الجمعة، 25 سبتمبر، 2009

السلسلة الفقرية ( الحلقة الأولى )

نيتدى منين الحكاية
مش عارف
بجد مش عارف
يعنى من اول ما حسيت انى شاب فقرى
ولا من اول ما بدأت الأحداث
خلينا نبدأ من الصفر
ولا بلاش الصفر لأن هتبقى كلها إحباطات
نبدأ نحكى إيه هى السلسلة الفقرية وبكتبها ليه ولمين وازاى وفيها ايه ؟
السلسلة الفقرية هى يوميات سابقة لشاب فقرى وتعتبر من وجهة نظرى السيرة الفقرية ( لو فى حد عايز يغنيها عالربابة )
والسلسلة الفقرية بعضها واقع والباقى منها حقيقة
السلسلة الفقرية غير مرتبه بأى شكل من الأشكال بمعنى أنها لا تتبع ترتيب تاريخى ولا ترتيب أحداث ولا ترتيب يومى ولا أى شىء
السلسلة الفقرية خرجت للوجود فجأة بدون سابق إنذار
حسيت إنى لازم أكتب مواقف معينه تحت عنوان كبير يحكى معظم ما مريت بيه
هحاول تكون البدايه بعيدة بعد تام عن الفقر ولذيذة ومرحة عشان مش تنكد عليكم من أول يوم
ونبدأ على بركة الله

تبدأ أحداث الحلقة الأولى من أعوام
من كتر الخنقة والفراغ فى الكلية والزهق وتجاهل الأصدقاء أو عدم وجودهم على الإطلاق
قررت فجأة إنى أخرج لوحدى بعد ما كنت على طول لازم أخرج مع صديق ولاحظوا صديق دى لانى هحكى عنها بعدين
المهم جهزت نفسى
لبست أحلى قميص روش ولذيذ عندى وبرفان وسرحت شعرى فى سابقة من نوعها ( مش لابس كاب )
المهم روقت نفسى ونزلت
نزلت وقررت أمشى وأروح فين
فى البدايه قررت إنى أتبع مواصلات الشعب الغلبات بمعنى لا عربيات ولا تاكسى ولا اى حاجة
عشان الوقت يمر مينفعش ابقى خارج واقوم راكب عربية او اوقف تاكس
ابقى عملت ايه ؟
المهم توكلت على الله ورسمت الخط
أول مكان : شارع 26 يوليو ( فؤاد سابقا ) بالعتبه
تانى مكان : شارع طلعت حرب بالعتبه
ثالت مكان : التحرير ( الميدان والكورنيش )
رابع مكان : مدينة نصر وجنينه مول
خامس مكان : لسه محددتش لحد دلوقتى

المهم نزلت من البيت وركبت المترو ربنا يحفظه
نزلت كانت الساعة سبعة تقريبا
وتخيل لما تبقى حاسس انك حبايه عنب وقعت فى الخلاط
ركبت المترو وياريتنى ما ركبت
طلعت من المترو فى محطة العتبه حاسس بحالة من القرف والعرق والتعب والارهاق
قلت مش مشكلة يابنى شوية وتخرج تتمشى فوق وتبقى الحالة تمام
قررت انى انسى المترو والقرف اللى فيه وخرجت اتمشى فى شارع فؤاد
إتمشيت لحد العبد كدا وانا بقول يارب أفوق وجسمى يهدى بعد الملحمة اللى كانت فى المترو
وصلت وانا لسه تعبان وزهقان
قلت هات آيس كريم ما انته خارج بقى وكمان مش معاك حد
دقيقة واحدة
وقبل ما امشى من قدام المحل
كان سايح على إيدى
قلت يابنى صدفة اكيد الجو حر أوى والآيس كريم بيسيح
حاولت بصعوبة أغسل غيدى وأورق واتظاهر بأن الموضوع عادى
لفيت على كل سينمات وسط البلد عشان ألاقى سينما واحدة فيها فيلم اجنبى
أبدا وحتى اللى لقيته كنت لسه منزله من النت من خلال ساعتين قبل ما انزل
قلت خلاص نطلع على جنينه مول او سيتى ستارز
بس هتركب منين يابنى
قلت خلاص إمشى طلعت حرب للآخر
مش عارف ليه حسيت برده ان الشارع زحمة وخنقة ولازم أولع فيه
بس مش لقيت له حل
المهم مشيت وامرى لله
خلصت طلعت حرب وطلعت على التحرير
أيوا التحرير مش تستغرب
وصلت وأنا تقريبا مش عارف أقف على رجلى قلت لازم اروح كفاية قرف انا ايه اللى خلانى أمشى كدا من غير عربية ولا حتى تاكس
بس قلت عادى يابنى اللى بيحصلك دا شىء طبيعى ولازم تكمل
كملت المشوار ووصلت قدام المجمع على ما لفيت لميدان عبد المنعم رياض واخدت ميكروباص
ايوا ميكروباص ما هوا المواصلة المحترمة الوحيدة اللى تلاقيها هناك
المهم ركبت والحمد لله
وبدأت مرحلة تانية من الخروجة
دايخ ةحاسس بالنعاس والنوم
مش تسألنى إزاى
ولكنى بجد نمت والحمد لله
صحيت لقيت نفسى فى مدينة نصر
قلت إشطة يا واد وصلنا أخيرا
كانت الساعة تقريبا حداشر الا ربع
بقى انا نازل اتمشى فى عباس العقاد
بس السينما يابنى باقى عليها ربع ساعة تقريبا
قلت فكك من الشارع
وجريت
وصدق عينيك
جريت فى عباس العقاد
كنت حاسس الناس هتقول حرامى من كتر ما كنت بجرى وكأن الشيطان نفسه بيجرى ورايا
وصلت جنينه مول والحمد لله فى خمس دقايق
مش عارف إزاى
ومش عارف ليه مصر على إنى مش أركب ولا حتى بسكلته توصلنى للمول
المهم وصلت دايخ اكتر
اول ما وصلت لقيت افيش فيلم اجنبى رهيب للست الفاضلة انجلينا جولى
قلت تمام
يبقى تاكل وتشرب حاجة ساقعة وتخش سينما
وياريتنى ما قررت
طلعت على اوحش محل ممكن تدخله فى حياتك فى جنينه مول
(( وصايه ))
لقيت فى طابور كبير ولازم تستنى لحد ما ربنا يكرمك وتوصل
دفعت وفضلت مستنى
الساعة لقيتها داخله على حداشر على ما استلمت الاوردر
مكملتش او مكلتش اساسا واخدت الحاجة الساقعة وانا عالسينما قالى مفيش غير فيلم عربى بسسس
روحت حجزت بهدوء ورميت الحاجة الساقعة قدام السينما فى اقرب صندوق زباله محترم
دخلت والحمد لله مع التكييف بدأ القولون العصبى يشتغل وحسيت ان معدتى فيها ألم رهيب
والحمد لله أنا بكره الدواء بطبعى
قلت عادى يا واد يا شاب
حاولت اضحك واندمج مع الفيلم مع انه فيلم فقرى جدا
بس قلت عادى
خلصت السينما وقلت الحمد لله اليوم خلص بالرغم من غباوة الفيلم وتفاهته
مش فاكر تقريبا خلصت الساعة اتنين ونص او تلاتة
مش فاكر والله
المهم العبد لله قال لازم أروح بقى
طلعت على برا واتمشيت شوية
مفيش قطة ماشية فى الشارع
قلت إشطة جدا والحمد لله الطريق فاضى ودى حاجة تريح اعصابى
شوية وركبت عربية بنت حلال ربنا يكرم السواق ويكمل اقساطها
المهم
ركبت من هنا والسواق تقريبا جاله تليفون من اخوه او ابوه
قال ايه راكب الميكروباص بتاعه فى امان الله وخبط واحد وفى المستشفى
مش عايز اقولكم السواق كان طاير
حسيت انه عدى ال 120 قلت يابنى عادى الراجل من حقه
شوية وصاحبنا دا خبط عربية ملاكى فى جنبها ودار حوار كله تهزيق بين السواق وصاحب العربية
وصاحبنا طار
شوية وقربت على رمسيس
والعربية ولعت
أيوا صدق عينيك
العربية ولعت والحمد لله
لقيتنا كلنا بنطنط من العربية وطالعين منها بسرعة الصاروخ
شوية ووقفنا برا
وبعدين السواق قال العربية تمام مفيهاش حاجة
قلت تمام
خلينا نروح الله يخرب بيت ال** ولا بلاش خلينا ساكتين الراجل فى ازمة
المهم
وصلت رمسيس
الحمد لله المعلم رمسيس مكانش هناك يطلع لى لسانه ويقولى ابقى قابلنى لو خرجت تانى
استنى لسه مخلصتش
لسه الحلقة اطول من كدا
ما هوا لازم اليوم يقفل
ركبت مع ناس اخر الليل
طبعا مكانش فى ظل تاكسى فى الطريق
قلت ماشى
شوية وركبت العربية اللى قلت عليها دلوقتى مع ركاب اخر الليل
زبون اخر الليل دا اوحش زبون
ركبت فى الكنبة اللى ورا السواق على طول وركب جمبى واحد طيب والنور بيشع من وشه
شوية والميكروباص طلع ومشينا
ببص لقيت فى خناقة هبت فى الميكروباص
عشان الاخ اللى وشه كل نور واللى زانقنى فى الشباك مش عايز يدفع ربع جنيه زيادة
والسواق وقف وحلف طلاق تلاتة لازم الراجل دا ينزل
إتدخلت أنا بكل طيبة ووداعة زى عادل ادهم كدا وبلهجة كلها تهديد إنى متبرع بالربع جنيه بس روحنا يا اسطة
الاسطى همد وركب والتباع ركب فى صمت
شوية والعربية قامت
وانا قلت مش دافع :D
هنستعبط وانا مالى
والحمد لله وصلنا بالسلامة لأرض الوطن
وصلت البيت
دخلت اودتى قدام جهازى والنت بتاعى وحلفت يمن بعظيم أبدا ما هكررها تانى إن شاء الله
ولكنى للأسف كررتها :D
تحياتى
على لقاء بالحلقة التانية :)

شاب فعلا فقرى

هناك 25 تعليقًا:

Mo7ammed يقول...

هههههههههه

ياعم كده لا فقرى ولا حاجة

طب مانا بيحصلى كده كتيير

اشطة ياعم دهانا هبقى ابعتلك كام موقف وحطهم فى حلقاتك وسلاسلك

Mo7ammed يقول...

وكمان اول تعليق

قشطة ياكبير

Mo7ammed يقول...

حلوة اوى جريت فى شارع عباس العقاد

ههههههه

Mo7ammed يقول...

مكملتش ليه فى مصطفى النحاس ياعم وكنت تحود على مكرم عبيد

وتجرى لأخره وتدخل سيتى ستارز


ههههههههههه

Mo7ammed يقول...

التعليق الخامس بقى علشان اموت وانا مرتاح

أبو العريف يقول...

ايه الفقر ده

دانت محظوظ

اولا محدش ينزل يتمشي لوحده

ثانيا

ايه الماسفات دي كلها

انت بتتمشي ولا بتعاقب نفسك


تقبل تحياتي

*البت المشمشية *حلوة بس شقية * يقول...

هههههههههههههههههههههههههه

لالاء
دة مش فقر ولا حاجة
ده سؤ حظ
ويمكن لما تكمل اكتشف انك فقرى فعلا

زى الهوا يقول...

ههههههههههه


ايه كل دا

انا قاعدة فى بيتى وعلى كرسيه , بس حسستنى انى باجرى , واتعصبتتتتتت

بس عادى دا الطبيعى , العربية رحمممممممممممممممممه بجد

ولما ما يبقاش فى عربية ابقى اقعد ف البيت ما تخرجششششششش

اومال انا ما بخرجش ليه :(

Pink Dreams يقول...

ههههههههههههههههههههههه

هههههههههههههههههههههههههههه

عشان تبقى تحرم تخرج من غير صديقك دا تانى

هههههههههههههههه

بس الظاهر كدا ان حظك هو اللى تمام

وش بيغمز

هههههههههههه

تحياتى

وبانتظار الحبقه التانيه

maha zein يقول...

ده ايه الملل ده
ده حاجة فقر صحيح
انا لو منككنت هاجرت من برة برة
معرفش جالك قلب منين تخرج تتمشي لوحدك
انا بحس الناس اللى كده انهم مش طبيعين
اه وربنا
اخرج بطولي كده و اتمشي مع نفسي و اعد اتفرج مع نفسي
ده انا مرة جربتها في الجامعة وقضيت يوم لنفسي
كنت هولع في نفسي
لو هنبدأ اليوميات كده فقر في فقر يبقه خلاص بقه
اصحا الصبح ملاقيش المدونة الفقر دي

بس عليي فكرة جامدة اوي ان الواحد يبقه مع نفسه كده
بحييك بشده وعنف علي الشجاعة

شاب فقرى يقول...

محمد

اهلا وسهلا بيك يارب تكون عجبتك الحلقة الاولى بالرغم من انها مش عجبانى
انا ليه مواقف كتير مع الخروج والله بس مش لاقى بصراحة اى موقف كويس يتقال
مفيش غير الفقر دا

وانته كنت كلمتنى قبل كدا عن الشهادات العالمية والحاجات اللى انا بدرسها

الحاجات دى ممكن تاخدها باى طريقة
المهم انجليزى كويس وتكون فاهم وحابب المجال

بس كدا

على فكرة الحاجات دى كلها مجرد خطوة بسيطة بس

كل سنة وانته طيب
ونورتنى بكل التعليقات دى

شاب فقرى

شاب فقرى يقول...

أبو العريف
بجد نورت المدونة
ونورتنى بتعليقك :)
والله مفيش اصدقاء ينفع اخرج معاهم هعمل ايه

فبخرج لوحدى وبتمشى كتير لانى بحب المشى وبحب ابقى لوحدى

كل سنة وانته طيب يا بو العريف

شاب فقرى

شاب فقرى يقول...

البت المشمشية *حلوة بس شقية *
ايه النور دا كله

بصى والله انا مش عارف يا مشمشية
تقريبا فقرى
بس فى حاجات ببقى احسن من كداوعلى النقيض تماما
مواقف بقابلها كل يوم فى شغلى

دعواتك معايا

وعايزك تنورى المدونة كل يوم كدا بتعليق ولا حاجة :)

شاب فقرى :$

شاب فقرى يقول...

زى الهوا
مينفعش اقعد مخرجش
بحس انى مدفون
وكمان مش بخرج باى عربية ولا تاكسى
امال خارج ليه عشان اتحبس واقعد مع نفسى
لازم اشوف ناس جديدة واشوف احوال الدنيا
انا بقعد كتير اوى لوحدى
ومش بلاقى لها حل غير انى اخرج

وكل سنة وانتى طيبة

شاب فقرى يقول...

Pink Dreams
نورتى السلسلة
والله ما فى حد اخرج معاه
مش عارف اقولك ايه
كل سنة وانتى طيبة :(

شاب فقرى :)

شاب فقرى يقول...

maha zein

من كتر ما كنت لوحدى اعتبرت ان دا الطبيعى وبقيت بستغرب لما بلاقى واحد مع صحابه ومبقتش بعترف بالتجمعات والعلاقات الانسانية

لازم الواحد يبقى بالجرأة الكافية إنه يبقى لوحده

كل سنة وانتى طيبة
شاب فقرى

ghorBty يقول...

كان الله في عونكـ

دا كدا يبقي كل الشعب فقري لان المشكله بتواجهنا كلنا زحمه المواصلات وطوابير في كل مكان

والله يهون علينا

بيطرية ومش بايدى يقول...

يانهار ابيض
ده انا راحت عليا نومة
قال ايه قولت هاروح ابات على باب المدونة غفلت شوية شوية ايه ده كتيييير
طاااايب
انا هاحجز ده وهاروح اقرا وارجع تانى

اوعى حد ياخد مكانى هاغسل وشى وافطر واخد حمام بس وارجع

شاب فقرى يقول...

غربتى

والله انا مش عارف موقفى من الزحمة

اوقات بتعصبنى

واوقات تانية بتخلينى هادى ورايق والله اعلم

تحياتى ونورتى المدونة
شاب فقرى

شاب فقرى يقول...

على فكرة انا مجهز البوست التانى وكنت هقفل التعليقات فى دا يا دكترة
بس قلت عيب لازم تردى الاول :P
نورتى المدونة

ان شاء الله تعجبك كمية الفقر اللى فى التدوينة دى :)

تحياتى

شاب فقرى

بيطرية ومش بايدى يقول...

لا بجد
ده يوم مايعلم به الا ربنا
انت لسه عايش يابنى قلبى عندك يا اخويا انا جربت الاحساس ده مرة قبل كده ضغطى على بعدها وكانت حالتى حالة وفضلت قاعدة ف البيت 3 ايام بس الصراحة عشان ماكدبش كنت اقل منك بكتيير

لا ومن ناحية الفقر فى الحلقة الاولى
كده تمام
الجرعة جامدة اخر حاجة

تحياتى ويارب يخلصك من الفقر ده
وتكون ذكريات بس

شاب فقرى يقول...

الواحد ياما استحمل يا دكترة

نورتى المدونة

خلاص كدا بيتهيالى أنزل بالبوست اللى مجهزه

مهم بالنسبة لى

تحياتى

شاب فقرى

بيطرية ومش بايدى يقول...

هاتنزله دلوقتى حالا
يعنى استنى
اصل انا نفسى اكون الاول مرة ف حياتى

ده انا ساعتها اعمل معاك احلى واجب

شاب فقرى يقول...

هوا فعلا نزل ناو

تحياتى :)

منورة المدونة بوجودك


تحبى تسمعى إيه ؟؟؟؟

أنزلك أى أغنيه فى المدونة ؟

شاب فقرى

7akwena يقول...

انا دايما متأخر كده
بس معلش اهبدنى الحلقه التانيه
وانت هتلاقينى فى الاول
بس يا مان دى حاجه عاديه
فى ايام الواحد مينفعش ينزل فيها من بيته بيبان ان اليوم ده قافش
انت المفروض بعد حوار المترو ده كنت تاخد تاكسى وتروح بيتك تصلى ركعتين شكر لله وتنام
يلا حصل خير
مستنى باقى الاجزاء