الجمعة، 27 نوفمبر، 2009

ما بلاش نتكلم بصراحة ...


السلام عليكم جميعا
عيد سعيد :)
وهابى خروف
وهابى عجل
وكل الحاجات الحلوة دى
فى فى مخى ألف حوار عايز أتكلم فيهم
فبدل ما أنزل بكام بوست والناس تقلق وتقرا ومتبقاش عارفة تعلق فين ولا فين
فأنا هكتب كله ورا بعضه
العنوان العام (( ما بلاش نتكلم بصراحة ...))
ليه ؟؟؟
(( لأنى هبطل صراحة وهتكلم ببجاحة :D ))
ليه ؟؟؟
(( لأنى مبحبش أكدب ولا أذوق الكلام ولا بحب أعمل كدا بالرغم من براعتى فى الموضوع دا ))

نبدأ على بركة الله

السفر

طبعا والحمد لله يوم الوقفة كان يوم مشحون وحافل بألف حوار ومش عارف طلعوا لى منين
والمشكلة الأكبر بالنسبة لى
إنى عايز أعيد بدقنى دى
وفى نفس الوقت مش عايز أعيد بيها
والحلاق زحمة
وكمان لازم أسافر بعد الفطار
ميت حاجة فى دماغى
الحمد لله اتصرفت ومش حلقتها برده
لقيت شكلى عامل زى اللى مكتئب و مش طايق نفسه
قصرتها شوية وظبطت المنظر وقلت طير يا كرمللة
خرجت من القاهرة ووصلت البلد بليل والحمد لله
كالعادة أول بيت بدخله بيت عمى
بالرغم من إنهم كانوا مدايقين لأنى بقالى كتير مروحتش لكن رحبوا بيه وأنا شوية وخلعت
ولفت نظرى أول ما وصلت البلد عربية قصب برا
روحت إشتريت قصب بسعر أنا مكنتش ممكن أتخيل إنى أدفعه فى شوية قصب
بس الحمد لله
كان زى السكر
وشوية ولفينا فى البلد مع صحاب إبن عمى
وإتكلمنا فى كل حاجة حتى الجزائر ومصر وعبد الناصر وكلام كتير أوى
وروحت مع إبن عمى التانى
وطلعت الفلاشة بتاعتى
وبدأت حفلة سينما ل saw 6
طبعا فيلم رهيب وعجبتنى النهاية أوى أوى أوى
كانت الساعة سته الصبح
خرجت أتمشى مع نفسى وألف فى البلد وطلعت عالغيطان ولفيت فيها شوية
وبعدين روحت تانى
حسيت إنى كنت بحرق فى أعصابى
بتلف فيها أكبر قدر ممكن من التلف عشان أقدر أناملى ساعة وأقدر أصحى أصلى العيد


رجال ... لا نعرف المستحيل
روحنا العيد
زى ما كانوا زمان بيقولوا لنا هتروحوا العيد يا ولاد ؟؟؟ ويضحكوا علينا وإحنا نقول ببراءة الأطفال آه :D
هوا دا اللى حصل على ما صحيت وسحبت نص عود قصب أفطر بيه
بس ملحقتش
على ما جهزوا اللبن وفطرنا والحمد لله بدأ اليوم بزوبعة من أولاد عمى زى الفل
قلق قلق قلق
قلق ممتع ولذيذ ميعرفش معناه أى حد فى الدنيا غيرى
تقريبا كنت نمت ساعة
بس قدرت بكفاءة إنى أخرج نفسى من أى مود زى ما أنا متعود :)
والله يا كريم يابنى برافو عليك
وشوية وعرفت بالصدفة أن عمتى اللى فى البلد اللى جمبنا
هيدبحوا النهارده عجل محترم :)
طبعا ركبنا نمر العربية ولبسنا الحمار وركبنا العربية وشرخنا
ويا سلام بقى اللى يشوفنى وأنا راكب العربية دى والتناكة اللى بكون فيها
تقولش راكب دبابة أو هامر
المهم
وصلنا ونزلت وشوفت الضحية
وشوية وقلعت بقى
والشاب التنك اللى كان راكب العربية دا تقدروا تقولوا إتقلب 180 درجة بقى حاجة تانية
بقى الواد كوكو صبى الجزار
طبعا لأننا منعرفش الجزارين وعاملين مقاطعة وبنشجع الإنتاج المحلى
فمكانش فى غيرنا يقوم بالمهمة دى
أنا وعمى وجوز عمتى
طبعا إحنا نقدر نجيب جزار فى دقيقة
ونخلص نفسنا ونقف نتفرج زى البهوات والشاب التنك اللى كان راكب العربية من شوية
بس مينفعش
مبدأ العمل وإن الواحد يتعب عشان يحس بحلاوة الشىء
وكمان تعبنا دا بيحسسنا براحة غريبة فى الآخر
طبعا مش أهل بلدنا كلهم كدا ولا عيلتنا كلها كدا
قلة قليلة زى حالاتى كدا
بيتهيألى لو مصر قررت تطلق قمر صناعى جديد
ياريت توكللنا المهمة دى :D
وربنا ساعتها هسميه (( كرمللة 707)) لانى بحب الرقم دا أوى :$
طبعا فهمتوا مبدأنا فى العمل و دا أهم حاجة
المهم بدأ الضرب
وفين يوجعك
طبعا قلعت هدومى وبقى منظرى الواد كوكو صبى الجزار
وبقيت طول الوقت ماسك الساتور أو السكينه الرهيبة بتاعت الجزار اللى لما تبص لها من بعيد بس
تحس إنها هتعورك غلاسة كدا :D
خلصنا متأخر
والحمد لله تمت المهمة على أكمل وجه
دعواتكم بقى ربنا يتقبل مننا :)

***


لعنة كرمللة


النهارده كنت فى بيت خطيبتى
لاء لاء لاء
هى مش خطيبتى
هى واحدة العيلة بتشجع إننا أخطبها
لأنها طيبة وبنت حلال ومؤدبة وفتاة جامعية محترمة ومليون سبب
بس طبعا لأن العيلة عندنا مش مافيا إيطالية
فأنا بلعب دور آل باتشينو وبحرق دم الجميع ولا بخطب ولا بتكلم ولا بنيل
لأنى ببساطة مشكلتى معاها حاجة واحدة بس
مش حاسس بيها
ولا قادر أحس بيها ولا أحس بغيرها
بقيت حاسس إن قلبى ببساطة عامل زى مقبرة من مقابر الفراعنة
عليها لعنة الفراعنة
اللى يفكر يفتحها يشيل اللعنة بقى ويتعامل
أو يموت على بابها زى ما سبقه غيره كتير
عالعموم بغض النظر عن أى شىء
فأنا مبسوط وراضى بكدا والحياة حلوة وعليها سكر كمان
المشكلة كلها إن الواحد هوائى شوية
أو متقلب زى موج البحر
وكل واحد بقى يفهمها بطريقته
طبعا مش غدر ولا خيانة
المشكلة إن الواحد أحيانا بتمر عليه لحظات بيحس بتعاسة وتكون (( لحظة وعدت زى سنين ))
فى بوست كتبته عن الحالة دى
مش وقته
المشكلة مش فى انى مبحسش بالناس وبس
غير كدا بقى
إن القلب مش زى حالتى المزاجية
يعنى ممكن اكون حزين جدا دلوقتى
وفى خلال دقيقة تلاقينى عرفت إزاى أبقى مبسوط من قلبى
ياريت قلبى يكون كدا وأعرف أفوقه وأحب ولو لدقيقة واحدة وبعدها أموت
بس طبعا اتمنى تكون الدقيقة دى قبل ما أموت

وفى آخر تلاتين ثانية أنطق الشهادة
أقولكم
الصفقة مش مربحة :D
أنا هلغيها
No Deal
إنتوا شايفنى عاقل ولا شايفينى مجنون

مش فاكر ليه جاى فى بالى أوى الموقف بتاع فيلم اسف عالازعاج
مش عايز شاب لطيف ظريف وأمور يطلع يقولى إنته هتعيش دور احمد حلمى ياعم
هرد عليه وأقوله أنا شايف نفسى أحسن منه تقريبا ألفين مرة
سواء هوا أو غيره
لأنى واثق فى نفسى وعندى إيمان بربنا إنه مخلقش غيرى ولا زيى بالمنظر دا
والكلام دا ينطبق على كل شخصية تقرأ هذا الكلام
المهم
الموقف فى الفيلم لما واقف قدام أمه وأبوه وبيقولهم إنتوا شايفينى عاقل ولا شايفينى مجنون
والكلمة اللى قالها للدكتور
ساعة ما قاله إنته بتعاملنى على أساس إنى مجنون
تصرفاتك بايخة وحركاتك سخيفة ومكشوفة
مش عارف ليه بفكر فى الكلام دا


موحشتنيش

تمر سنين وأعياد
وتبدأ المرحلة الأخيرة فى النسيان
ياترى هيبقى فى مراحل تانية
مش عارف ليه مش حاسس النهارده إنك مش واحشنى
مش عشان أى سبب غير
إنى ببساطة بدأت أفكر بالعقل أوى
موحشتنيش إنته عارف إنى مش بكدب
يمكن فكرت فيك
بس مبقتش توحشنى زى زمان
يمكن عشان بعيد عنى
يلا
مش هقولك غير
رحمة الله عليك يا أبى
أكيد كتير أوى بحتاجلك
وأكيد أكتر بحب أتكلم معاك
والأكتر إنى عارف إنته بتحبنى إزاى وأنته غالى عندى إزاى
بس حاليا
أنا بالقوة الكافية إنى أكمل الحياة من غيرك :)
نلتقى فى الدار الآخرة بعون الله :)

صاحبى

مش عارف ليه النهارده حسيت بشعور غريب كنت تقريبا نسيت إحساسى بيه من زمان
شعور بالصداقة من حد كويس وبيحبنى بجد
بجد أنا سعيد
يمكن الفرق بينى وبينك عشرين سنة
لكن إحنا تقريبا
نسخة جينيه واحدة
ودا
لأنك
عمى :D
مش عارف ليه كنت حاسس إننا لازم نروح نقعد على قهوة
أو نقعد نتكلم براحتنا شوية زى زمان
وحشنى أكلمك
بس اليوم كان مشحون وزى ال.... فل :@
هتتعوض يا معلم

خالص تحياتى لكم وإحترامى الشامل المهندم المهندس الأمور الحليوة الكامل المكتمل المكمل :)
هابى خروووووووووووووووووووووووووووف
وبالنسبة لتعليقات التبريكات والتهنئات بخصوص العيد ليه رد واحد بس للجميع
(( كل عام وأنتم إلى الله أقرب))
شاب فقرى


هناك 17 تعليقًا:

جارة القمر يقول...

هو انت ليه مش بتحب حد يعرف عنك حاجه ؟؟؟

عاجبنى انك بتعمل حاجات كتير مش بتخلى عندك وقت فاضى ودا شئ نفسى اعمله

مممممممم اه انت مجنون

يارب دايما مبسوط

ريمان يقول...

انا توهت منك


انا مش عارفه اركز على اى ناحيه من النواحى اللى اكلمت عنها فى البوست


البوست طويل اوى يا خراشى


ههههههههههههههههههه


بس حلوه لعنه الفراعنه دى


اوعى تقنع نفسك بكده عشان هتفضل كده طول عمرك


حاول تحس هتلاقى نفسك حسيت وحبيت واتفتحت نفسك للارتباط

كل عيد اضحى وانت طيب

sookra يقول...

هو انا الاول ولا لا؟
عموما حكيك حلو اوى وطريقتك جميله ومافيهاش اى بجاحه
ههههههههه
عمك اكيد هتلاقى وقت تصاحبه زى زمان
اولا اتعلم الحلاقه اهى بجد صانعه تكسب دهب
ههههههههههههه
ثانيا موش دايما الدقن دليل على الاكتئاب عندك انا مثلا النهارده اهتميت كدا بنفسى شويه صغيرين وشويه حبشتكانات كدا
عجبوا ماما اوى وتخيلت انى سعيده ومعرفتش انى لما اهتم بنفسى كدا ابقى جايبه اخرى
وبعدين كتبت كلمه سكر اكتر من مره فى البوست دا والبوست التانى
ياترى دا تأثير السكره
هههههههههههه
قلتلك مره يابختك انك ولد
ماتزعلش قصدى راجل
يعنى ببقى فى عز النهار وهتجنن انى انزل اتمشى فى الغيطان تقوم الست امى تقولى عيب
موش فاهمه ايه العيب وتقولى انتى بنت
يخرب بيت كدا
وانت ازاى كدا تروح العيد من غيرى
انا كدا زعلانه
وانت بقيت صبى الجزار
يعنى مستشار ابليس
ورسول عزرائيل وكمان صبى الجزار
طيب انا هاخاف من السطور اللى هيبقى فى ايدك بقى
كويس انك تكون قادر ان تظبط مودك حسب الجو اللى حواليك
يعنى بتراعى اللى حواليك لكن انت .......
حاول تبص للصفقه من جهات تانيه يمكن تنفع وتبقى deal
وانصحك خليك كدا لغايه لما تيجى اللى تقدر على اللعنه دى
بس اللى اعرفه عن لعنه الفراعنه انها بتصيب اول واحد يقرب بس
وبعد كدا خلاص
اللى عندك موش لاعنه فراعنه
اللى فيك دى لعنه الحب المستحيل
==============
الفيلم دا كله اكتر من رائع بجد
المشكله انهم يبقوا شايفينك اصلا
يشوف عاقل او مجنون تيجى بعدين بس الاول انهم يشوفوك
انا الدكتور بتاعى قالى قومى امشى وموش تيجى تانى
عارف ليه؟
لانى قاعده احكيله عنى واحلل فى المواقف اللى حصلتلى فقام قالى هو انتى بتحللى تصرفاتك امال جايالى ليه قومى روحى
كنت خلاص هاخليه يشد فى شعره بجد
هههههههههههههههه
=======================
يااااااااااااااه علينا لما نقوى على قلوبنا وعلى ضعفنا وعلى اشتياقنا لاى حد مهما كانت اهميته بالنسبالنا
والدك ربنا يرحمه يارب وتقابله فى الجنه بعد عمر طويل اوى وتكون حققت كل احلامك وكملت الرساله
وممكن نبقى نتقابل هناك



طولت عليك معلش بس انا رغايه اوى وانت عارف
هههههههههه
مساء الفل

الزنارى يقول...

السلام عليكم

بداية كل عام و أنتم بخير بمناسبة عيد الأضخى المبارك .

أحييك على موضوعك

مع فائق الاحترام و التقدير

أحمد الزنارى

promise is promise يقول...

كل سنه وانت طيب وجميع الاهل بخير وعيد سعيد عليكم

المهم اوعا تكون عملت زى بوحه وسلخت الاول قبل ما تدبح

عموما كل سنه وانت طيب

وهابى فته

فراشة يقول...

كل يوم وانت الى الله اقرب

كويس والله انك ساعدت ف الدبح انا شفت خروف بيندبح كرهت اللحمة ههههههههه

البوست طويل ومليان حاجات ونسيت كنت عايزة اعلق اقول ايه

بس حلوة بتاع قلبك عليه لعنه دي عجبتني الصراحة
بس ساعات الواحد بيبقى حاسس بكدا و ف ثانية يتغير خالص

ف النهاية ..ربنا يسعد قلبك وتحب وتتحب ايام وسنين مش لحظة واحدة

wella يقول...

ااااااااااااااااااه

اااااااااااااااااااااااه

اااااااااااااااااااااه


مجنون والنعمة هتجننى

بجد مش عارفة انا لية ديما مستمرة انى اقرا ليك اقوللك لية عشان ااكد لنفسى انى فى ناس غيرى مجانين فى الدنيا المجنونة دى

وكمان عشان بحب اقرى كلامك وبحب اعرف قضيتك يويك ازاى

ربنا يسعدك يارب
احلى حاجة مممكن تستفيد منها من المدونة انى هدعيللك كدة لله فى الله من غير اى سبب






صباح ومسا شى مابيتنسى تركت الحب واخدت القسى

wella يقول...

عندى سؤال

هوة لية الواحد مش ممكن يحب حتى لو كان مثلا اللى قدامة بيحبة وشارية

اية السبب

عارفة انو سؤال غبى بس لية ازاى الواحد يقدر يحس باللى قدامة

؟؟

donya يقول...

مساء الخير
علي فكره ربنا ماخلقش اي حد زي اي حد
خلق كل واحد بطبيعه غير التاني ممكن يشتركوا في الصفات ويختليفوا في تطبيقها او درجتها
يعني ممكن اتنين كدابين زي بعض
لكن واحد بيكدب بشكل غير التاني وطريقه مختلفه وواحد يكدب في كل حاجه وواحد مايكدبش في كل حاجه
اعتقد انك فهمتني
تحياتي

شاب فقرى يقول...

فراضة

والله انا كمان بيصعبوا عليه

هى مش لعنة بالمعنى المفهوم

هى القصد انه عامل زى القبر

لاحد بيدخله ولا حد بيخرج منه

قبر فاضى

فراضة ربنا يسعدك انتى كمان وكل سنة وانتى طيبة

شاب فقرى
=====================
==========================
promise is promise

لاء مش تقلق

إحنا محترفين :)

هابى عيد

شاب فقرى
======================
wella

بالنسبة لموضوع الجنان
ألف سلامة عليكى منه :)
انما اكيد انا مجنون
زى ما انا شايف معنى الكلمة مش زى ما الناس شايفاها

صباح الورد صحيح

ويارب العيد يمر على خير وسعادة وفرحة

والله لو هتدعى لى فانا مش عارف اقدر المعروف دا ازاى

يمكن دى الحاجة الوحيدة اللى بستناها من الناس

بجد شكرا

انك تحسى بالطرف التانى لازم تكونى متقبلاه وعارفاه كويس
مينفعش اضغط على زرار أقوم أحس بالطرف التانى
دا موضوع بييجى لوحده

ممكن يكون فى حد مقدرك وشاريكى وانتى مش عايزاه
عادى جدا

نورتى
واستمرى فى زيارتنا
شرفينا كتير
خالص تحياتى واحترامى
شاب فقرى

======================

donya
مش عارف انتى علقتى على ايه ولا بتتكلمى فى انهى موضوع بالظبط

بس رايك سليم

تحياتى لتواجدك
شاب فقرى
====================
الزنارى
نورت المدونة
وكل سنة وانته طيب يارب وبخير
شاب فقرى
====================
ريمان
اولا كدا كل سنة وانتى طيبة :)

هوا انا مش بقنع نفسى والله لانها حقيقة

حاولت كتير اوى لدرجة انى زهقت

معلش لو كان كلامى ايائس
لكن المشكلة دوما منى
كل سنة وانتى طيبة
دمتى بكل ود :)
شاب فقرى

=========================
سكرة
طبعا اكيد تأثير السكرة

والله والله والله مريض جدا

ومش هقدر ارد عالتعليق التلاتين دور دا

بس انتى عارفة اننا دايما متفقين :)

نورتى
خالص تحياتى واحترامى
شاب فقرى
============
جارة القمر

كل سنة وانتى طيبة وبخير ويارب دايما كل سنة والى الله اقرب وفى سعادة ورضا

نتكلم بصراحة

مش بحب حد يعرف عنى كل حاجة

اكيد عشان الناس مش هتعجبهم كل حاجة وساعتها هحط تفكيرى وحاجات كتير اوى تحت نقاش الناس ودى حاجة مش بحبها

واكيد عشان بحب اكون لوحدى
واكيد عشان مفيش حد يستحق انه يعرف كل حاجة

أينعم أنا مجنون :)

هذه حقيقة
ولكن كما أرى الكلمة وليس كما يراها الناس

نورتى
وشكرا للسؤال المستمر :)
وبجد
تحياتى
شاب فقرى

فتاه من الصعيد يقول...

قصب ؟؟؟؟ انت من الصعيد بقا

من اين انت يا فقري ..... ولا القصب كان جاي زياره لبلدكم ؟

كل سنه وانت طيب تاني :)

تحياتي

فتاه من الصعيد يقول...

على فكره انت موش مجنون .... انت بس متحمس بزياده

كل حاجه عندك اكستريمز

زعل على الاخر .... فرح على الاخر

من الاخر هوائي شويه .... ولولا شويه تحمل المسئوليه والطموح بتوعك دول هما اللي بيوجهوك لمستقبل افضل باذن الله

تحياتي

حنين يقول...

السلام عليكم
انا جيت اقول كل عام وانت بخير
واحيك على البوست وربنا يبعد عنك لعنه الفراعنه وتلاقى نفرتيتى وتريح عيلتك.

خواطر شابة يقول...

انا فقط أردت القاء التحية
تعجبني طريقة سردك للاحداث وسلاسة انتقالك من موضوع لموضوع لهذا أحب أن أٌقرأ لك دائما
تحياتي لك ومرة أخرى عيد سعيد

صدى الصمت - عاشقة الورد - يقول...

أخيراً البوست خلص
اية ياعم كل الرغى دة
هههههه
خلاص ماتزعلش أنا والله بأهز
كل سنة وانت بألف خير وصحة وسعادة
تحياتى

أحن إلى ذكرى تقسو علىّ يقول...

كل سنه و أنت طيب و إلى الله أقرب
بصراحه البلوج بتاعك طير النوم من عنيا و لو فضلت شويه كمان بابا هيقوم يضربنى و الجهاز بيصرخ و نفسه يستريح شويه
البلوج كله على بعضه رائع

شاب فقرى يقول...

فتاة من الصعيد

كل سنة وانتى طيبة وبخير يارب

:)

فعلا هوائى حبتين كمان مش حبه واحدة بس


نورتى

فقرى
==================
حنين
ربنا يستر علينا من اللعنات

نورتى وكل سنة وانتى طيبة

شاب فقرى
=============
خواطر شابة
وانا سعيد بوجودك ومرورك
:)

شاب فقرى
===============
صدى الصمت عاشقة الورد

دا كله اسم

يالهوى

برده بهزر

نورتى :)

فقرى
=====================
أحن إلى ذكرى تقسو على

نورتى والله وانا سعيد جدا برايك :)

فعلا حاجة تفرح :)

قومى نامى وغدا ان شاء الله المدونة فى انتظارك

فقرى :)