الأحد، 22 نوفمبر 2009

يشرفنى لو بتفكر تعرفنى


فى ناس كتير فاكرة أن التاج هوا مشرط الجراح اللى هيشرح المدون ويقول هوا مين ويفك الطلاسم كلها ولكن من وجهة نظرى مع إحترامى ..فأنا مش كدا ومتاكد من دا لأن أفكارى وشخصيتى بتظهر فى البوستات وكل كلمة بكتبها هنا أو هناك أو فى أى مكان ولو حتى فى المسنجر أو الفيس بوك أو حتى فى ردى عالتليفون ,,, فى ناس كتير لما بتكلمنى بتقولى إنته بتفكر كتير أوى قبل ما ترد يعنى مش بتجعجع وخلاص أو تتهور فى الرد ودا شىء طبيعى فى شخصيتى ومشكلتى هى إنى بكون سعيد لما بكون لوحدى وبفكر ومبحبش أجرح أى حد بكلمه إلا لو كان قصد يجرحنى بكلامه ,,,, و يمكن جت عليه فترة كان معايه صحاب كتير قوى وكلهم يعتبروا الأنتيم بتاعى ولكن خلاص الوقت دا فات وحتى الأن لم يعد لى أصدقاء سواكم ولهذا فإن كان التاج هيسعدكم وهيساعدكم فى التعرف علي كريم ( شاب فقرى ) فأنا موافق وسأرد بكل سعادة ورضا
همسك الميكروفون بهدوء وإبتسامة سعيدة :)
لأنه خلاص
لازم أرد
نبتدى بسم الله بالتاجين بتوع شيما
***


اسمك؟


شاب فقرى / كريم

والناس أحيانا بتقول الجنرال لأنى شخصية قوية بتعرف تتحكم فى الأخرين بدون أى ضغوط وبخيوط زى عرايس المسرح بالظبط


اسم مدونتك؟


يوميات شاب فقرى



مجال دراستك؟


كلية التجارة وإدارة الأعمال جامعة القاهرة


RHCE = RedHat Certified Engineer

يعنى دراسة فى اللينوكس والسيستم أدمن عشان أقدر أشتغل مهندس it

وكمان شغال فى النت بعمل مواقع ودعم فنى للمواقع وحماية وبعمل شغل سيكيورتى للسيرفرات وبحجز سيرفرات وعندى شركة زوغيرة كدا

هل فكرت في اغلاق مدونتك؟ والسبب؟


فكرت والسبق السابق كان :

إن الناس تعرفنى فعلا وتحدد كل حاجة من خلال معلوماتها عنى مش من خلال أفكارى

والسبب الحالى :

لو توجه تفكيرى وفلسفتى للأفكار الإلحادية وبقيت بضيع الناس وساعتها مستحيل أستمر فى المدونة

ايه رد فعلك لو حد قل ادبه عليك في المدونه؟


ماشى بمنطق (( إتفو على أم رأيك اللى هيخليك تشتمنى ))

ممكن أرد عليه وأحرجه أو أنفض له وكأنه سيس ومقالش حاجة

أسوا مدونه دخلتها؟

مجموعة مدونات كتيرررررررررر

هجص وهلث ودماغ فاضية ورومانسية تافهة بلا هدف

ناس بتعشق الشات وداخله منه للتدوين ومش فاهمين معنى التدوين حتى
وممكن تعلق عندك بإسمها وبعدين تخش تشتمك بغير معرف بعلا إسلوب قذر

هيحصل ايه لايميلك بعد ماتموت؟

عادى مش هفتحه تانى أكيد


اديت الباسورد لحد قبل كده؟


طبعا لاء :)
بس كنت ناوى طبعا أديها لحد بقدره فى عالم التدوين

السفر بالنسبه لك؟

بعشق السفر والترحال وممكن أسافر مكان معرفش فيه أى حد ولا حتى فيه أى شارع اعرفه وألف وأتوه هناك

المود بتاعك ايه؟

فقرى دايما

وحاليا مريض جدا جدا جدا

بتعمل ايه وقت فراغك؟

الانترنت وبعدين شرب الشاى فى البلكونة والتأمل فى ربنا والتفكير فى خلق الله


الاكلات المفضله؟

الفاصوليا الخصرا والرز وجمبهم حته فرخة أو شوية لحمة حلوين


الصفات التي اخدتها عن والدك؟

القوة الرهيبة

الشجاعة

القدرة عالتصرف فى أحلك المواقف والظروف

التفكير بعقلانية

الإبتكار والإبداع


الصفات التي اخدتها عن والدتك؟

الطيبة

الحنان


اكتر 6 حاجات بتحبهم؟


سلمى بنت بنت خالتى بعشقها

أختى

أمى

أخويا

البيت الجديد اللى بنيته وطلع عينى فيه

دراستى

شغلى عالنت

الحقيقة والواقع والصراحة


اكتر 6 حاجات بتكرهم؟


الكدب أساسى واللى بيكدب ولو مرة واحدة بيسقط من نظرى وبطرده من حياتى تماما

الخيابه والخيانة

الفشل

المعيلة

البنات السيس والتفاهة

الناس اللى تفكيرها غلط


شخصيتك نوعها ايه؟

قوية إلى حد لايمكن تخيله

بس مليانة تناقضات وصباح الحاجات اللى ملهاش علاقة ببعض


لماذا دخلت عالم التدوين من الاساس؟


من تلات سنين تقريا كنت داخل أكتب وأتكلم عن حياتى

من مدة لما فتحت يوميات شاب فقرى كنت عايز بس أقرب من حد بيفكر ويكون ليه ناس بتفهم وبتحكى وبتعبر عن اللى جواها بدون قيود وبتفهم بعضها بدون حدود


اهميه التعليقات بالنسبه لك؟


مهمة جدا بس مش معنى كدا إنى ألاقى واحد كاتب تعليق تافه أو فيه كلمة جارحة أو بيهزقنى فيه
أو كاتب تعليق سد خانه ودا بيغيظنى
لازم عشان تعلق تبقى فهمت اللى قريته مش بتعلق وخلاص


احلي بوست كتبته مع ذكر السبب؟

أى بوست يحمل كلمة فلسفة والسلسلة الفقرية



افضل مدونه قريتها؟

تقصد قريت المدونة كلها

يبقى إنته هنا تقصد إتنين بس

شيما ...الشعب لابد له من حكومة تشكمه

ميرام ,,,ميراميات ...إسكت يابنى...!

ponpona منى سلامة شوية ورق (( بنبهر من أسلوب الحكى ))

المدونتين دول تقريبا قضيت فيهم حوالى شهر ونص مبهور بمحتواهم وطريقة الكتابة والتفكير والأسلوب وحاجات كتير أوى

قلبت فى القديم والجديد


اهميه الانترنت بالنسبالك؟

بزنس وعلم وترفيه وصحاب

***********************


اسمك واسم مدونتك؟

قولنا فووووووووووووووووووق



احب الالوان؟ الايام؟ الارقام؟
الأحمر ... يوم الخميس والجمعة ... الأرقام رقم تلاتة

برجك وتاريخ ميلادك؟

الدلو شهر واحد

اهم مميزاتك؟ واهم عيوبك؟ وماهى الصفه التى تتمنى ان تتوفر فيك؟

المميزات : قوى بقدر أقف جمب أى حد والباقى معرفوش

العيوب:البعض بيقول مغرور والبعض بيقول رخم وغلس بس أنا مش عارف وربنا

الصفه اللى بتمنى وجودها: القدرة عالنسيان والتسامح والمغفرة

ماهو مكانك المفضل؟

كذا مكان وبالترتيب هما :

بيتنا القديم فى بركة السبع

بلدنا والغيط لما الواحد ينام هناك ساعة العصر

إسكندرية وبالذات عند القلعة

كورنيش النيل بالكامل وأقصد بكلمة الكامل الكامل فعلا


ايه هى هوايتك المفضله؟

النت والسفر والمشى والقراءة مع إنى بطلتها

ما المقوله اللى تؤمن بها؟
مقولة خاصة بيه أنا :
(( اليوم اللى يمر عليك من ما تتعلم جديد تبقى حمار
واليوم اللى يمر عليك بدون ما تحتفظ بمعلوماتك السابقة تبقى أهبل
واليوم اللى يمر عليك بدون شغل تبقى عندك تخلف عقلى ))

(( قرب .... تتكهرب ))

لأنى مش بحب الناس تقرب منى خوفا عليهم

(( اللى ميقدرنيش ميلزمنيش ))

(( عيش وحيد تعيش سعيد ))

اجمل هديه قدمت لك من مين؟
عمر ما فى حد جابلى هدية أيون صدق ولا حتى كيلو برتقان
أفتكر فى حد جابلى نص كيلو كنافة فى عيد ميلادى من حوالى عشر سنين بالظبط
غير كدا محدش عبرنى
ولا فى حد جابلى هدية كويسة محتفظ بيها حتى

اسعد يوم فى حياتك؟ واتعس يوم فى حياتك؟

أسعد يوم : يوم ما خلصت بناء البيت الجديد ووقفت قدامه أصوره وأنا سعيد بإنجازى فى الحياة وإنى خلاص عملت بيتى اللى هسكن فيه بالرغم من إنى لسه مبنتش شقتى ولسه مقررتش هسكن فيه ولا لاء لانى عندى شقتى الخاصة

أتعس يوم : يوم وفاة والدى

موقف طريف لا ينسى من ذاكرتك؟

لما كنت داخل المترو ونسيت التذكرة تقدروا تقروا بوست المسحور وإنتوا هتفهموا انا كنت عامل إزاى ساعتها

مسحوووووووووووووووووووووور

معاك ثلاث وردات لمين تهديهم ؟

أول وردة :طبعا للى جرحنى اول وردة وأقوله وأعرفه يابنى أنا أحسن منك لأنى كنت أقدر أكسرك وأدمرك بس أنا معملهاش

تانى وردة للعيلة الخاصة بيه : أختى وأخويا وأمى

تالت وردة : لأى حد حاسس ناحيتى بشعور الحب وشايف إنى كويس ودا فعلا حاجة مش بحسها كتير ولو حسيتها بقول فى نفس الناس دى هبلة بتحبنى على إيه ؟؟؟

معاك ثلاث رصاصات على من تطلقهم؟
-أى حد قبيح
- أى حد فاكر نفسه حاجة وهوا حمار فى الأساس
- أى حد مغرور

ايه رايك فى الحب؟ ولمن تقول اجمل كلمه حب؟

والله ما بكدب ولا بشتغل حد بس أنا قلبى حاليا متوقف لا بحب ولا بتاع

وكمان بالنسبة للحب راح معناه ومش قادر أفتكره خالص من كتر الجراح اللى جوايا واللى بشوفه


هل من السهل ان تمثل الحب لشخص يحبك لعدم جرح مشاعره؟

دا بقى بتنجان صرف ... لأنى ببساطة صريح جدا مبقدرش أكدب على حد مع إنى ممكن اكدب وشاطر أوى فى الكدب بس مبعملهاش

المراه فى نظر الرجل .......... أكمل ؟

الحنان والحب وبتعوض عن تعب السنين كله بكلمه

الرجل فى نظر المراه.............أكمل؟

راجل البيت

ماهو اسعد خبر سمعته هذا العام؟ وماهو اتعس خبر؟
وربنا ما فى حاجة حلوة تقريبا سمعتها السنة دى
أيون عايش فى نكد
********************
شوية أسئلة من ريمان
هواياتك؟
النت والقراءة والنقاش مع حد بيفهم وبيفكر

ايه اكتر شىء بتحبه فى الطبيعه؟
اللون الأخضر والطيور والغيط والفاكهة والخضرة
بعشق كل دا وكمان نهر النيل

ايه اكتر شىء دايما بتحن ليه؟
أرضنا فى البلد
وحبيبتى اللى لسه مش قابلتها ومعرفش هى مين ولا فين
بحر إسكندرية

ايه شاغل دماغك الايام دى؟
تحقيق ذاتى
الوصول لأهدافى


احلام حلمت بيها ومقدرتش تحقهها؟
الحب الحقيقى مقدرتش ألاقيه حتى الأن
غير كدا اى شىء حطيته كهدف وصلت له

احلام حلمت بيها وحققتها؟
تقدرى تقولى كل حاجة
بداية من بناء البيت من كام سنة على إيدى
لحد الشغل عالنت
وكمان الإحترام المتبادل مع الناس
عدم الإبتعاد عن التدوين
وكل حاجة فى حياتى

********************
خلونا بقى نجاوب عالتاج بتاع دموع القمر :

روحت مدونتها مش لقيته نو بروبلم
هحاول أتظاهر بأن كان فيه تاج هناك وكان نفسى أرد عليه لأنى حسيت إنه جميل قوى بس خلاص كدا
بس هسأل نفسى كام سؤال يمكن تقدروا تعرفوا أنا مين

مين جنابك ؟؟؟
فقرى فقط

حلمك لبكره ؟؟؟
بنوتة زوغيره بتجرى عليه وتحضنى وتقول بابا

بتحلم بإيه ؟؟؟
بحلم بتحقيق ذاتى

تعرف الخوف ؟؟؟
لا أعرفه ولا يعرفنى

يهمك رأى الناس ؟؟؟
من الأخر طز ,, أنا عايش براحتى ومش يفرق معايه حد ومطبق مبدأ عيش وحيد تعيش سعيد

إنته مغرور؟
لاء بس ثقتى فى نفسى بلا حدود

نفسك فى إيه ؟؟؟
بنوتة عسولة أو خمسة يبقوا بناتى مفيش مشاكل
شغل محترم
بيت فى مكان بحبه أوى

بتحب مصر ؟؟؟
اه والله

مدى عشقك للحياة ؟؟
ملوش حدود

هل أنت مجنون ؟؟
طبعا

ليك صحاب ؟؟
لاء
بس حاليا فى ناس قربت منى وأقدر أقول صديقة واحدة بس

بتكره الحب ؟؟؟
بعشقه لدرجة الجنون

يعنى إيه نت ؟
نت يعنى علاقات وشغل وتعليم وسياحة وسفر وحب وجواز كمان

الطب فى نظرك ؟؟؟
pure Freaking magic
ومش بلجأ له خالص غير لو بدأ جسمى ينهار

البنات فى وجهة نظرك ؟؟
مخلوقات لطيفة بتجلب السعادة
لو سمعت منك كلمة وحشة بتبقى لعنه وبتبقى ليها كيد عظيم

الصداقة ؟
عطاء بلا حدود

الكدب ؟؟؟
ملوش رجلين

الحب الحقيقى ؟؟؟
معرفة وإهتمام وطاعة

الغرور ؟
لسه متخلقش اللى هيتنك عليه
بالإضافة لأنى معرفش حد عشان أتنك عليه

أمريكا ؟؟؟
بنت كلب باليهود اللى فيها

إسرائيل ؟؟؟
قذارة وسفالة بلا حدود

الموت ؟؟
مش خايف منه نهائى
ربنا يجعل موتى على أعتاب المسجد الأقصى مدافع عنه
وطبعا لو أنا خارج بودع أى حد وداع الموت وكانى مش هشوفه تانى وكذلك بعمل مع صحابى

الزمن ؟؟؟
لازم تعمل له حساب

تقول إيه لكلا من ؟؟
والدك : بجد شكرا
حبيبتك : إتأخرتى أوى
مبارك : حس بينا الله يرضى عليك ويحسن خاتمتك

تعرف الإنتقام ؟؟؟
قادر عليه تمام القدرة لكن مبعملوش

تعرف الغدر ؟؟
أنا أكبر من إنى أعمله

إدمانك فى الحياة ؟؟؟
التفكير والتفكير والتفكير
بفكر حتى وأنا نايم ومحدش يقولى إزاى


******

إنتهت الإجابات
هل حقا علمت من أنا ؟؟؟
لا أظن هذا
ولكن
إهداء التاج يكون لمين ؟؟؟
isolde
الفراغ
سلمى
قلم رصاص
ريمان
جارة القمر
ponpona منى سلامة
شيما
وطبعا مش عايز أقول إنى بوجه مش التاجين أو اللى جاوبوا عليه قبل كدا بل الأسئلة الإضافية اللى فى النص واللى حطيتها عشان تعرفونى بيها

خالص تحياتى وإحترامى الكامل لكم
ولكل من أهدى لى تاج وخاصة من جاء ذكرهم فى البوست
وكل من أراد من القرب أو إحترمنى أو قدر رأيى ووجهة نظرى

شاب فقرى
كريم

هناك 26 تعليقًا:

حنين يقول...

السلام عليكم
مش عارفه اكتب اه بس شايفه شخصيه اعتقد انها محترمه وقويه بس حزينه شويه وده اعتقاد
ربنا بكرمك ويوفقك وتعيش فى البيت اللى بنيته افضل كثير من اى مكان تانى بس الاهم انك تعيش فيه مع ناس تحبك وتكون فيه اسره سعيده ان شاء الله ونصيحه من اخت
اتقى الله فى اهل بيتك وانت تعيش مرتاح
تحياتى لك حنين

حرروف يقول...

مش حاسه انك قلت حاجة excluseve

او حاجة تكشف عن خباياك كل اللي قلته افتكر باين في كتباتك يا كريم

بس ميمنعش ان اسئلتك الاضافيه عجبتني


دمت بخير

Just Smile يقول...

ايه شاغل دماغك الايام دى؟
تحقيق ذاتى
الوصول لأهدافى


احترم فيك كده جداااااااااااا ربنا يوفقك يارب وتحقق كل اللي انت عاوزه


مبارك : حس بينا الله يرضى عليك ويحسن خاتمتك

هههههههههههههههههههههههههه لا تعليق بس بجد انت تحفة:)

بس غريبة انك بتحب التفكير اوي كده انا بفكر كتير برضه بس مبنمش م التفكير مش بفكر وانا نايمة تيجي ازاي ديه بس^_^

اجاباتك جميلة
تحياتي ليك

د. ياسر عمر عبد الفتاح يقول...

هيه دي أهمية التاجات (اللي مش بحبها اساساً وعاملها مقاطعة)
إنها بتحخلينا نعرف جوانب كثير في شخصية المدون

لا إجاباتك كلها صح
وإن شاء الله النتيجة هتطلع ونشوف
وبإذن الله ناجح ,, متقلقش

donya يقول...

مساء الخير
التاج اقدر اقول قربني شويه من دماغك
لكن ماحدش بيعرف حد غير بالعشره

بس استغربت جدا انك ماعندكش هديه تعتز بيها
وان ماحدش اداك هديه
غريبه صح
اما اللي مايقدرنيش مايلزمنيش
دي قويه جداجداجدا

عجبتني اوي ياكريم

ربنا يكرمك
تحياتي

غروب يقول...

صباح الخير

ايه يا عم ده

ضحكتنى جدات والله وفي نفس الوقت خلتنى اكتشف انسان واثق في نفسه جدااااا فعلا

وثيق من الفوز يعنى هه


ربنا يكرمك ويهديك الحبيبه اللى تاتخرت والبنوته اللى بتتمنى منها كلمه بابا ووكل شئ

تحياتى

الفراغ يقول...

اشكرك على محاولتك ارضائنا
وبرضه مش عارفه ليه حاسه انى فعلا بحب كتاباتك
يمكن لكونك صادق صريح سريع شجاع
يمكن لانك معيشنا معاك
يمكن لانى سعيده انى بعيش حياتك اللى مقدرش اعيشها
وبتتحرك قدامنا وبشوف الدنيا بعنيك
يمكن كل ده
بس الاهم انى ارتحت عندك
اشكرك

Timo.. يقول...

وعشان أأكد لك تعليقي اللي فات اللي طلبت عدم نشره
90% من اجابات كنت متوقعها لان ببساطة كلامك واسلوبك في الحياة واضح من اقل من الكلمة.

جارة القمر يقول...

ازيك يا استاذ عامل ايه و ايه اخبارك

تعرف دايما كنت بقول انى اهم حاجه اعرفها عن اللى بحبهم انهم يبقوا طيبين وبس مش محتاجه انا اكتر من كدا
وانت طيب و دا اللى يهمنى اعرفه

و ميرسى انك اهدتنى التاج

كرسي أعتراف يقول...

تاج مركب من تاجين

اعجبت بإجاباتك وبأسلوبك

هنيئا لك شخصيتك المؤثرة جدا والمرحة

تقبل مودتي
سيمو

شاب فقرى يقول...

حنين

يشفرنى تشريفك ويسعدنى جدا نصيحتك وأكيد سأعمل بها

دمتى بكل ود

شاب فقرى

شاب فقرى يقول...

حرروف

تأكدى إنى لو كنت كتبت الأسئلة من دماغى كنتوا هتعرفونى اكتر

طبعا مفيش حاجة مميزة غير اللى سألته لنفسى فى سرعة وإجابات بسيطة

الباقى او اقصد التاجين سهلين خالص وسهل الواحد يضحك عليهم :P

نورتى
شاب فقرى

شاب فقرى يقول...

Just Smile

نورتى المدونة :)

لازم الواحد يتشغل بحاجة مهمة فى حياته وأكيد فى أهم من اللى ذكرته بس دا اللى فعلا فى بالى الفترة دى

التفكير بعتبره لعنه تخلى الواحد يكشف حقايق كتير وينجرح من ناس كتير لما يفهمها

ساعتها مبيبقاش نوم بيبقى مرحلة من الثبات أثناء التفكير


خالص احترامى وتحياتى :)
شاب فقرى

شاب فقرى يقول...

د. ياسر عمر عبد الفتاح

أسعدنى تواجدك :)

أنا كمان بكرهها بس كنت لازم أجاوب :$

دمت بكل خير

يارب النجاح يارب

شاب فقرى :)

شاب فقرى يقول...

donya

نورتى

دا المطلوب فعلا

ان الناس تقرب

اما موضوع الهديه فدا حقيقة واقعة

وملهاش تفسير حتى الان

غير انى مبخليش حد يقرب منى نهائى

اسعدنى ردك

شاب فقرى

شاب فقرى يقول...

غروب

وثيق من الفوز

بالظبط كدا :$


ههههههههههههههههههه

اللهم امين

نورتى

:)

شاب فقرى

شاب فقرى يقول...

الفراغ

أسعدنى إعجابك بالكتابات والمدونة والأسلوب :)

مهما كان السبب

ومهما كانت النتيجة

يشرفنى تواجدكم دايما :)

ويسعدنى :)

شاب فقرى

شاب فقرى يقول...

Timo

من وجهة نظرى إن تشابه إتنين فهوا مستحيل علميا ومنطقيا

لان كل شخص ليه ظروف وبيئته المحيطة وصحابه وحاجات كتير جدا تخليه مش يبقى شبه حد تانى زى بصمات الأصابع بالظبط

وبعدين مش تظلم نفسك وتقول شبهى

ياراجل حرام عليك

نورت

شاب فقرى

شاب فقرى يقول...

جارة القمر

الحمد لله بخير

وطبعا كان لازم اهدى للناس اللى بقدرهم كلهم واللى بيسألوا ويهمتوا :)

:)

الحمد لله على نعمة الطيبة :$

خالص تحياتى وإحترامى الكامل

شاب فقرى

شاب فقرى يقول...

كرسى إعتراف

التاج إهداء من ناس كتير ومقدرش ازعل حد

نورتى يا سيمو


وأسعدنى تواجدك

شاب فقرى

سلمى يقول...

السلام عليكم
اولا انا مش بعرف اجامل عشان كده حقولك
انت شخصيه محترمه وعمله نادره
ربنا يديك البنت اللى تقدرك وتفهم يعنى ايه انت
حاولت كتير احكم عليك وانا بقرء اجاباتك لكن فى كل اجابه كان حكم غير التانى
فى التاج الاول فى سؤال انت حذفته لكن احترم جداخصوصيتك
حضرتك اهديت التاج لسلمى مش عارفه سلمى دى تبقى انا ولا حد تانى بس اعتقد انى مشفتش حد زى اسمى فى البلوج
لو التاج عشانى بشكر حضرتك جدا انى بعتهولى وان شاء الله حجاوب عليه بس بعد شويه لانى لسه مجاوبه على واحد
بشكر حضرتك جدا
وبعتذر عن الاطاله

ريمان يقول...

ياااااااااه


كل دى اسئله

بجد برافو عليك انك جاوبت على دول كلهم


انا لو منك كنت قسمتهم على بوستين


مش عارفه اعلق على ايه ولا ايه


بس واضح اوى ان شخصيتك جميله


واللى عجبنى ثقتك فى نفسك اللى مالهاش حدود


وربنا يرزقك بالحب الحقيقى


وبجد شكرا على اجابتك على اسئلتى

نعكشة يقول...

الله يوفقك
:D

هوه المفوض فيه رغي كتير كنت عاوزة اقوله
بس مش عارفة صراحة

عامة بجد
معظم اجابات حضرتك متاشاء الله يعني
ربنا يباركلك في عمرك
ويحققلك كل احلامك

سلامٌ عليك

شاب فقرى يقول...

سلمى


أيون مفيش غيرك

ردى بقى :)


حذفت السؤال ويارب محد ياخد باله

:)

نورتى

شاب فقرى

شاب فقرى يقول...

ريمان

نورتى المدونة

هوا الأسئلة كتبت فيها كتير اوى بس ربنا كريم وقدرت اخلص

عقبال ما تجاوبى انتى كمان :)

ان لم نثق فى أنفسنا فمن سيثق بنا ؟؟؟


خالص تحياتى وإحترامى

شاب فقرى

شاب فقرى يقول...

نعكشة :)

التاج اهداء ليكى برده :)


نورتينى وربنا يحفظك ويعزك يارب :)

شاب فقرى