الخميس، 24 سبتمبر 2009

عرايس ماريونت


الحمد لله رجعت الامس من إسكندرية
... لمن لم يكن يعلم فقد كنت فى اجازة لمدة ثلاثة أيام
حقا كانت من اجمل أيام حياتى
رأيت فيها الكثير ونعلمت الأكثر والأكثر
وخرجت بها من أزمات عملاقة تؤرق بالى
عدت من حيت اللاعودة
هكذا عدت
لا أسترجع ذكريات
لاأبكى على من فارقونا
ومما تعلمت :
أن قمة العفاف أن تترك الشىء فى أمس حاجتك إليه
أن البعض يكون شخصا آخر لانه يفكر بطريقة شخص آخر
أن الدنبا مهما جرحنك فإنك تتعلم منها ما يقويك ويبنى ذاتك
أنك دوما فى حاجة إلى أصدقاء حقيقيون
أن الحب لا يأنى إلا بالأنسة ومعرفة الآخر
تعلمت أن الصداقة كنز من كنوز الدنيا والآخرة
أيقنت بأن الحب فى الله أبقى من كل شىء فى الحياة
أيقنت بوجود أصدقاء فى حياتى
أصدقائى الأعزاء أحبكم فى الله


الحمد لله رجعت من اسكندرية ووصلت منزلى الحبيب فى أسرع وقت
ورجعت تانى للتدوين بعد غياب تلات ايام
صحيح جاتلى افكار كتير اوى وكان قدامى اللاب توب وال usb modem وممكن ادون
بس مكانش فى اى وقت ينفع للتدوين
على طول بنعمل حاجة
مش قادر اوصف لكم كانت اجمل ايام مريت بيها ازاى
لفيت اسكندرية
اعصابى ارتاحت كتير
عارفين الاجازة دى كانت هتبقى اجمل ميت مرة لو كانت فى بركة السبع
المهم هوا الصحبة والناس اللى الواحد معاهم حاسين بيه وبيحبوه ولا لاء
والحمد لله كان معايه جميع اصحابى
لاول مرة مبقاش مضطر ارفع الموبايل فى العيد الصبح واتصل بحد
مش لاقى حد اتصل بيه
الكل معايه
وسبحان الله كل واحد فينا متخصص فى حاجة معينه
مكناش محتاجين اى حاجة وكلنا تمام تمام تمام
بجد اقدر اقول انى مبسوط
والاجازة دى يارب تكرمنا ونقدر نكررها تانى فى اقرب فرصة
والحمد لله خرج للنور ألبوم (( عرايس ماريوت )) لمودى راب
نصيحة تسمعه
والألبوم من اجمل الألبومات اللى سمعتها السنة دى فى مجال الراب أو من حيث الكلمات والالحان والتوزيع والأداء
عجبنى جدا جدا جدا وبانتظار ارائكم
جرب واسمع مودى راب هيفكرك بصلاح جاهين زى ما بيفكرنى
دلوقتى بقى متبقاش غير السلسة الفقرية ليتم إنتاجها بأسرع وقت ممكن
أنا بدأت والحمد لله فى ترتيب الأفكار وتجهيز كل حاجة
وبكره بليل بعون الله هتكون خرجت للحياة الحلقة الأولى
بإنتظار إقتراحاتكم وأرائكم
تحياتى لكم جميعا
شاب فقرى

هناك 21 تعليقًا:

*البت المشمشية *حلوة بس شقية * يقول...

مقولتليش ازاى انا السبب فى رجوعك التدوين

*البت المشمشية *حلوة بس شقية * يقول...

انا اول تعليق ولا ا يه

*البت المشمشية *حلوة بس شقية * يقول...

اى خدعه اول زيارة بأول تعليق

شاب فقرى يقول...

ياه
تلات تعليقات من المشمشية مرة واحدة

اممممممم
هقولك

بصى
انا كنت بدون زمان لما شفتك انتى بتدونى

وكنت معجب جدا بمدونتك

مش شوية

بجنون
لحد ما قفلت وعرفت انك نقلتى على مدونة ايجار جديد

دونت فترة باسم معين
وبطلت

ورجعت تانى لما كنت بزور مدونتك

قلت ارجع اكتب تانى وادون

يلا ادور على حد أصدعه

مينفعش أبقى مصدع لوحدى :D


كل سنة وانتى طيبة
ونورتى المدونة يا مشمشية :)

شاب فقرى

استنى بقى السلسلة الفقرية :P

*البت المشمشية *حلوة بس شقية * يقول...

هههههههههههه
طيب كويس جدا
بس مدونتك حلوة
محتاجة بقه شوية تظبيط كدة
وتزور ناس كتير عشان الناس تعرفك اكتر واكتر

وعايزين شغل جامد بقه

دموع القمر يقول...

تاااااانى تعليق بعد البت المشمشية

مش بطال

اروح اقرأ وارجع

دموع القمر يقول...

لووووووولوووووووولىىىىىى

حمد لله على سلامتك يارب كدا دايما

تكون نفسويتك متظبطة

بس ابقى شيل النووظارة

اللى وراها انا فااشل دى هههههههه

والبس واحدة بيضة كدا

علشان الفقر دا يمشى من عندك هههههه

وتبقى يوميات شاب فرحان مبسوط سعيد

تحياتى لك

di el2mr يقول...

حمد لله على السلامه
واكيد اليكس بتريح اعصاب اى حد وبذات لو معاك اصحابك
ويارب فعلا تكون رميت همومك فى البحر ورجعت فريش

اما بقى السلسله الفقريه
انا عن نفسى مستنيه اشوف ايه النظام
لان مظنش فى حد فقرى وحد مش فقرى
فى ظروف منها الحلو والوحش
والانسان بتصرفه بيعرف يغير الحلو لوحش والوحش لحلو

مش كدا ولا ايه

maha zein يقول...

يا حلولي يا ولاد

بقه اغيب سنتين اجي الاقي الناس بتصيف

ما اصل لو علي اسكندرية فمقدور عليها اني اروحها
و كل الامكانيات متوفرة و متظبطة
لكن بعيد عندك مش لاقية محرم ياخدني يوديني
لا اهل ولا اخوات ولا خيلان ولا حاجة خالص
كله بيتفسح ذي جنابك كده
ياخد الشلة و يطير
بقه تفتكر لو كنت طيب انت كده و انسان غلبان
مش كنت خدت اختك الغلبانة لو عندك اخت او بنت اخت الغلبانة لو عندك بنت اخت و كنت فسحتها

حرام عليكوا
كل واحد بيحب روحه و بس
منكم لله

ادعي عليكم يعني و لا علي اسكندرية

يلا كل سنة وانت طيب
و اجازة سعيدة

و خش جوة دلوقت بقه

نصيحة علي الهامش في الله
تتقبل نصيحتي
ونصيحتي دي ببلاش
ولا ارجو بها غير دعوة بنت حلال منك
و ازعل اوي لو طنشتها

وضعت لينك لاغاني راب و بتدعو الناس تسمعها
و بتشجع عليها

طب اقولك
ما اكيد انت عارف ان الغناء و الموسيقي حرام
ايون اجمع العلماء علي حرمانيتها بأدلة صحيحة
مفيش غير جدع ولا جدعين اللى خرجوا من الصف

ملناش دعوة بيهمدلوقت

الاهم

عارف
لو الواحد ظل يسمع هو اغاني هنقول عليه بيعمل معصية
وهنقول يا رب يهديه
و هو ذات نفسه هيكون حاسس بالضيقالنفسي

و ما شاء الله نفسيتكحلوة ومرتاحة يبقه ده من منن ربنا عليك
و شكلك ما شاء الله ملتزم بطاعة ربنا

يبقه نرج نقول انا في اعتقادي ان المعصية الى الانسان بيعملها لو وقع اذاها عليه هو بس
ممكن تكون هينة لان اثمها هينالوا هو بس
و يا عالم ربه يغفرله لعلمه بعبده ده و طيب نفسه

لكن لما الانسان يشرك غيره في حاجة فيها سيئات
و يدعوه ليها
بل ويسمعاله كمان سواء غصب او عن رضا
او يبعتهاله علي النت
ولا ياخدهاله علي فلاشة

تفتكر الاثر ايه
تفتكر دعا لايه

انا عارفة اني برغي وكلامي مش منسق
بس يمكن انت فهمت مرادي

اسمحلي ازود حتةكمان بما ان المايك بقه في في ايدي و بما اني بكلمك من ورا شاشة فمفيش خوف انك تاكلني علي بوزي ولا حاجة
ربنا يبارك في عمرك
وصدقني انا لولا حسيت ان طيب يعني منك كلامك كنتش هنصحك
لان في ناس ممكن تضايق

ديما كنت بفكر في موضوع السيئة الجارية

كنت بقول لنفسي ان الانسان ممكن يهادي حد بمصحف يكون المصحف ده صدقةجارية ليه ترفعه في درجات الجنة و تحميه من عذاب القبر
يبقه في قبره و شايف ان العذاب جاي
و فجاة يترفع العذاب
يسأل ليه حصل كده
يعرف ان المصحف ده مثلا صاحبه قرا فيه ايتين فياخد هو اجره و هو في قبره

ففكرت بردو في السيئة الجارية

ان الواحد يكون هادا واحد بشريط راب
او نقبه فيلم
ولا اغنية العنب مثلا

و الشخص يموت ويدخل قبره
و كل لما الجدع التاني يشغل الشريط يروح اخينا اللى في قبره يتوحوح و يتقلا


بخاف اوي ديما من مدوناتنا
وخاصة لما بشوف بعض المدونات اصحابها بيموتوا من غير ما يلحقوا يعدلوا حاجة عندهم في المدونة
و محدش بيعرف يعدلهمحاجة لان محدش عارف الباسوورد
و الناس تيجي تدخل عندهم يلاقوا مثلا اغنية شغاله في البلوج
او يلاقوا مثلا كلام يؤخذ عليهماو لينك عرايس مريونيت

حالهم ايهالعالم ال في قبورهم دول
بما انهم كانوا السبب في سماع المئات للاغاني او اي شىء تاني فيه اثم


النظرية اني بترجاك تقرأ في حرمانية الغناء و تشوف الادلة و تشوف فطرتك هتاخدك علي فين

وبترجاك لومقتنعتش حتى ان الغناء حرام
بترجاك تكون خواف اوي من الوقوع في سيئةجارية

انا خوافة اوي من الموضوع ده

الواحد و الله ممكن يتحمل عذابه لاثمه الشخصي
لكن انه يشيل اثم ناس غيره لانه كان السبب في اثمهم يبقه صعب


رغيت اوي انا
و زمانك عمال تقول انتي يا ست انتي اثم ايه وبتنجان الط ايه
انتي هتركبينا ذنوب

بس هقولك متكسفنيش و تقول كده
اصلي والله لقيتني مش متردده ان اقول الكلمتين التعبانين دول

يلا روح اعمل سيرش
و لو بخصوص اللاب توب و المدوم اللى جبتهولي من اسكندرية اللى كنت موصياك عليه
لو عاوز تبعته يبقه بسرعة بس عشان انا احتمال ادور علي محرم واسافر بركة السبع

بالله عليك يا عم اوعه تضرب ولا تشتم لا تبقه بركة سبع قصدي بركةدم

fL0weR-giRL يقول...

حمدا لله علي سلامتك

أنك دوما فى حاجة إلى أصدقاء حقيقيون
أن الحب لا يأنى إلا بالأنسة ومعرفة الآخر

بجد عندك حق جاااااااااااااااااامد في ديه



** تقبل مروري **

شاب فقرى يقول...

البنت المشمشية
كفايه زيارتك للمدونة حسستنى انها متظبطه جامد وانها تمام اوى
وانا والله بحاول اهوه على طول
بس ابقى تابعينى بس
انا بتابعك من زمان

شاب فقرى

شاب فقرى يقول...

دموع القمر
منورة والله
إيه رايك ؟
اهوه راجع بنضارة تانية

ان شاء الله فى يوم من الأيام هتلاقينى كتيت كدا بالظبط

نورتى المدونة يا دموع

شاب فقرى :$

شاب فقرى يقول...

ضى القمر
منورة المدونة
هوا فعلا عندك حق
انا مؤمن بمبدأ مهم جدا :
الناجحون فى الحياة ..أناس إن لم يجدوا الظروف ملائمة .. صنعوها

عشان كدا انا والحمد لله بغير ظروفى كل اما يبقى نفسى اعيش وابقى مبسوط

انما غير كدا معملش حاجة تانية

وان شاء الله السلسلة تعجبك

تحياتى

شاب فقرى

شاب فقرى يقول...

مها زين
منورة المدونة
انا هرد عليكى بما ينفع بعون الله
أنا بقالى سنين بطلت أسمع أغانى
لكن بقيت بسمع نوع تانى
المهم بالنسبة لى هوا الهدف من الاغنيه
بطلت اسمع اى اغانى رومانسية
بالنسبة لمودى راب فهوا مش مغنى زى ما الناس بتعتقد
لانه بالنسبة لى صوته وحش
والمزيكا بتاعته هوا اللى عاملها عالجهاز
يعنى مش معاه فرقة وعك
الراجل دا اقرب الى الفلسفة الحياتية والثورة والرغبة فى الخروج من الواقع السىء سواء بالتغيير أو بالتقبل للواقع

أنا عن نفسى بسمع مودى راب لاسباب
قلت بعضها
لو سمعتى الالبوم مش هتفهمى حاجة
لازم تسمعيه ييجى عشر مرات
وكمان إنما الأعمال بالنيات
وعارف إن النية الصالحة لا تصلح العمل الفاسد وإن النية الفاسدة تفسد العمل الصالح
بس ربنا اللى بيحاسب مش العلماء

كله على الله

بالنسبة للصيف واليكس

اصل هاخد اختى ازاى فى وسط مجموعة شباب

صدقينى والله ناوى اخدها فى مرة
بس لما يبقى فى فرصة بجد والظروف تكون فى صفنا هتخدهت ونسافر اليكس
انا كنت شاكك ان اختى قالت انا مين
بس الحمد لله لسه
كل سنة وانتى طيبة
ويارب دايما إلى الله أقرب


رايك عاجبنى جدا
وياريت تزورينا تانى
ولا بتنجان ولا حاجة
:)
شاب فقرى :)

شاب فقرى يقول...

fL0weR-giRL

منورانا

هى دى الحقيقة

انا اتعلمت حاجات هناك مش اتعلمتها فى اى حته فى الدنيا دى

ادتنى قوة لمدة سنة ونص بالميت

وكل سنة وانتى طيبة

شاب فقرى :)

Mo7ammed يقول...

الحمدلله عالسلامة

كويس انك غيرت جو
البوست كل حرف فيه بيقول انك فرحان ومبسوط

يارب دايما ان شاء الله

مستنيك تنورنى عندى

الحق ده موضوع مهيس اوى وهيعجبك ^_^

مواطن شووجااع يقول...

صدق اللي قال في السفر سبع فوائد

بس والله الحاجات اللي قلت إن إنت إتعلمتها قيم جميلة جداً والله

دمت بخير

شاب فقرى يقول...

محمد

ازيك يا جميل

زرت مدونتك وعجبنى اوى البوست دا

نورنى بليل بقى عشان تقرا السلسلة

شاب فقرى

شاب فقرى يقول...

مواطن شجاع

نورتنى

والله اتعلمت اكتر بكتير من اللى كتبته وفيه حالة من السعادة من ساعة ما رجعت لحد سنة ونص قدام

تحياتى

شاب فقرى

7akwena يقول...

يلا مستنين السلسله الفقريه

شاب فقرى يقول...

7akwena
نورتنى

ان شاء الله اليوم فى ميعادها :)


تحياتى ليك

شاب فقرى