أميرة

 

عزيزتي أميرة 

( اسمها في البطاقة وشهادة الوفاة فعلا أميرة بجد دا مش تلميح  لاي حاجة) 

من يوم وفاتك وانا حاسس ان العالم توقف عن الدوران ، حاولت اكتب لك كتير ، معرفتش اكتبلك ولا عرفت احضر عزاء ولا جنازه ودا حرق قلبي فوق الوصف ، هوا احنا يا أميرة كبشر يعني بنحتاج closure ؟ هتفرق في ايه معلش يعني ما كسمها ، الموت بينهي كل شيء ، عمري ما كنت بحب اشتم قدامك وكنتي انتي سري الصغير البسيط اللي عمري ما حكيت عنه ، محبيتش في الحياة قدك ولا عمري قلبي دق لحد زي ما دق ليكي ، عارفه يمكن خسارتك اعظم خسارة في تاريخي كله والله ، مع اني مكنتش مبين كل الحب دا ليكي بس والله يا أميرة حبيتك اكتر من نفسي ومن الوجود والحياة نفسها ، وحاسس اني لساني مقطوع لاني مش بعرف احكي عنك ، حاسس بحرقة قلب ووجع متتخيليهاش ، احيانا بقول لنفسي متعملش ذنوب عشان تقدر تقابلها قدام عرش ربنا وتدخل معاها الجنة ، أنا عايز اقولك اني كنت هموت علي كلمة معينه منك ومسمعتهاش ، أنا حبيتك اوي يا مرمر يا سكرة قلبي ، يمكن اكتر من اي حد وصف محبته لواحدة ، بس غصب عني والله مقدرش احكي عنك مينفعش حد أصلا يعرف بوجودك ولا باللي حصل لاني للاسف مش هقدر اغير حاجة ، هغير ايه في الموت يا مرمر ؟ هقول ايه بس ؟  لو قعدت ابكي عليكي من اليوم لحد يوم الدين قلبي مش هيتداوي من جرح فراقك ولا من موتك ، عايز اقعد اكتبلك واوصفلك كتير اوي بس ايه لزمته والكلام مبيوصلش للميت ، اني حتي مقدرش ازور قبرك ولا اقدر حتي اسأل هو فين ؟ يمكن دا عقاب ابدّي من ربنا ليا؟ بس أنا كفرت عن كل ذنوبي يا أميرة 

كفرت عنها كلها والله يا أميرة كفرت عنها كلها ، حتي اول صفحة في الكتاب ، تخيلي ، يمكن ربنا لم يتقبل يا حبيبتي يمكن لسا عليا دين عشان اخسرك بالموت ومقدرش أتحرك واقف عاجز وانتي بتودعي الحياة ، عارفه اني لسه فاكر ريحتك وفاكر حتي الدفا بين ايديكي ، فاكر كل حاجة وقلبي مكسور وموجوع عليكي اوي ، اللعنة ، أنا كل مرة بسال فيها ربنا ليه الموت خدك مني بحس اني بكفر بحس اني بعمل ذنب مينفعش يتم غفرانه أبدا لكني بستغفر وبربط قلبي وبكمل ، كل إنجاز في الحياة بوصله بعد موتك بيساوي صفر ، كل كلمة حلوة وكل لمسة حلوة وكل حتي بوسة من بنت تانية متساويش عندي حاجة ، كله صفر ، كل الصحاب والبنات والمعارف والعط والمسخرة مش بتملي جوايا الفراغ اللي سيبتيه بموتك ، أنا حارق قلبي اوي اوي اني مش عارف اكتب عنك ولا اعيط عليكي بقوة ، حاسس قلبي مش راضي يحس بفراقك وبموتك للآخر ، لان لو دا حصل هموت في لحظة ، كسم اي خسارة واي حد يتحط جنبك في الميزان ، كفتك كسبانه دايما حتي بعد موتك ، عارفه بيقولوا ايه عن تاثير ان الحاجات الغير مكتمله بتشغل عقل الإنسان عن اي شيء اكتمل ؟ 

مقدرتش حتي أنطق يا أميرة 

سامحيني 

لكن اعرفي اني هقابلك قدام ربنا 

وهحضنك اوي وهطلب من ربنا المغفره بحق وجع خسارتك وموتك 

بحق قبرك اللي معرفوش 

بحق كل لمسة لمستهالك وابتسمت 

وبحق كل حاجة كانت جوايا ليكي 

بحق كل ضحك  بعتهالك 

بحق كل حاجة 

هقوله يسامحني 

ويخليني جنبك شوية ويجمعني بيكي في الجنة 

أميرة 

حبيبتي 

مفيش حاجة تكفيكي 

انتي حب الحياة اللي مش بيتكرر 

لكن للاسف الموت خطفك مني 

كنتي الدوا لكل حاجة

كنتي الأمان والحنية والراحة وكل حاجة

اكيد ربنا هيراضيني

تصدقي والله بتخيل ابتسامتك ليا 

وبقول لنفسي ربنا هيداوي جرح موتك 

عندي أمل ومش هيتحقق أنا عارف 

افتكري يا أميرة اني حبيتك اوي اكتر من نفسي والدنيا والحياة نفسها 

افتكري كل مره قلتلك فيها انك احلي من الدنيا كلها 

وافتكريني 

والي لقاء تحت عرش الرحمن 

احبك جدا 

كريم 

——

بكره هروح مشوار مهم

بكره هلعب بقواعد اللعبه زي ما كنت بقول وبنصح كل اللي حبيتهم

بكره يوم حلو أنا عارف 

وعندي ثقة انه هيجيب الحلو كله