الخميس، 12 نوفمبر، 2009

الموت يلقى عليكم السلام



السلام عليكم ورحمة الله وبركاته

إحم إحم

الفقرى يتحدث

الأسبوع اللى فات حتى الأمس بيحصلى حوادث كتير جدا
نبداأ بمواجهات مع الموت

........|| مواجهات مع الموت ||.........
أول موقف كان فى فرح طنطا وإحنا طاالعين من طنطا
طبعا راكبين عربية ملاكى ومسافرين طالعين القاهرة
والسواق حبيب هارتى كان شارب حشيش :D
طبعا كان مهيص ومشهيص العملية والحالة تمام
بس والله على قد ما كنت قلقان على قد ما شكرت صانع الحشيش دا واللى إبتكره وقلت الحمد لله إنه شربه
لأنه والحمد لله السواق مزاجه مش بيتعدل غير كدا ولا بيعرف يشوق غير كدا
ملحوظة : العربية متأجرة هى والسواق :D لأحسن حد يقول بتصاحب حشاشين يا فقرى :$

الموقف التانى وإحنا راجعين من المعادى عالدائرى
كنا سايقين ببساطة جدا على 180 كيلو متر فى الساعة
يعنى ال 500 متر بنمشيهم فى ثانية :D
وفجأة الزيت اللى فى العربية وقع أو حصل مصيبة ووقفنا بشكل فجائى وكما هنتقلب :D
وطبعا مش عايز أقولكم ربنا ستر لو حد كان جاى من ورانا بسرعة كان زمانكم دلوقتى بتعزوا فى الفقرى
رغم إنى عارف إن أهلى مش هيسكتوا غير لما ياخدوا بالتار بس مش مشكلة إبقوا عزوا فى المدونة هنا
والحمد لله ربنا حلها لنا فى الليلة دى ووصلت البيت الساعة سته :D
علما بأن الموقف دا حصل عالطريق الدائرى الساعة اتنين

نسيت أقولكم إن وإحنا واقفين جت عربية ضخمة تريلا كدا
وقام الكاوتش مفرقع ولولا ستر ربنا كان زمانها خبطت فينا وبقينا كلنا فطيرة باللحمة :D
طبعا عطلت فى نفس المكان
محدش يقولى إن العيب من الفقرى بقى :$
عالعموم أنا هقول لوزارة المرور فى مصر هنا
إنى لما أنزل أمشى فى الشارع يفضوا لى الطريق
أنا أهم من المسؤلين
لأن لو مشيت فى الطريق ممكن تحصل حوادث أو كبارى تقع
فبالذوق توقفوا الطريق وتريحوا دماغكم :$

الموقف التالت :
لما ركبت من إسماعيلية عربية طنطا وفوتت فى الطريق عالزقازيق وبنها ونزلت فى بنها
كنا سايقين الساعة اتنين ونص وكان الجو زفت والطريق كله عربيات نقل كبيرة وبلاوى
وكنا هنموت متين مرة مش مرة واحدة بس
ولما نزلت بنها وملقتش عربيات وقمت اتمشسيت وكنت ناوى أمشى لحد القاهرة بالظبط 45 كيلو
بس لقيت فى أول إستراحة عربية توصلنى مصر والحمد لله وصلت فى عربية نقل
شفت فيها الرعب :D

ما أحلى الرجوع إليه

الموقف الرابع :
إمبارح وأنا فى الشغل مسكت مكنه بشكل غلط
نسيت
قلة تركيز كنت بفكر فى حاجة تانية
طبعا مش عايز أقول إنى كان ممكن أموت أو إيدي تتقطع أو يحصلى كارثة بس ربكم بيحبكم وبيحبنى وخلانى أعيش عشان أكتب لكم البوست دا
طبعا المكنة إسمها الصاروخ
اللى يعرفها هيعرف أنا بتكلم عن إيه بالظبط

ونتوكل على الله ونخش فى أحداث أخرى

أثبتت لى الظروف إنى شخص عامل زى الجوكر أى مكان بيتحط فيه فى الكوتشينه بيسد
وبيلعب وبيبقى ميه ميه
لما نزلت الشغل اللى قلت لكم عليه بالاضافة للدراسة فى الكورسات وبالاضافة لشغل النت وبالاضافة للدراسة
لقيت نفسى بتعلم بسرعة والحمد لله
إكتسبت معلومات كتيرة فى وقت قليل
قلبى جامد بقيت بستخدم حاجات ممكن تودينى فى داهية عادى جدا :D
دعواتكم معايه يا جدعان

وننتقل لجزء آخر ونقول :
إن فى ناس كانت فاكرة بعد البوست بتاع (( أتمنى أن أغفو قليلا ))
إنى يائس وقاعد عالجدار جمب الفرخة قاعد أعيط
طيب هتقولولى فرخة إيه
هقولكم فرخة هنيدى اللى بيقولها (( عالجدار عالجدار الفرخة ماشية عالجدار ))
بحب الأغنيه دى أوى

:D

مش إكتئاب ولا حاجة بس مطلوب منى أركز فى أكتر من حاجة
ومشغول وبسهر طول الليل وبنزل الشغل وحالتى ما يعلم بيها إلا ربنا
يعنى لما كنت بكتب فى اليوم تلات مقالات كان الناس بتقولى براحة ياعم فقرى
مش بنلحق نقرا وبتاع


طيب دلوقتى ؟؟؟

أستمر كل سنة بوست ولا أستمر كل يوم إتنين وإطلع اللى جوايه وأصدعكم :)

المهم دلوقتى

ياريت تركزوا فى الدعاء :D
هيعمل شغل جامد معايا لأنى محتاج دعواتكم بجد
البوست اللى فات فلسفى أوى ياريت محدش يفكر يقراه لأنه مش هيفهم حاجة
واللى هيفهم هجيبله عسلية
وبرده هيدفع تمنها :D
شاب فقرى

هناك 24 تعليقًا:

الشعب لابد له من حكومه تشكمه يقول...

مهنش عليا اسيب البوست من غير كومنت:) لازم اسيب بصمتى فيه.
اولا الحمد لله على سلامتك وخد بالك من نفسك لان وااااااضح ان الحوادث كلها اهمااااااااااااااااااال من جانب سيادتك..

ثانيا ايه صورة الجوكر دىىىىىىىىىىىىىىىىىىىىىىىىىىىىى ,بجد والله والله اتخضيت فعلا حسيت ان حد ادامى مش عارفه اوصفلك بس احساس بايخ اوى ياريت متوصفش نفسك كده:( او تقول على الصوره دى انه انت .مش عارفه اوصلك احساسى بس مش عجبتنى وخلاص:(

شاب فقرى يقول...

شيما

انا بحترم رايك اوى

بس كله الا الجوكر

انا بحب الشخصية دى سواء فى الفيلم او فى التمثيل اللى عمله

انا بقول على بعض الافكار اللى كان بيقولها فى الفيلم

هى فعلا صورة مرعبة

بس بحبها اوى

:$

الحل إيه دلوقتى بقى ؟؟؟؟؟؟؟

الشعب لابد له من حكومه تشكمه يقول...

الحل انك تشيل الصوره دى يانا هى فى البلوج..
مش عاجبانى خااااالص بجد:( من كتر مهى مش عاجبانى م عارفه اتكلم اواوصف..
ايه اللى عاجبك فيها وافكار ايه بس دا الفيلم كله على بعضه فظييييييع.

شاب فقرى يقول...

من اكتر الأفلام اللى بحب أشوفها

إنك تلاقى حد بيعمل الحاجة لانه بيحبها فعلا

لا يمكن تفاوضيه او تحاولى تقنعيه بوجهة نظر تانية

الايمان بالافعال فى حد ذاته رهيب

وبعدين يا شيما

حاولى تتأقلمى معاها عشان خاطرى

هرعب بيها الزوار شوية وبعدين هنزلها تحت :)

صباح الورد :$

الشعب لابد له من حكومه تشكمه يقول...

اوك افرح بيها شويه ..شفت انا متفاهمه ازاى لما تشيلها باه اباه عرفنى علشان اجى:)..
ورد ايه دلوقتى بالمنظر ده..ال ورد ال..
دى تقول صباحك هانيبال,صباحك ايلين جاى من المريخ,,لكن ورد مش هينفع خالص..

يعععععععععععععع شكلها بشعع بشع..

شاب فقرى يقول...

ماشى يا شيما

شيلناها

بس انتى كدا زعلتينى خلاويص :(

شاب فقرى يقول...

مقدرتش يا شيما :((((((((

معلش بقى استحملى وخلاص

وانتى ازيك بجى؟؟؟؟؟؟؟

الشعب لابد له من حكومه تشكمه يقول...

زعلتك؟؟؟ ليه هو انا اللى شيلتها:)
مش انت اللى شيلتها وبكامل ارادتك:)_(ابتسامة المنتصر)

لو عاوز ترجعها رجعها بس صدقنى مش حابه انك تظهر نفسك كده او تقول كده على نفسك...لييييييييه..؟؟

بس اكتر حاجه زعلتنى انك زعلت نفسك علشان متزعلنيش(ايه الجمله العجيبه دى :)
بس هى فعلا وحشه والله ومقبضه للنفس وسخيفه..

بعد مشيلتها تقول صباحك فل وياسمين:)

الشعب لابد له من حكومه تشكمه يقول...

لو كنت صبرت كنت هتلاقى تعليقى وترجعها بناء على طلبى.
لكن باه كده ماااااااااااااااااااااااااااااااااشى مااااااااااااااااااااااااااااااااااشى..
اوك اوك وهات الفل والياسمين..
هسسسسسسسسس متقولش اصل هسسسسسسس متقولش بس..

شاب فقرى يقول...

شيما

صباحكم سكر يا افندم


بس كانت عجبانى اوى والله

شفتى بقى

نكدت على نفسى يوم الخميس عشان خاطرك اهوه :((

اعمل ايه بقى دلوقتى ؟؟؟

:)

شاب فقرى يقول...

ما هى متشاله اهوه

اعمل ايه تانى بقى

هاتى الفل والياسمين

وخدى شوية ثكر :$

شاب فقرى يقول...

انتى من الشخصيات القيادية اللى بقلق منها يا شيما

ارجعها بناء على طلبك كمان

كدهوه يعنى :((

الشعب لابد له من حكومه تشكمه يقول...

شوف شوف هيستخدم معايا ااسلوب دا تانى,قلتلك مش بحبه:( بلاش تحسسنى بتأنيب الضمير..

خلاص رجعها .بجد رجعها:) رجعها واهو نرعب الناس شويه هههههههههههه.
رجعها خلاص:)
وميرسى انك عملتلى خاطر:) دى كفايه وتجبرنى انى احترم رايك وصورتك:).
قلت رجعها باه..
يلا اشوفك البوست الجاى ان شاء الله.

شاب فقرى يقول...

يااااااااااااه يا شيما :$

بجد اسعدنى تعليقك :)

طيب عشان تعرفى قيمتك عندنا بس

لو اى حد تانى

كنت هقوله دى قوانين الجمهورية الفقرية

صبح صبج

نورتى المدونة

بس خدى بالك مش هشيلها

مش تأنيب ضمير :$

بس فى أساليب كتير جدا :)

ولا يهمك

مع الفقرى مش هتقدر تغمض إيديك

شاب فقرى

نعكشة يقول...

لأ بجد فقري :D

بس انا مش متخيلة
هوه فيه في مصر
اوتو ستوب

بس مينفعش اعملها اصلاً

خلاص خلاص

سؤال رخم بقة
ماهي الصاروخ يا سيدي الفادل

إني اغبطك بجد
انا احلى حاجة في حياتي لما اموت من التعب سواء في اللعب او الشغل

الله يعينك و يوفقك و يفتح عليك

سلامٌ عليك

نعكشة يقول...

آه صحيح

نفسي اشرب حشيش :D
ههههه


يلا خير

sookra يقول...

اولا حمدالله على سلامتك
وزى ماقلتلك قبل كدا ان الموت بيهزر معاك
بيلعب معاك شويه عشان تاخد بالك من نفسك وكفايه اهمال بقى
سلامتك الف سلامه
وخميس حلو عليك وعلى كل الناس
وبعدين الجوكر اللى اعرفه موش مرعب اوى كدا ياعم جوكر
تحياتى للجوكر فقرى
شوفت شايله اسامه ابن اختى وعماله اقرا فى البوستات بتاعتك واعلق عليها كمان
مش دا انجاز بزمتك برده
هههههههههههههه
مستقبل
هىء هىء هىء
باظت باظت
سلام واروح للى بعده

فراشة يقول...

على فكرة انا بحب ادعي للناس قووووووووي

ادهيلك دعاء ماما بتقولهولي على طول

ربنا يسترها معاك ويوفقك ف طريقك ويحفظك من كل شر

و ربنا يكرمك ف كل حياتك وتحقق كل اللى تتمناه وزيادة وتعيش ومبسوط وفرحان يارب

قول أمين
ولو عايز دعاء مخصوص ماما رايحة تحج قول انت بس وهخليها تدعيلك

شاب فقرى يقول...

نعكشه

صباح الفل :)

مفمتش يعنى ايه اوتوستوب ؟؟

الصاروخ هوا مكنه لتقطيع المعادن

عبارة عن لوح مدور وفى السنتر بتاعه بيتربط فى موتور ولما بيشتغل الموتور

بيبقى سريع اوى ممكن يقطع اى حاجة

ولو طار على حد ممكن يقطعه حتت

هتلاقيه شبه المكنه اللى بتفتح القفص الصدرى وبتشقه او اللى بتقطع الجمجمه
شفت دا كله فى فيلم saw :D

المشكلة مش انى اموت من التعب

المشكلة انى لو موتت هموت بجد


دعواتك بقى

تعليقاتك وتواجدك اسعدنى

شاب فقرى :)

شاب فقرى يقول...

نعكشه

االحشيش بيخلى المود بتاع البنى ادم زى ما هوا عايز

يعنى لو شربتيه لوحدك مش هيبقى فى اى تغير

لازم جروب ويكون المود بتاعهم عايزين ينسوا وينبسطوا :D

وانصح كل شاب وكل فتاة إن الجريمة لا تفيد :P

ههههههههههههههههههههههههههههههههه

بلاش لانه مش حلو

دا من واقع حكاوى الاصدقاء

حكم انا عندى اصحاب ومعارف

من الوزير للصرصار :D

فقررررررررررررى

شاب فقرى يقول...

ثكره :D

صباح الفل :)

ايه الروقان الغير طبيعى دا

ربنا يستر بجد ومش اموت المرة الجايه

فعلا انجاز :)

انجااااااز عظيم

إستمرى بقى :P

شاب فقرى

شاب فقرى يقول...

فراشه

يااااااااااااااااااااه

خليها تدعى لى اللى ييجى على بالها بقى :$

اللهم امين يارب :)

ربنا يحفظك ويعزك يارب

شاب فقرى

'' حطام (ك) بقايا '' يقول...

الموت يلقي عليكم السلام

يااااه
فكرتني بيوم الثلاثاء المشؤوم اللي فات
تعرف اني كنت هنزل بوست عنوانه طرق الموت بابي بجد و الله

سمعت بحوادث الاختناق بالغاز اثناء اخد دش
اييووووة ده اللي حصل بالضبط
لولا ربنا ستر
ده انا قريت الشهادة خلاص وكنت مستنية الروح تخرج

بجد عمري ما هنسى اليوم ده ابدااا
اهو عشان تعرف انك مشالشخص الفقري بس

ونروح للبوست قبل ده

حـــلـــم كــــان يقول...

الحمد لله يافقرى ان مفيش حاجه حصلت

خد بالك من نفسك وبلاش تفكر وتشتغل فى وقت واحد

لتفكر لتشتغل