السبت، 21 نوفمبر، 2009

إلى السيد رئيس الجمهورية


السيد رئيس الجمهورية
صباح الخير
أرسل لسيادتك الخطاب رقم 1 وكلى أمل أن تقرؤه
أنا شاب مصرى بيحب مصر
لاء ياريس مش زى كل الناس
بحبها بجد مش كلام عالفاضى ولا طمعان من حبها فى حاجة لا عايز منصب ولا عايز فلوس ولا عايز واسطة ولا حتى عايز تشوفلى عروسة
إنته اكبر من كدا ياريس
أنا بس عايز أمشى محترم
سواء جوا أو برا مصر
أحس بإنى مواطن بلادى بتخاف عليه وبتحبنى
يوم ما يتجمع عليه الجزائريين أولاد التيت فى السودان ألاقى حد واقف جمبى
يوم ما أروح أشجع بلدى فى تصفيات التأهيل لكأس العالم ألاقى حماية من بلدى
مش عايز أنضرب عشان أنا مصرى
ولا عايز حد يهزقنى عشان أنا فى منى كتير وإنى تعليمى أى كلام
ومش عايز يطلع واحد سعودى يتهمنى إنى كنت بدى لمراته مخدرات وبخليها مدمنه إنتقاما منه ويجلدونى ألف جلدة
ومش عايز أسافر إيطاليا فى مراكب صيد مينفعش حتى إنها تنزل تصطاد لحالتها الزبالة
ومش عايز لما أروح إيطاليا أرجع مترحل لأن بلدى مش بتدى لى حقوقى
وكمان ياريس أنا مبفكرش أسافر إسرائيل زى ما شباب كتير عملوا
وأروح أقعد فى السجون هناك أو يتهمونى بتهمة ملهاش معنى وأعيش فى السجن
ولا عايز أموت فى عبارة أو طيارة ياريس الله يكرمك
ولا عايز ينضحك عليه بوهم الشقق والتسكين وفلوسى تروح منى
ولا عايز ياريس تبعتنى أمريكا وتعلمنى هناك وتخلينى دكتور مهم
ما أنا ممكن أبقى أحسن واحد فى الدنيا وفى بلدى
كل اللى فات دا أنا شفته وشفت اللى أكتر منه
وأخواتى ماتوا فيه
وأنا ليه حق فى البلد دى ياريس
مش كفاية بس إنى إبنها
أنا خالى كان معاك فى حرب أكتوبر وكان مهندس مصرى وإستشهد هناك
أنا مش عايز غير حاجة واحدة بس
أبقى محترم جوا وبرا
مش عايز أتهان من الجزائريين لما أروح أشجع بلدى وأرجع فى تابوت
مش عايز أنضرب برا بلدى وأتعذب جوا بلدى فى أقسام الشرطة
لأول مرة بنطقها ياريس
عايز أبقى محترم
ولك منى كل التحية والدعوات بطولة العمر
بس تشوفنا ياريس
مطلوب منك تشوفنا مش أكتر
وإحنا هنصعب عليك
خالص الإحترام والتحية والتقدير
شاب فقرى

هناك 25 تعليقًا:

عاشقه الرومانسيه يقول...

ياريته يسمع ويشوف
كانت حاجات كتير اتغيرت
:(

شاب فقرى يقول...

دودو


انا صعب عليه اللى اتصور واتذاع من اللى حصل فى السودان

ربنا يصبرنا يارب

ويرجع لنا كرامتنا

شاب فقرى

طوبه فضه وطوبه دهب يقول...

تسمح لى بعد البوست اللى فات والبوست دا اهديك تصفيق حاد لانك بجد حد محترم ونظرتك للدنيا نظره صح تقبل منى خالص الاحترام والتقدير اخى الصغير سننا الكبير مقاما

حنين يقول...

السلام عليكم
موضوع ممتاز أحييك عليه
وفعلا احنا اتبهدلنا بجد ربنا يصبرنا ويعوضنا خير

الشعب لابد له من حكومه تشكمه يقول...

هات الجواب ده امضيلك عليه وتبعته بالتضامن مع بعضينا,
حتى انا خالى برضه كان بيحارب معاه بس ممتش هو مفقود:( وفى الاخر اعتبروه طبعا استشهد,,ومش عارفين مكانه.

على فكره ياكرمله انا بعتله جواب شبه ده من كام يوم,بس مسمعوش اصل اخويا الكبير اعلن الحرب على بلد بعينها,والكبير اولى انه يسمع كلامه(وش بيغمز)

اخبارك ايه انهاردا؟:)

شاب فقرى يقول...

طوبة فضة وطوبة دهب

هوا انا قلت سنى قبل كدا

انا كبير فى السن مش زوغير اوى كدا :)

هتمضى عالجواب ؟؟

شكرا لرأيك :)
شاب فقرى

شاب فقرى يقول...

حنين


هوا مفيش أمل نرجع محترمين تانى فى البلد دى ؟؟؟؟

شاب فقرى

شاب فقرى يقول...

شيما

هوا خالى مفقود برده يا شيما

واعتبروه إستشهد

وأكيد دفن فى سينا

ايه حكاية الكبير النهارده يا جدعان

هوا ايه اللى بيقول انى زوغير :$

النهارده لسه حالتى زى ما هى

صحيت الساعة نمانية بليل من التعب مش قادر اصحى

وهبطل انزل الشغل خالص خالص

وهكمل تانى فى شغلى فى النت

لأنى بجد تعبان أوى

والحالة فى تأخر مستمر :$

:(((((

هاتى بقى تمن طابع بوسطة :$

شاب فقرى

غير معرف يقول...

صباح الخير ياريس
لو اتصلت ولقيت الموبايل مقفول او فاصل شحن
اتصل على رقم البيت انا مديهولك
هههههههههههه
اضحك من كتر همى
ياترى هتفضل تبعت كام جواب لحد الريس مايسمعك
ارجو انك موش تكتب جوابات كتيره
اوى ياكيمو
مساء موش مهم اهو مساء وخلاص


سكره

الشعب لابد له من حكومه تشكمه يقول...

اه زوغيور بقولك اخوك الكبير علاء اتكلم خلاص واعلن الحرب على الجزائر والكبير اولى يتسمع كلامه,ايييه مش مركز ولا ايه:)

روح لدكتور يا كريم متسكتش.الف سلامه عليك.:(

شاب فقرى يقول...

شيما

نفسى مسدودة مش عارف أخرج ولا عايز أروح لدكاترة زى ما قلت إمبارح

والله ما خدت بالى خالص

دا أنا على ما كتبت البوست دا ركزت جامد أوى وحسيت بالتعب والإنهاك :(

نورتى

فقرى

sookra يقول...

ايه هو انا موش بلعب معاكم هنا ولاايه
طيب والله هاكتب جواب للريس انا كمان واقوله انكم عيال وحشين خالث خالث


يالهوى عليا اما يبقى صابح عندى امتحان ببقى اخر تهييس
ببقى عثل عثل
لا ياشيما انتى وكريم موش هاديكم شويه عسل عشان انتوا اخدوا لعبتى واديتوها لاخوكم الكبير
هه يلا ياوحسين

Just Smile يقول...

ياسيادة الريس نفسي اعمل بطاقة مبيردوش يدخلوني السنيما من غير بطاقة وعاوزة اتحسب ع الدولة مواطنة والميس مش راضية تختملي الورق ازوره يعني ولا معملش بطاقة وانط من فوق سور السينيما عشان ادخل الفيلم !!..

احم احم منكن تزود الكلمتين دول ف الجواب بما انك ناوي تبعت ^_^ أنا شايلة كتير بس مبتكلمش خالص اصلي مش رغاية نوهائياً

بوست اكتر من رائع ولو اتكلمنا بجد هنلاقي مشاكل كتير اوي ..مش عارفة ايه اخرتها.. شكلنا كلنا هننط من فوق سور السينيما..

تحياتي ليك

donya يقول...

مساء الخير
بجد بجد جواب ميه ميه
بس انت هتبعته علي فين؟؟

ابعته يمكن يوصل

انت مش بتيجي عندي ليه
في المدونه

تحياتي

أميرة علي كوكب مهجور يقول...

الله عليك ياكريم
يارب بقا حد يسمعنا ويشوفنا
احنا مش عايزين فلوس ولا جاه عايزين نكون محترمين نشتغل ونتتعب ناكل اكل نظيف ونلاقي اخر الليل شقه مش مهم اربع اوض اهي اي شقه نتلم فيها بدل الناس اللي بتنام تحت السلالم وخيمه تحت الكوبري عايزين لما نقول اه نلاقي علاج يشفي مش يعل اكتر عايزين لماا نقول نعترض نلاقي حد يسمعنا

احنا عايزين نكون احنا ليس اكثر


اخبار ايه دلوقتي يارب تكون بخير وتكون سمعت الكلام وروحت لدكتور

جارة القمر يقول...

صباح الخير

ازيك يا كريم مش هعلق على البوست لانه مش محتاج تعليق كلنا عايزين حقنا يرجع

هو انت ليه مش عايز تروح للدكتور هو انت نفسك رخيصة عندك طيب ما ينفعش كدا.. طب انا خايفة عليك و كل شوية بدخل اطمن انك هنا و بترد على الناس و فى ناس تانية اهى خايفة عليك ... مش ممكن تسمع الكلام بقى و تروح للدكتور

شاب فقرى يقول...

سكوكرة

لاء مش بتلعبى معانا :P

فقرى :D

شاب فقرى يقول...

just smile

صباح الفل

بس مش ينفع وربنا تقعدى من غير بطاقة كدا :)

المدونة هنا فيها كمين وممكن تقفى هناك كتير

فحاولى تدخلى دايما بالبطاقة

فكرتينى بايام شبابى لما كنت بعمل مشاكل مع طوب الأرض :D سواء فى المدرسة أو حتى فى أى مكان

خالص تحياتى :)

نورتينى

شاب فقرى

آيوشة يقول...

كلنا عايزين كده كلنا عايزين نبقى لينا قيمة فى بلدنا علشان يبقى لينا قيمة برة

شاب فقرى يقول...

donya
بالنسبة للجواب هسيبه كدا يمكن حد إبن حلال يبعته :$

أكيد هزورك قريب أنا رجعت للنت من تانى

شاب فقرى

شاب فقرى يقول...

أميرة على كوكب مهجور

لسه مفيش جديد حاليا ولا روحت لدكتور

ربنا ستار رحيم

يارب يرزقنا الإحترام فى البلد دى

نورتى وشكرا للإهتمام والسؤال :)

شاب فقرى

شاب فقرى يقول...

جارة القمر

حااليا الحالة تمام

بس لسه مروحتش للدكتور وربنا يستر وفى مشاكل هنا بسبب الموضوع دا وأنا معارض سماع أى رأى تانى

دماغى وبس ومريحانى كدا :$

نورتى المدونة

خالص تحياتى وإحترامى

صباح الورد

شاب فقرى

شاب فقرى يقول...

آيوشة

كلمتين من الأخر وزيارة بعد طول غياب :)

يارب تكونى بخير وسلام لان اخر بوست قريته ليكى كان مليان حزن

ربنا يعفو عنك ويرضيكى

شاب فقرى

نعكشة يقول...

ابتسامة تحمل من الحزن و الأمل الكثير

سلامٌ عليك

شاب فقرى يقول...

نعكشة

لانملك سوى الدعاء بوصول الخطاب :)

شاب فقرى