الأربعاء، 19 يونيو 2019

Egal

اصعب الفترات واكثرها بؤسا بتيجي بدون تنبيه لوحدها كدا ،اتمني تعدي علي خير وخصوصا بعد الفشل العظيم دا ، اتمني ربنا يسمعني ويعينني بعد اخر امتحان بائس سد نفسي، اتمني مفقدش الامل واتمني تبقي نفسي مفتوحة واتمني مسيبش المكان دا عشان بحبه واتمني استمر حياتي بقدر بسيط من السعادة ولو حتي عقابه هيأتي فعلا عن قريب ولكني اتمني رحمته تسبق العقاب دا ، اتمني اني مبقاش لوحدي لكني النهارده كنت مستريح نفسيا شوية وانا منعزل عن العالم اتمني محبش دا واتمني الامتحان الجاي ربنا يديني القوة عشان اعديه لاني فعليا زهقت جدا ، اتمني اعرف انام كويس ولو حتي الكام يوم الباقيين دول ، اتمني اجازتي تطول واتمني انام كتير بدون فواصل تلات ايام علي بعض واتمني ان شنط الطوب اللي علي ضهري تقع واقدر امشي وضهري مفرود واتمني السعادة لكل انسان خلقه ربنا وابتسم في وشي ولو حتي مرة واحدة بس واتمني مفقدش الامل ولا اياس لاني فعليا كدا دلوقتي ، بس كل واحد بيشيل نتيجة افعاله واختياراته وبيتهيالي انا كمان كدا مش هبقي استثناء يعني ، اتمني اقدر اتحمل بصبر اختبار ربنا ليا في حاجات كتير فوق طاقتي وفعليا الضغط اللي بيوقع شعري بتمناه يختفي ، اتمني حاجات كتير جدا لكن زي ما ديكستر قال
Wishes are just for children
تصبحوا علي خير 

الأربعاء، 12 يونيو 2019

Great ideas

هوا انا ينفع اشتري 
Oceans 
باربع تلاف جنيه للثقب الاسود اللي في صدري دا ؟
كان اول رد خطر في بالي : هتخلص 
او بمعني اصح مش هتكفي 
فقلت بلاش 
***
هوا عشان كدا مبتعرفش تنام ؟
لا عشان بفكر اني هصحي الصبح اعمل حاجة مش عايزها في مكان مش عايزه 
واتحرك بشكل مش عايزه 
وانا عايز اكمل نوم انا 
ومش عايز الوقت يعدي 
هنا يقف الزمن شوية
بس مش هيقف ولا هيحصل حاجة عادي 
العداد هيفضل شغال وهتكتشف اكسيس جديد للعالم الآخر ما تحت اول طبقة نوم وهتفكر افكار ملهاش اي تلاتين لزمة
- طيب هنام في الآخر ؟
لا حضرتك هتفكر في افكار تانيه اكثر تفاهة
***
طيب لو الطبقة الاولي مملة مش هنعرف نلاقي اكسيس للطبقة التانية؟
ما انت لو اتنيلت لقيتها هتنام ياحبيبي 
طيب هوا مش دا الهدف ؟
لا انا عايز الافكار 
احا هوا مش قلت عايز تنام؟
اه بس عايز الافكار 
طيب لما تصحي الصبح اكتبها وانشرها انا وانت وبابا وناهد 
لا مليش فيه هنساها وانت بتزاولني 
***
ما تجيب بوسة يا اسماعيل بيه؟
يبقي انت شفت الحلقة الجديدة من بلاك ميرور 
انت تعرف ان بعض الاحلام فعلا بنشوف فيها الواقع والحقيقة حتي لو بعيد بالف ميل 
اه عادي 
بس اللينك يبقي قوي 
الشرط دا دايما متحقق لاني تقريبا عندي لينك لكل شيء حلو ووحش
بس سيبك انت الحلقة زي الخرا 
اه والله بجد مش عارف اودي كل دا فين
معاك كيس تاخد شوية ؟
لا عندي والله تسلم حبيبي تسلم تسلم تسلم 
***
هوا ريحة السجاير قوية؟ ولا عشان لسه شاربين سجارة ؟
مين اللي شاربين هوا انت مش كنت لوحدك فالشارع ؟
هوا مين بيتكلم؟ انت مين اساسا انت مش في الكتاب ولا فالشخصيات ولا اتذكرت قبل كدا ولا اتكتب عنك ولا اي حاجة
انت مين بقي ؟ ما انا اكيد مش هدخن مع حد معرفوش 
انا جايلك من الطبقة التالتة بقولك ان شوية وهنتعرف علي بعض 
طيب اشطا متتاخرش 
هوا مين اللي قطع الشجرة احنا لازم نبلغ عن الوسخ دا البوليس الصبح 
ثواني بس كدا انهي شجرة؟
الطبقة التانيه بتسلم عليك وبتقولك الاكسيس شغال

نرجع بقي قلتلي عايز تشتري محيطات بكام باكو ؟ 

الأربعاء، 5 يونيو 2019

العيد وليلة العيد ياافندم

سلام عليكم 
مش عارف بس هي عادات وتقاليد من سنين ان كل سنة بكتب بوست  محبة خالصة وحب كتير بإسم ( ليلة العيد ياحبيبتي ) فيا اما انا بذكر فيه حاجات بحبها او حاجات حلوه عايشها او بقعد ابكي علي اطلال الماضي بيتهيالي دي المعلومة الوحيدة اللي هيتم توضيحها فالبوست والباقي متروك كالعادة لعقل كل واحد  وعشان كدا انا هحدث البوست دا اكتر من مره  لاني فعليا بفكر فيه بقالي وقت عمال اقول اكتب ايه وكمان نقط كتير عايزه اذكرها وحاجات بتقع مني , اما بالنسبة لصورة البوست فهي لكارت علي مكتب الممرضة عند الدكتور وانا رايحله امبارح بس انا بعشق دي بالذات هي وكام واحدة تانية بحسهم فعليا من اعظم الحاجات في التاريخ 
شكلنا ابتدينا البوست ……… صباح الخير 😀
***