الأربعاء، 2 ديسمبر، 2009

الحنكلولو... أجمد أسرار البشرية


بسم الله الرحمن الرحيم
لم أكن أنوى على الإطلاق أن أقدم لكم أجمد أسرار البشرية
ولكن آن الأوان أن نكتشفها معا :)
***
الحنكلولو ...
أكتر حاجة بستغرب لها فى النفس البشرية هوا حب الإستكشاف وعشق الغموض
يعنى مثلا الإنسان فى الاول كان عايش فى مصر
وبعدين بدأ يستكشف العالم
طموحه عالى وواسع وملوش حدود
وبيعشق الغموض
فى ناس بتحب تغلف نفسها بالغموض تحت شعار
إن أنا لوحدى ومبحبش حد يعرف عنى حاجة وعندهم ألف خط أحمر
زيى مثلا
الناس دى من كتر ما هى بتحيط نفسها بهالة من الغموض
الناس بتحب تقرب لها وتسمعها وتحاول تشوفها وتشاهدها من بعيد
زى بالظبط ما بتبص على أى حاجة غريبة
بيستغربوا إزاى فى بنى آدم يقدر يحيط نفسه بالهالة دى من الغموض
والغموض دا بقى لو موجود فى أى حاجة
تلاقى الناس بتجرى عليها على طول
مش عارف بقى هل دا من الطمع ؟
ولا هل دا حب إستكشاف ؟
ولا هل هوا حب الوصول لكل شىء غريب وفريد؟
مش متأكد أوى
يمكن حتى قريت إمبارح موقف شبيه لدا فى مدونة الشعب لابد له من حكومة تشكمه
لما كانت شيما بتتكلم عن ام رجل مسلوخة وسبب رعبها للأطفال
الاطفال بتخاف من الشىء الغامض أو من الحاجة اللى مش معروفة
بالظبط زى ما بعض الناس بتخاف من بكره
لانها خايفة على احلامها وطموحاتها وعلى نفسها
***
يعنى مثلا لو قلنا إننا إكتشفنا حيوان جديد فى صعيد مصر فقط
إسمه (( الحنكلولو ))
وإن الحيوان دا طلع كدا ربانى من العدم
بدون أب ولا أم ولا حتى بنت خاله
طبعا هتلاقى تانى يوم
كل واحد فى مصر عايز يروح يشوف الحنكلولو
دا إذا مكانش اهل الصعيد طلعوا عالطريق وبيلفوا فى الصحارى بحثا عن الحنكلولو
وهتلاقى بقى قصص وأساطير ظهرت عن الحيوان الغريب
اللى يقولك شبه السلعوه
واللى يقولك دا إنسان مسحور ومسخوط زرافة (( معرفش إزاى يتسخط زرافة دى ))
واللى يقولك الحنكلولو جالى فى المنام وشفته بيشرب مية النيل كلها
واللى هيقولك الحنكلولو حيوان مفترس بالفطرة ولسه واكل أسدين
ولازم كلنا نستخبى منه
واللى يقول الحنكلولو بيطير
واللى يقول إنه أساسا كان بيعوم بس بقى بيطير عشان يعدى البحر وميتبلش

هتطلع كمية أساطير كافيه بتحريك الهرم الأكبر من مكانه
عن الحنكلولو
****
لكن اللى بيحزننى فى موضوع الغموض دا
إن الناس لما بتشوف شخص غامض
ربما يكون غامض لحزن أو لجرح قديم بيحاول يداريه
او ربما يكون غامض لانه مريض ومش عايز يقرب من حد
مش عارف
لكن فى ناس كتير بتحاول تقرب منه وتعوده على وجودهم فى حياته
مستهينين بمشاعر الشخص دا
وكإنه مش بنى آدم
وبعدين لما يتزاح كل الغموض دا أو ولو حتى يحسوا إنه بنى آدم زيهم زيه
تلاقى الناس بعدت وإختفت
وكإنهم بيتعمدوا يوجهوا إهانة للشخص دا عن قصد
وكأنهم بيوجهوا رسالة إننا حطمنا عالمك
وإنتهى بك الحال أن تصبح لا شىء
يمكن هما مبيعملوش كدا بقصد
ولا وهما حاسين انهم بيجرحوه
لكن للأسف الحماس الخاص بيهم بيكون إنتهى
وبيعود الشخص دا لغموض ألعن من الأول ألف مرة
وبيبدأ يعمل حول نفسه بوابات وأسوار عالية
و حول شخصيته
ومش بيسمح لأى حد يدخل من أى باب
عارفين
فى تشبيه قريته من سنين
مش فاكر فين بالظبط
___
لكن بيحكى عن بني آدم ساكن فى برج
البرج دا جوا قصر كبير أوى
والقصر حواليه أسوار من كل مكان
والأسوار بالقصر موجودين فى قلب جزيرة فى المحيط
مهما حاولت إنك تقرب
ومهما قربت
أوحاولت إنك توصل للشخص دا
فتأكد دايما إنك لسه عالبر التانى من المحيط
_____
خلص الكلام
أتمنى أكون عرفت أوصلكم حاجة مفيدة
وأتمنى أى حد بيفكر فى إنه يكسر غموض أى بنى آدم لمجرد التسلية والمتعه
فبلاش
لأن ما إنتش عارف الطرف التانى دا ممكن يعمل إيه لما يتعصب ويخرج عن شعوره أو يتجرح

وعن نفسى مازلت رافع شعار :

(( قرب ... تتكهرب ))

ومازلت مش فارقة معايه الناس تفهم إيه
اللى يفهم حاجة يفهمها
المهم أنا عارف أنا مين وبعمل إيه ومكانى فين

خالص تحياتى وإحترامى
شاب فقرى

هناك 36 تعليقًا:

الشعب لابد له من حكومه تشكمه يقول...

فى دماغى كلام كتير ومش عارفه اكتب ولا حاجه.

بس هقولك عموما احنا فى مجتمعتنا العربيه والمصريه بالتحديد,
عندنا فضووووول قاااتل,والمناخير واخده حقها معانا,
يعنى مثلا ممكن تكون قاعد فى مدونتك دلوقتى تلاقى حد داخل بيعرفك على نفسه ويقولك ودى مناخيرى جايبها احطها فى كل امورك.

احنا شعب مش بتاع غموض او انه يحط خطوط فى العلاقات احنا نحب كل حاجه وااضحه.واعرف تاريخ حياتك واتغديت ايه وكلمت مين وحبيت كام مره.

مناخيرنا طويله جدا.

علشان كده فى ناس لما تقابل حد عامل هاله لنفسه او مثلا شرنقه وعايش فيها بتحب تدخل الشرنقه دى تشوف شكلها ايه.زى الفضول اللى قتل القطه.هنموت ونشوف الشرنقه دى شكلها ايه من جوه.

ولما بتدخلها ممكن تلاقى حاجه غير توقعاتها فتتصدم وتقولك ياسلام ما انت زيينا اهو.
لان الغموض غصب عن الانسان بيخليه يرسم حجات كتير فى دماغه,

*هنا باه غلطه الشخص الغامض لانه بيعمل هاله حوالين نفسه,
واى حد بيكون ليه تخيلات معينه وهو السبب فيها بغموضه ده ,

ولما حد بيكتشفه بيلاقه مش زى الصوره اللى كان راسمها علشان كده بيفقد اهتمامه بيه.


فهمت حاجه من اللى قلته,اصلى مش فاهمه هههههه.

*عموما انا مش بحب الشخصيات الغامضه فى حياتى يعنى ممكن اقبلها فى عالم المدونات,
لكن فى تعاملاتى اليوميه والحياتيه لا.

نفس الفكره اللى اتكلمنا عنها امبارح ,
فكرة الخوف من المجهول,ازاى اخلى حد غامض يقرب منى ويتعامل معايا,
ممكن يكون محيط معارفى كتير لكن القريبين منى بختارهم كويس اوى ومش اى حد بيدخل المحيط القريب ده,
بالنسبالى هيكون ده ابو رجل مسلوخه .

بس مش فاهمه انا موضوع لما اعرفه افقد اهتمامى بيه....
يعنى انا لو قربت من حد وحبيت اعرفه
وشغلت بالى انى ادخل العالم بتاعه,
معنى كده انه لمسنى فى حاجه,مش لانه الرجل الغامض بسلامته متخفى بنضاره.

فى ناس غامضين كتير بننفر منهم ,

لكن لو حد حبيت اعرفه يباه لمسنى من جوه,على المستوى الانسانى.ومعتقدش ان لو حد لمسك من جوه هتفقد اهتمامك بيه.


تصدق انا مش فاهمه انا بقول ايه:)

الشعب لابد له من حكومه تشكمه يقول...

سورى نسيت اسلم:) واصبح عليك:)

صباحك سكر زياده ياكريم:)
تاكل ترمس:))

شاب فقرى يقول...

شيما

أولا

صباحك ورد

جنينه ورد أحمر بالكامل :)

اهوه انا بتغاظ بقى من بتوع المناخير دول

لانهم من الاخر بيكون هدفهم المعرفة والفضول وبس وبدون اى حاجة تانية

زى ما قلت لك فى البوست

اهانه مباشرة موجه قاصدة الجرح وبالعمد كمان

العيب مش فى الغامض
العيب فى الناس اللى بتبقى عايزة تدخل العالم بتاعه

كل واحد حر فى خصوصياته وفى عالمه الخاص

يعنى انا مثلا بحب ابقى لوحدى محدش يعرف عنى حاجة

بالنسبة للناس اللى بتقولى عليهم بتحصل كتير واكيد حصلت لك الفين مرة :)
ما هوا لو فى الحياة اليومية بتبقى الشخصية عاملة خط احمر
يعنى لو فى الشغل تلاقيه مش بيتكلم فى اى امور شخصية
لو فى الصداقة تلاقيه مانع جزء معين من حياته عن الكلام فيه

ممكن نخلى حد غامض يتعامل معانا لكن فى حاجة واحدة بس

فى جزء واحد بس

الشغل او الزمالة او حاجات تكون مفيش فيها اختلاط او دخول للمحيط الحياتى الخاص بالبنى ادم

واكتر ما عجبنى الكلمة دى

---------------------

لكن لو حد حبيت اعرفه يباه لمسنى من جوه,على المستوى الانسانى.ومعتقدش ان لو حد لمسك من جوه هتفقد اهتمامك بيه.

--------------------------

لاء مش هفقد اهتمامى بيه طبعا

بس المفروض يكون فى احترام للخصوصيات

الانسان هوا اللى يسمح للطرف التانى يقرب ولا ميقربش

يعرفه كل حاجة ولالاء

ما فى ناس مش كويسة ممكن نحبهم ونحاول نقرب منهم ونفتكر انهم لمسونا

على فكرة معنى كلمة لمس روحى دى كنت قلتها لحد من اسبوع

توارد جميل يا شيما :)

زى الحلم :P

نورتى

وصباحك ورد يارب

شاب فقرى

صوت من مصر يقول...

اظن ان الحنكوالو انا شفتوه ماسك سنجه وبيجرى على الطريق الدائرى " ده كلام حد بيهيس على تليفزيون "
الناس بتزودها موت
موضوع مفيد طبعا بدون ادنى شك

شاب فقرى يقول...

صوت من مصر

اسمه الحنكلولو :)

شكرا لرايك ان الموضوع مفيد :)

نورت المدونة بتعليقك ومرورك :)

شاب فقرى

Angel يقول...


شاب فقري

صباح الخير

عندك حق في ناس كتير كده

بس ممكن نتخلص منهم في لحظة

تقدر تقول ان في ناس منهم بتحس أوي

ولو أنت حسستهم بده


هيبعدوا فوراً


شكرا لوجهة نظرك


Angel love

reem يقول...

صباح الخير ياكريم

ازيك واخبارك ايه

البوست حلو اوى اوى يا كريم

وانا شايفه كلام شيما صح اوى

واحنا عامة مش عندنا ثقافة احترام خصوصية الاخر

لازم نحشر نفسنا ونعرف ايه ورا الشخص دا

ولما نعرف خلاص نهدا ونبعد

حلو اوى شعار قرب تتكهرب دا والله برافو عليك

وحبي لك لن يموت يقول...

الفضول ده طبيعة بشرية
واي كائن تبيعي التبيعي انه يحس بالفضول
تجاه شيء ما يراه غامضاً
أو يحتاج إلى تفسير
ولولا الفضول ده مكناش وصلنا
للي وصلناله ناو

بس فعلن في ناس بتحب تحشر منخيرها
في اللي ملهاش فيه
وبتتدخل زيادة عن اللزوم
ودي حاجة تضايق فعلا

انا بحب الغموض جدا
وبحب الناس الغامضة
بحبهم من بعيد بس :)
ولا افكر في ان استكشفهم
حتى ان كنت هموت واعمل ده D:
الواحد بيحس ان ليهم هيبة كده D:
وانا شايفة ان من حق
كل مواطن ان ينعم بالغموض كيفما يشاء
دون ان يتدخل فيه اي كائن غريب :S

سمعتهم بيقولولك يا "كريم"
فدمـــت بسع ـآدة يا كريم :)

ponpona يقول...

فقط لأن الغموض مغري بالاكتشاف
فالغموض يجعلك تضيق عينين وتحصر مجال الرؤيه في مجال أصغر .. وحقيقة ، أنت بهذا تزيد من قوة بصرك لتري مالم تتمكن من رؤيته مسبقا .. ولا تعاتب أحدا فضوله للاكتشاف ، لكن أن يصل الامر الي كون أحدهم تعدي مرحلة الاكتشاف إلي التطفل .. فهذا لم يعد مرحب به بالمره ولا تنزعج هناك الكثيرييين هكذا .. يتطفلون بفرضية مزعجه اسمها الاقتراب

بيطرية ومش بايدى يقول...

اولا سلام عليكم
ثانيا كل سنة وانت طيب
عيد سعيد رمضان كريم كريسماس خير

بغض البصر انى لسه مقرتش البوست
بس انا قولت اصبح

بيطرية ومش بايدى يقول...

اولا سلام عليكم
ثانيا كل سنة وانت طيب
عيد سعيد رمضان كريم كريسماس خير

بغض البصر انى لسه مقرتش البوست
بس انا قولت اصبح

sookra يقول...

كريم
صباح الحنكولو
انا بقى اعرف الحنكولولو
دا كائن غريب جدا بيطير ويعوم ويمشى على الارض كمان
كل ماهو غامض يستفز الانسان
والا ما كانت كل تلك الاكتشافات لباطن الارض وللسماوات وللكواكب الاخرى
موش المصرى بس اللى الغموض بيستفزه لكن المصرى هو الوحيد اللى بيستفزه غموض واسرار البشر وبيحشر مناخيره فى اللى مالوش فيه
انا فيه شخصين بس اللى استفزنى غموضهم
واحد لانى بحبه وكنت عاوزه اقرب منه موش عشان احتل خصوصياته بس عشان اقرب واعرفه اكتر
والتانى لانى حسيت انه تعبان وحسيت كمان انى ممكن اقدر افيده ولو بحاجه بسيطه وكمان لانى محتاجه شخص مايكونش فضولى اوى ويقتحمنى
انا بقى ياعم موش من الناس اللى عامله هالات حواليا يعنى انا واضحه جدا لدرجه الغموض
هههههههههههههه
تحياتى وصباحك شيكولاته

sookra يقول...

عارف لو تعليقى دا موش اتنشر هااعمل فيك ايه
والله هاجيبلك الحنكولولو عشان ياكلك
ههههههههههه

adel يقول...

÷و انا فاهم قصدك كويس و عيشته فترة طويلة الحقيقة
ولا تعقيم علي كلامك

بس بالنوسبة لحكاية الانسان الاول كان في مصر
دي مش حقيقية لحد دلوقتي يعني
لان انسان الصين ااقدم مننا

وبعدين الحنكلولو ده صديق طفولتي
انت ازاي تكشف سره كده

وبالنوسبة للشرنقة و القفلان ده و الغموض
علي قد ما بتشوف انك صح في الوقت ده علي قد ما هتكتشف بعدين انك خسرت كتير بسببه
وده مش كلام ده عن تجربة و شفتها في ناس كتير
فعرفت ان القاعدة مبتتغيرش
لما بتقفل مش بس بتبعد عن الناس و تخسرهم لا بتخسر حاجات تانية مهمة بس مش هتحس بيها الا بعد فترة

فتاه من الصعيد يقول...

ده شيء عادي في مجتمعنا اللي اصوله ريفيه

وفي الريف الجار بيعرف جاره اكل ايه وشرب ايه ودخل الحمام امتى :D

ولكن مع الوقت بيقلل السلوكيات الريفيه مع الاندماج في الحياه الحديثه

بس مع الاسف بتنتهي معاها سلوكيات تانيه كويسه زي الدفء والود والمراعاه والمشاركه

تحياتي

أحن إلى ذكرى تقسو علىّ يقول...

\\إن الناس لما بتشوف شخص غامض
ربما يكون غامض لحزن أو لجرح قديم بيحاول يداريه
او ربما يكون غامض لانه مريض ومش عايز يقرب من حد
مش عارف
لكن فى ناس كتير بتحاول تقرب منه وتعوده على وجودهم فى حياته
مستهينين بمشاعر الشخص دا
وكإنه مش بنى آدم
وبعدين لما يتزاح كل الغموض دا أو ولو حتى يحسوا إنه بنى آدم زيهم زيه
تلاقى الناس بعدت وإختفت
وكإنهم بيتعمدوا يوجهوا إهانة للشخص دا عن قصد\\
عجبتنى الجزئيه دى قوى يمكن علشان عن تجربه حقيقيه انى طول ما عايشه جوا جو غامض كنت بلاقى ناس كتير بيحاولوا يقربوا منى و بعدين بيبعدوا لسبب من اتنين اما انهم ملوا و مقدروش يستحملوا الغموض اللى انا فيه او انهم عرفوا مشكله بسيطه جدا عنى و بالنسبه لهم المشكله دى لو اتوزعت و اتقسمت على الناس هتبقى كبيره
أنا أحيانا بتجيلى حتة الفضول دى بس مع أصحابى بحب أعرف ايه اللى مزعلهم علشان أحللهم المشكله بس مش علشان انى اكسر حاجز الغموض و لا حاجه و بعدين هم اللى بيكونوا عاوزين يحكوا لى
لى عودة قريبا على ما اتعافى من حالة الصدمه اللى أنا فيها
سلام عليكم

*البت المشمشية *حلوة بس شقية * يقول...

تصدق يا كوكى عندك حق

متوصلش لمرحلة انك تكشف غموض
او تستفز اللى قدامك
لانك ساعتها
مش هتبقا عارف
رد فعلو ايه

wella يقول...

مش عارفة المفروض ارد اقول اية

امممممممممممم

الغموض مغرى فى اى حاجة حتى لو كانت الحاجة دى تافهة قدام كل جوانبها مش ظاهرة وفيها غموض يبقى الناس هتموت عليها


انا مابحبش الناس الغامضة مش عارفة بحس انها بتعمل لنفسها حجم اكبر من حجمها

الواحد لما يبقى صريح وواضح احسن مش يبقى واضح اوى لازم فى حاجات تستخبى

خير الامور الوسط


هية قرب ..تتكهرب دى اغنية جديدة لتامر حسنى ولا اية


مسائوا لوليتا

غير معرف يقول...

انت بنى ادم مغرور قوى
لما انت مستغنى عن الناس بالشكل ده عامل المدونه دى ليه؟
فى الحقيقه انت بتكدب على نفسك ومحتاج قوى وجود الناس حواليك ومش قادر تستغنى عنهم انت وحيد بشكل او باخر
بس اوعى تفتكر ان اسلوبك ده هيقرب الناس ليك بالعكس
وانت الخسران للاسف
لان مفيش حد بيعيش لوحده

سماء يقول...

السلام عليكم


عجبنى اوى اسم الحنكلولو

عايزة اعرف جبتة منين

فسرلى الغموض دة ههههههه

مش بس فى الانسان اللى بيحيطة غموض دا ممكن الانسان يبقا قصادك وعارف عنة كل حاجة وقريب منك كمان تلاقى بينسحب منك او يطلع من حياتك والانسان فية صفات كتيرة مستطلع وملول وساعات يغدر ودى صفة بشعة وفية كمان المخلص ليك مهما عرف عنك من اسرار يعنى القاعدة دية متنطبقش على الغموض

دمت بكل ود

قلم رصاص يقول...


ازيك ياكريم

يارب تكون اولا كده بكل خير

البوست رائع ويحمل افكارا مستنيرة يابني كعادتك بأمانه..ربنا يزيدك يارب

اولا بخصوص الفضول .. ده حاجة فعلا مستهجنه وبتزهق الواحد في عيشته .. لما تحس ان جحد باعت مناخيره مشوار تعرف له اخبار الناس ولو بالعافية .. بجد حاجة مزعجة جدا .. وبكل أسف منتشره في بلدنا المخروسة..وربنا يهدي الجميع

لكن الانسان اللي عامل هاله حوالين نفسه .. انا احترم هذه الهالة او الشرنقه اللي معيش نفسه فيها لو ده بيرجع لأسباب خاصة وخاصة جدا .. زي ما انت قولت .. سواء مرض او طبيعه او او

انما لو السبب راجع للغرور من اجل لفت انتباه الاخرين ليه .. فده بصراحه بيصعب علي جدا .. لأنه معندوش ثقة في نفسه .. وبيدي انطباع عدم قبول من الاخر له.

عموما وجهة نظرك الجميلة وصلت ياكريم

وبخصوص الحنكولو .. فانت ليه مصر تفضحني بأصدقاء الطفولة هههههههههههههههه

دمت بكل خير ياكريم

في امان الله

سلمى يقول...

السلام عليكم
حلوه صرحتك اوى وثقه فى نفسك
والاحلى انى بحس ان دماغ حضرتك نضيفه
تحياتى

واحده من الناس يقول...

من غير لا سلام ولا كلام
كلاكيت اول مره
انا اول مره اجى هنا الاقيك سبت بلاد الدنيا كلها وكل محافظات مصر وطلعت ف صعيد مصر حيوان الحنكلولو ده هو بلدنا ناقصه يعنى ..
ثم مالهم الصعايده
ها
مالهم
والله ابعتلك عيارين ف بوست
ههههههههههههههه
ازيك بجا
بص يا سيدى
وماستك الا انا
الغموض دعه فعلا مشكله
الناس تلاقى حد كده قافل على نفسه تفضل تنها وراه لحد ماتيب قراره وساعة مافهمت اللى فيها ولا تعوز تعرفه تانى
والله كل كلمه انت كتبتها مظبوطه
خاصة احنا الصعايده
بجد والله
بحس اننا بنتعامل كفيران تجارب
اى حد من خارج جمهورية الصعيد يبصلنا كده كأننا كائنات خضرا من المريخ واول مايلاقى اننا بشر عاديين زينا زيه يصدرلنا الطرشه ع الاخر..
وياحبذا لو شخصياتنا منغلقه كده ومش معروف عنها اى معلومات
وقتها تبقا المتعه اغلاكبر الحفر ورانا لحد مانتفهم والاصعب لو اللى عايز يعرفنا ده حد يعز علينا
اول مايعرفنا
يقولك خلاص انكشف السر
ويروح السحر
تمام زى اغنية حبيبى انت يا فيلسوف
بتاعة سعاد حسنى
لما تقولله علمنى علشان لما يزول السحر ماترجعش تقول انا احب دى مش معقول
وكفايه رغى منى بقا
صدعتك
سلامو عليكو

Lady E يقول...

قرب تتكهرب :) ليه محطة السد العالي للكهربا ولا ايه :)

عن الحنكلولو فكتير بيبقى نفسي اقول للناس اللي بيسألوا اسئلة كتير وانتوا مالكووووووو او
it is not your business

واكيد لو عملت كده هيتقال عليا شوية كلام مختار بعناية عندك مثلا دي بتتكبر علينا وكلام تاني كتير
للأسف كتير بيحبوا يتدخلوا في اللي ملهمش فيه بدافع الفضول بس

ثانكيو على اجمد اسرار البشرية يا شاب :)

بمناسبة الفضول بقى انتا بتحب احمد حلمي اوي كده؟ اصلي لما شفت فيلم اسف على الازعاج حسيت ان شاب فقري هو اللي بيمثل مش احمد حلمي

فراشة يقول...

الحنكلولو ...

لا اسمه جميل والله

بص انا مش فضولية قوي يعنى مع ان وانا صغيرة كانت اختى مسمياني فضولي

بس انا مش من النوع اللى بيحب يقتحم حياة الناس لو ححسيت انهم حابين يحيطوا نفسهم بالغموض

عشان انا ساعات ببقى نفسي اعمل زيهم كدا ومعرفش حدح عني حاجة بس انا فضوحية ورغاية فلزمن اتكلم عن نفسي ف كل الناس بتعرفني هههههههه

بس انا بحب اكتشف الاشياء او المواضيع المجهولة اعرف عنها اى حاجة ولو بسيطة لكن الناس بحترم فيها دا

مع انى ساعات بقى عايزة اعرف اللى جواهم لو ناس بحبهم وببقى عايزة اساعدهم

بوست جميل يا كريم

أنصار السنة والسلف الصالح يقول...
أزال أحد مشرفي المدونة هذا التعليق.
آيوشة يقول...

عارف الجزء الاخير عجبنى جدا يمكن قال كلام كان نفسى اقوله ومعرفتش اوصله للاسف انايمكن بشوف موضوع تحطيم الغموض ده كتير وبعد فترة فعلا بتلاقى الناس بعدت عنك علشان كل اللى كانوا عايزين يعرفوه عرفوه احساس وحش بس مش قادرين يفهموا ان الانسان الغامض مش بيقدر يكشف كل اسراره بسهولة ممكن طول حياته محدش قادر يفهمه
مش عارفة الغموض ده شئ كويس ولا وحش بصراحة




ملحوظة على جنب كده اخيييييييييرا عرفت لك اسم هيييييييه اهو حاجة من الغموض راح D:
بوست جميل كالعادة

الفراغ يقول...

يعنى كل الكلام ده ...علشان تقولنا انا الغامض الكبير
واياك حد يقرب ليتكهرب
يعمنا ...ماحدش بيخلى حد يتكلم غصب عنه
واحنا هنا فى المدونات كلنا اسرار وغموض

دا بقى حاجه غير انك باعت رساله لحد معين قريب من محيط حياتك وبتحزره

الا قلى هو مين؟؟؟؟؟؟؟؟؟؟؟؟؟؟
هههههههههههههههههههههه

صوت من مصر يقول...

http://forshewatan.blogspot.com/
ايه رايك تشوف دى
وتشترك معانا بجد
بس ياعم الفقرى
محتاجينك معانا بجد
فكر وشوف وطوف

شاب فقرى يقول...

صوت من مصر

هفكر فى اللى قلته كويس واكيد هرد عليك قريب

:)

نورت

شاب فقرى

=====================
الفراغ

:)

فهمتى اللى فيها :)

نورتى وشرفنى تعليقك

شاب فقرى
===================
آيوشة

الغموض بيكون حلو لما يكون مع الأغراب اللى مش بيقدروا قيمة البنى آدم
وبيكون وحش لما بيكون مع أقرب الناس

ما أنا قايل إسمى من زمان

الله :$

نورتى

شاب فقرى
======================
أنصار السنة والسلف الصالح
مش هرد عليك ولا هعبرك لانك مجنون ومش فاهم حاجة

شاب فقرى
======================
فراشة

:)

مرورك الأجمل

بكره موضوع ان الواحد يبقى رغاى وفحى دى
بعتبرها كارثة

لانى عارف نتيجتها كويس

نورتى

شاب فقرى
======================
Lady E
بالنسبة لرأيك فى الشعار

فالكهربا بتموت انما احنا لاء:)

هوا فعلا بحب حلمى

والله بيبقى نفسى اقول الرد دا للناس
بس متاكد انى لو قلته كدا

هيقولوا بيتكبر

فبقوله وبعتبر نفسى غلس وبتكبر :D
هههههههههههههههههههه

نورتى
شاب فقرى
======================
واحدة من الناس

أول زيارة

ومش هتكون الأخيرة

أصل أهل الصعيد أجدع ناس ومش بيخافوا من الأساطير والرغى الفاضى دا

فلو عرفوا ان فى سلعوة

هيطلعوا بقلب راجل من حديد يموتوها ويرموها للديابه :)

انا اعرف الصعايدة كويس اوى اوى اوى :)

عجبنى اوى كلامك والله

وبالذات اغنية سعاد حسنى والجملة اللى فيها دى

بتقول حاجة جميلة اوى
ان البعض بيحب حد عشان خاطر يقرب منه ويكمشفه ويسيبه ويجرحه مش اكتر

انكشف السر
ويروح السحر

نورتى

ويارب تزورينا تانى

وخالص احترامى للصعايدة احسن ناس فى البلد دى :)

شاب فقرى
================

شاب فقرى يقول...

سلمى
حلو موضوع دماغ حضرتى نضيفة دى :))

نورتى

شاب فقرى
====================
قلم رصاص

اخويا حبيبى :)

انا لما بحس كدا

بعور اللى قدامى فى منخيره :))

اول تعليق يقولى انا بحترم الغموض والشرنقة دى

بجد اسعدتنى :)

لازم كل شىء ينكشف ويبان يا صديقى :)

هههههههههههههههههههههه

نورت والله

شاب فقرى

=================
تمر حنه

صباح الورد

================
سماء

سيبى الحنكلولو فى حاله :)

مع انى مفهمتش وبطالب بتوضيح

بس نورتى :)

واسعدنى متابعتك :)

شاب فقرى
================
غير معرف باشا او هانم

انا مغرور

يخص حضرتك فى ايه مش فاهم ؟؟؟
يعنى مغرور أو بمشى عالحيط \

إنته مالك ؟؟؟؟

وبعدين سبب فتحى المدونة برده ميخصكش
أنا مجيتش جبت حضرتك من بيتكوا وقلت لك إعرفنى أو إقرالى
كنت تقدر تقفل الصفحة ومتسيبش التعليق دا

وسواء أحتاج الناس أو مش أحتاجهم برده حاجة تخصنى

وانا متأكد كويس أوى إنى عمرى ما بخسر

يبقى الأحسن تخليك فى حالك
وعايز تعلق يبقى تعلق زى الناس المحترمين بإسمك :)

===================
wella
:)

لاء يا ويلا

مش كدا

مش بيمنح لنفسه حجم اكبر من حجمه ولا حاجة

انتى لو فكرتى هتلاقى ان الناس هى اللى بتدى له حجم اكبر من حجمه

هوا كل اللى بيعمله بيخليه فى حاله

انا عن نفسى صريح جدا

بس مع الناس القريبين منى بس

مش لازم اروح اكلم كل الناس عشان ابقى صريح

الصراحة دى حاجة

والغموض اللى انا قلته حاجة تانية

على فكرة انا مبحبش تامر حسنى :(

دا شعار خاص بيه :$

نورتى :)

تحياتى يالوليتا

شاب فقرى
===============
البت المشمشية حلوة بس شقية :)

اكيد عندى حق يا شيمو :))

نورتى والله :)

شاب فقرى

====================

شاب فقرى يقول...

أحن إلى ذكرى تقسو على

عايز أقولك حاجة واحدة

لو قعدتى خمس دقايق

وفكرتى

هتلاقى ان مفيش حاجة ولا بنى ادم خلقه ربنا يستاهل زعلك والله

حاولى تفوقى وتنسى اللى بتمرى بيه وتبقى احسن

ودا رجاء :$

شاب فقرى

شاب فقرى يقول...

فتاة من الصعيد

انا بحب الريف اوى اوى اوى

بس دى المشكلة فى الريف

ان الواحد سيرته بتكون على كل لسان

مش عايز اقولك لما بنزل البلد بنبهر ازاى

هههههههههههههههههه

نورتى

شاب فقرى
==================
عادل

على طول كل اما تدخل

بتعمل أزعرينا

ياعم انا مقتنع ببلدى ولو التاريخ اثبت ان مصر مكانتش مهد الحضارة

انا واثق من كدا

لان انسان الصين مكانش انسان

انما انسان مصر كان انسان بجد يعرف العلم والزراعة وكل حاجة :)

صباحه ورد

اقرا تانى يا عادل

انته مش وصلت للمعنى :)
:P

نورت يا جميل

شاب فقرى

=====================

سكرة

يخرب بيت وضوحك :)

هههههههههههههههههههههههه

كل دا تعليق

ووصف للحنكلولو :)

حلوة والله

نورتى

شاب فقرى
=====================
بيطرية ومش بإيدى

أهلا وصهلا

صباح الورد

نورتى

شاب فقرى
====================
ponpona

الوحيدة اللى بتفهم المغزى من اللى بكتبه

طبعا فى غيرك

بس بيفهموا متاخر

هوا فعلا الحاجة اللى بتخلينا نركز اوى لما بنكون فى وسط الظلام ومش شايفين الطرف التانى
فالغموض بالمثل كدا

لكن أن يصل الامر الي كون أحدهم تعدي مرحلة الاكتشاف إلي التطفل .. فهذا لم يعد مرحب به بالمره ولا تنزعج هناك الكثيرييين هكذا .. يتطفلون بفرضية مزعجه اسمها الاقتراب

عندك حق اوى اوى اوى اوى

شاب فقرى
==================

وحبى لك لن يموت

عجبنى اوى الجملة دى

لولال الفضول مكناش وصلنا للى وصلنا له ناو

عجبنى المقطع كله

لانه فصحى على عامية على فرانكو

:)

هههههههههههههههه

هما فعلا بيكون ليهم هيبة

بس جميل ان الواحد يمسك نفسه عن حاجة نفسه فيها وبالذات يمنع فضوله


كسرتى حقى فى الغموض

عرفتى اسمى

نورتى :)

دمتى بكل سعادة

بتكتبيها حلوة والله

شكرا للمرور

شاب فقرى
==================
reem

نص اسمى التانى :)

صباح النور انا الحمد لله بخير

هوا انا كمان عجبنى كمان شيما اوى


والصح ان كل واحد يخليه فى حاله

دمتى بكل ود

شاب فقرى

========================
angel
مينفعش نطرد حد من حياتنا كدا
لازم نراعى مشاعر الناس كلها

ونحترمهم بما فيه الكفاية

:)

نورتى

شكرا لتواجدك

شاب فقرى

OlIvE يقول...

//
لكن اللى بيحزننى فى موضوع الغموض دا
إن الناس لما بتشوف شخص غامض
ربما يكون غامض لحزن أو لجرح قديم بيحاول يداريه
او ربما يكون غامض لانه مريض ومش عايز يقرب من حد
مش عارف
لكن فى ناس كتير بتحاول تقرب منه وتعوده على وجودهم فى حياته
مستهينين بمشاعر الشخص دا
وكإنه مش بنى آدم
وبعدين لما يتزاح كل الغموض دا أو ولو حتى يحسوا إنه بنى آدم زيهم زيه
تلاقى الناس بعدت وإختفت
وكإنهم بيتعمدوا يوجهوا إهانة للشخص دا عن قصد
وكأنهم بيوجهوا رسالة إننا حطمنا عالمك
وإنتهى بك الحال أن تصبح لا شىء
يمكن هما مبيعملوش كدا بقصد
ولا وهما حاسين انهم بيجرحوه
لكن للأسف الحماس الخاص بيهم بيكون إنتهى
وبيعود الشخص دا لغموض ألعن من الأول ألف مرة
وبيبدأ يعمل حول نفسه بوابات وأسوار عالية
و حول شخصيته
ومش بيسمح لأى حد يدخل من أى باب
عارفين
فى تشبيه قريته من سنين
مش فاكر فين بالظبط
//
أنا اخدت الجزئيه دى كلها
لان بالظبط بالظبط دا كان بيحصل معايا
وعلشان كدا مش هقول بعدت عن كل الناس بس بطلت ابين انى بفكر فى حاجة ولا ابين ان فى حاجة علشان محسش بالهفه الناس وبعد كدا تروح لحالها زى ما قولت لان دى حاجة بتتعب اوى

بجد كلامك فى الجزئيه دى كأنك بتحكى حاجات حصلت بالظبط

بجد موضوعك دا 10/10

سلمت يمينك

سلامى

أحن إلى ذكرى تقسو علىّ يقول...

السلام عليكم و رحمة الله و بركاته
ايه ده مش مصدقه عنيا رادد عليا انا لوحدى فى كومنت لوحده و الله هونت عليا ان زرار شيفت باظ الله يرحمه
انا الحمد لله تعافيت من الصدمه و قررت أقوم و اكمل و ادرس كل اللى انا عاوزاه بس للاسف الحاجات اللى عاوزه ادرسها مش هتنفع غير بعد ما اخلص كليتى و اشتغل لان اهلى هيمانعوا
ادعيلى يا كريم

wella يقول...

اممممممم

شعار خاص بيك

ومين قال ان فية حد اصلا بيحب تامر حسنى

ماحدش بيحبة هوة بس بيحبة نفسة نفسى ااقابل حد يقولى انا بحب تامر حسنى
غير طبعا الاروجزات اللى بيجبيهم على التلفزيون



بص ياسيدى هستئذنك استلف الشعار بتاعك عشان عجبنى ودخل دماغى

من هنا ورايح ويلا قرب تتكهرب

حلو صح