الاثنين، 26 أغسطس 2013

قفل ومفتاح ( النظرية )

لكل منا توأم روحه فى هذي الحياة 

***
منطقيات النظرية
***
يقال إن لكل إنسان له من يناسبه فى الدنيا دي ومن هوا مطابق له /لها بالضبط وإن مهما طال السعي بيلتقي الطرفين وبيتجمعوا مرة تانية برغم كل شىء وبرغم كل الظروف بيحتاج كل منهم الآخر وبيتمسك كل منهم بالآخر ( أحيانا ) وبيشتاق كل طرف للآخر 
ببساطة كدا هما الإتنين عاملين زي القفل ومفتاحه 
بعضنا بيتخلي عن نصه التاني لأي سبب كان ومن هنا بشوف أعظم الأخطاء فى الحياة وبيظهر كام سؤال :
-هوا مش اللى قدامك ميستاهلش التمسك ؟
- هوا الواحد كل يوم بيلاقي قصة حب حقيقة ؟؟؟
- الحاجات المهمة فى الحياة مبنعرفش إنها مهمة إلا لما تضيع ليه متبقاش ذكي وتقدر تقيم الطرف اللى قدامك ؟؟؟
- ياتري لو معاك الدنيا كلها وناقصك الشخص الوحيد اللى ينفع تعيش معاه كل حاجة حلوة  هل هتعرف تبقى سعيد ؟؟؟
- لو إنته مش قد المعركة وخايف أو جبان يا هلتري اللى قدامك مش يستاهل منك برده تتحدي نفسك عشان تقف علي رجليك وتتحدي نفسك وتبقى بالقوة الجبارة اللى تخليك تنتصر فى المعركة ؟؟؟
- عندك حياة واحدة بس يا هلتري بقى هتعيش تدور فيها علي شىء تافه ولا هتحاول توصل لشىء نفيس ويستحيل الوصول له ؟ يعني هتجري ورا المميزات ولا ورا الحاجات اللى مبتتكررش واللى الزمن بيثبت وجودها فى الطرف التاني ؟
- طبعا لكل شىء بتحصل عليه فى الدنيا تمن ولكل شىء تضحية , الموضوع بقى هنا راجع لك يا تري هل إنته تستحق تضحي عشان نفسك ( خد بالك إحنا هنا ملناش علاقة بالطرف التاني ) هل إنته تستاهل إنك تتعب عشانك وتتحدي كل حاجة عشان تبقى مبسوط وعايش مرتاح وحتي لو عيشتك زفت بس معاك اللى يهونها عليك , جاوبني بقى ؟
- هل أحلامك فى الحياة تستاهل إنك تحارب عشانها ؟
- هل هتقبل تبقى مجرد نسخة لمجرد محاولة إرضاء الآخر اللى مش مطلع بيك أو حاسس بيك وتضحي بالطرف التاني ؟؟


أسئلة كتير أوي بتحدد وبتقول أولوياتك إيه وإنته مين ؟

وبتحط الخيارين الأشهر فى التاريخ :Fight or Flight 
وبتقول ياتري تستاهل تعيش طبقا لفكرة القفل والمفتاح إن كل إنسان له توأم روح خاص بيه ومسيره هيجتمع بيه ولو قابله مش هيضيعه ولا إنته مجرد ... نسخة من النسخ اللى مالية البلد اللى بتقول كلام كتير وبتحلم بحاجات كتير بس وبتوعد بحاجات أكتر وبتكدب فى الوش ياتري إنته مين ؟؟؟



النظرية يتبعها التطبيق لاحقاً 

ربما اليوم :)
شاب فقري

الجملة اللى خطرت علي بالي إمبارح وكانت من الضرورة بالنسبة لي كتابتها عشان منساهاش : ليكن عزائك أني لم أكن خيبتك .

هناك تعليقان (2):

doaa elattar يقول...

ازيك أولاً :)

فكرتني برواية "بريدا" .. بفلسفة رفيق الروح .. وإننا لو تخلينا عن رفيق روحنا بأي شكل أو لأي سبب، ممكن الحياة تدينا فرصة تانية، وممكن .. يكون عقابنا "الوحدة" ..

بس عارف ..

"it is complicated"

لأن في أحيان التخلي مش بيكون منك .. وساعتها بتضطر تتخلى انت كمان
ـــــــــــ

مبروووووك بقى على التخرج وكدهون ^ــــــ^

شاب فقرى يقول...

الله يبارك فيكي يا دعاء

والله بيبقى نفسي ارد عالتعليقات

بس انا اصلا بقيت بكتب بالعافية للاسف :(

طاقتي منتهية وتعبان

فى مشاكل كتير

دعواتك

ودايما بتيجي فاهمة :)

منورة