الثلاثاء، 13 سبتمبر، 2011

وعمار يا إسكندرية

إتعلمت زمان مبدأ هام جدا جدا جدا جدا جدا جدا : لما تمشى فى طريق كون قد إختيارك وكون على قدر من التحمل مهما كانت العوائق ... خليك قوى وكمل للآخر , مهما كان الوجع اللى بتقابله فى السكة , لازم تجرى وتكمل المشوار , لازم فى أشد الأوقات اللى بيتحرك فيها الناس ببطىء وبيتخنقوا ومبيعرفوش تتحركوا إنته تعرف تتحرك وتتقدم وتبقى أحسن لنفسك أولا ...
أنا من الناس اللى بتعرف تشتغل تحت أقصى ظروف زى الضغط والقلق والسفر والإرهاق والتعب وحاجات تانية كتير ... هكذا خلقنى الله
بكره نازل إسكندرية عندى إختبار سباحة مهم جدا ولازم أنجح فيه حتى وإن كنت مش همشى فى الطريق دا بناء على إختيارات تانية حددتها فى حياتى زى حاجات مش هعرف أشرحها هنا ولكن سفر بكره مش هيحدد حاجة لأنى مختار بالفعل وعارف المسار اللى همشى فيه
فات عليا تلات أو أربع أسابيع من ساعة أول مرة دخلت الإمتحان دا وفشلت فيه ... ولكن المرة دى الأربع أسابيع كانوا عذاب بالنسبة لى فى التمرين وفى إنى أروح الحى العاشر اللى هوا أصلا بعيد عنى كل البعد وحصلى مواقف وحاجات كتير مقدرتش أتكلم عنها لأنه بالطبع محدش هيفهم أنا بعمل إيه فقلت أستنى للآخر وأتحرك صح ولما أخلص أبقى أحكى لكم وأكتب لكم
النهارده كنت عايز أكتب حاجة جديدة عن شىء مهم ( اللى إتكلمت عنه فى أول كام سطر دا بس هيبقى بإستفاضة وبشرح وفضفضة ووجهة نظر أكبر ) بس مش وقته .... الحاجة بتتكتب لما بينفع إنك تنقل الفكرة من عقلك للورق أو لما بتحاول تستدعيها فعلا عشان تظهر للعلن .. زى مثلا البوست بتاع إمبارح اللى هوا ( حبك فى فنجان القهوة ) كان بقالى تقريبا أكتر من سنتين بفكر أكتبه بس خلاص إحساسه جه وكان لازم يتكتب :) ويمكن لو فاكرين البوست بتاع ( تانج برتقان سقعان ) كنت إتكلمت فيه عن واحدة كانت بتعملى عصير برتقان والمرة دى قهوة .. من عشاق القهوة بس لسه ميعاد القهوة مجاش ... لسه الشمس مطلعتش ولسه اليوم مبدأش
قبل أى حاجة أنا مبسوط إنى مسافر بكره بالرغم من إن مفيش أى حد أعرفه إتصل بيا أو قالى هستناك أو حد بعتلى رسالة حتى بس نو بروبلم أنا هتصل بالناس وهجمعهم وأتكلم معاهم ... وحشنى صحابى من إسكندرية ووحشنى البحر والقلعة وبحرى بالذات ويمكن كمان ميامى والمندرة ...
بكره يوم مهم بالنسبة لى ... هروح الإختبار وهستنى دعواتكم قبل الساعة حداشر وحداشر بالظبط وياترى هتدعوا بضمير ولا لاء ؟؟؟
بكره هيكون معايه الرقمين : الزيرو عشرة والموبينيل ... الزيرو عشرة هيشتغل نص اليوم بس مش اليوم كله فعشان كدا اللى مش هيعرف يعمل مكالمة يبقى يبعت رسالة :)
دعواتكم ويارب يفوت اليوم على خير عشان نرجع نحتفل سوا :)
فقرى
ملحوظة : عارف إنى وحشتك إمبارح :) .

هناك 4 تعليقات:

قلم رصاص يقول...

ربنا يوفقك ياكريم يااااااااارب
والله هافرح اوي لما يتحقق اللي انت عاوزه ياصديقي

شد الحيل شد
:)))))))

candy يقول...

ربنا يوفقك :)

بنت قلبى يقول...

الله يوفقك يااارب وتحقق كل الا تتمنتاه يا اخى العزيز
فى التفوق دائما

وبس

sony2000 يقول...

يارب
يرزك بكل خير

ويجمعك بنصك التاني يارب
امين