السبت، 5 فبراير 2011

مش هنسيب الميدان وهنكمل المشوار


فى الأول قالوا علينا أغبياء ومفيش ثورة بيتحدد ميعادها وإن الكلام اللى بنعمله دا مش هينفع وإننا هناخد على دماغنا والأمن هيدينا بالجزمة ونرجع تانى بيوتنا
وبعدين بعد يوم الجمعة 28 يناير : قالوا علينا ثوار ورجالة بصحيح وإن اللى عملناه دا يعتبر إنجاز قوى جدا وإننا بجد رجالة
وبعدين لما ظهر التنظيم فى دخول ميدان التحرير والتفتيش وإظهار البطاقة الشخصية والبيات فى الميدان والمستشفى الميدانى : قالك دول معاهم أجندات أجنبية وخونة وعملاء
وبعدين لما البلطجية بهدلونا وبهدلوا المتظاهرين : قالوا لاء مينفعش كدا ... النظام فعلا فاسد ولابد من إستئصال الورم بس كفاية عليكم لحد كدا وسيبوا الشرعية والدستورية وسيبوا النظام فى حاله وروحوا بقى كفاية كدا
وكل الحاجات دى عصبتنى وحرقت دمى :
أولا : لما إنته شايف إن مفيش ثورة ينفع يتحدد ميعادها ... معملتش ليه حضرتك تحرك أو ثورة أو حتى مظاهرة على غير ميعاد ... أبسط حاجة كان هيتقبض عليك وتتهم بالخيانة العظمى والعمالة ...إنما اللى حصل هى ثورة تحرك فيها كل فئات الشعب ....
ثانيا : لما إنته شايفهم رجالة كدا وثوار منزلتش معاهم ليه ؟؟؟
ثالثا : إتهام الأجندات الفاكس وشبح الأخوان اللى النظام بيلعب بيه ... تفتكر الناس هتبلع الظعم بالسهولة دى ... ما كل الناس نازلة الميدان ... كل اللى أعرفهم مفيش فيهم ولا واحد أخوانى وحتى اللى ماسك الميدان هما الشباب مش تقولى أخوان وبتنجان ... وعلى فكرة لو الثورة إنطفت نارها ... أبسط حاجة هيعملها النظام هيوجه السكينه تجاه الأخوان ويتهمهم بالعمالة ويسجنهم ويخوف بيهم الغرب والدول الأجنبية اللى بتعادى نظام مبارك وهيبقوا عبرة لبقية فئات الشعب
ثالثا : شرعية مين ودستورية مين يا قمر الدين .... فاكر لما حاولوا يغيروا الدستور كان فى إستفتاء نزيه .؟؟؟ ولا أصلا المجلس دا إتعمل فى إنتخابات نزيهة ؟؟؟ متجيش تطالب بشرعية فى وسط نظام فاسد من أوله لأخره
طيب لو إحنا كنا سمعنا الخطاب الأول وقولنا آمين ولازم نسمع كلام الريس ... هل ياترى الحكومة كانت إتغيرت أصلا ؟؟؟
هل ياترى كان فى حد عبرنا بعدها ؟
كان زمان البلد لسه تحت حكومة نظيف أو الحكومة الجديدة والحزب الوطنى قوى ومسيطر عالبلد وعلى كل حاجة واللى بيسرق بيسرق واللى بينهب بينهب وكان زمان الناس دى كلها إتلمت فى المعتقلات
بعد كل خطاب بيطلع فى تصريحات أهم وكلام من النظام وقرارات فاكرها منحة على ناس غلابة ... فى حين إن دى أصلا حقوق الغلابة
إهمدوا بقى وبطلوا شعار إخلاء الميدان ووحدوا الصف
وبعدين اللى بيقولى دا خراب لمصر .... هوا فى خراب أكتر من اللى وصلنا له ؟؟؟ فى دم راح أكتر من اللى راح واللى إتدفن فى الدويقة واللى غرق فى العبارة واللى إتحرق فى قطر واللى مات فى قسم شرطة من التعذيب أو إتسرقت لقمة عيشه منه .... هوا فى خراب أو عار أكثر من تصدير الغاز ؟؟؟ وهوا فى عار أكثر من إطلاق الرصاص الحى على المتظاهرين والبلطجية يقطعوا فيهم ؟؟؟؟
وهوا الناس اللى بتتهمنا بالعمالة والخيانة والأجندات والناس اللى شغالة باليومية ... عاجبها حالها وحال البلد ؟؟؟ هوا مين اللى رماهم فى الفقر ؟؟؟
هوا مش كفاية اللى شوفتوه من كروت الإرهاب من النظام : مرة بالشرطة السرية والمباحث والمساعدين وهما بيسرقوا البيوت والجيش قبض عليهم ومرة تانية من بلطجية فى التحرير ومرة تالتة من المكالمات الزائفة عالتلفزيون المصرى ووساخة الإعلام ...
إعرفوا قيمة حريتكم وإعرفوا تمنها .... إخلاء الميدان والتنازل فجأة يعتبر تصرف غبى .... كلنا هنكمل وكلنا هنفضل ننزل
وسمعت الفترة اللى فاتت ناس بتقول شباب 25 يناير بطلوا ينزلوا ووافقوا على اللى بيانات الريس
شباب مين يا قمر الدين ..... دا شعب ... مفيش حد من حقه يقول وافقنا عالمطالب غير الشعب اللى يرضى بيها بشكل كامل ... ولنفترض إن البرادعى أو الإخوان أو حتى الوفد أو سته برميل زى ما بحب أسميهم قالوا إحنا وافقنا على إنجازات النظام ... هل دا خلاص هيخلى الناس تفوق وتقول بابا مبارك حبيبنا ونمشى وراه ؟؟؟؟
الناس اللى نازلة دى من كل فئات الشعب لاهى فى تيار ولا فى حزب ولا حتى فى جماعة ... واللى هيحاول يصنفهم تحت رابطة أو حاجة يبقى يتكلم ويقول مصريين .... فقط
الناس اللى فى الميدان واللى بيحاولوا يوهموكوا إن عددهم بيقل وإنهم خلاص زهقوا ... الناس دى وقفت فى المكان دا بدمها ... راح منهم ومننا جرحى وشهدا وناس إتكسرت على إيدين البلطجية ونازل إتبهدلت على إيد الأمن .... مش عايز حد يحلم ويقول محدش هيعبرهم ...
النظام بيتهاوى ويتداعى وإنما النصر صبر ساعة ... ولا تنسوا إن الساعات الأكثر ظلمة هى التى تسبق الفجر
وحدوا الصفوف .... كونوا معا بصوت واحد ورأى واحد وقوة واحدة
وإحنا مكملين وثابتين على موقفنا... ومش هنسيب الميدان وهنكمل المشوار .... كلنا على قلب راجل واحد
قلب مصرى
شاب فقرى

الأخوة المحترمين اللى مش عاجبهم الكلام يتفضلوا يشوفوا المطالب الدستورية للشعب ممكنة ولا لاء ويشوف السيناريوهات المطروحة فى شرح مبسط هنا ....إضغط ربنا يهديك وتعقل وتركز كدا ...
وأنا جايبلكم الفيديو هنا كمان ...





أما اللى مش عاجبهم الكلام خالص : فيحسم المشكلة بيننا إنتخابات تشريعية أو رئاسية نزيهة أو إستفتاء نزيه وقاضى على كل صندوق .... غير كدا مفيش غير الإحترام والنقاش الجاد المحترم.... وشكرا

هناك 4 تعليقات:

غير معرف يقول...

الاوضاع عندنا مستقره والحياه لونها بمبى والناس عايشه حياتها وكأن مفيش حاجة
بجد انا حزينة لانى بعيده عن موقع الاحداث
سواء الزقازيق او القاهره
طبعا رافضين تماما نزولى سواء اشتراك فى مظاهره او تغطية للجرنال
على رغم ان والدتى واخواتى كلمهم نزلوا :(:( الزقازيق فى 25 جمعه الغضب
فرحاانه جدا بشبابنا
كانو بيسألونى ليه النخوه والرجوله اتعدمت كنت اقول اصل الرجاله ماتت فى 73 لكن بجد لسا عندنا شباب عندنا عزيمة عندنا وطنيه والله بنحنى لهم احترام وتقدير
وبشكر مباااارك على اللى عمله لانه اثبتلنا اننا لسه رجال حقيقيين بعد ان كدنا ننسى اننا مصريين
عندى كلام كتير بس بجد مليش نفس اكتب اى حاجة
ومبقولش غير ياااااارب

سمسم

Tears يقول...

متفقة معاك جدا و فخورة بيك

ربنا يكتر من امثال عقلك المحترم ده

غير معرف يقول...

انا حقول لكم انتم ايه انتم رجالة وشجعان وشبان عملتم الي متعملش بس في كلاب خانوكم وناس ممسوح مخها بالاعلام المصري القوي الخاين الاداء الاقوى في ايد النظام الي اقنعت مثقفين مغيببين وغلابة مش فاهمين واقنعوهم ان سقوط النظام يسقط الدولة وكتر النح واللح اقنع وبرمج دماغات فاضية كتير ودلوقت التوجيه الاعلامي الي ميقنعش طفل اقنع رجالة اغبيا بانكم قاعدين علشان مدفوع لكم وعملا واجانب وامريكان ويهود وكل الفيلم عن الاجندات وعن تدريب ناس تسيس الشباب كاننا كنا شعب مرتاح ومدلع وجم ضحكوا علينا كل الحمقى دول ومظاهرتهم الغبية اضعفوا الحركة الثورية وخانوها واساوا اليها وقوا شوكة النظام وعطوه مبرر يقدر بيه يقعد ويمدد كمان ويقدر يطير رؤساء الشباب العظماء اثبتوا مكانكم اوعوا ترجعوا البيوت لو عملتم كده حيطير روسكم ويتهمكم بالخيانة والاخوانجية ويخلص على كل اعداءه ويلم كل من ظهر في التليفزيون ضده ويسوى حساباته وينظف وراه كل ده وبعدين ممكن يمشي بعد ما يسيب اصحابة الي عينهم نواب في برلمان جديد من صنعه ونائب صديق قديم له علشان ميتحاكمش وده التفكير المتفائل على فكرة
اما التفكير الاخر انه بعد ما يقضي عليكم ويصفي حساباته معكم يقعد ويستمر ويبقى اي واحد يفتح بقه وطبعا مفيش حد ساعتها حيقدر يقول له تقصد ايه ولو مش مصدقني شوف وعوده في الثلاثين سنة الماضية واسمع مني بعضها
1- اول ما تولى الحكم قال: لن اجدد لفترة اخرى
2- عندما جدد قال : لقد جددت بعد الحاج الشعب وخوفا على مصر
وهي الفترة الاخيرة حسب الدستور
3- عدل الدستور وازال المادة التي كانت تقول بان رئيس الجمهوريه لديه فترتين متتاليتين فقط للحكم
ووضع بدلا فترات متتالية ليكون عدد المرات مفتوحة
4- ومدد ثالثا ثم ازال مادة الدستور التي تقول انه ليس لرئيس الجمهورية ان ينقل الحكم ويورثه لابنه
وقال انه لن يورث الحكم وانما التعديلات من رجال القانون وليس منه وآهل ابنه في مجلش الشعب واظهره كرجل سياسة تأهيلا لان يحكم بدلا منه
فاياكم وان تصدقوه ان كانت الناس جائعة الان فهذا اقل بكثير مما سيرونه لو تخليتوا عن موقفكم ربنا معكم وسادعو لكم واليوم ساقرا عدية ياسين على النظام ربنا معكم لو كنت في مصر كنت جيت لكم لكن سادعو لكم يا رجالة مصر

حَـبآيـۃْ.بـטּـدۉڷ يقول...

يـــآه .. ويـــآه كبيره كمان ..

قد كده في نـآس كده ..

فخـوره جداً جداً إن فيـه ناس بتفكر كده ومن بلدي .. :)

ربنـآ يوفقك يـآرب ..

ربنـآ يهونهـآ ويكمل المشوار على خير ..

ربنـآ معـآك .. :)