الجمعة، 19 ديسمبر، 2014

لا تناقض جنتك

مش شايف جديد الصراحة :D
مازالوا : أيام سودا وبهايم Every where :D

الناس لسه زي ما هي 

وانا لسه بسأل نفسي 
إمبارح جه فى بالي الناس اللى بتكره كذا 
قلت انا ضد موقفهم المتخلف دا ازاى اسيبهم يغلطوا فى قيمة كبيرة او فى شخص بيطلع فن ما بطريقته وباسلوبه 
وبعدين قلت ثواني 
طالما هما بيمقتوه كدا 
وانا برده بتخنق وبتدايق وبكره بعض مغنيين المهرجانات ( بعض وليس كل ) اللى بيهبلوا وكل مزيكتهم هب ودب وترللي ومفيش كلمة ولا ايقاع تحس انه هبل 
طيب ما دا ممكن يخليني زيهم 
عزيزتي انا ازاى هحلم بأرض فيها تسامح وحرية وطيبة وحب وحاجات حلوة من اللى بنكتبها علي لوحة ورق ونعلقها فى أودتنا وأنا من جوايا فى ولو حتي نقطة من الكره لشخص أو فكرة 
إزاي هحلم بجنة أنا مستاهلهاش وبخالف أبسط ومبادئها ؟
إزاي هقدر أبطل أكره ولاد الوسخة ؟؟؟
أنا عندي قدرة عالتعامل مع أي حد 
لكن خلينا نيجي لنقطة الحب 
هل أنا بحب العالم ولاد الوسخة دول ؟
أنا بناقض جنتي :(

ضمي دا يا عزيزتي لمجموعة تناقضاتي اللى مش هيبقي لها تفسير
***
أنا بحب مستر آند ميس سميث 
عارفة المزيكا اللى رقصوا عليها فى أول الفيلم فى أول يوم إتعرفوا فيه علي بعض ؟
أيوا هي دي 
ما تيجي نشوفها إيه ونرقص عليها :D
(( وحشتيني ))
هبقي أجيبلك وردة لشعرك :)
فكريني :)
لما نبقى نتقابل بقي :D
 ***
بدأت أفكر وأصدق فى إن طاقات جوانا بتتحرك تجاه اللى بنحبهم , يمكن بتطمنهم ويمكن بتعرفهم فينا ايه 
زي بالظبط ما كل ليلة بعرف كل الناس فيها ايه 
أكيد حضرتك بتعرفي برده 
أكيد مش هيفرق لا التردد ولا الهوائي ولا الأنتينا ولا الحاجات الغريبة دي كلها :D
أكيد مش هيوصل غير بقوة الحاجات اللى بتدوم 
أقولك 
إستقبلي أنتي بس :)
***
النهارده حصل موقف عبد الله وأمجد
هبقى أحكي عليهم بكره 
تصبحوا وتصبحي :) علي خير 
 

هناك تعليق واحد:

شفّاف يقول...

صباحك طيبة وهدوء وطمأنينة (أو مساءك)
أنا كنت برسل أفكار نحو الذين أحبهم أو الذين لا أعجبهم
في التأمل الإسترخائي العميق
كلها سلام وخير
بالصحة وراح البال
بس خفت:)
أخاف يموت هذا الشخص أو يصاب بمكروه
ويتزعزع إيماني بالله
بس في مرة قلت في نفسي
إ عقل وتوكل
بمعنى إفعل الذي تحبه وسواء حدث المرغوب أو لم يحدث
لسبب ما
فعلى الأقل رميت حجر في البركة ولازم تصنع موجات
بس علي أن أتصالح مع غلظة الشخص معي إذا كنت أرسلت له مشاعر طيبة
أعتقد هذا المهم التصالح مع عدم حدوث الشيء إلا بالعكس
محبة