الخميس، 12 نوفمبر 2009

طالبة معايه



إزيكم

البوست التالت عالتوازى النهارده

دلوقتى أنا كنت كتبت إتنين وقررت أنام

لكن فجأة

قررت إنى أصحى و أطبق ومضيعش يوم الخميس اللى أنا بعتبره ثورة قومية لا يمكن التفريط فيها تحت أى مسمى

ولذلك أنا طالبة معايه ناو الحاجات دى :
- قهوة عربى ... عملت كوباية تقيلة جدا
- صوت مودى راب ...أسمع أغنيه عايز أنام آخر حاجة نزلت إمبارح
- مذاكرة داخل سيسكو ... الواحد يفتح المنهج وينط فيه بقالى كثير مش إتغابيت فى الشبكات
- إنى أكتب كمان بوستين النهارده وهيكونوا وعد منى حاجة مميزة جدا
- إنى أخد أجازة من الشغل واللى مش عاجبه يولع فى نفسه :D
- إنى أفوق من النوم وأطبق يومين وهيبقى يوم بتنجان أصلى فهمى :)
- أدخل عند ponpona منى سلامة و أقرا مدونتها كمان مرة

طبعا محدش يقولى هات شفطة أو اللى يشرب لوحده يزور :D
أان قاعد هنا طول اليوم متابع المدونة وبذاكر
لا هفتح فيس بوك ولا ميلات ولا أى حاجة غير لما الغزالة تروق كدا وأنجز بتاع تلات chapter أو فصول فى سيسكو
ساعتها بس ممكن أرضى عن نفسى وأسترخى فى صمت عالكرسى
ويغمى عليه وأنا قاعد فى مكانى وأنام تلات ساعات وأصحى ألاقى الماوس فى إيدى والكيبورد فى حجرى
ولسه فى مكانى
أقوم و أكمل كمان ساعة فى نفس المكان
وبعدين أقوم و ألبس أتهيأ وأتغدى :D

صباح الفل

النهارده الخميس

من وجهة نظرى اللى يضيع يوم الخميس يستحق أن يضرب بالشوز القديمة :)

صباح الورد عليكم يا حلوين

كان معكم

شاب فقرى
الساعة 7:19 صباحا


هناك 32 تعليقًا:

الشعب لابد له من حكومه تشكمه يقول...

استنى بس اخد نفسى لسه مبعتش الكومنت على البوست اللى فات هههههههههه استنى هقرا وارجع يارب الحق قبل متنزل حاجه فيمتو ثانيه استنانى

الشعب لابد له من حكومه تشكمه يقول...

ها نزلت حاجه ولا الحق ارد ههههههههههههههه..اولا اشرب لوحدك القهوه مش بحبها:)
ثانيا انا زيك مش بناااااااااام :(بنام 4 سعات فى اليوم وده الطبيعى بتاعى:(

ثالثا:
انت بتسال البوست اللى ملحقتش ارد عليه تكتب بمعدل اد ايه؟
تكتب لما تحس انك عاوز تكتب زى معملت دلوقتى,متحاولش ترضى حد لانك مهما تعمل مش هترضى الكل فعلى الاقل اكسب انك ترضى نفسك:)

صباحك سكر زياده..يارب الحق البوستات اللى هتنزلها ..اوعة تكون نزلت وانا برد.:(

شاب فقرى يقول...

شيما


لأول مرة هقولها فى عالم التدوين لحد

صباحك سكر :)

إيه الجمال دا

زيى يعنى بتنامى كام ساعة فى اليوم

أنا لما بتطلب معايه بتضرب خالص

بنام فوق المتوقع

خلاص بما إنك مش بتحبى القهوة

هجيبلك بيبس

أنا فعلا ماشى بنفس المبدأ

أنا بكتب بدماغى ولنفسى وذاتى فقط

صباح الروقان :)

قبل ما أنزل أى بوست جديد طبعا لازم أبلغك أولا :)

صبح تاتا

:)

سته وتلاتين فى تلاتة :D

شاب فقرى

الفراغ يقول...

صباحكم فل وورد انتم الاتنين
والله انتم اجدع ناس
وعاجبنى قوى
نفسى اعيش زيكم كدا..قول للزمان ارجع يازمان
وهاتلى قلب لا داب ولا حب ولا انجرح ولا داق حرمان
ههههههههههههههههه

باى باى يا احلى شباب

شاب فقرى يقول...

الفراغ
بسم الله ماشاء الله ولا قوة إلا بالله :)

صباح الفل

انا كنت هموت امبارح

دعواتك معايه بقى

الواحد هوا اللى بيفرض على نفسه اطار معين

بس انا بقى

مش بحب الاطارات

بكسرها

وبعيش خارج الصورة والبرواز خالص

شاب فقرى :)

مجرد حلم... صغنتوت يقول...

يا صباح الروقان :D
والله بقالي كتير مش بظبط نفسي واعيشها ف حالة من الروقان والتهييس المؤقت علشان اعمل فرق بين حالات الكآبة دي
بس هحاول قريب
القهوة بالهنا والشفا.. لو كانت نسكافيه كنت هسيبهالك برده :D

نعكشة يقول...

ربنا يوفقك

صراحة مبتفرقش معايا الايام

:D

سلامٌ عليك

فتاه من الصعيد يقول...

انا كل ما اجي اقرا مانيمام تلات بوستات

عموما عادي حاجه لطيفه

عجبني اوي البوست الفلسفي ده

بس لا اعتقد اننا نستطيع حساب المستقبل لكل الناس

لان البعض يفاجئون انفسهم ومن حولهم ... واحيانا يفاجئنا القدر

ولهذا فان دراسه علم النفس شيء صعب وجميل في نفس الوقت .... فمن منا يعرف نفسه حتى يعرف غيره

الف حمد الله ع السلامه من الحوادث المؤلمه دي .... الحمد لله ربنا سلم

انا في تعليقي على البوست اغفو قليلا لم اقص ان تغادر مدينتك .... ولكن قصدت ان تنتظر من يستحق .... وليس من تتمنى ان يكون شريك لك

وربنا معاك في المذاكره .... وكفايه رغي كده :)

تحياتي

فتاه من الصعيد يقول...

انا زيك انت وشيما ..... بنام عشر ساعات في اليوم .... اقله 8 ساعات والا ما اعرفش اجمع :))

ايه الشوباب اللي دماغها مصفحه دي :D

يلا روحوا ناموا

تحياتي

3mr wa2el يقول...

ههههههههههههههههههه

اول مرة ادخل هنا ب بقوللك حلاوة الخميس ف ليلة الخميس ههههههههههههههههههه

ponpona يقول...

شوف .... انا كنت ناويه اجي اتخانق .. بقي تقعد كل ده ماتحطش بوست وبعدين تروح حاطط تلاته مره واحده .. بس قولت سماح .. كريم بردو مننا وعلينا .. ها ؟ ايه اخبارك بقي ؟ كويس؟ شكلك كده كويس ومبسوط .. ماهو اللي يقوم يعمل قهوه ويحط تلاته بوست ويقرر كمان انه يذاكر يبقي مبسوط وكويس ... ربنا معاك
وبعدين تعالي هنا ... انت فعلا ناوي تتدخل تقرا المدونه تاني من أولها !!! .. والله يا أخي انت بتحسسني انا انا باكتب حاجه مهمه درجه ان ممكن حد يقرأها مرتين :D
ربنا يكرمني يارب كده ويكتبهالي وادخل انا اقرا مدونتك من اولها للاخر ..ز بي ياللا هانت .. فات م الدراسه شهر وفاضل 9 شهور .. بسيييييييطه

:))

همســات عــلى ضــوء الــقمر يقول...

صبااااح الخير

استنى كدا اخد نفسى من السلم

واقعد اقرأ البوست على روقان

همســات عــلى ضــوء الــقمر يقول...

هههههههه

لايعم اشرب لوحدك مبحبش القهوة خالص

بس طبعا زمانها خلصت
وبعدين يامقترى 3 فى وقت واحد
اعمل حساب للغلابة اللى زينا

يادوب نرج نقرأ كلمتين مش 3 بوستات

وبعدين من اولا كدا غياب
دا انت تتحط فى البلاك ليست
لازمن تكون نشيط وتروح الشغل ومتخليش دا يأثر على دا

وربنا يوفقك فى حياتك كلها سواء العلمية والعملية

وبم ان البوست دا كان امبارح فابقى طمنا بقى
عملت ايه ؟

وطبعا يوم الخميس
كالاتى
مذاكرة الفصل اللى اخدناه او على الاقل تلخيص
وجبت جرنال الحياه ومطلوب مننا اننا نلخصه وشكلها السهرة صباحى
وورايا كمان تحليل فيلم
ولا اكننا نقاد
الله المستعان

وصباح الروقان

blue-wave يقول...

هههههههههههههههههه
عجبتنى مدونتك بجد
بس انا بقى مش فارقه معايا الخميس لأن شغال طول الأسبوع اعمل ايه بقى؟:))

سمو الأميرة سارة يقول...

بتفكرني بيا في شبابي والله كنت بنزل بالبوست والاتنين والتلاتة في اليوم
لكن دلوقتي :(( بحط البوست اليتيم بالاسبوع والاتنين وما بيكونش عندي وقت أقراه كمان

حبيت طقوسك اوي وبعلنها واضحة صريحة .. انا بحسسسسسسسسسدك على 3 حاجات

الحاجة نمبر وان : انك بتقدر تطبق من غير ما باباك ولا مامتك يفصلوا عليك الكهربا علشان تقوم تنام وتسيب " الهباب دا اللي هيضيع صحتك "

الحاجة نمبر تو : انك قررت تذاكر :D

الحاجة نمبر ثري : انك اخدت اجازة من الشغل .. القرار اللي نفسي أخده بقالي شهوووووور ومش بيهون عليا انفذه :(

الحاجة نمبر فور : ان جهازك بيستحمل تشغل ويب واغاني مع بعض :D :D

:) وعلى فكرة بقى عيني مدورة والنق بتاعي بيجي في الجون هههههههههههههه

sookra يقول...

صباح الروقان كدا بقينا تلاته
انا متغاظه ان فيه ناس بتعمل زيىء
انا لو نمت اكتر من 3 او 4 ساعات بقوم تعبانه جدا
وكمان بحب القهوه اوى بس موش بشربها غير لما مزاجى يطلبها
اصل انا بنت مزجانجيه (ههههههههههههههه
ولما الغزاله تروق ابقى قولى وموش عاوزه منك شفطه لانها موش طالبه معايا قهوه دلوقتى
وبعدين ماتكتب يابنى واللى موش عاجبه يشرب من الترعه
هههههههههههههههه
هو انا بضحك كتير كدا ليه مع ان المود بتاعى زفت اوى النهارده
اصل حلمت حلم حلو اوى بحد موش عاوزه احلم بيه ومتغاظه من نفسى انى كنت مبسوطه فى الحلم
يالهوى عليا انا كدا عاوزه دكتور نفسى تانى غير اللى بروحله
شكله بتنجان وموش هيجيب نتيجه
هههههههههههههه
شفت ضحكت تانى
يخرب بيت كدا وكدا وكدا
التلاته

فراشة يقول...

شاب فقري
صباح المذاكرة هههههه

ماشاء الله عليك 3 سباتر وكوباية قهوة عربي كمان انا بحبها بس بالتمر

وحشتنى بوستاتك والله
هروح اقرأ البوستات اللى فاتت
وربنا معاك ف المذاكرة

adel يقول...

ادي اخرة السهر الكتير

كنت كويس يابني

سلمى يقول...

السلام عليكم
اوقات بحس انى قربت افهم حضرتك واوقات تانيه بحس انه من المستحيل انى افهمك
لكن الصراحه عمرى ما فهمتك
تحياتى

دموع كابر يقول...

اولا صباح الخير
ثانيا بقالى اكتر من 3 ساعات بلف فى البلوج بتاعك وبصراحه عجبنى اوى بشكل رهيب لدرجه انها هتكون اول بلوج اضيفها عندى
ثالثا
هاارغى كتير اتحملنى بليز
عاوزه اقول حاجات كتير بس بصراحه اصحابك قالوا كل الحاجات
المهم دير بالك على حالك اكتر من كدا
انت شاب طموح جدا ومينفعش تسمى نفسك فقرى
احييك بجد على افكارك وانك موش بتستسلم لاى شىء مهما كبر او زاد
انت شخص محبوب اوى ودا باين من الكومنتات بتاعت اصحابك
ربنا يديم عليك نعمه حب الناس
حتى لو كانوا بيحبوا وجهه واحده منك ومن حياتك المهم انهم بيحبوا اللى انت بتحكيه عنك يعنى بيحبوك زى ماانت شايف نفسك
واكيد لازم هناك بنات كتير معجبين بيك
هههههههههه
ولو كنت انا اصغر منك شويه كنت حبيتك كدا على طول بس انا عمرى 99 سنه
بهزر معاك يارب موش تضايق من هزارى
اوعى تخلى الوجع اللى موش بتحسه يدخل جواك ويعشش
اخيرا
دير بالك على حالك

ঔღঔ نـــوارة ঔღঔ يقول...

هههههههههههههه

هو الي عندك دا من قلة النوم ولا من كترة النوم

وبعدين اشمعنى الخميس بقى

عارف انا برضوا بحب الخميس دونا عن الايام ليه معرفش :)

يلا بقى كل خميس وانت فايق ورايق :)

ليس فقيرا من يحب يقول...

هههههههههههههههههههههههه

خلاص يا فقرى مش هاخصم من اعمال

السنه حاجه هاديلك الدرجات كامله

والحضور تمااااااااااااااااااااام

ليس فقيرا من يحب يقول...

وبعدين يا عم فقرى

حرام الطحن اللى بتطحنه فى نفسك

ومذاكرة ونت وصداع

انتخ شويه ههههههههههههههههههههههه

وبعدين يوم الخميس اهو زيه زى كل الايام

ملل فى ملل

وبعدين تلت سعات نوم بسسسسسسسسسسسسسس

يا لهوى دا الواحد بينام بتاع خمشاشر

تمنتاشر ساعه كده

ربنا معاك يا فقرى

كرسي أعتراف يقول...

سيفعلون الذين أضاعوا عمرهم باعتبار ان العمر عبارة عن " يوم خميس"؟

ميمى واحمد يقول...

فى عيد ميلاد زواج نوارة عايزنكم تحتفلوا معانا

طوبه فضه وطوبه دهب يقول...

ايه دا ليه دا كله ما تنام وتريح نفسك هو دا اخر خميس فى العمر ادخل نام ما تقلقش هتقوم تلاقينا قاعدين برضو وهتلاقى الكمبيوتر ما حدش هيسرقوا ما تخافش لا حول ولا قوه الا بالله انت مهنج على الاخر محتاج شحن بطريه ربنا يتولاك يا ابنى

7annen يقول...

مش ملاحقه ارد على ولا بوست ليييييك

مشغووووله جدا فى الكليه

بس بوستاتك تحفه اوووووووووووى

هحاول اتابع على قد ما اقدر

وبعدين لو عملت قهوه معاك واحد مظبوط هنا

هههههههههههههههههههه

حنين

أنا إنسان يقول...

من وجهة نظرى اللى يضيع يوم الخميس يستحق أن يضرب بالشوز القديمة :)
..................................
انا ضيعته النهارده
:(
وااااااااااء

ghorBty يقول...

ما شاء الله عليك

3 بوست النهارده

طول عمري بحب يوم الخميس دا اليوم الوحيد اللي بحبه ما يخلص ابدا ليه احساس خاص طبعا لان بعده اجاازه

ربنا يوفقك في دراستك ويرفع قدرك

تحياتي

شاب فقرى يقول...

مجرد حلم... صغنتوت

تسلم

أحلى حاجة حالة التوهان قبل الإنهيار فى أرض الراحة

نورت :)

يارب تدوم الزيارات

شاب فقرى
==========================
نعكشة

يوم الخميس

يعنى بكره اجازة

من كل حاجة

لازم يفرق :)

شاب فقرى
==================================
هكمل ردود بكره لانى ميت ناو

:$

فقرى

وحبي لك لن يموت يقول...

يوم الخميس
حبي الاول والاخير
بحبه اوي
لدرجة اني
بقيت بحب يوم الاربع
عشان بعده الخميس :)
وبحب يوم التلات عشان
بعده الاربع وهييجي بعده الخميس
وبحب يوم الاتنين
عشان هييجي في الاخر برده يوم الخميس
P:
لمدونتك نكهة خاصة
لعلنا سنصبح زوارا ً دائمين
فتقبلنا

كونت هونا .. :)

'' حطام (ك) بقايا '' يقول...

ها ارد و لا في كمان بوست في الطريق
ايييه ده
بوستين قبل ده و انا مش شايفاااهم
لا لا لا كده انا زعلااانة مليش دعوة

واجازة سعيدة عليك
وانا مالي لو فاتت مليش دعوة
هرد كانك لسه كاتبه و كان اليوم امبارح
طبعااا اوماااال
D: