الأربعاء، 25 نوفمبر، 2009

أوهام الأعياد والأفراح





السلام عليكم ورحمة الله وبركاته


تتملكنى رغبة شديدة فى الحديث عن شىء ما
لشخص ما
لقلب يتفهمك بهدوء
أمسك جوالى وأهمس له فى صمت
هل حقا تحتفظ فى ذاكرتك بإسم حبيبتى ؟؟؟
فلا أجد منه ردا ولا جوابا
وكأنما تملكه خجلا أراد له الصمت ليمنع عنى حقيقة
بأن حياتى اليوم بلا أحباب
ولا فى الدنيا عاد لى أصحاب
بأن عمرى الفائت ما كان إلا
غربة فى بلدى وبين جدران منزلى
وبأنى عشته كله حائرا ووحيدا
أبحث عن قلبى يملكنى
يأخذنى لشط ولا أعرف بعده موج البحار
ولكنى لازالت أبحث عنها
وأبحث عنى شاطئى
ولا أندم على ما فات من شهورا وسنين
فيوم لقائك يا عمرى
حينها يكون للندم معنى
بأن عمرى قد مر دون أن نكون معا
بأن فى عمرى لحظات
مرت دون أن تواسينى
وأبكى بين يديكى صارخا طالبا للغفران
وتحتضنين رأسى بين كفيك بحنان
وكأنك تداوين فى نفسى ما دمرته كل السنين
وما حطمته كل الأيام
ومنى تقتربين
وتهمسين
أحبك يا حبيبى
فإن لم أكن لك
وإن لم أعفو عنك
فمن يفعل ؟؟؟

***






ما زال يُسكرني شُعاعك ..

رغم أن الضوء في عيني نار

أجرى فألمح ألف ظل في خُطاي

فكيف أنجو الآن من هذا الحصار ؟

لم لا أسافر ؟

ألفُ أرض تحتويني .. ألفُ متكأ .. ودار

أنا لا أرى شيئا أمامي

غير أشلاء تُطاردها العواصفُ .. والغبار

***
كنت عايز أكتب بس مش عندى نيه للكتابه فى الرومانسية ولا فى أى حاجة تانية
بس كان لازم أكتب
خلاص العيد قرب وكل سنة وإنتم طيبين ويارب دايما إلى الله أقرب
والحياة حلوة وكل حاجة جميلة
تتملكنى أفكار كتير أوى
ياترى بمناسبة العيد الواحد المفروض يفتكر إيه ولا يتكلم فى إيه ولا يروح فين ؟؟؟
أنا عن نفسى لا أعترف بالاقارب ولا بالاصدقاء
لانى ايه الفايدة ان يكون لى اقارب تقريبا بقعد اسلم عليهم ساعتين الصبح ومفيش حد فيهم حتى يعرف إسمى
ولو كان يعرفه فمش يعرف عنى حاجة
وكمان بالنسبة للاصدقاء فأنا لم أجد من الحياة أصحابا بعد
لا اعرف صحاب ولا بتاع
هوا مش المفروض الصاحب يسأل على صاحبه ؟
بلاش ندخل فى جدل عقيم حول الصداقة وشروطها واساسياتها وهى ايه عشان مش هنطلع باى حاجة
لان حاليا مفيش لا صحاب ولا احباب فى حياة الواحد
فكل واحد ليه طلب او ليه حاجة زى زمان
لم يتغير الأمر كتير اوى عن زمان وبداية شغلى
حاليا يمكن شغلى متوقف وسيبت الشغل فى الورشة لانى مش عايز اكمل ببساطة
عادى جدا
انا حر فى تفكيرى
ونرجع تانى نقول لنقطة تانية
يا ترى هل يبحث النجم فعلا عن مدار ؟؟؟
ياترى فعلا هى مازلت أبحث عن الحب والعشق ؟؟؟؟
هل مازلت مؤمن بكل هذا ؟
للاسف لما الانسان بيكون قوى الملاحظة او كثير التجارب فى الحياة
بيكون على مقدرة انه يعرف معادن الناس وددى مشكلة
يمكن الواحد احيانا بيحسد البنت اللى بتحب واحد سنين وبتتخدع فيه
ومحدش يقولى ليه
يمكن احيانا االواحد بيحتاج للحب فعلا من اجل الحب مش لاجل اى هدف تانى
يمكن الواحد فعلا بيكون محتاج الحب من اجل الحب
مش فاكر مين اللى كان قالى الجملة دى من كام يوم
ولكن فعلا
مفيش حالة بتقدر تنكد عالواحد زى حالة العيد دى
يمكن الايام العادية انعدام الفرحة او الاحساس فيها بيكون شىء طبيعى
انما يوم العيد
لما يمر عادى ؟؟؟
لما ميبقاش فى اى تمييز
لما يكون زيه زى اى يوم تانى فى السنة ؟؟؟
مش عايز حد يروح فكره لبعيد ويفكر فى الناحية الدينية
انا بتكلم دلوقتى عن الناحية الحسية
عن الاحساس
لازم الواحد يوضح
لما بوضح كدا بحس انى مش بكتب لنفسى
انا بكتب لغيرى
عشان يفهم ويقرب
وبعد ما يقرب مش هنوصل لحاجة برده
لان مفيش اصدقاء ولا احبه
يمكن مفيش قدام الواحد غير انه يبص لنور الشمس وقت الغروب
ويروى منه روحه ومشاعره المكلومة فى فراق الكثيرين
ويرتوى بيه ويسكر منه
ياترى على فين بعد الارتواء
وايه اللى هيحصل بعد الغروب
هل هتستمر الدنيا فى الظلام
لحد ما توصل لاحلك النقط فى اليوم
هل فعلا احلك الاوقات جت ؟؟؟
لان دايما معروف ان احلك الاوقات
او الاوقات الاكثر ظلمة هى التى تسبق الفجر
ياترى امتى الفجر
ياترى هى دى الأوقات الأكثر ظلمة ؟؟؟
يعنى خلاص الفجر قرب ؟؟؟
ولا أحلك الأوقات والظروف لم تأتى بعد ؟؟

حتى السفر مبقاش بيمثل للواحد متعه
الواحد مبقاش حاسس إن السفر فيه جديد وفى متعة هتهب على الواحد لما يسافر
خلاص راحت المتعة دى
ياترى امتى هترجع ؟؟؟
الفرحة والعمر اللى الواحد نفسه يمر عليه
ياترى إمتى هلاقيها بتتصل
وبتبكى فى هدوء
ويدور الحوار التالى :

---

==========

هى تبكى فى صمت

هوا : مالك يا قلبى ؟

هى : هتفضل بعيد لحد إمتى ؟ هوا العيد هيبقى ليه معنى من غيرك ؟

هوا : وهوا البعد بإيدينا ؟ ولا إمتى الواحد إختار يبعد عن قلبه ؟وعن روحه وعنك ؟؟

هى :وبعدين هتعيد إزاى من غيرى إنته ؟ مش مهم أنا .

هوا : يا قلبى ,,,

قومى دلوقتى ...

إلبسى الطرحة

وإفتحى الشباك

دقايق وهلتلاقينى عندك

هتلاقينى جاى وجايبلك وردة وهمسح بإبتسامتى كل دموعك

وهمحى من ماضيكى كل تعب الإنتظار

هتلاقى بكره كله مرسوم فى عيونى

عشقى ليكى هيقول كل حاجة

قومى يلا إفتحى الشباك

وإستنينى

إستنى ثانية ....

بحبك

هى : وأنا كمان

بس هاتلى الورده حمرا

ومتنساش الشوكلاته :)

هوا : حاضر يا قلبى و يا طفلتى يا أميرتى :)

-----

==========


عيد سعيد عليكم
ولنا عودة نكمل كلامنا
كنت هكتب دلوقتى تانى فى موضوع مصر والجزائر فى فقرانيا العظمى
بخصوص أراء بعض المثقفين المصريين ورأيى الشخصى
بس خلاص مليش نفس
سلام

شاب فقرى

هناك 36 تعليقًا:

ريمان يقول...

وهتفيد بايه يا ندم


اه يا ندم


ههههههههههه


صباحك سكر


كل سنه وانت طيب

ويا رب يكون عيد سعيد عليك


وكل لحمه كتير واتغذى

بالنسبه لموضوع اسئلتك


انا مش اللى سميت اسم مدونتى بالاسم ده

ده كان اختيار اصحابى انى اسمى مدونتى ملائكيه وصمموا بصراحه انى اسميها كده

انا كنت مسمياها فى الاول حاجه تانيه بس غيرت اسمها عشان خاطرهم


بيقولوا انهم بيشوفونى ملاك

بيقولوا يعنى

ههههههههههههه


بالنسبه لموضوع ولدت من جديد ده

فده ليه حكايه


انى اتخلحصت فيها من الاسر

من اسر انسان ظالم

واما اتخلصت من الاسر ده حسيت انى اتولدت من جديد


اخدت حريتى يعنى بمعنى اصح

عشان كده ممكن فى اللحظه دى الانسان يتولد من جديد

تحياتى لك

اقصوصه يقول...

كل عام وانته بخير :)

فتاه من الصعيد يقول...

كل عام وانت بخير ....

والجديرون بالصداقه قليلون .... ولكن موجودين حولنا

قليل من المجهود والبحث الجاد مع الامل دوما .... ربما يؤدي لنتائج مذهله

تحياتي

7annen يقول...

كل سنه وانت طيب
عيد سعيد عليك

جارة القمر يقول...

ازيك يا اطيب الناس

على فكرة لازم اقلقك عليك و مش تقولى مش تقلقى لانى دى طبيعتى ان كان عاجبك يعنى ولا مش عاجبك مش مهم هقلق عليك برضو

نيجى بقى لكل اللى انت كاتبه ما هو طبيعى بعد الكلام الكئيب دا كله تقول ان مالكش نفس يا نهاار ابيض مصمم انك مش ليك اصحاب ولا احباب لا يونكن ابدا ازاى يعنىىىىىى اومال احنا ايه بقى
ها ؟؟ قول قول ... و اكيد فى ناس فى حياتك بيحبوك برضو انت بس اللى مش شايف كويس دور حواليك هتلاقيهم انا متأكدة

عارف انك اكيد هتقابلها و هتحبك اوووى و انت كمان و هتبقوا كيان واحد كمان لدرجة انكم هتحسوا ببعض حتى لو مش فى مكان واحد ... عرفت انا بتكلم على مين ؟؟؟ اكيد عرفت

تفائل انت تستاهل كل خير ... اه صحيح انت فى ذمتك ليا تعليق ها انا مش بسيب حقى :)

سلالالام

ponpona يقول...

:( :(

:( :( :(

donya يقول...

صباح الخير
كل اللي كاتبه ده ومالكش نفس
ههههههههه

اناكمان ساعات كتير بكفر بالصداقه والحب والاهل
بحس ان المصلحه هي اللي بقت متحكمه في كل ده
اللي بيحب بيحب لمصلحه واللي بيصادق بيصادق لمصلحه

وحتي الاهل برضه بسألوا علي بعض لما تكون في مصلحه بس

دنيتنا بقت دنية مصالح فقط

لكن اكيد في ناس عدله لكن في الحقيقه لسه ماقابلناهمش في الحياة

كل سنه وانت طيب

تحياتي

shemo يقول...

السلام عليكم.....
ازيك يا فقرى ....
كل سنة وانت طيب وبالف صحة يارب
ايه يا سيدى الكلام الكبير دا ومش ليك صحاب ولا احباب ومش بتعترف بالاصدقاء
الوحدة فعلا شىء واحساس غبى اوى
بس اكيد فى ناس حواليك بيحبوك ويهمهم رحتك دور عليهم وان شاء الله حتلاقى حببتك الى مش حتقدر تعيش من غيرك ولا انت تقدر تعيش من غيرها وكل واحد ليه نصيب واكيد حيخده......هو مجرد مود الانسان بيتحط فيه وبيبقى حاسس انه لوحده ومش يهم حد ولا حد قريبة منه ان شاء الله الدنيا تبقى احسن .......دومت بخير.....كل كل الود والحب والتقدير....فى رعاية الله.
shemo

الشعب لابد له من حكومه تشكمه يقول...

:) برضه هقولك عيد سعيد وتتبسط فيه,

شوف لو هتمحور حياتك فى حب رومانتك دى اكبر غلط,مينفعش نمحور حياتنا وسعادتنا على انسان واحد ونقول مش هنفرح غير لما يرجع او مش هنفرح غير لما نقابله..
طب واللى مش فى حياته حب رومانتك يعمل ايه واللى ربنا مأنعمش عليه انه يقابله خالص ,يعمل ايه؟؟؟؟
يعيش مكتئب ومش عاوز يكلم حد ويقول انا ببحث عنه ولا يروح يموت احسن؟...

وعلى فكره طول ما انت بتبحث عنه عمرك مهتقابله,الحب بيجى على غفله من غير متكون مستنيه او محضر ليه.

**بالنسبه للحب من اجل الحب,مش عارفه يمكن تفكير الشباب يختلف عن تفكير البنات فى النقطه دى’لان مفيش بنت ممكن تفكر كده,البنت بتبص لابعد من الحب بتبص على بيت واستقرار وحياه تبنيها.

ولكــــــــــــن

فى مقوله انا مؤمنه بيها جدااا وقلتها لسكره:
ان تفشل فى الحب افضل من الا تحب...
انك تجرب الاحساس وتعيش تفاصيله بسعادتها والمها افضل مليون مره من شخص عمره معرف الاحساس ده

**بالنسبه لاحساسك ان لازم يوم العيد يكون مختلف,لو انت قررت انه يكون مختلف هيكون مختلف.
حتى مع اختك اللى بتحبها,اعملوا حاجه مختلفه فى اليوم ده,.


كل سنه وانت طيب وعيد سعيد عليك وربنا يحققلك كل اللى بتتمناه ان شاء الله.

غير معرف يقول...

داخلة بس اقولك كل سنة وانت طيب

لكن مش هعلق على الكلام اللى انت كاتبه
علشان مش هيعجبك

سلااام

غير معرف يقول...

بس اللى هقولهولك

حاول تغير حياتك
مش معنى انى قولتلك ارجع للماضى
يبقى اقعد حاطط ايدى على خدى وافضل مستنى سرااب

غير معرف يقول...

ياريت متدورش على الحب علشان ممكن تخدع ناس كتير
بدون قصد ولغاية ما تفوق وتعرف انك غلطان تلاقى نفسك ظلمت كثير ومتعرفش تصلح دا
وفى نفس الوقت ممكن تنخدع
فياريت تنتظر لغاية مايجيلك الحب بنفسه
هيهبط على قلبك بدون ماتشعر

شاب فقرى يقول...

غير معرف

بغض النظر عن انى مش عارفك ونفسى اعرف انته مين

لانه ببساطة اان معرفش حد هنا معرفة شخصية ابدا

لكن هرد


اولا كل سنة وانتى طيبة

انا مش كاتب الكلام عشان الناس تقولى مش هرد

امال انا كتبته ليه ؟؟؟

اولا انا مش متنح فى الماضى زى ما انتى متخيلة الماضى بالنسبة لى هوا درس بنتعلم منه مش اكتر
وعمرى ما بحط ايدى على خدى

وحياتى الحمد لله كويسة مش محتاجة تغيير غير تغيير واحد ودا مش وقته

(( ياريت متدورش عالحب عشان ممكن تخدع ناس كتير ))

أكبر دليل إن حضرتك مش تعرفينى

لانى واضح وصريح مع اى حد

سواء فى الوسط التدوينى او خارجه

كل علاقاتى لها حدود واطارات واضحة

اما اللى بيبنى بينى وبينه جسور الأحلام فدا انا مش مسؤل عنه

انا مش همشى اصلح دماغ الناس

قصة انى انخدع دى انا مش هتحصلى ولو حصلت فهبفى متخدعتش
اللى معايا هوا اللى كان بالحماقة الكافية انه يخسرنى

يهبط ميهنطش مش هتفرق دلوقتى

شكرا لتواجد حضرتك

ورديت عليك اولا

لان تعليقاتك بتستفزنى لانك احيانا بيكون انته مش فاهمنى وبتتتكلم وخلاص

شكرا لتواجدك

شاب فقرى

شاب فقرى يقول...

ريمان

بسم الله ما شاء الله

اكيد عندهم حق صحابك

الملاك بروحه الطيبة وتسامحه مع الناس ودا واضح :)

ومبروك ميلادك من جديد :)

دمتى بكل ود

شاب فقرى

شاب فقرى يقول...

أقصوصة

وحضرتك طيبة وبالصحة والسلامة

شاب فقرى

شاب فقرى يقول...

7annen
وانتى بالصحة بالسلامة ويارب كل سنة الى الله اقرب

شاب فقرى

شاب فقرى يقول...

فتاة من الصعيد

كل عام وانتى بالف خير

بحثت كثيرا ولم اجد شيئا

لكن هناك دوما امل

شاب فقرى

شاب فقرى يقول...

جارة القمر

بالنسبة للقلق نو بروبلم

بس انا تصرفاتى دوما تكون مجنونة فمن يقلق لا يحصد إلا عصبية وغضب بلا حدود منى

سأظل أبحث أكيد

بس مش عرفت وربنا الكلام على مين

اكيد هاجى اعلق واكمل تعليقى :)

نورتى

وردى عليه فى اللى قلته

شاب فقرى

شاب فقرى يقول...

ponpona

اكتر حاجة زعلتنى حتى الان تعليقك

انتى من الناس اللى مش ينفع يكونوا زعلانين

لانهم بيرسموا بدون قصد عوالم لناس نفسها تعيش والناس دى بتعيش فيها

ابتسمى الله يفتح عليكى

شاب فقرى

شاب فقرى يقول...

donya

هنستنى لما نشوف اللى يستاهلوا

وكل سنة وانتى كمان طيبة :)

شاب فقرى

شاب فقرى يقول...

shemo

متفائلة جامد

بس هقولك كل سنة وانتى طيبة يارب :)

شاب فقرى

شاب فقرى يقول...

الشعب لابد له من حكةمى تشكمه

انا مش سيبت حياتى مستنيه حب رومانتك

انا عايش وبتعايش والحمد لله كل شىء تمام

بس مش مبسوط

انا متاكد من ان الحب بييجى على غفلة

زى حوادث القطارات كدا :)

والله انا بحلم بالاتنين يا شيما

بالنسبة للى قلتيه لسكرة

نو بروبلم

ربنا يسهل


مفيش فى دماغى اى اختلاف

:(

شاب فقرى

مجرد انسان يقول...

كل سنة وانت طيب


عيد سعيد

انا جديد فى عالم التدوين


عايز ترحيب وتشجيع

تحياتى

ponpona يقول...

معلش يلفقري .. انا آسفه فعلا بس انا كنت مخنوقه حبتين ومشوشه والحاجات كانت داخله مني في بعضها في بعضها كدهو زي بكرة الصوف لما قطه تقرر تلف بيها الشقه

كنت متضابقه وجيت قرأت البوست اتضايقتلك بزياده واتضايقت اكتر بسبب موضوع العيد ده .. مانكرش ان انا ببقي مبسوطه فيه .. بس ساعات أكتر ماببقاش مبسوطه ومابحبش حد يقولي تبهججي عشان دا عيد والمفروض نفرح .. اصلا كون الفرح يتحول لشئ مفروض الواجب عليا أأديه .. فكره مأساويه بالنسبالي ومابستحملهاش ناهيك عن فكره ان انا اقعد طول النهار اسلم علي ناس باشوفهم مره واحده في السنه .. تعرف ... انا بنات عماتي اللي بتتجوز فيهم ماباشوفهاش تاني ومكن اسمع بس اخبارها كده صدفة وممكن لأ ...
ييييييه انا شكلي عكيتها بزياده .. ماعلينا .. أهو بردو احسن من مفيش ، مره مرتين في السنه احسن من اني ماشوفهمش خالص

ومعلش تاني لو كنت زعلتك .. آديني ضحكت اهو :))


يكرمك يارب ويوقفلك ولاد الحلال قادر يا كريم .. قول آمين

شاب فقرى يقول...

مجرد انسان

نورت التدوين

خالص تحياتى

شاب فقرى

شاب فقرى يقول...

ponpona

نفكر بهدوء

هوا دا فعلا اللى بيحصل

بس احيانا بيكون المفر الوحيد ان الواحد يعيد لوحده

يقفل عليه اودته

او يسافر مكان بعيد

مينفعش تزعلى :)

إبتسمى الله يرضى عليكى:)

أيون كدا

وأنا هشوف هحل الموضوع مع نفسى إزاى

شاب فقرى

شاب فقرى يقول...

اه طبعا

امال هروح فين ؟؟؟

شوية وخارج

تقريبا كمان ربع ساعة


كريم

أميرة علي كوكب مهجور يقول...

ياااااه عيد!! الحمدلله علي كل حال

يارب تكون بخير

فراشة يقول...

ايه يا فقري انت لازم تفكرني اننا ف عيد يعنى انا كنت ناسية او بحاول انسي

بجد انت قلت الكلام اللى بقوله على طول
مبقاش ف العيد فرحة زي زمان دا انا زعلانة ان فيه اجازة 10 ايام ف البيت

بس هحاول افرح نفسي هو العمر فيه كام عيد

وعلى فكرةحكاية الوردة والبلكونة انا عملتها قبل كدا لصحبتى
ياااااااااه كانت ايام

المهم ..كل يوم وانت ف أحسن حال يارب

فراشة

مسدس صغير يقول...

كل سنة وانت طيب يا جميل
عيد سعيد عليك وعلى الاسرة الكريمة

سماء يقول...

كل سنة وانت طيب


وان شاء الله تلاقى الحب اللى يستمر معاك العمر كلة


دمت بود

ponpona يقول...

صباحك خير يا فقري انت عامل ايه؟ انا بقيت كويسه اهو الحمد لله انا جايه بس اسلم عليك قبل ما سافر .... هاسافر عشان العيد وهاقعد خمس تيام من غير نت .. عاااااا
بس مش مشكله .. ارجع الاقيك شايلي البوستات علي جنب أوكيه

سلام بقي

:))

ponpona يقول...

امممممم
شكلك قاعد دلوقتي بتنشر الكومنتات
ع العموم بردو عيد سعيد عليك ان شاء الله واستمتع زي مانت عايز لوحدك مع الناس مش مهم .. المهم تستمتع

سلام لرابع مره

:)

ماء تشرين يقول...

اى ده هو فى حد بيعمل كده انت بتنكدعلينا في العيد الله يسمحك ايه البوست الجامد ده

ربنا يسمحك
بجد انا معنديش تعليق

عموما عيد سعيد

غير معرف يقول...

كل سنة وانتةبخير ؟؟؟؟؟؟؟؟؟؟

جمهورية شومبونجو العربية يقول...

عزيزيى شاب فقرى

كل سنه وانت طيب

وعيد سعيد عليك

تحياتى


رئيس الجمهورية