الأربعاء، 2 ديسمبر 2009

الحنكلولو... أجمد أسرار البشرية


بسم الله الرحمن الرحيم
لم أكن أنوى على الإطلاق أن أقدم لكم أجمد أسرار البشرية
ولكن آن الأوان أن نكتشفها معا :)
***
الحنكلولو ...
أكتر حاجة بستغرب لها فى النفس البشرية هوا حب الإستكشاف وعشق الغموض
يعنى مثلا الإنسان فى الاول كان عايش فى مصر
وبعدين بدأ يستكشف العالم
طموحه عالى وواسع وملوش حدود
وبيعشق الغموض
فى ناس بتحب تغلف نفسها بالغموض تحت شعار
إن أنا لوحدى ومبحبش حد يعرف عنى حاجة وعندهم ألف خط أحمر
زيى مثلا
الناس دى من كتر ما هى بتحيط نفسها بهالة من الغموض
الناس بتحب تقرب لها وتسمعها وتحاول تشوفها وتشاهدها من بعيد
زى بالظبط ما بتبص على أى حاجة غريبة
بيستغربوا إزاى فى بنى آدم يقدر يحيط نفسه بالهالة دى من الغموض
والغموض دا بقى لو موجود فى أى حاجة
تلاقى الناس بتجرى عليها على طول
مش عارف بقى هل دا من الطمع ؟
ولا هل دا حب إستكشاف ؟
ولا هل هوا حب الوصول لكل شىء غريب وفريد؟
مش متأكد أوى
يمكن حتى قريت إمبارح موقف شبيه لدا فى مدونة الشعب لابد له من حكومة تشكمه
لما كانت شيما بتتكلم عن ام رجل مسلوخة وسبب رعبها للأطفال
الاطفال بتخاف من الشىء الغامض أو من الحاجة اللى مش معروفة
بالظبط زى ما بعض الناس بتخاف من بكره
لانها خايفة على احلامها وطموحاتها وعلى نفسها
***
يعنى مثلا لو قلنا إننا إكتشفنا حيوان جديد فى صعيد مصر فقط
إسمه (( الحنكلولو ))
وإن الحيوان دا طلع كدا ربانى من العدم
بدون أب ولا أم ولا حتى بنت خاله
طبعا هتلاقى تانى يوم
كل واحد فى مصر عايز يروح يشوف الحنكلولو
دا إذا مكانش اهل الصعيد طلعوا عالطريق وبيلفوا فى الصحارى بحثا عن الحنكلولو
وهتلاقى بقى قصص وأساطير ظهرت عن الحيوان الغريب
اللى يقولك شبه السلعوه
واللى يقولك دا إنسان مسحور ومسخوط زرافة (( معرفش إزاى يتسخط زرافة دى ))
واللى يقولك الحنكلولو جالى فى المنام وشفته بيشرب مية النيل كلها
واللى هيقولك الحنكلولو حيوان مفترس بالفطرة ولسه واكل أسدين
ولازم كلنا نستخبى منه
واللى يقول الحنكلولو بيطير
واللى يقول إنه أساسا كان بيعوم بس بقى بيطير عشان يعدى البحر وميتبلش

هتطلع كمية أساطير كافيه بتحريك الهرم الأكبر من مكانه
عن الحنكلولو
****
لكن اللى بيحزننى فى موضوع الغموض دا
إن الناس لما بتشوف شخص غامض
ربما يكون غامض لحزن أو لجرح قديم بيحاول يداريه
او ربما يكون غامض لانه مريض ومش عايز يقرب من حد
مش عارف
لكن فى ناس كتير بتحاول تقرب منه وتعوده على وجودهم فى حياته
مستهينين بمشاعر الشخص دا
وكإنه مش بنى آدم
وبعدين لما يتزاح كل الغموض دا أو ولو حتى يحسوا إنه بنى آدم زيهم زيه
تلاقى الناس بعدت وإختفت
وكإنهم بيتعمدوا يوجهوا إهانة للشخص دا عن قصد
وكأنهم بيوجهوا رسالة إننا حطمنا عالمك
وإنتهى بك الحال أن تصبح لا شىء
يمكن هما مبيعملوش كدا بقصد
ولا وهما حاسين انهم بيجرحوه
لكن للأسف الحماس الخاص بيهم بيكون إنتهى
وبيعود الشخص دا لغموض ألعن من الأول ألف مرة
وبيبدأ يعمل حول نفسه بوابات وأسوار عالية
و حول شخصيته
ومش بيسمح لأى حد يدخل من أى باب
عارفين
فى تشبيه قريته من سنين
مش فاكر فين بالظبط
___
لكن بيحكى عن بني آدم ساكن فى برج
البرج دا جوا قصر كبير أوى
والقصر حواليه أسوار من كل مكان
والأسوار بالقصر موجودين فى قلب جزيرة فى المحيط
مهما حاولت إنك تقرب
ومهما قربت
أوحاولت إنك توصل للشخص دا
فتأكد دايما إنك لسه عالبر التانى من المحيط
_____
خلص الكلام
أتمنى أكون عرفت أوصلكم حاجة مفيدة
وأتمنى أى حد بيفكر فى إنه يكسر غموض أى بنى آدم لمجرد التسلية والمتعه
فبلاش
لأن ما إنتش عارف الطرف التانى دا ممكن يعمل إيه لما يتعصب ويخرج عن شعوره أو يتجرح

وعن نفسى مازلت رافع شعار :

(( قرب ... تتكهرب ))

ومازلت مش فارقة معايه الناس تفهم إيه
اللى يفهم حاجة يفهمها
المهم أنا عارف أنا مين وبعمل إيه ومكانى فين

خالص تحياتى وإحترامى
شاب فقرى