خرجت علي خير الحمد لله
الحقيقة ولا شيء غير الحقيقةزي ما وعدت نفسي اول يوم بدات فيه تدوين هنا مش هكتب زي الفيس لكن هكتب الحقيقة لنفسي ولاولادي
ضد نصايح الطبيب اتاكدت من دا بعد التشخيص السريع اللي عملوه
اكتئاب حاد
للاسف كان لازم اخرج لاني اولا معنديش تامين ولا فلوس ادفع بيها كل المصاريف دي لان كانو عايزيني اقعد تلات او اربع اسابيع
غير اني مش هقدر اكل الاكل بتاعهم واشك في كل لقمة
غير ان اصلا الناس اللي هناك في شخصية واحدة كويسه ست ممرضة عندها خمسين سنة شبه امي طيبة وكويسة والباقي كله شداد جدا ومش عارف ليه
فاولا مش هقدر اتحمل تكاليف شهر علاج غير اني من اول بكره لازم ادفع التامين لنفسي لان نهاية العقد ومفيش اي امكانيات اني اقعد واجيب اكل وكمان مينفعش اخلي حد يدخل كل يوم البيت يجيبلي اكل او حاجات ومفيش حد اساسا فاضي
النهارده صحيت وعملت مقابله فيديو كول في وظيفة زي كل المقابلات اللي بعملها ومستني الرد وروحت البيت وشربت قهوه فالطريق وكمان اخدت شاور حلو ولبست لبس حلو وبحاول اتعايش مع نفسي واعمل جدول جديد لحياتي عشان مقعش في نوبة فزع جديدة تخليني اروح المستشفي تاني
طيعا مشيت ضد نصايحهم لكن كلمت دكتور في مصر وعملت جلسة و وصفلي دوا غير الادوية اللي كانوا بيدوهالي هناك
في وسط كل دا فكرت وعرفت ان فعلا كان عندها حق وياريتني عملت دا من زمان بس معادش ينفع الندم في شيء ودلوقتي ازم اتعالج وابقي كويس واقف علي رجليا
ليه خرجت تاني ؟
عشان لسه عندي ايمان بالناس والحياة عندي ايمان في كل اللي بحبهم وبعتت لاصحابي وقلتلهم كدا ورحبوا جدا بعد ما كانوا زعلانين مني وللاسف معادش ينفع ابعتلها اقولها دا بس خلاص دا قدري ونصيبي وانا راضي بيه ولازم اقف علي رجليا واتعالج
الدكتور بتاع مصر سمع مني وكان كويس جدا ووصفلي دوا والحمد لله الدوا موجود عند واحد صاحبي لسه مبلغني النهارده لما عرف اني هعمل سيشن قالي لو وصفلك الدوا دا موجود عندي منه علبتين وفعلا سبحان الله وصفلي نفس الدوا
انا كل اللي نفسي فيه اخرج من لوب ودايره الاوفر ثينكنج ، التغيير مش سهل والوقوف علي رجليا تاني مش سهل وحالتي النفسية والمادية والحياة العملية التقدم فيها مش سهل
انا واثق في ان ربنا هداني للطريق دا عشان ينقذني من نفسي لان نفسي هي اول عدو ليا
اتعلمت من اللي حصلي ان الناس او المصريين تحديدا في منهمناس اشرار كتير اوي هدفهم كله يولعوا الدنيا ويتفرجوا في صمت ومحدش همه علي مصلحتك غيرك ، وفي طبعا ناس كتير صادقين ، بس نقالين الكلام مفيش اسوأ منهم والاشرار في تفسير المواقف مفيش برده اسوا منهم
الحمد لله رب العالمين ان ربنا هداني للطريق دا
يومين المستشفي كانوا صعبين جدا وتقال جدا علي روحي والوقت مكانش بيعدي وقال ايه عشان ويك ايند مفيش نشاطات ولا علاج العلاج كله وسط الاسبوع ،
لما كلمتهم قالولي انت هتخرج ولو حبيت ترجع في اي وقت تعالي
انا مكسوف جدا والله وانا بحكي الكلام دا بس شجاعه الاعتراف بالغلط مهمة وشجاعه انك تصحح نفسك وحياتك مهمة ويمكن دا اهم تغيير لازم اعمله في حياتي اني اصلح نفسي واعالج نفسي من الاكتئاب والالم الرهيب والاوفر ثينكنج وابتدي اخد الحياة ببساطة
انا دلوقتي سعيد اني ماشي في طريق اني اقف علي رجليا واعيش ، سعيد اني هبتدي افكر بالعقل واهدي وابطل افكر في الحقوق ومين قال ومين عمل
النهارده لما قعدت مع نفسي اكتشفت ان لما انهرت من يومين كان السبب اني معنديش ثقة في نفسي ، تقريبا نفس الكلام اللي كنت بقوله لصحابي ، لما بيورطوا نفسهم او بيعملوا مشكلة
انا انسان يستاهل يعيش ويقدر نفسه الاول ويصحح مساره وياريتني عملت دا من زمان مكانش كل دا حصل
اكتئاب حاد وشديد بس لازم اقف علي رجليا وعارف اني هقع كتير والمشكلة ان مفيش سيستم دعم اساسا بس نا بلغت صحابي اني محتاجهم وعايزهم يدعموني ويكلموني ، مش عارف هيفرق في علاجي وتصحيح حالتي ولا لا
النهارده فكرت اني كاره الشقة جدا وعايز امشي منها بس للاسف مفيش بديل ، مش ععيز امشي عشان اي حاجة غير العيوب اللي فالشقة نفسها ، وجودي فيها خطر عليا وخطر قوي جدا لكن مفيش مشكلة هتعافي وان شاء الله هلاقي شغل قريب واجدد اقامه واقف علي رجليا ولو في ايدي امشي الصبح من الشقة والله لامشي لان فعليا بتهد روحي وتتعبني ودا هيخليني اخرج كتير واتمشي اكتر واغير البلاي ليست بتاعتي علي سبوتيفاي وهحط مواعيد جديدة للاكل والشرب وهواظب علي الدوا لحد ما ابقي كويس
النهارده عندي امل اني اعيش
بدون اي تفاصيل او اي حاجة غير اني اعيش وبس
دا اللي بسعي له ودا اللي عايزه ودا اللي بتمني ربنا يقويني عليه ويساعدني
عندي امل في كل الناس اللي بحبهم والناس اللي بتحبني برده وعندي امل ان ربنا يفتح باب رحمته ويقبلني ويخفف عني مرضي ويساعدني ابقي احسن وانا باخد بالاسباب
مش عارف هعمل ايه في حياتي الشخصية لان حرفيا معادش في حاجة تتعمل لاني عملت كل شيء عشان اصلح الدنيا وفشلت
وحياتي العملية والاقامه والشغل اديني اهوه بقدم في كل حته وبسعي بكل شكل وهبقي راضي ومبسوط بقرار وفقني لاي حاجة ومش زعلان
تقريبا كدا فضيت كل اللي جوايا
الحمد لله بجد خطوة جديدة بجد اني اتعالج وخطوة حلوه وتستاهل التسجيل في صفح المدونة
وحشتوني يا اولادي والله العظيم وحشتوني اوي لدرجة اني هحضنكم كل يوم وانتم قدامي وكل ساعه لما ربنا يكرمني وتيجوا والله وعمري ما هخليكم تتحطوا في موقف وحش او تتألموا بسببي وهعلمكم ازاي تواجهوا الم الدنيا وتبقوا اقويا
يارب يرزقني قريب ويسهل حياتي ويراضي قلبي ويرضيني
ليست هناك تعليقات:
إرسال تعليق