحياتي
موضوعك جمييل جدا

momken يقول...

مبروك المدونه الجديده
انا لسه مقرتش

لكن جيت بس ارحب بيك فى عالم بلوجر
على اساس ان بلوجر ده خالى مثلا وانتى دخلت بيته

وابارك على المدونه واتنمنالك التوفيق

مع انك مستحيل وانا معرفش ايه المعنى الحرفى للمستحيل لكلا هذا لا يفسد للود قضيه


تحياتى

shrshr يقول...

حقا التدوين والكتابه أكانه في أعناق أصحابحها وياريت فعلا اننا نقدر نعمل بيهم حاجه صح للبلد واللي عايشين فيها فعلا احنا محتاجن حاجه ايجابيه بس برده مفيش مانع من سرد السلبيات

Sharm يقول...

التاريخ انتهى ..

نحن في عصر ما بعد التاريخ

فشكووول يقول...

السلام عليكم شاب فقرى

تحياتى

قبل ما انسى اقول لك ان اليهود فعلا لهم تاريخ .. وان معظم الكتابات قبل الاسلام كانت اسسرائيليات. بس تاريخ زى الزفت .. ما علينا

يظهر والله اعلم اننا مش حنعرف نعمل حاجه غير اننا نأرخ للفتره اللى كل واحد فينا عايش فيها وربما يأتى احدهم بعد مائة او مائتى سنه ليجمع كتابات كل عصر ويقوم بعمل تأريخ صحيح لفترتنا او لما يؤرخ له

تحياتى

فشكووول يقول...

على فكره

التاريخ المصرى عايز اعادة كتابته من ايام محمد على وحتى اليوم وخصوصا الفتره من 1952 حتى اليوم

كلام عيب يقول...

ياريت كلنا تبقى عندنا المقدره اننا نلوم نفسنا و نعاتبها و نقومها وقت لزم فيه التقويم
تاريخنا بنصنعه احنا باعمالنا اللى بنسيبها تتكلم و تقول اننا كنا هنا فى يوم من الايام
يااما اللى يشوفها يدعيلنا يا يدعى علينا
كلامك حلو قوى قوى

سلمى يقول...

السلام عليكم
انا جيت اسئل على حضرتك نظرا لانى حسيت ان فى اختفاااااء
يارب خير

Ana keda يقول...

حلو التوبيك
لو جينا نتكلم عن الوضع الى احنا فيه معاك جدا ان البلد كلها فى حالة يرثى لها من كل حاجة ومش هنفضل نقول فيها وفيها لان مصر على مر العصور كلها والتاريخ يشهد علطول فى ازمات بس الغريب ان الوقت ده بقى ف سلبية كتير اوى وده من المناخ نفسه فى البلد الناس تحس انها اتكسرت يعنى زمان كان الكيلو بتاع اللحمة بجنيه والناس كانت بتعمل مظاهرات انا لما كان جدى بيحكيلى كنت بفضل اضحك لكن دلوقتى اكتشفت اننا بجد فى حاجة
وجات فترة انا نفسى كنت ماشية بالمنطق ده لا وبقول انى بعمل حتى لو مش بالتدوين على الاقل انا بعمل حجات وداخلة مع اصحابى فى كزا حاجة لانى امنت ان مش المفروض اننا نستنى كل حاجة من البلد لاننا يبقى موت يا....
لازم احنا الى نبتدى واحنا الى نغير بادينا واكيد فى وقت وهتتشال الغيمة الى عالبلد دى
يا رب

الشعب لابد له من شيما تشكمه يقول...

كريم:
فينك؟؟؟؟؟
بايت بتغطس كتير اوى.

ponpona يقول...

كريم

انا باحترم دماغك دي قوي

:)

sal يقول...

احييك واثمن كلامك الرائع
وسعيد بزيارتى هذه
اتمنى لك التوفيق

P A S H A يقول...

كل سنة وأنت طيب.

Angel يقول...

مساء الخير
كل سنة وانت طيب يا كريم
وإن شاء الله سنة سعيدة
(:
و
Happy New Year 2010

Angel love